CNI International News

ကိုလံဘို၊ ဇူလိုင် ၁၃

သီရိလင်္ကာတွင် ချွတ်ခြုံကျနေသော စီးပွားရေးကြောင့် ပြည်တွင်းကျန်းမာရေးစောင့်ရှောက်မှုစနစ်၌ ဆေးဝါးနှင့် အခြားအရေးပါသောအထောက်အပံ့များ ပြတ်တောက်ကုန်သဖြင့် ဖျားနာခြင်း (သို့မဟုတ်) မတော်တဆ ထိခိုက် ရှနာခြင်းများ မဖြစ်ပွားအောင် ဆင်ခြင်နေထိုင်ကြရန် သီရိလင်္ကာဆရာဝန်များက ပြည်သူများကို သတိပေးနှိုးဆော် နေရကြောင်း အေပီသတင်းအရ သိရသည်။

တောင်အာရှဒေသရှိ ကျွန်းနိုင်ငံဖြစ်သော သီရိလင်္ကာတွင် လောင်စာဆီနှင့်စားသောက်ကုန်စသည့် ပြည်တွင်း တင်သွင်းကုန်များအတွက် ပေးချေစရာ ငွေကြေးပြတ်လပ်နေခဲ့သလို ဆေးဝါးများလည်း ကုန်ခမ်းနေပြီဖြစ်သည်။

ထိုပြဿနာများသည် မကြာသေးမီ ဆယ်စုနှစ်များအတွင်း ကျန်းမာရေးစောင့်ရှောက်မှုကောင်းမွန်ခဲ့သော နိုင်ငံ၏ ပြည်သူ့ကျန်းမာရေးစနစ်ကို ခြိမ်းခြောက်နေပြီဖြစ်သည်။
အချို့ဆရာဝန်များက ထောက်ပံ့ရေးပစ္စည်း လှူဒါန်းနိုင်ရန် (သို့မဟုတ်) ၎င်းတို့ကို ဝယ်ယူနိုင်ရေး ရန်ပုံငွေရရှိရန် လူမှုကွန်ရက်မီဒီယာများကို အားကိုးနေကြသည်။ ထို့ပြင် ပြည်ပရောက် သီရိလင်္ကာနိုင်ငံသားများကိုလည်း မိခင် တိုင်းပြည်ကို ပြန်လှည့်ကြည့်ကြရန် တိုက်တွန်းထားကြသည်။

သီရိလင်္ကာနိုင်ငံ၊ ကိုလံဘိုမြို့ရှိ အစိုးရဆေးရုံတစ်ရုံတွင် ဆေးရုံဝန်ထမ်းတစ်ဦး ဆေးဗန်းများ သယ်ဆောင်နေစဉ်(ဓါတ်ပုံ-အေပီ)

တိုင်းပြည်ကို စီးပွားရေးနှင့် နိုင်ငံရေးအရ ပြိုလဲသွားစေသော လတ်တလောအကျပ်အတည်းကို အဆုံးသတ်သွား စေမည့် အရိပ်အယောင်လည်း မတွေ့ရသေးပေ။
ကင်ဆာဆေးရုံများတွင်လည်း ကုသရေးအတွက် မရှိမဖြစ်ဆေးဝါးများ ချွေတာသုံးစွဲရန် ကြိုးစားရုန်းကန်နေရ သည်။

“မဖျားကြပါနဲ့။ ဒဏ်ရာအနာတရ မရအောင် နေကြပါ။ မလိုအပ်ဘဲ ဆေးကုရဖို့၊ ဆေးရုံပြေးရဖို့ကိစ္စ ဘာမှ မဖြစ်အောင် ဆင်ခြင်ကြပါဗျာ။ အခုက အခြေအနေ တော်တော်ဆိုးနေလို့ပါ” ဟု သီရိလင်္ကာဆရာဝန်များ အသင်းဥက္ကဋ္ဌ ဆာမက်ဒါမာရက် (Samath Dharmaratne) က တိုက်တွန်းနှိုးဆော်ခဲ့သည်။

ကိုလံဘိုမြို့တော်ရှိ ကျောက်ကပ်ဆေးရုံကို ဦးစီးကြီးကြပ်‌နေသော ဒေါက်တာ ချားလ်စ်နူဂါဗီလာ (Charles Nugavela) က “၎င်း၏ဆေးရုံသည် အလှူရှင်များ၏ကျေးဇူးကြောင့် ဆက်လက်လည်ပတ်နေသော်လည်း ကျောက်ကပ်ဆေးကြောရသည့်အဆင့်ထိ ဆိုးဝါးနေသော လူနာများကိုသာ လက်ခံကုသပေးနိုင်တော့ကြောင်း” ပြောကြားခဲ့သည်။
ထို့ပြင် ခွဲစိတ်ခန်းသုံးပစ္စည်းများ ပြတ်တောက်နေ၍ ဆေးရုံတင်လူနာမှအပ အခြားအရေးပေါ်ခွဲစိတ်ကုသပေးမှု အားလုံးကို ရပ်ဆိုင်းလိုက်ရမည့်အရေးကို ဒေါက်တာ ချားလ်စ်နူဂါဗီလာက စိုးရိမ်နေသည်။

Source: AP

CNI International News

ဝါရှင်တန်၊ ဇူလိုင် ၁၃

ရုရှားနိုင်ငံအပေါ် ထောင်နှင့်ချီသော ဒဏ်ခတ်ပိတ်ဆို့မှုများ ချမှတ်ထားသည့် အမေရိကန်နှင့်၎င်း၏ မဟာမိတ်များသည် ယခု တိုက်ခိုက်နေသော ယူကရိန်းသို့ ရုရှားကျူးကျော်စစ်ကို ဟန့်တားနိုင်ရန်အတွက် ရုရှားရေနံဈေးကွက်ကို ကန့်သတ်ရန် ကြိုး ပမ်းနေသည်ဟု အေပီက ရေးသားသည်။

ထို့နောက် အစီအမံအသစ်များ ရေးဆွဲလျက်ရှိကြောင်း၊ ရေနံနှင့် လောင်စာဆီ ဈေးတက်ခြင်းကြောင့် ကမ္ဘာ့စီးပွားရေး ထိခိုက်စေနိုင်သည့် အဆင့်ကို ရပ်တန့်စေနိုင်ခဲ့ကြောင်း အေပီက ဆက်လက် ဖော်ပြထားသည်။

အခြားတဖက်တွင်လည်း ကရင်မလင်၏ အဓိက အားထားရာ မဏ္ဍိုင်ဖြစ်သည့် ရေနံသည် ပို့ကုန်ပိတ်ဆို့မှု၊ ဒဏ်ခတ်အရေး ယူများနှင့်အတူ ရုရှားဗဟိုဘဏ်၏ ပိုင်ဆိုင်မှုများ ဆိုင်းငံ့ခံထားရသော်လည်း ရုရှားစီးပွားရေးကို မယိမ်းမယိုင်အောင် ထိန်းနိုင် ခဲ့သည်။

အမေရိကန်၏ ဥရောပမဟာမိတ်များသည် ဘိုင်ဒန်အစိုးရ၏ ညွှန်ကြားချက်များကို လိုက်နာပြီး ရုရှားရေနံ သုံးစွဲခြင်းကို ယခု နှစ်ကုန်ပိုင်းတွင် အပြီးသတ်နိုင်မည့် ခြေလှမ်းများ လုပ်ဆောင်ရန် စီစဉ်ထားကြသည်။

ထိုသို့ အခင်းအကျင်းများသည် ယခုအခါ ကမ္ဘာတလွှား ရေနံ‌ရောင်းလိုအား ကျဆင်းစေပြီး ရေနံစိမ်း တစ်စည်လျှင် ဒေါ်လာ ၂၀၀ အထိ ဈေးတက်လာစေနိုင်ကြောင်း စီးပွားရေးပညာရှင်အချို့က ထောက်ပြနေကြသည်။

ပူတင် ကိုတွေ့ရစဉ် (GETTY IMAGES)

ထိုသို့ အန္တရာယ်များနေချိန်တွင် အမေရိကန်နှင့် ၎င်း၏ မဟာမိတ်များက ရုရှား၏ ရေနံဈေးနှုန်းကို ကန့်သတ် ထိန်းချုပ်ရန် အတွက် ဝယ်လက် အစုအဖွဲ့တစ်ခုကို တည်ထောင်ရန် ကြိုးပမ်းနေကြပြီး စက်မှုထိပ်သီး (G-7) ၇ နိုင်ငံမှ ခေါင်းဆောင်များက ထိုသို့ ကန့်သတ်ထိန်းချုပ်ရေးအတွက် အကြိုသဘောတူထားကြသည်။

ရိုးရှင်းစွာ ပြောရလျှင် ထိုအစီအစဉ်ကို လက်ခံကြသည့် နိုင်ငံများအနေဖြင့် ရေနံကို ဈေးကွက် ပေါက်ဈေးထက် သက်သာ သော နှုန်းထားဖြင့် ဝယ်ယူရန် လိုလိုလားလား သဘောတူ လက်ခံခဲ့ကြခြင်း ဖြစ်သည်။

ပြီးခဲ့သည့် ဖေဖော်ဝါရီလတွင် ယူကရိန်းကို ကျူးကျော်စစ်ကြောင့် ရုရှားသမ္မတ ပူတင်ကို ဆန့်ကျင်သည့် နိုင်ငံများ၌ စွမ်းအင် စရိတ် မြင့်မားလာခြင်းမှာ ၎င်းတို့နိုင်ငံ အသီးသီး၏ စီးပွားရေးကို ကျပ်တည်းစေခဲ့ပြီး ပြတ်လပ်မှုများ၏ ခြိမ်းခြောက်မှု ခံနေ ရပြီ ဖြစ်သည်။

ဗြိတိန်၊ ဂျာမနီနှင့် အီတလီရှိ ခေါင်းဆောင်များသည် ရုရှား၏ ရေနံနှင့် သဘာဝဓာတ်ငွေ့ကို ခပ်ကင်းကင်း နေကြည့်ကြရာမှ ဖြစ်ပေါ်လာသော စီးပွားရေး ပျက်သုဉ်းမှုနှင့် ရင်ဆိုင်နေကြရသည်။ တစ်ချိန်တည်းမှာပင် အမေရိကန်နိုင်ငံတွင် သမ္မတ ဂျိုးဘိုင်ဒန်သည် ကြားဖြတ်ရွေးကောက်ပွဲများ၌ ဒီမိုကရက်တစ်ပါတီဝင်များ အခွင့်အလမ်း ထိခိုက်စေသည့် ၎င်းအပေါ် လူထုထောက်ခံမှု အင်အား ကျဆင်းနေခဲ့သည်။

ထိုသို့ အခင်းအကျင်းများ၏ နောက်ကွယ်၌ ရှိနေသည့် အယူအဆများမှာ စားသုံးသူများအတွက် ဓာတ်ငွေ့နှင့်လောင်စာဆီ ဈေးလျှော့ ချပေးရေးနှင့် ယူကရိန်းစစ်ပွဲ ရပ်တန့်ရေး အကူအညီပေးကြဖို့ ဖြစ်သည်။

အမေရိကန် ဘဏ္ဍာရေးဝန်ကြီး ဂျာနက်ယဲလန်း (Janet Yellen) ဿည် လက်ရှိကာလ၌ အထက်ပါ အဆိုပြုချက်များအတွက် စည်းရုံးဆွဲဆောင်နိုင်ရန် အင်ဒို-ပစိဖိတ်ဒေသရှိ နိုင်ငံများသို့ ခရီးလှည့်လည်နေကြောင်း အေပီသတင်းအရ သိရသည်။

Source: AP

CNI International News

ကိုလံဘို၊ ဇူလိုင် ၁၃

သီရိလင်္ကာနိုင်ငံတွင် ၁၉၄၈ ခုနှစ်၊ လွတ်လပ်ရေးရပြီးနောက်ပိုင်း အဆိုးဆုံး စီးပွားရေးအကျပ်အတည်းကြောင့် ဆန္ဒပြမှုများဖြစ်ပေါ်ခဲ့၍ ရာထူးမှ နုတ်ထွက်ပေးမည်ဟု ကတိပြုခဲ့သော သမ္မတသည် ယခုအခါ တိုင်းပြည်မှ ထွက်ပြေးသွားပြီဖြစ်ကြောင်း အယ်လ်ဂျာဇီးယားသတင်းဌာနက ရေးသားဖော်ပြသည်။

သမ္မတ ရာဂျာပက်ဆာ၊ ၎င်း၏ဇနီးနှင့် သက်တော်စောင့်နှစ်ဦးတို့သည် သီရိလင်္ကာလေတပ်မှ လေယာဉ်ဖြင့် မော်လ်ဒိုက်နိုင်ငံ၏မြို့တော် မေးလ် (Male) သို့ ဦးတည်ပျံသန်းသွားကြောင်း ၎င်းလေတပ်က ဇူလိုင် ၁၃ ရက် (ယနေ့) အတည်ပြုသတင်းထုတ်ပြန်ခဲ့သည်။

“ဖွဲ့စည်းပုံအခြေခံဥပဒေပါ ပြဋ္ဌာန်းချက်တွေနဲ့ အစိုးရရဲ့တောင်းဆိုမှုအရ သမ္မတ၊ ဇနီးနဲ့ သူ့ရဲ့လုံခြုံရေးအရာရှိ နှစ်ဦးတို့ကို မော်လ်ဒိုက်နိုင်ငံထဲ ပျံသန်းပို့ဆောင်ပေးဖို့ သီရိလင်္ကာလေတပ်က ဒီကနေ့ အစောပိုင်းမှာ လေယာဉ် တစ်စင်း ပေးအပ်ခဲ့ပါတယ်” ဟု ၎င်းထုတ်ပြန်ချက်ထဲတွင် ဖော်ပြထားသည်။

အမည်မဖော်လိုသူ အစိုးရဘက်မှ လူဝင်မှုကြီးကြပ်ရေးအရာရှိများကို ကိုးကားလျက် သမ္မတ ထွက်ပြေးသွားသည့် သတင်းကို သတင်းဌာနများက ကနဦးတွင် ရေးသားခဲ့ကြသည်။

သောင်းနှင့်ချီသော ဆန္ဒပြသူများက ဇူလိုင် ၉ ရက်တွင် သမ္မတ၏အိမ်တော်ကို ဝင်ရောက်စီးနင်းခဲ့ကြရာ စည်းလုံး ညီညွတ်သည့်အစိုးရသစ်တစ်ရပ်အတွက် လမ်းဖွင့်ပေးရန် သမ္မတက မိမိရာထူးမှ ဇူလိုင် ၁၃ ရက် (ယနေ့) နုတ်ထွက်ပေးမည်ဟု ပြောကြားခဲ့ပြီးဖြစ်သည်။

 သီရိလင်္ကာနိုင်ငံမြို့တော် ကိုလံဘိုရှိ သမ္မတ ဂိုတာဘာယာ ရာဂျာပက်ဆာ၏နေအိမ်၌ ဆန္ဒပြသူများကို စနေနေ့က တွေ့ရစဉ်(ဓါတ်ပုံ-ရိုက်တာ)

လွန်ခဲ့သော ဆယ်စုနှစ်တစ်ခုကျော်က ၎င်းအစ်ကိုဖြစ်သူ မဟိန္ဒာ၏ အစိုးရအာဏာရှိနေစဉ်အတွင်း ထိုစဉ်က ပြည်တွင်းစစ်ကို ကာကွယ်ရေးဝန်ကြီးအဖြစ် အထောက်အကူပြုခဲ့ဖူးသော ရာဂျာပက်ဆာသည် လုံခြုံရေးနှင့် တည်ငြိမ်ရေးတို့အတွက် အလားအလာရှိသော သမ္မတအဖြစ် လူထုမျှော်လင့်လျက် ၂၀၁၉ ခုနှစ်တွင် ရွေးကောက် တင်မြှောက်ခံခဲ့ရသည်။

သို့သော် ၎င်း၏လက်ထက်အတွင်း အစိုးရ၏ အခွန်ဘဏ္ဍငွေလျော့နည်းလာခဲ့ပြီး ပြည်တွင်း၌ လောင်စာဆီ၊ စားသောက်ကုန်နှင့် ဆေးဝါးများ မတင်သွင်းနိုင်တော့ခြင်းကြောင့် ဆိုးဝါးသော အကျပ်အတည်းများ ရင်ဆိုင် လာရသည်။

သီရိလင်္ကာနိုင်ငံရေးကို နှစ်ပေါင်း ၂၀ နီးပါး လွှမ်းမိုးထားခဲ့သော သမ္မတ ဂိုတာဘာယာ ရာဂျာပက်ဆာ၏မိသားစုကို စီးပွားရေးဖြစ်ထွန်းရန် အရည်အချင်းမရှိဟု စွပ်စွဲခဲ့ကြပြီး ၎င်းတို့သည် လူထု၏သဘောထားနှင့် ဆန့်ကျင်ဘက် ဖြစ်နေကြောင်း ဝေဖန်ခဲ့ကြသည်။

ပြီးခဲ့သည့်မတ်လတွင် စတင်ခဲ့သော လူထုဆန္ဒပြပွဲများ ပြင်းထန်လာပြီးနောက် မေလတွင် အစ်ကိုဖြစ်သူ ဝန်ကြီးချုပ် မဟိန္ဒာရာဂျာပက်ဆာသည် ရာထူးမှ နုတ်ထွက်ပေးခဲ့ရသည်။

စစ်ရာဇဝတ်မှုများနှင့် အခြားလူ့အခွင့်အရေးချိုးဖောက်မှုများဖြင့် စွပ်စွဲခံထားရသည့် သမ္မတ ဂိုတာဘာယာ ရာဂျာပက်ဆာသည် ပုံမှန်ရုံးတက်စဉ် ဖမ်းဆီးခံရသည့်ဘေးမှ ကင်းလွတ်ခွင့်ရခဲ့ပြီးနောက် ၎င်းသည် ဇူလိုင် ၈ ရက် ကတည်းက အများပြည်သူမြင်ကွင်းမှ ပျောက်ဆုံးနေခဲ့သည်။

Source: Aljazeera

CNI International News

မော်စကို၊ ဇူလိုင် ၁၂

နစကဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ရုရှားနိုင်ငံ၊ မော်စကိုမြို့သို့ သွားရောက် ၍ ရုရှားအာကာသအေဂျင်စီမှ တာဝန်ရှိသူများနှင့် တွေ့ဆုံရန် စီစဉ်ထားကြောင်း ရုရှားသတင်းဌာန တစ်ခုဖြစ်သော RIA Nosvosti က ယနေ့ (ဇူလိုင် ၁၂ ရက်)တွင် ရေးသားခဲ့သည်ဟု အေအက်ဖ်ပီသတင်းကို ကိုးကားလျက် ဂျကာတာပို့စ်က ဖော်ပြ သည်။

ယခုအခါ ၎င်းသည် မော်စကိုမြို့သို့ ပုဂ္ဂလိက အလည်အပတ် (a private visit) အဖြစ် ရောက်ရှိနေပြီဟု မြန်မာနိုင်ငံရှိ ရုရှား သံရုံးက အင်တာဖက်စ် သတင်းဌာနသို့ ပြောကြားခဲ့သည်။

“မြန်မာ့ယဉ်ကျေးမှုဌာနဖွင့်ပွဲ တက်ရောက်ဖို့ ဖြစ်ပါတယ်” ဟု ၎င်းသံရုံးက ဆက်လက် ပြောကြားကြောင်း  အေအက်ဖ်ပီ သတင်းတွင် ဖော်ပြထားသည်။

မြန်မာ့တပ်မတော် ကာကွယ်ရေးဦးစီးချုပ်သည် မော်စကိုမြို့ရှိ အာကာသနှင့် နျူကလီးယား အေဂျင်စီများမှ တာဝန်ရှိသူများ နှင့် တွေ့ဆုံရန်လည်း စီစဉ်ထားကြောင်း ရုရှားမီဒီယာများက ရေးသားကြသည်။

ဗိုလ်ချုပ်မှူးကြီးမင်းအောင်လှိုင် ထီးတင်ပွဲ တင်ရောက်ခဲ့တဲ့ ရုရှားနိုင်ငံ၊ မော်စကိုမြို့ရှိ ရွှေစည်းခုံ စေတီတော် 

၎င်း၏ ခရီးစဉ်သတင်းသည် မြန်မာကို ဖိအားပေးရန် ပြောကြားခဲ့သည့် အမေရိကန်နိုင်ငံခြားရေးဝန်ကြီး အန်တိုနီဘလင်ကင် ၏ ထိုင်းခရီးစဉ်အပြီး ရက်ပိုင်းအတွင်း ထွက်ပေါ်လာခြင်း ဖြစ်သည်။

ယူကရိန်းကို ရုရှားကျူးကျော်မှုအပေါ် အမေရိကန်က ဦးစားပေး ဆန့်ကျင်နေသော်လည်း မြန်မာစစ်တပ်အပေါ် ပိတ်ဆို့ အရေးယူမှု မဟာဗျူဟာ လတ်တလော အကောင်အထည် မပေါ်သေးကြောင်း ဘလင်ကင်က ထိုင်းနိုင်ငံတွင် ပြောကြားခဲ့ သည်။

“အပြုသဘောဆောင်တဲ့ လှုပ်ရှားမှုတွေ မတွေ့ရဘဲ ဆန့်ကျင်ဘက်အနေနဲ့ မြန်မာပြည်သူကို ဆက်ဖိနှိပ်နေတာကိုပဲ တွေ့ရတဲ့ အတွက် ကံမကောင်း အကြောင်းမလှဘူးလို့ပဲ ပြောရမှာပါ” ဟု ဘလင်ကင်က မြန်မာနိုင်ငံ၏ ယခင်အမည်ဖြစ်သော Burma ဟု သုံးနှုန်းလျက် သတင်းထောက်များကို ပြောကြားခဲ့သည်။

“ကျနော်တို့ တတ်နိုင်သမျှ နည်းလမ်းတွေ ဆက်ပြီး ရှာဖွေသွားမှာ ဖြစ်ပါတယ်။ တခြားနိုင်ငံတွေကလည်း သူတို့ကို ဒီမိုကရေစီ လမ်းကြောင်းပေါ် ပြန်ရောက်ဖို့ ထိထိရောက်ရောက် ဖိအားပေးနိုင်ပါတယ်” ဟု ၎င်းက ဆက်လက် ပြောကြားခဲ့သည်။

၂၀၂၁ ခုနှစ်၊ ဧပြီလတွင် နစကနှင့် သဘောတူညီမှု အချက် ၅ ချက် ရရှိခဲ့သော အရှေ့တောင်အာရှနိုင်ငံများအသင်း (အာဆီယံ) အနေဖြင့် ၎င်း၏ ကတိကဝတ်များနှင့်ပတ်သက်၍ နစကကို တာဝန်ခံရန် ဘလင်ကင်က တောင်းဆိုခဲ့သည်။

Source: The Jakarta Post

CNI International News

ဝါရှင်တန်၊ ဇူလိုင် ၁၁

အမေရိကန်သမ္မတ ဂျိုးဘိုင်ဒန်၏ အသက်အရွယ်သည် အိမ်ဖြူတော်အတွက် ပြဿနာတစ်ရပ် ဖြစ်လာနေကြောင်း အမည် မဖော်လိုသူ အမေရိကန်အရာရှိများကို ကိုးကားလျက် နယူးယောက်တိုင်းမ် သတင်းစာက ဇူလိုင် ၉ ရက်တွင် ရေးသားခဲ့ကြောင်း အာရ်တီသတင်းဝက်ဘ်ဆိုက်မှ ဖော်ပြသည်။

သမ္မတသည် ယခင်ကဲ့သို့ မဟုတ်ကြောင်း အဆိုပါအရာရှိများက ပြောကြားခဲ့ပြီး အပြုအမူများကို ၎င်းတို့ တိတ်တဆိတ် စောင့်ကြည့်ခဲ့ကြသည်ဟု နယူးယောက်တိုင်းမ်က ဆက်လက်ရေးသားသည်။

သမ္မတ၏ အသက်အရွယ်သည် ၎င်းတာဝန်ဝတ္တရားအပေါ် သက်ရောက်မှု ရှိနေပြီဖြစ်ကြောင်း၊ ၎င်း၏ နိုင်ငံခြားခရီးစဉ် အချိန် ဇယားကို အိမ်ဖြူတော်အား အပြောင်းအလဲလုပ်ရန် ညွှန်ကြားခဲ့ကြောင်း အဆိုပါအရာရှိများက ဖွင့်ချခဲ့ကြသည်။

ဘိုင်ဒန်သည် လာမည့်သီတင်းပတ်၌ အရှေ့အလယ်ပိုင်းဒေသသို့ ၄ ရက်ကြာ ခရီးစဉ် စတင်တော့မည်ဟု သိရသည်။ အဆိုပါ ခရီးစဉ်သည် ယခင်လ၌ ဘိုင်ဒန်၏ ဥရောပခရီးစဉ် အပြီးတွင် ဆက်လက် သွားရောက်မည်ဟု ကနဦးတုန်းက အိမ်ဖြူတော် အရာရှိများ မျှော်လင့်ခဲ့ကြသည်။

သမ္မတသည် လက်ရှိရာထူး တာဝန်ထမ်းဆောင်စဉ် တလျှောက် ဉာဏ်ရည်ဉာဏ်သွေး စေ့စပ်သေချာခဲ့ကြောင်း အမေရိကန် အကြီးတန်းအရာရှိဟောင်းများနှင့် လက်ရှိအရာရှိများကတော့ အခိုင်အမာ ပြောကြားလျက် ရှိနေသည်။

အစည်းအဝေးများ၌ သမ္မတက ပိရိသေသပ်သော မေးခွန်းများ မေးနေစဉ် ၎င်း၏လက်ထောက်များကို အချက်အလက် အမျိုးမျိုး ဆွေးနွေးစေပြီး မိန့်ခွန်းများကို နောက်ဆုံးမိနစ် ပြောကြားချက်အထိ ပြန်လည် ကူးရေးစေကြောင်း နယူးယောက်တိုင်းမ်၏ အိမ်ဖြူတော်သတင်းထောက် ပီတာဘေကာ (Peter Baker) က သတင်းရေးသားထားသည်။

ဘိုင်ဒန် ဆွေးနွေးနေစဉ်

ထိုသို့ဖြစ်သည့်တိုင်အောင် အမေရိကန်အရာရှိများက ပေါ်ပေါက်လာနိုင်ခြေရှိသော ပြဿနာများအတွက် ၎င်းကို တိတ်တဆိတ် စောင့်ကြည့်နေကြောင်း ဝန်ခံခဲ့ကြသည်။

စိုးရိမ်စရာ ကောင်းသော အပြုအမူများထဲတွင် သမ္မတသည် ဝါယာကြိုးကို ခလုတ်တိုက်မိခြင်း (သို့မဟုတ်) အများအရှေ့ ပြောကြားသော မိန့်ခွန်းများ၌ စကားလုံး လွဲချော်ခြင်း တို့ကိုလည်း ပါဝင်သည်။

“မိန့်ခွန်းပြီးတဲ့အထိ အဆင်ပြေပါ့ မလားဆိုပြီး ရင်တမမ ဖြစ်နေရတယ်” ဟု အိမ်ဖြူတော် အရာရှိများ၏ ပြောကြားချက်ကို နယူးယောက်တိုင်းမ် သတင်းတွင် ဖော်ပြထားသည်။

အစောပိုင်းက ဘိုင်ဒန်သည် နှစ်နှစ်အတွင်း ၎င်း၏သမ္မတရာထူး ဒုတိယသက်တမ်းအတွက် အရွေးခံရန် ရည်ရွယ်ထားကြောင်း အကြိမ်ကြိမ် ပြောကြားခဲ့ဖူးသည်။ ပြီးခဲ့သည့် ဇွန်လတွင်လည်း “မိမိသည် ၂၀၂၄ ခုနှစ်အတွက် တာဝန်ဆက်လက် ထမ်းဆောင်ရန်” အစီအစဉ်ရှိခဲ့ကြောင်း အတည်ပြုခဲ့သည်။

ထိုသို့ အလားအလာများသည် အမေရိကန် အစိုးရအရာရှိဟောင်းများနှင့် သက်ကြီးရွယ်အိုဆိုင်ရာ အထူးကု ဆရာဝန်အချို့က စိုးရိမ်ကြောင်း ထုတ်ဖော်ပြောဆိုရန် စေ့ဆော်ပေးခဲ့သည်။

ရစ်ချက်နစ်ကဆင်၊ ဂဲရက်ဖို့ဒ်၊ ရော်နယ်ရေဂင်နှင့် ဘီလ်ကလင်တန် စသည့် သမ္မတ ၄ ဦး လက်ထက်တို့တွင် တာဝန် ထမ်း ဆောင်ခဲ့ဖူးသူ အမေရိကန်အရာရှိဟောင်း ဒေးဗစ်ဂါဂျန်က ဘိုင်ဒန်၏ အစီအစဉ်မှာ မသင့်လျော်ဟု မှတ်ချက်ချခဲ့သည်။

Soure: အာရ်တီသတင်းဌာန

CNI International News

ဘန်ကောက်၊ ဇူလိုင် ၁၁

လာမည့်နှစ်တွင် နှစ်နိုင်ငံဆက်ဆံရေး နှစ်ပေါင်း ၁၉၀ ပြည့် အထိမ်းအမှတ်အဖြစ် နှစ်ဘက်စလုံးက ပြင်ဆင်နေကြစဉ်အတွင်း ပူးပေါင်းဆောင်ရွက်မှု အားကောင်းစေရန်နှင့် ၎င်းတို့ကြား မိတ်ဖက် ဆက်ဆံရေး မြှင့်တင်ရန် ထိုင်းနှင့်အမေရိကန်တို့ ဇူလိုင် ၁၀ ရက်တွင် သဘောတူလက်ခံခဲ့ကြကြောင်း ဘန်ကောက်ပို့စ်သတင်းအရ သိရသည်။

ဇူလိုင် ၁၀ ရက်၌ ထိုင်းဝန်ကြီးချုပ် ပရာယွတ်ချန်အိုချာနှင့် အမေရိကန် နိုင်ငံခြားရေးဝန်ကြီး အန်တိုနီဘလင်ကင်တို့ တွေ့ဆုံ စဉ်အတွင်း ကုန်သွယ်ရေးနှင့် ရင်းနှီးမြှုပ်နှံမှု၊ ရာသီဥတု ပြောင်းလဲလာမှု၊ သန့်ရှင်းသော စွမ်းအင်၊ လူကုန်ကူးမှု၊ ဒေသတွင်း ပံ့ပိုးကူညီမှုနှင့် ပူးပေါင်းဆောင်ရွက်ရေးတို့ကို ဦးစားပေး ဆွေးနွေးခဲ့ကြသည်။

ဘန်ကောက်မြို့သို့ ဘလင်ကင်သည် တရားဝင် ခရီးစဉ်အဖြစ် ရောက်ရှိခဲ့ပြီးနောက် ဝန်ကြီးချုပ် ဗိုလ်ချုပ်ကြီး ပရာယွတ်ကို အစိုးရအိမ်တော်သို့ သွားရောက်၍ ဂါရဝပြု နှုတ်ဆက်ခဲ့သည်။

မစ္စတာဘလင်ကင်နှင့် ထိုင်းနိုင်ငံခြားရေးဝန်ကြီး ဒွန်ပရာမူဒဝီနိုင်းတို့သည် နှစ်နိုင်ငံ ဆက်ဆံရေး သဘောတူညီချက် နှစ်ရပ် ဖြစ်သည့် ‘ ထိုင်း-အမေရိကန် မဟာဗျူဟာမြောက် မဟာမိတ်နှင့်မိတ်ဖက် ဆက်ဆံရေးဆိုင်ရာ ကြေညာချက်’ နှင့် ‘ရေရှည် တည်တံ့မည့် ထောက်ပံ့ ပို့ဆောင်ရေး ကွင်းဆက်များ မြှင့်တင်ရေး နားလည်မှု စာချွန်လွှာ” တို့ကို အသီးသီး လက်မှတ် ရေးထိုး ခဲ့ကြသည်။

ဘလင်ကင်နဲ့ ထိုင်းနိုင်ငံခြားရေးဝန်ကြီး ဒွန်ပရာမူဒဝီနိုင်းတို့ စာချုပ်လက်မှတ်ရေးထိုးနေစဉ် 

အထက်ပါ အစီအစဉ်များအပြီး သတင်းစာ ရှင်းလင်းပွဲ ကျင်းပခဲ့ရာ ထိုင်းအစိုးရ ပြောရေးဆိုခွင့်ရှိသူ သနက်ကွန်ဝမ်ဘောင် ကောင်ချာနာက “နှစ်နိုင်ငံ ဆက်ဆံရေးအတွက် ဗိုလ်ချုပ်ကြီးပရာယွတ် ဝမ်းမြောက်ပါကြောင်း၊ လာမည့်နှစ်တွင် မိမိတို့ သံတမန် ဆက်ဆံရေး နှစ်ပေါင်း ၁၉၀ တိုင်ပြီဖြစ်ကြောင်း” ပြောကြားခဲ့သည်။

ယခု နှစ်နိုင်ငံ ပူးတွဲကြေညာချက် လက်မှတ်ရေးထိုးခြင်းကို ပရာယွတ်က ကြိုဆိုပါကြောင်း၊ တူညီသော ရည်မှန်းချက်များ အောင်မြင်စေရန် နိုင်ငံအချင်းချင်း ပိုမိုနီးကပ်စွာ လုပ်ဆောင် သွားကြမည်ဖြစ်ကြောင်း ၎င်းက ဆက်လက် ပြောကြားခဲ့သည်။

ဝန်ကြီးချုပ်က အမေရိကန်သမ္မတ ဂျိုးဘိုင်ဒန်ထံသို့ ဆုတောင်းမေတ္တာ ပို့သပါကြောင်း၊ လာမည့် မေလတွင် ဝါရှင်တန်ဒီစီ၌ ကျင်းပမည့် အမေရိကန်-အာဆီယံ အထူးထိပ်သီး အစည်းအဝေးသို့ ဖိတ်ကြားမှုအတွက် ကျေးဇူးတင်ရှိပါကြောင်း ထိုင်းအစိုးရ ပြောရေးဆိုခွင့်ရှိသူက ထပ်လောင်း ပြောကြားခဲ့သည်။

ထို့ပြင် လာမည့် နိုဝင်ဘာလ၌ ဘန်ကောက်မြို့တွင် ကျင်းပမည့် အာရှ-ပစိဖိတ် စီးပွားရေး ပူးပေါင်းဆောင်ရွက်မှု (APEC) ထိပ်သီး အစည်းအဝေးသို့ မစ္စတာဘိုင်ဒန်ကို ဧည့်ခံကြိုဆိုနိုင်ရန် မိမိတို့ ဝန်ကြီးချုပ် အနေဖြင့် မျှော်လင့်ထားကြောင်း ၎င်းက ဆက်လက် ပြောကြားခဲ့သည်။

တစ်ချိန်တည်းမှာပင် ထိုင်း-အမေရိကန် မဟာမိတ်ဖွဲ့ခြင်းကို ထပ်လောင်း အတည်ပြုပါကြောင်း မစ္စတာဘလင်ကင်က မိမိတို့ ဝန်ကြီးချုပ်ကို ပြောကြားခဲ့သည်ဟု ထိုင်းအစိုးရ ပြောရေးဆိုခွင့်ရှိသူက သတင်းထောက်များကို ရှင်းပြခဲ့သည်။

Source: Bangkok Post

CNI International News

တိုကျို၊ ဇူလိုင် ၁၁

ဂျပန်နိုင်ငံတွင် ဝန်ကြီးချုပ်ဟောင်း ရှင်ဇိုအာဘေး လုပ်ကြံခံရပြီးနောက် ဇူလိုင် ၁၀ ရက်နေ့ ကျင်းပသော လွှတ်တော် ရွေးကောက်ပွဲတွင် လက်ရှိ အစိုးရအဖွဲ့ဝင်များနှင့် ညွန့်ပေါင်းမဟာမိတ်များ အကြီးအကျယ် အနိုင်ရသွားခဲ့ကြောင်း အေပီ သတင်းအရ သိရသည်။

လစ်ဘရယ်ဒီမိုကရက်တစ်ပါတီနှင့် ၎င်း၏ ညွန့်ပေါင်းမဟာမိတ် ကိုမီတို (Komeito) တို့သည် အထက်လွှတ်တော်တွင် စုစုပေါင်း ၂၄၈ နေရာရှိသည့်အနက် အမတ်ဦးရေ ထက်ဝက်မျှဖြစ်သော ၁၄၆ နေရာအထိ တိုးမြှင့် ရရှိလာခဲ့သည်။

ထိုရလဒ်နှင့်အတူ လက်ရှိဝန်ကြီးချုပ် ဖူမီယိုကီရှီဒါသည် ၂၀၂၅ ခုနှစ်၌ စီစဉ်ထားသော ရွေးကောက်အထိ အနှောင့်အယှက် ကင်းကင်းဖြင့် ဆက်လက် အုပ်ချုပ်သွားနိုင်တော့မည် ဖြစ်သည်။

ကီရှီဒါသည် အမျိုးသားလုံခြုံရေး ကဲ့သို့သော ရေရှည်မူဝါဒများကို ချမှတ်နိုင်မည်ဖြစ်ပြီး ၎င်း လက်မှတ် ရေးထိုးထားသော် လည်း မသေချာ မရေရာသေးသော အရင်းရှင်စနစ်သစ် စီးပွားရေးမူဝါဒကလည်း အခြားတဖက်တွင် ရှိနေသေးသည်။

ဂျပန်ပြည်သူများ ရှင်ဇိုအာဘေး လုပ်ကြံခံရမှု ၀မ်းနည်းနေစဉ် (Reuters)

ထို့ပြင် ၎င်းပါတီ၏ ကြာမြင့်စွာ တောင့်တခဲ့သော ရည်မှန်းချက် တစ်ရပ်မှာ ဒုတိယကမ္ဘာစစ်ပြီးခေတ် ငြိမ်းချမ်းရေး ဖော်ဆောင်ရေးကို ဦးတည်ရေးဆွဲခဲ့သော ဖွဲ့စည်းပုံအခြေခံဥပဒေကို ပြင်ဆင်ရန်ဖြစ်သည်။

အဆိုပါ ဖွဲ့စည်းပုံကို စစ်ပြီးခေတ်၌ အမေရိကန်နှင့် ပူးပေါင်း ရေးဆွဲခဲ့ရခြင်း ဖြစ်သည်။ အမေရိကန်နှင့် ရယူခဲ့သော ပဋိညာဉ် သည် ယနေ့ခေတ် ဂျပန်အတွက် ပြုပြင်ပြောင်းလဲရေး အဆိုပြုချက်ထဲ၌ ဖြစ်နိုင်ခြေတစ်ခု ဖြစ်သည်။

ယခုအခါ အုပ်ချုပ်ရေး တာဝန်ယူထားသော အစိုးရအဖွဲ့အနေဖြင့် လွှတ်တော်ထဲတွင် ဖွဲ့စည်းပုံပြင်ဆင်ချက် အဆိုပြုရန် လိုအပ်သော အမတ်နေရာ သုံးပုံနှစ်ပုံအထိ အများစု ရရှိခဲ့သဖြင့် လက်တွေ့ကျသော ဖြစ်နိုင်ခြေအတွက် လမ်းပွင့်သွားခဲ့သည်။

အာဘေးကို လက်လွတ် ဆုံးရှုံးလိုက်ရပြီးနောက် ၎င်းမရှိတော့သည့် ပါတီအတွင်း စည်းလုံးရေး ခက်ခက်ခဲခဲ လုပ်ဆောင်နေရ သဖြင့် ယခုကဲ့သို့ လွှတ်တော်အမတ်နေရာ အများစု အောင်ပွဲရခဲ့သည့်တိုင်အောင် လက်ရှိဝန်ကြီးချုပ် ကီရှီဒါသည် ပြုံးပန်းဆင် နိုင်ခြင်း မရှိပေ။

ဂျပန်ပြည်သူများ ရွေးကောက်ပွဲ မဲထည့်နေစဉ် (AP)

ပါတီစည်းလုံးရေးသည် အခြားကိစ္စများထက် ပိုအရေးကြီးကြောင်း ဇူလိုင် ၁၀ ရက် နှောင်းပိုင်း အင်တာဗျူးများထဲတွင် ကီရှီဒါ က ထပ်တလဲလဲ ပြောကြားခဲ့သည်။

Covid-19 ကို တုံ့ပြန် ချေဖျက်နေရခြင်း၊ ယူကရိန်းသို့ ရုရှားကျူးကျော်မှုနှင့် ဈေးနှုန်းများ မြင့်တက်လာမှုတို့သည် မိမိ၏ ဦးစားပေး ကိစ္စရပ်များဖြစ်သည်ဟု ကီရှီဒါက ပြောကြားခဲ့ပြီးလည်း ဖြစ်သည်။

ဂျပန်နိုင်ငံ၏ အမျိုးသားလုံခြုံရေးကို အားဖြည့်သွားမည့်အပြင် ဖွဲ့စည်းပုံအခြေခံဥပဒေ ပြင်ဆင်ရေးကို စဉ်ဆက်မပြတ် တွန်းအားပေး လုပ်ဆောင်သွားမည်ဟု ၎င်းက ဆက်လက် ပြောကြားခဲ့သည်။

Source: AP

CNI International News

ကိုလံဘို၊ ဇူလိုင် ၁၁

သီရိလင်္ကာနိုင်ငံတွင် ထောင်နှင့်ချီသော ဆန္ဒပြသူများက သမ္မတနှင့်ဝန်ကြီးချုပ်တို့၏နေအိမ်အသီးသီးကို ဝင်ရောက်စီးနင်းကြပြီးနောက် သမ္မတ ဂိုတာဘာယာရာဂျာပက်ဆာအနေဖြင့် ရာထူးမှ နုတ်ထွက်ပေးတော့မည် ဖြစ်ကြောင်း ဝန်ကြီးချုပ်ရုံးက ဇူလိုင် ၁၁ ရက် (ယနေ့) အတည်ပြုကြေညာခဲ့သည်ဟု ရိုက်တာသတင်းအရ သိရ သည်။

စီးပွားရေးအကျပ်အတည်းကြောင့် ဇူလိုင် ၉ ရက်တွင် ဆန္ဒပြမှုများအကြီးအကျယ်ဖြစ်ပွားခဲ့သည့်နောက်ပိုင်း ရာဂျာပက်ဆာသည် သမ္မတရာထူးမှ ဇူလိုင် ၁၃ ရက်၌ နုတ်ထွက်တော့မည်ဖြစ်ကြောင်း သီရိလင်္ကာ လွှတ်တော် ဥက္ကဋ္ဌကလည်း ပြောကြားခဲ့သည်။ သို့သော် ယင်းသို့နုတ်ထွက်မည့်အကြောင်း ရာဂျာပက်ဆာထံမှ တိုက်ရိုက် ပြောကြားသည့် စကားသံတော့ မကြားရပေ။

ပါတီအားလုံးပါဝင်သည့် အစိုးရတစ်ရပ် တာဝန်ယူနိုင်ရန်အတွက် မိမိလည်း ရာထူးမှ ဆင်းပေးတော့မည်ဟု ဝန်ကြီးချုပ် ဝီကရီမီဆင်ကလည်း ပြောကြားခဲ့သည်။

ကိုလံဘိုမြို့တော်ရှိ သမ္မတနှင့်ဝန်ကြီးချုပ်တို့၏နေအိမ်များကို ၎င်းတို့ရာထူးမှ နုတ်ထွက်သည်အထိ ၎င်းတို့ လူအုပ်စုအနေဖြင့် ဆက်လက်သိမ်းပိုက်ထားမည်ဖြစ်ကြောင်း ဆန္ဒပြလှုပ်ရှားမှုကို ဦးဆောင်နေသူများက ပြောကြား ခဲ့ကြသည်။

သမ္မတ ဂိုတာဘာယာရာဂျာပက်ဆာ နေအိမ်သို့ ဝင်ရောက်ဆန္ဒပြသူများကိုတွေ့ရစဉ်(ဓါတ်ပုံ-ရိုက်တာ)

ဇူလိုင် ၁၁ ရက် (ယနေ့)တွင် သီရိလင်္ကာ၏အကြီးဆုံးမြို့ဖြစ်သော ကိုလံဘိုတွင် ရာနှင့်ချီသော လူအုပ်စုသည် သမ္မတ၏ အတွင်းဝန်ရုံးနှင့်နေအိမ်များသို့ လမ်းလျှောက်ဝင်ခဲ့ကြပြီး ကိုလိုနီခေတ်အဆောက်အအုံများကို လှည့်လည်ကြည့်ရှုနေခဲ့ကြပြီး အခြေအနေငြိမ်သက်လျက်ရှိကြောင်း ရိုက်တာက ဆက်လက်ရေးသားထားသည်။ ထိုသို့ လှည့်လည်ကြည့်ရှုများကို ရဲများက တစုံတရာ အဟန့်အတား မပြုခဲ့ပေ။

“ဒီသမ္မတ မထွက်အချင်း ကျနော်တို့ ဘယ်မှ မသွားတော့ဘူး။ ပြည်သူတွေ လက်ခံနိုင်တဲ့အစိုးရတစ်ရပ် ကျနော် တို့မှာ ရှိတယ်။ ပြည်သူတွေရဲ့ကြိုးစားရုန်းကန်မှုကို နိုင်ငံရေးပြုပြင်ပြောင်းလဲရေး ကျယ်ကျယ်ပြန့်ပြန့်ဖြစ်လာဖို့ပါ။ သမ္မတ ထွက်သွားရုံတင်မဟုတ်ပါဘူး။ အခု ဒါက အစပဲရှိသေးတယ်” ဟု ဧပြီလအစောပိုင်းကတည်းက ဆန္ဒပြ နေသူ အသက် ၃၁ နှစ်အရွယ်ရှိ ဂျူးဟန်ဆာနာဆိုသူက ပြောကြားခဲ့သည်။

သမ္မတအိမ်တော်ကို ဝင်ရောက်စီးနင်ခဲ့ပြီး အဆိုပါ နေအိမ်ရှိ ဆိုဖာပေါ်တွင် အိပ်ပျော်နေသော အမျိုးသားတစ်ဦး ကို တွေ့ရစဉ်(ဓါတ်ပုံ-ရိုက်တာ)

အခြားဆန္ဒပြသူတစ်ဦးဖြစ်သည့် ဒက်ရှ်ဟန်သာဂူနာဆင်းက ၎င်းသည် လောင်စာဆီမရသဖြင့် ကီလိုမီတာ ၁၃၀ (မိုင် ၈၀) ဝေးကွာသော ကိုလံဘိုမြို့သို့ ဦးတည်လျက် လမ်းလျှောက်ချီတက်ခဲ့ရာ နောက်ဆုံး ဇူလိုင် ၁၁ ရက် နံနက်ပိုင်းတွင် ရောက်ရှိလာကြောင်း ပြောကြားခဲ့သည်။

ဆန္ဒပြသူများသည် သမ္မတနှင့် ဝန်ကြီးချုပ်တို့၏နေအိမ်ခြံဝင်းအသီးသီးအတွင်းသို့ ဇူလိုင် ၈ ရက်ကတည်းက တိုးဝှေ့ဝင်ရောက်ခဲ့ကြသော်လည်း သမ္မတ ရာဂျာပက်ဆာနှင့် ဝီကရီမီဆင်တို့ကို နေအိမ်များထဲတွင် မတွေ့ရ ကြောင်း၊ ၎င်းတို့မည်သည့်နေရာတွင် ရောက်နေသည်ကို မသိရကြောင်း ရိုက်တာသတင်းတွင် ဖော်ပြထားသည်။

Source: Reuters

CNI International News

တိုကျို၊ ဇူလိုင် ၁၀

ဂျပန်ဝန်ကြီးချုပ်ဟောင်း ရှင်ဇိုအာဘေး လုပ်ကြံသတ်ဖြတ်ခံရမှုနှင့်ပတ်သက်၍ ရဲတပ်ဖွဲ့က စုံစမ်းစစ်ဆေးရေး လုပ်နေသော်လည်း ဇူလိုင် ၈ ရက် (ယမန်နေ့) အခင်းဖြစ်ပွားရာနေရာတွင် ဖမ်းဆီးခံခဲ့ရသော သံသယရှိသူ အကြောင်း လူသိနည်းနေသေးသည်။

အသက် ၆၇ နှစ်အရွယ်ရှိ အာဘေးသည် လမ်းမတစ်နေရာတွင် လူအုပ်ကြီးအား မဲဆွယ်စည်းရုံးသည့် မိန့်ခွန်း ပြောကြားနေစဉ် ပစ်ခတ်ခံခဲ့ရပြီး ဇူလိုင် ၈ ရက်၊ ဒေသစံတော်ချိန် ညနေ ၅း ၀၃ နာရီတွင် ကွယ်လွန်အနိစ္စ ရောက်သွားပြီဖြစ်ကြောင်း နာရာတက္ကသိုလ်ဆေးရုံမှ ဆရာဝန်များက အတည်ပြုခဲ့ကြသည်။

ဘယ်သူ့ကို သံသယရှိလဲ

ယာမာဂါမီတက်စုယာ (အသက် ၄၁) နှစ်သည် အာဘေးကို ပစ်သတ်ခဲ့ကြောင်း ဝန်ခံထွက်ဆိုသည်ဟု နာရာနီရှီ ရဲတပ်ဖွဲ့က ဇူလိုင် ၈ ရက်၊ ညနေပိုင်း သတင်းစာရှင်းလင်းတွင် ပြောကြားခဲ့သည်။ အလုပ်လက်မဲ့ဖြစ်သူ ယာမာဂါမီ သည် ၎င်းအမြင်မကြည်လင်သည့် အုပ်စုတစ်စုအပေါ် မုန်းတီးမှုရှိနေကြောင်း စစ်ကြောမေးမြန်းသူများကို ထုတ်ဖော်ပြောခဲ့သည်။

ဂျပန်ဝန်ကြီးချုပ်ဟောင်း ရှင်ဇိုအာဘေး လုပ်ကြံသတ်ဖြတ်ခဲ့သည်ဟု သံသယရှိသူ ယာမာဂါမီတက်စုယာကို လုံခြုံရေးများက ဖမ်းဆီးနေစဉ် (ရိုက်တာ)

အဆိုပါအုပ်စု၏အမည်ကိုတော့ ရဲတပ်ဖွဲ့က အတိအကျမပြောကြားပေ။
ယာမာဂါမီသည် လူသတ်မှုကြောင့် သံသယရှိသူအဖြစ် စုံစမ်းစစ်ဆေးခံနေရပြီး ၎င်းအားစုံစမ်းစစ်ဆေးမည့်အဖွဲ့ဝင် ဦးရေ ၉၀ အထိ တာဝန်ပေးထားကြောင်း ရဲတပ်ဖွဲ့က ပြောကြားခဲ့သည်။

ဘယ်လိုသေနတ်နဲ့ ပစ်ခတ်ခဲ့သလဲ

ပစ်ခတ်မှုတွင် သံသယရှိသူသည် လက်လုပ်သေနတ်တစ်လက်ကို သုံးခဲ့ကြောင်း ရဲက ပြောကြားခဲ့ရာ အခင်း ဖြစ်ပွားရာနေရာတွင် ရိုက်ကူးထားသော ဓာတ်ပုံများတွင် အနက်ရောင်တိပ်များဖြင့် ရစ်ပတ်ထားသော ဆလင်ဒါ သတ္တုချောင်းနှစ်ချောင်းပါသော လက်နက်ဖြစ်ပုံရသည်။

နောက်ပိုင်းတွင် သံသယရှိသူ၏တိုက်ခန်းမှ လက်လုပ် ပစ္စတိုသေနတ်နှင့်တူသော ပစ္စည်းအများအပြားကို အာဏာပိုင်များက သိမ်းဆည်းရမိခဲ့သည်။
အာဘေးပစ်ခတ်မှု၌ သုံးခဲ့သောလက်နက်မှာ အရှည် စင်တီမီတာ ၄၀ ရှည်၍ အနံ စင်တီမီတာ ၂၀ ရှိ သေနတ်နှင့်တူသောပစ္စည်း ဖြစ် ကြောင်း ရဲက ပြောကြားခဲ့သည်။

သံသယရှိသူ ယာမာဂါမီတက်စုယာ ကိုင်ဆောင်ပစ်ခတ်ခဲ့သည့် လက်လုပ်သေနတ်

၎င်းသည် တိပ်ဖြင့်ပတ်ထားသော သံပိုက်လုံးများဖြင့် သေနတ်အမျိုးအစားများစွာကို ပြုလုပ်ခဲ့ကြောင်း၊ ၎င်း၏ နေအိမ်မှ သံပိုက်သုံးလုံးတပ်၊ ငါးလုံးတပ်၊ ခြောက်လုံးတပ် သေနတ်များကို တွေ့ရှိရသည်ဟု ရဲက ဆက်လက် ပြောကြားခဲ့သည်။

အဆိုပါ ပိုက်များထဲသို့ အွန်လိုင်းမှဝယ်ယူခဲ့သော ကျည်ဆန်များ ထည့်သွင်းခဲ့ကြောင်း သံသယရှိသူက ထွက်ဆို ခဲ့သည်။ လုပ်ကြံသတ်ဖြတ်ချိန်၌ ထိုလက်နက်များထဲမှ အထိရောက်ဆုံးနှင့် အပြင်းထန်ဆုံးလက်နက်ကို အသုံးပြု ခဲ့ကြောင်း ရဲတပ်ဖွဲ့က ယုံကြည်သည်ဟု NHK သတင်းတွင် ဖော်ပြထားသည်။

လုံခြုံရေးတပ်ဖွဲ့တွေက ဘယ်လိုတုံ့ပြန်ခဲ့လဲ

ပစ်ခတ်မှုဖြစ်ပွားချိန်တွင် အာဘေးသည် လာမည့် ဇူလိုင် ၁၀ ရက် အထက်လွှတ်တော်ရွေးကောက်ပွဲ မတိုင်မီ အာဏာရ လစ်ဘရယ်ဒီမိုကရက်တစ်ပါတီ (LDP) ကိုယ်စားလှယ်လောင်းများကို ထောက်ခံပေးဖို့ ဆော်ဩသည့် မိန့်ခွန်းပြောကြားနေချိန်ဖြစ်သည်။

၎င်းသည် ကျန်းမာရေးအခြေအနေကြောင့် ၂၀၂၀ ပြည့်နှစ်တွင် ဂျပန် ဝန်ကြီးချုပ်ရာထူးမှ နုတ်ထွက်ခဲ့သော်လည်း နိုင်ငံရေးအခင်းအကျင်းတွင် သြဇာကြီးသူတစ်ဦးအဖြစ် ဆက်လက် ရပ်တည်ခဲ့ပြီး LDP ပါတီအတွက် ဆက်လက်မဲဆွယ်ပေးနေခဲ့သည်။

ဇူလိုင် ၈ ရက်၊ ပစ်ခတ်တိုက်ခိုက်မှုမတိုင်မီ လုံခြုံရေးအစီအမံများကို ပြန်လည်သုံးသပ်မည်ဖြစ်ကြောင်း ဂျပန် အမျိုးသားရဲတပ်ဖွဲ့က ပြောကြားခဲ့သည်။

အခင်းဖြစ်ပွားစဉ် နာရာခရိုင်ရဲတပ်ဖွဲ့က ကိုင်တွယ်ဆောင်ရွက်နေကြောင်း၊ ဝန်ကြီးချုပ်ဟောင်း နာရာမြို့ထဲ ရောက်ရှိလာစဉ်ကတည်းက လုံခြုံရေးအစီအမံများ ချထားပြီးဖြစ်ကြောင်း သိရသည်။

အဆိုပါနေရာတွင် တိုကျိုမြို့တော်မှ ရဲများ ဆယ်ဂဏန်းမျှ အခြားလုံခြုံရေးဝန်ထမ်းများနှင့်အတူ တာဝန်ကျ နေကြောင်း၊ အာဘေး မိန့်ခွန်းပြောနေစဉ် ရှုထောင့်ပေါင်းစုံမှ စောင့်ကြည့်နေခဲ့ကြောင်း ရဲတပ်ဖွဲ့က ပြောကြား သည်ဟု NHK သတင်းကို ကိုးကားလျက် CNN က ရေးသားထားသည်။

Source: CNN