CNI International News

ကိယက်ဗ်၊ ဧပြီ ၂၁

ဒိန်းမတ်ဝန်ကြီးချုပ်နှင့် စပိန်ဝန်ကြီးချုပ်တို့သည် ယနေ့(ဧပြီ ၂၁ ရက်)တွင် ယူကရိန်းနိုင်ငံ၊ ကိယက်ဗ်မြို့သို့ ရောက်ရှိလာခဲ့ပြီး အဆိုပါခရီးစဉ်အတွင်း ဒိန်းမတ်ဝန်ကြီးချုပ်က ယူကရိန်းထံသို့ လက်နက်များ ထပ်မံပေးအပ်ရန် ကတိပြုခဲ့ကြောင်း၊ ဝန်ကြီး ချုပ် နှစ်ဦးတို့သည် ယူကရိန်းသမ္မတ ဗိုလိုဒီမီယာ ဇာလန်းစကီးကို ထောက်ခံသည့် အနေအထားဖြင့် တွေ့ဆုံဆွေးနွေးခဲ့ ကြ ကြောင်း ရိုက်တာသတင်းအရ သိရသည်။

ဒိန်းမတ် အမျိုးသမီးဝန်ကြီးချုပ် မက်တီဖရက်ဒရစ်ဆင်သည် ကိယက်ဗ်မြို့တော် အနီးတဝိုက် ရုရှားတပ်များ ပြန်လည် ဆုတ်ခွာသွားပြီးနောက် ဆိုးရွားစွာ ပျက်စီးနေခဲ့သော ဘိုရိုဒရန်ကာမြို့ကိုလည်း သွားရောက်ကြည့်ရှုခဲ့သည်။

“အခုအချိန်မှာ အလိုအပ်ဆုံးဖြစ်လို့ ယူကရိန်းကို လက်နက်တွေ များများ ပို့ပေးဖို့ ကျမတို့ ရည်ရွယ်ထားပါတယ်” ဟု ဖရက် ဒရစ်ဆင်က လက်နက်ကိုင်စစ်သားများ ဝိုင်းထားသည့်မြို့တဝိုက် လမ်းလျှောက်ရင်း ဒိန်းမတ်ရုပ်သံလိုင်း TV2 သို့ ပြောကြား ခဲ့သည်။

ဒိန်းမတ်ဝန်ကြီးချုပ်နှင့် စပိန်ဝန်ကြီးချုပ် ပက်ဒရိုစန်ချက်တို့သည် ယနေ့ (ဧပြီ ၂၁ ရက်) အစောပိုင်းတွင် ကိယက်ဗ်မြို့သို့ ရောက်ရှိခဲ့ကြောင်း စန်ချက်၏ တွစ်တာလူမှုကွန်ရက်၌ လွှင့်တင်ထားသော ဗွီဒီယိုဖိုင်အရ သိရသည်။

ယူကရိန်းစစ်သားများကို မြို့ပျက်ကြီးမှာတွေ့ရစဉ်

ဇာလန်းစကီးနှင့် တွေ့ဆုံဆွေးနွေးမှုများအရ ယူကရိန်းနိုင်ငံသားများအတွက် နောက်ထပ် ပံ့ပိုးရန်နှင့် စစ်ရာဇဝတ်မှုများနှင့် လူ့အခွင့်အရေး ချိုးဖောက်မှုများအတွက် တရားစွဲရန်တို့ကို အာရုံစိုက် လုပ်ဆောင် သွားမည်ဖြစ်ကြောင်း ဖရက်ဒရစ်ဆင်၏ ရုံးက သတင်းထုတ်ပြန်ခဲ့သည်။

ရုရှားသည် ၎င်း၏ ထိုးစစ်နှင့်ပတ်သက်၍ ယူကရိန်းကို စစ်မဲ့ဇုန်ဖြစ်ရေးအတွက် အန္တရာယ်ရှိသော အမျိုးသားရေးဝါဒီများကို ချေမှုန်းပစ်ရန် အထူးစစ်ဆင်ရေး လုပ်ဆောင်ခြင်းဟု ပြောကြားထားသည်။

အနောက်အုပ်စု နိုင်ငံများနှင့် ကိယက်ဗ်ကတော့ ရုရှားသမ္မတ ဗလာဒီမာပူတင်၏ ရန်လိုသောစစ်ပွဲဟု စွပ်စွဲပြောကြားကြ သည်။
အထူးသဖြင့် ရုရှားက ယူကရိန်းမြောက်ပိုင်းမှ ၎င်း၏တပ်များကို ပြန်လည်ရုပ်သိမ်းပြီးနောက် ယူကရိန်းသမ္မတနှင့် ပြည်သူများ ကို ထောက်ခံကြောင်း ပြသလိုသည့်အတွက် ကျူးကျော်စစ် စတင်စဉ်ကတည်းက ဥရောပခေါင်းဆောင်များသည် ကိယက်ဗ် မြို့တော်သို့ အဆက်မပြတ် ရောက်ရှိလာခဲ့ကြသည်။

ယခင် သီတင်းပတ်ကလည်း ကိယက်ဗ်သို့ ဗြိတိန်ဝန်ကြီးချုပ် ဘောရစ် လာရောက် လည်ပတ်ခဲ့ပြီး ဖြစ်သည်။

Source: Reuters

CNI International News

ကိယက်ဗ်၊ ဧပြီ ၂၁

ယူကရိန်းတပ်ဖွဲ့ဝင်များ အပါအဝင် အရပ်သား ထောင်နှင့်ချီ၍ ခိုလှုံနေသည့် မာရီယူပေါလ်မြို့ အတွင်းရှိ အေဇော့စတယ် သံမဏိစက်ရုံသို့ ဝင်ရောက်တိုက်ခိုက်မည့် ရုရှားတပ်၏ အစီအစဉ်များကို ဖျက်သိမ်းရန် ရုရှားသမ္မတ ဗလာဒီမာပူတင်က ဧပြီ ၂၁ ရက်တွင် အမိန့်ပေးခဲ့ကြောင်း ရိုက်တာသတင်းအရ သိရသည်။

နှစ်လနီးပါးကြာ ဝိုင်းထားပြီးနောက် အဆိုပါ မြို့အတွင်းသို့ ဝင်ရောက် အောင်ပွဲခံရန်သာရှိပြီး အပျက်အစီးများ ပြန့်ကြဲနေ သော စက်ရုံထဲရှိ အကာအရံများကိုတော့ ဖယ်ရှားခြင်းမပြုဖို့ ပူတင်က ပြောကြားခဲ့သည်။

“စက်ရုံထဲကို ဝင်ရောက်စီးနင်းဖို့ အဆိုပြုတာဟာ မလိုအပ်ဘူးလို့ ကျနော်ထင်တယ်။ အဲဒီလို ဝင်စီးဖို့ အစီအစဉ်ကို ဖျက်ဖို့ ကျနော် အမိန့်ပေးရလိမ့်မယ်”ဟု ကရင်မလင် သမ္မတနန်းတော်တွင် ကျင်းပသည့် အစည်းအဝေး ရုပ်သံထုတ်လွှင့်မှုတွင် ပူတင်က ကာကွယ်ရေးဝန်ကြီး ဆာဂျေရွှိုင်ဂုကို ပြောကြားခဲ့သည်။

ရွှိုင်ဂုက ထိုစက်ရုံအတွင်း ယူကရိန်းတပ်ဖွဲ့ဝင်အား ၂,၀၀၀ ခန့် ကျန်ရှိနေသေးသည်ဟု ခန့်မှန်းထားသည်။ ၎င်းတို့ကို ရုရှားက လေးလေးစားစား ဆက်ဆံပြီး ဖျောင်းဖျလျက် လက်နက်ချစေရန် ပူတင်က ညွှန်ကြားခဲ့သည်။

မာရီယူပေါလ်မြို့တွင် ယူကရိန်းခံစစ်မှူးများ၏ ရှေ့ဆက်သွားမည့် အစီအစဉ်များကို ဆွေးနွေးကြရန် ညတွင်းချင်းပင် ယူကရိန်း စေ့စပ်ညှိနှိုင်းမှူး မီခေးလိုပိုဒိုလီယက်က အဆိုပြုခဲ့ကြသည်။

မာရီယူပေါလ်မြို့ ပျက်စီးနေမှုကိုတွေ့ရစဉ်

“ကြိုတင်သဘောတူထားတဲ့ အခြေအနေတစ်ရပ် မရှိဘဲနဲ့ မာရီယူပေါလ်မှာ အထူးညှိနှိုင်းမှုတွေ လုပ်ဖို့ ကျနော်တို့ အဆင်သင့် ဖြစ်နေပါပြီ” ဟု ၎င်းက ဧပြီ ၂၀ ရက် နှောင်းပိုင်းတွင် တွစ်တာလူမှုကွန်ရက်တွင် ရေးသား၍ ကမ်းလှမ်းခဲ့သည်။

စစ်ပွဲ စတင်စဉ်ကတည်းက ဗုံးကြဲတိုက်ခိုက်ခြင်းနှင့် ဝိုင်းရံပိတ်ဆို့ခြင်း ခံနေရသော အေဇော့ပင်လယ်နှင့် ထိစပ်နေသည့် မာရီယူပေါလ် ဆိပ်ကမ်းမြို့သည် ယခင်က မြို့ခံလူထု ၄ သိန်း နေထိုင်ခဲ့ကြောင်း၊ ရုရှား၏ ထိုးစစ်ဒဏ်ကို အပြင်းထန်ဆုံး ခံစားခဲ့ရပြီးနောက် စစ်ပွဲတစ်ခုလုံး၏ အနိဋ္ဌာရုံများ ဖုံးလွှမ်းခဲ့ရသည်။

ထိုမြို့တွင် အရပ်သားပေါင်း သောင်းနှင့်ချီ၍ သေဆုံးခဲ့ကြောင်း ယူကရိန်းဘက်က ပြောသည်။ သို့သော်လည်း ယူကရိန်းတပ် များ ခိုလှုံနေသည့် ဧရာမ သံမဏိစက်ရုံမှအပ ထိုမြို့သည် ၎င်း၏ထိန်းချုပ်မှုအောက်တွင် ရောက်ရှိနေပြီဟု ရုရှားနိုင်ငံက သတင်း ထုတ်ပြန်ခဲ့သည်။

ရုရှားတိုက်ခိုက်မှုခံလိုက်ရတဲ့ ယူကရိန်း

ယူကရိန်း၏ အေဇော့တပ်ရင်းမှ တပ်မှူးတစ်ဦးသည် ရုရှားဘက်မှ လက်နက်ချရန် တောင်းဆိုမှုကို ပယ်ချခဲ့သည်။

၎င်းက ဖြန့်ဝေခဲ့သော ဗွီဒီယိုဖိုင် တစ်ဖိုင်ထဲတွင် စက်ရုံအတွင်း ဗုံးခိုကျင်းများ၌ နေထိုင်ကြသည့် ရာနှင့်ချီသော အရပ်သားများ ဘေးကင်းလုံခြုံမှုကို အာမခံချက်ရရန် ကမ္ဘာသို့ ပန်ကြား၍ အကူအညီတောင်းခံခဲ့သည်။

အဆိုပါ အရပ်သားများကို ယူကရိန်း ထိန်းချုပ်နယ်မြေထဲသို့ ရွှေ့ပေးရန် မာရီယူပေါလ်မြို့သို့ အကူအညီ (သို့မဟုတ်) ဘတ်စ် ကားများ စေလွှတ်ရန် ယူကရိန်းအစိုးရ၏ ကြိုးပမ်းမှုအားလုံးကို ရုရှားက ပိတ်ဆို့ထားဆဲ ဖြစ်သည်။

သို့သော် လူသားချင်း စာနာမှုဆိုင်ရာ ဘေးလွတ်ရာရွှေ့ပြောင်းမှုတွင် အရပ်သား ၁၄၀,၀၀၀ (တစ်သိန်းလေးသောင်း) ကို ခေါ်ဆောင်ပေးခဲ့ကြောင်း မော်စကိုက ပြောကြားခဲ့သည်။

Source: Reuters

CNI International News

၂၀၂၂ ခုနှစ်၊ ဧပြီ ၂၁

ဆီးရီးယားနိုင်ငံမြောက်ပိုင်း၊ Tadef မြို့တွင် ဆီးရီးယားစစ်ပွဲအတွင်း ပျက်စီးနေသော အဆောက်အဦများကြားမှာ ဧပြီ ၁၈ ရက်က ရမ်ဇာန်လမြတ်ကာလ လူများစုဝေး၍ မနက်စာ စားနေကြသည်။

နှစ်ပေါင်းများစွာ စစ်ပွဲကြောင့် ခွဲခွာခဲ့ရသည့် မိသားစုများ ဧပြီ ၁၈ ရက်နေ့က စုဝေး၍ သူပုန်များ ထိန်းချုပ်ထားသည့် Tadef မြို့မှာ စားသောက်ပွဲ ကျင်းပခဲ့ခြင်း ဖြစ်သည်။

ဆီးရီးယားစစ်ပွဲသည် ၂၀၁၁ ခုနှစ်က စတင်ခဲ့ပြီး ယနေ့အချိန်ထိ မတည်မငြိမ်ကာလကို ဖြတ်ကျော်နေဆဲဖြစ်သည်။

၂၀၁၁ ခုနှစ်က စတင်ခဲ့သော ဆီးရီးယားစစ်ပွဲတွင် ၂၀၂၁ ခုနှစ် ဇွန်လအထိ သေဆုံးသူပေါင်း ၄၉၄,၄၃၈ ဦးရှိကြောင်း၊ အနည်းဆုံး အရပ်သား ၁၅၉,၇၇၄ ဦးသေဆုံးခဲ့ကြောင်း လူ့အခွင့်အရေး အဖွဲ့များက မှတ်တမ်းတင် ပြုစုထားကြောင်း သိရသည်။

CNI International News

ကိယက်ဗ်၊ ဧပြီ ၂၁

မာရီယူပေါလ်မြို့ရှိ ယူကရိန်း မရိန်းတပ်မှူးတစ်ဦးသည် မြို့နှင့်အနီးတဝိုက်ကို ရုရှားတပ်များ အလုံးအရင်းဖြင့် ပိတ်ဆို့တိုက်ခိုက်မှုအား တွန်းလှန်ရန် ကြိုးပမ်းနေရင်း မိမိတို့တပ်ဖွဲ့အား အကူအညီပေးရန် ကမ္ဘာသို့ နောက်ဆုံး အကြိမ် တောင်းခံခဲ့ကြောင်း ဘီဘီစီ အင်္ဂလိပ်ပိုင်း၏ သတင်းဖော်ပြချက်အရ သိရသည်။

ရုရှားတပ်အင်အား အဆမတန်များပြားလွန်းနေပြီး မိမိတို့ထံတွင် ရိက္ခာများ ပြတ်တောက်နေကြောင်း ဗိုလ်မှူး ဆာဟီးဗိုလီနာ (Serhiy Volyna) က ပြောကြားခဲ့သည်။

ယူကရိန်းတပ်များ လက်နက်ချရန် ရုရှားဘက်မှ တောင်းဆိုထားသည့် နောက်ဆုံးပေးထားသည့်အချိန်ကို လိုက်နာခြင်းမရှိဘဲ ကျော်လွန်သွားခဲ့ပြီဖြစ်သည်။

မာရီယူပေါလ်မြို့ရှိ ဧရာမ အေဇော့စတယ် သံမဏိစက်ရုံတွင် နောက်ဆုံးခုခံတွန်းလှန်နေသူများ ခိုလှုံလျက်ရှိရာ အရပ်သား ၁,၀၀၀ ခန့် ရှိနေကြောင်း သတင်းများအရ သိရသည်။ မြို့တွင်းရှိ အရပ်သားအချို့ကို ကယ်ဆယ်ရန် အကြိုသဘောတူညီမှုတစ်ခု ရရှိခဲ့ကြောင်း ကိယက်ဗ်အစိုးရက ပြောသည်။

လူပေါင်း ၆,၀၀၀ ခန့်ကို ဘေးလွတ်ရာပြောင်းရွှေ့ပေးရန် ဘတ်စ်ကား အစီးရေ ၉၀ စေလွှတ်နိုင်ဖို့ ဧပြီ ၂၀ ရက်၌ အစိုးရက ကြိုးစားနေကြောင်း မြို့တော်ဝန် ဗာဒိုင်းဘွိုင်ချန်ကို (Vadym Boichenko) က နိုင်ငံပိုင်ရုပ်သံလိုင်းသို့ ပြောကြားခဲ့သည်။ မာရီယူပေါလ်တွင် လူပေါင်း ၁ သောင်းခန့် ပိတ်မိနေကြောင်းလည်း ၎င်းက ဆက်လက် ပြောကြားခဲ့သည်။

စီစဉ်ထားသော ဘတ်စ်ကားအနည်းငယ်သာ ပိတ်မိနေသည့် အရပ်သားများထံရောက်ခဲ့ကြောင်း၊ အများအပြားကို ဘေးလွတ်ရာ မပို့နိုင်သေးကြောင်း ဒေသန္တရအုပ်ချုပ်ရေးမှူး ပါဗလိုကီရာလန်ကိုက ပြောကြားခဲ့သည်။

“လူတွေက သတ်မှတ်ထားတဲ့ စုရပ်တွေမှာ ရှိနေကြပြီး တချို့တလေပဲ ဘတ်စ်ကားပေါ် တက်နိုင်ခဲ့ကြတယ်” ဟု ဘေးလွတ်ရာရွှေ့ပေးသူ ဦးရေ အတိအကျမဖော်ပြဘဲ ၎င်းက ရိုက်တာသတင်းဌာနသို့ ပြောကြားခဲ့သည်။

မာရီယူပေါလ်မြို့၏ အရှေ့တောင်ဘက်ရှိ ဧရိယာ ၄ စတုရန်းမိုင် (၁၀ စတုရန်းကီလိုမီတာ) ကျယ်ဝန်းသော သံမဏိစက်ရုံသည် ၎င်းမြို့အတွက် ယူကရိန်းခံစစ်၏နောက်ဆုံးအဓိကနေရာ ဖြစ်လာခဲ့သည်။

မြို့ထဲတွင် ယူကရိန်းတပ်အင်အား မည်မျှရှိသည်ကို ရှင်းရှင်းလင်းလင်း မသိရသေးသော်လည်း ဘီဘီစီထံသို့ ပေးပို့သော ဗီဒီယိုဖိုင်ထဲတွင် ဒဏ်ရာရတပ်ဖွဲ့ဝင် ၅၀၀ ခန့်ကို စက်ရုံဝင်းအတွင်း ပြုစုစောင့်ရှောက်ထားကြောင်း ဗိုလ်မှူး ဆာဟီးဗိုလီနာက ရှင်းပြသည်။ ၎င်းသည် ယူကရိန်း၏ အမှတ် ၃၆ မရိန်းတပ်ရင်းကို ဦးဆောင် ကွပ်ကဲ နေရသည်။

“ဒါက ကမ္ဘာကို ကျနော်တို့ နောက်ဆုံးပန်ကြားခြင်းပါ။ ကျနော်တို့ရဲ့နောက်ဆုံးပန်ကြားချက်ဖြစ်နိုင်တယ်” ဟု ၎င်းက ဗီဒီယိုဖိုင်ထဲတွင် ပြောကြားခဲ့သည်။

တပ်ဖွဲ့ဝင်များ၏ရိက္ခာများ နည်းပါးလာနေကြောင်း၊ ရုရှားတပ်အင်အားသည် မိမိတို့ထက် အဆပေါင်းများစွာ သာလွန်နေပြီး ယူကရိန်းဘက်မှ စိတ်ဓာတ်အပြည့်အဝဖြင့် ရှိနေသော်လည်း လေကြောင်း၊ ကြည်းကြောင်းနှင့် အမြောက်များ၊ ယန္တရားများ၊ တင့်ကားများသုံး၍ ဖိအားမြှင့် တိုက်ခိုက်ခံနေရကြောင်း ၎င်းက ဆက်လက် ပြောကြားခဲ့သည်။

Source: BBC

CNI International News

ဂျေရုဆလင်၊ ဧပြီ ၂၁

ပါလက်စတိုင်းစစ်သွေးကြွများသည် ဧပြီ ၂၁ ရက် (ယနေ့) အစောပိုင်းတွင် ဂါဇာကမ်းမြောင်မှ အစ္စရေးတောင်ပိုင်းသို့ ဒုံးကျည် အများအပြား ပစ်လွှတ်ခဲ့ရာ အစ္စရေးလေယာဉ်များကလည်း အပြန်အလှန်တိုက်ခိုက်ခဲ့ပြီး ဂါဇာရှိ စစ်သွေးကြွ ပစ်မှတ်များကို ထိမှန်ခဲ့ကြောင်း အေပီသတင်းတစ်ပုဒ်တွင် တွေ့ရသည်။

ထိုသို့ အပြန်အလှန်တိုက်ခိုက်မှုများသည် ယမန်နှစ် အစ္စရေး-ဂါဇာ ပဋိက္ခနှင့် တူညီသည့် စစ်ရေးတင်းမာမှုများ တကျော့ပြန် တိုးလာခဲ့ခြင်းဟု အေပီက ဆက်လက် ရေးသားထားသည်။

နယ်စပ်ဖြတ်ကျော်တိုက်ခိုက်မှုများလည်း ဂျေရုဆလင်တွင် မတည်မငြိမ်ဖြစ်နေခဲ့သည့် အစ္စရေး-ပါလက်စတိုင်း တင်းမာမှုများ နောက်ပိုင်း ပေါ်ပေါက်လာခဲ့သည်။

ဧပြီ ၂၀ ရက်တွင် ရာနှင့်ချီသော အမျိုးသားရေး အစွန်းရောက်ဝါဒီများသည် အစ္စရေးအလံများ ဝှေ့ယမ်းရင်း ဂျေရုဆလင် မြို့တော်ဟောင်း တဝိုက်ရှိ ပါလက်စတိုင်း အများစုနေထိုင်ရာ နယ်မြေများဆီသို့ ချီတက်ခဲ့ ကြခြင်းအားဖြင့် အငြင်းပွားနေ သော မြို့တော်အတွက် အစ္စရေးတို့ ထိန်းချုပ်နိုင်မှု အတိုင်းအတာကို တစိတ်တပိုင်း ပြသခဲ့ကြသည်။

ယမန်နှစ်က အစ္စရေးနှင့် ဟားမတ်စ်တို့အကြား ၁၁ ရက်ကြာ စစ်ပွဲမတိုင်မီက အဓိက အချက်အချာ ဖြစ်ခဲ့သော ဂျေရုဆလင် မြို့ဟောင်း၏ ဒမတ်စကက်ဂိတ်သို့ ဦးတည်ရာ လမ်းမကို ယခုအခါ ရဲများက ပိတ်ဆို့ထားခဲ့သည်။ အဆိုပါ ပိတ်ဆို့ထားသည့် အတားအဆီးများအနီးတွင် ချီတက်ကြသူများက ရဲများကို တွန်းထိုးဖယ်ရှားလျက် အစ္စရေးအလံများ ဝှေ့ယမ်းရင်း ကြွေးကြော် သံများ အော်ဟစ်ခဲ့ကြသည်။

အစ္စရေးအမျိုးသားရေးများနဲ့ ပါလက်စတိုင်းများ အငြင်းပွားမှုဖြစ်ကြ(AP)

မြို့ဟောင်းရှိ တောင်ထိပ်သည် ဘာသာရေး အသီးသီး၏ အထွတ်အမြတ် နေရာဖြစ်ပြီး အစ္စရေး-ပါလက်စတိုင်း ပဋိပက္ခ၏ စိတ်လှုပ်ရှားစရာ ခံစားချက်ကို ထုတ်ဖော်ရာနှင့် ယခင် အကြမ်းဖက်မှုများအတွက် မမေ့နိုင်စရာ ဖြစ်နေခဲ့သည်။

အယ်လ်ကွာစာ (Al Aqsa) ဗလီဝင်းဟု မွတ်ဆလင်တို့ ခေါ်ကြသည့် နေရာသည် အစ္စလာမ်ဘာသာ၏ တတိယမြောက် အမြင့် မြတ်ဆုံး နေရာအဖြစ် သတ်မှတ်ထားသည်။ ထိုနေရာကိုပင် ဂျူးဘာသာကလည်း အမြင့်မြတ်ဆုံး နေရာဟု တလေးတစား ရှိ ကြပြီး ဂျူးလူမျိုး၏ ကျမ်းစာလာ ဘုရားကျောင်း ပရိဝုဏ်လည်း ဖြစ်သည်။

မွတ်ဆလင် ဘာသာရေး ဆရာများ အုပ်ချုပ်သည့် ဗလီသည် အစ္စရေးတို့ သိမ်းပိုက်ထားသည့် အရှေ့ဂျေရုဆလင်တွင် ပါလက်စတိုင်း လူမျိုးများအတွက် ရှားရှားပါးပါး နေရာတစ်ခု ဖြစ်နေသည်။

၁၉၆၇ ခုနှစ် အရှေ့အလယ်ပိုင်း စစ်ပွဲတွင် အစ္စရေးတို့ သိမ်းပိုက်ခဲ့သော အရှေ့ဂျေရုဆလင်ကို ပါလက်စတိုင်းတို့က အနာဂတ် တွင် ၎င်းတို့ပိုင်ဆိုင်လာရမည်ဟု သန္နိဋ္ဌာန်ချထားကြသည်။

အစ္စရေးက ဂါဇာဘက်ကို ဒုံးကျည်ပစ်တိုက်ခိုက်(AP)

ဂါဇာရှိ ပါလက်စတိုင်း စစ်သွေးကြွ အဖွဲ့များဖြစ်ကြသည့် အာဏာရ ဟားမတ်စ်အုပ်စုနှင့် အစ္စလာမ္မစ် ဂျီဟက် အဖွဲ့ငယ်များ သည် ဂျေရုဆလင်၏ သန့်ရှင်းသော နေရာအတွက် ခုခံကာကွယ်သူများအဖြစ် ၎င်းတို့ကိုယ်ကို သတ်မှတ်၍ ရပ်တည်နေကြ သည်။

ဂါဇာဘက်မှ ဒုံးကျည်များ ညလုံးပေါက် အဆက်မပြတ် ပစ်လွှတ်ခဲ့ရာ ယနေ့(ဧပြီ ၂၁ ရက်) အစောပိုင်း ပစ်လွှတ်လိုက်သည့် ဒုံးကျည် ၄ စင်းကို အစ္စရေးဘက်မှ ကြားဖြတ် ဟန့်တားနိုင်ခဲ့ကြောင်း အစ္စရေးစစ်တပ်က ပြောသည်။

အဆိုပါ ဖြစ်ကြောင့် အသေအပျောက် (သို့မဟုတ်) ပျက်စီးဆုံးရှုံးမှုများကို လတ်တလော မည်သူကမျှ ထုတ်ဖော်ပြောကြား ခြင်း မရှိသေးသော်လည်း ဒုံးကျည်ပစ်ခတ်မှု အားလုံးအတွက် ဟားမတ်စ်တွင် တာဝန်ရှိကြောင်း အစ္စရေးက စွပ်စွဲခဲ့သည်။

ဧပြီ ၂၁ ရက် အစောပိုင်းတွင် အစ္စရေး တိုက်လေယာဉ်များက ဂါဇာကမ်းမြောင် အလယ်ပိုင်းတွင် လေကြောင်းမှ တိုက်ခိုက်မှု များ ဆက်တိုက် ပြုလုပ်ခဲ့ကြောင်း ဒေသတွင်း မီဒီယာများက ဖော်ပြကြသည်။

Source: AP

CNI International News

မော်စကို၊ ဧပြီ ၂၁

ရုရှားနှင့်ယူကရိန်း နှစ်နိုင်ငံအကြား ရပ်တန့်နေသော ငြိမ်းချမ်းရေးဆွေးနွေးပွဲများနှင့်စပ်လျဉ်း၍ သမ္မတ ဗလာဒီမာ ပူတင်၏ ပြောခွင့်ရသူ ဒီမီထရီပက်စ်ကော့ဗ်က သဘောထားမှတ်ချက်ပေးရာတွင် “မော်စကိုသည် ယူကရိန်းထံသို့ တိကျသောအသုံးအနှုန်းများဖြင့် အဆိုပြုချက်မူကြမ်းကို ပေးပို့ခဲ့ကြောင်း” သတင်းထောက်များကို ပြောကြားခဲ့ သည်ဟု ရုရှားအာဘော် အာရ်တီသတင်းဌာနက ရေးသားဖော်ပြသည်။

“ဆွေးနွေးပွဲအတွက် သူတို့ဘက်က ညှိနှိုင်းရမယ့်အလှည့်ပါ။ သူတို့တုံ့ပြန်မှုကို ကျနော်တို့ စောင့်နေပါတယ်” ဟု ပက်စကော့ဗ်က ဧပြီ ၂၀ ရက်တွင် ပြောကြားခဲ့သည်။ ယူကရိန်းဘက်က တုံ့ပြန်ရမည့် နောက်ဆုံး သတ်မှတ် ထားခြင်း ရှိ/မရှိ သတင်းထောက်များက ဆက်လက်မေးမြန်းခဲ့ရာ ၎င်းက “ကိယက်ဗ်အစိုးရပေါ်တွင် မူတည် ကြောင်း” ပြန်လည်ဖြေကြားခဲ့သည်။

သို့သော် ယူကရိန်းနိုင်ငံသားများသည် ယခုစေ့စပ်ညှိနှိုင်းရေးလုပ်ငန်းစဉ်ကို အရှိန်မြှင့်တင်ရာ၌ သဘောထားကြီး သည့်လက္ခဏာ မပြသကြောင်း ပက်စကော့ဗ်က မှတ်ချက်ချခဲ့သည်။ ထို့ပြင် ယူကရိန်းသည် စကားအသုံးအနှုန်း များ မတည်တံ့ဘဲ စဉ်ဆက်မပြတ် အပြောင်းအလဲရှိနေကြောင်း ၎င်းက စွပ်စွဲပြောကြားခဲ့သည်။

ဧပြီ ၂၀ ရက်အစောပိုင်း၌ ပြောကြားခဲ့သည့် ပက်စကော့ဗ်၏မှတ်ချက်များကို ရုရှားနိုင်ငံခြားရေးဝန်ကြီးဌာန ပြောခွင့်ရသူ မာရီယာဇာခါရိုဗာက ထပ်ဆင့်ပြောကြားခဲ့ရာတွင် “မော်စကိုအနေဖြင့် ယူကရိန်း စေ့စပ် ညှိနှိုင်းရေးမှူးများကို အယုံအကြည်မရှိကြောင်း” ထည့်သွင်းပြောကြားခဲ့သည်။

“ယူကရိန်းအစိုးရသည် အမှီအခိုကင်းစွာဖြင့် ဆောင်ရွက်နေခြင်းမဟုတ်သော်လည်း ပြည်ပထိန်းချုပ်မှု ခံနေရ ကြောင်း၊ ဆွေးနွေးပွဲများ၌ ကိယက်ဗ်အစိုးရ၏ကိုင်တွယ်ပုံများမှာ ဆပ်ကပ်ဆန်ဆန် ဖြစ်နေကြောင်း၊ ယူကရိန်း အာဏာပိုင်များ၏ရပ်တည်ချက်မှာလည်း မတည်ငြိမ်ကြောင်း” ရုရှားနိုင်ငံခြားရေး ပြောခွင့်ရသူအမျိုးသမီးဖြစ်သူ မာရီယာဇာခါရိုဗာက သုံးသပ်ပြောကြားခဲ့သည်။

ဖေဖော်ဝါရီ ၂၄ ရက် စစ်ရေးပဋိပက္ခစတင်ချိန်ကတည်းက ရုရှားနှင့် ယူကရိန်းတို့သည် အကျပ်အတည်းကို ဖြေရှင်းရန် ရည်ရွယ်လျက် လူချင်းတွေ့ဆုံမှုနှင့် အွန်လိုင်းမှတစ်ဆင့် ဆွေးနွေးမှုများကို အကြိမ်ကြိမ် ပြုလုပ် ခဲ့ကြသည်။

မတ်လ ၂၉ ရက်တွင် နှစ်ဘက်စေ့စပ်ညှိနှိုင်းရေးမှူးများ နောက်ဆုံးအကြိမ် တွေ့ဆုံခဲ့ကြသည်။ ထိုသို့ ဆွေးနွေးမှု များသည် ရှေ့မတိုးသာ နောက်မဆုတ်သာဖြစ်လာကြောင်း ရုရှားသမ္မတ ဗလာဒီမာပူတင်က ဧပြီ ၁၂ ရက်တွင် ကောက်ချက်ချခဲ့သည်။

ခရိုင်းမီးယားနှင့် ဒွန်ဘတ်စ်သမ္မတနိုင်ငံများကို သီးခြားအသိအမှတ်ပြုရန်အတွက် ရုရှား၏အဓိက တောင်းဆိုချက် များကို ဖြည့်ဆည်းရန် ယူကရိန်းက ပယ်ချခဲ့ကြောင်း ပူတင်က ဆက်လက်ပြောကြားခဲ့သည်။

Source: အာရ်တီသတင်းဌာန

CNI International News

တိုကျို၊ ဧပြီ ၂၀

ဂျပန်နှင့်ရုရှား နှစ်နိုင်ငံအကြား နယ်မြေပိုင်ဆိုင်မှု နှစ်ပေါင်းများစွာ အငြင်းပွားနေမှုကို အဖြေရှာကြရန် စေ့စပ်ညှိနှိုင်းရေး ဆွေးနွေးပွဲများအား ဆိုင်းငံ့ထားရနိုင်ခြေရှိနေကြောင်း ဂျပန်သတင်းဌာန NHK တွင် ဖော်ပြထားသည်။

ယူကရိန်းကို ကျူးကျော်၍ မော်စကိုအပေါ် ဖိအားပေးရေးအတွက် နိုင်ငံတကာပိတ်ဆို့ ဒဏ်ခတ်မှုများ၌ ပါဝင်ရန် ဂျပန်က ဆုံးဖြတ်ခဲ့ပြီး ရုရှားသည် ဂျပန်နှင့် နယ်မြေအရေး ဆွေးနွေးနေမှုကို ကျောခိုင်းထွက်ခွာ သွားခဲ့သည်။ ယင်းသို့ ထွက်ခွာမည့် အကြောင်းကိုလည်း ရုရှားနိုင်ငံခြားရေးဝန်ကြီးဌာနက ပြီးခဲ့သည့် မတ်လ ၂၁ ရက်တွင် ကြေညာချက် ထုတ်ပြန်ခဲ့သည်။

အဆိုပါ ကြေညာချက်ထဲတွင် “လက်ရှိအခြေအနေအရ ရုရှားဖက်ဒရေးရှင်းနိုင်ငံသည် ဂျပန်နှင့် ငြိမ်းချမ်းရေး စာချုပ်ဆိုင်ရာ ဆွေးနွေးပွဲများ ဆက်လက် ကျင်းပသွားရန် ရည်ရွယ်ထားခြင်း မရှိတော့ကြောင်း၊ ဖော်ရွေလှိုက်လှဲမှု မပါဝင်သည့် အနေ အထား ပိုင်ဆိုင်ထားသည့် နိုင်ငံနှင့် မိမိတို့ ဆက်ဆံရေးဆိုင်ရာ အခြေခံ စာချုပ်စာတမ်းကိစ္စ ဆွေးနွေးရန် မဖြစ်နိုင် တော့ပါ” ဟု ရေးသားထားသည်။

အဆိုပါ လုပ်ရပ်သည် ရုရှားအပေါ် ပိတ်ဆို့အရေးယူမှု အစီအမံသစ်ချမှတ်ရန် ဂျပန်ဝန်ကြီးချုပ် ကီရှီဒါဖူမီယို၏ ဆုံးဖြတ်ချက် အတိုင်း လုပ်ဆောင်ခဲ့ခြင်းဖြစ်သည်။ ထိုအစီအမံသည် တခြားသော ၇ နိုင်ငံအုပ်စု၏ သဘောထားနှင့် ကိုက်ညီသည်။

ဂျပန်သည် ရုရှား၏ ကုန်သွယ်ရေး အဆင်ပြေဆုံးနိုင်ငံ အဆင့်အတန်းကို ရုတ်သိမ်းလိုက်ပြီး တိုကျိုအနေဖြင့် ရုရှားထုတ်ကုန် များကို အခွန်တိုးကောက်ဖို့ စီစဉ်နေသည်။

ဂျပန်-ရုရှား နှစ်နိုင်ငံ သံတမန်အရေး ဆွေးနွေးမှုများ ဆယ်စုနှစ်များစွာ ကြာမြင့်ခဲ့ပြီ ဖြစ်သည်။ ဂျပန်နှင့် ရုရှားတို့သည် ၁၉၅၆ ခုနှစ်မှ စတင်၍ ဂျပန်-ဆိုဗီယက် ပူးတွဲကြေညာစာတမ်း လက်မှတ်ထိုးကြပြီးကတည်းက စစ်ပြေငြိမ်းရေး သဘောတူနိုင်ခဲ့ ကြသည်။

ရုရှား-ဂျပန် ကျွန်းအငြင်းပွားမှု

၎င်းတို့သည် ဟော့ကိုင်းဒိုးကျွန်း၏ အရှေ့မြောက်ကမ်းရိုးတန်းရှိ ကျွန်းများနှင့်စပ်လျဉ်း၍ နယ်မြေပိုင်ဆိုင်မှု အငြင်းပွားနေ ခြင်းမှာ နှစ်နိုင်ငံဆက်ဆံရေးတွင် အတားအဆီးတစ်ခု ဖြစ်နေခဲ့သည်။

အဆိုပါ ကျွန်းများကို ရုရှားက လက်ရှိ ထိန်းချုပ်ထားသည်။ ဂျပန်က ထိုကျွန်းများကို သူ ပိုင်ဆိုင်သည်ဟု ပြောသည်။ ထိုကျွန်း များသည် ဂျပန်ပိုင်နက်၏ မွေးရာပါ အစိတ်အပိုင်းဖြစ်ကြောင်း ဂျပန်အစိုးရက ဆုပ်ကိုင်ထားသည်။ ဒုတိယကမ္ဘာစစ်ပြီးချိန် ကျမှ ရုရှား ထိုကျွန်းများကို တရားမဝင် ဝင်ရောက်သိမ်းပိုက်ခဲ့ကြောင်း ဂျပန်က အကြောင်းပြခဲ့သည်။

ဂျပန်အစိုးရ၏ အဆိုအရ ထိုကျွန်းများကို ဆိုဗီယက်(ရုရှား)တို့ မသိမ်းပိုက်မီ ၁၉၄၅ ခုနှစ်အထိ ကျွန်းများပေါ်တွင် ဂျပန်လူမျိုး ၁၇,၀၀၀ ခန့် နေထိုင်ခဲ့ကြောင်း သိရသည်။ ဆိုဗီယက်တို့ သိမ်းပြီးနောက် ကျွန်းအသီးသီးရှိ ဂျပန်လူမျိုးများကို ၁၉၄၈ ခုနှစ် တွင် ရွှေ့ပြောင်းပေးဖို့ အမိန့်ထုတ်ခဲ့သည်။

၂၀၁၆ ခုနှစ်တွင်တော့ ထိုကျွန်းများ အရေးကိစ္စမှာ နွေးထွေးပြေလည်လာခဲ့သည်။ ထိုစဉ်က ဂျပန်ဝန်ကြီးချုပ် ရှင်ဇိုအာဘေး နှင့် ရုရှားသမ္မတ ဗလာဒီမာပူတင်တို့ ကျွန်းစုများပေါ် ခရီးသွားလုပ်ငန်း စီမံကိန်းရေးဆွဲခြင်း အပါအဝင် စီးပွားရေးအရ ပူးပေါင်း လုပ်ကိုင်ကြရန် သဘောတူ လက်ခံခဲ့ကြသည်။

ဂျပန်ဝန်ကြီးချုပ် ကီရှီဒါဖူမီယိုနဲ့ ရုရှား ကာကွယ်ရေး/နိုင်ငံခြားရေး၀န်ကြီးများ

သို့သော် မျက်မှောက်ကာလ၌ လက်မခံနိုင်စရာ ချဉ်းကပ်မှုများ ရှိနေသည်ဟု အကြောင်းပြချက်ဖြင့် ရုရှားဘက်ကို လက်ရှိ ဝန်ကြီးချုပ် ကီရှီဒါက ကန့်ကွက်ခဲ့သည်။

“အခု အခြေအနေက ရုရှားရဲ့ ရန်လိုတဲ့လုပ်ရပ်ရဲ့ ရလဒ်ဖြစ်ပါတယ်။ အဲဒီအပေါ် အခြေခံပြီးတော့ ဂျပန်-ရုရှား ဆက်ဆံရေး အကျိုးဆက်တွေကို အပြစ်ပုံချတာ အင်မတန် တရားလွန်ပါတယ်” ဟု ကီရှီဒါက လွှတ်တော်ရေးရာကော်မတီသို့ ပြောကြား ခဲ့သည်။

၎င်းတို့ အစိုးရအနေဖြင့် သက်ကြီးရွယ်အို ကျွန်းသူကျွန်းသားဟောင်းများ၏ ဆန္ဒကို အဓိကဦးတည်၍ ဆက်လက် ကိုင်တွယ် ဖြေရှင်းသွားမည်ဟု ဂျပန်နိုင်ငံခြားရေးဝန်ကြီး ဟာယာရှီယိုရှီမာဆာက ပြောကြားခဲ့သည်။

“ဒါပေမယ့် လတ်တလော ကာလမှာတော့ စေ့စပ်ညှိနှိုင်းရေး အလားအလာကို ကျနော်တို့ ဦးတည်ထားလို့ မရသေးဘူး” ဟု ၎င်းက သတင်းစာ ရှင်းလင်းပွဲ၌ ထုတ်ဖော်ပြောကြားခဲ့သည်။

Source: NHK

CNI International News

တိုကျို၊ ဧပြီ ၂၀

ရုရှားအရာရှိ ၈ ဦးကို တိုကျိုက နှင်ထုတ်ရန် ဆုံးဖြတ်လိုက်ပြီးနောက် ၎င်းတို့သည် ဧပြီ ၂၀ ရက်(ယနေ့) အစောပိုင်း၌ ဂျပန်နိုင်ငံထဲမှ ထွက်ခွာသွားရဖွယ်ရှိကြောင်း NHK သတင်းက ဖော်ပြသည်။

ဂျပန်အစိုးရသည် ၎င်းပြည်တွင်းရှိ ရုရှားသံရုံးနှင့်ကုန်သွယ်ရေးကိုယ်စားလှယ်ရုံးတို့မှ အရာရှိများကို နှင်ထုတ် ကြောင်း ဧပြီ ၈ ရက်တွင် အတိအလင်းကြေညာခဲ့သည်။

အဆိုပါ ရုရှားအရာရှိများသည် ထောက်လှမ်းရေးသတင်းစုဆောင်းခြင်းတွင် အဓိကပါဝင်ပတ်သက်နေသည်ဟု ယူဆရကြောင်း ဂျပန်အစိုးရနှင့် နီးစပ်သောသတင်းရင်းမြစ်များက ပြောကြသည်။

၎င်းတို့ ၈ ဦးသည် ရုရှားနိုင်ငံမှ ရောက်ရှိလာသည့် စင်းလုံးငှားလေယာဉ်ဖြင့် လိုက်ပါကြမည်ဖြစ်၍ ဧပြီ ၂၀ ရက် (ယနေ့) မွန်းတည့်ချိန်တွင် တိုကျိုမြို့ရှိ ဟာနီဒါလေဆိပ်မှ စတင်ထွက်ခွာမည်ဟု သိရသည်။

ဂျပန်နိုင်ငံတွင် နိုင်ငံခြားသံတမန်များ (သို့မဟုတ်) အခြားနိုင်ငံခြားအစိုးရ အမှုထမ်း၊ အရာထမ်းများကို ယခုကဲ့သို့ နှင်ထုတ်ခြင်းမှာ လွန်စွာရှားပါးသည်။

ယခုဖြစ်စဉ်အပေါ် ရုရှားက လက်တုံ့ပြန်၍ အရေးယူဖွယ်ရှိသော်လည်း အသေးစိတ်အချက်အလက်များကို မသိရ သေးပေ။

၎င်းတို့အား နှင်ထုတ်သည့်အကြောင်းကို ဂျပန်နိုင်ငံခြားရေးဝန်ကြီးဌာနမှ သတင်းပြန်ကြားရေးအတွင်းဝန် အိုနိုဟီကာရီကို (Ono Hikariko) က ဧပြီ ၈ ရက်တွင် ကြေညာခဲ့သည်။

ဂျပန်အစိုးရ၏ဆုံးဖြတ်ချက်ကို နိုင်ငံခြားရေးဒုတိယဝန်ကြီး မိုရီကဲကီယိုက ဂျပန်နိုင်ငံဆိုင်ရာ ရုရှားသံအမတ် မီးခေးလ်ဂလူဇန်ကို ဧပြီ ၇ ရက်တွင် ဆင့်ခေါ်ပြီး အသိပေးပြောကြားခဲ့ကြောင်း NHK သတင်းအရ သိရသည်။

ယူကရိန်းတွင် အပြစ်မဲ့အရပ်သားအများအပြားကို သတ်ဖြတ်ခြင်းသည် နိုင်ငံတကာဥပဒေကို ရုရှားအနေဖြင့် ဆိုးရွားစွာချိုးဖောက်ခြင်းဖြစ်ကြောင်း၊ ၎င်းတို့သည် လုံးဝသည်းမခံနိုင်သော စစ်ရာဇဝတ်မှုများကို ကျူးလွန် နေကြောင်း မိုရီကဲကီယိုက ရုရှားသံအမတ်ကို ပြောကြားခဲ့သည်။

Source: NHK

CNI International News

လန်ဒန်၊ ဧပြီ ၂၀

ယူကရိန်းကို စစ်ရေးအကူအညီ တိုးမြှင့်ပေးခြင်းနှင့် မဲဆွယ်စည်းရုံးရန်အတွက် Covid-19 စည်းကမ်း ချိုးဖောက်မိခဲ့ ခြင်းတို့ အတွက် လွှတ်တော်သို့ တောင်းပန်စကား ပြောခဲ့ရသော ဗြိတိန်ဝန်ကြီးချုပ် ဘောရစ်ဂျွန်ဆင်သည် ၎င်း၏ပြည်တွင်း၌ နိုင်ငံရေးအရ ဆန့်ကျင်ဝေဖန်မှုများ ရင်ဆိုင်နေရကြောင်း အာရ်တီသတင်းဌာနက ရေးသားဖော်ပြသည်။

ဗြိတိန်နိုင်ငံသားများအပေါ် ကပ်ရောဂါဆိုင်ရာ Lockdown ချထားချိန်၌ ဝန်ကြီးချုပ်ဖြစ်သူက ထိုစည်းမျဉ်းကို ချိုးဖောက်ခဲ့မိ၍ နောင်တရကြောင်း၊ ယူကရိန်းအကျပ်အတည်းနှင့် တစ်ဆက်တည်း ဖြစ်သွားခဲ့သဖြင့် ဘောရစ်ဂျွန်ဆင်မှာ ထပ်တလဲလဲ ဝေဖန် ထိုးနှက်မှုများ ခံခဲ့ရသည်။

ဧပြီ ၁၉ ရက်၊ အောက်လွှတ်တော် အစည်းအဝေး၌ ဂျွန်ဆင်က ၂၀၂၀ ပြည့်နှစ်၊ ဇွန်လအတွင်း လန်ဒန်မြို့ lockdown ချထား စဉ် ၎င်း၏မွေးနေ့ပွဲ ကျင်းပမိခဲ့ခြင်းအတွက် တောင်းပန်စကား ပြောကြားခဲ့သည်။

ပြီးခဲ့သည့် ဖေဖော်ဝါရီလ၌ ရုရှားသမ္မတ ဗလာဒီမာပူတင် အမိန့်ပေးခဲ့သော ထိုးစစ်ကို ကိယက်ဗ်အစိုးရ ခုခံချေမှုန်း နိုင်ရန် အတွက် စစ်ရေးအကူအညီ တိုးမြှင့်ပေးရေး ဂျွန်ဆင်က လွှတ်တော်သို့ တောင်းဆိုခဲ့သည်။

“ဒီဖြစ်စဉ်အပေါ် လူအတော်များများက ဒေါသထွက်ပြီး စိတ်ပျက်နေတယ်ဆိုတာ ကျနော် အတိအကျ သိပါတယ်။ ယူကရိန်း နိုင်ငံထဲကို ပူတင်ရဲ့ ရိုင်းစိုင်းရက်စက်တဲ့ ထိုးစစ်ဆင်ခဲ့တာကို ဗြိတိန်ရဲ့ အကောင်းဆုံး အစဉ်အလာတွေနဲ့ တုံ့ပြန်ပေးဖို့ ပိုပြီး တာဝန်ကြီးတယ်လို့ ခံစားမိပါတယ်” ဟု ဝန်ကြီးချုပ် ဂျွန်ဆင်က ပြောကြားခဲ့သည်။

ဇာလန်းစကီးနဲ့ ဘောရစ်ဂျွန်ဆင်ကို တွေ့ရစဉ်(GETTY IMAGES)

မိမိသည် ယူကရိန်းစစ်ရေး ပဋိပက္ခ စတင်စဉ် ကတည်းက ကိယက်ဗ်မြို့တော်သို့ ပထမဆုံး လာရောက်သည့် G-7 အုပ်စု ခေါင်းဆောင်ဖြစ်ကြောင်း ဂျွန်ဆင်က မှတ်ချက်ချခဲ့သည်။

ယူကရိန်းသမ္မတ ဇာလန်းစကီးနှင့် ၄ နာရီကျော်ကြာ တွေ့ဆုံခဲ့သည့် ဧပြီ ၉ ရက် ယူကရိန်းခရီးစဉ်ကို ဂျွန်ဆင်က ပြန်လည် ရှင်းပြခဲ့ပြီး ယခင်သီတင်းပတ်များ၌ အမေရိကန်သမ္မတ ဂျိုးဘိုင်ဒန်၏ ဥရောပခရီးစဉ်ကိုလည်း အကျဉ်းချုပ် ပြောကြားခဲ့ သည်။

ယခင် ဆိုဗီယက်ပြည်ထောင်စု အုပ်စုဟောင်းဖြစ်ခဲ့သည့် ယူကရိန်းကို ရေရှည်စစ်ရေး တည်ဆောက်မှု ပြုနိုင်ရန်အတွက် ဘောရစ်ဂျွန်ဆင်က အမေရိကန်သမ္မတနှင့်အတူ လက်တွဲ၍ တောင်းဆိုဆော်ဩပေးခဲ့သည်။

“ကျနော်တို့ရဲ့ ရေရှည် ရည်မှန်းချက်ကတော့ ရုရှား နောက်တစ်ကြိမ် မကျူးကျော်ရဲတဲ့အထိ ယူကရိန်းကို အခိုင်အမာ ရှိနေစေ ဖို့ ဖြစ်တယ်” ဟု ၎င်းက ဘိုင်ဒန်ကို ပြောကြားခဲ့သည်။

Source: အာရ်တီ