CNI News

၂၀၂၄ ခုနှစ်၊ ဖေဖော်ဝါရီ ၂၃

ထိုင်းပြည်ဝင်ခွင့် ဗီဇာရရှိရန် ဆောင်ရွက်နေသည့် မြန်မာများအတွက် ဗီဇာလျှောက်ထားမှုကို အွန်လိုင်းစနစ်ဖြင့် ပြောင်းလဲလုပ်ဆောင်ခြင်းတွင် ပွဲစားများ၏ အခန်းကဏ္ဍမှာ ပါဝင်လာဦးမည်ဖြစ်ကြောင်း ပြည်ပအလုပ်အကိုင် အေဂျင်စီနှင့် ရွှေ့ပြောင်းအလုပ်သမားအရေးဆောင်ရွက်သူများက CNI သတင်းဌာနသို့ ပြောသည်။

မြန်မာနိုင်ငံဆိုင်ရာ ထိုင်းသံရုံးအနေဖြင့် ဗီဇာရရှိရန် လူကိုယ်တိုင်သံရုံးရှေ့တန်းစီ၍ ရက်ချိန်းရယူသည့်စနစ်ကို ဖျက်သိမ်းလိုက်ပြီး ဖေဖော်ဝါရီ ၂၂ ရက်နေ့မှစတင်ကာ အွန်လိုင်းစနစ်ဖြင့်သာ လက်ခံသွားမည်ဟု ထုတ်ပြန် ကြေညာထားသည်။

လက်ရှိ ပြည်ဝင်ခွင့် ဗီဇာလျှောက်နေသည့် မြန်မာလူငယ် အများစုသည် အွန်လိုင်းစနစ် ကျွမ်းကျင်စွာသုံးတတ် သောကြောင့် အွန်လိုင်းစနစ်ဖြင့် လျှောက်ထားရာတွင် လွယ်ကူနိုင်သော်လည်း ပွဲစားများ၏ အခန်းကဏ္ဍ မဖြစ်မနေ ပါဝင်လာဦးမည်ဟု FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

“သူတို့အနေနဲ့ သံရုံးထဲကလူပဲဖြစ်ဖြစ် အဲဒီလိုမျိုး တစ်ခုနဲ့ ပေါင်းပြီးတော့ ဒီနေ့တင်တဲ့စာရင်းထဲမှာ ပါအောင် လုပ်ပေးတဲ့ဟာမျိုး ဒါမျိုးလုပ်တဲ့ဟာမျိုးတွေ ဖြစ်နိုင်တာပေါ့။ ဒါမှမဟုတ်လည်း နောက်တစ်ခုက ဒီဟာနဲ့ ပတ်သက်ပြီး အမြဲတမ်းလုပ်နေကြရှိတဲ့ အေးဂျင့်တွေ၊ အေဂျင်စီတွေအနေနဲ့ အရင်တုန်းကဆို အေဂျင်စီတစ်ဖွဲ့ကို အယောက် ၂၀ ကိုယ်တာရတယ် ဆိုတဲ့ဟာမျိုး ရှိတယ်။ အေဂျင်စီတွေနဲ့ သံရုံးနဲ့က အဆက်အသွယ်ရှိထားတဲ့ ဟာတွေ ရှိပြီးသားလေ။ သူတို့တွေ အနေနဲ့ဆိုရင် ရနိုင်တာပဲ။ အဲဒီအခါကြ ဝန်ဆောင်ခပေါ့ အဲဒီအေဂျင်စီတွေရဲ့ ဝန်ဆောင်ခ ပိုပြီး ပေးရမယ့်ဟာမျိုး အဲဒီလိုတွေ ဖြစ်ကုန်တယ်။ ဒါမှမဟုတ်လည်း ကြားထဲမှာမှ အေဂျင်စီတွေဆီ တိုက်ရိုက် မရောက်နိုင်တဲ့လူတွေကြတော့ ကြားခံပွဲစားတွေကနေတစ်ဆင့် လုပ်ရမယ်ဆိုရင် ကုန်ကျတဲ့ဟာတွေ ပိုများမယ်။ လိမ်လည်တာတွေ ဖြစ်နိုင်တယ်” ဟု ၎င်းက ပြောသည်။

ထိုင်းသံရုံး၏ ကြေညာချက်တွင် လာရောက်လျှောက်ထားသူများ အဆင်ပြေချောမွေ့စေရန်၊ တပြိုင်နက်တည်း လူအများအပြား လာရောက်လျှောက်ထားမှုကို လျှော့ချပေးနိုင်ရန်နှင့် ရုံးလုပ်ငန်းစဉ်ဆိုင်ရာ ဘေးကင်းလုံခြုံရေး အတွက် လူကိုယ်တိုင်သံရုံးရှေ့တန်းစီပြီး ဗီဇာလျှောက်ရန် ရက်ချိန်းယူသည့်စနစ်အား ဖျက်သိမ်းလိုက်ခြင်း ဖြစ်ကြောင်း ဖော်ပြထားသည်။

ဖေဖော်ဝါရီ ၂၂ ရက်မှ စတင်ကာ ရက်ပေါင်း ၃၀ စာအတွက် တစ်ရက်လျှင် တိုကင်အရေအတွက် ၂၀၀ နှုန်းဖြင့် ကြိုတင်ဆောင်ရွက်ထားပြီးဖြစ်သော်လည်း တိုကင်အရေအတွက် ၄၀၀ နှုန်းအထိ ထပ်မံဖြည့်သွင်းကာ ကြိုတင် လျှောက်ထားခြင်းကို လက်ခံသွားမည်ဖြစ်သည်။

 ရန်ကုန်မြို့ရှိ ထိုင်းသံရုံး

ယခုကဲ့သို့ အွန်လိုင်းစနစ်သို့ ပြောင်းလဲဆောင်ရွက်လိုက်ခြင်းသည် ကောင်းမွန်သော်လည်း အချိန်စောင့်ဆိုင်းရမှု အနည်းငယ်ရှိကြောင်း MOEAF မှ အထွေထွေအတွင်းရေးမှူး ဦးမြတ်သူက CNI သတင်းဌာနသို့ ပြောသည်။ 

“သူတို့ကလည်း အဲဒီနေ့က တော်တော်များသွားတာကို။ ဒီဘက် ထိုင်းသံရုံးကနေတန်းစီလိုက်တာ ဟိုဘက် မလေးရှားသံရုံးအထိ ရောက်သွားတာဆိုတော့ နည်းတဲ့အတန်းကြီးမှ မဟုတ်တာကို။ အဝေးကြီးပဲကို။ အွန်လိုင်း နဲ့ဆိုရင်တော့ ပိုအဆင်ပြေသွားတာပေါ့ ရုပ်ပျက်ဆင်းပျက် တန်းစီရတာထက်စာရင်။ ပတ်စပို့ရုံးလိုပဲ ဖြစ်သွား မှာပေါ့။ နည်းနည်းတော့ စောင့်ရတာပေါ့။ ဘယ်လိုလုပ်ကြမလဲတော့ မသိဘူးပေါ့။ တကယ်လို့ အွန်လိုင်းကို မတင်တတ်ဘူးဆိုရင်တော့ ကြားထဲက ပွဲစားတစ်ဆင့်ကရှိဦးမှာပဲ။ လွယ်ကူပါတယ် (အွန်လိုင်းစနစ်က)။ ဒါပေမယ့် တချို့တွေက ပွဲစားအားကိုးတော့လည်း ပိုက်ဆံပေးနေရတာပေါ့။ ပိုက်ဆံပေးရတာက မှန်မှန်ကန်ကန်ဆို တော်သေး၊ မဟုတ်ဘဲနဲ့ အတုတွေနဲ့ဆို ဒုက္ခရောက်မှာလည်း ရှိသေးတာပေါ့” ဟု ၎င်းက ပြောသည်။

မြန်မာနိုင်ငံဆိုင်ရာ ထိုင်းသံရုံးတွင် ဖေဖော်ဝါရီလဆန်းပိုင်းမှစတင်ပြီး ထိုင်းနိုင်ငံသို့ သွားရောက်မည့်သူ များပြားလာသဖြင့် ဗီဇာလျှောက်ထားရန် လူအများအပြား တန်းစီစောင့်ဆိုင်းခဲ့ရသဖြင့် ဖေဖော်ဝါရီ ၁၄ ရက်တွင် ဗီဇာလျှောက်ထားရန် တိုကင်စနစ်သို့ ပြောင်းလဲခဲ့ပြီး တစ်ရက်လျှင် လူ ၄၀၀ အတွက် တိုကင်များပေးဝေခဲ့သည်။

ထို့နောက် ယခုကဲ့သို့ အွန်လိုင်းစနစ်ဖြင့် တိုကင်ရက်ချိန်းထုတ်ပေးသည့် စနစ်အား ထပ်မံပြောင်းလဲလိုက်ခြင်း ဖြစ်ပြီး လျှောက်ထားရာ၌ အမည်၊ ဖုန်းနံပါတ်၊ အီးမေးလ်လိပ်စာ၊ ပတ်စ်ပို့နံပါတ်နှင့်အတူ လျှောက်ထားလိုသည့် ဗီဇာအမျိုးအစားများအား ဖြည့်သွင်း၍ လျှောက်ထားရမည်ဖြစ်သည်။