CNI Sport News

၂၀၂၂ ခုနှစ်၊ စက်တင်ဘာ ၂၀

လီဝန်ဒေါစကီးက ဘိုင်ယန်မြူးနစ်အသင်းမှာ ကစားတဲ့အချိန်နဲ့ နှိုင်းယှဉ်မယ်ဆိုရင် ဘာစီလိုနာမှာက ဘောလွန်းဒီအောဆု ရနိုင်ခြေပိုရှိတယ်လို့ ပြောလိုက်ပါတယ်။

လီဝန်ဒေါစကီးက “ဘောလွန်းဒီအောဆုကို အများဆုံးရရှိခဲ့တဲ့ ကစားသမားသမားအများအပြားက ဘာစီလိုနာအသင်းကဆိုတာ ကျနော်သိပါတယ်။ဒါကြောင့်လည်း ဘိုင်ယန်မြူးနစ်မှာထက် ဘာစီလိုနာ မှာက ပိုပြီးရနိုင်ဖို့ နီးစပ်ပါတယ်”လို့ မာကာနဲ့ အင်တာဗျူးမှာ ပြောခဲ့တာပါ။

အသက် ၃၃ နှစ်အရွယ်ရှိ လီဝန်ဒေါစကီးဟာ ပြီးခဲ့တဲ့အပြောင်းအရွှေ့က ပေါင်သန်း ၃၀ နဲ့ ဘိုင်ယန် မြူးနစ်မှာ ၈ ရာသီကြာကစားတာကို အဆုံးသတ်ပြီး ဘာစီလိုနာထံ ပြောင်းရွှေ့ခဲ့တာ ဖြစ်ပါတယ်။ ပိုလန်တိုက်စစ်မှူးဟာ ဘာစီလိုနာအသင်းမှာ ချက်ချင်းအံဝင်ခဲ့ပြီး ၈ ပွဲကစားအပြီးမှာ ၁၁ ဂိုးအထိ သွင်းယူနိုင်ခဲ့တာပါ။ လီဝန်ဒေါစကီးဟာ စပိန်လာလီဂါပြိုင်ပွဲမှာ ၈ ဂိုးအထိသွင်းယူထားပြီး ဂိုးသွင်း အများဆုံးကစားသမားအဖြစ် ရပ်တည်နေတာဖြစ်ပါတယ်။

လီဝန်ဒေါစကီးက “နူးကမ့်ပ်မှာ ဘာစီလိုနာပရိသတ်တွေ ကျနော့်နာမည်ကို သီဆိုဖို့ဆိုတာက တကယ် ကို မမျှော်လင့်ထားတဲ့အရာပါ။ဘာစီလိုနာမှာ အကြာကြီးရှိနေသလိုကို ခံစားနေရပါတယ်။ဘာစီလိုနာကို ရောက်လာတဲ့ ပထမဆုံးနေ့ကတည်းက ကျနော်ဟာ နေရာမှန်ကို အချိန်မှန်ရောက်လာတယ်လို့ ခံစား ခဲ့ရတာပါ။ပရိသတ်တွေရဲ့အားပေးမှုကြောင့် အလွန်သက်သောင့်သက်သာရှိသလို ခံစားခဲ့ရပါတယ်။ အားလုံးက ကောင်းမွန်စွာဆက်ဆံပြီး အခွင့်ထူးခံရသလိုကို ရှိခဲ့တာပါ”လို့ ပြောခဲ့တာပါ။

လီဝန်ဒေါစကီးဟာ နေးရှင်းလိဂ်ပွဲတွေယှဉ်ပြိုင်ဖို့ ပိုလန်လက်ရွေးစင်အသင်းနဲ့ ပူးပေါင်းပြီး လေ့ကျင့်မှု တွေ ပြုလုပ်တော့မှာ ဖြစ်ပါတယ်။ပိုလန်အသင်းဟာ စက်တင်ဘာ ၂၃ ရက်မှာ နယ်သာလန်၊ ၂၆ ရက်မှာ ဝေးလ်စ်အသင်းတို့နဲ့ ယှဉ်ပြိုင်ကစားသွားမှာ ဖြစ်ပါတယ်။

Source:Mirror

CNI Sport News

၂၀၂၂ ခုနှစ်၊ စက်တင်ဘာ ၂၀

မြန်မာပြည်ဖွား MMA တိုက်ခိုက်ရေးသမား အောင်လအန်ဆန်းဟာ ONE Championship နဲ့ စာချုပ် ချုပ်ဆိုလိုက် ပြီလို့ သူ့ရဲ့ ဆိုရှယ်မီဒီယာကနေ တရားဝင် ကြေညာခဲ့ပါတယ်။

အောင်လအန်ဆန်းက “ ONE Championship နဲ့ စာချုပ် ချုပ်ဆိုလိုက်ပါပြီ။ ကျနော့်အဖွဲ့က ကျနော် အဆင်သင့် ဖြစ်အောင် လုပ်ထားမယ်ဆိုတာ ကျနော်သိပါတယ်။ ကျနော့်ကို ချစ်ခြင်းမေတ္တာတွေနဲ့ အားပေးမှုတွေအတွက် ခင်ဗျားတို့ အားလုံးကို ကျေးဇူးတင်ပါတယ်”လို့ ဆိုရှယ်မီဒီယာပေါ်မှာ ရေးသားထုတ်လွှင့်ပြီးတော့ ပြောခဲ့တာပါ။

အောင်လအန်ဆန်းဟာ အခုနှစ် ဖေဖော်ဝါရီလက ဘစ်ဒက်ချ်ကို အရေးနိမ့်ခဲ့တဲ့ ပွဲစဉ်ပြီးကတည်းက ပွဲတွေနဲ့ ဝေးကွာနေခဲ့ပါတယ်။ ဒါပေမယ့် လေ့ကျင့်မှုတွေကိုသာ ပိုပြီးကြိုးစားလုပ်ဆောင်နေတာ ဖြစ်ပါတယ်။

အောင်လအန်ဆန်းဟာ တိုကျိုမှာ ပြုလုပ်မယ့် ONE Championship ပြိုင်ပွဲမှာ ယူရှင်အိုကာမီနဲ့ ထိုးသတ်ချင်တဲ့ အကြောင်းကို မကြာသေးခင်က သူ့ရဲ့ ဆိုရှယ်မီဒီယာပေါ်မှာ ရေးသားမှု ပြုလုပ်ခဲ့တာပါ။ ONE ရဲ့ ဝိတ်တန်း ၂ ခု ချန်ပီယံဟောင်း အောင်လအန်ဆန်းဟာ စာချုပ်ကြောင့် အခုနှစ်မကုန်ခင် ပွဲထိုးသတ်ရဖို့ ရှိနေတာ ဖြစ်ပါတယ်။

အောင်လအန်ဆန်း လေ့ကျင့်ခန်းဆင်းနေစဉ် (Aung La Nsang-Fb)

အောင်လအန်ဆန်းဟာ ဘစ်ဒက်ချ်ကို အရေးနိမ့်အပြီးမှာ သူ့ရဲ့ ပိုကောင်းတဲ့ ပုံစံအသစ်တွေကို မြင်တွေ့ရဖို့ ရှိတယ်လို့ ပြောထားတာပါ။

မစ်ဒယ်ဝိတ်နဲ့ လိုက်ဟဲဗီးဝိတ် ချန်ပီယံဟောင်းဟာ နောက်ဆုံးထိုးသတ်ခဲ့တဲ့ ၄ ပွဲမှာ ၃ ပွဲအထိ အရေးနိမ့်ထားတာ ကြောင့် ချန်ပီယံခါးပတ်ကို ပြန်စိန်ခေါ်နိုင်ဖို့အတွက် နပန်းပညာရပ်တွေကိုပါ သင်ယူ ကာ ပြင်းပြင်းထန်ထန် လေ့ကျင့်နေပါတယ်။

အောင်လအန်ဆန်းဟာ ONE ပြိုင်ပွဲရဲ့ ချန်ပီယံခါးပတ် ၂ ခုကို ၂၀၁၇ ကနေ ၂၀၁၉ အထိ ထိန်းထားနိုင်ခဲ့ပေမယ့် ၂၀၂၀ နဲ့ ၂၀၂၁ မှာ ရိုင်နီယာကို အရေးနိမ့်ပြီး ချန်ပီယံဆုတွေကို လက်လွှတ်ခဲ့ရတာပါ။ အသက် ၃၇ နှစ်အရွယ်ရှိ အောင်လအန်ဆန်းဟာ MMA ပွဲစဉ်ပေါင်း ၄၁ ပွဲအထိ ထိုးသတ်ထားပြီး ၂၇ ပွဲအနိုင်ရကာ ၁၃ ပွဲအရေးနိမ့်ထားတာ ဖြစ်ပါတယ်။

CNI Sport News

၂၀၂၂ ခုနှစ်၊ စက်တင်ဘာ ၁၉

အတ္တလန္တာအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တဲ့ စီးရီးအေပွဲစဉ်မှာ အနီကတ်နဲ့ ထုတ်ပယ်ခံရပြီး နောက် ရိုးမားကစားသမားတွေအနေနဲ့ ဒိုင်ဗင်ထိုးတာကို စတင်လုပ်ဆောင်သင့်ပြီလို့ နည်းပြ မော်ရင် ဟိုက ပြောလိုက်ပါတယ်။

မော်ရင်ဟိုက “ဒါက ရှင်းရှင်းလင်းလင်းကို ပင်နယ်တီပေးရမှာပါ။ဇာနီအိုလိုက မလဲကျလို့ ပင်နယ်တီ မပေးတာလား။ဒါဆိုရင် ကစားသမားတွေကို ကျနော်ပေးထားတဲ့ အကြံဉာဏ်တွေ ပြောင်းလဲရတော့ မယ်။ ရပ်နိုင်အောင်မကြိုးစားနဲ့၊ ဘောလုံးကန်ဖို့ မလုပ်နဲ့၊ ဒီလိဂ်မှာ အများလုပ်သလို ရေကန်ထဲမှာ ဒိုင်ဗင်ထိုးတဲ့ လူပျက်လိုပဲနေဖို့ မှာရတော့မှာပါ။ဒါမှလည်း ကျနော်တို့ ပင်နယ်တီရမှာ” လို့ Football Italia ကို ပြောခဲ့တာပါ။

ဇာနီအိုလိုဖြစ်ရပ်နဲ့ ပတ်သက်ပြီး ရိုးမားအသင်းကို ပင်နယ်တီမပေးခဲ့တာကြောင့် မော်ရင်ဟိုဟာ ဒေါသ ထွက်ခဲ့ပြီး ကွင်းထဲထိ ဝင်ရောက်ခဲ့တာကြောင့် ကွင်းလယ်ဒိုင်လူကြီးက အနီကတ်ပြ ထုတ်ပယ်ခဲ့တာ ဖြစ်ပါတယ်။ဒီပွဲမှာ ဇာနီအိုလိုကို အတ္တလန္တာကစားသမား အိုကိုလီက ဆွဲထားခဲ့ပေမယ့် ကစားသမားက ဂိုးဧရိယာထဲမှာ မလဲကျခဲ့ပါဘူး။အဲဒါကြောင့် ကွင်းလယ်ဒိုင်လူကြီးက ပင်နယ်တီမပေးခဲ့တာကို မော်ရင် ဟိုက ဒေါသထွက်ခဲ့တာဖြစ်ပါတယ်။

ရိုးမားအသင်းဟာ ဒီပွဲမစတင်ခင် သွေးပူလေ့ကျင့်ခန်းပြုလုပ်တာမှာ အဓိက ကစားသမားဖြစ်သူ ဒိုင်ဘား လား ဒဏ်ရာရသွားလို့ မာတစ်နဲ့ ပွဲထွက်လူစာရင်းကို အပြောင်းအလဲ ပြုလုပ်ခဲ့ရတာပါ။ဒီရှုံးပွဲဟာ ဒီရာသီ ရိုးမားအသင်းအတွက် စီးရီးအေ ဒုတိယမြောက်ရှုံးပွဲဖြစ်ပြီး ၇ ပွဲကစားအပြီးမှာ ရမှတ် ၁၃ မှတ်နဲ့ အမှတ် ပေးဇယား အဆင့် ၆ နေရာမှာ ရပ်တည်နေတာ ဖြစ်ပါတယ်။

ရိုးမားအသင်းဟာ နိုင်ငံတကာပွဲစဉ်တွေအပြီးမှာ စီးရီးအေပွဲစဉ်အဖြစ် အင်တာမီလန်အသင်းနဲ့ အောက်တိုဘာလ ၁ ရက်မှာ ယှဉ်ပြိုင်ရမှာပါ။ဒီပွဲပြီးရင်တော့ ဘက်တစ်အသင်းနဲ့ ယူရိုပါလိဂ်ပွဲစဉ် ယှဉ်ပြိုင်ရမှာ ဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ စက်တင်ဘာ ၂၀

မာသီးယက်စ်ပေါ့ဘာဟာ ညီဖြစ်သူ ပေါလ်ပေါ့ဘာဆီကနေ ငွေညှစ်ဖို့ ကြံစည်မှုနဲ့ ထိန်းသိမ်းခံထားရပြီး စုံစမ်းစစ်ဆေးခံနေရတယ်လို့ သိရပါတယ်။

ငွေညှစ်ဖို့နဲ့ ရာဇဝတ်ဆိုင်ရာပူးပေါင်းကြံစည်မှုတို့အတွက် အခြားလူ ၄ ဦးကိုလည်း စုံစမ်းစစ်ဆေးမှုတွေ ပြုလုပ်နေတယ်လို့ တရားရေးဆိုင်ရာရင်းမြစ်တွေက ရိုက်တာနဲ့ ပြင်သစ်သတင်းဌာနတွေကို ပြောခဲ့ တာပါ။မာသီးယက်စ်ရဲ့ ရှေ့နေဖြစ်သူကတော့ သူ့ရဲ့ အမှုသည်မှာ အပြစ်မရှိဘူးလို့ ငြင်းဆိုထားပါတယ်။ ရှေ့နေဖြစ်သူ ယာဆင်ဘိုဇရူးက “ဒီဆုံးဖြတ်ချက်ကို ကျနော်တို့ဘက်က စိန်ခေါ်ပြီး ရင်ဆိုင်သွားမှာပါ” လို့ ပြင်သစ်ရုပ်သံ BFMTV ကို ပြောခဲ့တာပါ။

မာသီးယက်စ်ဟာ ညီဖြစ်သူရဲ့ အကြောင်းနဲ့ ပတ်သက်တဲ့ ပြောဆိုမှုတွေဟာ ပြီးခဲ့တဲ့လက အွန်လိုင်းပေါ် မှာ ထွက်ပေါ်လာခဲ့ပြီးနောက် ဒီဗွီဒီယိုရဲ့ နောက်ကွယ်မှာ သူရှိနေကြောင်း ဝန်ခံထားတာ ဖြစ်ပါတယ်။ ပေါ့ဘာက သူ့ကို ဂိုဏ်းအဖွဲ့အစည်းတစ်ခုက ခြိမ်းခြောက်ငွေညှစ်ဖို့ ပစ်မှတ်ထားနေတယ်လို့ ပြောခဲ့ပြီး နောက် ပြင်သစ်အစိုးရရှေ့နေတွေဟာ စက်တင်ဘာလအစောပိုင်းက တရားစီရင်ရေးဆိုင်ရာ စုံစမ်း စစ်ဆေးမှုတွေကို စတင်ခဲ့တာပါ။

ပြင်သစ်ကွင်းလယ်ကစားသမားက သူဟာ ယူရို ၁၃ သန်းပေးချေဖို့ ပစ်မှတ်ထားတောင်းခံနေရတယ်လို့ ဇူလိုင်လ ၁၆ ရက်က တူရင်အစိုးရရှေ့နေတွေထံ တိုင်ကြားခဲ့တာ ဖြစ်ပါတယ်။ပြီးခဲ့တဲ့ နွေရာသီ အ ပြောင်းအရွှေ့က ဂျူဗင်တပ်စ်အသင်းထံ ပြန်လည်ရောက်ရှိလာခဲ့တဲ့ ပေါ့ဘာဟာ ဒဏ်ရာကို ခွဲစိတ် ကုသမှုခံယူရမှာ ဖြစ်တာကြောင့် ၂၀၂၂ ကမ္ဘာ့ဖလားပြိုင်ပွဲနဲ့ လွဲချော်ရဖွယ် ရှိနေတယ်လို့လည်း သိရပါတယ်။

ပရော်ဖက်ရှင်နယ်ဘောလုံးသမားတစ်ဦးဖြစ်တဲ့ မာသီးယက်စ်ဟာ ဂီနီလက်ရွေးစင်ကို ကိုယ်စားပြု ပါဝင်ကစားခဲ့ကာ အင်္ဂလန်ကလပ်တွေဖြစ်တဲ့ ခရူဝီ၊ ရက်ဇ်ဟမ်း၊ ခရော်လေစတဲ့ အသင်းတွေအပြင် ဥရောပကလပ်တွေမှာ ကစားခဲ့တာလည်း ဖြစ်ပါတယ်။

Source:BBC

CNI Sport News

၂၀၂၂ ခုနှစ်၊ စက်တင်ဘာ ၁၉

အသလက်တီကိုမက်ဒရစ်အသင်း ပရိသတ်တွေဟာ ရီးရယ်လ်မက်ဒရစ်အသင်းနဲ့ ကစားခဲ့တဲ့ မက်ဒရစ် ဒါဘီပွဲ မစတင်ခင် ဗီနီစီးယက်စ်ကို လူမျိုးရေးခွဲခြားတဲ့ ကြွေးကြော်မှုတွေ ပြုလုပ်သွားခဲ့ပါတယ်။

အေးဂျင့်တစ်ဦးဖြစ်တဲ့ ဘရာဗိုက ဂိုးသွင်းအပြီးမှာ ကခုန်အောင်ပွဲခံတဲ့ ဗီနီစီးယက်စ်ကို ရည်ညွှန်းပြီး မျောက်လိုလုပ်တာ ရပ်လိုက်ပါလို့ ပြောခဲ့ပြီးနောက် ကစားသမားဖြစ်သူက စပိန်ဘောလုံးလောကမှာ လူမျိုးရေးခွဲခြားမှုကို ရှုတ်ချကြောင်းပြောထားတာပါ။ဘရာဇီးလ်နာမည်ကြီး ကစားသမားတွေဖြစ်တဲ့ ပီလီ၊ နေမာတို့ အပါအဝင် ကစားသမားတချို့က ဗီနီစီးယက်စ်ဘက်က ရပ်တည်ကြောင်း ထုတ်ပြောခဲ့ ကြပါတယ်။

အသလက်တီကိုအသင်း ပရိသတ်တချို့ကတော့ မက်ဒရစ်ဒါဘီပွဲမစခင်မှာ “မင်းဟာ မျောက်ပဲ၊ ဗီနီစီးယက်စ် မင်းဟာ မျောက်ပဲ” ဆိုပြီး ကြွေးကြော်နေကြတဲ့ ဗွီဒီယိုဖိုင်ဟာ ဆိုရှယ်မီဒီယာပေါ်မှာ ရောက်ရှိသွားခဲ့တာပါ။ ပြီးခဲ့တဲ့ ရက်ပိုင်းကမှ ဗီနီစီးယက်စ်အပေါ် လူမျိုးရေးခွဲခြားတာနဲ့ပတ်သက်ပြီး ရီးရယ်လ်အသင်းက “ဒီလိုလူမျိုးရေးခွဲခြားမှုအပြုအမူတွေကို ပြင်းပြင်းထန်ထန်ရှုတ်ချပါတယ်။ ကျနော် တို့ ကစားသမားတွေအပေါ် လူမျိုးရေးခွဲခြားတဲ့ မှတ်ချက်ပေးတဲ့သူတိုင်းကို တရားဥပဒေအရအရေးယူဖို့ လုပ်ဆောင်ထားတယ်လို့” ထုတ်ပြန်ထားပါတယ်။

ဗီနီစီးယက်စ်ကတော့ ဘာနေဗျူးမှာ ဒါမှမဟုတ် ဘယ်ကွင်းမှာပဲဖြစ်ဖြစ် ကခုန်အောင်ပွဲခံမှုကိုတော့ ရပ်တန့်သွားမှာ မဟုတ်ဘူးလို့ ပြောထားခဲ့တာပါ။ဘရာဇီးလ်ကစားသမားဟာ အသလက်တီကိုအသင်း နဲ့ပွဲမှာ အသင်းဖော် ရိုဒရီဂို ဂိုးသွင်းအပြီး ဆမ်ဘာအကနဲ့ ပြိုင်ဘက်ပရိသတ်တွေ ရှေ့မှာ ကခုန်အောင်ပွဲခံ သွားခဲ့တာ ဖြစ်ပါတယ်။ဒီပွဲမှာ ရီးရယ်လ်အသင်းက အသလက်တီကိုအသင်းကို ၂ ဂိုး- ၁ ဂိုးနဲ့ အနိုင်ရပြီး ရာနှုန်းပြည့်နိုင်ပွဲနဲ့ လာလီဂါ အမှတ်ပေးဇယားထိပ်ဆုံးနေရာမှာ ဆက်လက်ရပ်တည်နိုင်ခဲ့တာပါ။

ဘရာဇီးလ်ကစားသမားတွေထဲက တစ်ဦးဖြစ်တဲ့ အာဆင်နယ်အသင်းတိုက်စစ်မှူး ဂျီးဆပ်စ်ဟာ ဘရန်ဖိုဒ့်အသင်းနဲ့ပွဲမှာ ဂိုးသွင်းအပြီး ဗီနီစီးယက်စ်ကို ထောက်ခံတဲ့အနေနဲ့ ကခုန်အောင်ပွဲခံသွားခဲ့တာ ဖြစ်ပါတယ်။

Source:Mirror

CNI International News

၂၀၂၂ ခုနှစ်၊ စက်တင်ဘာ ၁၉

မြန်မာအသင်းဟာ ၂၀၂၃ အာရှယူ-၂၀ ချန်ပီယံရှစ် ပြိုင်ပွဲခြေစစ်ပွဲ အုပ်စုနောက်ဆုံး ပွဲစဉ်အဖြစ် မော်လ်ဒိုက်အသင်း နဲ့ ကစားခဲ့တာမှာ ၃ ဂိုး- ဂိုးမရှိနဲ့ အနိုင်ရရှိသွားခဲ့ပါတယ်။

စက်တင်ဘာ ၁၉ ရက် မနက်ပိုင်းက ဆော်ဒီမှာ ကစားခဲ့တဲ့ ဒီပွဲမှာ မြန်မာအသင်းဟာ ဂိုးပြတ်နိုင်ပွဲတစ်ပွဲကို ရှာဖွေ သွားနိုင်ခဲ့တာပါ။

မြန်မာအသင်းအတွက် ဂိုးတွေကို ကောင်းထက်ပိုင်၊ စွမ်းထက်နဲ့ လမင်းထွေးတို့က သွင်းယူခဲ့တာ ဖြစ်ပါတယ်။ မြန်မာအသင်းဟာ မော်လ်ဒိုက်အသင်းကို အနိုင်ရခဲ့ပေမယ့် အုပ်စုပွဲစဉ် ၃ ပွဲ ကစားအပြီးမှာ ၁ ပွဲနိုင်၊ ၂ ပွဲရှုံးနဲ့ ခြေစစ်ပွဲ အောင်မြင်ခြင်း မရှိခဲ့တာပါ။

မြန်မာအသင်းဟာ ခြေစစ်ပွဲမှာ ဥဇဘတ်ကစ္စတန်၊ ဆော်ဒီ၊ တရုတ်၊ မော်လ်ဒိုက်တို့နဲ့ တစ်အုပ်စုတည်း ကျရောက် ခဲ့တာ ဖြစ်ပါတယ်။

မော်လ်ဒိုက်သတင်းနဲ့ မြန်မာအသင်း ယှဉ်ပြိုင်နေစဉ် (MFF)

ဒါပေမယ့် ဥဇဘတ်ကစ္စတန် အသင်းဟာ နောက်ဆုံးအဆင့် ပြိုင်ပွဲကို အိမ်ရှင်အဖြစ် ကျင်းပမှာဖြစ်လို့ ခြေစစ်ပွဲ တိုက်ရိုက် အောင်မြင်ထားတာပါ။

အဲ့ဒါကြောင့် ဥဇဘတ်ကစ္စတန်နဲ့ ကစားတဲ့ ရလဒ်တွေကို ထည့်သွင်းတွက်ချက်ခြင်း မရှိပါဘူး။ မြန်မာအသင်းဟာ အုပ်စုတွင်းပွဲတွေမှာ တရုတ်အသင်းကို ၃ ဂိုး- ၁ ဂိုး၊ ဆော်ဒီအသင်းကို ၅ ဂိုး- ဂိုးမရှိဆိုတဲ့ ရလဒ်တွေနဲ့ အရေးနိမ့်ခဲ့ ပြီး မော်လ်ဒိုက်အသင်းကို အနိုင်ရခဲ့တာ ဖြစ်ပါတယ်။

၂၀၂၃ အာရှယူ-၂၀ ချန်ပီယံရှစ်ပြိုင်ပွဲ ခြေစစ်ပွဲအပြီးမှာ အုပ်စုထိပ်ဆုံး အသင်းတွေဖြစ်တဲ့ ဆော်ဒီ၊ ကာတာ၊ ဂျပန်၊ ဂျော်ဒန်၊ တောင်ကိုရီးယား၊ အင်ဒိုနီးရှား၊ အိုမန်၊ တာဂျစ်ကစ္စတန်၊ အီရန်တို့ ခြေစစ်ပွဲအောင်မြင်ခဲ့တာ ဖြစ်ပါတယ်။

ဒါ့အပြင် ဗီယက်နမ်၊ ကာဂျစ္စတန်၊ တရုတ်၊ ဆီးရီးယားနဲ့ ထိုင်းအသင်းတို့ဟာ အကောင်းဆုံး အုပ်စုဒုတိယနဲ့ ခြေစစ်ပွဲ အောင်မြင်ခဲ့တာပါ။ သြစတြေးလျ၊ အီရတ်၊ အိန္ဒိယနဲ့ ကူဝိတ်တို့ ပါဝင်တဲ့ အုပ်စု H ခြေစစ်ပွဲကိုတော့ အောက်တိုဘာလမှာ ကျင်းပသွားမှာ ဖြစ်ပါတယ်။

၂၀၂၃ အာရှယူ-၂၀ နောက်ဆုံးအဆင့် ပြိုင်ပွဲကို မတ်လ ၁ ရက်ကနေ ၁၈ ရက်အထိ အသင်းပေါင်း ၁၆ သင်းနဲ့ ကျင်းပသွားမှာ ဖြစ်ပါတယ်။

CNI Sport News

၂၀၂၂ ခုနှစ်၊ စက်တင်ဘာ ၁၇

ပီအက်စ်ဂျီ ကစားသမားဟောင်း ဒီယာလိုဟာ ပြီးခဲ့တဲ့နှစ် နိုဝင်ဘာလက အသင်းဖော် ဟမ်ရာအိုရီကို တိုက်ခိုက် မှုနဲ့ ပတ်သက်ပြီး ရဲတပ်ဖွဲ့က စုံစမ်းစစ်ဆေးနေချိန်အတွင်းမှာ ပြန်လည် ဖမ်းဆီးခံခဲ့ရပါတယ်။

ဟမ်ရာအိုရီဟာ ဒီယာလို မောင်းနှင်လာတဲ့ ကားနဲ့ အဖွဲ့လိုက် စားသောက်ပြီး အိမ်ပြန်လာချိန်မှာ မျက်နှာဖုံးစွပ် အမျိုးသား ၂ ဦးက ကားပေါ်က ဆွဲချပြီး ခြေထောက်ကို သံတုတ်တွေနဲ့ ရိုက်နှက်ခဲ့တာပါ။

ပြင်သစ်ကွင်းလယ် ကစားသမား ၂ ဦးဟာ ပီအက်စ်ဂျီအသင်းမှာ ကစားတဲ့နေရာ တူညီနေတာကြောင့် အပြိုင် အဆိုင် ကြိုးစားနေကြရတာ ဖြစ်ပါတယ်။ အသက် ၂၇ နှစ်အရွယ်ရှိ ဒီယာလိုဟာ ဒီအဖြစ်အပျက် အပြီးမှာ ဖမ်းဆီး ခံခဲ့ရပေမယ့် စွဲချက် မတင်ခံရဘဲ ပြန်လည် လွှတ်မြောက်လာခဲ့တာပါ။

ဒါပေမယ့် အခုတစ်ခါမှာတော့ ဒီယာလိုကို ပြန်လည် ဖမ်းဆီးခဲ့ပါတယ်။

ဒီယာလိုကတော့ သူမဟာ ဒီအဖြစ်အပျက်မှာ ပါဝင်ပတ်သက်ခြင်း မရှိကြောင်း ငြင်းဆိုထားပါတယ်။ အခုအချိန် မှာတော့ ဒီယာလိုဟာ ကိုယ်ခန္ဓာ ထိခိုက်စေမှုစွဲချက်နဲ့ စုံစမ်းစစ်ဆေးခံနေရပြီး ယာယီထိန်းသိမ်းခံရထားပါ။

ဒီယာလိုဟာ တရားမဝင် ချုပ်နှောင်မှုနဲ့ ပတ်သက်ပြီး တရားရုံးရဲ့ ကြားနာမှုကို စောင့်ဆိုင်းနေရတာ ဖြစ်ပါတယ်။ ဒီဖြစ်ရပ်နဲ့ ဆက်နွယ်တယ်လို့ ယူဆရတဲ့ အမျိုးသား ၄ ဦးကိုလည်း စုံစမ်းစစ်ဆေးမှုတွေ ပြုလုပ်နေတယ်လို့ သိရ တာပါ။

ပြင်သစ်ကစားသမားဟာ ပီအက်စ်ဂျီအသင်းနဲ့ ချုပ်ဆိုထားတဲ့ စာချုပ်ကုန်ဆုံးပြီးနောက် မနှစ်က ရာသီအကုန်မှာ ထွက်ခွာခဲ့ပါတယ်။ အခု ပွဲတွေကနေ အနားယူထားတာ ဖြစ်ပါတယ်။

အသက် ၃၂ နှစ်အရွယ်ရှိ ဟမ်ရာအိုရီဟာ ဒီတိုက်ခိုက်မှုကြောင့် ဆေးရုံမှာ ဆေးကုသမှု ခံယူခဲ့ရပြီး သူမရဲ့ လက်မောင်းနဲ့ ခြေထောက်တို့ကို ချုပ်ခဲ့ရပါတယ်။ သူမဟာ အခုနှစ် အစောပိုင်းမှာ အသင်းထံ ပြန်လည် ရောက်ရှိ လာခဲ့ပြီး စာချုပ် ကျန်ရှိနေဆဲဖြစ်ပေမယ့် အခုအချိန်ထိ ပါဝင်ကစားရခြင်း မရှိသေးပါဘူး။

ဒီယာလိုဟာ ပြင်သစ်လက်ရွေးစင်အတွက် ၇ ပွဲ ပါဝင်ကစားထားပြီး ၁ ဂိုး သွင်းယူထားကာ ဟမ်ရာအိုရီကတော့ ပွဲပေါင်း ၃၉ ပွဲ ပါဝင်ကစားထားပြီး ၃ ဂိုး သွင်းယူထားတာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ စက်တင်ဘာ ၁၇

ဘရန်ဖို့ဒ် အသင်းနည်းပြ သောမတ်စ်ဖရန့်ခ်က အာဆင်နယ်ဟာ ဒီရာသီ ပရီးမီးယားလိဂ် ပြိုင်ပွဲရဲ့ ဒုတိယ အကောင်းဆုံး အသင်းဖြစ်တယ်ဆိုတာ ယုံကြည်တယ်လို့ ပြောလိုက်ပါတယ်။

သောမတ်စ်ဖရန့်ခ်က “ ကျနော်တို့ဟာ အလွန်ကောင်းမွန်တဲ့ အသင်းနဲ့ ကစားရမှာပါ။ လွန်ခဲ့တဲ့ တစ်နှစ်က သူတို့ ကို အနိုင်ယူခဲ့ပေမယ့် အခု မတူတော့ဘူးလို့ ထင်ပါတယ်။ တနင်္ဂနွေနေ့မှာ လုပ်ဆောင်ရမှာက ကျနော်တို့အတွက် လုံးဝ မတူတော့ပါဘူး။ ဘာဖြစ်လို့လဲဆိုရင်တော့ သူတို့ဟာ မန်စီးတီးအသင်းပြီးရင် လိဂ်ပြိုင်ပွဲမှာ စွမ်းဆောင်ရည် အကောင်းဆုံးအသင်း ဖြစ်နေလို့ပါ။ သူတို့ဟာ ပထမ ၆ ပွဲမှာ အကောင်းဆုံး စွမ်းဆောင်ရည်ကို ပြသနိုင်ခဲ့ပါ တယ်”လို့ ပြောပါတယ်။

သူတို့ ၂ သင်းဟာ တနင်္ဂနွေနေ့မှာ ပရီးမီးယားလိဂ် ပွဲစဉ်အဖြစ် ယှဉ်ပြိုင်ကစားကြမှာ ဖြစ်ပါတယ်။ အာဆင်နယ် အသင်းဟာ ပရီးမီးယားလိဂ်ပြိုင်ပွဲမှာ အဖွင့်ပွဲ ၅ ပွဲဆက်တိုက် အနိုင်ရကာ အကောင်းဆုံး ပုံစံ ပြသနိုင်ခဲ့ပြီး ယူနိုက်တက်နဲ့အတွေ့မှာ ပထမဆုံး ရှုံးပွဲကြုံတွေ့ခဲ့ရတာပါ။

အာဆင်နယ်အသင်းနဲ့ ဘရန်ဖို့ဒ်အသင်းတို့ ယှဉ်ပြိုင်နေစဉ် (Reuters)

ဘရန်ဖို့ဒ်နဲ့ အာဆင်နယ် အသင်းတို့ဟာ ပြီးခဲ့တဲ့ရာသီ ပရီးမီးယားလိဂ်ပြိုင်ပွဲမှာ အိမ်ကွင်းပွဲစဉ်တွေကို အနိုင် ရရှိအောင် ကစားနိုင်ခဲ့ကြတာ ဖြစ်ပါတယ်။

သောမတ်စ်ဖရန့်ခ်က “ သူတို့ဟာ ပရီးမီးယားလိဂ်ဖလားကို ရယူနိုင်တဲ့ အနေအထားမှာ ရှိတယ်လို့ ကျနော်ထင်ပါ တယ်။ သူတို့ဟာ အံ့မခန်းဖွယ်ကောင်းနေပြီး ကစားသမားတွေလည်း ကြီးထွားလာခဲ့သလို၊ မှန်ကန်တဲ့ ကစား သမားတွေလည်း ရှိနေပါတယ်။ ဆလီဘာ ပြန်ရောက်လာခဲ့တယ်။ ဂျီးဆပ်စ်ဆိုရင် အလွန်ကောင်းမွန်တဲ့ ခေါ်ယူမှု ပါ။ အိုဒီဂတ်ဆိုရင်လည်း သူ့ရဲ့ ကစားပုံဟာ ဒီဘရိုင်းနဲ့ သိပ်ပြီး မကွာတော့ဘူးဆိုတာ ကျနော်ထင်ပါတယ်”လို့ ပြောပါတယ်။

ဘရန်ဖို့ဒ်အသင်းဟာ ဒီရာသီ အိမ်ကွင်းပွဲစဉ်မှာ ယူနိုက်တက်အသင်းကို ၄ ဂိုး- ဂိုးမရှိနဲ့ အနိုင်ရထားပြီး ရလဒ် ကောင်းတွေကို ပိုင်ဆိုင်ထားပါတယ်။

ဒီနောက်မှာတော့ ဘရန်ဖို့ဒ်အသင်းဟာ ပရီးမီးယားလိဂ် အမှတ်ပေးဇယား အဆင့် ၉ နေရာမှာ ရပ်တည်နေတာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ စက်တင်ဘာ ၁၇

အီကွေဒေါအသင်းဟာ အသုံးပြုလို့မရတဲ့ ကစားသမားဖြစ်တဲ့ ကတ်စတီလိုကို အသုံးပြုခဲ့တယ်ဆိုတဲ့ တိုင်ကြားချက်တွေကို ဖီဖာက ပယ်ချလိုက်ပါတယ်။အဲဒါကြောင့် အီကွေဒေါအသင်းဟာ ကမ္ဘာ့ဖလား ယှဉ်ပြိုင်ခွင့် ရရှိသွားပြီဖြစ်ပါတယ်။

ဒီမတိုင်ခင်က အီကွေဒေါအသင်း ညာနောက်ခံလူ ကတ်စတီလိုဟာ ၁၉၉၅ ခုနှစ်၊ ကိုလံဘီယာနိုင်ငံ တူမာကိုမှာ မွေးဖွားခဲ့တာဖြစ်ပြီး ၁၉၉၈ ခုနှစ်၊ အီကွေဒေါမှာ မွေးဖွားခဲ့တာမဟုတ်ဘူးလို့ ချီလီ ဘောလုံး အဖွဲ့ချုပ်က သက်သေအထောက်အထားတွေ ပြသခဲ့မှုအပေါ် ကတ်စတီလိုကလည်း မွေးစာရင်း အတု ပြုလုပ်ခဲ့တယ်လို့ ဝန်ခံလိုက်တာကြောင့် အီကွေဒေါ အသင်းဟာ ၂၀၂၂ ကမ္ဘာ့ဖလား ပြိုင်ပွဲကနေ ထုတ်ပယ်ခံရဖို့ အခြေအနေနဲ့ ရင်ဆိုင်ခဲ့ရတာပါ။

ယခုအခါ ချီလီဘက်က ဖီဖာရဲ့ ပယ်ချလိုက်တဲ့ ဆုံးဖြတ်ချက်အပေါ် မကျေနပ်တာကြောင့် အားကစား ခုံရုံးထံ အယူခံဝင်သွားမယ်လို့ သိရပါတယ်။ဖီဖာဟာ ဇွန်လကတည်းက ကတ်စတီလိုဟာ အသုံးပြုလို့ ရတဲ့ ကစားသမားဖြစ်တယ်လို့ ပြောထားခဲ့ပေမယ့် ချီလီနဲ့ ပီရူးဘောလုံးအဖွဲ့ချုပ်တွေက အယူခံထပ် ဝင်ခဲ့တာဖြစ်ပါတယ်။ အခုအချိန် မှာတော့ ဖီဖာအယူခံကော်မတီက ကတ်စတီလိုဟာ အီကွေဒေါအတွက် ကစားလို့ရတဲ့သူလို့ ပြောခဲ့တာ ပါ။

ချီလီဘောလုံးအဖွဲ့ချုပ်အထွေအထွေအတွင်းရေးမှူး ယန်းက “ဒီနေ့က ဘောလုံးနဲ့ စနစ်ရဲ့ ယုံကြည် စိတ်ချရမှုတွေအတွက် မှောင်မိုက်တဲ့ နေ့တစ်နေ့ပါပဲ”လို့ ပြောပါတယ်။ကတ်စတီလိုဟာ အီကွေဒေါ အတွက် ၂၀၂၂ ကမ္ဘာ့ဖလားခြေစစ်ပွဲ ၈ ပွဲ ပါဝင်ကစားခဲ့တာဖြစ်ပြီး ချီလီဘောလုံးအဖွဲ့ချုပ်ကတော့ ကစားသမားဟာ မွေးစာရင်းအတုအသုံးပြုခဲ့တယ်လို့ အခိုင်အမာပြောခဲ့တာပါ။ ပြီးခဲ့တဲအပတ်က ဒေးလီးမေးလ်ဟာ ကတ်စတီလိုရဲ့ အင်တာဗျူးအသေးစိတ်ကို ချပြခဲ့တာမှာ ကစားသမားဟာ စာရွက် စာတမ်းအတု အသုံးပြုခဲ့တယ်လို့ ဝန်ခံခဲ့တာဖြစ်ပါတယ်။

ဖီဖာကတော့ “တင်ပြထားတဲ့ စာရွက်စာတမ်းပေါ်မှာ အခြေခံပြီး ကစားသမားကို အီကွေဒေါ နိုင်ငံသား အဖြစ် အမြဲတမ်း သတ်မှတ်ရမယ်” လို့ ထုတ်ပြန်ထားတာပါ။ ချီလီဘောလုံးအဖွဲ့ချုပ် အထွေအထွေ အတွင်းရေးမှူး ယန်းက “ ဖီဖာရဲ့ ကြားနာမှုမှာ သူပါဝင်ဖို့ ငြင်းဆန်ခဲ့တာကို အံသြစရာ မရှိပါဘူး။ လက်ရှိ ဆုံးဖြတ်ချက်နဲ့ပတ်သက်ပြီး အားကစားဆိုင်ရာ ခုံရုံးမှာ အယူခံဝင်ဖို့ ကျန်ရှိနေပါသေးတယ်” လို့ ပြောခဲ့ပါ တယ်။

အယူခံဝင်သွားမယ့် ချီလီဘောလုံးအဖွဲ့ချုပ်ရှေ့နေဖြစ်သူ ကာလက်စ်ဇိုက “ရှေ့နေတစ်ဦးအနေနဲ့ ဒီလို မမျှတမှုကို ကျနော့်ဘဝမှာ တစ်ခါမှမမြင်တွေ့ဖူးပါဘူး။ ကစားသမားကို ကိုလံဘီယာမှာ မွေးဖွားခဲ့တယ် ဆိုတာ သံသယမရှိပါဘူး။ဒါကို သက်သေပြနိုင်တဲ့ စာရွက်စာတမ်းတွေအများကြီး ရှိပါတယ်။ ကစားသမားရဲ့ ဝန်ခံချက်ကို လူတိုင်းကြားခဲ့ရပါတယ်။လိမ်လည်မှုကို ခွင့်ပြုတယ်ဆိုတဲ့ သတင်းစကားက အလွန်ရှင်းပါတယ်”လို့ ပြောခဲ့ပါတယ်။
အီကွေဒေါဟာ ကမ္ဘာ့ဖလားခြေစစ်ပွဲ တောင်အမေရိကဇုန်ရဲ့ အဆင့် ၄ နေရာနဲ့ ခြေစစ်ပွဲတိုက်ရိုက် အောင်မြင်ခဲ့တာဖြစ်ပြီး ပီရူးက အဆင့် ၅၊ ချီလီက အဆင့် ၇ နေရာမှာ ရပ်တည်ခဲ့ပါတယ်။ အီကွေဒေါ အသင်းဟာ ကမ္ဘာ့ဖလားပြိုင်ပွဲမှာ ကာတာ၊ နယ်သာလန်၊ ဆီနီဂေါတို့နဲ့ ကျရောက်နေတာ ဖြစ်ပါတယ်။