- By CNI
- Category: အားကစား
- Hits: 1267
CNI Sport News
၂၀၂၂ ခုနှစ်၊ စက်တင်ဘာ ၈
လီဗာပူးလ်အသင်းနည်းပြ ကလောပ့်က နာပိုလီအသင်းကို အရေးနိမ့်ပြီးနောက် အဝေးကွင်းကို လိုက်ပါ အားပေးတဲ့ ပရိသတ်တွေကိုတောင်းပန်ခဲ့ပြီး အသင်းပိုင်ရှင်တွေက သူ့ကို ထုတ်ပယ်မှာမဟုတ်ဘူးလို့ ပြောလိုက်ပါတယ်။
ကလောပ့်က “ဒီလိုအလွန်ဆိုးရွားတဲ့ညတစ်ညအတွက် ပရိသတ်တွေကို ကျနော်တောင်းပန်ချင်ပါတယ်။ နာပိုလီက အလွန်ကောင်းမွန်ခဲ့ပြီး ကျနော်တို့က အလွန်ဆိုးရွားခဲ့ပါတယ်။ကျနော်ထုတ်ပယ်ခံရမှာ မဟုတ်ပါဘူး။ဒါပေမယ့် ဘယ်သူကတော့ သိနိုင်မှာလဲ။ပိုင်ရှင်တွေက အမျိုးမျိုးရှိပါတယ်။ကျနော်တို့ ပိုင်ရှင်ကတော့ အေးအေးဆေးဆေးပါပဲ။သူတို့က ဒီအခြေအနေနဲ့ပတ်သက်ပြီး ရှင်းပြနိုင်ဖို့ ကျနော့်ဆီက မျှော်လင့်ထားပါတယ်။အခြားတစ်ယောက်ယောက်ကို ဝင်ရောက်ဖြေရှင်းပေးဖို့ မလိုဘူးလို့ သူတို့ဘက် ကလည်း မြင်ထားပါတယ်။သူတို့အမြင်ပြောင်းလဲတဲ့နေ့မှာတော့ သူတို့က ကျနော့်ကို ပြောပြနိုင်ပါ တယ်”လို့ ပြောခဲ့တာပါ။
လီဗာပူးလ်အသင်းဟာ အခုနှစ်ရာသီ ချန်ပီယံလိဂ်အဖွင့်ပွဲစဉ်အဖြစ် နာပိုလီအသင်းအိမ်ကွင်းမှာ ကစားခဲ့ရာ ၄ ဂိုး- ၁ ဂိုးနဲ့ ဂိုးပြတ်အရေးနိမ့်ခဲ့တာဖြစ်ပါတယ်။လီဗာပူးလ်အသင်းဟာ အခုနှစ်ရာသီမှာ ရလဒ်အနည်းငယ်ဆိုးရွားနေတာဖြစ်ပြီး အခုရှုံးပွဲကြောင့် အသင်းအပေါ်မှာ ဝေဖန်မှုကျရောက်လာခဲ့ တာပါ။လီဗာပူးလ်နည်းပြကလောပ့်က ပိုပြီးကောင်းမွန်တဲ့ ပြင်ဆင်မှုတစ်ခုကို ရှာဖွေဖို့ ကြိုးစားရမယ်လို့ ပွဲအပြီးမှာ ပြောခဲ့ပါတယ်။
ကလောပ့်က “ကျနော်တို့ဟာ ကိုယ့်ကိုကိုယ်ပြန်ပြီးဆန်းစစ်ဖို့ လိုအပ်ပါတယ်။အခုက ခက်ခဲတဲ့ အခြေအနေမှာရှိနေပြီး ဒါကို လုံးဝသံသယမရှိပါဘူး။ခင်ဗျားအနေနဲ့ ကောင်းမွန်စွာ မကစားနိုင်ဘူး ဆိုရင်လည်း ခံစစ်ပိုင်းကိုတော့ အမြင်ဆုံးအဆင့် လုပ်နိုင်ရပါမယ်။ဘောလုံးပုံစံအသစ်ကို တီထွင်နေဖို့ မလိုပါဘူး။ကျနော်တို့ တိုးတက်ဖို့ပဲ လိုတာပါ။အရာရာတိုင်းမှာ အများကြီးပိုကောင်းလာဖို့အတွက် ရှာဖွေမှုပြုလုပ်ဖို့ ကြိုးစားရပါမယ်”လို့ ပြောခဲ့တာပါ။
လီဗာပူးလ်အသင်းဟာ ဒီရာသီ ပြိုင်ပွဲစုံအဝေးကွင်းပွဲစဉ်တွေမှာ နိုင်ပွဲပျောက်ဆုံးနေခဲ့တာ ဖြစ်ပါတယ်။ လီဗာပူးလ် ဘယ်နောက်ခံလူ ရော်ဘတ်ဆန်ကလည်း အသင်းဟာ ဒီရလဒ်နဲ့ ထိုက်တန်တယ်လို့ ဝန်ခံ ခဲ့ပြီး ပထမပိုင်းမှာဆို သူတို့ဘက်က လူတစ်ယောက်အသာရပြီး ကစားနေတယ်လို့ ခံစားရကြောင်း ပွဲအပြီး အင်တာဗျူးမှာ ပြောခဲ့တာပါ။
လီဗာပူးလ်အသင်းဟာ စနေနေ့မှာ ပရီးမီးယားလိဂ်ပွဲစဉ်အဖြစ် အိမ်ကွင်းမှာ ဝုလ်ဗ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source:The Sun
- By CNI
- Category: အားကစား
- Hits: 726
CNI Sport News
၂၀၂၂ ခုနှစ်၊ စက်တင်ဘာ ၇
ကားလို့စ်ကွီးရော့စ်ဟာ ကမ္ဘာ့ဖလားပြိုင်ပွဲကျင်းပဖို့ ၃ လလောက်ပဲ လိုတော့တဲ့အချိန်မှာ အီရန်အသင်း ကို နည်းပြအဖြစ်ကိုင်တွယ်ဖို့ သဘောတူညီမှုရခဲ့တယ်လို့ အီရန်နိုင်ငံပိုင်မီဒီယာက ဖော်ပြခဲ့ပါတယ်။
အီရန်နိုင်ငံရဲ့ တရားဝင်သတင်းဌာနက ကားလို့စ်ကွီးရော့စ်ဟာ အခုသတင်းပတ်အကုန်မှာ တီဟီရန်ကို သွားရောက်ပြီး ဒရာဂန်ဆကာစစ်ရဲ့နေရာမှာ အစားထိုးကိုင်တွယ်ဖို့ စာချုပ်ချုပ်ဆိုသွားမယ်လို့ ဖော်ပြ ထားတာပါ။အဆိုပါခရိုအေးရှားလူမျိုးနည်းပြဟာ ဝီလ်မို့စ်ရဲ့နေရာမှာ အမြဲတမ်းနည်းပြအဖြစ် တာဝန်ယူ ပြီးနောက် အီရန်အသင်းကို ၁၈ ပွဲကိုင်တွယ်ထားခဲ့ရာမှာ ၁၅ ပွဲအနိုင်ရပြီး ကာတာ ကမ္ဘာ့ဖလား ခြေစစ်ပွဲ အောင်မြင်အောင် ဦးဆောင်ခဲ့တာဖြစ်ပါတယ်။
ကားလို့စ်ကွီးရော့စ်ဟာ အီရန်အသင်းကို ၂၀၁၁ ကနေ ၂၀၁၉ အထိ ကာလကြာရှည်ကိုင်တွယ်ခဲ့ပြီး ၂၀၁၄ နဲ့ ၂၀၁၈ ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရရှိအောင်စွမ်းဆောင်နိုင်ခဲ့သေးတာပါ။ပြီးခဲ့တဲ့ အင်္ဂါနေ့က မက်ဒီ တာ့ချ်ဟာ အီရန်ဘောလုံးအဖွဲ့ချုပ်ဥက္ကဋ္ဌ အဖြစ် ရွေးချယ်ခံရပြီးကတည်းက ကားလို့စ်ကွီးရော့စ်ဟာ လက်ရွေးစင်အသင်းနည်းပြရာထူးကို ပြန်လည်ဝင်ရောက်ဖို့ ချိတ်ဆက်ခံခဲ့ရတာဖြစ်ပါတယ်။
၂၀၁၈ က ရုရှားမှာ ကျင်းပခဲ့တဲ့ ကမ္ဘာ့ဖလားပြိုင်ပွဲမှာ အီရန်အသင်းဟာ ကားလို့စ်ကွီးရော့စ် လက်ထက် မှာ အကောင်းဆုံးခြေစွမ်းပြသနိုင်ခဲ့ပြီး မော်ရိုကိုကို အနိုင်ရခဲ့ကာ ပေါ်တူဂီကို သရေကစား နိုင်ခဲ့တာပါ။ ဒါပေမယ့် စပိန်အသင်းကို အရေးနိမ့်ခဲ့လို့ ကမ္ဘာ့ဖလားပြိုင်ပွဲရဲ့ အုပ်စုအဆင့်ကနေ ထွက်ခွာခဲ့ရတာ ဖြစ်ပါတယ်။အီရန်အသင်းဟာ အခုနှစ်ကမ္ဘာ့ဖလားပြိုင်ပွဲမှာတော့ အင်္ဂလန်၊ အမေရိကန်၊ ဝေးလ်စ်တို့နဲ့ တစ်အုပ်စုတည်းကျရောက်နေတာပါ။
အဖွင့်ပွဲစဉ်အဖြစ် နိုဝင်ဘာလ ၂၁ ရက် အင်္ဂလန်အသင်းနဲ့ စတင်ယှဉ်ပြိုင်ရမှာဖြစ်ပြီး ၂၅ ရက်မှာ ဝေးလ်စ် အသင်း၊ ၂၉ ရက်မှာ အုပ်စုနောက်ဆုံးပွဲစဉ်အဖြစ် အမေရိကန်အသင်းနဲ့ ယှဉ်ပြိုင်ရမှာ ဖြစ်ပါတယ်။ ကားလို့စ်ကွီးရော့စ်ဟာ အီဂျစ်အသင်းကို နောက်ဆုံးကိုင်တွယ်ခဲ့တာဖြစ်ပြီး ၂၀၂၂ ကမ္ဘာ့ဖလားခြေစစ်ပွဲ မအောင်မြင်ခဲ့လို့ နှစ်ဦးသဘောတူစာချုပ်ဖျက်သိမ်းခဲ့တာ ဖြစ်ပါတယ်။
Source:ChannelNewsAsia
- By CNI
- Category: အားကစား
- Hits: 704
CNI Sport News
၂၀၂၂ ခုနှစ်၊ စက်တင်ဘာ ၇
ရီးရယ်လ်အသင်းတိုက်စစ်ကစားသမား ဟာဇတ်ဟာ ဆဲလ်တစ်အသင်းကို အနိုင်ရခဲ့တဲ့ ချန်ပီယံလိဂ် အုပ်စုအဖွင့်ပွဲစဉ်မှာ ၂၀၂၀ နောက်ပိုင်း၂ နှစ်ကျော်အကြာမှ ပထမဆုံးချန်ပီယံလိဂ် သွင်းဂိုးကို ရယူ နိုင်ခဲ့တာဖြစ်ပါတယ်။
ဒီပွဲမှာ ရီးရယ်လ်အသင်းက ဆဲလ်တစ်အသင်းကို ၃ ဂိုး- ဂိုးမရှိနဲ့ အနိုင်ရရှိခဲ့တာပါ။ ရီးရယ်လ်အတွက်ဂိုး တွေကို ဗီနီစီးယက်စ်၊ မိုဒရစ်နဲ့ ဟာဇတ်တို့က သွင်းယူခဲ့တာဖြစ်ပါတယ်။
ဟာဇတ်ဟာ ဒီပွဲစဉ်ရဲ့ ပွဲချိန် မိနစ် ၃၀ မှာ ဘန်ဇီမာဒဏ်ရာ ရသွားခဲ့လို့ လူစားဝင်ကစားသမားအဖြစ် ပါဝင်ခဲ့ရတာပါ။ဒါပေမယ့် ဘယ်လ်ဂျီယံအသင်းခေါင်းဆောင်ဟာ ဒီပွဲမှာ ခြေစွမ်းပြသခဲ့ပြီး ၁ ဂိုးသွင်းယူခဲ့သလို အသင်းဖော် မိုဒရစ်သွင်းယူခဲ့တဲ့ ဂိုးကိုလည်း ဖန်တီးပေးခဲ့တာပါ။
ရီးရယ်လ်အသင်းနည်းပြ အန်ဆယ်လော့တီက ဟာဇတ် အလွန်ပျော်ရွှင်နေတာကို မြင်တွေ့ခဲ့ရတယ်လို့ ပွဲအပြီးမှာ ပြောခဲ့ပါတယ်။အန်ဆယ်လော့တီက “ ကျနော်သူ့ကို လူစားထည့်သွင်းလိုက်ချိန်မှာ ဟာဇတ်ရဲ့ အခိုက်အတန့်ပဲလို့ ကျနော်ထင်ခဲ့ပါတယ်။သူကလည်း ကျနော်မှန်တယ်ဆိုတာကို သက်သေပြသနိုင်ခဲ့ ပါတယ်။သူ အခုအလွန်ပျော်ရွှင်နေပါတယ်။
ဒီလိုပုံစံအတိုင်းပဲ သူဆက်ရှိဖို့ ကျနော်မျှော်လင့်ပါတယ်”လို့ ပွဲအပြီးမှာ သတင်းထောက်တွေကို ပြောခဲ့တာပါ။
ဟာဇတ်ဟာ ရီးရယ်လ်အသင်းကို ၂၀၁၉ က ချယ်လ်ဆီးကနေ ရောက်ရှိလာခဲ့တာဖြစ်ပြီး ကစားသမား ဟာ စပိန်ကလပ်ကို ရောက်ရှိလာကတည်းက ဒဏ်ရာတွေနဲ့ လုံးပန်းခဲ့ရတာဖြစ်ပါတယ်။ သူဟာ ဒီလို အခြေအနေတွေကြောင့် ရီးရယ်လ်အသင်းအတွက် ပွဲစဉ်ပေါင်း ၆၉ ပွဲသာ ပါဝင်ကစားထားနိုင်ခဲ့ပြီး သွင်းဂိုးကလည်း အခုသွင်းဂိုး အပါမှ ၇ ဂိုးသာ ရရှိထားတာပါ။
ဟာဇတ်ဟာ ဒီရာသီမှာတော့ ကြံ့ခိုင်မှုအပြည့်နဲ့ အသင်းအတွက် ပါဝင်ကစားနိုင်ဖို့ ပစ်မှတ်ထားနေတာ ဖြစ်ပါတယ်။ချယ်လ်ဆီးကစားသမားဟောင်းဟာ ဆဲလ်တစ်နဲ့ပွဲမှာ သွင်းယူခဲ့တဲ့ဂိုးကြောင့် သူ့ရဲ့ ကလပ်နဲ့ နိုင်ငံအသင်းကစားသမားဘ၀ သွင်းဂိုး ၂၀၀ ပြည့်မြောက်သွားခဲ့တာပါ။ရီးရယ်လ်အသင်းဟာ အခုအပတ် မှာ စပိန်လာလီဂါပွဲစဉ်အဖြစ် မာယော့ကာအသင်းနဲ့ ယှဉ်ပြိုင်ရမှာ ဖြစ်ပါတယ်။
Source:DailyMail
- By CNI News
- Category: အားကစား
- Hits: 767
CNI Sport BREAKING NEWS
၂၀၂၂ ခုနှစ်၊ စက်တင်ဘာ ၇
ချယ်လ်ဆီးအသင်းဟာ ဒိုင်နမိုဇာဂရက်အသင်းကို ချန်ပီယံလိဂ် အဖွင့်ပွဲစဉ်မှာ အရေးနိမ့်ပြီးနောက် နည်းပြ တူချယ်လ်ကို ရာထူးကနေ ထုတ်ပယ်လိုက်ပြီ ဖြစ်ပါတယ်။
Source: BBC
- By CNI
- Category: အားကစား
- Hits: 1240
CNI Sport News
၂၀၂၂ ခုနှစ်၊ စက်တင်ဘာ ၇
မန်စီးတီးအသင်းက ဆီဗီလာအသင်းကို ၄ ဂိုး- ဂိုးမရှိနဲ့ ဂိုးပြတ်အနိုင်ရရှိခဲ့တဲ့ ချန်ပီယံလိဂ် အုပ်စု အဖွင့် ပွဲစဉ်မှာ ၂ ဂိုးသွင်းယူပြီးနောက် ဟာလန်းက ချန်ပီယံလိဂ်ပြိုင်ပွဲမှာ စံချိန်သစ်တင်လိုက်ပါတယ်။
ပြီးခဲ့တဲ့ အပြောင်းအရွှေ့ကမှ ဒေါ့မွန်ကနေ ရောက်ရှိလာခဲ့တဲ့ ဟာလန်းဟာ ဒီပွဲမှာ သွင်းယူခဲ့တဲ့ ဂိုးတွေ ကြောင့် ချန်ပီယံလိဂ် ပထမဆုံးပွဲ ၂၀ မှာ ၂၅ ဂိုးသွင်းယူနိုင်ခဲ့တဲ့ ပထမဆုံးကစားသမား ဖြစ်လာတာပါ။ ဒါ့အပြင် နော်ဝေတိုက်စစ်မှူးဟာ ဆဲလ်ဘတ်၊ ဒေါ့မွန်နဲ့ မန်စီးတီးအတွက် ပွဲထွက်ခွင့်ရခဲ့တဲ့ ချန်ပီယံလိဂ် ပွဲဦးထွက်တွေမှာ ဂိုးသွင်းနိုင်တဲ့ မှတ်တမ်းကောင်းကိုလည်း ပိုင်ဆိုင်နိုင်ခဲ့တာဖြစ်ပါတယ်။
ဟာလန်းဟာ မန်စီးတီးအတွက် ပရီးမီးယားလိဂ် ၆ ပွဲကစားအပြီးမှာ ၁၀ ဂိုးသွင်းယူထားတာကြောင့် ပြိုင်ပွဲစုံ ၈ ပွဲမှာ ၁၂ ဂိုးသွင်းယူထားနိုင်ခဲ့တာပါ။ဟာလန်းဟာ ဆီဗီလာနဲ့ပွဲမှာ မိနစ် ၇၀ အထိသာ ပါဝင် ကစားခွင့်ရခဲ့ပြီး နည်းပြ ဂွာဒီယိုလာက သူ့ကို လူစားလဲမှုပြုလုပ်သွားခဲ့တာ ဖြစ်ပါတယ်။ မန်စီးတီး နည်းပြ ဂွာဒီယိုလာက ဟာလန်းအနေနဲ့ ဒီပုံစံအတိုင်းကိုပဲ ဆက်ပြီးသွားနေဖို့ လိုအပ်တယ်လို့ ပွဲအပြီးမှာ ပြောခဲ့တာပါ။
ဂွာဒီယိုလာက “သူဟာ မယုံနိုင်လောက်အောင် ကောင်းမွန်တဲ့ ဂိုးသွင်းစွမ်းရည်ရှိတဲ့သူပါ။သူ့ရဲ့ ကိန်း ဂဏန်းတွေလည်း မယုံနိုင်လောက်အောင်ပါပဲ။အဲဒါကြောင့် စပါးနဲ့ ကစားမယ့်ပွဲစဉ်မှာလည်း သူဂိုးတွေ ဆက်သွင်းနိုင်ဖို့ ကျနော်တို့ မျှော်လင့်ပါတယ်။ကိန်းဂဏန်းဆိုတာ သူလုပ်ခဲ့တာကို ပြောနေတာပါ။အခု သွင်းဂိုး ၂ ဂိုးတင်မဟုတ်ပါဘူး။ဒီနေရာမှာ သူအမြဲတမ်းရှိနေမှာပါ။သူဟာ အမြဲတမ်းဂိုးပိုသွင်းတယ်ဆိုတဲ့ ခံစားချက်ရှိပါတယ်”လို့ ပြောခဲ့ပါတယ်။
ဒီဘရိုင်းကလည်း ဟာလန်းဆီကနေ နောက်ထပ်အများကြီးလာဖို့ ရှိသေးတယ်လို့ ယုံကြည်နေတာပါ။ “အခုအချိန်မှာ သူဟာ ဂိုးတွေသွင်းပြီး ကျနော်တို့ကို အနိုင်ရရှိအောင် ကူညီပေးနေပါတယ်။သူဟာ ကျနော်တို့နဲ့ လိုက်လျောညီထွေဖြစ်အောင်လုပ်တဲ့ ပုံစံက တကယ်ကိုကောင်းပါတယ်။ဒါပေမယ့် ဂိုးသွင်းယူမှုတွေအပြင် တခြားအပိုင်းတွေလည်း ရှိပါသေးတယ်။ဒီအပိုင်းကိုတော့ လိုက်လျောညီထွေ ဖြစ်အောင်လုပ်ဖို့ ခက်ခဲနိုင်တယ်”လို့ ဒီဘရိုင်းက ပြောခဲ့ပါတယ်။
ပြီးခဲ့တဲ့အပတ်က ဗီလာနဲ့ ပရီးမီးယားလိဂ်ပွဲစဉ်မှာ သရေကျခဲ့တဲ့ မန်စီးတီးအသင်းဟာ ဒီတစ်ပတ်မှာ တော့ စပါးအသင်းနဲ့ အိမ်ကွင်းပွဲစဉ်ယှဉ်ပြိုင်ရမှာ ဖြစ်ပါတယ်။
Source:DailyMail
- By CNI
- Category: အားကစား
- Hits: 889
CNI Sport News
၂၀၂၂ ခုနှစ်၊ စက်တင်ဘာ ၇
ပရီးမီးယားလိဂ်ကလပ် ချယ်လ်ဆီးအသင်းရောင်းချလို့ရတဲ့ ငွေတွေကို ယူကရိန်းထံ မလွှဲရသေးဘူးလို့ ဗြိတိန်အလုပ်သမားလွတ်တော်အမတ် ခရစ္စဘရိုင်ယန့်က ပြောလိုက်ပါတယ်။
ခရစ္စဘရိုင်ယန့်က “ဗြိတိန်မှာ ဒဏ်ခတ်ပိတ်ဆို့ခံထားရတဲ့ သူတွေထဲကတစ်ဦးမှာ အေဘရာမိုဗစ်ချ် လည်း ပါဝင်ပါတယ်။သူ့ရဲ့ ချယ်လ်ဆီးကို မေလ ၃၀ ရက်မှာရောင်းချခဲ့ပါတယ်။ဒါပေမယ့် ပေါင်သန်း ပေါင်းများစွာဟာ သူ့ရဲ့ ဘဏ်အကောင့်ထဲမှာ ရှိနေပါတယ်။ဘာကြောင့်လဲဆိုရင် ယူကရိန်းပြည်သူတွေ ထံပေးမယ့် ငွေတွေကို နိုင်ငံခြားရေးရုံးက ရန်ပုံငွေမထူထောင်သေးလို့ပါ” လို့ အောက်လွှတ်တော်မှာ အင်္ဂါနေ့က ပြောခဲ့တာပါ။
ဒါ့အပြင် နိုင်ငံခြားရေးရုံးက ဘာကြောင့်ဒီလောက်ကြာနေတာလဲ၊ဘယ်တော့ခွဲပေးမှာလဲဆိုပြီးတော့ ခရစ္စဘရိုင်ယန့်က ထပ်မံပြောခဲ့ပါတယ်။ခရစ္စဘရိုင်ယန့်ရဲ့ ပြောဆိုမှုကို တုံ့ပြန်တဲ့အနေနဲ့ နိုင်ငံခြားရေးရုံး ဝန်ကြီးဖြစ်သူက အစိုးရအနေနဲ့ တစ်ဦးချင်းကိစ္စရပ်တွေကို မှတ်ချက်မပေးခဲ့ပေမယ့် သူတို့ဟာ ကျူး ကျော်မှုဖြစ်ပြီးကတည်းက ရုရှားနဲ့ဆက်စပ်တဲ့ လူပေါင်း ၁,၁၀၀ ကို ဒဏ်ခတ်ပိတ်ဆို့ထားတယ်လို့ ပြောခဲ့တာပါ။
ချယ်လ်ဆီးအသင်းပိုင်ရှင်ဟောင်းဖြစ်တဲ့ ရုရှားဘီလျံနာ အေဘရာမိုဗစ်ချ်ဟာ ဒီအသင်းကို ရောင်းချလို့ ရတဲ့ ငွေတွေနဲ့ ရုရှားကျူးကျော်မှုကြောင့် ထိခိုက်ခံစားခဲ့ရတဲ့ ယူကရိန်းပြည်သူတွေကို လှူဒါန်းသွား မယ်လို့ ကတိပြုခဲ့ပါတယ်။ချယ်လ်ဆီးအသင်းဟာ လက်ရှိအချိန်မှာ တောဒ့်ဘိုလီအစုအဖွဲ့လက်ထဲကို ရောက်ရှိနေတာဖြစ်ပြီး သူ့ရဲ့ပထမဆုံးအပြောင်းအရွှေ့မှာ ငွေကြေးအများအပြားသုံးစွဲခဲ့တာပါ။
ချယ်လ်ဆီးအသင်းဟာ ပြီးခဲ့တဲ့နွေရာသီအပြောင်းအရွှေ့မှာ ဖိုဖာနာ၊ကူကူရယ်လ်လာ၊ စတာလင်၊ ကူလီ ဘာလီ၊ အူဘာမီယန်း အစရှိတဲ့ ကစားသမားတွေအတွက် အသုံးစရိတ် ပေါင်သန်း ၂၅၀ ကျော် အသုံးပြု ခဲ့တာ ဖြစ်ပါတယ်။ဒါပေမယ့် ချယ်လ်ဆီးအသင်းဟာ အခုနှစ်ရာသီမှာ ရလဒ်ကောင်းရယူနိုင်ဖို့ ရုန်းကန် နေရပြီး ဒိုင်နမိုဇာဂရက်နဲ့ ကစားခဲ့တဲ့ ချန်ပီယံလိဂ်အုပ်စုအဖွင့်ပွဲစဉ်မှာလည်း ၁ ဂိုး- ဂိုးမရှိနဲ့ အရေးနိမ့် ခဲ့တာဖြစ်ပါတယ်။
Source:Goal
- By CNI
- Category: အားကစား
- Hits: 992
CNI Sport News
၂၀၂၂ ခုနှစ်၊ စက်တင်ဘာ ၆
ပြင်သစ်လီဂူးဝမ်းပွဲစဉ်မှာ ပင်နယ်တီ ကန်သွင်းမှုနဲ့ ပတ်သက်ပြီး အငြင်းအခုံ ဖြစ်ခဲ့ပေမယ့် နေမာနဲ့ ကောင်းမွန်တဲ့ ဆက်ဆံရေးရှိတယ်လို့ ဘတ်ပီက ပြောပါတယ်။
ဘတ်ပီက “ ကျနော်တို့ရဲ့ ဆက်ဆံရေးက အမြဲတမ်း ဒီလိုပါပဲ။ အနည်းငယ် နွေးထွေးတဲ့ အခိုက်အတန့်တွေရှိသလို အေးတိအေးစက်ဖြစ်တဲ့ အချိန်တွေလည်း ရှိပါတယ်။ တစ်ခါတလေမှာ ကျနော်တို့ဟာ အခင်ဆုံး သူငယ်ချင်းတွေ ဖြစ်ပြီး တချို့အချိန်တွေမှာဆို စကားပြောနည်းကြပါတယ်။ ဒါပေမယ့် အမြဲတမ်းတော့ လေးစားမှုရှိပါတယ်။ အသင်းမှာ ဒီလို ကစားသမားတွေ ရှိရင်တော့ ပြဿနာဖြစ်တက်ပါတယ်။ ဒါပေမယ့် ကျနော်တို့ တစ်ယောက်နဲ့ တစ်ယောက် အမြဲတမ်းလေးစား မှုရှိပါတယ်”လို့ ပြောပါတယ်။
နေမာနဲ့ ဘတ်ပီတို့ဟာ မောင့်ပယ်လီယာကို အနိုင်ရခဲ့တဲ့ ပြင်သစ်လီဂူးဝမ်းပွဲစဉ်မှာ ပင်နယ်တီ ကန်သွင်းမှုနဲ့ ပတ်သက်ပြီး အငြင်းအခုံ ဖြစ်ခဲ့ကြပါတယ်။
ပင်နယ်တီ ကန်ဖို့ လုနေကြတဲ့ နေမာနဲ့ဘတ်ပီ
ဘတ်ပီဟာ ဒီပွဲမှာ ပီအက်စ်ဂျီအသင်း ပထမဆုံးပင်နယ်တီ ကန်သွင်းမှုရခဲ့တာကို ကန်သွင်းတာမှာ လွဲချော်သွားခဲ့ တာပါ။ နောက်ထပ်တစ်ကြိမ် ပင်နယ်တီ ကန်သွင်းခွင့်ရတဲ့အချိန်မှာ ဘတ်ပီက ကန်သွင်းချင်ခဲ့ပေမယ့် နေမာက ကန်သွင်းသွားခဲ့တာ ဖြစ်ပါတယ်။ ဒါနဲ့ ပတ်သက်ပြီး အဆင်မပြေမှုတွေ ရှိခဲ့ကြတာပါ။
နောက်ပိုင်းပွဲတွေမှာတော့ ၂ ဦးသား ပြန်အဆင်ပြေ သွားခဲ့ကြပြီး လီဂူးဝမ်းပြိုင်ပွဲမှာ ၇ ဂိုးစီ သွင်းယူထားကာ ဂိုး သွင်း အများဆုံး ကစားသမားတွေအဖြစ် ထိပ်ဆုံးမှာ ဦးဆောင်နေခဲ့ပါတယ်။ မက်ဆီကလည်း သူတို့ ၂ ဦး ဂိုးသွင်း ယူမှုတွေ ပြုလုပ်နိုင်အောင် ဂိုးဖန်တီးမှု ၆ ကြိမ် ပြုလုပ်ထား နိုင်ခဲ့တာပါ။
ပီအက်စ်ဂျီအသင်းဟာ ဒီရာသီ လီဂူးဝမ်း ၆ ပွဲကစားအပြီးမှာ ၂၄ ဂိုး သွင်းယူထားကာ ဂိုးသွင်းစွမ်းရည်ကို ပြသထား တာ ဖြစ်ပါတယ်။
ပီအက်စ်ဂျီအသင်းဟာ ဒီရာသီမှာ ချန်ပီယံလိဂ် အပါအဝင် ဆုဖလားအားလုံးကို ရယူနိုင်ဖို့ ပစ်မှတ်ထားနေတာ ဖြစ်ပြီး ပိုချက်တီနိုကို ထုတ်ပယ်ကာ ဂယ်လ်တီယာကို နည်းပြသစ်အဖြစ် ခန့်အပ်ခဲ့တာပါ။
ချန်ပီယံလိဂ်အုပ်စု အဖွင့်ပွဲစဉ်အဖြစ် ဂျူဗင်တပ်စ်အသင်းနဲ့ ကစားခဲ့တဲ့ ပီအက်စ်ဂျီအသင်းဟာ ဒီတစ်ပတ်မှာ လီဂူးဝမ်းပွဲစဉ်အဖြစ် ဘရက်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: CNA
- By CNI
- Category: အားကစား
- Hits: 879
CNI Sport News
၂၀၂၂ ခုနှစ်၊ စက်တင်ဘာ ၆
WBC ဟဲဗီးဝိတ် လက်ဝှေ့ခါးပတ်အတွက် ‘ Battle of Britain’ ထိုးသတ်ပွဲအဖြစ် တိုင်ဆန်ဗျူရီရဲ့ လူသိရှင်ကြား စိန်ခေါ်မှုကို လက်ခံကြောင်း အန်သိုနီဂျိုရွှာက ပြောလိုက်ပါတယ်။
အန်သိုနီဂျိုရွှာဟာ ပြီးခဲ့တဲ့လက ဆော်ဒီမှာထိုးသတ်ခဲ့တဲ့ WBA, WBO, IBF နဲ့ IBO ချန်ပီယံခါးပတ် မကျေပွဲမှာ အူဆက်ခ်ကို ၂ ပွဲဆက်တိုက် အရေးနိမ့်ခဲ့တာပါ။
ဗြိတိန်နိုင်ငံသားဟာ အခုနှစ်မကုန်ခင် လက်ဝှေ့ကြိုးဝိုင်းထဲ ပြန်လည် ဝင်ရောက်ချင်တယ်လို့ ပြောထားခဲ့ပါတယ်။ တိုင်ဆန်ဗျူရီဟာ ပြီးခဲ့တဲ့ ဧပြီလက ထိုးသတ်ခဲ့တဲ့ ဒီလီယန်ဝှိုက်နဲ့ ပွဲအပြီးမှာ လက်ဝှေ့ ကစားသမားဘဝက အနား ယူပြီလို့ ကြေညာခဲ့ပေမယ့် အခု ထပ်မံထိုးသတ်ဦးမယ်လို့ ကြေညာခဲ့တာပါ။
တိုင်ဆန်ဗျူရီက “ လာမယ့်လ အနည်းငယ်အတွင်းမှာ ကျနော်ထိုးသတ်ဖို့ ရှိတယ်ဆိုတာ အားလုံးလည်း ကြားကြ မယ်လို့ ထင်ပါတယ်။ အန်သိုနီဂျိုရွှာရေ လာမယ့် လအနည်းငယ်အတွင်း WBC ဟဲဗီးဝိတ် ချန်ပီယံဆုအတွက် ငါ့ကို တိုက်ခိုက်ခွင့်ရမယ့် အခွင့်အရေး ပေးချင်ပါတယ်။ မင်းက ၁၂ ချီ ထိုးသတ်တဲ့ ပွဲကနေ ဆင်းလာတာဆိုတော့ ဒီပွဲက မင်းအတွက် ကိုက်ညီမှုရှိပြီး မင်း အဆင်သင့် ဖြစ်နေမှာပါ”လို့ ပြောခဲ့တာကို သူ့ရဲ့ ဆိုရှယ်မီဒီယာမှာ ဗွီဒီယိုဖိုင် တင်ခဲ့တာ ဖြစ်ပါတယ်။
တိုင်ဆန်ဗျူရီကိုတွေ့ရစဉ် (Reuters)
အူဆက်ခ်ဟာ အန်သိုနီဂျိုရွှာကို အနိုင်ရပြီးနောက် သူထိုးသတ်ချင်တဲ့ တစ်ပွဲတည်းသော ပွဲစဉ်က တိုင်ဆန်ဗျူရီနဲ့ ဖြစ်တယ်လို့ ပြောထားပါတယ်။ ဒါပေမယ့် သူဟာ အနားယူချင်ပြီး မိသားစုကို အချိန်ပေးချင်တာကြောင့် အခုနှစ် ထဲမှာ ဘယ်ပွဲမှ ထိုးသတ်မှာ မဟုတ်ဘူးလို့ ပြောခဲ့ပါတယ်။
တိုင်ဆန်ဗျူရီက “အန်သိုနီဂျိုရွှာရေ မင်းစိတ်ဝင်စားရင် မင်းကိုငါ ရက်ချိန်းပြန်ပေးလိုက်ပါတယ်။ ဒီပွဲဟာ WBC ဟဲဗီးဝိတ် ချန်ပီယံဆုအတွက် ဗြိတိန်ထိုးသတ်မယ့်ပွဲပါ။ မင်းစိတ်ဝင်စားရင် ငါ့ကို အကြောင်းကြားပါ။ မဟုတ်ဘူး ဆိုရင်တော့ တခြားပြိုင်ဘက်ကို ငါရွေးချယ်ရလိမ့်မယ်”လို့ ပြောခဲ့တာပါ။
အန်သိုနီဂျိုရွှာကလည်း အဆင်သင့်ပဲလို့ ပြန်လည် တုံ့ပြန်သွားခဲ့ပါတယ်။
အန်သိုနီဂျိုရွှာက “ ကျနော်အွန်လိုင်းမှာ ဆွေးနွေးမှုတွေ ပြုလုပ်နေတာ မဟုတ်ပါဘူး။ ခင်ဗျား တကယ်ပြောတာ ဆိုရင် ကျနော်ရဲ့ စီမံခန့်ခွဲမှုကုမ္ပဏီကို လှမ်းပြီးအော်ပြောလိုက်ပါ။ ကျနော်ကတော့ ဒီဇင်ဘာမှာ အဆင်သင့်ဖြစ်နေ ပါမယ်” လို့ အင်စတာဂရမ် စတိုရီမှာ ရေးသားခဲ့ပါတယ်။
- By CNI
- Category: အားကစား
- Hits: 818
CNI Sport News
၂၀၂၂ ခုနှစ်၊ စက်တင်ဘာ ၆
ဂျူဗင်တပ်စ်နဲ့ ပြင်သစ်ကွင်းလယ်လူ ပေါ့ဘာဟာ ဒူးဒဏ်ရာကို ခွဲစိတ်ကုသမှုခံယူရမှာ ဖြစ်တာကြောင့် အခုနှစ်ကုန်ပိုင်းမှာ ကျင်းပမယ့် ကမ္ဘာ့ဖလားပြိုင်ပွဲမှာ ပါဝင်နိုင်ဖို့ မသေချာတော့ဘူးလို့ သိရပါတယ်။
အသက် ၂၉ နှစ်အရွယ်ရှိ ပေါ့ဘာဟာ ပြီးခဲ့တဲ့ဇူလိုင်လမှာ ဒူးဒဏ်ရာကို ခံစားခဲ့ရတာဖြစ်ပြီး အခုနှစ်ရာသီ ဂျူဗင်တပ်စ်အသင်းအတွက် တစ်ပွဲမှပါဝင်ကစားရခြင်းမရှိသေးပါဘူး။ပေါ့ဘာဟာ အစောပိုင်းက ဒီ ဒဏ်ရာကို ရှေးရိုးဆန်တဲ့ ကုသမှုပြုလုပ်ခဲ့ရာမှာ အဆင်မပြေတာကြောင့် ခွဲစိတ်ကုသမှုခံယူရတော့မှာ ဖြစ်ပါတယ်။
ဒီခွဲစိတ်မှုကြောင့် ပေါ့ဘာဟာ ရက်ပေါင်း ၄၀ ကနေ ၆၀ အထိအနားယူရဖွယ်ရှိနေပါတယ်။ ပြင်သစ်အသင်းရဲ့ ကမ္ဘာ့ဖလားပြိုင်ပွဲ အဖွင့်ပွဲစဉ်ကတော့ နိုဝင်ဘာလ ၂၂ ရက် သြစတြေးလျနဲ့ ယှဉ်ပြိုင် ရမှာဖြစ်ပါတယ်။
ဂျူဗင်တပ်စ်နည်းပြ အယ်လီဂရီက “ဒီမနက်မှာ ပေါ့ဘာက ဒုတိယအကြိမ်မြောက် လေ့ကျင့်မှုပြုလုပ်ခဲ့ ပေမယ့် ရပ်တန့်သွားခဲ့ပြီး ခွဲစိတ်မှုပြုလုပ်ဖို့ သူဆုံးဖြတ်ခဲ့ပါတယ်။ကျနော်တို့ကတော့ ပေါ့ဘာကို ဇန်နဝါရီ မှ ပြန်ရရှိတော့မှာပါ။သူကမ္ဘာ့ဖလားကစားနိုင်ခြင်း ရှိ မရှိကတော့ ကျနော်ရဲ့ ပြဿနာ မဟုတ်ဘူး” လို့ သတင်းထောက်ရဲ့ မေးမြန်းမှုကို ဖြေခဲ့တာပါ။
ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲဗိုလ်လုပွဲမှာ ပြင်သစ်အသင်းအတွက် အနိုင်ဂိုးတစ်ဂိုးသွင်းယူပေးခဲ့တဲ့ ပေါ့ဘာကတော့ ကာတာကမ္ဘာ့ဖလားမှာ ကြံခိုင်မှုအပြည့်နဲ့ ပါဝင်နိုင်ဖို့ မျှော်လင့်နေတာ ဖြစ်ပါတယ်။
ပေါ့ဘာဟာ ပြီးခဲ့တဲ့အပြောင်းအရွှေ့မှာ ယူနိုက်တက်အသင်းနဲ့ စာချုပ်ကုန်ဆုံးပြီးနောက် အသင်းဟောင်း ဂျူဗင်တပ်စ်အသင်းထံ ပြန်လည်ရောက်ရှိလာခဲ့တာပါ။ဒါပေမယ့် ရာသီကြိုခြေစမ်းပွဲတစ်ပွဲသာ ပါဝင် ကစားထားနိုင်ခဲ့ပါတယ်။
ပေါ့ဘာဟာ ဒဏ်ရာပြဿနာအပြင် အစ်ကိုဖြစ်သူပါဝင်နေတဲ့ ဂိုဏ်းအဖွဲ့အစည်းတစ်ခုရဲ့ ခြိမ်းခြောက် ငွေညှစ်မှုကိုလည်း ခံနေရတာပါ။အဲဒါကြောင့် သူ့ရဲ့ တိုင်ကြားမှုနဲ့အတူ ပြင်သစ်အစိုးရရှေ့နေတွေက တရားစီရင်ရေးဆိုင်ရာ စုံစမ်းစစ်ဆေးမှုတွေကို စတင်ခဲ့တာလည်းဖြစ်ပါတယ်။
Source:Goal
- By CNI
- Category: အားကစား
- Hits: 764
CNI Sport News
၂၀၂၂ ခုနှစ်၊ စက်တင်ဘာ ၆
စပိန်နာမည်ကျော် တင်းနစ်ကစားသမား ရာဖေးလ်နာဒယ်လ်ဟာ အမေရိကန်အိုးပန်း စတုတ္ထအဆင့်ကနေ ထွက်ခဲ့ရပြီးနောက် ဘယ်အချိန်မှာ ပြန်လည် ကစားနိုင်မလဲဆိုတာ မသိဘူးလို့ ပြောလိုက်ပါတယ်။
ရာဖေးလ်နာဒယ်လ်က “ ကျနော်ပြန်သွားဖို့လိုပါတယ်။ ဘဝ အပါအဝင် အရာရာကို ပြန်လည်ပြင်ဆင်မှုတွေ ပြုလုပ်ရမှာ ဖြစ်တာကြောင့် ဘယ်အချိန်မှာ ဒီကိုပြန်လာနိုင်မလဲဆိုတာ ကျနော်မသိပါဘူး။ ကျနော် စိတ်ပိုင်းဆိုင်ရာ အဆင်သင့်ဖြစ်အောင် ကြိုးစားရပါမယ်။ နောက်တစ်ကြိမ် ပြန်ကစားဖို့ အဆင်သင့် ဖြစ်နေတယ်လို့ ခံစားမိရင်တော့ ကျနော်အဲ့ဒီနေရာမှာ ရောက်ရှိနေမှာပါ”လို့ ပြောခဲ့ပါတယ်။
ရာဖေးလ်နာဒယ်လ်ဟာ စတုတ္ထအဆင့်မှာ အမေရိကန်တင်းနစ်သမား တီယာဖိုးကို ၄-၆၊ ၆-၄၊ ၄-၆၊ ၃-၆ နဲ့ အရေးနိမ့်ခဲ့တာ ဖြစ်ပါတယ်။ ဒီရှုံးပွဲဟာ နာဒယ်လ် အတွက်တော့ ၂၀၂၂ ဂရမ်းဆလမ်းပြိုင်ပွဲမှာ ပထမဆုံး ကြုံတွေ့ခဲ့ရတဲ့ ရှုံးပွဲလည်း ဖြစ်ပါ တယ်။
ရာဖေးလ်နာဒယ်လ်နဲ့ တီယာဖိုးကို တွေ့ရစဉ် (CBS Sport)
နာဒယ်လ်ဟာ အခုနှစ် ကျင်းပခဲ့တဲ့ ဂရမ်းဆလမ်းပြိုင်ပွဲတွေထဲမှာ သြစတြေးလျအိုးပန်းနဲ့ ပြင်သစ်အိုးပန်းပြိုင်ပွဲမှာ ဗိုလ်စွဲထားပြီး ဂရမ်းဆလမ်းဆုဖလား ၂၂ ကြိမ်အထိ ရယူထားနိုင်တာ ဖြစ်ပါတယ်။
နာဒယ်လ်ကို အနိုင်ရခဲ့တဲ့ တီယာဖိုးကတော့ “ ဒီနေ့ကတော့ ထူးထူးခြားခြား အရာတစ်ခု ဖြစ်သွားခဲ့တာပါ။ ကျနော် ဘာပြောရမလဲဆိုတာ မသိပါဘူး။ ကျနော် အလွန်ပျော်ရွှင်နေပါတယ်။ သူက အချိန်တိုင်းရဲ့ အကောင်းဆုံး ကစားသမား တွေထဲက တစ်ယောက်ဖြစ်ပြီး မယုံနိုင်လောက်အောင်ကို ကစားခဲ့ရတာပါ”လို့ ပွဲအပြီး အင်တာဗျူးမှာ ပြောခဲ့ပါတယ်။
တီယာဖိုးဟာ အမေရိကန်အိုးပန်း ကွာတားဖိုင်နယ်အဆင့်မှာ ရုရှားတင်းနစ်သမား ရူဘလက်ဗ်နဲ့ ယှဉ်ပြိုင်ရမှာ ဖြစ်ပါတယ်။ ရာဖေးလ်နာဒယ်လ်ဟာ တင်းနစ်ပြိုင်ပွဲတွေ ဘယ်အချိန်မှာ ပြန်ကစားနိုင်မလဲဆိုတာ မသိဘူးလို့ ပြောထားပေမယ့် လန်ဒန်မှာ စက်တင်ဘာ ၂၃ ရက်ကနေ ၂၅ ရက်အထိ ကျင်းပဖို့ စီစဉ်ထားတဲ့ Laver Cup ပြိုင်ပွဲမှာ ပါဝင်ဖို့ ရှိနေပါတယ်။
ဒီပြိုင်ပွဲမှာတော့ နာဒယ်လ်အပြင် တင်းနစ်လောကရဲ့ နာမည်ကြီး ကစားသမားတွေ ဖြစ်တဲ့ ရော်ဂျာဖက်ဒဲရား၊ ဂျိုကိုဗစ်နဲ့ အန်ဒီမာရေးတို့ ပါဝင်ကြမှာ ဖြစ်ပါတယ်။
Source: BBC
Page 318 of 372
Latest News
Connect with us
