CNI Sport News
၂၀၂၃ ခုနှစ်၊ ဇွန်လ ၁၉
ကာတာဘဏ်လုပ်ငန်းရှင် ရှိတ်ဂျာဆင်မ်ဟာ ယူနိုက်တက်ကို ဝယ်ယူဖို့အတွက် ပြိုင်ဆိုင်မှုမှာ အနိုင်ရခဲ့ရင် ဆိုးလ်ရှားကို ကလပ်အသင်းရဲ့ အခန်းကဏ္ဍတစ်ခုမှာ နေရာပေးဖို့ စဉ်းစားနေတယ်လို့ သိရပါတယ်။
ရှိတ်ဂျာဆင်မ်ဟာ ယူနိုက်တက်အသင်းကို ဝယ်ယူဖို့အတွက် နောက်ဆုံးအကြိမ် လေလံတင်သွင်းမှု ပြုလုပ် ခဲ့ပြီးနောက် အသင်းပိုင်ရှင် ဖြစ်လာဖို့ မျှော်လင့်ချက်တွေ မြင့်တက်လာခဲ့ပါတယ်။
အစောပိုင်းက ရက်ကလစ်ဖ်ဟာ ဂလေဇာ မိသားစုကို အသင်းရဲ့ အစုရှယ်ယာရှင်အဖြစ် အသင်းမှာ ဆက်နေဖို့ အခွင့်အရေး ပေးတာကြောင့် အသင်းပိုင်ရှင်သစ် ဖြစ်လာဖို့ ရေပန်းစားနေခဲ့တာ ဖြစ်ပါတယ်။
ဒါပေမယ့် ရှိတ်ဂျာဆင်မ်ရဲ့ နောက်ဆုံးကမ်းလှမ်းမှုဟာ ယူရို ၅ ဘီလီယံ ဝန်းကျင်ရှိတဲ့အတွက် ရေပန်းစားမှုဟာ ပြောင်းလဲသွားခဲ့ပါတယ်။
ကာတာဘဏ် လုပ်ငန်းရှင်ဟာ 92 ဖောင်ဒေးရှင်းကို တည်ထောင်ထားပြီး ဗြိတိန်ကုမ္ပဏီအဖြစ် ပြီးခဲ့တဲ့အပတ်က စာရင်းသွင်းခဲ့တာ ဖြစ်ပါတယ်။ ရှိတ်ဂျာဆင်မ်ဟာ ယူနိုက်တက်ကို ဝယ်ယူနိုင်ခဲ့ရင် အိုးထရက်ဖို့ဒ်မှာ ကလပ် အသင်းရဲ့ ဂန္တဝင်တွေ ပါဝင်နိုင်ဖို့ ကြိုးပမ်းသွားဖွယ် ရှိနေပါတယ်။
ရှိတ်ဂျာဆင်မ်နဲ့ ရက်ကလစ်ဖ်ကိုတွေ့ရစဉ်
အဲဒါကြောင့် ကစားသမားဟောင်းနဲ့ နည်းပြဟောင်းဖြစ်တဲ့ ဆိုးလ်ရှားဟာ အသင်းထံ ပြန်လာဖို့ ရှိနေတယ်လို့ မေရာသတင်းဌာနက ဖော်ပြခဲ့တာ ဖြစ်ပါတယ်။
နော်ဝေလူမျိုး နည်းပြဟာ အသင်းရဲ့ ရလဒ်ပိုင်း ဆိုးရွားမှုကြောင့် ၂၀၂၁ ခုနှစ်၊ နိုဝင်ဘာလက ယူနိုက်တက် အသင်းရဲ့ နည်းပြရာထူးကနေ ထုတ်ပယ် ခံထားရတာပါ။
ဆိုးလ်ရှားဟာ ယူနိုက်တက်အသင်းကို ကိုင်တွယ်ခဲ့တဲ့အချိန်မှာ ချန်ပီယံလိဂ် ဝင်ခွင့်ရအောင် စွမ်းဆောင် နိုင်ခဲ့ပေမယ့် နောက်ဆုံးရာသီမှာတော့ ရလဒ်ပိုင်း ဆိုးရွားခဲ့တာ ဖြစ်ပါတယ်။
ဆိုးလ်ရှားဟာ ယူနိုက်တက်အသင်းမှာ ကစားသမားအဖြစ် ၁၀ နှစ်ကြာရှိခဲ့ပြီး အသင်းရဲ့ ဂန္တဝင်အဖြစ် သတ်မှတ် ခံခဲ့ရတာပါ။
အသက် ၅၀ အရွယ်ရှိ ဆိုးလ်ရှားဟာ ပြီးခဲ့တဲ့လက The Athletic နဲ့ ပြုလုပ်ခဲ့တဲ့ အင်တာဗျူးမှာ ယူနိုက်တက် အသင်းထံ ပြန်လာချင်တဲ့ သူ့ရဲ့ စိတ်ကူးကို ပြောခဲ့သေးပါတယ်။
ဆိုးလ်ရှားဟာ ယူနိုက်တက်အသင်းက ထုတ်ပယ်ခံရပြီးကတည်းက ဘယ်အသင်းကိုမှ မကိုင်တွယ် ရသေးတာ ဖြစ်ပါတယ်။
Source: Metro
