CNI Article

၂၀၂၄ ခုနှစ်၊ ဇွန်လ ၈

အမေရိကန်သမ္မတဟောင်း ဒေါ်နယ်ထရမ့်သည် ၂၀၂၄ ခုနှစ် သမ္မတရွေးကောက်ပွဲတွင် အနိုင်ရရှိရန် ကြိုးပမ်းမှုများ အနက် အချက်အလက်မရှိသည့် ရွှေ့ပြောင်းနေထိုင်သူများအား ဝေဖန်တိုက်ခိုက်မှုများကို အရှိန်မြှင့်တင်ခဲ့သည်။

၂၀၂၄ ခုနှစ်၊ ဧပြီ ၃၀ ရက်က ထုတ်ပြန်ခဲ့သည့် Times မဂ္ဂဇင်းနှင့် ပြုလုပ်သည့် အင်တာဗျူးတစ်ခုတွင် ထရမ့်က ရွှေ့ပြောင်းနေထိုင်သူများအား မိမိတို့နိုင်ငံ၊ မိမိတို့၏ ချမ်းသာကြွယ်ဝမှုနှင့် မိမိတို့၏ အလုပ်အကိုင်များကို ခိုးယူရန် ရောက်ရှိလာသည့်  ရာဇဝတ်သားများဟု ရည်ညွှန်းပြောဆိုခဲ့သည်။

အထူးသဖြင့် ထရမ့်သည် တရုတ်နိုင်ငံမှ ဝင်ရောက်လာသည့် ရွှေ့ပြောင်းနေထိုင်သူများကို သရော်လှောင်ပြောင် လေ့ရှိပြီး တရုတ်ရွှေ့ပြောင်းများသည် မိမိတို့နိုင်ငံကို ပုံဖော်နေသော အဓိက အင်အားစု ဖြစ်ကြောင်း၊ အထောက် အထားမဲ့ ရွှေ့ပြောင်းနေထိုင်သူများ အရေးသည် မိမိတို့နိုင်ငံကို ကျူးကျော်မှုဖြစ်ကြောင်း ပြောကြားခဲ့သည်။

မကြာသေးမီက ထရမ့်၏ ရွှေ့ပြောင်းနေထိုင်သူများ ဆန့်ကျင်ရေး လေလုံးထွား ပြောဆိုမှုများသည် ပိုမို ပြင်းထန် လာခဲ့သည်။ သို့သော်လည်း ထိုအချင်းအရာသည် အသစ်အဆန်းတစ်ခုတော့ မဟုတ်ပေ။

ဥပမာပြရမည်ဆိုပါက ၂၀၁၆ ရွေးကောက်ပွဲအတွက် ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်မည်ဟု ကြေညာသည့် ပထမဆုံး မိန့်ခွန်းတွင် ထရမ့်သည် မက္ကဆီကို ရွှေ့ပြောင်းနေထိုင်သူများအား မူးယစ်ဆေးဝါး သယ်ဆောင်လာသူများ၊ ရာဇဝတ်မှုများကို ဆောင်ကျဉ်း လာသူများ၊ အဓမ္မပြုကျင့်သူများအဖြစ် ထည့်သွင်းပြောဆို ခဲ့သည်။

ဒေါ်နယ်ထရမ့် နာမည်ပါ ဦးထုပ်များကိုတွေ့ရစဉ်

ထရမ့်သည် ထိုသို့ အပျက်သဘောဆောင်သည့် ပြောဆိုမှုများကို အဘယ်ကြောင့် ထပ်တလဲလဲ ပြောဆိုနေပါ သနည်းဟု မေးခွန်းထုတ်ရ မည်ဆိုပါက ရွေးကောက်ပွဲမဟာဗျူဟာတွင် လူထုအကြား လှုပ်လှုပ်ရှားရှားဖြစ်အောင် စေ့ဆော်ရာ၌ အလုပ်ဖြစ်သောကြောင့် ဖြစ်သည်။

ရွှေ့ပြောင်းများကို ဆန့်ကျင်သည့် ထရမ့်၏ ပြောဆိုမှုများသည် အမေရိကန်၏ အဓိက မဲဆန္ဒရှင်ဖြစ်သည့် အလုပ်အကိုင်ရှိသော လူဖြူအမေရိကန်များ၏ ထောက်ခံမှုကို ရရှိခဲ့သည်။

မကြာသေးမီက ပြုလုပ်ခဲ့သည့် စစ်တမ်းများတွင်လည်း ထရမ့်သည် လက်ရှိသမ္မတ ဂျိုးဘိုင်ဒန်ထက် လူဖြူ မဲဆန္ဒရှင်များ၏ ထောက်ခံမှုကို ၁၃ ဒသမ ၇ ရာခိုင်နှုန်းကျော် ပိုမိုရရှိထားသည်ဟု ဖော်ပြထားသည်။

ထို့ပြင် ဘွဲ့မရသည့် လူဖြူအမေရိကန်များအနက် ၆၀ ရာခိုင်နှုန်းမှာ ထရမ့်ကို ထောက်ခံထားကြသည်။

ထို့ကြောင့် လူဖြူအမေရိကန်များ၏ ခိုင်မာသည့် ထောက်ခံမှုနှင့်အတူ ထရမ့်သည် မကြာသေးမီက လူမည်းများနှင့် စပိန်စကားပြောသော လက်တင်အမေရိက မဲဆန္ဒရှင်များ၏ ထောက်ခံမှုကို ရရှိရန် ကြိုးပမ်းနေသည့် အခြေအနေ ကို စောင့်ကြည့်ရမည်ဖြစ်သည်။

နယူးယောက်စီးတီးမြို့မှ ဘီလျံနာတစ်ဦးဖြစ်သူ ထရမ့်အနေဖြင့် အလုပ်သမား လူတန်းစား အမေရိကန်များ အကြား ခိုင်မာသည့် ထောက်ခံမှုကို မည်သို့ရရှိခဲ့သည်ဆိုသော မေးခွန်းသည် ၂၀၁၆ ခုနှစ် ရွေးကောက်ပွဲက ထရမ့် အနိုင်ရရှိခဲ့သည့် အချိန်ကတည်းက မေးခွန်းတစ်ခု ဖြစ်ခဲ့သည်။

ဘိုင်ဒန်ကိုတွေ့ရစဉ်

ထရမ့်၏ သာမန်လူထုအကျိုးမျှော်ဝါဒ ကျင့်သုံးသည့် စတိုင်သည် ဂလိုဘယ်လိုက်ဇေးရှင်းကြောင့် နောက်ကျ ကျန်နေရစ်မည့် အရေးကို စိုးရိမ်သည့် အမေရိကန်များအား ဆွဲဆောင်နိုင်ခဲ့ခြင်းဖြစ်သည်ဟု ကျွမ်းကျင်သူများက ပြောကြားခဲ့သည်။

ထရမ့်၏ ၂၀၁၆ နှင့် ၂၀၂၀ ရွေးကောက်ပွဲ မဲဆွယ်စည်းရုံးမှုများကို သုတေသန ပြုလုပ်ခဲ့ရာတွင် ထရမ့်သည် လူမျိုးစု အမျိုးသားရေးဝါဒဖြင့် လှုပ်ရှားခဲ့သည်ကို တွေ့ရပြီး  လူဖြူ၊ ခရစ်ယာန်၊ အမေရိကန်ဖွား၊ အင်္ဂလိပ်စကားပြော အစရှိသည် စံသတ်မှတ်ချက်များဖြင့် မည်သူက အမေရိကန်စစ်သည်၊ မည်သူက အမေရိကန်မစစ် ဟူ၍ ခွဲခြား သတ်မှတ် ခြင်းဖြစ်သည်။

ထရမ့်သည် ထိုသဘောတရားဖြင့်  လူဖြူအမေရိကန်များအား အမေရိကန် မစစ်သည့်သူများ၊ အထူးသဖြင့် အထောက်အထားမဲ့ ရွှေ့ပြောင်းများ၏ ခြိမ်းခြောက်မှုရန်မှ ကာကွယ်ပေးမည်သူအဖြစ် သူ့ကိုယ်သူပုံဖော်ပြီး အမေရိကန်များ၏ ထောက်ခံမှုကို ရရှိရန်ကြိုးပမ်းခဲ့ခြင်းဖြစ်သည်။

သို့သော်လည်း ထရမ့်ကို လူဖြူမဟုတ်သည့် လက်တင်အမေရိကန်များနှင့်  စပိန်ဘာသာစကားပြောသည့် လက်တင်အမေရိကန်များက အဘယ်ကြောင့် ထောက်ခံနေကြပါသနည်း။

ထရမ့်ကို ထောက်ခံသည့် လူဖြူမဟုတ်သည့် အခြားအသားရောင်ရှိသည့် အမေရိကန်များသည် လူမျိုးရေးနှင့် ရွှေ့ပြောင်းနေထိုင်ရေးတို့နှင့်ပတ်သက်ပြီး ရှေးရိုးစွဲ အမြင်ရှိကြသူများ ဖြစ်နိုင်သည်။

မကြာသေးမီက ထရမ့်သည် ထိုရှေးရိုးစွဲ အမြင်များကို ထောက်ခံသည့် ပုံစံဖြင့် ရွှေ့ပြောင်းနေထိုင်သူများအား ဆန့်ကျင်သည့် ပြောဆိုမှုများကို အရှိန်မြှင့်တင်ခဲ့ခြင်းဖြစ်သည်။

ထရမ့်သည် ၎င်းအား ထောက်ခံသည့် လူဖြူမဲဆန္ဒရှင် အင်အားစု အပြင် အမေရိကန်တွင် ရွှေ့ပြောင်းနေထိုင်သူများ ဖြင့် လူမျိုးရေးပြဿနာများနှင့်ပတ်သက်ပြီး ရှေးရိုးစွဲအမြင်ရှိသည့် အသားအရောင်ရှိသော လူနည်းစုများ၏ သဘောထားကို သံယောင်လိုက် ပြောဆိုမှုများ ပြုလုပ်ခဲ့သည်။

ထို့ကြောင့် ထရမ့်၏ နှုတ်မှုရေးရာ ကျွမ်းကျင်မှုနှင့် လိမ်မာပါးနပ်သည့် စကားပြော စွမ်းရည်တို့ကြောင့် အသားအရောင်ရှိသော လူနည်းစု အမေရိကန်များ၏ ထောက်ခံမှုကို ရရှိသည်မှာ ထူးဆန်းလှခြင်းတော့ မဟုတ်ပေ။

ဒေါ်နယ်ထရမ့်ကို တွေ့ရစဉ်

ထရမ့်သည် လူဖြူမဲဆန္ဒရှင်များနှင့် အသားအရောင်ရှိသည့် လူနည်းစု အမေရိကန်များ၏ ထောက်ခံမှုကို ရရှိရန် မဲဆွယ်စည်းရုံးပွဲများတွင် လိမ္မာပါးနပ်စွာဖြင့် စကားပရိယာယ်များ သုံးစွဲပြောဆိုခဲ့သည်။

သို့သော် ထိုကဲ့သို့ စကားပရိယာယ် အသုံးပြုနေသည့် နည်းဗျူဟာသည် ရွေးကောက်ပွဲတွင် အနိုင်ရရှိအောင် မည်သည့်နည်းဖြင့် အထောက်အကူ ပြုပေးနိုင်ပါသနည်း။ ထိုမေးခွန်းမှာ အသစ်အဆန်းတော့ မဟုတ်ပေ။ အမေရိကန်နိုင်ငံရေးလောကတွင် လူမျိုးရေး-အမျိုးသားရေးဝါဒသည် ကာလကြာရှည် တည်ရှိနေခြင်းကြောင့် ထရမ့်သည် ထိုဝါဒဖြင့် ထောက်ခံမှုများကို ရယူကာ ရွေးကောက်ပွဲကို အသာစီးရယူနိုင်ခြေရှိသည်။

ထိုဝါဒသည် အမေရိကန်တွင် မည်သည့်လူမျိုး၊ မည်သည့်အသားအရောင်၊ မည်သည့်ဘာသာကို ကိုးကွယ်သူ ဖြစ်ဖြစ် အမေရိကန်နိုင်ငံသားအားလုံး တန်းတူအခွင့်အရေး ရှိသည်ဆိုသည့် အချက်အပေါ် အခြေတည်ထားခြင်း ဖြစ်သည်။

တစ်ချိန်တည်းမှာပင် ထရမ့်သည် အမေရိကန်၏  ကိုယ်ပိုင်လက္ခဏာကို အောင်မြင်စွာ ကာကွယ်နိုင်သည့် ခေါင်းဆောင်တစ်ဦးအဖြစ် ပုံဖော်ပြီး လှုပ်ရှားလျက်ရှိသည်။

အထူးသဖြင့် ထရမ့်သည် အမေရိကန်သာ ပထမဆိုသည့် မူဝါဒဖြင့် အမေရိကန်အရေးကိစ္စများကို ဦးစားပေးမည့် ၎င်း၏ မူဝါဒအတိုင်း ဆက်လက်လှုပ်ရှားနေသည်။

ထရမ့်၏ ပြိုင်ဘက်ဖြစ်သည့် ဘိုင်ဒန်ကမူ ထရမ့်၏ လူဝင်မှုကြီးကြပ်ရေးနှင့်ပတ်သက်သည့် မူဝါဒများကို ပြင်းထန်စွာ ဝေဖန်ခဲ့ပြီး နိုင်ငံခြားရေးမူဝါဒကို ဦးစားပေးကာ မဟာမိတ်များနှင့် ဆက်ဆံရေးကို ဆက်လက် ထိန်းသိမ်းရန် ကတိပြုထားသည်။

ထို့ကြောင့် အမေရိကန်၏ အမျိုးသားရေး လက္ခဏာများအပေါ် အမြင်မတူသည့် ခေါင်းဆောင်နှစ်ဦး၏ ယှဉ်ပြိုင်မှု တွင် ပြည်တွင်းမဲဆန္ဒရှင်များ၏ ထောက်ခံမှုကို ရယူရန် စကားပြောစွမ်းရည် သာလွန်မှုရှိသည့် ထရမ့်က အနိုင်ရရှိ မည် ဟုတ်/မဟုတ်ကို စောင့်ကြည့်ရမည်ဖြစ်သည်။

Source: Asia Times

CNI Sport Article

၂၀၂၄ ခုနှစ်၊ ဇွန်လ ၇

ဂျာမနီနိုင်ငံက အိမ်ရှင်အဖြစ် ကျင်းပမယ့် ယူရို ၂၀၂၄ ပြိုင်ပွဲကျင်းပဖို့ ရက်ပိုင်းပဲ လိုတော့တဲ့အချိန်မှာ ဒီပြိုင်ပွဲမှာ ဘယ်အသင်း ချန်ပီယံဖြစ်နိုင်မလဲဆိုတဲ့ ခန့်မှန်းမှုတွေကလည်း ထွက်ပေါ်နေခဲ့ပြီဖြစ်ပါတယ်။ 

အချက်အလက်တွေကို ပြုစုတဲ့ Opat စူပါကွန်ပျူတာရဲ့ တွက်ချက်မှုမှာတော့ အင်္ဂလန်အသင်းက ဒီပြိုင်ပွဲမှာ ဗိုလ်စွဲဖို့ ရေပန်းအစားဆုံးဖြစ်နေတာကို တွေ့ခဲ့ရတာပါ။ အင်္ဂလန်အသင်းဟာ ဘယ်ပြိုင်ပွဲမဆို မကျင်းပခင်မှာ ဗိုလ်စွဲဖို့ ရေပန်းစားတာက ထုံးစံလို ဖြစ်နေပါတယ်။

ဒါပေမယ့် ယူရို ၂၀၂၄ ပြိုင်ပွဲမှာတော့ အင်္ဂလန်အသင်းဟာ ဗိုလ်စွဲဖို့ ရေပန်းအစားဆုံး အသင်းအဖြစ် ဦးဆောင်နေ တာပါ။ ဒါကလည်း အင်္ဂလန်အသင်းရဲ့ ကစားသမား အစုအဖွဲ့နဲ့ ရလဒ်ကောင်းမွန်မှုတွေကြောင့်လည်း ဖြစ်နိုင် ပါတယ်။ 

အင်္ဂလန်အသင်းရဲ့ ရလဒ်တွေကို ကြည့်ရရင် ဘရာဇီးလ်အသင်းကို ခြေစမ်းပွဲမှာ အရေးနိမ့်တာကလွဲပြီး ရလဒ်တွေ ကောင်းမွန်ခဲ့တာပါ။ 

ယူရိုပြိုင်ပွဲဖလားကိုတွေ့ရစဉ်

သူတို့ရဲ့ လူစာရင်းမှာဆိုရင် ဂိုးသွင်းကောင်းတဲ့ အသင်းခေါင်းဆောင် ဟာရီကိန်း၊ အာဆင်နယ် အသင်းက ဆာကာနဲ့ ဒီကလန်ရိုက်စ်၊ မန်စီးတီးအသင်းက ဖိုဒန်၊ ရီးရယ်လ်အသင်းနဲ့အတူ ဆုဖလားတွေ ရယူနိုင် ခဲ့တဲ့ ဘယ်လင်ဂမ်နဲ့ ချယ်လ်ဆီး ကြယ်ပွင့် ကိုးလ်ပါလ်မာတို့ ပါဝင်နေတာ ဖြစ်ပါတယ်။

ပြီးတော့ ကိုဘီမိုင်နူး၊ အီဇီ၊ ဝါတန်၊ ဂေါ်ဒွန်တို့လို လူငယ် ကစားသမားတွေအပြင် အာနိုးလ်၊ ဝေါလ်ကာ၊ ထရစ်ပီယာ၊ ဝက်ကင်စ်တို့လို ကစားသမားတွေလည်း ရှိနေတာပါ။ 

အင်္ဂလန်အသင်းဟာ နေရာစုံမှာ တောင့်တင်းတဲ့ လူစာရင်းရှိနေပေမယ့် နောက်ခံလူ မက်ဂွဲယား ဒဏ်ရာကြောင့် မပါဝင်နိုင်တော့တဲ့အတွက် ဗဟိုခံစစ်ပိုင်းက အားနည်းနိုင်တာ ဖြစ်ပါတယ်။ 

အဲဒါကြောင့် ပွဲထွက်လူစာရင်းမှာ ပါဝင်မယ့် ကစားသမားတွေက ဒီနေရာကို ဖြည့်ပြီးကစားနိုင်ရင် အင်္ဂလန် အသင်းဟာ ချန်ပီယံဆု ရယူနိုင်မယ့် အနေအထားမှာ ရှိနေတာပါ။ 

ဒီလိုတွေကြောင့်လည်း အင်္ဂလန်အသင်းကို ယူရို ၂၀၂၄ ပြိုင်ပွဲမှာ ဗိုလ်စွဲဖို့ ရေပန်းအစားဆုံး အသင်းအဖြစ် Opta က သတ်မှတ်ခဲ့တာ ဖြစ်ပါတယ်။

ဟာရီကိန်းကိုတွေ့ရစဉ်

အင်္ဂလန်အသင်းဟာ နည်းပြ ဆောက်ဂိတ် လက်ထက် ပြီးခဲ့တဲ့ ယူရိုပြိုင်ပွဲနဲ့ ကမ္ဘာ့ဖလားပြိုင်ပွဲတွေမှာ ရလဒ် ကောင်းတွေ ရယူနိုင်ခဲ့တာပါ။

အင်္ဂလန်အသင်းဟာ ၂၀၁၈ ကမ္ဘာ့ဖလားပြိုင်ပွဲမှာ ဆီမီးဖိုင်နယ်အဆင့်ကို ရောက်ရှိခဲ့ပြီး ၂၀၂၂ ကမ္ဘာ့ဖလားပြိုင်ပွဲမှာ ကွာတားဖိုင်နယ်အထိ ရောက်ရှိခဲ့တာ ဖြစ်ပါတယ်။ 

ယူရို ၂၀၂၀ ပြိုင်ပွဲမှာတော့ အင်္ဂလန်အသင်းဟာ ဗိုလ်လုပွဲကို တက်နိုင်ခဲ့ပြီး ချန်ပီယံဖြစ်ဖို့ အနီးစပ်ဆုံးဖြစ်ခဲ့ပေမယ့် အီတလီအသင်းကို ပင်နယ်တီနဲ့ အရေးနိမ့်ကာ ဒုတိယနဲ့သာ ကျေနပ်ခဲ့ရတာပါ။ အဲဒါကြောင့် အင်္ဂလန်အသင်းဟာ ယူရို ၂၀၂၄ ပြိုင်ပွဲမှာ ချန်ပီယံဆုကို ရယူနိုင်ဖို့ ပစ်မှတ်ထားနေတာ ဖြစ်ပါတယ်။

Opta စူပါကွန်ပျူတာရဲ့ တွက်ချက်မှုမှာ အင်္ဂလန်အသင်းဟာ ယူရိုပြိုင်ပွဲမှာ ချန်ပီယံဖြစ်ဖို့ ၂၀ ရာခိုင်နှုန်းရှိတယ်လို့ ဖော်ပြထားတာပါ။ 

ယူရိုပြိုင်ပွဲ၀င် အသင်းတွေကိုတွေ့ရစဉ်

အင်္ဂလန်အသင်းရဲ့ အနောက်မှာတော့ ပြင်သစ်အသင်းက ၁၉ ရာခိုင်နှုန်းနဲ့ ဒုတိယ၊ အိမ်ရှင်ဂျာမနီအသင်းက ၁၂ ရာခိုင်နှုန်းနဲ့ တတိယ၊ စပိန်အသင်းက ၁၀ ရာခိုင်နှုန်းနဲ့ စတုတ္ထ၊ ပေါ်တူဂီအသင်းက ၉ ရာခိုင်နှုန်းနဲ့ပဉ္စမနေရာမှာ ရပ်တည်နေတာ ဖြစ်ပါတယ်။

နယ်သာလန်၊ လက်ရှိချန်ပီယံ အီတလီနဲ့ ဘယ်လ်ဂျီယံအသင်းတို့ဟာ ဒီအသင်းတွေရဲ့ အနောက်မှာ ချန်ပီယံ ဖြစ်နိုင်မယ့် အသင်းတွေအဖြစ် ရပ်တည်နေတာပါ။

ဒီရာခိုင်နှုန်းတွေက စူပါကွန်ပျူတာရဲ့ တွက်ချက်မှုတွေ ဖြစ်တာကြောင့် လက်တွေ့မှာတော့ ကွာခြားမှုတွေ ရှိနိုင်ပါတယ်။ အင်္ဂလန်အသင်းအနေနဲ့ ချန်ပီယံဆုကို ရရှိချင်တယ်ဆိုရင် ပွဲစဉ်တိုင်းကို အကောင်းဆုံးလုပ်ပြနိုင်ဖို့ လိုအပ်တာပါ။

အင်္ဂလန်အသင်းဟာ အုပ်စုတွင်းမှာ ဆားဘီးယား၊ ဒိန်းမတ်၊ ဆလိုဗေးနီးယားအသင်းတို့နဲ့ ကျရောက်နေတာ ကြောင့် နောက်တစ်ဆင့်တက်နိုင်ဖို့ အခြေအနေ ကောင်းတဲ့အတွက် ရှုံးထွက်အဆင့်တွေမှာ ချန်ပီယံခြေစွမ်းတွေ ကို ပြသရတော့မှာ ဖြစ်ပါတယ်။

အင်္ဂလန်အသင်းဟာ ယူရိုပြိုင်ပွဲမှာ ချန်ပီယံဆုကို ၁ ကြိမ်မှ မရယူနိုင်သေးတာကို ယူရို ၂၀၂၄ ပြိုင်ပွဲမှာ အဆုံးသတ်နိုင်မလားဆိုတာ စောင့်ကြည့်ရမှာပါ။

ယူရို ၂၀၂၄ ပြိုင်ပွဲကို ဇွန်လ ၁၄ ရက်ကနေ ဇူလိုင် ၁၄ ရက်အထိ တစ်လကြာ ကျင်းပသွားမှာဖြစ်ပြီး  ခန့်မှန်းမှုတွေ အတိုင်းပဲ အင်္ဂလန်အသင်းက ချန်ပီယံဖြစ်သွားမလား၊ ဘယ်အသင်းက ချန်ပီယံဆုကို ကိုင်မြှောက်နိုင်မလဲဆိုတာ စိတ်ဝင်စားဖို့ကောင်းနေတာ ဖြစ်ပါတယ်။

CNI Article

၂၀၂၄ ခုနှစ် ၊ မေလ ၃၁

တောင်တရုတ်ပင်လယ်တွင် တရုတ်၏ ကျယ်ပြန့်သည့် လှုပ်ရှားမှုများသည် သဘာဝပတ်ဝန်းကျင် ထိခိုက်မှု အတွက် ထိတ်လန့်မှုများကို ဖြစ်စေသည်။

အလွန်အကျွံ ငါးဖမ်းမှုများ၊ ရာသီဥတု ဖောက်ပြန်ပြောင်းလဲမှုနှင့် သန္တာကျောက်တန်းများ ပျက်စီးမှုများသည် ထိုဒေသ၏ ကြွယ်ဝသည့် ဇီဝမျိုးကွဲများကို ခြိမ်းခြောက်လျက်ရှိသည်။

နယ်နိမိတ်ပိုင်ဆိုင်ကြောင်း ကြေညာမှုများ ပြုလုပ်ရန်အတွက် မြေယာဖော်ယူမှုများနှင့် ကြီးမားသည့် ခုံးကောင် များကို ဖမ်းဆီးနေမှုများက သန္တာကျောက်တန်း မျိုးစိတ်ပေါင်း ၅၀၀ ကျော်ကို လျင်မြန်စွာ ပြုန်းတီးစေခဲ့သည်။

တစ်ခါတစ်ရံတွင် ပထဝီနိုင်ငံရေး တင်းမာမှုများ၏ လောင်းရိပ်အောက် ကျရောက်လေ့ရှိသည့် ထိုကဲ့သို့ ဂေဟဗေဒ ဆိုင်ရာ အကျပ်အတည်း မြင့်တက်လာမှုက တောင်တရုတ်ပင်လယ်၏ ကောင်းမွန်သော အခြေအနေနှင့် ခံနိုင်ရည် ရှိမှုအပေါ် ဆိုးရွာသော ရေရှည်ခြိမ်းခြောက်မှု တစ်ခုကဲ့သို့ ဖြစ်လာခဲ့သည်။

ထိုသဘာဝပတ်ဝန်းကျင်ဆိုင်ရာ ကပ်ဘေးကို လျော့ကျစေရန်အတွက် နိုင်ငံတကာ၏ အာရုံစိုက်လုပ်ဆောင်မှုသည် အရေးတကြီး လိုအပ်လှပေသည်။

တောင်တရုတ်ပင်လယ်တွင် တရုတ်ကမ်းခြေစောင့်တပ်ဖွဲ့၏ ထိန်းချုပ်မှုအောက်၌ ရှိနေသည့် အငြင်းပွားဖွယ် ဒေသဖြစ်သော စကာဘိုရော့ချ် သောင်ခုံ (Scarborough Shoal) သည် တရုတ်ငါးဖမ်းသမားများကြောင့် သဘာဝ ပတ်ဝန်းကျင်ဆိုင်ရာ အရည်အသွေးနိမ့်ကျမှုကို ဖြစ်ပွားစေခဲ့သည်ဟု ဖိလစ်ပိုင်နိုင်ငံက စွပ်စွဲထားသည်။ 

သဘာဝပတ်ဝန်းကျင် ပျက်စီးမှုကို သရုပ်ဖော်ပြထားစဉ်

တရုတ်အနေဖြင့် ထိုသောင်ခုံ၏ အခြေအနေကို နိုင်ငံတကာလေ့လာသူများအား စစ်ဆေးကြည့်ရှုခွင့်ပေးရန် ဖိလစ်ပိုင်က တိုက်တွန်းထားသည်။

ပြီးခဲ့သည့်ရက်ပိုင်းက ပြုလုပ်ခဲ့သော သတင်းစာ ရှင်းလင်းပွဲတွင်လည်း ဖိလစ်ပိုင်ကမ်းခြေစောင့်တပ်ဖွဲ့ (PCG) သည် စကာဘိုရော့ချ်သောင်ခုံ အနီးတစ်ဝိုက်ရှိ သန္တာကျောက်တန်းများကို ရိုက်ကူးထားသည့် ဂြိုဟ်တုဓာတ်ပုံ များကို ဖော်ပြခဲ့သည်။ 

တရုတ်ငါးဖမ်းသမားများသည် ကြီးမားသည့် ခုံးကောင်များကို ခွာယူနေမှုကြောင့် သန္တာကျောက်တန်းများသည် သိသိသာသာ ထိခိုက်ခဲ့သည်ဟု PCG က ပြောသည်။

ထိုသတင်းစာ ရှင်းလင်းပွဲတွင် ဖိလစ်ပိုင်အမျိုးသားလုံခြုံရေးအဖွဲ့ ပြောရေးဆိုခွင့်ရှိသူ ဂျိုနသန် မာလာယာ (Jonathan Malaya) က လက်ရှိဖြစ်ပွားနေသည့် အခြေအနေနှင့်ပတ်သက်ပြီး စိုးရိမ်ပူပန်မှုများကို ဖော်ပြခဲ့သည်။ 

တရုတ်အနေဖြင့် ပင်လယ်ရေကြောင်းဆိုင်ရာ ထိခိုက်ပျက်စီးမှုများ၏ အခြေခံအကြောင်းရင်းများကို ကုလသမဂ္ဂမှ ကျွမ်းကျင်သူများနှင့် သဘာဝပတ်ဝန်းကျင်ဆိုင်ရာ အဖွဲ့အစည်းများအား လွတ်လပ်သည့် စုံစမ်းစစ်ဆေးမှုများ ပြုလုပ်ခွင့်ပေးရန် ၎င်းက တိုက်တွန်းခဲ့သည်။

"တရုတ်နိုင်ငံကို ကျနော်တို့ စိန်ခေါ်ပါတယ်။ တကယ်လို့ သူတို့ဟာ သူတို့ကိုယ်သူတို့ သဘာဝပတ်ဝန်းကျင် ထိန်းသိမ်းသူတွေလို့ ယူဆထားမယ်ဆိုရင် သူတို့ဟာ ဘာဂျိုဒီမဆင်လော့ (Bajo de Masinloc) ကျွန်းကို နိုင်ငံတကာလေ့လာသူတွေကို စစ်ဆေးခွင့်ပြုသင့်ပါတယ်" ဟု မာလာယာက ပြောကြားခဲ့သည်။ (မှတ်ချက်- စကာဘိုရော့ချ်သောင်ခုံကို ဖိလစ်ပိုင်က ဘာဂျိုဒီမဆင်လော့ကျွန်းဟူ၍ သုံးနှုန်းခေါ်ဝေါ်သည်။)

တရုတ်ကမ်းခြေစောင့်တပ်ဖွဲ့က ဖိလစ်ပိုင်စက်လှေကို ရေပိုက်နဲ့ထိုးနေစဉ်

စကာဘိုရော့ချ်သောင်ခုံတွင် ကြီးမာသည့် ခုံးကောင်အရေအတွက် လျော့နည်းလာမှုအတွက် ဖိလစ်ပိုင်အရာရှိ များက တရုတ်ငါးဖမ်းသမားများကို ဝေဖန်ပြစ်တင်လေ့ရှိသည်။ 

ထိုသောင်ခုံသည် ဖိလစ်ပိုင်နိုင်ငံ၊ လူဇွန်(Luzon)ကျွန်း အနောက်ဘက် ၁၉၈ ကီလိုမီတာ အကွာခန့်တွင် တည်ရှိပြီး ဖိလစ်ပိုင်အထူးစီးပွားရေးဇုန်ထဲမှာဖြစ်၍ ထိုသောင်ခုံကို ဖိလစ်ပိုင်က ပိုင်ဆိုင်ကြောင်း နိုင်ငံတကာက အသိအမှတ် ပြုထားသည်။

မည်သို့ပင်ဆိုစေ ၂၀၁၂ ခုနှစ်က တရုတ်နှင့်ဖိလစ်ပိုင်အကြား သီတင်း ၁၀ ပတ်ကြာ ထိပ်တိုက်တွေ့ခဲ့ပြီးနောက် တရုတ်ကမ်းခြေစောင့်တပ်ဖွဲ့ (CCG) သည်  ပြီးခဲ့သည့် ၁၁ နှစ်အတွင်း ထိုသောင်ခုံအနီးတစ်ဝိုက်တွင် တပ်များကို ဖြန့်ထားခဲ့သည်။ 

တရုတ်အစိုးရကလည်း ထိုသောင်ခုံသည် တရုတ်၏ ရှိရင်းစွဲ နယ်နိမိတ်တစ်ခုဖြစ်ကြောင်း ကြေညာထားပြီး ထိုသောင်ခုံတွင် တရုတ်က ငြင်းစရာမလိုသည့် အချုပ်အခြာအာဏာကို ပိုင်ဆိုင်ကြောင်း ပြီးခဲ့သည့်နှစ်တွင် တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက ပြောကြားခဲ့သည်။

ထိုနယ်နိမိတ်သည် တရုတ်၏ ထိန်းချုပ်မှုအောက်သို့ ရောက်ရှိခဲ့ပြီးနောက် တရုတ်ငါးဖမ်းသင်္ဘောများသည် ထိုသောင်အနီးရှိ ထုံးအိုင်အတွင်းမှ တန်ဖိုးကြီးမားသည့် ခုံးကောင်များကို အများအပြား ခွာယူခဲ့ကြောင်း ဖိလစ်ပိုင်က စွပ်စွဲခဲ့သည်။

၂၀၁၆ ခုနှစ်အစောပိုင်းက South China Morning Post သတင်းစာတွင် ဖော်ပြခဲ့သည့် သတင်း၌  သင်္ဘော ဒလက်များကြောင့် ထိခိုက်ပျက်စီးနေသည့် ကျောက်တန်းများကို ဂြိုဟ်တုဓာတ်ပုံများထဲတွင် မြင်တွေ့ရသည်ဟု ထုတ်ပြန်ခဲ့သည်။

ထိုထိခိုက်ပျက်စီးမှုများသည် ငါးဖမ်းသမားများ၏ သင်္ဘောများတွင် တပ်ဆင်ထားသည့် ဒလက်များက ကျောက်တန်းကို ပွတ်တိုက်မှု၏ အကျိုးဆက်များဖြစ်သည်။

မကြာသေးမီက ပြုလုပ်ခဲ့သည့် ဖိလစ်ပိုင်၏ သတင်းစာ ရှင်းလင်းပွဲအတွင်း ပြသခဲ့သည့် ဓာတ်ပုံများထဲတွင် တရုတ် ငါးဖမ်းသမားများသည်  ကြီးမားသည့် ခုံးကောင်များကို နှစ်ပေါင်းများစွာကြာ အများအပြား ဖမ်းယူနေသည့် ပုံများအား ဖော်ပြထားသည်ဟု အေပီမှ ဖော်ပြခဲ့သည်။ 

မည်သို့ပင်ဆိုစေ ထိုလှုပ်ရှားမှုများသည် ၂၀၁၉ ခုနှစ်၊ မတ်လတွင် ရပ်နားသွားခဲ့ပုံပေါ်ကြောင်း ဖိလစ်ပိုင်အရာရှိများ က ပြောကြားခဲ့သည်။ 

သန္တာကျောက်တန်းများ ထိခိုက်ပျက်စီးမှုသည် လျစ်လျူရှုခံထားရသည့် မငြင်းနိုင်သော သက်သေတစ်ခုဖြစ်ပြီး ပင်လယ်ရေကြောင်းဆိုင်ရာ ဂေဟစနစ်ကို အလေးထားသူ အနည်းငယ်သာရှိနေကြောင်း ဖိလစ်ပိုင်ကမ်းခြေစောင့် တပ်ဖွဲ့ ပြောရေးဆိုခွင့်ရှိသူ မာလာယာက ပြောကြားခဲ့သည်။

တောင်တရုတ်ပင်လယ်တွင် သန္တာကျောက်တန်းများနှင့် အခြားထိခိုက် ပျက်စီးမှုများအတွက် တရုတ်ကို တရားစွဲ ဆိုရန် ဖိလစ်ပိုင်အစိုးရနှင့် သဘာတူညီမှုများ ရရှိထားကြောင်း မာလာယာက ပြောသည်။

၂၀၁၃ ခုနှစ်ကလည်း ဖိလစ်ပိုင်သည် နယ်သာလန်နိုင်ငံ၊ သည်ဟိဂ် (The Hague) မြို့ရှိ အနုညာတခုံရုံးတွင် တောင်တရုတ်ပင်လယ်အတွင်း တရုတ်က ပင်လယ်ရေကြောင်းဆိုင်ရာ ပိုင်ဆိုင်ကြောင်း ကြေညာသည့် Nine-dash line အမည်ရှိ နယ်စပ်စည်းရေးဆွဲမှုကို တရားရေးအရ စိန်ခေါ်ခဲ့သည်။ 

တောင်တရုတ်ပင်လယ် အခင်းအကျင်းကို တွေ့ရစဉ်

၃ နှစ်အကြာတွင် အနုညာတခုံးရုံးက ဖိလစ်ပိုင်ဘက်က ရပ်တည်ခဲ့ပြီး တောင်တရုတ်ပင်လယ်အတွင်း တရုတ်၏ ပိုင်ဆိုင်ကြောင်း ထွက်ဆိုမှုများကို ပယ်ချကြောင်း စီရင်ချက်ချခဲ့သည်။

မည်သို့ပင်ဆိုစေ တရုတ်အစိုးရက တရားရုံး၏ စီရင်ချက်ကို လျစ်လျူရှုခဲ့ပြီး စကာဘိုရော့ချ်သောင်ခုံကို နိုင်ငံတကာက စုံစမ်းစစ်ဆေးမှု ပြုလုပ်ခွင့်ပေးရန် တောင်းဆိုသည့် ဖိလစ်ပိုင်၏ တိုက်တွန်းချက်ကိုလည်း ငြင်းပယ်ဖွယ်ရှိသည်။

စကာဘိုရော့ချ်သောင်ခုံသည် မကြာသေးမီက တောင်တရုတ်ပင်လယ်အတွင်း တရုတ်နှင့် ဖိလစ်ပိုင်အကြား တင်းမာမှုများ မြင့်တက်စေခဲ့သည့် အဓိကနေရာတစ်ခု ဖြစ်ခဲ့သည်။ 

ထိုသောင်ခုံ၏ ထုံးအိုင်အတွင်းသို့ ဖိစလပိုင် ငါးဖမ်းသမား ဝင်ရောက်ခြင်းမရှိစေရန် တရုတ်ကမ်းခြေစောင့်တပ်ဖွဲ့ က ဟန့်တားပိတ်ဆို့ခဲ့သည်။

ပြီးခဲ့သည့်နှစ် စက်တင်ဘာလက တရုတ်ကမ်းခြေစောင့်တပ်ဖွဲ့သည် ထုံံးအိုင်အတွင်းသို့ ဝင်ရောက်မည့် ဝင်ပေါက် ကို ရေပေါ်အတားအဆီးများဖြင့် ပိတ်ဆို့ခဲ့ပြီး နောက်ပိုင်းတွင် ထိုအတားအဆီးများအား ဖိလစ်ပိုင်ကမ်းခြေစောင့် တပ်ဖွဲ့က ဖယ်ရှားခဲ့သည်။

ထိုဖြစ်စဉ် ဖြစ်ပွားခဲ့ပြီးကတည်းက ဖိလစ်ပိုင်ကမ်းခြေစောင့်တပ်ဖွဲ့ သင်္ဘောများနှင့် တရုတ်ကမ်းခြေစောင့်တပ်ဖွဲ့ သင်္ဘောများအကြား ထိပ်တိုက်တွေ့မှုများ ဖြစ်ပွားခဲ့သည်။ 

ဧပြီ ၃၀ ရက်ကလည်း တရုတ်ကမ်းခြေစောင့်တပ်ဖွဲ့ သင်္ဘောများသည် ဖိလစ်ပိုင် ကမ်းခြေစောင့်တပ်ဖွဲ့၏ ကင်းလှည့်သင်္ဘောများနှင့် ငါးဖမ်းသင်္ဘောများကို မီးသတ်ပိုက်ဖြင့် ထိုးခဲ့သဖြင့် ဖိလစ်ပိုင်သင်္ဘောများ ထိခိုက် ပျက်စီးခဲ့သည်။

တရုတ်၏ ကျွန်းတုကို တွေ့ရစဉ်

တောင်တရုတ်ပင်လယ်တွင် သဘာဝပတ်ဝန်းကျင်ဆိုင်ရာ အကျပ်အတည်းသည် ပထဝီနိုင်ငံရေး ဂယက်ရိုက်ခတ် မှုများကို သိသိသာသာ ဖြစ်ပေါ်စေခဲ့သည်။ 

ထိုဒေသသည် ရှုပ်ထွေးသည့် ပထဝီနိုင်ငံရေး အခင်းအကျင်းဖြစ်ပြီး တရုတ်က  တောင်တရုတ်ပင်လယ်၏ နယ်နိမိတ် ၉၀ ရာခိုင်နှုန်းနီးပါးကို ပိုင်ဆိုင်ကြောင်း ကြေညာထားသည်။ 

ထို့ကြောင့် တရုတ်သည် အရှေ့တောင်အာရှနိုင်ငံအချို့နှင့် နယ်နိမိတ် ပိုင်ဆိုင်မှု အငြင်းပွားလျက်ရှိပြီး အမေရိကန် နှင့်လည်း တင်းမာမှု မြင့်တက်ခဲ့သည်။

တရုတ်၏ လုပ်ဆောင်မှုများကြောင့် သဘာဝပတ်ဝန်းကျင် အရည်အသွေး နိမ့်ကျမှုသည် ထိုအငြင်းပွားမှုများကို ပိုမိုဆိုးရွားစေခဲ့သည်။ 

ထိုအခြေအနေသည် ဒေသတွင်း သောင်းနှင့်ချီသည့် ငါးဖမ်းသမားများ၏ စားဝတ်နေရေး၊ စားနပ်ရိက္ခာလုံခြုံရေးကို ခြိမ်းခြောက်နေကာ ဒေသတွင်း တည်ငြိမ်မှု ပျက်ယွင်းစေမည့် အလားအလာအထိ ရောက်ရှိနေသည်။ 

တောင်တရုတ်ပင်လယ်တွင် ထိုအရေးကိစ္စနှင့် ပတ်သက်ပြီး အာဆီယံနိုင်ငံများနှင့် ဆွေးနွေးညှိနှိုင်းရန် အချိန်ဆွဲ နေသည့် တရုတ်၏ နည်းဗျူဟာများကလည်း တောင်တရုတ်ပင်လယ်အတွင်း တရုတ်၏ လှုပ်ရှားမှုများကို ပိုမို ခိုင်မာအားကောင်းစေခဲ့သည်။

ထိုအကျပ်အတည်းသည် ကမ္ဘာလုံးဆိုင်ရာ အခင်းအကျင်းအပေါ်လည်း သက်ရောက်မှုရှိပြီး တရုတ်နှင့် အခြား နိုင်ငံများအကြား ယခင်ကတည်းက ရှိနေသည့် သဘောထား ကွဲလွဲမှုများနှင့် သံသယများကို ပိုမိုကြီးထွားစေကာ တောင်တရုတ်ပင်လယ်တွင် ပဋိပက္ခများ၏ ရှုပ်ထွေးသည့် အခြေအနေအတွက် မျက်နှာစာအသစ်တစ်ခု ဖြစ်ပေါ် စေခဲ့သည်။ 

ထို့ကြောင့် ထိုသဘာဝပတ်ဝန်းကျင် အကျပ်အတည်းသည် ဂေဟဗေဟဆိုင်ရာ ပြဿနာတစ်ခုသာ မဟုတ်ဘဲ နိုင်ငံတကာ၏ အာရုံစိုက်မှုနှင့် ချက်ချင်းဖြေရှင်းရမည့် ပထဝီနိုင်ငံရေးဆိုင်ရာ စိုးရိမ်စရာကိစ္စရပ်တစ်ခု ဖြစ်သည်။

Source: CNI

CNI Sport Article

၂၀၂၄ ခုနှစ်၊ မေလ ၃၁

ပြီးခဲ့တဲ့ရက်ပိုင်းက အားလုံးကို အံ့အားသင့်စရာ ဖြစ်ခဲ့တာကတော့ ဘိုင်ယန်မြူးနစ်အသင်းဟာ ကွန်ပနီကို နည်းပြသစ်အဖြစ် ခန့်အပ်လိုက်တယ်ဆိုတာ ဖြစ်ပါတယ်။

ဘိုင်ယန်မြူးနစ်အသင်းလို ဥရောပထိပ်သီးအသင်းက ဘန်လေအသင်းကို ပရီးမီးယားလိဂ်ပြိုင်ပွဲမှာ ဆက်ရှိအောင် မကိုင်တွယ်နိုင်ခဲ့တဲ့ ကွန်ပနီကို နည်းပြအဖြစ် ခန့်အပ်မယ်လို့ ဘယ်သူကမှ ထင်မှတ်မထားပေမယ့် ဒါက တကယ့် လက်တွေ့မှာ ဖြစ်လာခဲ့တာပါ။

ဘိုင်ယန်မြူးနစ်အသင်းဟာ ကွန်ပနီကို နည်းပြအဖြစ် ခန့်အပ်ဖို့က သူတို့အတွက် ဦးစားပေး မဟုတ်ခဲ့ပေမယ့် လိုချင်တဲ့ နည်းပြတွေ မရတဲ့အဆုံး နောက်ဆုံးမှာ ခန့်အပ်ခဲ့တာလို့ ပြောရမှာဖြစ်ပါတယ်။ 

ဘိုင်ယန်မြူးနစ်အသင်းဟာ လေဗာကူဆင်အသင်းနည်းပြ ဇာဘီအလွန်ဆို၊ ဂျာမနီအသင်းကို ကိုင်တွယ်နေတဲ့ နည်းပြဟောင်း နာဂျယ်လ်စမန်း၊ သြစတြီးယားအသင်းနည်းပြ ရက်ဂ်နစ်တို့ကို ချိတ်ဆက်ခဲ့ပေမယ့် အဆင်မပြေခဲ့ သလို ထွက်ခွာမယ့် နည်းပြ တူချယ်လ်ကို အသင်းမှာ ဆက်ရှိစေဖို့ ကြိုးစားခဲ့တာမှာလည်း သဘောတူညီမှု မရရှိခဲ့တာ ဖြစ်ပါတယ်။

အဲဒါကြောင့်လည်း နည်းပြကောင်း ဖြစ်လာဖို့ အလားအလာရှိတဲ့ ကွန်ပနီကို နည်းပြသစ်အဖြစ် ၃ နှစ်စာချုပ်နဲ့ ခန့်အပ်ခဲ့တာပါ။ 

ကွန်ပနီရဲ့ နည်းပြ အတွေ့အကြုံကို ကြည့်မယ်ဆိုရင်လည်း သူဟာ ၂၀၁၉ ခုနှစ်ကမှ ဘယ်လ်ဂျီယံကလပ် အန်ဒါလက်ချ်အသင်းမှာ ကစားသမား/နည်းပြအဖြစ် တာဝန်ယူရင်းကနေ ၂၀၂၀ ခုနှစ်မှာ နည်းပြအဖြစ် စတင် ကိုင်တွယ်ခဲ့တာ ဖြစ်ပါတယ်။

ကွန်ပနီကို တွေ့ရစဉ်

အန်ဒါလက်ချ်အသင်းကို ၂ နှစ်ကြာ ကိုင်တွယ်ခဲ့တဲ့ ကွန်ပနီဟာ ကြီးကြီးမားမား အောင်မြင်မှုအဖြစ် ဘယ်လ်ဂျီယံ ဖလားပြိုင်ပွဲမှာ ဒုတိယသာရရှိခဲ့တာပါ။

ကွန်ပနီဟာ အန်ဒါလက်ချ်အသင်းကို ကိုင်တွယ်အပြီးမှာ ဘန်လေအသင်းရဲ့ နည်းပြအဖြစ် ခန့်အပ်ခံခဲ့ရပြီး သူဟာ ဘန်လေအသင်းကို ချန်ပီယံရှစ်ပြိုင်ပွဲမှာ ချန်ပီယံအဖြစ်နဲ့ ပရီးမီးယားလိဂ်ကို တန်းတက်နိုင်အောင် စွမ်းဆောင်နိုင် ခဲ့ပါတယ်။

ကွန်ပနီဟာ ဘန်လေအသင်းကို ပရီးမီးယားလိဂ်ပြိုင်ပွဲမှာ ဆက်ပြီးရှိအောင် မကိုင်တွယ်နိုင်ခဲ့ပေမယ့် သူဟာ ရှိတဲ့လူစာရင်းနဲ့  အကောင်းဆုံး ယှဉ်ပြိုင်နိုင်ခဲ့တာကို မြင်တွေ့ခဲ့ရတာပါ။

နည်းပြအတွေ့အကြုံ နုသေးတဲ့ ကွန်ပနီအတွက်တော့ ဘိုင်ယန်မြူးနစ်အသင်းကို ကိုင်တွယ်ရတာဟာ အရင် ကိုင်တွယ်ခဲ့တဲ့ အန်ဒါလက်ချ်၊ ဘန်လေအသင်းတို့နဲ့ တူညီမှာ မဟုတ်ပါဘူး။

ဘိုင်ယန်မြူးနစ်အသင်းဟာ ထိပ်သီးအသင်း ဖြစ်တဲ့အတွက် ကွန်ပနီဟာ ဖိအားတွေ၊ စိန်ခေါ်မှုတွေ အများကြီးကို  ရင်ဆိုင်ရတော့မှာပါ။ 

ကွန်ပနီကိုယ်တိုင်ကလည်း ဒီစိန်ခေါ်မှုတွေကို သူစောင့်မျှော်နေတယ်လို့ ပြောထားတာ ဖြစ်ပါတယ်။ 

ဘိုင်ယန်မြူးနစ်အသင်းဟာ ၂၀၁၁-၁၂ ရာသီနောက်ပိုင်း ပထမဆုံးအကြိမ် ဒီရာသီကို ဆုဖလားလက်မဲ့နဲ့ အဆုံးသတ်ခဲ့ရတဲ့အတွက် လာမယ့်ရာသီမှာ ဆုဖလားပြန်လည်ရအောင် ယူပေးဖို့က ကွန်ပနီအပေါ်မှာ တာဝန်ရှိ သွားပြီဖြစ်ပါတယ်။

ကွန်ပနီဟာ လေဗာကူဆင်အသင်းဆီကနေ ဘွန်ဒက်လီဂါဖလားကို ပြန်လည်ရအောင် ယူဖို့ ဦးစားပေး လုပ်ဆောင်ရမှာပါ။

ကွန်ပနီကို တွေ့ရစဉ်

ပြီးရင် ဥရောပချန်ပီယံလိဂ်ပြိုင်ပွဲမှာ ဘိုင်ယန်မြူးနစ်အသင်း ပြန်လည်ကြီးစိုးအောင် လုပ်ဖို့အတွက် ကွန်ပနီ အနေနဲ့ တစ်ဆင့်ချင်းစီ ပြင်ဆင်သွားရမှာ ဖြစ်ပါတယ်။ 

လက်ရှိ ဘိုင်ယန်မြူးနစ်အသင်းမှာဆိုရင် ကွန်ပနီထက် ရက်ပိုင်းပိုကြီးနေတဲ့ ဂိုးသမား နူအာ၊ အသက်သိပ်မကွာတဲ့ မူလာတို့လို ကစားသမားတွေရှိတာကြောင့် ဘယ်လ်ဂျီယံ လူမျိုးနည်းပြဟာ သူတို့နဲ့ တိုင်ပင်ပြီး အသင်းကို အကောင်းဆုံး ကိုင်တွယ်သွားဖို့လည်း လိုအပ်နေတာပါ။ 

ဂျာမနီ ဝါရင့်ကစားသမားတွေဖြစ်တဲ့ သူတို့နဲ့ အဆင်မပြေရင်လည်း ကွန်ပနီအတွက် အခက်တွေ့နိုင်ပါတယ်။ 

ဘိုင်ယန်မြူးနစ်အသင်းဘက်ကို ပြန်ကြည့်ရင်လည်း ဇာဘီအလွန်ဆိုလို လူငယ်နည်းပြ တစ်ဦးက လေဗာကူဆင် အသင်းကို ရှုံးပွဲမရှိ စံချိန်တင် အောင်ပွဲတွေ ရယူခဲ့ချိန်မှာ သူတို့လည်း လူငယ်နည်းပြတစ်ဦးနဲ့ ပြန်လုပ်ပြဖို့ ရည်ရွယ်ထားပုံရတာ ဖြစ်ပါတယ်။

အောင်မြင်မှုမရရင်တော့ ဘိုင်ယန်မြူးနစ်အသင်းအနေနဲ့ ဝေဖန်မှုတွေ အများကြီးကို ခံရမှာပါ။ ဘိုင်ယန်မြူးနစ်နဲ့ ကွန်ပနီတို့ဟာ သူတို့ကို မယုံကြည်တဲ့သူတွေကို အကောင်းဆုံး တုန့်ပြန်နိုင်ဖို့က လာမယ့်ရာသီမှာ ဆုဖလား အောင်မြင်မှုတွေ ရယူနိုင်ဖို့ ဖြစ်ပါတယ်။ 

အဲဒါကြောင့် ကွန်ပနီအနေနဲ့ ဘိုင်ယန်မြူးနစ်အသင်းကို ဘယ်လိုနည်းဗျူဟာတွေနဲ့ ကိုင်တွယ်ပြီး ဆုဖလားတွေ ရယူပေးနိုင်မလားဆိုတာ စောင့်ကြည့်ရတော့မှာ ဖြစ်ပါတယ်။ 

CNI International Article
၂၀၂၄ ခုနှစ်၊ မေလ ၂၆

လာမည့်နှစ်ပေါင်း ၂၀ ကျော်အတွင်း အရှေ့တောင်အာရှ၏ အခြေအနေမှာ မည်သို့ဖြစ်လာမည်နည်း။ 

မခန့်မှန်းနိုင်လောက်သည့် ပထဝီနိုင်ငံရေး အခြေအနေအရ ထိုဒေသသည် ပေါ်ထွက်လာသည့် နိုင်ငံတကာ အခင်းအကျင်းအသစ်၏ ရိုက်ခတ်မှုများကို လျော့ပါးသက်သာစေမည့် နည်းလမ်းများတွင် မဟာဗျူဟာမြောက် အနေအထားကို ဆက်လက် ထိန်းသိမ်းထားမည်ဖြစ်သည်။ 

ဝင်ရိုးစုံကမ္ဘာသည် အရှေ့တောင်အာရှဒေသအတွက် ရုန်းကန်ရမည့် ကစားပွဲအသစ်တစ်ခု ဖြစ်လာမည်ဖြစ်သည်။

အမေရိကန်နှင့် တရုတ်အကြား အပြန်အလှန် ထိုးနှက်မှုများဖြင့် အားပြိုင်မှုသည် လျော့ကျသွားဖွယ် မရှိသည့် အချက်ကို အရှေ့တောင်အာရှနိုင်ငံများက သိရှိနားလည်ထားကြသည်။ 

ထိုအခြေအနေများအရ အာဆီယံ၏ အရိပ်အောက်တွင် အရှေ့တောင်အာရှ၏ အခန်းကဏ္ဍသည် ဒေသတွင်း အသုံးချခံ မဖြစ်စေရန် စိတ်ချသေချာမှုရှိအောင် လုပ်ဆောင်ရမည်ဖြစ်သည်။

တိတိကျကျ ပြောရမည်ဆိုပါက အမေရိကန်-တရုတ် အားပြိုင်မှုတွင် အာဆီယံသည် နယ်ရုပ်တစ်ခု ဖြစ်လာမည့် အရေးမှ မည်ကဲ့သို့ ရှောင်လွှဲနိုင်မည် ဟုတ်၊မဟုတ် မေးခွန်းထုတ်ရမည်ဖြစ်သည်။

လက်ရှိအနေအထားအရ အမေရိကန်-တရုတ် အပြန်အလှန် ထိုးနှက်မှုများ၏ အကျိုးသက်ရောက်မှုများကို တုန့်ပြန်ရန် အာဆီယံတွင် ဘုံမဟာဗျူဟာ အစီအစဉ်တစ်ခုမရှိခဲ့ပေ။

အာဆီယံဖွဲ့စည်းခဲ့သည့် ၁၉၆၇ ခုနှစ်ကတည်းက အာဆီယံသည် ပထဝီနိုင်ငံရေး ဖိအားများကို ကျော်လွှားနိုင်ခဲ့သည်။

စစ်အေးကာလက အာဆီယံသည် အဖွဲ့ဝင်နိုင်ငံများနှင့် အဖွဲ့အစည်း၏ အကျိုးစီးပွားကို ထိခိုက်စေခြင်းမရှိဘဲ ပထဝီနိုင်ငံရေး ကသောင်းကနင်း အခြေအနေကြားတွင် ကြံ့ကြံ့ခံ ရပ်တည်နိုင်ခဲ့သည်။

မည်သို့ပင်ဆိုစေ မကြာသေးမီ နှစ်များအတွင်း အမေရိကန်နှင့် တရုတ်၏ အားပြိုင်မှုများ ပိုမိုပြင်းထန်လာသည် နှင့်အမျှ ပထဝီနိုင်ငံရေး အခင်းအကျင်းသည် အလုံးစုံ ပြောင်းလဲသွားခဲ့သည်။

လက်ရှိတွင် အမေရိကန်နှင့် တရုတ်သည် ၎င်းတို့၏ သက်ဆိုင်ရာ မဟာဗျူဟာများကို ပိုမိုခိုင်မာမှုရှိစေရန် ကမ္ဘာတစ်ဝန်းတွင် မဟာမိတ်များကို အပြိုင်အဆိုင် စည်ရုံးနေကြသည်။

ထိုအားပြိုင်မှုနှင့်ပတ်သက်ပြီး အာဆီယံ၏ တုန့်ပြန်ဆောင်ရွက်မှုကို နားလည်သိရှိစေရန် မကြာမီ ကြေညာ တော့မည့် ASEAN Vision 2045 အမည်ရှိ မူကြမ်းကို လေ့လာရန် အရေးကြီးသည်။

ထိုမူကြမ်းကို လာမည့်နှစ်တွင် မလေးရှားနိုင်ငံ၏ ဥက္ကဋ္ဌရာထူး လက်ထက်၌ အာဆီယံခေါင်းဆောင်များက အပြီးသတ် စိစစ်ရေးဆွဲသွားမည်ဖြစ်သည်။

လက်ရှိ ကျင့်သုံးနေသည့် အာဆီယံ၏ အတွေးအမြင်ဖြစ်သည့် Asian Vision (၂၀၁၅-၂၀၂၅) တွင် အာဆီယံ အသိုင်းအဝိုင်းအကြား နိုင်ငံရေး၊ လုံခြုံရေး၊ စီးပွားရေး၊ လူမှုရေး၊ ယဉ်ကျေးမှု ဒေါက်တိုင်များနှင့် ချမ်းသာကြွယ်ဝ ရေးဆိုသည့် ခေါင်းစဉ်များအောက်တွင် ပေါင်းစည်းညီညွတ်ရေးကို အလေးထားဖော်ပြထားသည်။

လာမည့်နှစ်ပေါင်း ၂၀ အတွက် အာဆီယံသည် အလယ်အလတ်လမ်းစဉ်ကို ပိုမိုခိုင်မာစေရန် ဒေသတွင်းနှင့် နိုင်ငံတကာအဆင့်တွင် သေချာသည့် လမ်းကြောင်းတစ်ခုကို ဖောက်လုပ်ရမည်ဖြစ်သည်။

၂၀၁၉ ခုနှစ်က အာဆီယံ၏ အင်ဒို-ပစိဖိတ်သဘောထား ထုတ်ပြန်ချက်တွင် အာဆီယံသည် ဒေသတွင်း ဖွဲ့စည်း တည်ဆောက်မှုကို ပုံဖော်ရာ၌ အလယ်ဗဟိုကျသည့် အခန်းကဏ္ဍမှ ပါဝင်ရန် ကြိုးပမ်းလိုကြောင်း ဖော်ပြခဲ့ပြီး ကြားဝင်မစွက်ဖက်ရေး၊ အများသဘောဆန္ဒကို အခြေခံသည့် ဆုံးဖြတ်ချက် ချမှတ်မှုနှင့် ကြားနေဝါဒကို ဆက်လက် ကျင်းသုံးလျက်ရှိသည်။

လက်ရှိ အာဆီယံ၏ ကျင့်ဝတ်စည်းကမ်းဖြစ်သည့် အာဆီယံ ချစ်ကြည်မှုနှင့် ပူးပေါင်းဆောင်ရွက်ရေးစာချုပ် (TAC) သည် အာဆီယံ၏ ဩဇာအာဏကို မြှင့်တင်လိုသည့် ရည်ရွယ်ချက်ဖြင့် နိုင်ငံရေးလုပ်ဆောင်ချက်မျိုး မပါဝင်ဘဲ အသုံးဝင်နေဆဲဖြစ်သည့် မူဘောင်တစ်ခုဖြစ်သည်။

TAC သည် အာဆီယံအတွင်း အဖွဲ့ဝင်နိုင်ငံ ၁၀ နိုင်ငံ ပြည့်လာခဲ့သည့် ၁၉၇၀ ပြည့်နှစ် ကာလများတွင် အရှေ့တောင်အာရှနိုင်ငံများအကြား ငြိမ်းချမ်းရေးစာချုပ်တစ်ခု ဖြစ်ခဲ့သည်။

နှစ်အလိုက် ပါဝင် လက်မှတ်ရေးထိုးခဲ့သည့် နိုင်ငံများ ပိုမိုများပြားလာသည်နှင့်အမျှ လက်ရှိတွင် TAC ၌ ပါဝင် လက်မှတ်ရေးထိုးခဲ့သည့် နိုင်ငံပေါင်း ၅၁ နိုင်ငံအထိရှိလာခဲ့ကာ ထိုနိုင်ငံ အရေအတွက်သည် ကုလသမဂ္ဂ အဖွဲ့ဝင် နိုင်ငံ စုစုပေါင်း၏ ၄ ပုံ ၁ ပုံခန့်ဖြစ်သည်။

TAC ၏ အဓိက ရည်ရွယ်ချက်မှာ ငြိမ်းချမ်းရေးကို မြတ်နိုးသည့် နိုင်ငံများအတွက် ငြိမ်းချမ်းရေးနှင့် ချမ်းသာ ကြွယ်ဝရေးတို့ကို မြှင့်တင်ရန် ဖြစ်သည်။

နောက်ထပ် အသုံးဝင်သည့် အာဆီယံ၏ စာချုပ်များထဲတွင် အရှေ့တောင်အာရှ နျူကလီးယား လက်နက်များ ကင်းစင်ရေးဇုန် စာချုပ်၊ ငြိမ်းချမ်းရေး၊ လွတ်လပ်မှုနှင့် ကြားနေဇုန် ကြေညာချက်တို့ ပါဝင်သည်။

မည်သို့ပင်ဆိုစေ လက်ရှိ အမေရိကန်-တရုတ် ဆက်ဆံရေးများ တင်းမာမှု မြင့်တက်လာချိန်တွင် အာဆီယံအနေ ဖြင့် လက်ပိုက်ကြည့်နေရမည် မဟုတ်ဘဲ စူပါပါဝါ နှစ်နှိင်ငံအတွက် ပြန်လည်ချိတ်ဆက်ရန်နှင့် ရင်ကြားစေ့ရန် နည်းလမ်းများကို ရှာဖွေရမည်ဖြစ်သည်။

လောလောဆယ်တွင် အာဆီယံသည် ၎င်း၏ မူဘောင်များနှင့် လမ်းစဉ်များကို ဖော်ပြရန် အာဆီယံ ဒေသတွင်း ဖိုရမ်၊ အရှေ့အာရှ ညီလာခံနှင့် အာဆီယံ ကာကွယ်ရေးဝန်ကြီးများနှင့် အပေါင်းပါနိုင်ငံများ အစည်းအဝေးတို့ကဲ့သို့ အာဆီယံက ဦးဆောင်သည့် လုပ်ထုံးလုပ်နည်းများကို အသုံးပြုနေသည်။

သို့သော် ထိုအားထုတ် ကြိုးပမ်းမှုများသည် အမေရိကန်နှင့် တရုတ်အကြား ပြေလည်မှုရရှိစေရန် လုံလောက်မှု မရှိခဲ့ပေ။ ထို့ပြင် အမေရိကန်နှင့်တရုတ်သည် အရှေ့တောင်အာရှတွင် ငြိမ်းချမ်းရေးနှင့် တည်ငြိမ်ရေးကို မြှင့်တင်ရန် ပူးပေါင်းဆောင်ရွက်မှုများကို တိုးမြှင့်ရန်နှင့် ထိတွေ့ဆက်ဆံမှုများ ပြုလုပ်ရန် အာဆီယံနှင့် ပူးပေါင်း ဆောင်ရွက်မှုအပိုင်းတွင် အားနည်းခဲ့သည်။

ထို့ကြောင့် လက်ရှိတွင် အာဆီယံအနေဖြင့် အမေရိကန်-တရုတ် ဆွေးနွေးမှုကို အစပျိုးရန် အထောက်အပံ့ ဖြစ်စေသည့် အခန်းကဏ္ဍ၌ ရှိနေသင့်သည်။
အာဆီယံ၏ နောက်ထပ် လုပ်ဆောင်မှုများသည်လည်း အထောက်အကူ ဖြစ်စေနိုင်သည်။ ဥပမာပြရမည်ဆိုပါက ၂၀၂၁ ခုနှစ် ဇွန်လက ထိုင်းနိုင်ငံတွင် အာဆီယံ-တရုတ် ဆွေးနွေးပွဲ၌ စတင်အကောင်အထည်ဖော်ခဲ့သည့် အာဆီယံ အပေါင်း ၂ ဖိုရမ် (Asean Plus Two Forum) ဖြစ်သည်။

အာဆီယံနှင့် အခြားနိုင်ငံများအကြား အပြန်အလှန် ယုံကြည်မှုများ မြင့်တက်လာမည်နှင့်အမျှ သက်ဆိုင်ရာ အရေး ကိစ္စများတွင် အာဆီယံကို ကြားနေလေ့လာသူ တစ်ဦးအဖြစ် ထိတွေ့ဆက်နွှယ်သည့် ထိပ်သီးအဆင့် ပူးပေါင်း ပါဝင်သည့်နိုင်ငံများ ပိုမိုများပြားလာမည်ဖြစ်သည်။

ဇန်နဝါရီလကုန်ပိုင်းက အမေရိကန်အမျိုးသားလုံခြုံရေး အကြံပေးပုဂ္ဂိုလ် ဂျိတ်ဆူလေဗန် (Jake Sullivan) သည် ဘန်ကောက်သို့ အံ့အားသင့်ဖွယ် ခရီးစဉ်အဖြစ် လာရောက်ခဲ့ပြီး တရုတ်နိုင်ငံတော်ကောင်စီဝင်လည်းဖြစ် တရုတ် နိုင်ငံခြားရေးဝန်ကြီးလည်းဖြစ်သည့် ဝမ်ယိ (Wang Yi) နှင့် တွေ့ဆုံကာ နှစ်နိုင်ငံအကြား အရေးကိစ္စများနှင့် စိန်ခေါ်မှုများနှင့်ပတ်သက်ပြီး ဆွေးနွေးခဲ့သည်။

၎င်းတို့နှစ်ဦး၏ တွေ့ဆုံမှုသည် အာဆီယံအနေဖြင့် စူပါပါဝါ နှစ်နိုင်ငံဖြစ်သည့် အမေရိကန်နှင့် တရုတ်အကြား ငြိမ်းချမ်းမှုရှိသည့် ဆွေးနွေးပွဲများ ပြုလုပ်နိုင်သည့် နေရာတစ်ခုအဖြစ် မီးမောင်းထိုးပြသရာ ရောက်ခဲ့သည်။

သင့်တင့်မျှတမှုရှိသည့် ပထဝီဝင် တည်နေရာနှင့် သံတမန်ဆက်ဆံရေး ကောင်းမွန်သည့် ထိုင်းသည် အိမ်ရှင် ကောင်း ပီသစွာ ဆွေးနွေးပွဲကို လက်ခံကျင်းပပေးခဲ့သည်။

ပိုမိုကြီးမားကျယ်ပြန့်သည့် အရေးကိစ္စများတွင် အာဆီယံဒေသသည် အမေရိကန်နှင့် တရုတ်အကြား တင်းမာမှု များ လျော့ကျစေရန်နှင့် ပူးပေါင်းဆောင်ရွက်မှုကို မြှင့်တင်ရန် နောက်ထပ် ဆွေးနွေးပွဲများ ပြုလုပ်ရေးအတွက် အချက်အခြာကျသည့် ရပ်ဝန်းတစ်ခုအဖြစ် ထောက်ပံ့ပေးနိုင်မည်ဖြစ်သည်။

နှစ်ကုန်ပိုင်းတွင် ပြုလုပ်လေ့ရှိသည့် အာဆီယံညီလာခံများတွင်လည်း အမေရိကန်နှင့် တရုတ်အား ထိုသို့ပြုလုပ်ရန် ကောင်းမွန်သည့် အခွင့်အလမ်းများကို ကမ်းလှမ်းခဲ့သည်။

လာမည့်နှစ်ပေါင်း ၂၀ တွင် အာဆီယံ၏ တည်ငြိမ်ရေးနှင့် ချမ်းသာကြွယ်ဝရေးသည် အမေရိကန်-တရုတ် ဆက်ဆံရေးပေါ် မူတည်နေမည်ဖြစ်သည်။ 

အာဆီယံအဖွဲ့အနေဖြင့်လည်း အမေရိကန်နှင့် တရုတ်ကြား ပူးပေါင်းဆောင်ရွက်မှုနှင့် ဆွေးနွေးမှုကို မြှင့်တင်ရန် တတ်အားသရွေ့ လုပ်ဆောင်ရမည်ဖြစ်သည်။ အာဆီယံကို အမေရိကန်နှင့် တရုတ်တို့က ယုံကြည်မှုနှင့်အတူ အာဆီယံအနေဖြင့် ၎င်း၏ နိုင်ငံရေးကစားပွဲကို ဆက်ကစားရမည်ဖြစ်သည်။

Source: ဘန်ကောက်ပို့စ်

CNI Sport Article 

၂၀၂၄ ခုနှစ်၊ မေလ ၂၄

နာမည်ကျော် ဘောလုံးသမား တစ်ဦးပြီးတစ်ဦး ပရော်ဖက်ရှင်နယ် ဘောလုံးသမားဘဝကို စွန့်ခွာလာရင်း နောက်ထပ် အလှည့်ကျလာတဲ့သူကတော့ ရီးရယ်လ်အသင်း ကွင်းလယ်လူ တိုနီကရူးစ် ဖြစ်ပါတယ်။ 

ရီးရယ်လ်နဲ့ ဂျာမနီကွင်းလယ်လူ တိုနီကရူးစ်ဟာ နွေရာသီမှာ ကျင်းပမယ့် ယူရို ၂၀၂၄ ပြိုင်ပွဲအပြီးမှာ ပရော်ဖက်ရှင်နယ် ဘောလုံးကစားသမားဘဝကနေ အနားယူတော့မယ်လို့ ပြီးခဲ့တဲ့ရက်ပိုင်းက တရားဝင် ကြေညာခဲ့ပါတယ်။

တိုနီကရူးစ်ဟာ အခုမှ အသက် ၃၄ နှစ်အရွယ်သာ ရှိသေးတာကြောင့် ပရော်ဖက်ရှင်နယ် ကစားသမားဘဝကို ဆက်သွားလို့ရသေးပေမယ့် အနားယူဖို့ ဆုံးဖြတ်ချက်ချခဲ့တာပါ။

ဂျာမန်စနိုက်ပါလို့ အမည်ပြောင်ရထားတဲ့ တိုနီကရူးစ်ဟာ ဘောလုံးကစားတာမှာ သွေးအေးပြီး ဘောလုံး အမြင်၊ ပေးပို့မှု၊ တီထွင်ဖန်တီးမှု၊ ဖြတ်တင်ပေးမှုတွေနဲ့ တည်ကန်ဘောကန်ရာမှာ ကျွမ်းကျင်မှုရှိတဲ့သူ ဖြစ်ပါတယ်။ 

အဲဒါကြောင့်လည်း တိုနီကရူးစ်ရဲ့ ဆုံးဖြတ်ချက်ကို အသင်းဖော်တွေနဲ့ ပရိသတ်တွေက စောလွန်းသေးတယ်ဆိုပြီး နှမြောနေကြတာပါ။

တိုနီကရူးစ်ကို တွေ့ရစဉ်

ဂျာမနီကွင်းလယ်လူ တိုနီကရူးစ်က ဒါဟာ သူ့အတွက် ခက်ခဲတဲ့ ဆုံးဖြတ်ချက်ဖြစ်ပေမယ့် သေချာတွေးပြီးမှ ဆုံးဖြတ်ချက်ချခဲ့တာလို့ ပြောခဲ့ပါတယ်။

တိုနီကရူးစ်နဲ့ ရီးရယ်လ်အသင်းတို့ ချုပ်ဆိုထားတဲ့ စာချုပ်ဟာ ဒီရာသီအကုန်မှာ ကုန်ဆုံးတော့မှာဖြစ်ပြီး စပိန်ကလပ်က သူ့ကို စာချုပ်သစ်ချုပ်ဆိုဖို့ စီစဉ်နေတာပါ။ 

ဒါပေမယ့် တိုနီကရူးစ်က သူ့ရဲ့စွမ်းဆောင်ရည် အကောင်းဆုံး ဖြစ်နေတဲ့အချိန်မှာ ကစားသမားဘဝကို အဆုံးသတ်ဖို့က သူရဲ့ရည်မှန်းချက် ဖြစ်တယ်လို့ ပြောခဲ့ပါတယ်။

ပြီးတော့ ရီးရယ်လ်အသင်းမှာ ကစားသမားဘဝကို အဆုံးသတ်ဖို့က သူအဖြစ်ချင်ဆုံးအရာ ဖြစ်တယ်လို့လည်း တိုနီကရူးစ်က ပြောခဲ့တာပါ။ 

တိုနီကရူးစ်ဟာ ကစားသမားဘဝ အစကို ဘိုင်ယန်မြူးနစ်အသင်းမှာ စတင်ခဲ့ပေမယ့် ရီးရယ်လ်အသင်းမှာ ကစားရတာကို အပျော်ရွှင်ဆုံး ဖြစ်နေခဲ့ပါတယ်။

တိုနီကရူးစ်ဟာ ဘိုင်ယန်မြူးနစ်အသင်းမှာ ၂၀၀၇ ကနေ ၂၀၁၄ ခုနှစ်အထိ ကစားခဲ့ပြီး ၂၀၁၄ ခုနှစ်မှာ ရီးရယ်လ် အသင်းထံ ပြောင်းရွှေ့ခဲ့တာပါ။

တိုနီကရူးစ်ဟာ ရီးရယ်လ်အသင်းထံ မပြောင်းရွှေ့ခင်မှာ ယူနိုက်တက်အသင်းထံ ပြောင်းရွှေ့ဖို့ နီးစပ်ခဲ့ပြီး ဒီအချိန်က ယူနိုက်တက်အသင်းကို ကိုင်တွယ်ခဲ့တဲ့ နည်းပြ ဒေးဗစ်မိုယက်စ်နဲ့ အပြောင်းအရွှေ့ သဘောတူညီမှု ရရှိခဲ့တာ ဖြစ်ပါတယ်။ 

တိုနီကရူးစ်ကို တွေ့ရစဉ်

ဒါပေမယ့် ဒေးဗစ်မိုယက်စ် ထုတ်ပယ်ခံခဲ့ရပြီး သူ့နေရာမှာ အစားထိုး ဝင်ရောက်လာတဲ့ ဗန်ဟားလ်က တိုနီကရူးစ်ကို မခေါ်ယူခဲ့တာပါ။

ဒါက တိုနီကရူးစ်အတွက် ကောင်းတဲ့အရာဖြစ်လာခဲ့ပြီး ဒီလိုမှမဟုတ်ရင် ရီးရယ်လ်အသင်းမှာ ရယူနိုင်ခဲ့တဲ့ အောင်မြင်မှုမျိုးကို ရယူနိုင်ဖို့ရှိလာမှာ မဟုတ်ပါဘူး။ 

ဂန္ထဝင်ကွင်း လယ်လူဟာ ဘိုင်ယန်မြူးနစ်အသင်းမှာ ကစားခဲ့ချိန်က ဘွန်ဒက်လီဂါဖလား ၃ ကြိမ်၊ ချန်ပီယံလိဂ် ဖလား ၁ ကြိမ် အပါအဝင် ဆုဖလားပေါင်း ၁၀ ခုအထိ ရယူနိုင်ခဲ့တာပါ။ 

တိုနီကရူးစ်ဟာ ရီးရယ်လ်အသင်းမှာ ကစားတဲ့ ၁၀ နှစ်အတွင်းမှာ စပိန်လာလီဂါနဲ့ ချန်ပီယံလိဂ်ဖလား ၄ ကြိမ်စီ အပါအဝင် ဆုဖလားပေါင်း ၂၁ ခုအထိ ရယူနိုင်ခဲ့တာ ဖြစ်ပါတယ်။

တိုနီကရူးစ်ဟာ နိုင်ငံအသင်းဖြစ်တဲ့ ဂျာမနီအသင်းနဲ့ ၂၀၁၄ ကမ္ဘာ့ဖလားပြိုင်ပွဲမှာ ချန်ပီယံဆုကို ရယူနိုင်ခဲ့တာပါ။ 

တိုနီကရူးစ်ဟာ ၂၀၂၁ ခုနှစ်၊ ဇူလိုင်က ဂျာမနီအသင်းကနေ အနားယူခဲ့ပေမယ့် နည်းပြသစ်ဖြစ်လာတဲ့ နာဂျယ်လ် စမန်းနဲ့ ဆွေးနွေးမှု ပြုလုပ်အပြီးမှာ သူ့ရဲ့ဆုံးဖြတ်ချက်ကို ပြန်ပြောင်းပြီး နိုင်ငံအသင်းအတွက် ပြန်လည်ကစားပေး ဖို့ ဆုံးဖြတ်ခဲ့တာ ဖြစ်ပါတယ်။

တိုနီကရူးစ်ကို တွေ့ရစဉ်

အခုအချိန်မှာတော့ တိုနီကရူးစ်ဟာ ဂျာမနီအသင်းအတွက် ယူရို ၂၀၂၄ ပြိုင်ပွဲမှာ ပါဝင်ကစားပေးပြီး ပရော်ဖက်ရှင်နယ် ကစားသမားဘဝက အနားယူတော့မှာပါ။

အဲဒါကြောင့် တိုနီကရူးစ်ရဲ့ ကစားသမားဘဝ အနားယူမယ့် နေ့ရက်တွေဟာ လက်ချိုးပြီး ရေတွက်ရင် သိပ်ပြီး မကျန်ရှိတော့တာ ဖြစ်ပါတယ်။ 

အသက် ၃၄ နှစ်အရွယ်ရှိ တိုနီကရူးစ်အတွက် ဇွန်လ ၁ ရက်မှာ ကစားမယ့် ဒေါ့မွန်အသင်းနဲ့ ချန်ပီယံလိဂ် ဗိုလ်လုပွဲဟာ ရီးရယ်လ်အသင်း ကစားသမားဘဝ သူ့ရဲ့နောက်ဆုံးပွဲစဉ် ဖြစ်လာမှာပါ။ 

ရီးရယ်လ်အသင်းဖော်တွေဟာ ချန်ပီယံလိဂ်ဖလား ရယူပေးပြီး တိုနီကရူးစ်ကို အကောင်းဆုံး နှုတ်ဆက်နိုင်ဖို့ အာရုံစိုက်နေကြတာ ဖြစ်ပါတယ်။

တိုနီကရူးစ်ဟာ သူ့ရဲ့ကစားသမားဘဝ နောက်ဆုံးရာသီမှာ ကလပ်အသင်းဖြစ်တဲ့ ရီးရယ်လ်အသင်း၊ နိုင်ငံအသင်းဖြစ်တဲ့ ဂျာမနီအသင်းတို့နဲ့ အောင်မြင်မှုတွေရယူပြီး အဆုံးသတ်ဖို့ မျှော်လင့်နေတာကြောင့် မျှော်လင့်ထားတဲ့အတိုင်း ဖြစ်လာနိုင်မလားဆိုတာ စောင့်ကြည်ရမှာပဲ ဖြစ်ပါတယ်။