CNI Article

၂၀၂၄ ခုနှစ်၊ မတ်လ ၁၇

အိန္ဒိယဝန်ကြီးချုပ် နာရန်ဒရာမိုဒီ (Narendra Modi) သည် မတ်လ ၇ ရက်က ကက်ရှ်မီးယားဒေသ သီရိနာဂါ (Srinagar) မြို့တော်ရှိ ဘက်ခ်ရှီ (Bakshi) ဘောလုံးကွင်းတွင် မိန့်ခွန်းပြောကြားခဲ့သည်။

၂၀၁၉ ခုနှစ်၊ ဩဂုတ် ၅ ရက်တွင် ဗဟိုအစိုးရက ကက်ရှ်မီးယားဒေသ၏ ကိုယ်ပိုင်အုပ်ချုပ်ခွင့်ကို ပြန်လည် ရုပ်သိမ်းခဲ့ပြီးနောက် မိုဒီသည် ကက်ရှ်မီးယားသို့ ပထမဆုံးအကြိမ် လာရောက်သည့် ခရီးစဉ်လည်း ဖြစ်သည်။

မိုဒီသည် နိုင်ငံရေး ကြားပွဲစားများကို ကျော်လွှားပြီး ကက်ရှ်မီးယား ဒေသခံများနှင့် တိုက်ရိုက် ထိတွေ့ဆက်ဆံမှုကို ရွေးချယ်ခဲ့ခြင်းဖြင့် ထိုမိန့်ခွန်း ပြောကြားသည့် အခမ်းအနားသည် ထုံးတမ်းစဉ်လာ ကျင့်သုံးခဲ့သော  လုပ်ထုံး လုပ်နည်းများနှင့် ကွဲပြားခဲ့သည်ကို တွေ့ရမည်ဖြစ်သည်။

ထိုကဲ့သို့ ကက်ရှ်မီးယား ဒေသခံများနှင့် စုရုံးတွေ့ဆုံမှုသည် မိုဒီ၏ နိုင်ငံရေး လိမ်မာပါးနပ်မှုကို ပြသရုံသာ မဟုတ် ဘဲ အိန္ဒိယအစိုးရနှင့် ဂျမူးနှင့်ကက်ရှ်မီးယား ဒေသခံများအကြား ပြောင်းလဲတိုးတက်လာသည့် ဆက်ဆံရေး၏ အထောက်အထားတစ်ခု ဖြစ်ခဲ့သည်။

လူပေါင်း ထောင်သောင်းချီ တက်ရောက်ခဲ့သည့် ဘက်ခ်ရှီ ဘောလုံးကွင်းတွင် မိန့်ခွန်း ပြောကြားခဲ့သည့် မိုဒီသည် မိမိကိုယ်ကိုယ် ယုံကြည်ချက် အပြည့်ဖြင့် အပြုသဘောဆောင်သည့် စကားလုံးများကို ပြောကြားခဲ့သည်။

ထို့နောက် ဂျမူးနှင့် ကက်ရှ်မီးယားဒေသကို ပေးအပ်ထားသော အထူးအခွင့်အရေးဖြစ်သည့် ဥပဒေအပိုဒ်ခွဲ ၃၇၀ (Article 370) ကို ပြန်လည်ရုပ်သိမ်းရန် ဗဟိုအစိုးရက ဆုံးဖြတ်ခဲ့ပြီးနောက်ပိုင်း ၎င်း၏ ခရီးစဉ်အပေါ် ကက်ရှ်မီးယား ဒေသခံများက အပြုသဘောဆောင်သည့် ကြိုဆိုမှုများအတွက် ပျော်ရွှင်ကြောင်း ဖော်ပြခဲ့သည်။

ကက်ရှ်မီးယား ဒေသခံများနှင့် တိုက်ရိုက် ထိတွေ့ဆက်ဆံရန် ဆုံးဖြတ်မှုသည် သမားရိုးကျ နိုင်ငံရေးချဉ်းကပ်မှု အစဉ်အလာမှ သွေဖယ်သည့် လက္ခဏာတစ်ခုလည်း ဖြစ်သည်။

Article 370 ကို ပြန်လည် ရုပ်သိမ်းပြီးနောက်ပိုင်း ဂျမူးနှင့် ကက်ရှ်မီးယားဒေသတွင် ဖွံ့ဖြိုးတိုးတက်မှုများကို မိုဒီက ၎င်း၏ မိန့်ခွန်းအတွင်း အဓိကထားပြီး ပြောကြားခဲ့သည်။

ထိုဒေသတွင် ဖွံ့ဖြိုးတိုးတက်ရေးနှင့် ချမ်းသာကြွယ်ဝစေရေးတို့ကို မြှင့်တင်ရန် ရည်ရွယ်သည့် ဗဟိုအစိုးရ၏ ဖွံ့ဖြိုးတိုးတက်ရေး အစီအစဉ်များကို မိုဒီက အလေးထား ပြောဆိုခဲ့သည်။

အစိုးရ၏ အားထုတ်ကြိုးပမ်းမှုများသည် အခြေခံ အဆောက်အအုံများ ဖွံဖြိုးတိုးတက်မှုများကိုသာမက အလုံးစုံ ဖွံ့ဖြိုးတိုးတက်ရေး၊ ပညာရေး၊ ကျန်းမာရေး စောင့်ရှောက်မှုနှင့် ဂျမူးနှင့် ကက်ရှ်မီးယား ဒေသခံလူငယ်များအတွက် စီးပွားရေး အခွင့်အလမ်းများကို မြင့်မားစေရေးတို့လည်း ပါဝင်သည်ဟု မိုဒီက ပြောကြားခဲ့သည်။

ဒေသခံများနှင့် တိုက်ရိုက်ထိတွေ့ ဆက်ဆံခြင်းဖြင့် မိုဒီသည် ဗဟိုအစိုးရနှင့် ဂျမူးနှင့် ကက်ရှ်မီးယား ဒေသခံများ အကြား ကွာဟချက်ကို ကျဉ်းမြောင်းစေရန် ကြိုးပမ်းခဲ့ပြီး အစိုးရအဖွဲ့၏ ရည်ရွယ်မှုများကို ယုံကြည်မှု၊ နားလည်မှု တို့ မြင့်တက်စေရန် လုပ်ဆောင်ခဲ့သည်။

မိုဒီသည် ၎င်း၏ မိန့်ခွန်းအတွင်း ကက်ရှ်မီးယား ဒေသခံများ၏ သက်သာချောင်ချိရေးနှင့် တိုးတက်မှုများအတွက် ကတိကဝတ်များကို ထပ်လောင်း အတည်ပြုခဲ့ပြီး ဒေသခံများ၏ စိုးရိမ်မှုများကို  အစိုးရအဖွဲ့၏ လုပ်ငန်းစဉ်များထဲ တွင် ဦးစားပေးနေရာ၌ ထားရှိကြောင်းပြောကြားခဲ့သည်။

ဗဟိုအစိုးရသည် ဒေသတွင်း ငြိမ်းချမ်းရေး၊ တည်ငြိမ်ရေးနှင့် ချမ်းသာကြွယ်ဝစေရေးတို့ကို အားထုတ်ကြိုးပမ်း နေကြောင်းလည်း ၎င်းက ပြောကြားခဲ့သည်။

မိုဒီ၏ မိန့်ခွန်းများသည် ကက်ရှ်မီးယား ဒေသခံများ၏ သဘောထားများနှင့် တူညီမှုရှိခဲ့ပြီး ဒေသခံအများစုက ၎င်းတို့နှင့် တိုက်ရိုက် ထိတွေ့ဆက်ဆံသည့် မိုဒီ၏ အားထုတ် ကြိုပမ်းမှုများကို အသိအမှတ်ပြုကြောင်း ဖော်ပြခဲ့ သည်။

ဝန်ကြီးချုပ်တာဝန်ကို စတင်ရယူခဲ့သည့် ၂၀၁၄ ခုနှစ်ကတည်းက မိုဒီသည် ဂျမူးနှင့် ကက်ရှ်မီးယား ဒေသခံများ၏ ထောက်ခံမှုများကို ရရှိရန် ကြိုးပမ်းခဲ့သည်။

မိုဒီသည် နှစ်ပေါင်း ၇၀ ကြာ ဆင်းရဲ ချို့တဲ့ခဲ့သည့် ဂျမူးနှင့် ကက်ရှ်မီးယားဒေသကို တိုးတက်မှုရှိစေရန် လုပ်ဆောင်ခဲ့သည်။

ထိုလုပ်ဆောင်ချက်များထဲမှ တစ်ခု အပါအဝင်အဖြစ် မိုဒီသည် ကက်ရှ်မီးယားခရီးစဉ်အတွင်း ရူပီး ၃၂၀၀ ကုဋေ တန်ဖိုးရှိသည့် ဖွံ့ဖြိုးတိုးတက်ရေး စီမံကိန်းများကို စတင် အကောင်အထည်ဖော်ခဲ့ပြီး သီရိနာဂါမြို့တော်တွင် ရူပီး ၆၄၀၀ ကုဋေ တန်ကြေးရှိသည့် ဖွံ့ ဖြိုးတိုးတက်ရေး စီမံကိန်းများကို စတင်ဖွင့် လှစ်ခဲ့သည်။

ထို့ကြောင့် သီရိနာဂါမြို့တော်တွင် မိုဒီ၏ မိန့်ခွန်းပြောကြားမှုသည် စည်းလုံးညီညွတ်မှု၏ သင်္ကေတတစ်ခုဖြစ်ပြီး ဖွံ့ဖြိုးတိုး တက်ရေးခေါင်းစဉ်ဖြင့် သဘောထားကွဲလွဲနေသည့် လူ့အသိုင်းအဝိုင်းကို အတူတကွ စည်းလုံးစေနိုင်ခဲ့ သည်။

မိုဒီ၏ ကက်ရှ်မီးယား ဒေသခံများနှင့် စုရုံးတွေ့ဆုံမှုသည် ဂျမူးနှင့် ကက်ရှ်မီးယား ဒေသတွင် ငြိမ်းချမ်းရေး၊ ချမ်းသာ ကြွယ်ဝရေးနှင့် ဖွံ့ဖြိုးတိုးတက်ရေးလမ်းစဉ်တွင် အဓိက မှတ်တိုင်တစ်ခုဖြစ်ခဲ့သည်ဟု လေ့လာစောင့် ကြည့်သူများ က ပြောကြားခဲ့သည်။

နိုင်ငံရေးကြားပွဲစားများ မပါဘဲ ဒေသခံများနှင့် တိုက်ရိုက် ထိတွေ့ဆက်ဆံမှုသည် ပွင့်လင်းမြင်သာမှု၊ ဘက်ပေါင်းစုံ ပါဝင်မှု၊ အခြေခံကျကျ ထိတွေ့ဆက်ဆံမှုများဖြင့် ဖွဲ့စည်းထားသည့် ခေတ်သစ် အုပ်ချုပ်ရေးစနစ်ကို မီးမောင်းထိုး ပြသရာလည်း ရောက်ခဲ့သည်။

ဂျမူးနှင့်ကက်ရှ်မီးယားဒေသသည် တိုးတက်မှုလမ်းကြောင်းပေါ်တွင် ဆက်ရှိနေမှုနှင့်အတူ မိုဒီ၏ ဦးဆောင်မှု အောက်တွင် အနာဂတ်ဖွံ့ဖြိုးတိုးတက်မှုများကို အကောင်အထည်ဖော်ရာတွင် အဓိကကျသည့် အခန်းကဏ္ဍမှ မလွဲမသေ ပါဝင်လာမည် ဖြစ်သည်။

Source: Kashmir Observer

CNI Sport Article 

၂၀၂၄ ခုနှစ်၊ မတ်လ ၁၅

၂၀၂၃-၂၄ ရာသီ ပရီးမီးယားလိဂ်ပြိုင်ပွဲပြီးဆုံးဖို့ ၁၀ ပွဲသာ ကျန်ရှိတော့တဲ့အချိန်မှာ ချန်ပီယံဆုအတွက် ပြိုင်ဆိုင်မှု တွေဟာ ဇာတ်ရှိန်အမြင့်ဆုံးကို ရောက်ရှိလာခဲ့ပြီ ဖြစ်ပါတယ်။

ပြီးခဲ့တဲ့ရာသီတွေက ချန်ပီယံဆုအတွက် ၂ သင်းတည်းသာ အပြိုင်ဖြစ်ခဲ့ပေမယ့် ဒီရာသီမှာတော့ ချန်ပီယံဆု  ပြေးလမ်းကြောင်းမှာ ၃ သင်းအထိ ရှိလာခဲ့တာပါ။ 

ပရီးမီးယားလိဂ် ၂၈ ပွဲ ကစားအပြီးမှာ အာဆင်နယ်အသင်းက ၆၄ မှတ်နဲ့ အဆင့် ၁၊ လီဗာပူးလ်အသင်းက ၆၄ မှတ်နဲ့ အဆင့် ၂ ၊ မန်စီးတီးအသင်းက ၆၃ မှတ်နဲ့ အဆင့် ၃ နေရာမှာ ရပ်တည်နေတာ ဖြစ်ပါတယ်။

ဒီ ၃ သင်းကြားမှာ ရမှတ်ကွာဟမှုက ၁ မှတ်သာရှိတာကြောင့် ခြေချော်တာနဲ့ အမှတ်ပေးဇယား ရပ်တည်မှုက အပြောင်းအလဲတွေ ဖြစ်သွားနိုင်တာပါ။ 

အမှတ်ကွာဟမှုက ကျဉ်းမြောင်းတာကြောင့် ချန်ပီယံဆုအတွက် ဂိုးကွာခြားချက်နဲ့ ဆုံးဖြတ်ရနိုင်တဲ့ အခြေအနေ တွေလည်း ရှိလာနိုင်တဲ့အတွက် အဆင့် ၁ နေရာမှာ ဦးဆောင်နေတဲ့ အာဆင်နယ်အသင်းဟာ ပြီးခဲ့တဲ့ပွဲတွေမှာ ဂိုးတွေ အများကြီးသွင်းယူကာ ဒါကိုအားသာချက်ဖြစ်အောင် လုပ်ဆောင်နေတာဖြစ်ပါတယ်။ 

အာဆင်နယ်နဲ့ မန်စီးတီး ယှဉ်ပြိုင်နေစဉ်

လက်ရှိအချိန်မှာတော့ ၃ သင်းစလုံးဟာ ရာသီနောက်ဆုံးပွဲစဉ်အထိ အမှားအယွင်းမရှိအောင် ပြင်ဆင်နေ ကြတာပါ။

အာဆင်နယ်၊ လီဗာပူးလ်နဲ့ မန်စီးတီးအသင်းတို့ရဲ့ လက်ကျန် ၁၀ ပွဲကို ကြည့်မယ်ဆိုရင် အာဆင်နယ်အသင်းဟာ ပွဲကျပ်နေတာကို  မြင်တွေ့ခဲ့ရပါတယ်။

အာဆင်နယ်အသင်းဟာ ဒီ ၁၀ ပွဲမှာ ချယ်လ်ဆီး၊ မန်စီးတီး၊ အက်စတွန်ဗီလာ၊ စပါး၊ ယူနိုက်တက်အသင်းတို့နဲ့ တွေ့ဆုံရမယ့် ပွဲစဉ်တွေအပြင် တန်းဆင်းဇုန်ကနေ လွတ်ဖို့ ရုန်းမယ့် လူတန်၊ အဲဗာတန်အသင်းတို့နဲ့ ပွဲစဉ်တွေ ပါဝင်တာ ဖြစ်ပါတယ်။ 

အဲဒါကြောင့် အာဆင်နယ်အသင်းဟာ ပွဲကျပ် အများအပြားကို ကျော်ဖြတ်ရဖို့ ရှိနေပြီး ချန်ပီယံဆုယူချင်ရင် ကျော်ဖြတ်ပြဖို့လည်း လိုအပ်နေတာ ဖြစ်ပါတယ်။ 

အာဆင်နယ်အသင်းဟာ ပြီးခဲ့တဲ့ရာသီကလည်း ရာသီကုန်ဖို့ နီးကပ်တဲ့အချိန်မှ ချန်ပီယံဆုကို လက်လွှတ်ခဲ့ရ တာကြောင့် ဒီရာသီမှာ ဒီလိုအရာတွေကနေ သင်ယူထားတယ်လို့ နည်းပြ အာတီတာက ပြောထားတာပါ။

 လီဗာပူးလ်အသင်းနဲ့ မန်စီးတီး ယှဉ်ပြိုင်နေစဉ်

လီဗာပူးလ်အသင်းရဲ့ လက်ကျန်ပွဲစဉ်တွေမှာတော့ အဲဗာတန်၊ ယူနိုက်တက်၊ စပါးနဲ့ အက်စတွန်ဗီလာ ပွဲစဉ်တွေ လောက်သာ သူ့အတွက် ခက်ခဲနိုင်ပြီး လက်ရှိခြေစွမ်းအရ ကျန်ပွဲတွေဟာ သူ့အတွက် လွယ်ကူတာ မဟုတ်ရင် တောင် အနိုင်ရလဒ် ရယူနိုင်မယ့်ပွဲစဉ်တွေ ဖြစ်ပါတယ်။ 

လီဗာပူးလ်အသင်းဟာ ပြီးခဲ့တဲ့ပွဲတွေမှာ အဓိက ကစားသမားအချို့ ဒဏ်ရာရရှိပေမယ့် လူငယ်ကစားသမားတွေကို အသုံးပြုပြီး ရလဒ်ကောင်းတွေ ရယူနိုင်ခဲ့တာကို မြင်တွေ့ခဲ့ရတာပါ။ 

လီဗာပူးလ်အသင်း တစ်သင်းလုံးဟာ ဒီရာသီအကုန်မှာ ထွက်ခွာတော့မယ့် နည်းပြကလော့ပ်ကို ပရီးမီးယားလိဂ် ဖလား ရယူပေးပြီး နှုတ်ဆက်ချင်နေတာကြောင့် အမှတ်ပေးဖလားကို ရယူဖို့ စိတ်အားထက်သန်နေတာ ဖြစ်ပါတယ်။

လက်ရှိချန်ပီယံ မန်စီးတီးအသင်းဟာ လက်ကျန်ပွဲစဉ်တွေမှာ အာဆင်နယ်၊ အက်စတွန်ဗီလာ၊ စပါးတို့နဲ့ ပွဲကြီး ပွဲကောင်းတွေအပြင် တန်းဆင်းဇုန်က လွတ်ဖို့ရုန်းကန်နေရတဲ့ လူတန်၊ နော်တင်ဟမ်ဖောရက်စ်အသင်းတို့နဲ့ တွေ့ဆုံတဲ့ပွဲစဉ်တွေ ပါဝင်နေတာပါ။

ဒီပွဲစဉ်တွေကို ကြည့်ရမယ်ဆိုရင် မန်စီးတီးအသင်းဟာ အာဆင်နယ်အသင်းလောက် အရမ်းကြီး ပွဲကျပ်နေတဲ့ ပွဲစဉ်တွေ အများကြီး မပါဝင်တာ ဖြစ်ပါတယ်။ 

 ပရီးမီးယားလိဂ်ဆုဖလားကို တွေ့ရစဉ်

မန်စီးတီးအသင်းဟာ ပရီးမီးယားလိဂ်ဖလားကို ၃ နှစ်ဆက်တိုက် ရယူထားနိုင်တဲ့ အသင်းဖြစ်တာကြောင့် ဒီလက်ကျန်ပွဲတွေကို ကျော်ဖြတ်နိုင်တဲ့ အတွေ့အကြုံတွေကို ပိုင်ဆိုင်ထားပြီး ဖြစ်တာပါ။

ပြီးတော့ မန်စီးတီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ချန်ပီယံဆုကို ရယူနိုင်ခဲ့ရင် ပရီးမီးယားလိဂ်ဖလား ကို ၄ နှစ်ဆက်တိုက် ရယူနိုင်တဲ့ ပထမဆုံးအသင်းအဖြစ် စံချိန်သစ် ရေးထိုးနိုင်မှာ ဖြစ်ပါတယ်။ 

အဲဒါကြောင့် ရာသီသိမ်းဖို့ ၁၀ ပွဲသာ ကျန်ရှိတော့တဲ့အချိန်မှာ ဒီမျှော်လင့်ချက်ကို လက်လွှတ်ခံမှာ မဟုတ်ဘူးဆို တာ သေချာနေပါတယ်။ 

ပရီးမီးယားလိဂ် လက်ကျန်ပွဲစဉ်တွေကို ကြည့်ပြီး ဒီရာသီ ပရီးမီးယားလိဂ် ချန်ပီယံဆုကို ခန့်မှန်းရရင် အာဆင်နယ် အသင်းအတွက် ခက်ခဲနိုင်ပြီး လီဗာပူးလ်နဲ့ မန်စီးတီးအသင်းတို့ထဲက တစ်သင်းက ဒီဆုဖလားကို ကိုင်မြှောက်နိုင် မယ်လို့ ယူဆရပါတယ်။

ဒီ ၃ သင်းစလုံးဟာ ဥရောပပြိုင်ပွဲတွေ ယှဉ်ပြိုင်နေရတဲ့အတွက် ကစားသမားတွေရဲ့ ဒဏ်ရာ၊ ပွဲပန်းမယ့် အရာတွေ ကြောင့် အခြေအနေတွေကလည်း ပြောင်းလဲသွားနိုင်တာပါ။

အဲဒါကြောင့် ဒီရာသီ ပရီးမီးယားလိဂ်ပြိုင်ပွဲမှာ ဘယ်အသင်း ချန်ပီယံဆု ရယူသွားနိုင်မလဲဆိုတာ စိတ်ဝင်စားဖို့ ကောင်းနေတာပဲ ဖြစ်ပါတယ်။ 

CNI Article
၂၀၂၄ ခုနှစ်၊ မတ် ၁၀ 

နေတိုးအဖွဲ့အနေဖြင့် ယူကရိန်းသို့ စစ်သားများပို့ဆောင်ရန် အကြောက်အကန် ငြင်းဆိုနေခဲ့မည်ဆိုပါက ယူကရိန်း တွင် ရှိနှင့်နေပြီးဖြစ်သည့် ၎င်း၏တပ်ဖွဲ့ဝင်များကို အဘယ်ကြောင့် ပြန်လည်ရုပ်သိမ်းရန် တောင်းဆိုခြင်း မရှိပါသနည်း။

ဖေဖော်ဝါရီ ၂၆ ရက်က ဂျာမနီဝန်ကြီးချုပ် အိုလက်ဖ်ရှောဇ် (Olaf Scholz) က ယူကရိန်းသို့ Taurus တာဝေးပစ် ခရုဇ်ဒုံးကျည်များ ထောက်ပံ့ပေးမည် မဟုတ်ကြောင်း ပြောကြားခဲ့သည်။

အဘယ်ကြောင့်ဆိုသော် ထိုဒုံးကျည်များကို ယူကရိန်းစစ်သားများ အသုံးပြုတတ်စေရန် ဂျာမနီစစ်သားများကိုပါ ယူကရိန်းသို့ စေလွှတ်ရမည် ဖြစ်သောကြောင့် ဖြစ်သည်ဟု ရှောဇ်က ပြောသည်။

ဗြိတိန်သည် Storm Shadow ခရုဇ်ဒုံးကျည်များကို ယူကရိန်းသို့ ပေးပို့စဉ်က ထိုဒုံးကျည်များ အသုံးပြုရန်အတွက် ဗြိတိန်စစ်သားများကိုပါ ယူကရိန်းသို့ ပို့ဆောင်ခဲ့သဖြင့် ဂျာမနီအနေဖြင့် ထိုကဲ့သို့ လုပ်ဆောင်မည်မဟုတ်ဟု ၎င်းက ဆိုသည်။

ဗြိတိန်ကမူ ရှောဇ်၏ ပြောကြားချက်များကို ဝေဖန်ခဲ့ပြီး ဂျာမနီသည် ထောက်လှမ်းရေး အချက်အလက်များကို အလွဲသုံးစားလုပ်ခြင်းဖြစ်ကြောင်းနှင့် ယူကရိန်းတွင် နေတိုးအရာရှိများနှင့် စစ်မှုထမ်းများ ရှိနေသည်ဆိုသည့် အချက်ကို ရှောဇ်၏ ပြောကြားချက်များက အတည်ပြုရာ ရောက်ခဲ့ကြောင်း ပြောကြားခဲ့သည်။

ယူကရိန်းတွင် အမေရိကန်၏ Patriot နှင့် NASAM လေကြောင်းကာကွယ်ရေးစနစ်များ၊ HIMARS အတွဲလိုက် ဒုံးပစ်စနစ်များ၊ ဗြိတိန်နှင့် ပြင်သစ်၏ Storm Shadow ခရုဇ်ဒုံးကျည်များနှင့် အခြား ခေတ်မီလက်နက်များကို ယူကရိန်းစစ်သားများ အသုံးပြုတတ်စေရန် နေတိုးအမှုထမ်းများက ယူကရိန်းသို့ ရောက်ရှိနေသည်ဟု အများစုက ယူဆထားကြသည်။

ဂျာမနီဝန်ကြီးချုပ် အိုလက်ဖ်ရှောဇ်ကို တွေ့ရစဉ်

ယူကရိန်းတွင် ရှိနေသည့် နေတိုးအဖွဲ့ဝင်များမှ စစ်မှုထမ်း အရေအတွက် အတိအကျကို မည်သူကမှ တိတိကျကျ မသိရသော်လည်း ယူကရိန်းတွင် အမေရိကန်၊ ဗြိတိန်၊ ပြင်သစ်၊ ပိုလန်နှင့် အခြားနိုင်ငံများမှ စစ်မှုထမ်း အများအပြား ရောက်ရှိနေသည်မှာ သံသယဖြစ်စရာမလိုပေ။

ဖေဖော်ဝါရီ ၂၉ ရက်က ပူတင် ပြောကြားခဲ့သည့် နိုင်ငံတော်မိန့်ခွန်းတွင် အနောက်နိုင်ငံများအနေဖြင့် ယူကရိန်းသို့ စစ်သားများ စေလွှတ်မည်ဆိုပါက နျူကလီးယားစစ်ပွဲ ဖြစ်ပွားမည့် အန္တရာယ်ရှိနိုင်ကြောင်း ခြိမ်းခြောက်ခဲ့သည်။ 

ယူကရိန်းသို့ နေတိုးစစ်သားများ စေလွှတ်မည့် အစီအစဉ်ကို စာရင်းမှ ဖယ်ထုတ်မည် မဟုတ်ကြောင်း ပြင်သစ် သမ္မတ မက်ခရွန် (Emmanuel Macron) ၏ ပြောကြားချက်ကို ပူတင်က တုန့်ပြန်သည့်အနေဖြင့် ခြိမ်းခြောက်ခဲ့ ခြင်းဖြစ်သည်။

မက်ခရွန်၏ အိုင်ဒီယာကို ဥရောပသမဂ္ဂ ခေါင်းဆောင်များက လျင်မြန်စွာ ရှုတ်ချခဲ့ကြပြီး ထိုအကြောင်းအရာကို ဥရောပသမဂ္ဂဖိုရမ်တွင် ဆွေးနွေးခြင်းသည်လျင် နေတိုးနှင့် ရုရှားအကြား တင်းမာမှုများကို မြင့်တက်စေခဲ့သည်။

နေတိုးသည် ရုရှားကို ရည်ရွယ်သည့် အနေဖြင့် နေတိုးတပ်ဖွဲ့များနှင့် လက်နက်များကိုထားရှိရန် စစ်စခန်းများ ရှာဖွေလျက်ရှိသည်။ 

New York Times သတင်းစာ၏ ဖော်ပြချက်အရ အမေရိကန်ဗဟိုထောက်လှမ်းရေး အေဂျင်စီ (CIA)သည် ရုရှား နယ်စပ်အနီးရှိ ယူကရိန်း၏ နယ်မြေများတွင် CIA စခန်း ၁၂ ခုအထိ ထားရှိခဲ့ကြောင်း သိရသည်။

Wired Magazine ကလည်း အမေရိကန်သည် ပူတင်၏ တည်နေရာကို သိရှိစေရန် ပူတင်နှင့် ပူတင်၏ မိတ်ဆွေ များ၏ ဆဲလ်ဖုန်းများကို ထောက်လှမ်းနိုင်မည့် အထူးနည်းပညာတစ်ရပ်ကို တီထွင်ဖန်တီးနေကြောင်း ဖော်ပြခဲ့သည်။

ပူတင် အနေဖြင့်လည်း သူသည် နေတိုးဦးဆောင်သည့် အေးဂျင့်များ၏ ပစ်မှတ်တစ်ခု ဖြစ်နေသည်ကို သိရှိ နားလည်နိုင်စွမ်း ရှိ၊မရှိ မေးခွန်းထုတ်ရမည်ဖြစ်သည်။ 

အဘယ်ကြောင့်ဆိုသော် ပူတင်အား သတ်ဖြတ်ရန် ကြိုးပမ်းမှုများ ရှိခဲ့ခြင်းကြောင့်ဖြစ်သည်။

ပူတင် စီးနင်းလိုက်ပါလေ့ရှိတဲ့ကားကို တိုက်ပြီးလုပ်ကြံစဉ်

ထိုဖြစ်စဉ်များထဲမှာ တစ်ခုမှာ ကရင်မလင်နန်းတော်ရှိ ပူတင်၏ ရုံးကို ဖောက်ခွဲရေးဒရုန်းတစ်စင်း ထိမှန်ခဲ့ခြင်း ဖြစ်သည်။

နောက်ထပ်ဖြစ်စဉ်တစ်ခုမှာ ယူကရိန်းကျူးကျော်စစ် မတိုင်မီ ခြောက်နှစ်အလိုက မော်စကိုမြို့တော်၏ Ring Road လမ်းပေါ်တွင် ပူတင် စီးနင်းလေ့ရှိသည့် ဇိမ်ခံကားကို အခြားကားတစ်စီးက ခေါင်းချင်းဆိုင် ဝင်တိုက်ခဲ့ခြင်း ဖြစ်သည်။

ထိုဖြစ်စဉ်တွင် ပူတင်သည် ကားထဲတွင် ရှိမနေသော်လည်း ၎င်း၏ ယာဉ်မောင်းသည် သေဆုံးသွားခဲ့သည်။

ရုရှား၏ ပြည်တွင်းနိုင်ငံရေး အခြေအနေသည် ရှုပ်ထွေးမှုများ ရှိနေချိန်တွင် ပူတင်သည် နေတိုးခေါင်းဆောင် များကိုလည်း အထူးသတိထားပြီး ဆက်ဆံခဲ့သည်။ 

လက်ရှိတွင် ယူကရိန်း၏ အခြေအနေသည် လက်နက်ခဲယမ်းများ ပြတ်လပ်နေသဖြင့် အလွန်ဆိုးရွားနေပြီး လာမည့် သုံးလအတွင်း စစ်ရှုံးနိုင်ကြောင်း အနောက်နိုင်ငံများမှ ထောက်လှမ်းရေးအေဂျင်စီများ၊ ကျွမ်းကျင် ပညာရှင် အဖွဲ့များနှင့် ယူကရိန်းကိုယ်တိုင်ကပင် ပြောကြားထားသည်။

ထို့ကြောင့် ထိုအခြေအနေသည် ဥရောပအတွက် တပ်လှန့်နှိုးဆော်မှု တစ်ခုဖြစ်ခဲ့ပြီး ပါရီ(ပြင်သစ်)တွင် ဥရောပသမဂ္ဂ အရေးပေါ် အစည်းအဝေးကို မက်ခရွန်က ဦးစီးကျင်းပရသည့် အဓိက အကြောင်းရင်းတစ်ခု ဖြစ်လာခဲ့သည်။

ထိုအစည်းအဝေးတွင် ဥရောပနိုင်ငံများက ယူကရိန်းကို တာဝေးပစ် လက်နက်များ ထောက်ပံ့ပေးမည်ဟု ကတိပြု ခဲ့ပုံပေါ်သော်လည်း ဂျာမနီကမူ Taurus ဒုံးကျည်များ ထောက်ပံ့ရေးနှင့်ပတ်သက်ပြီး ထိုအစီအစဉ်ကို သဘောတူခဲ့ ခြင်း မရှိပေ။

ဂျာမနီသည် ရုရှား၏ တုန့်ပြန်မှုကို စိုးရိမ်ခြင်းကြောင့်လော သိုမဟုတ် ရုရှားက ဂျာမနီအစိုးရကို အန္တရာယ်ဇုန် အတွင်းသို့ ဖြတ်သန်းနေကြောင်း လူသိရှင်ကြား သတိပေးထားခြင်းကြောင့်လော ဟူသည့်အချက်ကို စဉ်းစားရ မည်ဖြစ်သည်။

နေတိုးအဖွဲ့၏ မူဝါဒကို ချက်ချင်း ပြန်လည်သုံးသပ်သင့်သည်။ အကယ်၍ နေတိုးအဖွဲ့အနေဖြင့် ယူကရိန်းသို့ စစ်သားများ စေလွှတ်ရန် အမှန်တကယ် ဆန့်ကျင်နေသည်ဆိုပါက ယူကရိန်းတွင် ယခင်ကတည်းက တည်ရှိ နေဖွယ်ရှိသည့် နေတိုးစစ်သားများနှင့်ပတ်သက်ပြီး ရေရှည်တွင် ငြင်းဆိုနိုင်တော့မည် မဟုတ်ပေ။

ရုရှားသမ္မတ ဗလာဒီမာပူတင်ကမူ အနောက်အုပ်စုအနေဖြင့် ယူကရိန်းစစ်ပွဲကို အရှိန်မြင့်တက်လာအောင် လုပ်မည်ဆိုပါက နျူကလီးယားစစ်ပွဲ၏ စစ်မှန်သောအန္တရာယ် ရှိလာမည်ဟု ဖေ‌ဖော်ဝါရီ ၂၉ ရက်က ပြောကြားခဲ့ သည့် နိုင်ငံတော်မိန့်ခွန်းတွင် သတိပေးခဲ့သည်။

နေတိုးအဖွဲ့ အနေနှင့်လည်း ရုရှားနှင့် စစ်ပွဲဖြစ်ပွားရန် ပြင်ဆင်ထားပုံ မပေါ်ပေ။ အဘယ်ကြောင့်ဆိုသော် နေတိုးအဖွဲ့သည် ယူကရိန်းကို လက်နက်များ ထောက်ပံ့ပေးနေရသဖြင့် ၎င်းတို့၏ ကိုယ်ပိုင် လက်နက်ခဲယမ်း များနှင့် ကာကွယ်ရေးကဏ္ဍအပေါ် အာရုံစိုက်လုပ်ဆောင်မှုများ လျော့နည်းစေခဲ့သည်။

ထို့ကြောင့် လက်ရှိ အနေအထားအရ နေတိုးခေါင်းဆောင်များသည် ရုရှားနှင့် စစ်ရေးအရ ထိပ်တိုက်မတွေ့ဘဲ ရုရှားကို မခံချိ၊ မခံသာဖြစ်စေသည့် ပြောကြားချက်များ၊ လုပ်ဆောင်ချက်များဖြင့် တင်းမာမှုများ မြင့်တက်စေရန် သာ လုပ်ဆောင်နေလိမ့်မည်ဖြစ်သည်။

Source: Asia Times

#နေတိုး #ယူကရိန်းစစ်ပွဲ #ပူတင် #ဆောင်းပါး #CNIArticle #cnimyanmar 

CNI Sport News

၂၀၂၄ ခုနှစ်၊ မတ်လ ၈

မန်စီးတီးအသင်း အကြောင်းပြောရင် အားလုံးဟာ တိုက်စစ်မှူး ဟာလန်းနဲ့ ကွင်းလယ်လူ ဒီဘရိုင်းကိုပဲ ပြေးမြင်မိ မှာဖြစ်ပေမယ့် သူတို့ အပါအဝင် မရှိမဖြစ် အရေးပါတဲ့ ကစားသမားတစ်ဦးလည်း ရှိပါတယ်။

သူကတော့ စပိန်ကွင်းလယ်လူ ရိုဒရီပါ။ အသက် ၂၇ နှစ်အရွယ်ရှိ ရိုဒရီဟာ မန်စီးတီးအသင်းကို အသလက်တီကို အသင်းကနေ ရောက်ရှိလာခဲ့တဲ့ ၂၀၁၉ ခုနှစ်ကတည်းက အသင်းအတွက် ခြေစွမ်းပြပြီး မနှစ်ကရာသီက သမိုင်းဝင် ဆုဖလား ၃ လုံး ရယူနိုင်ခဲ့တာမှာ အသင်းရဲ့ အသက်သွေးကြော အဖြစ်ရှိခဲ့တာ ဖြစ်ပါတယ်။

ရိုဒရီဟာ ပြီးခဲ့တဲ့ ၂၀၂၃ ခုနှစ်ထဲမှာ မန်စီးတီးအသင်းနဲ့ ပရီးမီးယားလိဂ်၊ FA ဖလား၊ ချန်ပီယံလိဂ်၊ ဥရောပစူပါ ဖလား၊ ကလပ်ကမ္ဘာ့ဖလားတို့ကို ရယူနိုင်ခဲ့ပြီး စပိန်လက်ရွေးစင်အသင်း နေးရှင်းလိဂ်ဖလား ရယူခဲ့တာမှာလည်း အဓိက ကျတဲ့သူဖြစ်ခဲ့တာပါ။ 

မန်စီးတီးအသင်းနည်းပြ ဂွာဒီယိုလာက ရိုဒရီဟာ လက်ရှိကမ္ဘာ့အကောင်းဆုံး ကွင်းလယ်ကစားသမားဖြစ်ပြီး သူပါဝင်ရင် မန်စီးတီးအသင်းက ပိုပြီးကောင်းတယ်ဆိုတာ သံသယမရှိဘူးလို့ ပြောထားခဲ့ပါတယ်။ တကယ်လည်း ရိုဒရီရဲ့ သက်ရောက်မှုတွေက မန်စီးတီးအသင်းမှာ အများကြီးရှိနေတာပါ။

ရိုဒရီဟာ အခုဆိုရင် မန်စီးတီးအသင်းအတွက် သူပါဝင်ကစားခဲ့တဲ့ နောက်ဆုံးပြိုင်ပွဲစုံ ပွဲပေါင်း ၆၀ အထိ ရှုံးပွဲမရှိတဲ့ စံချိန်တစ်ခုကို ပိုင်ဆိုင်နေပြီ ဖြစ်ပါတယ်။

ရိုဒရီကို တွေ့ရစဉ်

ဒါဟာ ပရီးမီးယားလိဂ်မှာ ဘယ်ကစားသမားကမှ မလုပ်နိုင်သေးတဲ့ မှတ်တမ်းတစ်ခုလည်း ဖြစ်တာပါ။

ရိုဒရီဟာ ၂၀၂၃ ခုနှစ်၊ ဖေဖာ်ဝါရီ ၁၂ ရက်ကနေ အခုအချိန်ထိ သူပါဝင်ကစားခဲ့တဲ့ ပွဲပေါင်း ၆၀ မှာ မန်စီးတီးအသင်း ဟာ ရှုံးပွဲမရှိခဲ့တာဖြစ်ပြီး ဒီပွဲတွေမှာ မန်စီးတီးအသင်းဟာ ၄၈ ပွဲ အနိုင်ရပြီး ၁၂ ပွဲသရေကျခဲ့တာ ဖြစ်ပါတယ်။

ရိုဒရီ မပါဝင်နိုင်ခဲ့တဲ့ ၁၁ ပွဲမှာ မန်စီးတီးအသင်းဟာ ၆ ပွဲ အနိုင်ရပြီး ၅ ပွဲ ရှုံးနိမ့်ထားတာကို အချက်အလက်တွေမှာ ဖော်ပြထားတာပါ။ 

ဒီရာသီ အစောပိုင်းပွဲစဉ်ဖြစ်တဲ့ နော်တင်ဟမ်ဖောရက်စ် အသင်းနဲ့ပွဲမှာ ရိုဒရီ အနီကတ်ထိပြီးနောက် ပွဲပယ်ခံထား ရချိန် မန်စီးတီးအသင်းဟာ နယူးကာဆယ်၊ ဝုလ်ဗ်စ်နဲ့ အာဆင်နယ်အသင်းတို့ကို အရေးနိမ့်ခဲ့တာ ဖြစ်ပါတယ်။ 

ရိုဒရီမပါဝင်တာနဲ့ မန်စီးတီးအသင်း ရှုံးပွဲကြုံတွေ့ရတာကတော့ တကယ်ကို ထူးခြားတဲ့ တိုက်ဆိုင်မှုတစ်ခုလည်း ဖြစ်နေတာပါ။

ရိုဒရီဟာ ကွင်းလယ်ခံစစ် ကစားသမားဆိုပေမယ့် မန်စီးတီးအသင်းဂိုးရဖို့ လိုအပ်ချိန်တိုင်းမှာ သူ့ရဲ့သွင်းဂိုးတွေနဲ့ ကူညီပေးနေတာကိုလည်း မြင်တွေ့နေရတာ ဖြစ်ပါတယ်။

ဒီရာသီမှာ ရိုဒရီဟာ မန်စီးတီးအသင်းအတွက် ၃၅ ပွဲ ပါဝင်ကစားထားပြီး ၇ ဂိုးသွင်းယူကာ ၈ ဂိုးဖန်တီးထားတာပါ။ 

မန်စီးတီးအသင်းနည်းပြ ဂွာဒီယိုလာရဲ့နည်းဗျူဟာမှာ ရိုဒရီဟာ အဓိကကျနေပြီး ဘောလုံးလက်ခံရယူကာ အသင်း ဖော်တွေကို ပြန်လည်ပေးပြီး လိုအပ်ရင် ဂိုးပါသွင်းယူနေတာ ဖြစ်ပါတယ်။ 

ရိုဒရီကို တွေ့ရစဉ်

စပိန်ကွင်းလယ်လူဟာ ဒီရာသီ ဥရောပထိပ်တန်း ၅ လိဂ်မှာ ဘောလုံးပေးပို့မှု အအောင်မြင်ဆုံး ကစားသမား အဖြစ်လည်း ရပ်တည်နေတာပါ။

ရိုဒရီရဲ့ စွမ်းဆောင်ရည်ကို လူတန်အသင်းခေါင်းဆောင် လော့ခ်ယာက ချီးကျူးမှု ပြုလုပ်ထားပါတယ်။

လော့ခ်ယာက ရိုဒရီနဲ့အတူ ဘောလုံးကွင်းတစ်ခုမှာ အတူရှိနေရတာက ပျော်ရွှင်ဖို့ကောင်းပြီး ရိုဒရီကို  Rolls Royce ကားနဲ့ တင်စားခဲ့တာပါ။ 

ရိုဒရီဟာ မန်စီးတီးအသင်း ရရှိခဲ့တဲ့ ချန်ပီယံလိဂ်၊ ကလပ်ကမ္ဘာ့ဖလားပြိုင်ပွဲတွေမှာ အကောင်းဆုံး ကစားသမားဆု ကို ရရှိခဲ့ပြီး စပိန်အသင်း နေးရှင်းလိဂ်ဖလားကို ရယူခဲ့တုန်းကလည်း ဒီပြိုင်ပွဲရဲ့ အကောင်းဆုံး ကစားသမားဆုကို ရရှိခဲ့တာဖြစ်ပါတယ်။

ရိုဒရီဟာ ဒီလိုအောင်မြင်မှုတွေ ရထားပေမယ့် ဘောလွန်းဒီအော၊ ဖီဖာ အကောင်းဆုံး ဆုတွေမှာတော့ ထိပ်ဆုံး ၃ ဦးစာရင်း ပါဝင်ခွင့်မရခဲ့ပါဘူး။ 

ရိုဒရီကတော့ ဒီလိုဆုတွေ မရခဲ့တာကို အေးဆေးဖြစ်ခဲ့ပြီး အသင်းလိုက်ရတဲ့ အောင်မြင်မှုတွေကို ပိုပြီးမက်မော တယ်လို့ ပြောခဲ့ပါတယ်။ 

ရိုဒရီဟာ ဒီရာသီမှာ မန်စီးတီးအသင်းကို မနှစ်ကလို အောင်မြင်မှုမျိုး ပြန်ယူပေးနိုင်ဖို့ ပစ်မှတ်ထားနေပြီး သူပါဝင် တဲ့ပွဲတွေမှာ မန်စီးတီးအသင်း မရှုံးနိမ့်ဖူးဆိုတဲ့ စံချိန်မှတ်တမ်းကို ဆက်ပြီး သယ်ဆောင်နိုင်ဖို့လည်း မျှော်လင့်နေ တာပါ။ 

အဲဒါကြောင့် ရိုဒရီအနေနဲ့ အနီးကပ်ဆုံးပွဲဖြစ်တဲ့ လီဗာပူးလ်အသင်းနဲ့ပွှဲမှာ မန်စီးတီးအသင်းကို ရလဒ်ကောင်း ရယူပေးပြီး ဒီစံချိန်ကို ဆက်ထိန်းနိုင်မလားဆိုတာ စောင့်ကြည့်ရမှာဖြစ်ပါတယ်။ 

CNI Article

၂၀၂၄ ခုနှစ်၊ မတ်လ ၃

သင်နေထိုင်ရာမြို့မှာ နေ့စဉ်နှင့်အမျှ ဒုံးကျည်များဖြင့် တိုက်ခိုက်ခံနေရပြီး လူနေ အဆောက်အအုံများကို ဒုံးကျည်များ ထိမှန်နေသည့် အခြေအနေအား စိတ်ကူး ပုံဖော်၍ မှန်းဆကြည့်လိုက်ပါ။

ညတိုင်းလိုလို လေကြောင်းတိုက်ခိုက်မှု အချက်ပေးသံများကြောင့် မြေအောက်ရထားဘူတာရုံမှာ ပုန်းအောင်း နေရမည့်ဘဝကိုလည်း တွေးကြည့်လိုက်ပါ။

ကလေးများကလည်း မြေအောက်ခန်းများထဲမှာ စာသင်နေရပြီး သင်နှင့်သိခဲ့ဖူးသည့် လူငယ်များသည် စစ်ပွဲအတွင်း ပေးဆပ်သွားခဲ့ရသော အခြေအနေများကို မြင်ယောင်ကြည့်နိုင်သည်။ အဆိုပါ အခြေအနေများကို သင်ဆိုလျှင် ခံစားနိုင်ပါ့မလား မေးခွန်းထုတ်စရာ ရှိလာသည်။

အထက်ဖော်ပြပါ အခြေအနေများသည် ယူကရိန်းတွင် ပြည်သူအများစု နဖူးတွေ့ ဒူးတွေ့ ခံစားနေရသည့် ကြောက်မက်ဖွယ် ဖြစ်ရပ်များဖြစ်သည်။

၂၀၂၂ ခုနှစ်၊ ဖေဖော်ဝါရီ ၂၄ ရက်က ရုရှား၏ ကျူးကျော်စစ် စတင်ခဲ့ချိန်ကတည်းက ထိုကြောက်မက်ဖွယ် ဖြစ်ရပ်များကို ယူကရိန်းပြည်သူအများစု ခံစားနေရခြင်းဖြစ်သည်။

ရုရှားကမူ ယူကရိန်းအား ကျူးကျော်ခြင်းမပြုမီ ရက်ပိုင်းအလိုက ယူကရိန်းကို ကျူးကျော်ရန် ရည်ရွယ်ချက် မရှိကြောင်း ပြောကြားခဲ့ပြီး စစ်ပွဲဖြစ်ပွားနိုင်ခြေနှင့်ပတ်သက်ပြီး သတိပေးသူများကိုပင် ရုရှားမုန်းတီးရေး သမားများဟု သမုတ်ခဲ့သည်။

မည်သို့ပင်ဆိုစေ ရုရှားသည် ထိုကဲ့သို့ ပြောကြားခဲ့ပြီးနောက် ၃ ရက်အကြာတွင် ယူကရိန်းကို ဝင်ရောက် တိုက်ခိုက်ခဲ့သည်။

ထိုတိုက်ခိုက်မှုသည် ယူကရိန်းကို ရုရှားက ပထမဆုံးအကြိမ် တိုက်ခိုက်မှုတော့ မဟုတ်ပေ။

၂၀၁၄ ခုနှစ်ကလည်း ရုရှားသည် အမြဲတမ်း မဟုတ်သည့် တပ်ဖွဲ့ဝင်များကို ဖွဲ့စည်းခဲ့ပြီး ခရိုင်းမီးယား (Crimea) ကျွန်းဆွယ်နှင့် ယူကရိန်းအရှေ့ပိုင်းကို ဝင်ရောက်တိုက်ခိုက်ခဲ့သဖြင့် တစ်ကမ္ဘာလုံးက မယုံကြည်နိုင်လောက် အောင် အံ့သြပြီး ထိုင်ကြည့်နေခဲ့ရသည်။

လက်ရှိ ယူကရိန်းစစ်ပွဲ ဖြစ်ပွားခဲ့သည်မှာ ၂ နှစ်ကျော် ကြာမြင့်လာချိန်တွင် ရုရှားသည် လူအင်အား၊ လက်နက် အင်အား များစွာဆုံးရှုံးခဲ့ပြီး စီးပွားရေးနှင့် သံတမန်ရေးအရ ဖိအားများနှင့် ရင်ဆိုင်ခဲ့ရသည်။

သို့တိုင်အောင် ရုရှားသည် ယူကရိန်းစစ်ပွဲတွင် ၎င်းတို့၏ ရည်ရွယ်ချက်များကို အကောင်အထည် မဖော်နိုင်သေးပေ။

ထို့ကြောင့် ရုရှား-ယူကရိန်းစစ်ပွဲကို မဖြစ်မနေ အဆုံးသတ်ရန် လိုအပ်နေသည်။ သို့သော် မည်သည့်နည်းလမ်းဖြင့် စစ်ပွဲကို အဆုံးသတ်မည်နည်းဆိုခြင်းကို မေးခွန်းထုတ်ရမည်ဖြစ်သည်။

၂၀၁၄ ခုနှစ် ခရိုင်းမီးယားစစ်ပွဲအပြီးတွင် ဂျာမနီနှင့် ပြင်သစ်တို့က ဦးဆောင်စီမံသည့် ဆွေးနွေးညှိနှိုင်းမှုများ စတင်ပြုလုပ်ခဲ့သည်။

ထိုဆွေးနွေး ညှိနှိုင်းမှုများမှတဆင့် မင်စ်ခ် သဘောတူညီချက် (Minsk Agreements) ရရှိခဲ့ပြီး အပစ်အခတ် ရပ်စဲခဲ့သည်။

မည်သို့ပင်ဆိုစေ ရုရှားသည် ခရိုင်းမီးယားကို သိမ်းပိုက်နိုင်ခြင်းသည် လုံလောက်ခြင်းမရှိဟု ယူဆခဲ့ဖွယ်ရှိပြီး ၂၀၂၂ ခုနှစ်တွင် ယူကရိန်းအား နောက်တစ်ကြိမ် တိုက်ခိုက်ခဲ့သည်။ ယခုဖြစ်ပွားသည့် စစ်ပွဲသည် ရုရှားက ယူကရိန်းအား စစ်တပ်အင်အား အပြည့်အဝဖြင့် ပေါ်တင် ဝင်ရောက်တိုက်ခိုက်ခဲ့ခြင်းဖြစ်သည်။

ကုလသမဂ္ဂ ပဋိညာဉ် စာတမ်း၏ အပုဒ်ခွဲ ၂ (၄) ကဲ့သို့ နိုင်ငံတကာဥပဒေများတွင် ကုလအဖွဲ့ဝင်နိုင်ငံများအကြား စစ်အင်အား အသုံးပြုပြီး ဝင်ရောက်တိုက်ခိုက်မှုကို ပြတ်ပြတ်သားသား တားမြစ်ထားသည်။

သို့သော် ခြွင်းချက်အနေနှင့် မိမိကိုယ်ကိုယ် ကာကွယ်မှု၊ သို့မဟုတ် အခြားနိုင်ငံ၏ မိမိကိုယ်ကိုယ် ကာကွယ်မှုကို ဆန့်ကျင်သည့် ရန်လိုမှုကို ကူညီထောက်ပံ့ပေးမှု အခြေအနေများတွင် တိုက်ခိုက်ခွင့်ပြုထားသည်။

ထို့ကြောင့် ရုရှား၏ ကျူးကျော်မှုသည် တရားမျှတသည်ဟု မယူဆနိုင်ပေ။ ရုရှားသမ္မတ ဗလာဒီမာ ပူတင် (Vladimir Putin) ကမူ သမိုင်းနှင့်ချီ အကြောင်းပြချက်ပေးခဲ့ပြီး ယူကရိန်းသည် လွတ်လပ်သည့် နိုင်ငံအဖြစ် တည်ရှိပိုင်ခွင့် မရှိကြောင်း ပြောကြားခဲ့သည်။

ပူတင်မတိုင်မီ ယခင်သမ္မတဖြစ်သည့် ဘိုးရစ် ယဲ့လ်ဆင် (Boris Yelsin) ကပင် ယူကရိန်းကို လွတ်လပ်သည့် နိုင်ငံအဖြစ် တရားဝင် အသိအမှတ်ပြုခဲ့သည့်တိုင် ပူတင်က ထိုကဲ့သို့ ပြောကြားခဲ့ခြင်းဖြစ်သည်။

သို့ဆိုလျှင် ရုရှား-ယူကရိန်းစစ်ပွဲသည် ထိုင်းနိုင်ငံအပေါ် မည်သို့ သက်ရောက်နေပါသနည်း။

မိမိတို့သည် ကမ္ဘာကြီးက ရွာဖြစ်သွားသည့် ၂၁ ရာစုထဲတွင် နေထိုင်သူများဖြစ်သဖြင့် ကမ္ဘာလုံးဆိုင်ရာ ကုန်သွယ် ရေးနှင့် ကမ္ဘာ့ပေါ်မှ နိုင်ငံတိုင်းတွင် ဖြစ်ပျက်နေသည့် မိမိတို့နိုင်ငံနှင့်လည်း တစ်နည်းတစ်ဖုံ ပတ်သက်ရမည်သာ ဖြစ်သည်။

ရုရှား၏ ကျူးကျော်မှုကြောင့် ယူကရိန်းတွင် လူသားချင်း စာနာထောက်ထားမှုဆိုင်ရာ အကျပ်အတည်းနှင့် သေဆုံးမှုများသာမက ကမ္ဘာလုံးဆိုင်ရာ စီးပွားရေးအပေါ်ကိုလည်း များစွာထိခိုက်မှုရှိခဲ့သည်။

ရုရှား-ယူကရိန်း စစ်ပွဲကြောင့် ရေနံနှင့် ဓာတ်ငွေ့ စျေးနှုန်းများ မြင့်တက်ခဲ့သည့် အခြေအနေကို လူတိုင်း ကြုံတွေ့ခဲ့ရပြီး ဖြစ်သည်။

ထို့ကြောင့် ကြီးမားသည့် စစ်အင်အားရှိသည့် နိုင်ငံက စစ်အင်အားသေးငယ်သည့် အိမ်နီးချင်းနိုင်ငံများကို ဝင်ရောက် ကျူးကျော်ခြင်းသည် ကမ္ဘာပေါ်ရှိ လူသားအားလုံး အနည်းနှင့်အများဆိုသလို ထိခိုက်မှုတော့ ရှိမည်ဖြစ်သည်။

ထိုအခြေအနေမျိုးမှ အကာအကွယ်ရစေရန်အတွက် မိမိတို့သည် နိုင်ငံအားလုံးက လိုက်နာကျင့်သုံးသည့် နိုင်ငံတကာ စည်းမျဉ်းဥပဒေတစ်ရပ်ဖြင့် အုပ်ချုပ်သည့် ကမ္ဘာ့အခင်းအကျင်းကို လိုအပ်သည်။

ထို့ကြောင့် ထိုင်းနိုင်ငံ အပါအဝင် ကမ္ဘာ့နိုင်ငံအားလုံး၏ အကျိုးစီးပွားအတွက် စည်းမျဉ်းအခြေပြု နိုင်ငံတကာ အခင်းအကျင်းကို ကာကွယ်ရန်နှင့် ထိုအခင်းအကျင်းကို လေးစားမှုကင်းမဲ့သည့် တိုက်ခိုက်မှုများကို ရှုတ်ချရန် လိုအပ်သည်။

အထူးသဖြင့် ယူကရိန်းကို ရုရှားက ဝင်ရောက်ကျူးကျော်မှုသည် ကမ္ဘာ့အခင်းအကျင်းကို ပြောင်းလဲစေနိုင်သည့် ဥပမာပြရမည့် ဖြစ်ရပ်တစ်ခုအဖြစ် ယူဆနိုင်သည်။

Source: ဘန်ကောက်ပို့စ်

CNI Sport Article 

၂၀၂၄ ခုနှစ်၊ မတ်လ ၁

ဂျူဗင်တပ်စ်နဲ့ ပြင်သစ်လက်ရွေးစင် ပေါ့ဘာဟာ တားမြစ်ဆေးသုံးစွဲမှုကြောင့် ဘောလုံးလောကနဲ့ ပတ်သက်ခွင့် ၄ နှစ်ကြာ ပိတ်ပင်ခံလိုက်ရပြီ ဖြစ်ပါတယ်။ 

ဒီလထဲမှာ အသက် ၃၁ နှစ်ပြည့်တော့မယ့် ပေါ့ဘာအတွက်တော့ ဒီလိုပိတ်ပင်ခံရမှုကြောင့် သူ့ရဲ့ကစားသမားဘဝ ဟာ ပြီးဆုံးသွားပြီလို့ ယေဘုယျပြောလို့ ရပါတယ်။ 

ပေါ့ဘာဟာ ကမ္ဘာ့အကောင်းဆုံး ကစားသမားတွေထဲက တစ်ဦးအဖြစ် သတ်မှတ်ခံခဲ့ရတဲ့အထိ ခြေစွမ်းကောင်းခဲ့ ပြီး ဘောလွန်းဒီအောဆုကို ရယူနိုင်ဖို့ မျှော်လင့်ခြင်းခံခဲ့ရတဲ့ ကစားသမားလည်း ဖြစ်ပါတယ်။

ဒါပေမယ့် တားမြစ်ထားတဲ့ ဆေးကို သုံးစွဲမိခဲ့တာကြောင့် ပေါ့ဘာဟာ ဘောလုံးနဲ့ ပတ်သက်ခွင့် ၄ နှစ် ပိတ်ပင်ခံ လိုက်ရပြီ ဖြစ်တာပါ။

ပေါ့ဘာအနေနဲ့ ဒီပြစ်ဒဏ်ကို လျှော့ချနိုင်ဖို့အတွက် နိုင်ငံတကာ အားကစားခုံရုံးထံ အယူခံ ဝင်သွားဖို့ရှိနေတာ ဖြစ်ပါတယ်။ 

ပေါ့ဘာကို တွေ့ရစဉ်

ပေါ့ဘာဟာ တားမြစ်ထားတဲ့ testosterone ဆေးကို အသုံးပြုခဲ့တာကြောင့် ၂၀၂၃ ခုနှစ်၊ စက်တင်ဘာလ ကတည်းက ပွဲကစားခွင့် ဆိုင်းငံ့ခံခဲ့ရတာပါ။ အောက်တိုဘာမှာ ဒုတိယအကြိမ် ထပ်မံစစ်ဆေးတာမှာလည်း တားမြစ်ဆေးသုံးစွဲကြောင်း ထပ်ပြီးတွေ့ရှိခဲ့တာ ဖြစ်ပါတယ်။ 

ကမ္ဘာ့တန်ကြေး အကြီးဆုံး ကစားသမားဖြစ်ခဲ့ဖူးတဲ့ ပေါ့ဘာဟာ ယူနိုက်တက်အသင်းကနေ စာချုပ်ကုန်ဆုံးပြီး ၂၀၂၂ ခုနှစ် နွေရာသီမှာ ဂျူဗင်တပ်စ်အသင်းထံ ဒုတိယအကြိမ်မြောက်ကစားဖို့ ပြန်လာကတည်းက စိတ်ပျက်စရာ တွေနဲ့သာ ကြုံတွေ့ခဲ့ရတာပါ။ 

ပေါ့ဘာဟာ ဂျူဗင်တပ်စ်အသင်းမှာ ဒဏ်ရာနှိပ်စက်မှုတွေကြောင့် ၂၀၂၂ ကမ္ဘာ့ဖလားပြိုင်ပွဲမှာ ပြင်သစ်အသင်း အတွက် မပါဝင်နိုင်ခဲ့ပါဘူး။

ပေါ့ဘာဟာ ပြီးခဲ့တဲ့ရာသီက ဂျူဗင်တပ်စ်အသင်းအတွက် ပွဲပေါင်း ၁၀ ပွဲသာ ပါဝင်ကစားနိုင်ခဲ့ပြီး ဒဏ်ရာကြောင့် အနားယူနေခဲ့ရတာ ဖြစ်ပါတယ်။

ပေါ့ဘာကို တွေ့ရစဉ်

ဒီ ၁၀ ပွဲမှာဆိုရင် ပေါ့ဘာဟာ စီးရီးအေ ၆ ပွဲ၊ ယူရိုပါလိဂ် ၃ ပွဲနဲ့ ကိုပါအီတာလီယာ ၁ ပွဲ ပါဝင်ကစားခဲ့ပြီး ဒီပွဲတွေ အားလုံးမှာ ၁၆၂ မိနစ်သာ ကစားနိုင်ခဲ့တာပါ။ 

ဒီရာသီမှာတော့ ပေါ့ဘာဟာ ဒဏ်ရာကင်းစင်စွာနဲ့ ဂျူဗင်တပ်စ်အသင်းအတွက် ပါဝင်နိုင်ဖို့ မျှော်လင့်ခဲ့ပေမယ့် ဒဏ်ရာပြဿနာတွေကြောင့် စိတ်ပျက်စရာတွေ ထပ်ကြုံခဲ့ရတာ ဖြစ်ပါတယ်။

ပေါ့ဘာဟာ ဒီရာသီမှာ ဂျူဗင်တပ်စ်အသင်းအတွက် ၂ ပွဲသာ ပါဝင်ကစားနိုင်ခဲ့ပြီး ဒီ ၂ ပွဲမှာ ပွဲကစားချိန်က ၅၁ မိနစ်သာ ရှိခဲ့တာပါ။

ဒီထက် စိတ်ပျက်စရာ ကောင်းခဲ့တာကတော့ ဒီရာသီ ဂျူဗင်တပ်စ်အသင်းရဲ့ ပထမဆုံး စီးရီးအေပွဲစဉ်အပြီး ကျပန်း ဆေးစစ်မှု ပြုလုပ်ခဲ့တာမှာ ပေါ့ဘာ တားမြစ်ဆေး သုံးစွဲတာကို တွေ့ရှိခဲ့တာဖြစ်ပါတယ်။ 

ဒါကြောင့် ပေါ့ဘာဟာ အခုဆို ဘောလုံးနဲ့ ပတ်သက်ခွင့် ၄ နှစ် ပိတ်ပင်ခံလိုက်ရပြီဖြစ်ပါတယ်။ 

ပေါ့ဘာကတော့ သူ့ရဲ့ကစားသမားဘဝမှာ တည်ဆောက်ထားတဲ့ အရာအားလုံးဟာ သူ့ရဲ့အဝေးကို ထွက်ခွာသွားပြီ ဖြစ်တာကြောင့် အလွန်ဝမ်းနည်းတုန်လှုပ်ပြီး ကြေကွဲရတယ်လို့ ဖွင့်ဟထားပါတယ်။

ပေါ့ဘာကို တွေ့ရစဉ်

ပေါ့ဘာက သူဟာ ဒီဆေးကို တမင်သက်သက် သုံးစွဲခဲ့တာ မဟုတ်တဲ့အတွက် နိုင်ငံတကာအားကစားခုံရုံးမှာ အယူခံဝင်သွားမယ်လို့ ပြောခဲ့ပါတယ်။

ပေါ့ဘာအနေနဲ့ အယူခံ မအောင်မြင်ဘူးဆိုရင်တော့ စိတ်ပိုင်းဆိုင်ရာပါ ထိခိုက်သွားနိုင်ပြီး ကစားသမားဘဝကို စောစီးစွာ အဆုံးသတ်ရဖို့ သေချာနေတာပါ။ 

ဂျူဗင်တပ်စ်အသင်းမှာ ပထမဆုံးအကြိမ် ကစားခဲ့တုန်းက ကစားသမားဘဝ အကောင်းဆုံး ခြေစွမ်းတွေကို ပိုင်ဆိုင်ခဲ့တဲ့ ပေါ့ဘာဟာ ပြင်သစ်အသင်း ၂၀၁၈ ကမ္ဘာ့ဖလား ရယူခဲ့တာမှာလည်း အဓိကကျတဲ့သူ ဖြစ်ခဲ့ပါတယ်။ 

ဒါပေမယ့် ပေါ့ဘာဟာ ယူနိုက်တက်အသင်းထံ ပြန်လည်ပြောင်းရွှေ့အပြီးမှာ နည်းပြ မော်ရင်ဟိုနဲ့  ဆက်ဆံရေး အဆင်မပြေဖြစ်ခဲ့သလို အသင်းအပေါ် ဝေဖန်မှုတွေ ပြုလုပ်ခဲ့တာကြောင့် ယူနိုက်တက်အသင်း ပရိသတ်တွေရဲ့ မုန်းတီးမှုကို ခံခဲ့ရတာပါ။

ပေါ့ဘာဟာ အခုအချိန်မှာတော့ သူ့ရဲ့ကစားသမားဘဝကို အဓိက အဆုံးအဖြတ်ပေးမယ့် အယူခံရလဒ်ကို စောင့်မျှော် နေရတော့မှာ ဖြစ်ပါတယ်။ 

ပေါ့ဘာအနေနဲ့ အယူခံ မအောင်မြင်ရင်တော့ တစ်ချိန်က ကမ္ဘာ့တန်ကြေး အကြီးဆုံးကစားသမား၊ ဘောလွန်းဒီဆု ရဖို့ မျှော်လင့်ထားသူ အဖြစ်ကနေ ကစားသမားဘဝကို စောစီးစွာ နှုတ်ဆက်ရသွားနိုင်တာပဲဖြစ်ပါတယ်။