CNI News

၂၀၂၂ ခုနှစ်၊ စက်တင်ဘာ ၂၆

ဧရာဝတီတိုင်းဒေသကြီးအတွင်းရှိ ကမ်းခြေတချို့တွင် တနင်္ဂနွေနေ့တိုင်း ပလတ်စတစ်အစား ဖက်ရွက်များကိုသာ အသုံးပြုရန် အသိပေးထားကြောင်း ရွှေသောင်ယံမြို့နယ် အုပ်ချုပ်ရေးမှူး ဦးညီတူးကြီး က CNI သတင်းဌာနသို့ ပြောသည်။

ယခုလို အသိပေးထားခြင်းကို လွန်ခဲ့သော တစ်လခန့်က ချောင်းသာကမ်းခြေတွင် စတင်ပြုလုပ်ခဲ့ခြင်းဖြစ်သည်ဟု သိရသည်။

ရွှေသောင်ယံမြို့နယ် အုပ်ချုပ်ရေးမှူးက ဦးညီတူးကြီးက “ပလတ်စတစ်အိတ်ရဲ့ အစားဖြစ်တဲ့ ဖက်ပေါ့၊ ကျနော်တို့ ဒေသအရဆို တောင်စွန်ဖက်လိုဟာမျိုးတွေနဲ့ပေါ့လေ၊ အဲ့လိုဖက်တွေနဲ့ အသုံးပြုမယ်ပေါ့၊ အိမ်က ချိုင့်နဲ့ အသုံးပြု မယ်ပေါ့၊ သဘောက။ ဒါကတော့ ပလတ်စတစ်ကို သုံးစွဲတာပေါ့နော်၊ လျှော့ချရေးအနေနဲ့ တဖြည်းဖြည်းခြင်း တဆင့်ခြင်း တဆင့်ခြင်း သွားနေတာပေါ့၊ နောက်ဆုံးကျရင် လုံးလုံး ပလတ်စတစ် ကင်းစင်ရေးပေါ့၊ အဲ့အထိ သွားချင်တာပေါ့၊ အဲ့လိုသွားဖို့အတွက် တနင်္ဂနွေနေ့ကနေစပြီး အစပြုတာပေါ့။ ဒါတွေက တခြားမြိုနယ်တွေလည်း လုပ်မယ်လို့ အကုန်လုံး ဒီအတိုင်း ရှိထားတာပေါ့။ တစ်မြို့နယ်လုံးပေါ့၊ ပုသိမ်မြို့နယ် တစ်မြို့နယ်လုံး အဆင့်တော့ ဒါတွေက ဒီလိုပဲ ထုတ်ပြန်ထားပါတယ်” ဟု CNI သို့ ပြောသည်။

ယခုလို ပလတ်စတစ်အိတ်အစား ဖက်ရွက်ကိုအသုံးပြုရခြင်းသည် ကမ်းခြေသာယာ လှပစေရေးအတွက် ဖြစ် ကြောင်းနှင့် အသိပေးကာလဖြစ်သောကြောင့် မလိုက်နာသူများကို ဒက်ငွေပေးဆောင်ခိုင်းခြင်းမျိုးကိုတော့ မထုတ်ပြန်ထားသေးကြောင်းလည်း ၎င်းက ဆက်ပြောသည်။

ပုသိမ်မြို့နယ်အတွင်းရှိ ငွေဆောင်ကမ်းခြေမြင်ကွင်း(ဓါတ်ပုံ-Getty Images)

ငွေဆောင်ကမ်းခြေတွင်လည်း ပလတ်စတစ်အိတ်အစား ဖက်ရွက်ကို အသုံးပြုရန် အသိပေးထားကြောင်းနှင့် ဆိုင်းဘုတ်များလည်းချိတ်ဆွဲထားကြောင်း ငွေခြေကမ်းခြေဒေသခံတစ်ဦးထံမှ သိရသည်။

၎င်းနေ့တွင် ပလတ်စတစ်အိတ်သုံးမိပါက ဆိုင်သမားများ ၏ တာဝန်သာဖြစ်သည်ဟု ရပ်ကွက်လူကြီးများက လာရောက်ပြောဆိုထားခြင်းများရှိကြောင်း ပလတ်စတစ်အိတ်ကို အဓိကထား သုံးစွဲနေရသည့် မုန့်ဟင်းခါး၊ ခေါက်ဆွဲရောင်းချနေသူ ဒေါ်မူမူက CNI သတင်းဌာနကို ပြောသည်။

“ဗြုန်းကနဲဆိုတော့ မသိဘူးလေ။ အန်တီတို့ကလည်း မသိတော့ အဲ့ဒီနေ့လည်းကျရော ဈေးဝယ်သူတွေက လာကြ ရော၊ လာကြတော့ အန်တီတို့မှာ ဘယ်လိုလုပ်ရလဲဆိုတော့ ပြောလိုက်တာပေါ့နော်၊ ဒီနေ့ပါဆယ် မဆွဲရဘူး၊ ဖက်နဲ့ ထုပ်ရမယ်၊ စက္ကူနဲ့ ထုတ်ပေးရမယ်၊ အဲ့လိုမျိုးပြောတယ်လေ။ အဲ့လိုမျိုးပြောတော့ အန်တီမှာ ဈေးဝယ်သားတွေက လာတော့ တချို့တစ်လေကျတာ့လည်း ချိုင့်ပြန်ယူပြီးတော့ ပြန်လာကျတာပေါ့။ တချို့ကိုကျတော့ အိမ်ကရှိတဲ့ ချိုင့် အကုန်လုံးပေးလိုက်ရတာပေါ့နော်၊ ဆိုင်သမားတွေ အဲ့လိုမျိုး ဖက်တွေနဲ့ ထုတ်ရမယ်ဆိုရင် မုန့်ဟင်းခါး ခေါက်ဆွဲရောင်းတဲ့ အန်တီတို့က အများကြီးပြဿနာရှိတာပေါ့” ဟု ၎င်းက ပြောသည်။

ယခုလို ပလတ်စတစ်အိတ်အသုံးပြုခြင်းကို တနင်္ဂနွေနေ့ တစ်ရက်ထဲသာ အသုံးမပြုရန် အသိပေးထားကြောင်း၊ ကျန်ရက်များတွင်အသုံးပြုနိုင်ကြောင်းနှင့် နောက်ပိုင်းတွင် ပလတ်စတစ် ပပျောက်စေရေးအတွက် စည်းကမ်း တင်းကျပ်မှုများ လုပ်ဆောင်သွားမည်ဖြစ်ကြောင်း သိရသည်။

CNI International News

ဘေဂျင်း၊ စက်တင်ဘာ ၆

တရုတ်နိုင်ငံ၊ အနောက်တောင်ပိုင်း စီချွမ်ပြည်နယ်တွင် စက်တင်ဘာ ၅ ရက်၌ လှုပ်ခတ်ခဲ့သော ပြင်းအား ၆ ဒသမ ၈ အဆင့်ရှိ ငလျင်ကြောင့် အနည်းဆုံး လူ ၄၆ ဦးသေဆုံး၍ ၁၆ ဦး ပျောက်ဆုံးနေကြောင်း အေပီသတင်းအရ သိရသည်။

ဒေသခံ ၂၁ သန်းသည် Covid-19 ကပ်ရောဂါကြောင့် ကန့်သတ်ချက်များထားရှိသည့် ပြည်နယ်၏မြို့တော် ချန်ဒူး တွင် အများစုနေထိုင်ကြရာ မြေပြိုမှုများနှင့် အဆောက်အအုံများ တုန်ခါမှုဒဏ်တို့ကို ခံစားခဲ့ကြရသည်။

ထိုနေ့ မွန်းတည့်ချိန်နောက်ပိုင်း မကြာမီ၌ပင် လူဒင်းခရိုင်ရှိ တောင်ပေါ်ဒေသတွင်လည်း အလားတူ မြေငလျင် ထပ်မံလှုပ်ခတ်ခဲ့ကြောင်း တရုတ်ငလျင်ကွန်ရက်ဌာနက သတင်းထုတ်ပြန်ခဲ့သည်။

တရုတ်နိုင်ငံ အနောက်တောင်ပိုင်း စီချွမ်ပြည်နယ် လူဒင်းခရိုင်ရှိ လန်ကွီမြို့အနီ ကျောက်နံရံမှ လမ်းမပေါ်သို့ ပြိုကျနေသည့် ကျောက်တုံးများကိုတွေ့ရစဉ်(ဓါတ်ပုံ- အေပီ)

တိဗက်ကုန်းပြင်မြင့်၏အစွန်းတွင် တည်ရှိသော စီချွမ်ပြည်နယ်သည် မြေငလျင်ဒဏ်ကို မကြာခဏ ခံစားရလေ့ ရှိသည်။

ပြီးခဲ့သည့် ဇွန်လအတွင်းကလည်း ငလျင်နှစ်ကြိမ် လှုပ်ခတ်ခဲ့သေးရာ အနည်းဆုံး လူ ၄ ဦး သေဆုံးခဲ့သည်။

စက်တင်ဘာ ၅ ရက်တွင် တိဗက်ကိုယ်ပိုင်အုပ်ချုပ်ခွင့်ရ ဂါဇီစီရင်စုရှိ သမိုင်းဝင် မိုဇီမြို့တွင် လူ ၂၉ ဦးသေဆုံးခဲ့ပြီး လျှပ်စစ်မီးများ ပြတ်တောက်သွားခဲ့သည်။

အဆိုပါငလျင်ကြောင့် လူပေါင်း ၅ သောင်းကျော် ဘေးကင်းလုံခြုံရာသို့ ရွှေ့ပြောင်းပေးခဲ့ရပြီး ယာယီရွက်ဖျင် တဲများထိုး၍ နေရာချထားပေးထားကြောင်း ဆင်ဟွာသတင်းဌာနက စက်တင်ဘာ ၆ ရက် (ယနေ့) တွင် ဖော်ပြခဲ့သည်။

မိုဇီမြို့ရှိ ပြိုကျနေသော လူနေအိမ်တစ်လုံးမှ ဒဏ်ရာရ အမျိုးသမီးတစ်ဦးကို ကယ်ဆယ်ရေးသမားများ ဆွဲထုတ် နေပုံအား အစိုးရရုပ်သံလိုင်း CCTV က ထုတ်လွှင့်ခဲ့သည်။

စက်တင်ဘာလ ၅ ရက်နေ့က လှုပ်ခတ်ခဲ့သည့် မြေငလျင်ကြောင့် တရုတ်နိုင်ငံ အနောက်တောင်ပိုင်း စီချွမ်ပြည်နယ် ရာအန်းမြို့ရှိ မူလတန်းကျောင်းတစ်ကျောင်းမှ ကျောင်းသားကလေးငယ်များကို တွေ့ရစဉ်(ဓါတ်ပုံ-အေပီ)

အဆိုပါဒေသရှိ အဆောက်အအုံအများအပြားကို သစ်သားနှင့်အုတ်တို့ဖြင့် ရောနှောဆောက်လုပ်ထားခြင်းဖြစ်ပြီး လူပေါင်း ၁၅၀ ခန့် ဒဏ်ရာရခဲ့သည်။

အစောပိုင်းကလည်း လူဒင်ခရိုင်တွင် သေဆုံးသူ ၇ ဦးနှင့် တောင်ပိုင်းရှိ ရှင်မီယန်ခရိုင်တွင် သေဆုံးသူ ၁၄ ဦး ရှိ ကြောင်း အာဏာပိုင်များက သတင်းထုတ်ပြန်ခဲ့သည်။

ထိုအထဲကမှ သေဆုံးသူ ၃ ဦးမှာ ရေခဲမြစ်နှင့် သဘာဝဘေးမဲ့သစ်တောများရှိသည့် ဟိုင်လူဂိုရှုခင်းသာနယ်မြေတွင် အသက်မွေးဝမ်းကျောင်းပြုနေသော အလုပ်သမားများဖြစ်ကြကြောင်း သိရသည်။

ငလျင်၏ဗဟိုချက်နေရာမှ ကီလိုမီတာ ၂၀၀ (၁၂၅ မိုင်) ကွာဝေးသော ချန်ဒူးဒေသရှိ အဆောက်အအုံများ လှုပ်ခါ သွားခဲ့သည်။

၃၁ ထပ်တိုက်ခန်းတွင် နေထိုင်သူ ကျောက်တန်းလိက ငလျင်လှုပ်ခတ်စဉ် သူမသည် ၅ မိနစ်ကြာ စားပွဲခုံအောက် တွင် ပုန်းဝပ်နေခဲ့ကြောင်း ပြောကြားခဲ့သည်။ နောက်ဆက်တွဲငလျင်အန္တရာယ်ကို သတိပြုမိသော သူမ၏ အိမ်နီး ချင်းများလည်း အထပ်မြင့်တိုက်ပေါ်မှ မြေပြင်ပေါ်သို့ ပြေးဆင်းခဲ့ကြရသည်။

Source: AP

CNI International News

အစ္စလာမ္မာဘတ်၊ ဩဂုတ် ၃၁

ပါကစ္စတန်နိုင်ငံတွင် ပြီးခဲ့သည့် ဇွန်လ အလယ်ပိုင်းကတည်းက လူပေါင်း ၁,၁၆၀ ကျော် စံချိန်တင် သေဆုံးခဲ့ရသည့် ရေကြီးမှုများကြောင့် အရေးပေါ်ရန်ပုံငွေ ဒေါ်လာ သန်း ၁၆၀ ပေးအပ်ရန်အတွက် ကုလသမဂ္ဂ (UN) နှင့် ပါကစ္စတန်တို့က ဩဂုတ် ၃၀ ရက်တွင် မေတ္တာရပ်ခံခဲ့ကြောင်း အေပီသတင်းအရ သိရသည်။

မကြာသေးမီ သီတင်းပတ်များအတွင်း မကြုံစဖူး မုတ်သုံမိုးရွာသွန်းမှု သည်းထန်လွန်းခြင်းကြောင့် ပေါ်ပေါက်လာ သော ပါကစ္စတန်ရေဘေးသည် ရာသီဥတုပြောင်းလဲမှု ပြဿနာအပေါ် အရှိန်မြှင့် ကိုင်တွယ်ဖြေရှင်းရန် ကမ္ဘာကို အချက်ပြလိုက်ခြင်းဖြစ်ကြောင်း UN အတွင်းရေးမှူးချုပ် အန်တိုနီယိုဂူတာရက်စ်က ပြောကြားခဲ့သည်။

“ရာသီဥတုဖောက်ပြန်လို့ ကျနော်တို့ ကမ္ဘာဂြိုဟ်ဟာ ပျက်စီးတဲ့ဆီကို ဦးတည်နေပါပြီ။ ကျနော်တို့ အိပ်မောကျ၊ တွေဝေငိုက်မြည်းပြီး လျှောက်လှမ်းနေတာတွေ ရပ်လိုက်ကြပါစို့။ ဒီနေ့ ပါကစ္စတန်ဆိုရင် မနက်ဖြန် ခင်ဗျားတို့ နိုင်ငံ ဖြစ်လာနိုင်တယ်” ဟု အစ္စလာမ္မာဘတ်မြို့တွင် ကျင်းပသည့် ရန်ပုံငွေ မေတ္တာရပ်ခံရေး အခမ်းအနားသို့ ပေးပို့သော ဗွီဒီယိုမက်စ်ဆေ့ချ်တွင် ဂူတာရက်စ်က ပြောကြားခဲ့သည်။

UN အတွင်းရေးမှူးချုပ် အန်တိုနီယိုဂူတာရက်စ် (GETTY IMAGES)

ဂူတာရက်စ်သည် လာမည့် စက်တင်ဘာ ၉ ရက်တွင် မကြုံစဖူး ရာသီဥတု ကပ်ဆိုးကြောင့် ထိခိုက်မှု အပြင်းထန်ဆုံး ခံစားခဲ့ရသည့် ဒေသများသို့ သွားရောက်လေ့လာမည်ဟု UN ပြောခွင့်ရသူ စတီဖင်ဒူဂျာရစ် (Stephane Dujarric) က ဩဂုတ် ၃၀ ရက်တွင် ပြောကြားခဲ့သည်။

UN အထွေထွေအတွင်းရေးမှူးချုပ် အနေဖြင့် ဂူတာရက်စ်သည် အိုးမဲ့အိမ်မဲ့ မိသားစုများနှင့် တွေ့ဆုံပြီး UN ဝန်ထမ်းများ၊ လူသားချင်း စာနာမှုဆိုင်ရာ မိတ်ဖက်အဖွဲ့များအနေဖြင့် အကူအညီ ပေးအပ်ရန် မည်သို့ ကြိုးစားနေ ကြောင်း သက်သေပြသွားမည်ဟု ဒူဂျာရစ်က ဆက်လက် ပြောကြားခဲ့သည်။

စီးပွားရေး ပြန်လည်နာလန်ထူဖို့ မနည်းအားယူနေရသော ပါကစ္စတန်နိုင်ငံတွင် ရေဘေးကြောင့် ထိခိုက်ခဲ့ရသူပေါင်း ၃၃ သန်းကျော် (သို့မဟုတ်) နိုင်ငံသား ၇ ဦးတွင် တစ်ဦး ရေဘေးခံစားခဲ့ရသဖြင့် ပိုမိုအထိနာစေခဲ့သည်။

ရေဘေးသင့်နေသော ပါကစ္စတန် (AP)

ပြီးခဲ့သည့် ၂ လခွဲအတွင်း အိမ်ခြေ ၁ သန်းကျော် ပျက်စီးခဲ့ရပြီး လူပေါင်းသန်းနှင့်ချီ၍ အိုးမဲ့အိမ်မဲ့ ဖြစ်ခဲ့သည်။

အိုးမဲ့အိမ်မဲ့ ဖြစ်ခဲ့သူများအနက် တစ်သန်းခွဲခန့်မှာ ဒုက္ခသည်စခန်းသို့ ရောက်ရှိသွားကြသော်လည်း အချို့မှာ ကိုယ်ထူကိုယ်ထ အမိုးအကာ ရရှိရေး ကြိုးစားရှာဖွေနေရသည်။

ရေကြီးရေလျှံမှုကြောင့် ကောက်ပဲသီးနှံများ ဆိုးရွားစွာ ပျက်စီးခဲ့ရပြီး စားနပ်ရိက္ခာ ပြတ်လပ်မှု မဖြစ်ပွားအောင် မိမိတို့ အစိုးရအနေဖြင့် ဂျုံတင်သွင်းရန် စဉ်းစားနေကြောင်း ဝန်ကြီးချုပ် ရှာဘတ်ရှရစ်ဖ် (Shahbaz Sharif) က ပြောကြားခဲ့သည်။

ပါကစ္စတန်သည် နိုင်ငံ့သမိုင်းတလျှောက် အဆိုးဆုံး ရေဘေးနှင့် မျက်မြင်ဒိဋ္ဌ ကြုံတွေ့နေရကြောင်း၊ ဒုက္ခသည်များ ကူညီရေးအတွက် နိုင်ငံတကာဘက်မှ မရည်ရွယ်ပါဘဲနှင့် ကြန့်ကြာခဲ့လျှင် ပါကစ္စတန် ပြည်သူများအတွက် ဝမ်း နည်းစရာ ကောင်းလိမ့်မည်ဖြစ်ကြောင်း ရှာဘတ်ရှရစ်ဖ်က ဆက်လက် ပြောကြားခဲ့သည်။

Source: AP

CNI International News

လန်ဒန်၊ ဩဂုတ် ၁၁

အကယ်၍ ကမ္ဘာ့အကြီးဆုံး ရေခဲပြင်မှာ ကမ္ဘာ့အပူချိန် ၂ ဒီဂရီ စင်တီဂရိတ်ထက် ပိုတက်လာပါက ရာစုနှစ်များစွာအတွင်း ပင်လယ်ရေမျက်နှာပြင် မီတာများစွာ မြင့်တက်လာနိုင်သည်ဟု ဩဂုတ် ၁၀ ရက်က ထုတ်ပြန်ခဲ့သည့် ဗြိတိန်နိုင်ငံမှ သုတေသန လေ့လာမှုတစ်ခုတွင် တွေ့ရှိရကြောင်း အေအက်ဖ်ပီသတင်းကို ကိုးကားလျက် ဘန်ကောက်ပို့စ်ဝက်ဘ်ဆိုက်တွင် ဖော်ပြထားသည်။

ဗြိတိန်နိုင်ငံ၊ ဒါဟမ် (Durham) တက္ကသိုလ်မှ သုတေသီများက ကမ္ဘာလုံးဆိုင်ရာ ဖန်လုံအိမ်ဓာတ်ငွေ့ ထုတ်လွှတ်မှု ဆက်လက် မြင့်မားနေပါက အန္တာတိကတိုက်၏ ရေခဲလွှာ (EAIS) အရည်ပျော်မှုသည် ၂၁၀၀ ပြည့်နှစ် အရောက်တွင် ပင်လယ်ရေမျက်နှာ ပြင် မီတာထက်ဝက်နီးပါး မြင့်တက်လာနိုင်ကြောင်း ကောက်ချက်ချခဲ့သည်။

အဆိုပါ ကောက်ချက်ကို သဘာဝသိပ္ပံပညာဂျာနယ်တွင် ရေးသားဖော်ပြခဲ့သည်။ ထို့ထက် ကျော်လွန်၍ ဓာတ်ငွေ့ထုတ်လွှတ်မှု မြင့်မားနေမည်ဆိုလျှင် အန္တာတိကရေခဲလွှာကြောင့် ကမ္ဘာ့ပင်လယ် ရေမျက်နှာပြင်သည် သက္ကရာဇ် ၂၃၀၀ နှင့် ၂၅၀၀ အရောက်တွင် ၂ မီတာမှ ၅ မီတာအထိ မြင့်တက်လာစေဖို့ သက်ရောက်မှုရှိနိုင်သည်ဟု သုတေသီများက ဆက်လက် ပြောကြားခဲ့သည်။

သို့သော် ဓာတ်ငွေ့ထုတ်လွှတ်မှု သိသိသာသာ လျော့ကျသွားခဲ့လျှင်လည်း အန္တာတိကရေခဲလွှာ ပျော်ဝင်မှုကြောင့် ပင်လယ် ရေမျက်နှာပြင်သည် ၂၁၀၀ ပြည့်နှစ် အရောက်တွင် ၂ စင်တီမီတာ မြင့်တက်လာနိုင်သည်ဟု ၎င်းတို့၏ အကဲဖြတ်ချက်အရ သိရသည်။

ထိုပမာဏသည် ဂရင်းလန်းနှင့် အန္တာတိကတိုက် အနောက်ပိုင်းတို့မှ မျှော်လင့်ထားသည့် ရေခဲများ ဆုံးရှုံးမှုထက် အဆပေါင်း များစွာ လျော့နည်းမည် ဖြစ်သည်။

“ကျနော်တို့ သုတေသန လုပ်ငန်းကနေ အဓိက ကောက်ချက်ကတော့ အ

ရေခဲပြင် အရည်ဖျော်မှု (GETTY IMAGES)

ရှေ့အန္တာတိကရေခဲလွှာရဲ့ ကံကြမ္မာဟာ ကျနော်တို့ လက်ထဲမှာပဲ ရှိနေတုန်းပါ” ဟု ဒါဟမ်တက္ကသိုလ်၊ ပထဝီဝင်ဌာနမှ အစီရင်ခံစာ ဦးဆောင်ပြုစုသူ ခရစ္စစတုတ်က ပြောကြားခဲ့ သည်။

“ဒီရေခဲလွှာဟာ ပင်လယ်ရေမျက်နှာပြင် ၅၂ မီတာနဲ့ညီမျှပြီးတော့ ကမ္ဘာပေါ်မှာ အကြီးဆုံး ရေခဲလွှာ ဖြစ်ပါတယ်။ ဒီလိုမျိုး သူ့ဘာသာသူ အိပ်စက်နေတဲ့ ဧရာမရေခဲကို သွားပြီး မနှိုးမိဖို့က တကယ့်ကို အရေးကြီးတယ်။ ပြင်သစ်နိုင်ငံ၊ ပါရီမြို့ ရာသီဥတု ဆိုင်ရာ သဘောတူညီချက်မှာ သတ်မှတ်ထားတဲ့အတိုင်း ကမ္ဘာ့အပူချိန် ၂ ဒီဂရီစင်တီဂရိတ်အောက်ကို တိုးလာမှုကို ကန့်သတ် ဖို့ပါ။ အဲဒီလို ကန့်သတ်လိုက်ပါမှ အဆိုးဆုံး အခြေအနေတွေကို ရှောင်ရှားဖို့ (ဒါမှမဟုတ်) အရှေ့အန္တာတိက ရေခဲလွှာတွေ အရည်ပျော်တာတွေကို ရပ်တန့်စေခဲ့တယ်။ ဒါကြောင့် ကမ္ဘာ့ပင်လယ်အပေါ် သက်ရောက်မှုတွေကို ဆက်ပြီး ကန့်သတ်ထား သင့်တယ်” ဟု ၎င်းက ဆက်လက် ပြောကြားခဲ့သည်။

အဆိုးဆုံး အခြေအနေများသည် “အလွန်ဖြစ်နိုင်ခြေရှိနေသည်”ဟု ယခု သုတေသန ဆန်းစစ်ချက်က ထောက်ပြထားသည်။

ကမ္ဘာကြီး ပူနွေးလာမှုကို ၂ ဒီဂရီစင်တီဂရိတ်အောက်သို့ လျှော့ချရန်နှင့် အပူချိန် ၁.၅ ဒီဂရီစင်တီဂရိတ်အထိ တက်လာမှုကို ကန့်သတ် ထိန်းချုပ်ရန်အတွက် ကမ္ဘာ့ခေါင်းဆောင်များက ပါရီမြို့တွင် ၂၀၁၅ ခုနှစ်၌ ကျင်းပခဲ့သည့် ကုလသမဂ္ဂ ရာသီဥတု ပြောင်းလဲမှုဆိုင်ရာ ညီလာခံတွင် သဘောတူညီခဲ့ကြသည်။

ဗြိတိန်၊ ဩစတြေးလျ၊ ပြင်သစ်နှင့် အမေရိကန်တို့မှ သိပ္ပံပညာရှင်များ ပါဝင်သော ယခု သုတေသနအဖွဲ့သည် ကမ္ဘာ့ရေခဲလွှာ ၏ ခန့်မှန်းချက်များကို ပြုလုပ်ရင်းဖြင့် ယခင်က ပူနွေးသော အချိန်များကို မည်သို့ တုံ့ပြန်ဖြေရှင်းခဲ့သည်ကိုပါ ခွဲခြမ်းစိတ်ဖြာ သုံးသပ်ခဲ့သည်။

Source: AFP

CNI International News

ကဘူးလ်၊ ဇွန်လ ၂၃

အာဖဂန်နစ္စတန်နိုင်ငံ၏ အရှေ့ပိုင်း ခက်ခဲကြမ်းတမ်းသည့် တောင်တန်းဒေသတွင် ဇွန်လ ၂၂ ရက် အစောပိုင်းက အင်အား ပြင်းထန်သည့် ငလျင်တစ်ခု လှုပ်ခတ်ခဲ့ရာ ကျောက်ခဲများ၊ ရွှံ့အုတ်များဖြင့် ဆောက်လုပ်ထားသည့် လူနေအိမ် အများအပြား ပြိုကျပျက်စီးခဲ့ပြီး လူပေါင်း ၁၀၀၀ ထက်မနည်း သေဆုံးခဲ့ကြောင်း အေပီသတင်းအရ သိရသည်။

အဆိုပါ သဘာဝဘေးအန္တရာယ်သည် အာဖဂန်၏ လူသားချင်း စာနာမှု အကျပ်အတည်းကို ရုန်းကန် ရင်ဆိုင်နေရသော တာလီဘန် ခေါင်းဆောင်များနှင့် ကယ်ဆယ်ရေး အေဂျင်စီများအတွက် ကိုင်တွယ် ဖြေရှင်းနိုင်စွမ်း စမ်းသပ်ချက်တစ်ခု ဖြစ်လာခဲ့သည်။

ထိုငလျင်ကြောင့် အာဖဂန်နစ္စတန်တွင် ဆယ်စုနှစ် ၂ ခုအတွင်း လူအသေအပျောက် အများဆုံးဖြစ်ခဲ့ရပြီး သေဆုံးသူဦးရေ တိုးလာနိုင်ကြောင်း အစိုးရတာဝန်ရှိသူများ ပြောကြားခဲ့သည်။
ခန့်မှန်းခြေ ဒဏ်ရာရသူ ၁၅၀၀ ခန့်ရှိကြောင်း တာလီဘန်တို့၏ သတင်းဌာနက ထုတ်လွှင့်ခဲ့သည်။

ပြင်းအား ရစ်ချက်တာစကေး (၆ ဒသမ ၁) ရှိ ငလျင်လှုပ်ခတ်မှုကြောင့် လူသန်းပေါင်းများစွာ ငတ်မွတ်ခေါင်းပါးမှုနှင့် ဆင်းရဲ မွဲတေနေသည့်ကြားမှ အိုးမဲ့အိမ်မဲ့ဖြစ်၍ သေကြေပျက်စီးခဲ့ရသည်။ ပြီးခဲ့သည့် ၁၀ လခန့်နီးပါးက တာလီဘန်တို့ တနိုင်ငံလုံး အာဏာပြန်ယူပြီးနောက် ကျန်းမာရေးစနစ်ပြိုလဲခဲ့သည့် အာဖဂန်နိုင်ငံတွင် ယခုအခါ ဆင်းရဲဒုက္ခများ ပိုမိုဆိုးရွားလာခဲ့သည်။

ငလျင် ဒဏ်ကြောင့် ပျက်စီးနေသော အဆောက်အအုံရှေ့က အာဖဂန်အမျိုးသားတစ်ဦး (AP)

တာလီဘန်တို့ အာဏာပြန်ရပြီးနောက် အာဖဂန်ပိုင် နိုင်ငံတကာဘဏ္ဍာငွေများ ဆိုင်းငံ့ခံခဲ့ရပြီး ကမ္ဘာ့နိုင်ငံအများစုက တာလီဘန်အစိုးရ ရှောင်ဖယ်ခဲ့ကြသည်။

ရှားရှားပါးပါး ဖြစ်စဉ်တစ်ခုအနေဖြင့် တာလီဘန်တို့၏ ထိပ်ဆုံးခေါင်းဆောင် ဟိုင်ဗ္ဗဒူလာအခွန်ဇာဒါ (Haibatullah Akhundzadah) က “ယခုကြေကွဲဖွယ် ဖြစ်ရပ်ဆိုးကြောင့် ထိခိုက်ခံစားရသော အာဖဂန်ပြည်သူများကို မဆိုင်းမတွ ကူညီကြပါရန်” နိုင်ငံတကာအသိုင်းအဝိုင်းနှင့် လူသားချင်းစာနာမှုဆိုင်ရာ အဖွဲ့အစည်းများထံ မေတ္တာရပ်ခံ ပန်ကြားခဲ့သည်။

ပါကစ္စတန်နယ်စပ်အနီး အာဖဂန်ပိုင်နက်အတွင်းရှိ ဝေးလံခေါင်သီသော ဒေသ၌ နေထိုင်သူများ လက်ဗလာဖြင့် မြေပြိုသေဆုံး နေပုံများ (သို့မဟုတ်) အသက်ရှင် ကျန်ရစ်များကို ရှာဖွေနေပုံများကို ဘက်ခါတာ (Bakhtar) သတင်းဌာနမှ ထုတ်လွှင့်သော ဗွီဒီယိုဖိုင်တွင် မြင်တွေ့ရသည်။

ကယ်ဆယ်ရေးပစ္စည်းများ အများအပြား ပေးပို့နိုင်ခြင်း ရှိ/မရှိ (သို့မဟုတ်) ငလျင်ဒဏ်ခံစားရသော နယ်မြေသို့ ပို့နိုင်/မပို့နိုင် ဆိုသည်ကို လတ်တလော မသိရသေးကြောင်း အေပီသတင်းဌာနက ရေးသားဖော်ပြထားသည်။

Source: AP

 ပြီးခဲ့သည့်နှစ်က ပုဂံဘုရားတချို့ ရေဝင်ရောက်မှုကြောင့် ပျက်စီးခဲ့ရ

ပြီးခဲ့သည့်နှစ်က ပုဂံဘုရား ရေဝင်ရောက်မှု

CNI News

၂၀၂၂ ခုနှစ်၊ မေလ ၂၀

မွန်ပြည်နယ်၊ မော်လမြိုင်မြို့တွင် အားကောင်းသည့်မုန်တိုင်းငယ်၏ အရှိန်ကြောင့် ယနေ့(မေ ၂၀ ရက်)တွင် မိုးရွာသွန်းကာ လေပြင်းတိုက်ခတ်မှုကြောင့် နေအိမ်အချို့ ပျက်စီးသွားကြောင်း သိရသည်။

ရာမညအရေးပေါ်လူမှုကယ်ဆယ်ရေးနှင့် ရှာဖွေကယ်ဆယ်ရေးကွန်ယက်အဖွဲ့မှ တာဝန်ရှိသူက "သစ်ပင်တွေလဲတယ်။ ရေတော့မကြီးဘူး။ လေတော့တအားကြမ်းတယ်။ အိမ်ပြိုတာတို့ဘာတို့ရှိတယ် သစ်ပင်ပိပြီးတော့လေ။ ရွာတာ မိုးက ညကတည်းကရွာတာ မနက် ၃ နာရီလောက်ကတည်းကရွာတာ ခုချိန်ထိ မတိတ်သေးဘူး။ လေကတော့ငြိမ်သွားပြီပေါ့။ လူတစ်ယောက်တော့ထိခိုက်သွားတယ် အပင်လဲပြီးတော့ "ဟု CNI သတင်းဌာနသို့ ပြောသည်။

ကပ္ပလီ ပင်လယ်ပြင်မြောက်ပိုင်း(မုတ္တမကမ်းလွန်အနီး)တွင် ဖြစ်ပေါ်နေသော မုန်တိုင်းငယ်သည် မြန်မာနိုင်ငံ၊ မွန်ပြည်နယ်၊ မော်လမြိုင်မြို့အနီးမှ ဖြတ် ကျော်ဝင်ရောက်လျက်ရှိပြီး၊ ကုန်းတွင်းမုန်တိုင်းငယ်အဖြစ် ဆက်လက်တည်ရှိနေကြောင်း မိုးဇလမှသိရသည်။

ကုန်းတွင်းမုန်တိုင်းငယ်၏ လက်ရှိအခြေအနေမှာ မြန်မာနိုင်ငံ၊ မွန်ပြည်နယ်၊ မော်လမြိုင်မြို့အနီးမှ ဖြတ်ကျော်ဝင်ရောက်လျက်ရှိ သည့် အခြေအနေဖြစ်ပါသဖြင့် အညိုရောင်အဆင့်ဟု သတ်မှတ် ကြောင်းလည်း ထုတ်ပြန်ထားသည်။

အဆိုပါ ကုန်းတွင်းမုန်တိုင်းငယ်သည် နောက် ၆ နာရီ အတွင်း မြောက်-အရှေ့မြောက်ဘက်သို့ ဆက်လက် ရွေ့လျားပြီး၊ ကရင်ပြည်နယ်၊ ဘားအံမြို့အနီးသို့ ရောက်ရှိနိုင်သည်ဟု ခန့်မှန်းရကြောင်းလည်း မိုးဇလက ထုတ်ပြန်ထားသည်။

CNI News

၂၀၂၂ ခုနှစ်၊ မေ ၇

ရခိုင်ပြည်နယ်ရှိ မြို့နယ်တိုင်းလိုလိုတွင် နွေရာသီရောက်တိုင်း ရေရှားပါးမှုနှင့် ကြုံတွေ့နေရသည့်အတွက် သက်ဆိုင်ရာတာဝန်ရှိသူများအနေဖြင့် ရခိုင်တွင် နှစ်စဉ်ကြုံတွေ့နေရသည့် ပြဿနာကို တစ်ပွဲထိုးမဟုတ်ဘဲ စီမံကိန်းများ အသေအချာရေးဆွဲပြီး ဖြေရှင်းပေးရန် လိုအပ်ကြောင်း ဒေသခံများက သုံးသပ်ပြောဆိုသည်။

ရခိုင်ပြည်နယ်အတွင်းတွင် ရေပေးဝေရန် တည်ဆောက်ထားသည့် ဆည်များစွာ ရှိသော်လည်း တချို့ ဆည်များသည် မြို့ရွာများသို့ ရေပေးဝေခြင်း မရှိကြောင်းနှင့် မင်းပြားမြို့နယ်တွင်လည်း ယင်းကဲ့သို့ ဖြစ်ပေါ်နေကြောင်း၊ ရခိုင်ပြည်နယ်အတွက် မြို့နယ်အလိုက် ရေလှောင်တမံများ တည်ဆောက်စေလိုကြောင်း မင်းပြားလူမှုကူညီရေးအဖွဲ့မှ ကိုကြည်လင်းက CNI သတင်းဌာနသို့ ပြောသည်။

“ကျနော်တို့ မင်းကျန်စစ် ကုမ္ပဏီက ဆောက်ထားတဲ့ မြောင်ကြီးဆည်ဆိုရင် မင်းပြားမြို့ကို ရေတစ်စက်မှ မရောက်သေးဘူး။ အဲဒီကုမ္ပဏီက ကြံ့ခိုင်ရေးက နန္ဒာလှမြင့်တို့ လုပ်သွားတာပေါ့ အဲဒီကုမ္ပဏီက မင်းကျန်စစ် ဆိုပြီးတော့ မင်းပြားက မြောင်ကြီးဆည်ပေါ့။ ရေဂါလံက သန်း ၉၀ လောက် ရှိတာပေါ့။ ဒါပေမယ့် မြို့ထဲကိုတော့ တစ်စက်မှ မ‌ရောက်သေးဘူး။ အရင်တုန်းကတော့ လွန်ခဲ့တဲ့ ၃ နှစ်လောက်က အဲဒီဆည်ကြီးပြီးတော့ မင်းပြားမြို့ ကို စီမံကိန်းဆွဲပြီးတော့ ရေပေးဝေဖို့ လုပ်ခဲ့တယ်။ ဒါပေမယ့် ရာမောင်တံတားက ဖြတ်လို့မရ ဘာညာဆိုပြီးတော့ အဲဒီစီမံကိန်း ပျက်သွားပါတယ်။ ဒီနှစ်ကတော့ သူတို့ ဘတ်ဂျက်ကျပြီးတော့ ကျနော်တို့ မင်းပြားမြို့နယ် မင်းရွာ အုပ်စုကိုတော့ ရေနည်းနည်း ပေးလေ့ရှိပါတယ်ခင်ဗျ။ ကျနော်တို့ ရခိုင်ဘက်မှာ တောတောင်တွေပေါတော့ မြို့နယ်အလိုက် ရေလှောင်တမံတွေ ဆောက်ပေးတာတော့ အဆင်ပြေပါတယ်ခင်ဗျ” ဟု ပြောသည်။

နှစ်စဉ် ရေရှားပါးမှုနှင့်ကြုံတွေ့နေရသည့် မြေပုံမြို့နယ်ရှိ ပြင်ဝိုင်းကျေးရွာတွင် ရေတွင်းများမှ ရေများ ခမ်းခြောက် နေပြီး ရေအနည်းငယ်သာ ထွက်ရှိသည့်အတွက် ညပိုင်းအထိ စောင့်ဆိုင်း၍ ခပ်ယူနေကြရကြောင်း ဒေသခံ ဦးလှစောဖြူက CNI သတင်းဌာနသို့ ပြောသည်။

“စောင့်စောင့်ပြီး ခပ်နေရတယ်။ ည ၁၂ နာရီ၊ ၁ နာရီ တစ်ယောက်ပြီး တစ်ယောက် အဲလို ခပ်နေရတယ်။ အချိန်နဲ့ ပေးတာမဟုတ်ဘူး။ တွင်းကနေ ကိုယ့်ဟာကို ရေပုံးနဲ့ ခပ်တာကိုး။ တွင်းဆိုတာက ဘယ်လိုခေါ်မလဲ ၁၅ ပေ လောက်တော့ နက်တာပေါ့ အဲဒီတွင်းတွေက။ အဲဒါကနေပြီး နည်းနည်းနဲ့ ထွက်တယ်။ အဲလို ဝေမျှပြီးတော့ ခပ်နေရတာပေါ့။ ၃/၄/၅ တွင်းလောက်တော့ ရှိတယ်။ သောက်ရေခပ်တဲ့တွင်းရယ်၊ သုံးရေခပ်တဲ့တွင်းရယ်ဆိုတာ ရှိတော့ရှိတယ်။ ဒါပေမယ့် အဲဒီတွင်းတွေကလည်း သိပ်များများစားစား မထွက်တော့ဘူး” ဟု ပြောသည်။

ရေတွင်း၊ ရေကန်များ တူးဖော်ရန်အတွက် အစိုးရမှ ဘတ်ဂျက်ချပေးသော်လည်း အုပ်ချုပ်ရေးမှူးများမှ ဖြစ်သလို လုပ်ဆောင်ပြီး ငွေများကို အလွဲသုံးစား လုပ်ဆောင်နေမှုများလည်း ရှိသည်ဟု ဦးလှစောဖြူက ပြောသည်။

မြေပုံမြို့နယ်အတွင်းရှိ ကျေးရွာတိုင်းလိုလိုတွင် ရေရှားပါးမှုနှင့် ကြုံတွေ့နေရပြီး ဖွံ့ဖြိုးမှု နည်းပါးသည့် တချို့ ကျေးရွာများထံသို့ ရေလှူသည့် အဖွဲ့အစည်းများ၊ အလှူရှင်များ လာရောက်လှူဒါန်းမှုများလည်း မရှိကြောင်း ယင်းဒေသခံများက ပြောသည်။

မြေပုံမြို့နယ်အတွင်း ရေရှားပါးမှုကို ဖြေရှင်းရန်အတွက် တောင်ကျရေများကို အသုံးပြုကာ ရေလှောင်ကန် တည်ဆောက်၍ ပိုက်များဖြင့် သွယ်တန်းပြီး လုပ်ဆောင်၍ ရနိုင်သည်ဟု ဦးလှစောဖြူက ဆက်ပြောသည်။

“ဒီဘက်မှာက ရေရှားပါးမှုကို လုပ်ဆောင်ဖို့ကိစ္စကတော့ ရှိတာပေါ့။ တောင်ကျရေကို တောင်ပေါ်မှာ ရေလှောင် ကန်လုပ်ပြီး အောက်ကို ရေဆင်းလို့ရတယ်။ မိုက်ခရိုတောင် အလယ်လောက်မှာ ရှိတယ်။ အဲဒီတောင်ကနေ ကျတဲ့ ရေကို တစ်ဖက်ဆည်၊ ရေလှောင်ကန် ဆောက်ပြီးတော့ ရွာကို ပိုက်လုံးတွေနဲ့ သွယ်ပြီးတော့ ရတယ်။ ရေထွက်တဲ့ နေရာ ရှိတယ်။ ဒေသမဖွံ့ဖြိုးတော့ ပိုက်ဆံတွေ ရှားပါးကြတော့ အခက်အခဲ တွေ့တာပေါ့နော်” ဟု သူက ပြော သည်။

ရခိုင်ပြည်နယ် မြို့နယ်တချို့၌ နှစ်စဉ် ရေရှားပါးမှု ကြုံတွေ့နေရပြီး ယခုနှစ်တွင်လည်း ရေရှားပါးမှုနှင့် ကြုံတွေ့ နေရကာ အဆိုပါကိစ္စကို ဖြေရှင်းရန်အတွက် မည်သို့ လုပ်ဆောင်သွားဖို့ရှိသည်ကို ရခိုင်ပြည်နယ် စည်ပင်ဝန်ကြီး ထံသို့ ဆက်သွယ်သော်လည်း မဖြေကြားနိုင်သေးကြောင်း ပြောသည်။

ရခိုင်ပြည်နယ်ရှိ မြို့နယ်တိုင်းလိုလိုတွင် နွေ‌ရာသီရောက်တိုင်း ရေရှားပါးမှုနှင့် ကြုံတွေ့နေရပြီး ထိုအထဲတွင် စစ်တွေ၊ ပုဏ္ဏားကျွန်း၊ မင်းပြား၊ မြေပုံ၊ ပေါက်တော၊ မြောက်ဦး၊ ကျောက်တော်၊ ရသေ့တောင်၊ ဘူးသီးတောင်နှင့် မောင်တောမြို့နယ်တို့တွင် အဆိုးရွားဆုံးဖြစ်ကြောင်း သိရသည်။