CNI International News

အစ္စလာမ္မာဘတ်၊ ဧပြီ ၁၂

မိမိအား တွစ်တာလူမှုကွန်ရက်တွင် တိုင်းပြည် ခေါင်းဆောင်တစ်ဦးအဖြစ် အသိအမှတ်ပြု ရည်ညွှန်းရေးသား ပေးခဲ့ခြင်းအပေါ် အိန္ဒိယဝန်ကြီးချုပ်ကို ကျေးဇူးတင်ရှိပါကြောင်း ပါကစ္စတန်ဝန်ကြီးချုပ်သစ် ရှာဘတ်ဇ်ရှာရစ်ဖ်က တုံ့ပြန်ပြောကြားခဲ့ပြီး အကြမ်းဖက်ဝါဒ တိုက်ဖျက်ရေးနှင့် ဂျမူး-ကက်ရှ်မီးယား အငြင်းပွားမှုများ နှစ်နိုင်ငံ ငြိမ်းချမ်းစွာ ဆက်လက် ညှိနှိုင်း အဖြေရှာ သွားကြရေး တိုက်တွန်းခဲ့သည်။

မစ္စတာရှာရစ်ဖ်သည် ပါကစ္စတန်ဝန်ကြီးချုပ်အဖြစ် မဲအပြတ်အသတ်ဖြင့် အနိုင်ရသွားပြီးနောက် အိန္ဒိယဝန်ကြီးချုပ် နာရိန္ဒရာ မိုဒီက ဝမ်းမြောက်ပါကြောင်း တွစ်တာလူမှုကွန်ရက်မှတဆင့် ချီးကျူးထောပနာပြုခဲ့ပြီး ဒေသတွင်း ငြိမ်းချမ်းရေး၊ တည်ငြိမ် ရေးအတွက် ၎င်းဆန္ဒကို ထပ်လောင်းဖော်ပြခဲ့သည်။

မတ်လ ၈ ရက်တွင် ယခင်ဝန်ကြီးချုပ်ဟောင်း အီမရန်ခမ်းအပေါ် အယုံအကြည် မရှိကြောင်း ပါကစ္စတန်လွှတ်တော်တွင် မဲခွဲဆုံးဖြတ်၍ ဖယ်ရှားခဲ့ပြီးနောက် ဝန်ကြီးချုပ်သစ်အဖြစ် မစ္စတာရှာရစ်ဖ်ကို ခန့်အပ်လိုက်ရာ သီတင်းပတ် အတန်ကြာ တင်းမာနေခဲ့သည့် နိုင်ငံရေးမရေရာမှုများလည်း အဆုံးသတ်သွားခဲ့သည်။

ဝန်ကြီးချုပ်ရာထူး ရွေးကောက် တင်မြှောက်ခံရပြီးနောက် ရှာရစ်ဖ်သည် ပါကစ္စတန်နှင့်အိန္ဒိယကြား အငြင်းပွားနေဆဲဖြစ်သည့် ကက်ရှ်မီးယားဒေသတွင် ပုဒ်မ ၃၇၀ အမိန့် ထုတ်ပြန်ခြင်းကို ဖျက်သိမ်းပေးခဲ့ပြီး သွေးထွက်သံယိုမှုများ လျော့ကျစေရေးနှင့် ဒေသခံ ပြည်သူများကို ကူညီပံ့ပိုး‌ရေး လုပ်ဆောင်သွားမည်ဟု ကတိပြုခဲ့သည်။

အိန္ဒိယ ဝန်ကြီးချုပ် မိုဒီ

အီမရန်ခမ်း၏ နေရာကို အစားထိုး ဆက်ခံခဲ့သူ ရှာရစ်ဖ်သည် အသက် ၇၀ ရှိပြီဖြစ်ပြီး အိန္ဒိယနှင့် ဆက်ဆံရေး ကောင်းမွန်ရန် လိုလားသော်လည်း ကက်ရှ်မီးယားပြဿနာကို ဖြေရှင်းမှုမပါဝင်ဘဲ အောင်မြင်မည် မဟုတ်ကြောင်း ထုတ်ဖော် ပြောကြားခဲ့ သည်။

လက်တွေ့ကျသော နိုင်ငံရေးသမားလည်းဖြစ်၊ ကိုယ်ပိုင်စီးပွားရေးလည်း ကောင်းမွန်သူဟု အများက ရှုကြသည့် ရှာရစ်ဖ်သည် ပါကစ္စတန်ဝန်ကြီးချုပ်သစ်အနေဖြင့် စိန်ခေါ်မှုများစွာ ဆက်လက် ရင်ဆိုင်နေရပြီး ယင်းစိန်ခေါ်မှုများအနက် ကက်ရှ်မီးယား အရေးလည်း အပါအဝင် ဖြစ်သည်။

အိန္ဒိယနှင့်ပါကစ္စတန်တို့သည် ပြီးခဲ့သည့် နှစ်ပေါင်း ၇၅ နှစ်အတွင်း ထိုဒေသအရေးကြောင့် သုံးကြိမ်တိတိ စစ်မက်ဖြစ်ပွားခဲ့ သည်။

ရှာရစ်ဖ်သည် ပါကစ္စတန် ဝါရင့်နိုင်ငံ‌ရေးသမားဘဝ၌ ရပ်တည်ခဲ့သူဖြစ်ပြီး ၂၀၁၃ ခုနှစ်တွင် ပန်ဂျပ်ပြည်နယ် ဝန်ကြီးချုပ် တာဝန် ထမ်းဆောင်ရင်း အိန္ဒိယနိုင်ငံသို့ သွားရောက်လည်ပတ်ခဲ့ရာ ပါကစ္စတန်နိုင်ငံရေး အသိုင်းအဝိုင်းတွင် ထူးထူးခြားခြား အသိအမှတ်ပြု ခံခဲ့ရသည်။

အဆိုပါ ခရီးစဉ်အတွင်း ရှာရစ်ဖ်သည် အိန္ဒိယဘက်ခြမ်းရှိ ၎င်း၏ဘိုးဘွားမိသားစုများ နေထိုင်ခဲ့ရာ ကျေးရွာသို့ သွားရောက် ခဲ့ပြီး နယူးဒေလီမြို့တော်တွင် ထိုစဉ်က ဝန်ကြီးချုပ် မန်မိုဟန်ဆင်းနှင့် အိန္ဒိယအစိုးရအရာရှိများကို တွေ့ဆုံနှုတ်ဆက်ခဲ့သည်။

Source: NDTV

CNI International News

မာရီယူပေါလ်၊ ဧပြီ  ၁၂

ယူကရိန်းနိုင်ငံရှိ မဟာဗျူဟာကျသော မာရီယူပေါလ်မြို့ကို ရက်သတ္တ ၆ ပတ်ကြာ ရုရှားတပ်များ ဝိုင်းရံပိတ်ဆို့၍ တိုက်ခိုက် ခဲ့ပြီးနောက် ပိုမိုထိတ်လန့်စရာ သတင်းများ ထပ်မံထွက်ပေါ်လာခဲ့ရာ အရပ်သား စုစုပေါင်း တစ်သောင်း(၁၀၀၀၀) ကျော် သေ ဆုံးခဲ့ကြောင်း ၎င်းမြို့တော်ဝန်က ပြောကြားသည်ဟု အေပီသတင်းဌာနက ရေးသားဖော်ပြသည်။

ယူကရိန်းရှိ ပစ်မှတ်များအနက် နိုင်ငံ၏ အရှေ့ဘက်ခြမ်းသို့ အင်အား အလုံးအရင်းဖြင့် ရုရှား ချေမှုန်းရန် ကြံရွယ်လာချိန်၌ “ပူတင်၏ တပ်များသည် ဓာတုလက်နက် သုံးလာနိုင်ကြောင်း” ယူကရိန်းသမ္မတက သတိပေးခဲ့သည်။

ထူးခြား ဖြစ်စဉ်အနေဖြင့် မာရီယူပေါလ်မြို့တွင် အဆိပ်ရှိသော အရာဝတ္ထုများ ကောင်းကင်မှ ကျလာခဲ့ကြောင်း ယူကရိန်း တပ်ရင်း တစ်ခုထံမှ အတည်မပြုနိုင်သော သတင်းပေးပို့မှု တစ်ခုအပေါ် အနောက်အုပ်စုနိုင်ငံများမှ အစိုးရအရာရှိများက စုံစမ်း စစ်ဆေးနေကြောင်း သိရသည်။

ကိယက်ဗ်မြို့တော်သည် စစ်ပွဲကာလတလျှောက် အပြင်းထန်ဆုံး တိုက်ခိုက်မှုများကို အရပ်သားများ ရင်ဆိုင်ခံစား နေရသည် ကို မြင်တွေ့နေရသော်လည်း ရုရှားတပ်ဖွဲ့များက ၎င်းတို့သိမ်းပိုက်နိုင်ရန် ကြည်းကြောင်း၊ ရေကြောင်းနှင့် လေကြောင်း တိုက် ခိုက် နေစဉ်အတွင်း မြို့တော်အတွင်း ဖြစ်ပျက်နေသမျှ သတင်းအမှောင်ချ၍ ပိတ်ဆို့ထားခဲ့သည်။

ဧပြီ ၁၂ ရက် (ယနေ့) အေပီသတင်းဌာနနှင့် တယ်လီဖုန်း ဆက်သွယ်ပြောဆိုရာတွင် မာရီယူပေါလ်မြို့တော်ဝန် ဗာဒိုင်ဘွိုင်ချန် ကိုက “ရုရှားတပ်များသည် ၎င်းတို့ရက်ရက်စက်စက် သတ်ဖြတ်မှုများကို ဖုံးကွယ်ရန် တစိတ်တပိုင်း လုပ်ဆောင်ချက်အနေဖြင့် လူသားချင်းစာနာမှု ကူညီရေးယာဉ်တန်းများကို ရက်သတ္တတစ်ပတ်ကြာ တားဆီးကန့်သတ်နေကြောင်း” စွပ်စွဲခဲ့သည်။

မာရီယူပေါလ် တစ်မြို့တည်းတွင် သေဆုံးသူ ၂ သောင်းကျော်အထိ ရှိနိုင်ကြောင်း ၎င်းက ဆက်လက် ပြောကြားခဲ့သည်။

ရုရှားတပ်များသည် အဝိုင်းခံခဲ့ရသည့် မြို့မှ သေဆုံးသူများ၏ ရုပ်အလောင်းများကို အစဖျောက် မီးရှို့ရန်အတွက် ယာဉ်ဖြင့် သယ်ယူနိုင်သော မိုဘိုင်းမီးသင်္ဂြိုဟ်စက်များကို အသင့်ယူဆောင်လာကြကြောင်း ယူကရိန်းဘက်မှ စွပ်စွဲချက် တစ်ရပ်အနေ ဖြင့် ဘွိုင်ချန်ကိုက ပြောကြားခဲ့သည်။

ထို့ပြင် ဂိုဒေါင်များနှင့် ရေခဲသေတ္တာများရှိသည့် ဈေးဝယ်စင်တာကြီး တစ်ခုထံသို့လည်း အလောင်းအများအပြားကို ရုရှား တပ်သားများ ယူဆောင်သွားကြကြောင်း ၎င်းက ဖြည့်စွက်ပြောကြားခဲ့သည်။

“သူတို့ဆီက ရွေ့လျား မီးသင်္ဂြိုဟ်နိုင်တဲ့ စက်တွေက ထရပ်ကားပုံစံနဲ့ ရောက်လာတာဗျ။ အဲဒီစက်ကို ဖွင့်ကြည့်လိုက်ရင် ပိုက်လိုင်းတစ်ခုကို ခင်ဗျား တွေ့လိမ့်မယ်။ အဲဒီအထဲ ရောက်သွားတဲ့ အလောင်းတွေကတော့ ပြာကျကုန်ပြီ” ဟု ၎င်းက အေပီသို့ ရှင်းပြခဲ့သည်။

Source: AP

CNI News

၂၀၂၂ ခုနှစ်၊ ဧပြီ ၉

မိမိတို့ ညီနောင်မဟာမိတ်အဖွဲ့အနေဖြင့် မိမိတို့အကြား အားကောင်းစွာ ရရှိထားပြီးဖြစ်သည့် နိုင်ငံရေး၊ စစ်ရေး ပူးပေါင်း ဆောင်ရွက်မှုတို့ကို မိမိတို့၏ အန္တိမပန်းတိုင် မရောက်မချင်း လက်တွဲဆောင်ရွက်သွားမည်ဟု TNLA၊ MNDAA ပူးတွဲ၍ AA ထံပေးပို့သော သဝဏ်လွှာတွင် ပြောထားသည်။

TNLA နှင့် MNDAA ပူးတွဲ၍ ရက္ခိုင့်တပ်တော်(AA)၏ ဧပြီ ၁၀ ရက်နေ့တွင် ကျရောက်မည့် (၁၃)နှစ်ပြည့် ရက္ခိုင့်တပ်တော် နေ့သို့ ပေးပို့သော် သဝဏ်လွှာမှာ အထက်ပါအတိုင်း ပြောကြားထားခြင်း ဖြစ်သည်။

TNLA ၊ MNDAA တို့က “ မိမိတို့ ညီနောင်မဟာမိတ်အဖွဲ့အနေဖြင့် မိမိတို့အကြား အားကောင်းစွာ ရရှိထားပြီးဖြစ်သည့် နိုင်ငံရေး၊ စစ်ရေး ပူးပေါင်း ဆောင်ရွက်မှုတို့ကို မိမိတို့၏ အန္တိမပန်းတိုင် မရောက်မချင်း လက်တွဲဆောင်ရွက်သွားမည်”ဟု ပြောသည်။

ထို့နောက် မိမိတို့ ညီနောင်မဟာမိတ်(၃)ဖွဲ့တို့သည် ခက်ထန်ကြမ်းတမ်းသော နိုင်ငံရေး၊ စစ်ရေး အကျပ်အတည်းတို့ကို စုပေါင်းဖြတ်ကျော်နိုင်ခဲ့ကြပြီး မိမိတို့ လိုအပ်သော အင်အားတို့ကို ပိုမိုခိုင်မာအောင် တည်ဆောက်ခြင်း၊ မိမိတို့၏ သက်ဆိုင် ရာ လူထုကို ကာကွယ်စောင့်ရှောက်မှုများ ပြုလုပ်နိုင်ခြင်းတို့သည် ညီနောင် မဟာမိတ်အဖွဲ့တို့၏ ညီညွတ်မှု အသီးအပွင့် များ ဖြစ်ကြောင်း ပူးတွဲသဝဏ်လွှာတွင် ဖော်ပြထားသည်။

အလားတူ ညီနောင်မဟာမိတ် အဖွဲ့အစည်းများအနေဖြင့် မိမိတို့အကြား ယခင်ရရှိထားပြီး စည်းလုံးညီညွတ်မှု အပါအဝင် ရက္ခိုင်၊ တအာင်း၊ ကိုးကန့် တိုင်းရင်းသားလူမျိုးအကြား အပြန်အလှန်လေးစားမှု၊ အသိအမှတ်ပြုမှုတို့ကို ဆက်လက်၍ ခိုင်မြဲ လာစေရန် ပြုလုပ်သွားမည်ဟု သန္နိဋ္ဌာန်ချထားပါကြောင်း TNLA နှင့် MNDAA တို့က ပြောသည်။

AA ၊ TNLA၊ MNDAA တို့သည် နိုင်ငံရေး၊ စစ်ရေး မဟာမိတ်များအဖြစ် ဖွဲ့စည်းထားပြီး တပ်မတော်နှင့် ရှမ်းပြည်နယ်၊ ရခိုင် ပြည်နယ်တို့မှာ ၂၀၁၅ ခုနှစ်ကနေ ၂၀၂၀ ခုနှစ်အထိ တိုက်ပွဲများ မကြာခဏ ဖြစ်ပွားခဲ့ကြသည်။

တခြား တစ်ဖက်မှာလည်း AA၊ MNDAA၊ TNLA တို့သည် တပ်မတော်နှင့် အပစ်အခတ်ရပ်စဲနိုင်ရေး ငြိမ်းချမ်းရေး ဆွေးနွေမှု များ ပြုလုပ်မှုရှိသည်။

CNI News

၂၀၂၂ ခုနှစ်၊ ဧပြီ ၇

နိုင်ငံရေးအရ ဘက်စုံဖိအားပေးမှု အသွင်ဆောင်မှုအပေါ် စိန်ခေါ်မှုတစ်ရပ်အနေဖြင့် အောင်မြင်စွာ ရင်ဆိုင်ဖြေရှင်း ကျော်လွှား နေရသည်ဟု နစက၏ ဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်းက ပြောသည်။

ယနေ့(ဧပြီ ၇ ရက်) နောင်ဝိုး၊ ကျိုင်းခမ်း၊ မိုင်းပျဉ်းနှင့်တောင်ကြီး တပ်နယ်ရှိ အရာရှိ၊ စစ်သည်၊ မိသားစုများဖြင့် တွေ့ဆုံစဉ် အထက်ပါအတိုင်း ၎င်းက ပြောကြားခဲ့ခြင်းဖြစ်သည်။

မိမိတို့ နိုင်ငံသည် လွတ်လပ်၍ အချုပ်အခြာအာဏာပိုင်နိုင်ငံဖြစ်ကြောင်း၊ နိုင်ငံခြားရေးမူဝါဒအရလည်း လွတ်လပ်၍ တက်ကြွ ပြီး ဘက်မလိုက်သော နိုင်ငံခြားရေးမူဝါဒကို အစဉ်တစိုက်ရပ်တည် လက်ခံကျင့်သုံးခဲ့ကြောင်း ဒုတိယဗိုလ်ချုပ်မှူးကြီးစိုးဝင်းက ပြောသည်။

၎င်းက “ မြန်မာနိုင်ငံ၏ ပထဝီနိုင်ငံရေး အခြေအနေ ဘက်မလိုက်သော နိုင်ငံခြားရေးမူဝါဒကို မြဲမြံစွာ စွဲကိုင်ကျင့်သုံးခြင်း ဖြစ် ကြောင်း၊ အဆိုပါ အချက်အပေါ် နိုင်ငံရေးအရ ဘက်စုံဖိအားပေးမှု အသွင်ဆောင်မှုများအပေါ် စိန်ခေါ်မှုတစ်ရပ်အနေဖြင့် အောင်မြင်စွာ ရင်ဆိုင်ဖြေရှင်းကျော်လွှားနေရကြောင်း၊ ထိုအောင်မြင်စွာ ရင်ဆိုင်ကျော်လွှားနိုင်ရန်မှာ တပ်မတော်သည် နိုင်ငံ တော်ကာကွယ်ရေးအတွက် အဓိက တာဝန်ရှိသည်ကို ယုံကြည်ချက်၊ ခံယူချက် ပြည့်ဝစွာဖြင့် ကာကွယ်စောင့်ရှောက် နေခြင်း ဖြစ်တယ်”ဟု ပြောသည်။

ထိုသို့ ဆောင်ရွက်နိုင်ရန် စွမ်းရည်ရှိပြီး လုံခြုံရေးအသိ၊ လုံခြုံရေးသတိဖြင့် အမြဲအသင့်ဖြစ်နေအောင် လိုအပ်သည်များ အမြဲ တမ်း ပြင်ဆင်နေကြရန်လိုကြောင်း၊ ပြည်ပနိုင်ငံကြီးတချို့နှင့် ပြည်တွင်းအဖွဲ့အစည်း(မူရင်း-အကြမ်းဖက်အဖွဲ့)များသည် နည်း မျိုးစုံသုံးကာ အစိုးရယန္တရား ရပ်တန့်စေရန် ကြိုးပမ်းခဲ့ကြောင်း၊ သို့သော်လည်း ထင်တိုင်းမပေါက်သဖြင့် နိုင်ငံတော်၏ အခိုင် မာဆုံး အင်အားစုဖြစ်သည့် တပ်မတော်ကို ဖြိုခွဲရန် အစိုးရအဆက်ဆက် ကြိုးပမ်းနေခြင်းဖြစ်ကြောင်း၊ ဆက်လက်၍လည်း သွေးခွဲမှုမျိုးစုံ ပြုလုပ်လာနိုင်သဖြင့် တပ်မတော်သား မိသားစုဝင်များအနေဖြင့် အထက်အောက် အပြန်အလှန် လေးစား ယုံကြည်မှုဖြင့် ကိုင်းကျွန်းမှီ ကျွန်းကိုင်းမှီ၊ အေးအတူ ပူအမျှစိတ်ဓာတ်ဖြင့် စည်းလုံးညီညွတ်စွာ နေထိုင်ကြရန်လိုကြောင်း နစကဒုဥက္ကဋ္ဌက ပြောသည်။

အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလက တပ်မတော်၏ လေယာဉ်၊ ရေယာဉ်၊ စစ်သုံးယာဉ်များ ကို ဖျက်စီး-ယူဆောင်လာခြင်းများ ပြုလုပ်ပါက သိန်း ၂၀၀၀ မှ သိန်း ၁ သောင်းထိ ဆုချီးမြှင့်မည်ဟု ယနေ့(ဧပြီ ၇ ရက် )တွင် ထုတ်ပြန်ခဲ့သည်။

အလားတူ ဥရောပသမဂ္ဂ(EU)နှင့် အမေရိကန် အပါအဝင် နိုင်ငံတကာက တပ်မတော် ထိပ်သီးခေါင်းဆောင်များ၊ နစက အဖွဲ့ ဝင်များ၊ တပ်မတော်ပိုင် လုပ်ငန်းများ၊ တပ်မတော်နှင့်နီးစပ်သူများကို ပိတ်ဆို့ အရေးယူမှုများ ပြုလုပ်လျက်ရှိသည်။

ထို့နောက် ဒီမိုကရေစီအင်အားစုများနှင့် တိုင်းရင်းသား လက်နက်ကိုင်တချို့ ပူးပေါင်း၍ တပ်မတော် ဖြုတ်ချရေး လက်နက် ကိုင် တော်လှန်တိုက်ခိုက်လျက်ရှိခြင်းကြောင့် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကယားပြည် နယ်၊ ကရင်ပြည်နယ်တို့တွင် တိုက်ပွဲများ ဖြစ်ပွားလျက်ရှိနေပြီး တရားဥပဒေစိုးမိုးမှု အားနည်းလျက်ရှိနေသည်။

အဆိုပါ အခြေအနေများကြောင့် မြန်မာနိုင်ငံအတွင်းမှာ လူမှုရေး၊ စီးပွားရေး၊ ပညာရေး၊ ကျန်းမာရေး စသည့် အခန်းကဏ္ဍများ ဖွံ့ဖြိုးမှု နိမ့်ကျနေသလို စက်သုံးဆီနှင့် စားသောက်ကုန် ဈေးနှုန်းများလည်း အဆမတန်မြင့်တက်မှုဖြင့် ရင်ဆိုင်နေကြရသည်။

CNI News

၂၀၂၂ ခုနှစ်၊ ဧပြီ ၇

ကယားပြည်နယ်တွင် တိုက်ပွဲများ ဆက်လက်ဖြစ်ပွားနေခြင်းကြောင့် စစ်ရေးအရှိန် လျော့ကျသွားခြင်း မရှိသေးကြောင်း ကရင်နီအမျိုးသား တိုးတက်ရေးပါတီ(KNPP) အတွင်းရေးမှူး-၁ ခူဒန်နီရယ်က CNI သတင်းဌာနသို့ ပြောသည်။

လက်ရှိ ကယားပြည်နယ်အတွင်း ဖြစ်ပွားနေသည့် တပ်မတော်နှင့် ကယားပြည်သူ့ကာကွယ်ရေးတပ်ဖွဲ့များကြား တိုက်ပွဲ ဖြစ်ပွားမှု အခြေအနေနှင့် ပတ်သက်၍ ၎င်းက အထက်ပါအတိုင်း ပြောကြားခြင်း ဖြစ်သည်။

KNPP အတွင်းရေးမှူး (၁) ခူဒန်နီရယ်က “လောလောဆယ်တော့ သူတို့ လေယာဉ်နဲ့ မလုပ်တော့ဘူး စစ်ရေးနည်းနည်း အရှိန်လျော့လာတယ်လို့ ပြောလို့ရတယ်၊ သို့သော် မြေပြင်မှာတော့ ပျောက်ကြားစစ်တွေရှိနေတယ်၊ နောက်မှ စုဖွဲ့မှု အသစ်တွေ လုပ်နေတယ် အဲဒါတွေကတော့ စစ်ရေးအရှိန်ကတော့ တူတူပဲ ရှိနေတာပေါ့”ဟု ပြောသည်။

ကရင်နီအမျိုးသားတိုးတက်ရေးပါတီ (KNPP)သည် ကရင်နီအမျိုးသားများ ကာကွယ်ရေးတပ်ဖွဲ့(KNDF) အပါအဝင် ပြည်သူ့ ကာကွယ်ရေးတပ် (PDF) များဖြင့် ပူးပေါင်းကာ ကယားပြည်နယ်နှင့် ရှမ်းပြည်နယ်(တောင်ပိုင်း) မိုးဗြဲမြို့နယ်၊ ဖယ်ခုံမြို့နယ် တို့တွင် တပ်မတော်ကို တိုက်ခိုက်လျက်ရှိသည်။

မြို့တွင်းလှုပ်ရှားနေသော ကယားဒေသခံကာကွယ်ရေးတပ်ဖွဲ့

လက်ရှိတွင် တပ်မတော်က အင်အားသုံး တိုက်ခိုက်မှုကြောင့် ပြည်သူ့ကာကွယ်ရေးအဖွဲ့များ၏ စခန်းများ ဆုတ်ခွာပေးနေ ရကြောင်း၊ ထိုသို့ ဆုတ်ပေးရခြင်းကလည်း အင်အားမမျှ၍ ယာယီဆုတ်ပေးခြင်းသာဖြစ်ကြောင်း၊ မြေပြင်တွင် ဆက်လက် တိုက်ပွဲဝင်နေကြောင်း KNPP အတွင်းရေးမှူး (၁) ခူဒန်နီရယ်က ပြောသည်။

ခူဒန်နီရယ်က “လက်ရှိ အနေအထားအရ သူတို့မှာ အင်အားပိုများတယ်၊ သူတို့သုံးတဲ့ လက်နက်တွေက ဟိုးလေယာဥ်အထိ အသုံးပြုလာတော့ ကျနော်တို့ဘက်က ယာယီဆုတ်ပေးတဲ့ အနေအထားမျိုး၊ ယာယီစွန့်ခွာပေးတဲ့ အနေအထားမျိုးပဲ ရှိပါ တယ်၊ တိုက်ပွဲတွေကတော့ ဆက်ဖြစ်နေမှာပဲ သူတို့က တိုက်အားဖြည့်လေလေ၊ လူထုတွေကို သတ်ဖြတ်မှု လုပ်လေလေ လုပ်နေသရွေ့ကတော့ တိုက်ပွဲတွေ ဆက်ဖြစ်နေမှာပဲ” ဟု ပြောသည်။

လက်ရှိတွင်တော့ ဒီမောဆိုးနှင့် မိုးဗြဲမြို့နယ်များသည် စစ်ရေး အပြင်းထန်ဆုံး မြို့နယ်များဖြစ်ကြောင်း၊ လူနေအိမ်များပင် မရှိသလောက် အခြေအနေမျိုးဖြစ်နေကြောင်း မိုးဗြဲဒေသခံ ကိုမင်းမင်း (အမည်လွှဲ) ကပြောသည်။

မြို့တွင်းလှုပ်ရှားနေသော ကယားဒေသခံကာကွယ်ရေးတပ်ဖွဲ့

“လမ်းတစ်လျှောက် မြို့ပျက်ကြီးတွေလိုပဲ၊ တချို့လမ်းတွေဆို လုံခြုံရေးအရ သွားလို့မရဘူး၊ မြို့အပြင်က ရွာတွေဆိုလည်း လူမနေတော့ဘူး အကုန်ပြေးကြတာပေါ့၊ အခုက PDF တွေ သိပ်မထိန်းချုပ် နိုင်တော့ဘူးဆိုပေမယ့် စစ်ကောင်စီ တပ်တွေ လည်း သေချာ ထိန်းချုပ် ထားနိုင်တာမျိုးတော့ မဟုတ်ဘူး၊ အပြန်အလှန် ပြင်ဆင်နေတဲ့ အနေအထားမျိုးလို့ ထင်တယ်” ဟု ၎င်းက ပြောသည်။

KNPP၊ KNDF ပူးပေါင်းတပ်ဖွဲ့များနှင့် တပ်မတော်ကြား ပြီးခဲ့သည့် ဧပြီ ၅ ရက်နေ့အထိ ဖရူဆိုမြို့နယ်အတွင်းမှာ တိုက်ပွဲ များ ဖြစ်ပွားခဲ့ကြောင်း၊ ဖရူဆိုမြို့နယ်တွင် အသုံးပြုနေသော လမ်းမကြီးတစ်လျှောက်တွင် ပြည်သူများ သွားလာခြင်း မပြု လုပ်ရန် KNDF က သတိပေးချက် ထုတ်ပြန်ထားသည်။

ကယားပြည်နယ်တွင် ပြီးခဲ့သည့် ၂၀၂၁ ခုနှစ်၊ မေလက စတင်၍ တပ်မတော်နှင့် KNPP တို့အကြား တိုက်ပွဲများ စတင် ဖြစ်ပွားခဲ့ခြင်းဖြစ်ကြောင်း၊ လက်ရှိတွင် တိုက်ပွဲကာလ တစ်နှစ်ခန့် ကြာမြင့်နေပြီ ဖြစ်သည်။

CNI News

၂၀၂၂ ခုနှစ်၊ ဧပြီ ၆

နိုင်ငံရေးပါတီအစုအဖွဲ့၏ အလုပ်အဖွဲ့မှ အဆိုပြုသည့် ၂၀၀၈ ဖွဲ့စည်းပုံအခြေခံဥပဒေမှ ပြင်ဆင်လိုသည့် အချက်များအား အမျိုးသားစည်းလုံးညီညွတ်ရေးနှင့်ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ(NSPNC)နှင့် UPDJC နိုင်ငံရေးပါတီ များအစုအဖွဲ့၏ အလုပ်အဖွဲ့တို့ တွေ့ဆုံ ဆွေးနွေးခဲ့ကြသည်။

ယနေ့(ဧပြီ ၆ ရက်) နေပြည်တော်မှာ NSPNC နှင့် ပြည်ထောင်စုငြိမ်းချမ်းရေးဆွေးနွေးမှုဆိုင်ရာပူးတွဲကော်မတီ(UPDJC)၏ နိုင်ငံရေးပါတီများအစုအဖွဲ့၏ အလုပ်အဖွဲ့တို့ တွေ့ဆုံ ဆွေးနွေးခဲ့ကြသည်။

နစက-က “ငြိမ်းချမ်းရေး လုပ်ငန်းစဉ်ဆိုင်ရာ ကိစ္စများနှင့် နိုင်ငံရေးပါတီ အစုအဖွဲ့၏ အလုပ်အဖွဲ့မှအဆိုပြုသည့် ၂၀၀၈ ခုနှစ် ဖွဲ့စည်းပုံ အခြေခံဥပဒေမှ ပြင်ဆင်လိုသည့် အချက်များအား အလွတ်သဘော ဆွေးနွေးကြသည်”ဟု ထုတ်ပြန်ခဲ့သည်။

သို့သော် မည်သည့် ပုဒ်မများကို ဆွေးနွေးခဲ့ကြကြောင်းကိုတော့ ထုတ်ပြန်ချက်တွင် ဖော်ပြမထားပေ။

NSPNC နှင့် နိုင်ငံရေးပါတီအစုအဖွဲ့၏ အလုပ်အဖွဲ့တို့ တွေ့ဆုံ ဆွေးနွေးမှုတွင် NSPNC ကို ဒုတိယဗိုလ်ချုပ်ကြီး ရာပြည့်က ဦးဆောင်ခဲ့ပြီး နိုင်ငံရေးပါတီအစုအဖွဲ့၏ အလုပ်အဖွဲ့ကိုတော့ ဦးစိုင်းအိုက်ပေါင်းက ဦးဆောင်ခဲ့ကြောင်း သိရသည်။

UPDJC နိုင်ငံရေးပါတီအစုအဖွဲ့ကို ၂၀၂၁ ခုနှစ်၊ နိုဝင်ဘာလက မြန်မာနိုင်ငံအတွင်းရှိ တရားဝင် နိုင်ငံရေးပါတီ ၉၀ ကျော် အနက် နိုင်ငံရေးပါတီ ၅၂ ပါတီမှ ကိုယ်စားလှယ် ၁၆ ဦးကို ရွေးချယ်၍ ယာယီ ၄ လသက်တမ်းဖြင့် ဖွဲ့စည်းခဲ့သည်။

လက်ရှိတွင် ယာယီ ၄ လသက်တမ်း ပြည့်သွားပြီဖြစ်သည့်အတွက် ၂ လသက်တမ်းတိုးထားကြောင်း သိရသည်။

အဆိုပါ UPDJC နိုင်ငံရေးပါတီ အစုအဖွဲ့သည် ရပ်တန့်နေသော ငြိမ်းချမ်းရေး လုပ်ငန်းစဉ်များနှင့် နိုင်ငံရေး ဆွေးနွေးပွဲများ ပြန်လည် ဆောင်ရွက်နိုင်ရေး ကြိုးပမ်းလျက်ရှိကြောင်း သိရသည်။

CNI News
၂၀၂၂ ခုနှစ်၊ ဧပြီ ၅

တပ်မတော်မှ အာဏာသိမ်းမှုကြောင့် လူမှုဒုက္ခ၊ စီးပွားရေးပျက်စီးသည့်ဒုက္ခ၊ ကျောင်းသား/သူများ၊ ကလေးများ၏ ပညာရေး အနာဂတ်ပျောက်ဆုံးမှုများ ဖြစ်ပေါ်ခံစားနေပြီး ပျက်သုဉ်းနိုင်ငံသို့ ဦးတည်နေပြီဟု အမျိုးသားညီညွတ်ရေး အစိုးရ(NUG)၏ ယာယီသမ္မတ ဒူဝါလရှီးလက ပြောသည်။

ယနေ့(ဧပြီ ၅ ရက်)နံနက်ပိုင်းက ကျင်းပခဲ့သော NUG ၏ (၄၉)ကြိမ်မြောက် အစည်းအဝေးတွင် ၎င်းက အထက်ပါ အတိုင်း ပြောခဲ့ခြင်း ဖြစ်သည်။

ဒူဝါလရှီးလက “စစ်တပ်မှ အာဏာသိမ်းမှုကြောင့် လူမှုဒုက္ခ၊ စီးပွားရေးပျက်စီးတဲ့ဒုက္ခသည်၊ ကျောင်းသား ကျောင်းသူများ၊ ကလေးများရဲ့ ပညာရေးအနာဂတ် ပျောက်ဆုံးမှုများ ဖြစ်ပေါ်ခံစားနေပြီး ပျက်သုဉ်းနိုင်ငံသို့ ဦးတည်နေပြီဖြစ်တယ်။ ခေတ် အဆက်ဆက် စစ်တပ်၏ တကိုယ်ကောင်းဆန် အာဏာမက်မောမှုကြောင့် ပြည်ထောင်စုမြန်မာနိုင်ငံရဲ့ ကံကြမ္မာဟာ ဆင်း ရဲတွင်း နက်သည်ထက်နက်လာပြီး ကမ္ဘာ့အလယ်မှာ မျက်နှာပျက်နေကြရပါတယ်”ဟု ပြောသည်။

ထို့နောက် လာမည့် ဧပြီ ၁၆ ရက်တွင် NUG ကို ဖွဲ့စည်းခဲ့ခြင်း ၁ နှစ်ပြည့်တော့မည့် အချိန်ဖြစ်ကြောင်း၊ ထိုအချိန်မှာ မိမိတို့ အစိုးရအဖွဲ့မှ မိမိတို့၏ လုပ်ဆောင်ချက်များမှာ အားသာချက်၊ အားနည်းချက်များကို ပြန်လည် အစီအရင်ခံ တင်ပြမှုများ ပြုလုပ်ကြမှာ ဖြစ်ကြောင်း ၎င်းက ပြောသည်။

NUG ၏ ဝန်ကြီးချုပ် မန်းဝင်းခိုင်သန်းက “လူတစ်စုရဲ့ အတ္တကြီးမှု၊ ရက်စက်မှုဒဏ်တွေကို နည်းမျိုးစုံနဲ့ခံစား နေခဲ့ကြရတာ ၁ နှစ်ကျော် ကြာလာခဲ့ပြီဖြစ်တယ်။ နိုင်ငံလည်း အဘက်ဘက်က ယိုယွင်းပြီး ခက်ခဲတဲ့ အခြေအနေတွေကို ရင်ဆိုင်နေရ သလို ပြည်သူတွေလည်း အတော်ဒုက္ခများကြတယ်”ဟု ပြောသည်။

ထို့နောက် မိမိတို့ တော်လှန်ရေး အောင်မြင်ဖို့ အမြတ်ထုတ်နိုင်ရန်လိုအပ်ပြီး အခြေအနေများကိုလည်း ဗျူဟာကျကျ စဉ်းစား သုံးသပ်ကြပြီး ချဉ်းကပ်ကြဖို့လိုကြောင်း ၎င်းက ပြောသည်။

လက်ရှိ မြန်မာနိုင်ငံတွင် တပ်မတော်က ၂၀၂၀ အထွေထွေရွေးကောက်ပွဲ၌ NLD အစိုးရမှ မဲစာရင်း အငြင်းပွားမှုကို မဖြေရှင်း ဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ နိုင်ငံတော်ကို အရေးပေါ် ကြေညာ၍ နစကကို ဖွဲ့စည်းပြီး အုပ်ချုပ်လျက် ရှိနေ သည်။

အဆိုပါ တပ်မတော်၏ ဆောင်ရွက်ချက်ကို ဒီမိုကရေစီအင်အားစုများက နိုင်ငံတဝန်း ကန့်ကွက် ဆန္ဒပြခဲ့ကြသလို NUG မှ တပ်မတော်အား ပြန်လည် ဖြုတ်ချနိုင်ရေး လက်နက်ကိုင် တိုက်ခိုက်လျက်ရှိနေသည်။

CNI News

၂၀၂၂ ခုနှစ်၊ ဧပြီ ၅

လူပုဂ္ဂိုလ်ကို တိုက်ရိုက် ရည်ရွယ်တိုက်ခိုက်ခြင်းသည် အဓိပ္ပာယ်ရှိကောင်းရှိမည်ဖြစ်သော်လည်း တရားမဲ့ လက်နက်မဲ့ မသက်ဆိုင်သူများ၊ အဖွဲ့အစည်းများနှင့် လူပုဂ္ဂိုလ်များကို တိုက်ခိုက်ခြင်းသည် လူသားမဆန်သော ပြစ်မှုကျူးလွန်မှုပင် ဖြစ်ကြောင်း နစက ဒုဥက္ကဋ္ဌ ဒုဗိုလ်ချုပ်မှူးကြီး စိုးဝင်းက ပြောသည်။

ယနေ့(ဧပြီ ၅ ရက်) ဗထူးတပ်နယ်မှ သင်တန်းနည်းပြများ၊ အရာရှိ၊ စစ်သည်၊ မိသားစုများနှင့် တွေ့ဆုံစဉ် ၎င်းက အထက်ပါ အတိုင်း ပြောခဲ့ခြင်း ဖြစ်သည်။

ဒုဗိုလ်ချုပ်မှူးကြီးစိုးဝင်းက “မိမိဆန္ဒနှင့်မကိုက်ညီ၍ မကျေနပ်ပါက အဆိုပါအဖွဲ့အစည်း၊ လူပုဂ္ဂိုလ်ကို တိုက်ရိုက် ရည်ရွယ် တိုက်ခိုက်ခြင်းသည် အဓိပ္ပာယ်ရှိကောင်း ရှိမည်ဖြစ်သော်လည်း တရားမဲ့ လက်နက်မဲ့ မသက်ဆိုင်သူများ၊ အဖွဲ့အစည်းများ နှင့် လူပုဂ္ဂိုလ်များကို တိုက်ခိုက်ခြင်းသည် လူသာမဆန်သော ပြစ်မှုကျူးလွန်မှုပင်ဖြစ်တယ်”ဟု ပြောသည်။

အဆိုပါ တရားမဲ့ လုပ်ဆောင်နေသူများကို လုံခြုံရေးတပ်ဖွဲ့ဝင်များ၊ နိုင်ငံ့ဝန်ထမ်းများ၊ တိုင်းရင်းသား ပြည်သူများနှင့်အတူ လက်တွဲ ပူးပေါင်း၍ ဆက်လက်ဖယ်ရှား ရှင်းလင်းသွားမည်ဖြစ်ကြောင်း၊ ပြည်သူများလိုလားသည့် လွတ်လပ်၍ တရားမျှတ သော ရွေးကောက်ပွဲအောင်မြင်စွာ ကျင်းပနိုင်ရေး ကြိုးပမ်းဆောင်ရွက်သွားမည်ဖြစ်ကြောင်း ၎င်းက ပြောသည်။

၂၀၂၂ ခုနှစ်၊ ဧပြီ ၄ ရက် ဗထူးတပ်နယ်ရှိ တပ်မတော်(ကြည်း) အရာခံ၊ သင်တန်းသားများကို တွေ့ရစဉ်

တရားမဲ့ လက်နက်မဲ့ မသက်ဆိုင်သူများကို တိုက်ခိုက်ခြင်းဆိုသည်မှာ တပ်မတော်ကိုလည်း မေးခွန်းထုတ်စရာရှိကြောင်း၊ လုံခြုံရေးတပ်ဖွဲ့များက တရားမဲ့ ဖမ်းဆီးမှုများ ရှိခဲ့ခြင်းနှင့် လက်နက်မဲ့ ပြည်သူများကို တိုက်ခိုက်ခဲ့ခြင်းအပေါ် တာဝန်ယူမှု တာဝန်ခံမှုရှိရှိဖြင့် ဖြေရှင်းပေးရန်လိုကြောင်း၊ ရွေးကောက်ပွဲ ကျင်းပပေးမည်ဆိုသော ကတိဖြင့် ပြည်သူလူထုကို ဆွဲဆောင် နိုင်မည်ဟုမထင်မိကြောင်း နိုင်ငံရေးလေ့လာသုံးသပ်သူ တစ်ဦးက ပြောသည်။

၎င်းက “တရားမဲ့ လက်နက်မဲ့သူကို တိုက်ခိုက်မှုလုပ်တာမကောင်းဘူးဆိုတာ မှန်ပါတယ်။ဒါပေမယ့် တပ်မတော်ဘက်က လည်း အဲဒါကို တကယ် လေးလေးနက်နက် အောက်လက်ငယ်သားတွေကို ကိုင်တွယ်ဖို့လိုတယ်။ အောက်ခြေမှာ အားလုံး သိတဲ့အတိုင်းပဲ တရားမဲ့ ပြုကျင့်တာတွေရှိသလို  လက်နက်မဲ့ ပြည်သူတွေကို တိုက်ခိုက်ခဲ့တာတွေလည်းရှိတယ်လေ။ ကိုယ့်ဘက်က အခြေအနေကိုလည်း တာဝန်ယူမှု တာဝန်ခံမှုနဲ့ထိန်းကြောင်းဖို့လိုတယ်။ ပြီးတော့ ရွေးကောက်ပွဲ ကျင်းပပေး မယ်၊ ပြီးရင် နိုင်ငံတဲ့ပါတီကို အာဏာလွှဲပေးမယ်ဆိုတာက ပြည်သူလူထုကို မဆွဲဆောင်ဘူး။ ဘယ်ကာလမှာ ဘယ်ပုဒ်မ တွေပြင်မယ်၊ ဖက်ဒရယ်ပြည်ထောင်စုကို ဘယ်အချိန်မှာ ဘယ်အဆင့်ရောက်အောင် တည်ဆောက်မယ်။ အခု ဘယ် ကာလအတွင်းမှာ စစ်တပ်က နိုင်ငံရေးက ဘယ်အတိုင်းအတာထိ ဆုတ်ပေးမလဲ ဒါတွေ အာမခံ အကောင်အထည်ဖော်ဖို့ လိုပါတယ်”ဟု ပြောသည်။

တပ်မတော်ဖြုတ်ချရေး ကြိုးပမ်းနေသော PDF တပ်ဖွဲ့၀င်များ

ဒုဗိုလ်ချုပ်မှူးကြီးစိုးဝင်းက နိုင်ငံတော်၏အကျိုး၊ တပ်မတော်၏ အကျိုးကို စည်းလုံးညီညွတ်စွာဖြင့် စိန်ခေါ်မှုများနှင့် အခက် အခဲ အမျိုးမျိုးတို့အား အောင်မြင်စွာ ရင်ဆိုင်ကျော်လွှားသွားကြရမည်ဟု ပြောသည်။

လက်ရှိ မြန်မာနိုင်ငံတွင် တပ်မတော်က ၂၀၂၀ အထွေထွေရွေးကောက်ပွဲ၌ NLD အစိုးရမှ မဲစာရင်း အငြင်းပွားမှုကို မဖြေ ရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ နိုင်ငံတော်ကို အရေးပေါ် ကြေညာ၍ နစကကို ဖွဲ့စည်းပြီး အုပ်ချုပ်လျက် ရှိနေသည်။

အဆိုပါ တပ်မတော်၏ ဆောင်ရွက်ချက်ကို ဒီမိုကရေစီအင်အားစုများက နိုင်ငံတဝန်း ကန့်ကွက် ဆန္ဒပြခဲ့ကြသလို တပ်မတော်အား ပြန်လည် ဖြုတ်ချနိုင်ရေး လက်နက်ကိုင် တိုက်ခိုက်လျက်ရှိနေသည်။

ထို့နောက် လက်နက်ကိုင် ပဋိပက္ခများ နိုင်ငံအနှံ့ ဖြစ်ပွားလာခြင်းနှင့်အတူ နိုင်ငံသား တချို့မှာ ဒလန်ဟု စွပ်စွဲခံရပြီး သတ်ဖြတ်ခံရမှုများ ကြုံတွေ့နေကြရသည်။

CNI News

၂၀၂၂ ခုနှစ်၊ ဧပြီ ၄

ပြည်ပနိုင်ငံကြီး တချို့သည် ပထဝီနိုင်ငံရေးအရ သြဇာလွှမ်းမိုးနိုင်ရေး ကြိုးပမ်းခဲ့ရာ တပ်မတော်၏ စည်းလုံးညီညွတ်မှု စွမ်း အားကို ဖြိုခွဲရန် ဦးတည်ကြိုးပမ်းလာခဲ့ကြောင်း နစကဒုဥက္ကဋ္ဌ ဒုတိယတပ်မတော်ကာကွယ်ရေးဦးစီးချုပ် ဒုဗိုလ်ချုပ်မှူးကြီး စိုးဝင်းက ပြောသည်။

ယနေ့ (ဧပြီ ၄ ရက်) ဗထူးတပ်နယ်ရှိ တပ်မတော်(ကြည်း) အရာခံနှင့် အကြပ်ကြီး သင်ကျောင်းတွင် သင်တန်းသားများနှင့် တွေ့ဆုံစဉ် အထက်ပါအတိုင်း ၎င်းက ပြောကြားခဲ့ခြင်း ဖြစ်သည်။

ဒုဗိုလ်ချုပ်မှူးကြီးစိုးဝင်းက “ပြည်ပနိုင်ငံကြီးတချို့ အနေဖြင့် ပထဝီနိုင်ငံရေးအရ သြဇာလွှမ်းမိုးနိုင်ရေး ကြိုးပမ်းခဲ့ရာ EAOs တချို့ အပါအဝင် အကြမ်းဖက် အဖွဲ့အမျိုးမျိုးက နည်းမျိုးစုံဖြင့် ထောက်ပံ့မှုအမျိုးမျိုးဖြင့် သိမ်းသွင်း၍ ဖောက်ခွဲ ဖျက်ဆီး ရေး သင်တန်းများကို ပြုလုပ်၍ အစိုးရရပ်တည်၍ မရအောင်ဆောင်ရွက်လာကြောင်း၊ သို့သော် ပြည်သူလူထု၊ သစ္စာရှိ နိုင်ငံ့ဝန် ထမ်းများ လုံခြုံရေးအဖွဲ့ဝင်များ၏ စည်းလုံးညီညွတ်မှုဖြင့် ကြံ့ကြံ့ခံကာ ရင်ဆိုင်ကျော်လွှားနိုင်ခဲ့ပါကြောင်း။ နည်းမျိုးစုံဖြင့် အလုံးစုံပျက်သုဉ်းရေး ဆောင်ရွက်မှုမအောင်မြင်ခဲ့ကြောင်း။ ၂၀၂၂ ခုနှစ်တွင်လည်း အထက်ပါလုပ်ရပ်များအပြင် တပ်မတော်၏ စည်းလုံးညီညွတ်မှု စွမ်းအားကို ဖြိုခွဲရန် ဦးတည်ကြိုးပမ်းလာခဲ့တယ်”ဟု ပြောသည်။

ပြည်ပနိုင်ငံကြီးတချို့ဆိုသည်မှာ မည်သည့် နိုင်ငံကို ရည်ညွန်း ပြောကြားသည်ကိုတော့ တိတိကျကျ ပြောမသွားခဲ့ပေ။

တော်လှန်ရေး(မူရင်း-အကြမ်းဖက်)အဖွဲ့အစည်း အသီးသီးအနေဖြင့် ပြည်ပနိုင်ငံကြီးတချို့၏ နယ်ရုပ်များသဖွယ် ခိုင်းစေသည့် အတိုင်း အခိုင်မာဆုံး Institution တစ်ခုဖြစ်သည့် တပ်မတော်ကို ဖြိုခွဲရန် ကြိုးပမ်းလာခြင်းသာဖြစ်ကြောင်း၊ တပ်မတော် အပေါ်တွင် နိုင်ငံကြီးတချို့၏ ခြိမ်းခြောက်မှု၊ ဝင်ရောက်စွက်ဖက်မှု၊ လူမျိုးသုဉ်းသတ်ဖြတ်သူများအဖြစ် စွပ်စွဲမှု များဖြင့် ဖိအား ပေးနှောင့်ယှက် နေသော်လည်း တပ်မတော်အနေဖြင့် စုပေါင်းညီညွတ်မှုစွမ်းအားဖြင့် အဖက်ဖက်မှ အောင်မြင်စွာ ကျော်ဖြတ် သွားမည်ဟု ၎င်းက ပြောသည်။

တပ်မတော်၏ အဓိကတာဝန်သည် နိုင်ငံတော်ကာကွယ်ရေးတာဝန်ဖြစ်ပြီး ၂၀၂၀ ပြည့်နှစ် ရွေးကောက်ပွဲတွင် မဲမသမာမှု များမှတဆင့် နိုင်ငံတော်အာဏာအရပ်ရပ်ကို အဓမ္မနည်းဖြင့် ရယူရန် ကြိုးပမ်းလာမှုအပေါ် ဒီမိုကရေစီ လမ်းကြောင်းပေါ်မှ သွေဖယ်တိမ်းစောင်းမှု မဖြစ်ပေါ်စေရေး တပ်မတော်က ၂၀၀၈ ဖွဲ့စည်းပုံအခြေခံဥပဒေ နှင့်အညီ အရေးပေါ်ကာလ ပြဋ္ဌာန်း ချက်ပါအတိုင်း တာဝန်ယူထမ်းဆောင်ခဲ့ရခြင်းဖြစ်သည်ဟု နစကဒုဥက္ကဋ္ဌက ပြောသည်။

၎င်းက “အရေးပေါ်ကာလ ၁ နှစ်ကျော်ကာလအတွင်း အခက်အခဲ အမျိုးမျိုး၊ စိန်ခေါ်မှုအမျိုးမျိုးတို့ကို သစ္စာရှိဝန်ထမ်းများ၊ လုံခြုံရေး တပ်ဖွဲ့ဝင်များနှင့် တိုင်းရင်းသားပြည်သူများ၏ ပူးပေါင်းပါဝင်မှုတို့ဖြင့် ဖြတ်သန်းကျော်လွှားခဲ့ပြီးဖြစ်တယ်”ဟု ပြောသည်။

၂၀၂၁ ခုနှစ်၊ မေလက ဒီးမော့ဆိုမြို့နယ်ရှိ စစ်တပ်၏ ဂိတ်စခန်းတစ်ခုကို ပြည်သူ့ကာကွယ်ရေးတပ်ဖွဲ့က ပူးပေါင်းသိမ်းယူခဲ့စဉ်။ (ဓာတ်ပုံ − Supplied)

လက်ရှိတွင် တပ်မတော်သည် ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို NLD အစိုးရက ဖြေရှင်းခြင်း မပြု လုပ်ဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ နိုင်ငံတော်ကို အရေးပေါ် ကြေညာ၍ နစကကို ဖွဲ့စည်းကာ ဆောင်ရွက် လျက်ရှိသည်။

ထို့နောက် တပ်မတော်ကို ဆန့်ကျင် ကန့်ကွက်ကြောင်း နိုင်ငံအဝန်း ဆန္ဒပြမှုများ ပေါ်ပေါက်ခဲ့ရာ ကြမ်းတမ်းစွာ ဖြိုခွင်မှု ကြောင့် ဆန္ဒပြသူများသည် လက်နက်ကိုင် တော်လှန်ရေးနည်းလမ်းဖြင့် တပ်မတော်အား ပြန်လည် ဖြုတ်ချရန် ယနေ့အထိ ကြိုးပမ်းလျက်ရှိနေသည်။

CNI News

၂၀၂၂ ခုနှစ်၊ ဧပြီ ၂

၂၀၂၃ ခုနှစ်တွင် ကျင်းပရန် ရည်ရွယ်ထားသည့် ရွေးကောက်ပွဲသည် လွတ်လပ်သည့် တရားမျှတသည့် ရွေးကောက်ပွဲ ဖြစ်ရန် အခြေခံအားဖြင့် စာရင်းဇယားမှန်ကန် တိကျရန် အဓိက လိုအပ်ကြောင်း နစကဒုဥက္ကဋ္ဌ ဒုဗိုလ်ချုပ်မှူးကြီးစိုးဝင်းက ပြောသည်။

ဧပြီ ၁ ရက်နေ့က ကျင်းပသည့် ရွေးကောက်ပွဲအတွက် မဲစာရင်းပြုစုရေးဆိုင်ရာ အစည်းအဝေးမှာ ၎င်းက အထက်ပါ အတိုင်း ထည့်သွင်း ပြောကြားခဲ့ခြင်း ဖြစ်သည်။

ဒုဗိုလ်ချုပ်မှူးကြီးစိုးဝင်းက “ ၂၀၂၃ ခုနှစ်တွင် ကျင်းပရန် ရည်ရွယ်ထားသည့် ရွေးကောက်ပွဲသည် လွတ်လပ်သည့် တရားမျှ တ သည့် ရွေးကောက်ပွဲဖြစ်ရန် အခြေခံအားဖြင့် စာရင်းဇယားမှန်ကန် တိကျရန် အဓိကလိုအပ်ပါသဖြင့် စာရင်းဇယားများ တိကျ မှန်ကန်စေရန် တိုင်းဒေသကြီးနှင့်ပြည်နယ်များအနေဖြင့် ရွေးကောက်ပွဲကော်မရှင်အဆင့်ဆင့်၊ လူဝင်မှုကြီးကြပ်ရေး နှင့်ပြည်သူ့ အင်အားဌာနများနှင့်ပေါင်းစပ်၍ ဆန္ဒမဲပေးပိုင်ခွင့်ရှိသူ တစ်ဦးချင်းစီတိုင်း နိုင်ငံသားစိစစ်ရေးကတ် ရှိ-မရှိ လဝက ပုံစံ ၆၆/၆ ရှိ-မရှိ တစ်အိမ်တ်က တစ်အိမ်ဆင်းစိစစ်ဆောင်ရွက် သွားကြရမည်”ဟု ပြောသည်။

ထို့နောက် မြေပြင်ကွင်းဆင်း တိုင်ဆိုင် စစ်ဆေးနိုင်ရေးအတွက် လူဝင်မှုကြီးကြပ်ရေးနှင့် ပြည်သူ့အင်အားဌာနရှိ တစ်နိုင်ငံ လုံး ထုတ်ပေးထားသည့် မှတ်ပုံတင်မှတ်တမ်းများကို မှတ်တမ်းစာအုပ်မှ ကွန်ပျူတာသို့ ပြောင်းနေကြောင်း၊ အဆိုပါ ကွန်ပျူ တာသို့ စာရင်းသွင်းပြီးချိန်တွင် လဝက ပုံစံ ၆၆/၆ ကိုလည်း တစ်ပြိုင်နက် ကွန်ပျူတာအတွင်း စာရင်းသွင်းလျက်ရှိကြောင်း၊ နိုင်ငံသားစိစစ်ရေးကတ်စာရင်းနှင့် လဝက ပုံစံ ၆၆/၆ များ ကွန်ပျူတာအတွင်း ရရှိပြီးပါက သက်ဆိုင်ရာ တိုင်းဒေသကြီးနှင့် ပြည်နယ်များရှိ မြို့နယ်များသို့ ပူးပေါင်း အဖွဲ့များဖြင့် ရွေးကောက်ပွဲကျင်းပရန် ရည်ရွယ်ထားသည့် ၂၀၂၃ ခုနှစ်မတိုင်မီ မြေပြင် စာရင်း မှန်ကန်မှု ရှိ-မရှိ ပြီးစီးအောင်တိုင်ဆိုင် စစ်ဆေးဆောင်ရွက်သွားကြရမည်ဟု ၎င်းက ပြောသည်။

ဒုဗိုလ်ချုပ်မှူးကြီးစိုးဝင်းက “၂၀၂၀ ပြည့်နှစ်အထွေထွေ ရွေးကောက်ပွဲတွင် အိမ်ထောင်စု လူဦးရေစာရင်းအား လဝက ပုံစံ ၆၆/၆၊ နိုင်ငံသားစိစစ်ရေးကတ် စသည်တို့နှင့် မြေပြင် တိုက်ဆိုင်စစ်ဆေး နိုင်မှုမရှိဘဲ ရှိ/ကောက် စနစ်ဆောင်ရွက်ခဲ့၍ မဲမသမာမှုများ အမြောက်အမြားဖြစ်ပေါ်ခဲ့တယ်”ဟု ပြောသည်။

လက်ရှိ မြန်မာနိုင်ငံတွင် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ တစ်နိုင်ငံလုံး မှတ်ပုံတင်ထုတ်ပေးထား သည့် စာရင်းမှာ ၅၁ သန်းကျော်ရှိကြောင်း၊ ထိုအထဲတွင် သေဆုံးသူများ၊ ပြည်ပသို့ ထွက်ခွာသွားသူများ၊ ပျက်စီး၊ ပျောက် ဆုံးနှင့် နှစ်ကြိမ် သုံးကြိမ်ထပ်သူများလည်း ပါဝင်နေနိုင်ကြောင်း၊ ထိုမှတ်ပုံတင် ထုတ်ပေးထားသည့် ၅၁ သန်းကျော် အနက် ကွန်ပျူတာသို့ စာရင်းသွင်းရာတွင် ယခုထိ ၂၇ သန်းကျော်ပြီးစီးပြီဖြစ်ကြောင်း၊ ကျန်အရေအတွက်မှာ ၂၄ သန်းကျော်ရှိ ကြောင်း သိရသည်။

နစကသည် အရေးပေါ်ကာလဆိုင်ပြဋ္ဌာန်းချက်များနှင့်အညီ ဆောင်ရွက်ပြီးစီးပါက ၂၀၀၈ ဖွဲ့စည်းပုံအခြေခံဥပဒေနှင့်အညီ လွတ်လပ်ပြီး တရားမျှတသော ပါတီစုံဒီမိုကရေစီ အထွေထွေရွေးကောက်ပွဲအား ပြန်လည် ကျင်းပပေးမည်ဖြစ်ကြောင်း၊ ထို့ နောက် အနိုင်ရရှိသည့် ပါတီအား ဒီမိုကရေစီစံနှုန်းများနှင့်အညီ နိုင်ငံတာဝန်ကို လွှဲအပ်နိုင်ရေး ဆက်လက် ဆောင်ရွက် သွားမည်ဖြစ်ကြောင်း နစကဒုဥက္ကဋ္ဌ ဒုဗိုလ်ချုပ်မှူးကြီးစိုးဝင်းက ပြောသည်။

၂၀၂၃ ခုနှစ်၊ သြဂုတ်လတွင် အထွေထွေရွေးကောက်ပွဲ ကျင်းပပေးမည်ဟုလည်း နစက-က ထုတ်ပြန်ကြေညာထားသည်။

လက်ရှိ မြန်မာနိုင်ငံသည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့ အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေ ရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်က ဖြုတ်ချ၍ နိုင်ငံတော်ကို အရေးပေါ် ကြေညာခဲ့သည်။

CNI International News

ကိယက်ဗ်၊ ဧပြီ ၁

ရုရှားတပ်ဖွဲ့ဝင်များသည် ၎င်းတို့တစ်လကျော်ကြာ ထိန်းချုပ်ထားခဲ့သော ချာနိုဘိုင်း နျူကလီးယားစက်ရုံကို မတ်လ ၃၁ ရက် က ယူကရိန်းနိုင်ငံသားများထံသို့ ပြန်လည်လွှဲပြောင်းပေးခဲ့ပြီး ထွက်ခွာသွားခဲ့ကြကြောင်း ယူကရိန်းအာဏာပိုင်များက ပြော ကြားသည်ဟု အေပီသတင်းဌာနက ရေးသားဖော်ပြသည်။

တစ်ချိန်တည်းမှာပင် ကိယက်ဗ်မြို့တော် အစွန်အဖျား ဒေသများနှင့် တခြားစစ်မျက်နှာတွင်လည်း တိုက်ပွဲများ ပြင်းထန် နေဆဲ ရှိသည်။

ရုရှားစစ်သားများသည် ပိတ်ဆို့ထားသော အဆိုပါစက်ရုံတဝိုက်ရှိ သစ်တောအတွင်း ကတုတ်ကျင်းများ တူးရာမှ ဓာတ်ရောင် ခြည် ဖြာထွက်မှု သိသိသာသာ ခံစားရပြီးနောက် ယခုကဲ့သို့ ချာနိုင်ဘိုင်းကို ကျောခိုင်းခဲ့ကြောင်း ယူကရိန်းအစိုးရပိုင် အဏုမြူစွမ်းအင်လုပ်ငန်းဖြစ်သည့် အင်နာဂိုတွန် (Energoatom)က ပြောကြားခဲ့သည်။

ကရင်မလင်သည် ယူကရိန်းပြည်တွင်း၌ တင်းမာမှုများ လျော့ကျရေးအတွက် လက်ရှိ ဆွေးနွေးနေမှုကို အရံအတားအဖြစ် အသုံးချနေပြီး ယူကရိန်းအရှေ့ပိုင်း ထိုးစစ်ဆင်ရန် တပ်ဖြန့်နေစဉ် တခြားစစ်မျက်နှာများမှ ဆုတ်သွားသည့် အရိပ်အယောင် များ ပြသနေခဲ့သည်။

ရုရှားတပ်ဖွဲ့များ

နိုင်ငံမြောက်ပိုင်းနှင့် အလယ်ပိုင်းတို့မှ ရုရှားတပ်များ ပြန်ဆုတ်ပေးနေခြင်းသည် စစ်ရေးဗျူဟာမျှသာဖြစ်ပြီး အရှေ့တောင် ဘက်သို့ စစ်မျက်နှာသစ်ဖွင့်ရန် တပ်အင်အား စုစည်းတည်ဆောက်နေကြောင်း ယူကရိန်းသမ္မတ ဗိုလိုဒီမီယာ ဇာလန်းစကီးက ပြောကြားခဲ့သည်။

ရုရှားစစ်ကြောင်း ၂ ကြောင်းသည် ချာနိုဘိုင်းစက်ရုံမှ ဆုတ်ခွာပြီ ဘယ်လာရုစ် နယ်စပ်အနီးသို့ ဦးတည်ရွေ့လျားခဲ့သည်ဟု ယူကရိန်းအစိုးရပိုင် အဏုမြူစွမ်းအင်လုပ်ငန်းဖြစ်သည့် အင်နာဂိုတွန်၏ သတင်းထုတ်ပြန်ချက်ကို ကိုးကားလျက် vice.com ဝက်ဘ်ဆိုက်က ဖော်ပြသည်။

“ယနေ့နံနက်တွင် ကျူးကျော်သူများသည် ချာနိုဘိုင်း နျူကလီးယားသုံး ဓာတ်အားပေးစက်ရုံမှ ယူကရိန်းဝန်ထမ်းများကို ၎င်းတို့ ထွက်ခွာတော့မည့်အကြောင်း အသိပေးကြေညာခဲ့ကြောင်း” အဆိုပါစက်ရုံ၏ တယ်လီဂရမ်ချန်နယ်တွင် လွှင့်တင် ထားသော ထုတ်ပြန်ချက်၌ ရေးသားထားသည်။

ရုရှား ပြည်သူများ

၎င်းတို့ဆုတ်ခွာမှုသည် ရုရှား၏ ယူကရိန်းကျူးကျော်စစ်အတွင်း ထင်ရှားသည့် ဖြစ်စဉ်တစ်ခု ဖြစ်သည်။

ဖေဖော်ဝါရီ ၂၄ ရက် ရုရှားထိုးစစ် စတင်စဉ်ကပင် သမိုင်းဝင် ချာနိုဘိုင်း စက်ရုံထဲသို့ ပထမဆုံး ဝင်ရောက်သိမ်းပိုက်ခဲ့ပြီးနောက် နျူကလီးယားအရေး နောက်ဆက်တွဲ အကျိုးဆက်များအပေါ် စိုးရိမ်စရာများ တိုးပွားလာစေခဲ့သည်။

အဆိုပါစက်ရုံကို ရုရှားကျူးကျော် သိမ်းပိုက်ထားစဉ် တလျှောက်လုံး စက်ရုံဝန်ထမ်းများကို ဓားစာခံအဖြစ် ချုပ်နှောင်ထားခဲ့ ကြောင်း၊ စက်ရုံပုံမှန် ထိန်းသိမ်းရေး အစီအစဉ်နှင့် ဘေးကင်းစေမည့် အစီအမံများကို ရုရှားစစ်သားများ မလိုက်နာခဲ့ကြောင်း ယူကရိန်းအစိုးရက သတင်းထုတ်ပြန်ခဲ့ပြီး ဖြစ်သည်။

Source: AP, vice.com

CNI News

၂၀၂၂ ခုနှစ်၊ မတ်လ ၃၁

အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ(NSPNC)နှင့် ရှမ်းပြည်တိုးတက်ရေး ပါတီ(SSPP)တို့ ယနေ့(မတ်လ ၃၁ ရက်)တွင် နေပြည်တော်၌ တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့ကြ သည်။

အဆိုပါ တွေ့ဆုံ ဆွေးနွေးပွဲသို့ NSPNC ဘက်မှ ဒုတိယဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ်အဖွဲ့နှင့် SSPP ဘက်မှ ဒုဥက္ကဋ္ဌ(၂) စဝ်ခွန်ဆိုင်၊ အတွင်းရေးမှူး(၂) စဝ်စိုင်းဆု၊ ဗဟိုကော်မတီဝင် စဝ်နော်လိတ်၊ စဝ်သန်းအောင်တို့ ပါဝင်သော ကိုယ်စားလှယ်အဖွဲ့တို့ တက်ရောက်ခဲ့ကြသည်။

၂၀၂၂ ခုနှစ်၊ မတ်လ ၃၁ ရက်က NSPNC နှင့် SSPP တွေ့ဆုံစဉ်

NSPNC ဘက်က လက်ရှိ ငြိမ်းချမ်းရေးဆောင်ရွက်နေမှု၊ အစိုးရအနေဖြင့် ၂၀၂၂ ခုနှစ်ကို ငြိမ်းချမ်းရေး နှစ်အဖြစ် သတ် မှတ်ပြီး ကြိုတင်သတ်မှတ်ချက်များမရှိဘဲ လက်နက်ကိုင်အဖွဲ့အစည်းများနှင့် တွေ့ဆုံ ဆွေးနွေးမှု၊ အပစ်အခတ်ရပ်စဲ ထားမှု၊ ဒေသဖွံ့ ဖြိုး တက်ရေး လုပ်ငန်းများဆောင်ရွက်နိုင်ရေး၊ ပဋိပက္ခများလျှော့ချနိုင်ရေး၊ ဒေသခံပြည်သူများ၏ လိုအပ်ချက်များကို တွေ့ဆုံ ညှိနှိုင်း ဖြည့်ဆည်းဆောင်ရွက်နိုင်ရေး၊ လွတ်လပ်ပြီး တရားမျှတသော ပါတီစုံ ဒီမိုကရေစီ အထွေထွေရွေးကောက်ပွဲ အောင် မြင်စွာ ကျင်းပနိုင်ရေးအတွက် ပူးပေါင်းဆောင်ရွက်ရေးနှင့် နယ်မြေဒေသ တည်ငြိမ်အေး ချမ်းရေး စသည့် ကိစ္စရပ်များကို ဆွေးနွေးခဲ့ကြောင်း နစက-က ထုတ်ပြန်ထားသည်။

SSPP ၏ ဒုဥက္ကဋ္ဌ(၂)စဝ်ခွန်ဆိုင်

ထို့နောက် SSPP ၏ ဒုဥက္ကဋ္ဌ(၂)စဝ်ခွန်ဆိုင်က တိုင်းပြည် ဖွံ့ဖြိုးတိုးတက်ရေးအတွက် တည်ငြိမ်အေးချမ်းပြီး တရားဥပဒေ စိုးမိုး မှုရှိသည့် ပတ်ဝန်းကျင်ကောင်းတစ်ခု ဖန်တီးရေး၊ ဒေသတည်ငြိမ်အေးချမ်းရေးနှင့်လုံခြုံမှုရရှိရေးအတွက် တစ်ဖက်နှင့် တစ် ဖက် ယုံကြည်မှု ပိုမိုတည်ဆောက်နိုင်ရေး၊ အကြိမ်ကြိမ် တွေ့ဆုံဆွေးနွေးညှိနှိုင်းပြီး အခက်အခဲ အတားအဆီးများ ကျော်လွှား နိုင်ရေး စသည့် အခြေအနေများကို ဆွေးနွေးခဲ့ကြောင်း သိရသည်။

ထို့ပြင် NSPNC နှင့် SSPP တို့သည် ရှမ်းပြည်နယ်အတွင်းရှိ တိုင်းရင်းသား လက်နက်ကိုင်အဖွဲ့များအကြား လက်ရှိ ဖြစ်ပေါ် နေသည့် ကိစ္စရပ်များ၊ ရှေ့ဆက် ဆောင်ရွက်မည့် ငြိမ်းချမ်းရေး လုပ်ငန်းစဉ်များနှင့် ဒေသဖွံ့ဖြိုးရေးဆိုင်ရာကိစ္စများအား ညှိနှိုင်း ဆွေးနွေးခဲ့ကြကြောာင်းလည်း သိရသည်။

 SSPP သည် ပြည်နယ်-ပြည်ထောင်စုအဆင့် ပဏာမအပစ်အခတ်ရပ်စဲရေးစာချုပ် (Bilateral) ရေးထိုးထားသည့် ရှမ်းလက်နက်ကိုင်အဖွဲ့ဖြစ်ပြီး တစ်နိုင်ငံ လုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ကိုတော့ လက်မှတ် မထိုးနိုင်သေးပေ။

CNI Sport News

၂၀၂၂ ခုနှစ်၊ မတ်လ ၃၁

ဘာစီလိုနာ အသင်းက ရီးရယ်လ်အသင်းကို အနိုင်ရခဲ့တဲ့ အမျိုးသမီး ချန်ပီယံလိဂ်ပြိုင်ပွဲ ကွာတားဖိုင်နယ် ဒုတိယအကျော့ ပွဲစဉ်မှာ စံချိန်တင် ပရိသတ်ဦးရေ ၉၁၅၅၃ ယောက် တက်ရောက် ကြည့်ရှုခဲ့တယ်လို့ သိရပါတယ်။

ဒါဟာ အမျိုးသမီး ဘောလုံးပြိုင်ပွဲသမိုင်းမှာ ကြည့်ရှုတဲ့ ပရိသတ်အရေအတွက် စံချိန်တင်ခဲ့တာလည်း ဖြစ်ပါတယ်။ နူးကမ့်ပ် ကွင်းမှာ ကစားခဲ့တဲ့ ဒီပွဲမှာ ဘာစီလိုနာအသင်းက ရီးရယ်လ်အသင်းကို ၅ ဂိုး- ၂ ဂိုးနဲ့ အနိုင်ရရှိခဲ့တာပါ။

ပထမအကျော့ အဖြစ် ကစားခဲ့တုန်းက ဘာစီလိုနာ အသင်းကပဲ ၃ ဂိုး- ၁ ဂိုးနဲ့ အနိုင်ရခဲ့တာကြောင့် နှစ်ကျော့ပေါင်းရလဒ် ၈ ဂိုး- ၃ ဂိုးနဲ့ ဘာစီလိုနာ အသင်း အကြိုဗိုလ်လုပွဲ တက်နိုင်ခဲ့တာ ဖြစ်ပါတယ်။

အရင်က အမျိုးသမီး ဘောလုံးပြိုင်ပွဲမှာ စံချိန်တင်ပရိသတ် တက်ရောက်ကြည့်ရှုခဲ့တဲ့ ပွဲကတော့ အမေရိကန်နဲ့ တရုတ်တို့ ကစားခဲ့တဲ့ ၁၉၉၉ ကမ္ဘာ့ဖလားပြိုင်ပွဲပါ။ ဒီပွဲမှာ ပရိသတ်ဦးရေ ၉၀၁၈၅ ယောက် ကြည့်ရှုခဲ့တာ ဖြစ်ပါတယ်။

၁၉၇၁ က ဒိန်းမတ်နဲ့ မက္ကဆီကိုတို့ ကစားခဲ့တဲ့ ကမ္ဘာ့ဖလားပြိုင်ပွဲ ဗိုလ်လုပွဲမှာ ပရိသတ် အရေအတွက် ၁၁၀,၀၀၀ ခန့် တက် ရောက် ကြည့်ရှုခဲ့တယ်လို့ ခန့်မှန်းရတာပါ။ ဒါပေမယ့် ဒီပွဲကို တရားဝင် အသိအမှတ် မပြုခဲ့တာကြောင့် ပရိသတ် အများဆုံး ကြည့်ရှုတဲ့ ပွဲမဖြစ်ခဲ့တာလည်း ဖြစ်ပါတယ်။

ပရိသတ်ပြည့်လျှံတဲ့ ဘာစီလိုနာနဲ့ရီးရယ်လ်ပွဲ (Barca Blaugranes)

ဘာစီလိုနာ အသင်းက ရီးရယ်လ်အသင်းကို အနိုင်ရခဲ့တဲ့ပွဲကို ကလပ်အသင်းရဲ့ ဂန္တဝင် ကစားသမားတွေဖြစ်တဲ့ ပူယိုးလ်နဲ့ နည်းပြ ဇာဗီတို့ တက်ရောက် ကြည့်ရှုခဲ့တာကို တွေ့မြင်ခဲ့ရပါတယ်။

ဘာစီလိုနာ အသင်းခေါင်းဆောင် ပူတယ်လက်စ်က“အိမ်မက်တစ်ခု တကယ်ဖြစ်လာခဲ့ပါပြီ။ အလုပ်တွေ ပိုလုပ်ပြီး ပိုမို ကောင်း မွန်လာကာ အနိုင်ရတဲ့ ပွဲတွေနဲ့ပဲ ဒါတွေကို ဖြေဆိုနိုင်တာပါ။

ဒါမှလည်း သူတို့ကို ကြီးမားတဲ့ မြင်ကွင်းတွေ ပေးနိုင်မှာပါ။ အောင်ပွဲခံ နေချိန်အတွင်းမှာ သူတို့နဲ့အသင်းရဲ့ကြားမှာ ကြီးမားတဲ့ ဆက်နွယ်မှုတွေ ရှိနေပါတယ်။ တူရင်ကို သွားချင်တယ်ဆို ပြီး သူတို့သီကြွေးနေတာကို ကြားရတာလည်း အလွန်ကောင်းတယ်”လို့ ပြောခဲ့ပါတယ်။

ချန်ပီယံလိဂ်ပြိုင်ပွဲရဲ့ လက်ရှိချန်ပီယံဖြစ်တဲ့ ဘာစီလိုနာ အသင်းဟာ အကြိုဗိုလ်လုပွဲမှာတော့ အာဆင်နယ်နဲ့ ဝုလ်ဖ်ဘတ်တို့ ပွဲစဉ်က အနိုင်ရတဲ့ အသင်းနဲ့ ယှဉ်ပြိုင်ရမှာပါ။ အာဆင်နယ်နဲ့ ဝုလ်ဖ်ဘတ်အသင်း ပထမအကျော့ အဖြစ်ကစားခဲ့တုန်းက ၁ ဂိုး စီ သရေကျခဲ့တာ ဖြစ်ပါတယ်။

Source: The Sun/ Daily Mail

CNI International News

ကိယက်ဗ်၊ မတ်လ ၃၀

ရုရှား-ယူကရိန်း စစ်ပွဲသည် ယနေ့ဆိုလျှင် ၃၅ ရက် တိုင်ခဲ့ပြီ ဖြစ်သည်။ စစ်ပွဲအတွင်း ဖြစ်စဉ်များမှာ နောင်တစ်ချိန်တွင် ကမ္ဘာ့ သမိုင်း စာမျက်နှာထက်ဝယ် ကျန်ရစ်ခဲ့ပေလိမ့်မည်။ ယခုရက်ပိုင်းအတွင်း စစ်ပွဲအခြေအနေနှင့် နောက်ဆက်တွဲ အကျိုးသက် ရောက်မှုများကို အောက်ပါအတိုင်း တွေ့ရသည်။

တိုက်ခိုက်ရေး

• ထိခိုက်မှုကြီးမားခဲ့သော ရုရှားတပ်ဖွဲ့များ ပြန်လည်စုစည်းရန်နှင့်ဖြည့်တင်းရန် ဘယ်လာရုစ်နှင့် ရုရှားနိုင်ငံများသို့ တပ်ခေါက်ခဲ့ရကြောင်း ဗြိတိန်ထောက်လှမ်းရေးက ပြောသည်။
• ယူကရိန်းနိုင်ငံအရှေ့ပိုင်း လိုင်ဆိုင်ချန်ဆက်မြို့ရှိ လူနေရပ်ကွက်များ အမြောက်ဖြင့် ပစ်ခတ်ခံခဲ့ရကြောင်း ဒေသန္တရ အာဏာပိုင်များက ပြောသည်။
• မိုင်ကိုလာဗစ်မြို့ရှိ အုပ်ချုပ်ရေး အဆောက်အအုံတစ်ခု ရုရှားဒုံးကျည်ထိမှန်ခဲ့ရာ လူ ၁၂ ဦးထက်မနည်း သေဆုံးခဲ့သည်။
• ကိယက်ဗ်မြို့တော်တွင် ပေါက်ကွဲမှု အကြိမ်များစွာ ရှိခဲ့ကြောင်း ယူကရိန်းသတင်းဌာနတစ်ခုက ဖော်ပြသည်။

ဆွေးနွေးပွဲများနှင့် သံခင်းတမန်ခင်း

*****************************

တူရကီနိုင်ငံ၊ အစ္စတန်ဘူလ်မြို့ ဆွေးနွေးပွဲအပြီးတွင် ရုရှားက ကိယက်ဗ်နှင့် အရှေ့မြောက်ပိုင်း ချာနီဟစ်မြို့ တိုက်စစ် ဆင်ရေး လျှော့ချမည်ဟု ကတိပြုခဲ့သည်။ ယူကရိန်းဘက်ကလည်း ရက်သတ္တ ၅ ပတ်ကြာ စစ်ပွဲအရှိန် လျော့အောင် ကူညီဖို့ ယုံကြည်မှု တည်ဆောက်ရေး ခြေလှမ်းများ၌ ကြားနေရပ်တည်ချက် ချမှတ်နိုင်ကြောင်း ပြောကြားခဲ့သည်။

ရုရှားစေ့စပ်ညှိနှိုင်းရေးအဖွဲ့ အကြီးအကဲ ဗလာဒီမာမီဒင်စကီးက “ဒါဟာ အပစ်အခတ်ရပ်စဲရေး မဟုတ်ပေမယ့် ဒီတွေ့ဆုံ မှုတွေကနေ အနည်းဆုံးတော့ ပဋိပက္ခအရှိန် လျော့ကျအောင် ဖြည်းဖြည်းချင်း တက်လှမ်းဖို့က ကျနော်တို့ရဲ့ဆန္ဒပါပဲ” ဟု ပြောကြားခဲ့သည်။

ယူကရိန်းသမ္မတ ဗိုလိုဒီမီယာ ဇာလန်းစကီးကတော့ “မြေပြင် ဖြစ်ပျက်နေပုံတွေနဲ့ ရုရှားရဲ့ပြောပုံဆိုပုံတွေက မကိုက်ညီ တဲ့အတွက် ယုံကြည်စရာ အကြောင်းမရှိဘူးလို့” ပြောကြားခဲ့သည်။

ရုရှားဘက်မှ ကြေညာချက်ကို အမေရိကန်နှင့်ဗြိတိန်တို့ကလည်း သံသယရှိကြောင်း ထုတ်ဖော်ပြောကြားခဲ့သည်။

“သူတို့ရဲ့လုပ်ရပ်တွေ မတွေ့ရ မချင်း စဉ်းစားစရာပဲဗျ” ဟု အမေရိကန်သမ္မတ ဂျိုးဘိုင်ဒန်က မှတ်ချက်ချခဲ့သည်။

ရုရှားနိုင်ငံခြားရေးဝန်ကြီး ဆာဂျေလာဗရော့က ဖေဖော်ဝါရီ ၂၄ ရက် မော်စကိုကျူးကျော်စစ် စတင်ပြီးနောက် ၎င်း၏ ပထမဆုံး ခရီးစဉ်အဖြစ် တရုတ်သို့ သွားရောက်ခဲ့သည်။

အရပ်သား အသေအပျောက်

***************************

စစ်ပွဲ စတင်ချိန်မှစ၍ ယူကရိန်းတွင် အရပ်သားသေဆုံးမှု ၁,၁၇၉ ဦး စစ်ဆေးတွေ့ရှိခဲ့ပြီး နောက်ထပ် အရပ်သား ၁,၈၆၀ ဦး ဒဏ်ရာရခဲ့ကြောင်း ကုလသမဂ္ဂလူ့အခွင့်အရေးရုံးက ပြောသည်။ အမှန်တကယ် အသေအပျောက် အရေအတွက်မှာ ထိုအရေအတွက်ထက် ပိုများကြောင်း ယူဆရသည်။

ရုရှားတပ်များ အဝိုင်းခံထားရသော မာရီယူပေါ်လ်မြို့ အကျပ်အတည်းမှာ ပိုမိုဆိုးရွားလာကြောင်း နိုင်ငံတကာကြက်ခြေနီ ကော်မတီ (ICRC) က သတိပေးသည်။

“ကျနော်တို့ မျက်မြင်တွေ့နေရသည့် သေဆုံးမှု၊ ပျက်စီးမှုနှင့် နာကျင်ခံစားရမှု အဆင့်သည် အရပ်သားများအပေါ် ရက်စက် ကြမ်းကြုတ်မှုဖြစ်ပြီး လက်ခံနိုင်ဖွယ်မရှိပါ” ဟု ICRC က ထုတ်ပြန်ခဲ့သည်။

စီးပွားရေး

**********

ရှယ်ယာဈေးကွက်များနှင့် ကမ္ဘာလုံးဆိုင်ရာ ငွေချေးငှားမှုဆိုင်ရာ ကိစ္စရပ်များသည် ဆွေးနွေးပွဲများ တိုးတက်မှု လက္ခဏာများ အနေဖြင့် မြင်တွေ့ရသည်။ ယူကရိန်း ငွေချေးစာချုပ်များနှင့် ရုရှားရူဘယ်တို့ ဈေးကစားနေဆဲရှိသော်လည်း ကမ္ဘာ့ရေနံဈေး ပြန်လည် ကျဆင်းလာခဲ့သည်။

ကမ္ဘာ့အကြီးဆုံး ဘိလပ်မြေ ထုတ်လုပ်မှု လုပ်ငန်းဖြစ်သည့် Holcim က ရုရှားဈေးကွက်ကို ကျောခိုင်းတော့မည်ဟု ပြောကြား ခဲ့သည်။

ဂျပန်နိုင်ငံက ရုရှားသို့ တန်ဖိုးကြီး မော်တော်ယာဉ်နှင့် ဇိမ်ခံပစ္စည်းများ တင်ပို့များကို ကန့်သတ်မည်ဖြစ်သည်။

အလားတူ ဂျာမနီနိုင်ငံကလည်း ရုရှားထံမှ ရုပ်ကြွင်းလောင်စာဆီ တင်သွင်းမှုအားလုံးကို ရပ်တန့်ရန် လိုလားနေသည်။

Source: Aljazeera

CNI International News

၂၀၂၂ ခုနှစ်၊ မတ်လ ၃၀

ယီမင်နိုင်ငံ၏မြို့တော်ကို သိမ်းပိုက်ထားသော ဟူသီသူပုန်များအား တိုက်ခိုက်နေသည့် ဆော်ဒီအာရေဗျ ဦးဆောင်သော ညွန့်ပေါင်းတပ်ဖွဲ့သည် မွတ်ဆလင် ဥပုသ်လမတိုင်မီ မတ်လ ၃၀ ရက် အစောပိုင်းတွင် တစ်ဖက်သတ် အပစ်အခတ်ရပ်စဲဖို့ ကမ်းလှမ်းမှုကို ဟူသီသူပုန်များက ပယ်ချခဲ့ကြောင်း အေပီသတင်းအရ သိရသည်။

အဆိုပါ ကမ်းလှမ်းချက်သည် ဆိပ်ကမ်းများကို အပြည့်အဝ ပြန်မဖွင့်ပေးဘဲ ကမ်းလှမ်းလာခြင်း ဖြစ်သည့်အတွက် အဓိပ္ပါယ်မဲ့ သည်ဟု ဟူသီသူပုန်များက ပြောကြား၍ ပယ်ချခဲ့ကြောင်း အေပီက ဆက်လက် ဖော်ပြထားသည်။

ညွန့်ပေါင်းတပ်ဖွဲ့သည် ယီမင်နိုင်ငံ၌ ဟူသီသူပုန်များ သပိတ်မှောက်ခဲ့သော စေ့စပ်ညှိနှိုင်းမှုများ လွယ်ကူချောမွေ့စေရန် မတ်လ ၃၀ ရက်၊ ဒေသစံတော်ချိန် နံနက် ၆ နာရီ (ဂရင်းနစ်စံတော်ချိန် နံနက် ၃ နာရီ)တွင် တဖက်သတ် အပစ်အခတ် ရပ်စဲ ရေး စတင်ဖို့ စီစဉ်ထားသည်။

“အပစ်အခတ်ရပ်စဲ‌ရေး အောင်မြင်ဖို့ ခြေလှမ်းတိုင်း၊ အဆင့်တိုင်းကို အစီအမံချမှတ်ပြီး လုပ်ဆောင်သွားမှာ ဖြစ်ပါတယ်။ ငြိမ်းချမ်းရေးရဖို့နဲ့ အကျပ်အတည်းချုပ်ငြိမ်းဖို့ ရမ်ဇာန်လမြတ်အတွင်း အပြုသဘောဆောင်တဲ့ အခင်းအကျင်းမျိုးကို ဖန်တီး ပေးသွားမှာပါ” ဟု ဆော်ဒီဦးဆောင်သည့် ညွန့်ပေါင်းတပ်ဖွဲ့မှ ပြောခွင့်ရသူ ဗိုလ်မှူးချုပ် တာကီအယ်လ်မာလီကီ (Turki al-Maliki) က မတ်လ ၂၉ ရက် နှောင်းပိုင်းတွင် ပြောကြားခဲ့သည်။

သို့သော် အီရန်ကျောထောက် နောက်ခံရှိနေသည့် ဟူသီသူပုန်များသည် ဆော်ဒီအာရေဗျနိုင်ငံတွင် ကျင်းပမည့် ထိပ်သီး အစည်းအဝေးကို ရှောင်လွဲနေကြသဖြင့် ယခုအပစ်အခတ်ရပ်စဲရေး ကြေညာချက် ထွက်ပေါ်လာမှုကို လတ်တလော သံသယ ဝင်ခဲ့ကြသည်။ အကြောင်းမှာ ဆော်ဒီအခြေစိုက် ပင်လယ်ကွေ့ ပူးပေါင်းဆောင်ရွက်ရေးကောင်စီက ဟူသီသူပုန်တို့၏ ရန်သူ့ နယ်မြေတွင် စေ့စပ်ညှိနှိုင်းရေး လုပ်နေကြ၍ ဖြစ်သည်။

ဆော်ဒီဦးဆောင်သည့် ညွန့်ပေါင်းတပ်ဖွဲ့မှ ပြောခွင့်ရသူ ဗိုလ်မှူးချုပ် တာကီအယ်လ်မာလီကီကိုတွေ့ရစဉ်

လွန်ခဲ့သည့် ၂ နှစ်ကလည်း အဆိုပါညွန့်ပေါင်းတပ်ဖွဲ့က ကြေညာခဲ့သော တစ်ဖက်သတ် အပစ်အခတ်ရပ်စဲရေးမှာလည်း ပျက်ပြားခဲ့ဖူးသည်။

ယခုအခါတွင်လည်း ဆာနာလေဆိပ်ကို ဆက်ပိတ်ထားရန်နှင့် ဆိပ်ကမ်းများ ကန့်သတ်ထားရန် ရှိနေခြင်းကြောင့် အပစ်အခတ်ရပ်စဲရေး ကမ်းလှမ်းချက်ကို မိုဟာမက်အယ်လ် ဘူကိုင်တီ အမည်ရှိ ဟူသီသူပုန်တပ်ဖွဲ့ တာဝန်ရှိသူတစ်ဦးက ညွန့်ပေါင်းတပ်ဖွဲ့၏ ကြေညာချက်ထွက်ပေါ်ပြီး နာရီပိုင်းအတွင်း ပယ်ချခဲ့သည်။

“ပိတ်ဆို့တားဆီးမှုတွေ မရုပ်သိမ်းပေးဘဲနဲ့ စစ်ဆင်ရေးရပ်တန့်ဖို့ ညွန့်ပေါင်းအဖွဲ့က တစ်ဖက်သတ် ရန်လိုပြီး ကြေညာတဲ့ အတွက် အဓိပ္ပါယ်မရှိသလို အခုဆက်ပြီး ပိတ်ဆို့နေတဲ့ ရလဒ်ကနေ ယီမင်စစ်ပွဲ ပိုကြာမယ်၊ ဒုက္ခသည် အကျပ်အတည်း ပိုပြင်းထန်လာမယ်” ဟု ဘူကိုင်တီက တွစ်တာလူမှုကွန်ရက်တွင် ရေးသားခဲ့သည်။

အကယ်၍ ဟူသီသူပုန်များက အပစ်အခတ်ရပ်စဲရေးကို မလိုက်နာပါက ညွန့်ပေါင်းတပ်ဖွဲ့များ မည်ကဲ့သို့ တုံ့ပြန်မည်ကို လတ်တလော ရှင်းရှင်းလင်းလင်း မသိရသေးပေ။

ကုလသမဂ္ဂနှင့် တခြားနိုင်ငံများကတော့ ယီမင်စစ်၌ နှစ်ဘက်စလုံးကို မွတ်ဆလင် ဥပုသ်လအတွင်း အပစ်အခတ်ရပ်စဲရေးကို အလေးပေး တိုက်တွန်း လျက်ရှိသော်လည်း ယခင်အတိုင်းပင် ပြန်လည် တင်းမာနေဆဲဖြစ်သည်။ အဆိုပါ ရမ်ဇာန်ဥပုသ်လ သည် ယခုသီတင်းပတ် အကုန်ပိုင်းတွင် စတင်ကျရောက်မည် ဖြစ်သည်။

Source: AP