CNI News
၂၀၂၅ ခုနှစ်၊ မတ်လ ၃
မြန်မာနိုင်ငံတွင် ငြိမ်းချမ်းရေးလုပ်ငန်းများ လုပ်ဆောင်ရန် ယုံကြည်မှု ပြန်လည်တည်ဆောက်ရမည်ဟု NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO- NCA/S) မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။
ငြိမ်းချမ်းရေးသည် ယုံကြည်မှု တည်ဆောက်ပြီးမှသာ ရရှိမည်ဖြစ်ကြောင်း၊ ပြည်ထောင်စုနှင့် ပြည်သူလူထုအား ချစ်သည့် စိတ်နေစိတ်ထားများ ထားရှိပါက တိုင်းပြည်ကို ကယ်တင်၍ ရမည်ဖြစ်ကြောင်း ၎င်းက ပြောသည်။
ဗိုလ်မှူးကြီးခွန်ဥက္ကာက “ကျနော်တို့ တွက်တာကတော့ ယုံကြည်မှု ပြန်လည်တည်ဆောက် ရမှာပေါ့ဗျာ၊ ငြိမ်းချမ်းရေးဆိုတာက ယုံကြည်မှု တည်ဆောက်ပြီးမှ ဖြစ်ရတာ၊ အခုက ဘယ်ဘက်ကမှ ယုံကြည်မှု မရနိုင်တဲ့ အခြေအနေမျိုး ဖြစ်နေတယ်၊ အုပ်ချုပ်တဲ့သူဖက်ကလည်း တစ်မျိုးဖြစ်နေတယ်၊ ဒီဖက်က လက်နက်ကိုင် ဆန့်ကျင် တဲ့ ဘက်ကလည်း တစ်မျိုးဖြစ်နေတယ်၊ ဒါကြောင့် ယုံကြည်မှု မရဘူးထင်တယ်၊ နောက်တစ်ခုက စိတ်နေစိတ် ထားက ပြည်ထောင်စုကိုချစ်တဲ့ စိတ်နေစိတ်ထား လက်နက်ကိုင်အားလုံးမှာ ပြည်သူကိုချစ်တဲ့စိတ် ပြည်ထောင်စု ကို ချစ်တဲ့စိတ်တွေ ထားကြရင်တော့ ပြန်ပြီးတော့ တိုင်းပြည်ကို ကယ်တင်လို့ ရတာပေါ့နော်၊ ဆွေးနွေးပွဲ လုပ်လို့ ရမယ်၊ ဘက်အသီးသီးပေါ့ဗျာ အခုပဋိပက္ခမှာပါနေတဲ့ လက်နက်ကိုင် ဘက်အသီးသီးက စဥ်းစားဖို့ သင့်ပြီလို့တော့ ကျနော် အကြံပေးချင်တာပေါ့၊ ယုံကြည်မှု တည်ဆောက်ပြီးတော့ ပြည်သူကို မျက်နှာမူကြမယ် ဆိုရင်တော့ ဆွေးနွေးပွဲက ဖြစ်လာမှာပါ” ဟု ပြောသည်။
ကချင်တိုင်းရင်းသားများကို တွေ့ရစဉ်
မြန်မာပြည်ငြိမ်းချမ်းရေး ရေရှည်တည်တံ့ခိုင်မြဲရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်နိုင်ရေး အတွက် သက်ဆိုင်ရာအဖွဲ့အစည်းများ အနေဖြင့် မျက်နှာချင်းဆိုင် တွေ့ဆုံဆွေးနွေးဖြေရှင်းရန် ရှမ်းပြည်ပြန်လည် ထူထောင်ရေးကောင်စီ (RCSS)က ၂၀၂၅ ခုနှစ်၊ ဖေဖော်ဝါရီ ၂၄-၂၅ ရက်များတွင် ထုတ်ပြန်ခဲ့သည်။
နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကလည်း နိုင်ငံရေးပြဿနာများအား နိုင်ငံရေးအရ ဖြေရှင်းနိုင်ရန် ငြိမ်းချမ်းရေးတံခါးကို ဖွင့်လှစ်ကြိုဆိုလျက်ရှိကြောင်း ၂၀၂၅ ခုနှစ်၊ ဖေဖော်ဝါရီ ၁၂ ရက်နေ့တွင် ကျရောက်သည့် ပြည်ထောင်စုနေ့ အခမ်းအနားသို့ ပေးပို့သော သဝဏ်လွှာ၌ ထည့်သွင်းပြောကြားခဲ့သည်။
ဒေသခံ တိုင်းရင်းသားများအနေဖြင့် လက်နက်ကိုင်အဖွဲ့အစည်းများအား နိုင်ငံရေးနည်းလမ်းဖြင့် စေ့စပ်ညှိနှိုင်း အဖြေရှာရေး အားပေးရန် မေတ္တာရပ်ခံကြောင်းလည်း နစကဥက္ကဋ္ဌက တိုက်တွန်းခဲ့သည်။
ငြိမ်းချမ်းရေးလုပ်ငန်းစဥ်များတွင် အဓိကအားဖြင့် တာဝန်ယူမှု၊ တာဝန်ခံမှု ရှိရမည်ဖြစ်ပြီး မရှိပါက ငြိမ်းချမ်းရေး ဖြစ်စဥ်တစ်ရပ် အောင်မြင်ရန် မလွယ်ကြောင်း ပအိုဝ်းအမျိုးသားဖက်ဒရယ်ကောင်စီ(PNFC) ဥက္ကဋ္ဌ ခွန်မြင့်ထွန်းက CNI သတင်းဌာနသို့ ပြောသည်။
NCA နှစ်ပတ်လည် အခမ်းအနားကျင်းပစဉ်
ခွန်မြင့်ထွန်းက “ဒီငြိမ်းချမ်းရေး ဖြစ်စဥ်အတွက်ကတော့ အားလုံးကတော့ ကျနော်တို့ကတော့ ငြိမ်းချမ်းရေးဖြစ်စဥ် တစ်ခုလည်း ဖြတ်သန်းခဲ့တာပဲလေ၊ အဲတော့ အဓိက,ကတော့ တာဝန်ယူမှု၊ တာဝန်ခံမှုပေါ့၊ တာဝန်ယူမှု၊ တာဝန်ခံ မှု မရှိခဲ့တဲ့ အခါကျတော့ NCA နဲ့လုပ်ခဲ့တဲ့ ငြိမ်းချမ်းရေးဖြစ်စဥ်လည်း ပျက်ခဲ့တာပေါ့နော်၊ အဲတော့ တကယ်တော့ စစ်တပ်ကနေ အာဏာမသိမ်းခဲ့ဘူး၊ တာဝန်ယူမှု၊ တာဝန်ခံမှု ရှိခဲ့တယ်ဆိုရင် ငြိမ်းချမ်းရေးဖြစ်စဥ်က ဒါတော်တော် လေးကို အရှိန်အဟုန် ကောင်းနေမှာ စစ်တပ်က ဖျက်စီးပစ်ခဲ့တဲ့ အခါကျတော့ အခုဒီငြိမ်းချမ်းရေး ဖြစ်စဥ်ကို တကယ်လို့ ကျနော်တို့ ဆောင်ရွက်ကြမယ်ဆိုရင် အဓိကအချက်ကတော့ တာဝန်ယူမှု၊ တာဝန်ခံမှုပါပဲ၊ တာဝန်ယူ မှု၊ တာဝန်ခံမှု မရှိဘဲနဲ့ကတော့ ငြိမ်းချမ်းရေး ဖြစ်စဥ်တစ်ရပ် အောင်မြင်ဖို့ဆိုတာ မလွယ်ပါဘူး၊ အခြေခံ အကျဆုံး ကတော့ အဲဒီအချက်ပါပဲ” ဟု ပြောသည်။
မြန်မာ့ပြည်တွင်းရေး ပြဿနာအား ပြည်တွင်းမှာပင် ဖြေရှင်းရမည်ဖြစ်သော်လည်း ငြိမ်းချမ်းရေး လုပ်ငန်းစဥ်များ အတွက် နိုင်ငံတကာ၏ တွန်းအားပေးမှုများ၊ လုပ်ဆောင်ချက်များလည်း လိုအပ်ကြောင်း စစ်ရေးနှင့်နိုင်ငံရေး အကဲခတ်များက ပြောသည်။
အာဆီယံအဖွဲ့ဝင် နိုင်ငံများအနေဖြင့် မြန်မာပြည် ငြိမ်းချမ်းရေးလုပ်ငန်းစဥ်အား အရှိန်မြှင့် ဆောင်ရွက်ရန် ၂၀၂၅ ခုနှစ်၊ ဖေဖော်ဝါရီ ၁၂ ရက်နေ့တွင် Free Malaysia Today (FMT) က ဖော်ပြခဲ့သည်။
မြန်မာနိုင်ငံတွင် အပစ်အခတ်ရပ်စဲပြီး ငြိမ်းချမ်းရေးအတွက် ဆွေးနွေးကြရန် တရုတ်အနေဖြင့် တိုက်တွန်းနေပြီး ငြိမ်းချမ်းရေးဖော်ဆောင်မည့် လုပ်ငန်းစဉ်များကိုလည်း အစွမ်းကုန်ထောက်ခံ အားပေးသွားမည်ဖြစ်ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မစ္စစ်မော်နင်းက ပြောကြားထားသည်။
