CNI News
၂၀၂၅ ခုနှစ်၊ မတ်လ ၃
ရုရှားသမ္မတ ပူတင်နှင့်တွေ့ဆုံရန် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၅ ခုနှစ်၊ မတ်လ ၃ ရက်နေ့ နံနက်ပိုင်းက နေပြည်တော်ကနေ အထူးလေယာဉ်ဖြင့် ထွက်ခွာသွားပြီဖြစ်သည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို ရုရှားသမ္မတ ပူတင်က တရားဝင်ချစ်ကြည်ရေးခရီး လာရောက်ရန် အတွက် ဖိတ်ကြားခဲ့သည်။
ထို့နောက် ဗိုလ်ချုပ်မှူးကြီးမင်းအောင်လှိုင်သည် ရုရှားသမ္မတ ပူတင်နှင့် မတ်လ ၄ ရက်နေ့တွင် တွေ့ဆုံ ဆွေးနွေး ကြမည်ဖြစ်သည်။
အလားတူ ရုရှားဝန်ကြီးချုပ်၊ လွှတ်တော်ဥက္ကဋ္ဌ အပါအဝင် ရုရှားအစိုးရအဖွဲ့ဝင်များဖြင့် တွေ့ဆုံ ဆွေးနွေးမည် ဖြစ်သည်။
အဆိုပါ တွေ့ဆုံမှုတွင် လုံခြုံရေးဆိုင်ရာများနှင့် ကဏ္ဍပေါင်းစုံ၌ မဟာဗျူဟာမြောက် ပူးပေါင်းဆောင်ရွက်မှု ဆိုင်ရာကိစ္စရပ်များကို ဆွေးနွေးမည်ဟု နစကဘက်က ထုတ်ပြန်ထားသည်။
နစကဥက္ကဋ္ဌ၏ ရုရှားခရီးစဉ်သို့ နစက တွဲဖက်အတွင်းရေးမှူး ဗိုလ်ချုပ်ကြီးရဲဝင်းဦး၊ နစကအဖွဲ့ဝင် ဗိုလ်ချုပ်ကြီး ညိုစော၊ ဗိုလ်ချုပ်ကြီးမိုးအောင်၊ နိုင်ငံခြားရေးဝန်ကြီး ဦးသန်းဆွေ၊ ဒေါက်တာကံဇော်၊ ဦးကိုကိုလွင်၊ ဒေါက်တာ မျိုးသိန်းကျော်၊ ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်းနှင့် ကာကွယ်ရေးဦးစီးချုပ်ရုံးမှ အဆင့်မြင့် တပ်မတော်အရာရှိကြီးများ လိုက်ပါသွားကြောင်း သိရသည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ၂၀၂၂ ခုနှစ်၊ စက်တင်ဘာလက ရုရှားနိုင်ငံမှာ ကျင်းပသည့် (၇)ကြိမ်မြောက် အရှေ့ဖျား စီပွားရေးဖိုရမ်သို့ တက်ရောက်ပြီး စက်တင်ဘာ ၇ ရက်တွင် ရုရှားသမ္မတ ပူတင်နှင့် တွေ့ဆုံ ဆွေးနွေးခဲ့သေးသည်။
