CNI International News

မော်စကို၊ မေ ၁၇

ရုရှားဦးဆောင်သော CSTO စစ်ဘက်လုံခြုံရေးစာချုပ်အဖွဲ့တွင် အဖွဲ့ဝင်နိုင်ငံအနေဖြင့် ပြည်ပဖိအားများ တွန်းလှန် နိုင်ရန်အတွက် နိုင်ငံရေးပူးပေါင်းဆောင်ရွက်မှု မြှင့်တင်ကြဖို့ ဘယ်လာရုစ်သမ္မတ လူကာရှန်ကိုက ပြောကြားခဲ့ သည်ဟု တာ့စ်သတင်းဌာနက ဖော်ပြခဲ့သည်။

CSTO အဖွဲ့၏ ရတုအထိမ်းအမှတ် ဆွေးနွေးပွဲကို မေလ ၁၆ ရက်တွင် မော်စကိုမြို့၌ ကျင်းပစဉ် လူကာရှန်ကိုက ပြောကြားခဲ့ခြင်း ဖြစ်သည်။

“CSTO အဖွဲ့ဝင်နိုင်ငံတွေဟာ နိုင်ငံရေးပူးပေါင်းဆောင်ရွက်မှုနဲ့ ပေါင်းစပ်ညှိနှိုင်းမှု၊ နိုင်ငံခြားရေးမူဝါဒ၊ လုံခြုံရေး ဆိုင်ရာဆွေးနွေးမှုယန္တရားတွေ ပိုပြီး တိုးမြှင့်ရမှာဖြစ်ပါတယ်။ အဖွဲ့အစည်းရဲ့အသံနဲ့ ရပ်တည်ချက်ကို နိုင်ငံတကာ စင်မြင့်တွေမှာ ကောင်းကောင်းကြားနိုင်၊ သိနိုင်အောင် CSTO ကိုယ်စား မကြာမကြာ ပြောပေးသင့်ပါတယ်။ ကျနော်တို့ ဘုံအသံနဲ့ ဘုံရပ်တည်ချက်တွေက အနောက်အုပ်စုနိုင်ငံတွေလိုပါပဲ” ဟု လူကာရှန်ကိုက ပြောကြား ခဲ့သည်။

CSTO ၏ ပြိုင်ဘက်များနှင့် ရန်သူများကြောင့် မိမိတို့အဖွဲ့၏ အခြေခံနှင့်မဟာမိတ်ဆက်ဆံရေးကို လျော့ကျသွား စေနိုင်ကြောင်းလည်း ၎င်းက သတိပေးခဲ့သည်။

“ဒါနဲ့ပတ်သက်လို့ ပြောရရင် ကျနော်တို့ဟာ အနောက်အုပ်စုနိုင်ငံတွေလက်ထဲကနေ လွတ်တာတော့ မဟုတ်ဘူး။ ဘုံမျက်နှာစာတစ်ခုကို တင်ပြတဲ့အခါမှာ ငရဲထက်ဆိုးတဲ့ ဒဏ်ခတ်အရေးယူမှုလိုမျိုး တခြားဘာမှမရှိဘူးလို့ ကျနော် သေချာပေါက် အလေးအနက်ပြောချင်ပါတယ်” ဟု လူကာရှန်ကိုက ပြောကြားခဲ့သည်။

Source: တာ့စ်သတင်းဌာန

CNI International News

ကိုလံဘို၊ မေ ၁၇

အကျပ်အတည်းဆိုက်ရောက်နေသော မိမိတို့နိုင်ငံတွင် လောင်စာဆီဖြန့်ဖြူးပေးနိုင်ခြင်း နောက်ဆုံးနေ့သို့ နီးကပ်လာပြီဖြစ်ကြောင်း သီရိလင်္ကာဝန်ကြီးချုပ်သစ်က မေလ ၁၆ ရက်တွင် ပြောကြားခဲ့ကြောင်း ရိုက်တာ သတင်းဌာနက ရေးသားဖော်ပြသည်။

ယခင် သီတင်းပတ်ကမှ ဝန်ကြီးချုပ်ဖြစ်လာသူ ရာနေးလ်ဝစ်ရီမီဆင်းက “တိုင်းပြည်အတွက် အရေးကြီးသော သွင်းကုန်များ ဝယ်ယူပေးချေရန် နိုင်ငံခြားငွေ အမေရိကန်ဒေါ်လာ ၇၅ သန်း အရေးပေါ်လိုအပ်နေကြောင်း” ၎င်း မိန့်ခွန်းထဲတွင် ထည့်သွင်းပြောကြားခဲ့သည်။

“လောလောဆယ် ကျနော်တို့မှာ တစ်ရက်စာသုံးဖို့ပဲ ဓာတ်ဆီကျန်တော့တယ်ဗျ။ နောက်လတွေဆိုရင် ကျနော်တို့ ဘဝတွေ အခက်ခဲဆုံးဖြစ်လာတော့မှာပါ” ဟု ၎င်းက တိုင်းပြည်သို့ ရှင်းပြခဲ့သည်။

“ကျနော်တို့တတွေဟာ စွန့်လွှတ်အနစ်နာခံမှုတွေနဲ့ အခုကာလ စိန်ခေါ်မှုတွေ ရင်ဆိုင်ဖို့ မိမိကိုယ်ကို ပြင်ဆင် ထားရပါလိမ့်မယ်” ဟု ဝစ်ရီမီဆင်းက ထပ်လောင်းပြောကြားခဲ့သည်။

အိန္ဒိယချေးငွေကို သုံး၍ ဓာတ်ဆီနှင့် ဒီဇယ်ဆီရမည်ဆိုလျှင် လာမည့်ရက်အနည်းငယ်အတွင်း အသက်ရှုချောင် နိုင်မည်ဟု ၎င်းက ဖြည့်စွက်ပြောကြားခဲ့သည်။

တိုင်းပြည်အကျပ်အတည်းကြောင့် လက်ရှိသမ္မတ ဂိုတာဘာယာရာဂျာပက်ဆာနှင့် ၎င်း၏မိသားစုအပေါ် မကျေနပ်ကြသည့် လူထုဆန္ဒပြမှုများကျယ်ကျယ်ပြန့်ပြန့် ဖြစ်ပေါ်ခဲ့ပြီးနောက် သမ္မတ၏အစ်ကိုဖြစ်သူ မဟိန္ဒာသည် ဝန်ကြီးချုပ်ရာထူးမှ ဆင်းပေးခဲ့ရသည်။ ယင်းနောက် ပြီးခဲ့သည့်သီတင်းပတ်၌ အစိုးရ ထောက်ခံသူ များနှင့် ဆန့်ကျင်ဆန္ဒပြသူများအကြား ရုန်းရင်းဆန်ခတ်ဖြစ်ခဲ့ရာ လူ ၉ ဦးသေဆုံး၍ ၃၀၀ ကျော် ဒဏ်ရာရခဲ့သည်။

သမ္မတသည် အတိုက်အခံလွှတ်တော်အမတ်အဖြစ် ၅ ကြိမ်တိုင်တိုင် လုပ်ကိုင်ခဲ့ဖူးသူ ဝစ်ရီမီဆင်းကို ဝန်ကြီးချုပ် နေရာ အစားထိုးခန့်အပ်ခဲ့ပြီး ဆန္ဒပြသူများကို နှိမ်နင်းရန် အပြင်းအထန်ကြိုးပမ်းခဲ့သည်။

သို့သော် ဂိုတာဘာယာရာဂျာပက်ဆာအနေဖြင့် သမ္မတနေရာ၌ ဆက်ယူထားမည်ဆိုပါက ဆန္ဒပြမှုများ ဆက်တိုက် ပြုလုပ်သွားမည်ဟု အစိုးရဆန့်ကျင်သူများက ပြောကြားခဲ့ကြသည်။

ဝစ်ရီမီဆင်းကို သမ္မတ၏လက်ကိုင်တုတ်ဟု တံဆိပ်ကပ်ပြီး ရာဂျာပက်ဆာညီအစ်ကိုများ ဦးဆောင်သည့် နိုင်ငံရေး ပါတီဝင်များဖြင့် အစိုးရကက်ဘိနက်ဝန်ကြီး ၄ ဦး ခန့်အပ်ခြင်းကိုလည်း ဝေဖန်အပြစ်တင်ခဲ့ကြသည်။

မည်သို့ပင်ဆိုစေကာမူ “တိုင်းပြည်ကောင်းကျိုးအတွက် ကျနော် တာဝန်ယူထားပါတယ်” ဟု ဝစ်ရီမီဆင်းက မေလ ၁၆ ရက်တွင် ပြောကြားခဲ့သည်။

Source: Reuters

CNI International News

ဘန်ကောက်၊ မေလ ၁၆

အသက် ၉၀ ပြည့်မွေးနေ့ပွဲ မေလ ၁၅ ရက်၌ ကျင်းပခဲ့သည့် ထိုင်းဝန်ကြီးချုပ်ဟောင်း ဗိုလ်ချုပ်ကြီး ချာဗလစ် ယောင်ချိုင်ယွတ်က နိုင်ငံရေးပါတီ အသစ်တစ်ခု တည်ထောင် သွားမည်ဖြစ်ကြောင်း အတည်ပြု ပြောကြားခဲ့သည်ဟု ဘန်ကောက်ပို့စ် သတင်းတွင် တွေ့ရသည်။

မိမိသည် ရုပ်ပိုင်းဆိုင်ရာ ကျန်းမာကြံ့ခိုင်နေဆဲ ဖြစ်ကြောင်း၊ ပါတီ ၇ ခုတို့ထံမှ အကြံပေးပုဂ္ဂိုလ်အဖြစ် တာဝန်ထမ်းဆောင်ရန် ကမ်းလှမ်းချက်ကို လက်ခံခဲ့ကြောင်း၊ မိမိ၏နိုင်ငံရေးကဏ္ဍသစ် ဖွင့်လှစ်ရန် အချိန်တန်ပြီဖြစ်ကြောင်း ချာဗလစ်က ပြောကြားခဲ့သည်။

၎င်းသည် လက်ရှိဥက္ကဋ္ဌအဖြစ် တာဝန်ယူထားသည့် ဆိုင်းယမ်း လူမှုတိုးတက်ရေး ဖောင်ဒေးရှင်းကို ဆိုင်းယမ်းလူမှု တိုးတက် ရေးပါတီ အဖြစ်သို့ အမည်ပြောင်းလဲခဲ့သည်။

သို့သော် ဗိုလ်ချုပ်ကြီးချာဗလစ်က ၎င်းအနေဖြင့် ဝန်ကြီးချုပ်ရာထူးအတွက် ဝင်ရောက် အရွေးချယ်ခံမည် မဟုတ်သလို ပါတီ ခေါင်းဆောင် တာဝန်လည်း ယူမည်မဟုတ်ကြောင်း ပြောကြားခဲ့သည်။ ၎င်း၏ကိုယ်စား ပါတီနှင့် ထိုင်းပြည်သူများအတွက် အလားအလာရှိသော ကိုယ်စားလှယ်လောင်းတစ်ဦးကို ရှာဖွေမည်ဟု သိရသည်။

လက်ရှိ ဝန်ကြီးချုပ် ပရာယွက်ချန်အိုချာ၏ စီမံခန့်ခွဲမှုများအပေါ် သဘောထား မှတ်ချက်ပေးရန် ချာဗလစ်က ငြင်းဆန်ခဲ့ သော်လည်း “တိုင်းပြည်အတွက် စိတ်ပူမိတယ်။ ဒါက ကျနော် ဘယ်လိုလုပ်ပေးလို့ရမလဲ။ တိုင်းပြည်က ဒုက္ခရောက်ပြီး ပြည်သူတွေ အကြွေးနဲ့ ကျန်ခဲ့ကြတယ်” ဟု ပြောကြားခဲ့သည်။

ထိုင်းနိုင်ငံရေးနဲ့ထိုင်းပြည်သူများ

နိုင်ငံရေး မတည်ငြိမ်မှုနှင့်ပတ်သက်၍ အာဏာသိမ်းနိုင်သည့် အလားအလာကို ထပ်မံမေးမြန်းရာ ချာဗလစ်က “စစ်တပ် ဝင်ရောက် စွက်ဖက်မည်ကို စိုးရိမ်ခြင်း မရှိကြောင်း၊ ပြည်သူများအတွက် အကျိုးရှိမည်ဆိုလျှင် ထောက်ခံနိုင်ကြောင်း” ဖြေကြားခဲ့သည်။

ယင်းကဲ့သို့ အာဏာသိမ်းမည်ဟု ထင်ကြေး ပေးနေမှုများကို ထိုင်းစစ်တပ်၏ အကြီးအကဲဖြစ်သူ ဗိုလ်ချုပ်ကြီး နရောင်ပန် ဂျစ်ကော်တေးက မကြာသေးမီက ပယ်ချခဲ့သည်။

Big Jiew ဟုလည်း အများက ခေါ်ကြသည့် ဗိုလ်ချုပ်ကြီး ချာဗလစ်သည် ၁၉၉၀ ပြည့်နှစ်တွင် စစ်တပ်အကြီးအကဲနှင့် စစ်ဦးစီးချုပ်အဖြစ်မှ နုတ်ထွက်ခဲ့ပြီး ၎င်း၏နိုင်ငံရေး ရည်မှန်းချက်များကို အကောင်အထည်ဖော်ရန် NAP ပါတီ (New Aspiration Party) ကို တည်ထောင်ခဲ့သည်။ NAP ပါတီသည် ယခုအခါ ပါတီတစ်ရပ် အနေဖြင့် မရှိတော့ပေ။

၎င်းသည် ၁၉၉၂ ခုနှစ်၊ မေလတွင် အာဏာသိမ်း စစ်ခေါင်းဆောင် ဗိုလ်ချုပ်ကြီး ဆူမင်ဒါ ကရာပရာယွန်းကို ဆန့်ကျင်သည့် လူထုအုံကြွမှု၌ ပါဝင်ခဲ့သော ထင်ရှားသည့် ထိုင်းနိုင်ငံရေးသမားများထဲတွင် ပါဝင်ခဲ့သည်။ NAP သည် ၁၉၉၆ ခုနှစ် ရွေး ကောက်ပွဲတွင် အနိုင်ရခဲ့ပြီး ထိုင်းနိုင်ငံ၏ ၂၂ ယောက်မြောက် ၀န်ကြီးချုပ် ဖြစ်လာခဲ့သည်။

ဗိုလ်ချုပ်ကြီး ချာဗလစ်သည် မြန်မာ့အာဏာသိမ်း ခေါင်းဆောင်ဖြစ်ခဲ့သူ ဗိုလ်ချုပ်ကြီးစောမောင်နှင့်လည်း ရင်းနှီးသော ဆက်ဆံရေး တစ်ရပ်ခဲ့သူ ဖြစ်သည်။

Source: Bangkok Post

CNI International News

တီဟီရန်၊ မေလ ၁၆

အီရန်နိုင်ငံ၌ စားနပ်ရိက္ခာရှားပါး၍ ကုန်ဈေးနှုန်းများ တက်လာခြင်းကြောင့် ဆန္ဒပြမှုများ ဖြစ်ပွားခဲ့ရာ လူ ၅ ဦး သေဆုံး ခဲ့ကြောင်း ဒေသတွင်းမီဒီယာများကို ကိုးကားလျက် အာရ်တီသတင်းဌာနက ရေးသားဖော်ပြခဲ့သည်။

တီဟီရန်(အီရန်)အစိုးရ တာဝန်ရှိသူများကတော့ အဆိုပါ ဖြစ်စဉ်များ၌ အသေအပျောက် ရှိနိုင်ခြေကို အတည်ပြု မထုတ်ပြန်ပေ။

ယခု သီတင်းပတ် အစောပိုင်းတွင် သမ္မတ အီဘရာဟင်ရိုင်စီက ကြေညာခဲ့သည့် ခြိုးခြံချွေတာရေး အစီအစဉ်၏ တစိတ်တပိုင်း အနေဖြင့် အစားအသောက် တင်သွင်းမှုဆိုင်ရာငွေကြေးကို ဖြတ်တောက်ရန် အစိုးရ၏ဆုံးဖြတ်ချက် ထွက်ပေါ်လာပြီးနောက် ဆန္ဒပြပွဲများ ပေါ်ပေါက်လာခဲ့သည်။

သမ္မတ၏ အစီအစဉ်သည် ပိတ်ဆို့ အရေးယူမှုများကြောင့် ယိုယွင်းလာသော စီးပွားရေးကို ကယ်တင်ရန် ရည်ရွယ်သည့်အပြင် ယူကရိန်းပဋိပက္ခကြောင့် ပိုမိုဆိုးရွားလာသည့် ငွေကြေးဖောင်းပွမှုကိုလည်း ပြန်လည်ဦးမော့လာဖို့ ရည်ရွယ်သည်။

ထောက်ပံ့ကြေးများ ဖျက်သိမ်းလိုက်ခြင်းကြောင့် ဟင်းချက်ဆီ၊ ကြက်သား၊ ဥနှင့် နို့ထွက် ပစ္စည်းကဲ့သို့ နေ့စဉ်စားသောက်ကုန် ဈေးများ အလွန်အမင်း ခုန်တက်သွားခဲ့သည်။

ငွေကြေးဖောင်းပွမှု ဂယက်ကြောင့် ဝင်ငွေနည်းသော နိုင်ငံသားများကို လစဉ်လက်ငင်း ငွေထုတ်ပေးမည်ဟု အီရန်အစိုးရက ကတိပြုခဲ့သော်လည်း မျက်မှောက်ကာလ အခြေအနေများကြောင့် နိုင်ငံတဝန်း စားသောက်ကုန် ရောင်းချသော ဆိုင်များရှေ့ တွင် လူများတန်းစီ၍ အခြေခံ စားသောက်ကုန်များကို အပင်ပန်းခံ ဝယ်ယူစားသုံးနေရသည်။

အီရန်သမ္မတ(GETTY IMAGES)

ဒိုရက် (Dorud) ၊ ဂျိုးနီဂန် (Jooneghan) ၊ ဘိုရူဂျက် (Borujerd) စသည့် အီရန်မြို့ကြီးများတွင် အစိုးရဆန့်ကျင်ရေး ချီတက် ပွဲများ ပေါ်ပေါက်လာခဲ့သည်။ အချို့လူစုလူဝေးများသည် ရုန်းရင်းဆန်ခတ်ဖြင့် ကုန်စုံဆိုင်များကို မီးတင်ရှို့ကြသည်။

မေလ ၁၃ ရက်ကတည်းက စတင်ခဲ့သော ဆန္ဒပြမှုများအတွင်း လူ ၅ ဦး သေဆုံးခဲ့ကြောင်း အတည်မပြုနိုင်သော ဗွီဒီယိုဖိုင် တစ်ခုကို ကိုးကားလျက် ဆော်ဒီအာရေဗျငွေကြေးဖြင့် ထုတ်လွှင့်နေသော အီရန်နိုင်ငံတကာသတင်းဌာနက ဖော်ပြခဲ့သည်။

ဆန္ဒပြမှု ဖြစ်စဉ်များကြောင့် လူပေါင်းဆယ်ဂဏန်း ဖမ်းဆီးထားကြောင်း IRNA သတင်းဌာနက ပြောကြားခဲ့သော်လည်း အသေအပျောက် စာရင်းကိုမူ မထုတ်ပြန်ခဲ့ပေ။

အီရန်နိုင်ငံတွင် တရားဝင် ငွေကြေးဖောင်းပွနှုန်းမှာ ၄၀ ရာခိုင်နှုန်း ဝန်းကျင်တွင် ရှိနေပြီး နိုင်ငံ၏လူဦးရေ ၈၂ သန်း၏ ထက်ဝက်နီးပါးသည် ယခုအခါ ဆင်းရဲနွမ်းပါးမှု ညွှန်းကိန်းမျဉ်းအောက်သို့ ကျဆင်းနေကြသည်။

ဖေဖော်ဝါရီလကုန်ပိုင်း၌ ယူကရိန်းကို ရုရှားကျူးကျော်မှု စတင်ခဲ့ပြီးနောက် စားသောက်ကုန် ဈေးနှုန်းများ နိုင်ငံတကာ ဈေးကွက်ထဲ၌ တဟုန်ထိုး တက်လာခဲ့ပြီး ကမ္ဘာ့စားနပ်ရိက္ခာ အကျပ်အတည်းအတွက် စိုးရိမ်စရာ ဖြစ်လာခဲ့သည်။

Source: အာရ်တီသတင်းဌာန

CNI International News

ဂျေရုဆလင်၊ မေလ ၁၄

အယ်လ်ဂျာဇီးယား သတင်းထောက် ရှီရင်းအဘူအကလက်ချ်၏ ဈာပနအခမ်းအနားတွင် အစ္စရေး အဓိကရုဏ်း နှိမ်နင်းရေး ရဲများက မေလ ၁၃ ရက်၌ ဝင်ရောက် ရိုက်နှက်ခဲ့ကြကြောင်း အေပီက ရေးသားဖော်ပြထားသည်။

၎င်းတို့လုပ်ရပ်သည် ဂျေရုဆလင်တွင် မျိုးဆက်တစ်ဆက်အတွင်း ပါလက်စတိုင်း အမျိုးသားရေးဝါဒ၏ အကြီးမားဆုံး ပြသမှု တစ်ရပ် အနေဖြင့် စီတန်းလှည့်လည်ခြင်းကို တုန်လှုပ်ခြောက်ခြားစရာ ဖြစ်စေခဲ့ကြောင်း အေပီသတင်းဌာနက ဆက်လက် ရေးသားဖော်ပြသည်။

အဆိုပါ အမျိုးသမီးသတင်းထောက် သေဆုံးပြီးနောက် အာရပ်ကမ္ဘာတဝန်း အကြမ်းဖက်မှုများနှင့် ဒေါသအငွေ့အသက်များ ထွက်ပေါ်လာဖွယ်ရှိကြောင်း အေပီက ရေးသားထားသည်။

သိမ်းပိုက်ခံထားရသော အနောက်ဘက်ကမ်းကို အစ္စရေးတို့ စီးနင်းတိုက်ခိုက်စဉ် မေလ ၁၁ ရက်က ရှီရင်းအဘူအကလက်ချ် ပစ်သတ် ခံရခြင်းဖြစ်ကြောင်း မျက်မြင် သက်သေများက ပြောကြားခဲ့သည်။

အရှေ့ဂျေရုဆလင်သည် အစ္စရေးနှင့် ပါလက်စတိုင်း နှစ်ဖက်စလုံးက ၎င်းတို့ပိုင်နက်ဖြစ်ကြောင်း အသီးသီး တောင်းဆိုနေကြပြီး အကြမ်းဖက်မှုများ ထပ်တလဲလဲ ဖြစ်နေခဲ့သည်။

အသက် ၅၁ နှစ်အရွယ်တွင် သေဆုံးသွားခဲ့သည့် အယ်လ်ဂျာဇီးယား သတင်းထောက် အဘူအကလက်ချ်သည် အစ္စရေးတို့ လွှမ်းမိုးမှုအောက်တွင် စတေးခဲ့ရသူ တစ်ဦးအဖြစ် အာရပ်ကမ္ဘာက ရှုမြင်ခံစားနေကြသည်။

သေဆုံးခဲ့သော သတင်းထောက် ရှီရင်းအဘူအကလက်ချ် ဈာပနာ(AP)

သူမသည် အယ်လ်ဂျာဇီးယား၏ ဂြိုဟ်တုရုပ်သံလိုင်းတွင် ၂၅ နှစ်ကြာ အမှုထမ်းခဲ့သည့် ဝါရင့်မီဒီယာသမားဖြစ်ပြီး ပါလက်စတိုင်း လူမျိုးများက ဒေသခံ သူရဲကောင်းတစ်ဦးအဖြစ် ကြည်ညိုလေးစားကြသည်။

၎င်းသည် အစ္စရေး တပ်ဖွဲ့ဝင်များ၏ တမင်တကာ ပစ်ခတ်မှုကြောင့် သေဆုံးခဲ့ရသည်ဟု ပါလက်စတိုင်း ရှေ့နေတစ်ဦးက ပမာဏ စစ်ဆေးတွေ့ရှိချက်ကို မေလ ၁၃ ရက် နှောင်းပိုင်းတွင် ထုတ်ဖော်ပြောကြားခဲ့သည်။ သေမှုသေခင်းအတွက် စုံစမ်း စစ်ဆေးမှုများ ဆက်လုပ်သွားမည်ဟု ၎င်းက ကတိပြုခဲ့သည်။

သူမ(အဘူအကလက်ချ်)၏ ဈာပနအခမ်းအနားသို့ ပါလက်စတိုင်း အလံများ ဝှေ့ယမ်းရင်း လူပေါင်းထောင်နှင့်ချီ၍ လိုက်ပါ ပို့ဆောင်ခဲ့ကြသည်။ ၂၀၀၁ ခုနှစ်က ပါလက်စတိုင်း ခေါင်းဆောင်တစ်ဦးဖြစ်သူ ဖိုင်ဇယ်ဟူစိန်နီ ကွယ်လွန်ပြီးနောက် ယခုဈာပနမှာ ဂျေရုဆလင် တွင် အစည်ကားဆုံး ပါလက်စတိုင်း ဈာပနအဖြစ် ယုံကြည်ရကြောင်း အေပီက ရေးသားဖော်ပြသည်။

သင်္ဂြိုဟ်ခြင်းမပြုမီ လူအုပ်ကြီးသည် ၎င်း၏ခေါင်းတလားကို ဝန်းရံ၍ လှည့်လည်ချီတက်ခဲ့ကြပြီး မြို့ဟောင်းအနီးရှိ ကက်သလစ် ဘုရားကျောင်းသို့ စုဝေးပို့ဆောင်ခဲ့ကြသည်။

အဓိကရုဏ်းဖြစ်နေစဉ်(AP)

မရှေးမနှောင်းမှာပင် အစ္စရေးရဲများ ဝင်ရောက်လာပြီး ဝမ်းနည်းပူဆွေးနေသူများကို တွန်းထိုးရိုက်နှက်ခဲ့ကြသည်။ လူအများ လက်ထဲမှ ပါလက်စတိုင်းအလံများကို အစ္စရေးရဲများ လုယူဆုတ်ဖြဲကြပြီး လူစုခွဲကြဖို့ ဗုံးခွဲခြောက်လှန့်ခဲ့သည်။

အစ္စရေးရဲများ၏ ဖြိုခွင်းမှုသည် အဘူအကလက်ချ်ကို ထပ်မံသတ်ဖြတ်ခြင်းနှင့် အတူတူပင်ဖြစ်ကြောင်း အယ်လ်ဂျာဇီးယား သတင်းထောက် တစ်ဦးဖြစ်သူ ဂျီဗာရာဘူဒိုင်ရီက ပြောသည်။

ဂျူး၊ မွတ်ဆလင်နှင့် ခရစ်ယာန်ဘာသာတို့ အထွတ်အမြတ်နေရာများ တည်ရှိရာ အရှေ့ဂျေရုဆလင်ကို ၁၉၆၇ ခုနှစ် အရှေ့ အလယ်ပိုင်း စစ်ပွဲတွင် အစ္စရေးတို့က သိမ်းပိုက်ထားခဲ့သည်။

Source: AP

CNI International News

အန်ကာရာ၊ မေလ ၁၄

ဖင်လန်နှင့်ဆွီဒင်တို့ မြောက်အတ္တလန္တိတ် စစ်စာချုပ်အဖွဲ့(နေတိုး)ထဲ ဝင်ရေးမှာ မိမိနိုင်ငံအတွက် အဆင်သင့် မဖြစ်ကြောင်း တူရကီသမ္မတ အာဒိုဂန်က မေလ ၁၃ ရက်၌ ပြောကြားလိုက်ပြီး နေတိုးအဖွဲ့ဝင် တူရကီအနေဖြင့် အနောက်နိုင်ငံများ၏ စစ်ရေး မဟာမိတ်ကဏ္ဍ၌ ဗီတိုအာဏာသုံးရန် လှုံ့ဆော်လာခဲ့ကြောင်း အေပီသတင်းအရ သိရသည်။

“ဖင်လန်တို့၊ ဆွီဒင်တို့နဲ့ ပတ်သက်တဲ့ တိုးတက်မှုတွေကို ကျနော်တို့ လိုက်ကြည့်နေပါတယ်။ ဒါပေမယ့် အကောင်းမြင်တဲ့ သဘောမျိုး မတွေ့ရပါဘူး” ဟု အာဒိုဂန်က သတင်းထောက်များကို ပြောကြားခဲ့သည်။

ဆွီဒင်နှင့် အခြား စကင်ဒီနေးဗီယား ကျွန်းဆွယ်ရှိ နိုင်ငံများ၏ ထောက်ခံချက်ဖြင့် လှုပ်ရှားနေကြသည့် ကာ့ဒ်စစ်သွေးကြွများ၊ တူရကီက အကြမ်းဖက် သမားများဟု မှတ်ယူထားသူများကို ထောက်ပြလျက် တူရကီသမ္မတက အထက်ပါအတိုင်း ပြောကြားခဲ့ခြင်း ဖြစ်သည်။

၁၉၈၀ ပြည့်နှစ်၌ ဂရိနိုင်ငံကို နေတိုး၏ စစ်တောင်ပံ ဖြန့်ကြက်မှုအဖြစ် ပြန်လည်လက်ခံရန် သဘောတူခဲ့သည့် အချိန်လိုမျိုး အတိတ်အမှားမျိုးကို တူရကီ ထပ်မလုပ်လိုတော့ကြောင်း ၎င်းက ဆက်လက်ပြောကြားခဲ့သည်။

ထိုစဉ်က နေတိုး၏ ကျောထောက်နောက်ခံဖြင့် ဂရိကို တူရကီဆန့်ကျင်ရေး သဘောထား ချမှတ်ရန် ခွင့်ပြုခဲ့မှုမျိုး ရှိခဲ့ကြောင်း ၎င်းက ပြန်ပြောင်း သုံးသပ်ပြသည်။

သို့သော် အာဒိုဂန်သည် အဆိုပါ နော်ဒစ်နိုင်ငံနှစ်နိုင်ငံက နေတိုးထဲ ဝင်ဖို့ ကြိုးပမ်းမှုမှန်သမျှကို ပိတ်ဆို့သွားမည်ဟုတော့ အတိအလင်း မပြောခဲ့ပေ။

ဖင်လန်နဲ့ဆွီဒင် ဝန်ကြီးချုပ် (GETTY IMAGES)

မည်သို့ပင် ဆိုစေကာမူ နေတိုးသည် အဖွဲ့ဝင်နိုင်ငံ ၃၀ ရှိရာတွင် နောက်ထပ် မည်သည့်နိုင်ငံ ပါဝင်နိုင်ကြောင်း ကိစ္စမျိုး၌ ဗီတိုအာဏာ သုံးနိုင်ကြောင်း ပြဋ္ဌာန်းထားသည်။

ယူကရိန်းကို ရုရှားကျူးကျော်မှုဖြစ်စဉ်သည် ဖင်လန်နှင့်ဆွီဒင်တို့ကို စစ်ရေးအရ ဟန်ချက်မညီသည့် အစဉ်အလာများ ပြန်လည် သုံးသပ်မိစေရန် တွန်းအားပေးခဲ့သည်။

ဖေဖော်ဝါရီ ၂၄ ရက်၌ ရုရှားက ယူကရိန်းပိုင်နက်ထဲသို့ ကျူးကျော် ဝင်ရောက်ပြီးနောက် နေတိုးအဖွဲ့ဝင် ဖြစ်ရေးအတွက် ဖင်လန်နှင့်ဆွီဒင်ပြည်သူများ စိတ်အားထက်သန်လာခဲ့ကြသည်။

အဆိုပါ လမ်းကြောင်းသို့ ထိုနှစ်နိုင်ငံ ဆက်လျှောက်ပါက ရုရှားနိုင်ငံအတွက် ထိုးနှက်ချက်တစ်ရပ် ထပ်တိုးလာမည်ဖြစ်သည်။

အမေရိကန်သမ္မတ ဂျိုးဘိုင်ဒန်သည် ဆွီဒင်ဝန်ကြီးချုပ် မက်ဒယ်လီ နာအန်ဒါဆင်နှင့် ဖင်လန်သမ္မတ ဆော်လီနီနစ်စတိုတို့ကို မေလ ၁၃ ရက်တွင် တွေ့ဆုံဆွေးနွေးခဲ့သည်။

ဘိုင်ဒန်သည် နေတိုး၏ တံခါးဖွင့် မူဝါဒနှင့် အနာဂတ် နိုင်ငံခြားရေးမူဝါဒ၊ လုံခြုံရေး အစီအစဉ်များ ဆုံးဖြတ်ပိုင်ခွင့်အတွက် ဖင်လန်နှင့်ဆွီဒင်တို့၏ အခွင့်အရေးကို အလေးပေး ထောက်ခံခဲ့ကြောင်း အိမ်ဖြူတော် ထုတ်ပြန်ချက်အရ သိရသည်။

Source: AP

CNI International News

ဝါရှင်တန်၊ မေလ ၁၄

အမေရိကန်သမ္မတ ဂျိုးဘိုင်ဒန်သည် ၎င်း၏ အမျိုးသားလုံခြုံရေး ထိပ်တန်း လက်ထောက်တစ်ဦးကို အာဆီယံဆိုင်ရာ သံအမတ်အဖြစ် ခန့်အပ်လိုက်ကြောင်း မေလ ၁၃ ရက်တွင် ကြေညာခဲ့သည်ဟု အေပီသတင်းတစ်ပုဒ်တွင် တွေ့ရသည်။

ထိုသို့ ခန့်အပ်ခြင်းသည် ပစိဖိတ်ဒေသအတွက် ၎င်းအစိုးရ၏ ကတိကဝတ်ကို အလေးပေးနိုင်ရန် ရည်ရွယ်ခြင်း ဖြစ်ကြောင်း သိရသည်။

ဝါရှင်တန်တွင် အာဆီယံခေါင်းဆောင်များနှင့် အထူးအစည်းအဝေးနေ့၌ တွေ့ဆုံ ဆွေးနွေးပြီးနောက် အာဆီယံအသင်းအတွက် အမေရိကန် ကိုယ်စားလှယ်အဖြစ် သံအမတ် တာဝန်ထမ်းဆောင်ရန် အိမ်ဖြူတော် အမျိုးသားလုံခြုံရေးကောင်စီ အရာရှိချုပ် ယိုဟန်နက်စ်အေဘရာဟင် (Yohannes Abraham) ကို ခန့်အပ်ရန် ဆုံးဖြတ်လိုက်ကြောင်း ဘိုင်ဒန်က ကြေညာခဲ့သည်။

မကြာသေးမီ လများအတွင်း ရုရှားက ယူကရိန်းကို ကျူးကျော်ခဲ့မှုကြောင့် ပစိဖိတ်ဒေသကို အာရုံစိုက်ရန်အတွက် ဘိုင်ဒန်၏ ကြိုးပမ်းမှုမှာ အတန်ငယ် တုံ့ဆိုင်းသွားခဲ့သည်။

အာဆီယံဆိုင်ရာ အမေရိကန်သံအမတ် ခန့်အပ်ခြင်းနှင့်အတူ အာရှတွင် ပိုမိုအာရုံစိုက်ရန်နှင့် ဒေသတွင်း တရုတ်နိုင်ငံ၏ အရှိန်အဝါ တိုးလာခြင်းကို တန်ပြန်ရန် အမေရိကန်၏ အခန်းကဏ္ဍ အားကောင်းလာစေဖို့ ဝါရှင်တန်၏ နိုင်ငံခြားရေးမူဝါဒကို သမ္မတ ဂျိုးဘိုင်ဒန်က ပြန်လည် သုံးသပ်နေခဲ့သည်။

အေဘရာဟင်ကို ဘိုင်ဒန်က ၎င်း၏အရင်းနှီးဆုံး အကြံပေးပုဂ္ဂိုလ် တစ်ဦးအဖြစ်လည်း ယခုအစည်းအဝေး၌ ပွဲထုတ်ခဲ့သည်။

အာဆီယံဆိုင်ရာ အမေရိကန်သံအမတ်အဖြစ် ခန့်အပ်ခံရသူ ယိုဟန်နက်စ်အေဘရာဟင်(GETTY IMAGES)

“သူက ကျနော် ဘယ်လိုတွေးလဲ သိတဲ့အတွက်ကြောင့် သူ့ကို အခုလို ခန့်အပ်ဖို့ ကျနော် နည်းနည်း စိတ်ပူတယ်ဗျ။ သူက ကျနော့်အကြောင်း ကောင်းကောင်းသိတယ်လေ” ဟု ဘိုင်ဒန်က အေဘရာဟင် အကြောင်းကို အာဆီယံခေါင်းဆောင်များနှင့် အရွှန်းဖောက်ရင်း ပြောကြားခဲ့သည်။

“ဒါပေမယ့် ဟာသပြောတာပါ။ ခင်ဗျားတို့ သူနဲ့ ကောင်းကောင်း အလုပ်ဖြစ်မယ်လို့ ကျနော်ထင်ပါတယ်။ သူက ကျနော့်ကို ပြန်ပြောပြလိမ့်မယ်။ ကျနော့်အစိုးရကို ခင်ဗျားတို့အကြောင်း ပြန်အစီရင်ခံပါလိမ့်မယ်” ဟု ဘိုင်ဒန်က ပြောကြားခဲ့သည်။

ယခု အေဘရာဟင်ကို သံအမတ်ခန့်အပ်မှု၌ အထက်လွှတ်တော်၏ အတည်ပြုချက် လိုအပ်နေသေးသည်။

အာဆီယံခေါင်းဆောင်များနှင့် တွေ့ဆုံနေသည့် အမေရိကန် ဒုတိယသမ္မတ(AP)

အမေရိကန်သည် အရှေ့တောင်အာရှဒေသ၏ ရာသီဥတု၊ ရေကြောင်းနှင့် ပြည်သူ့ကျန်းမာရေးဆိုင်ရာ အခြေခံ အဆောက် အအုံများ အားကောင်းလာစေဖို့ စီမံကိန်း အသစ်များအတွက် အမေရိကန်ဒေါ်လာ သန်း ၁၅၀ ကျော် ပေးအပ်ရန် အိမ်ဖြူတော် က ကတိပြုခဲ့ပြီးနောက် အာဆီယံအတွက် သီးသန့် သံအမတ်ခန့်အပ်ခြင်း ပေါ်ပေါက်လာခဲ့သည်။

မေလ ၁၃ ရက် အစောပိုင်းတွင် ဒုတိယသမ္မတ ကာမယ်လာဟားရစ်သည် အာဆီယံခေါင်းဆောင်များနှင့် တွေ့ဆုံခဲ့ပြီး “အမေရိကန်နှင့် အာဆီယံတို့သည် ဤဒေသအတွက် မျှော်မှန်းချက် တူညီကြပြီး နိုင်ငံတကာ စည်းမျည်းစည်းကမ်း၊ စံချိန် စံညွှန်းများအပေါ် ခြိမ်းခြောက်မှုများကို အတူတကွ လက်တွဲကာကွယ်သွားမည်ဖြစ်ကြောင်း” အလေးပေး ပြောကြားခဲ့သည်။

Source: AP

CNI International News

ဝါရှင်တန်၊ မေလ ၁၃

ယူကရိန်းကို ရုရှားကျူးကျော် စစ်နှင့်ပတ်သက်၍ ပိုမို ထုတ်ဖော် ပြောကြရန် အရှေ့တောင်အာရှနိုင်ငံများအသင်း(အာဆီယံ) မှ ခေါင်းဆောင်များကို အမေရိကန်သမ္မတ ဂျိုးဘိုင်ဒန်က စေ့ဆော်ဖို့ ကြိုးစားနေကြောင်း အေပီသတင်းတွင် တွေ့ရသည်။

သို့သော် မော်စကိုနှင့် နက်ရှိုင်းသော ဆက်ဆံရေး ကိုယ်စီရှိကြသည့် အာဆီယံဒေသတွင်း ၁၀ နိုင်ငံအတွက် ထိုသို့ ထုတ်ဖော် ပြောဆိုရေးမှာ သိမ်မွေ့သော ပြဿနာတစ်ရပ်အဖြစ် ဆက်ရှိနေသည်။

ဘိုင်ဒန်သည် နှစ်ရက်ကြာ ထိပ်သီး အစည်းအဝေး စတင်ရန်အတွက် အာဆီယံ ခေါင်းဆောင်များကို မေလ ၁၂ ရက် နှောင်း ပိုင်းတွင် အိမ်ဖြူတော်၌ ညစာစားပွဲဖြင့် တည်ခင်းဧည့်ခံ၍ အနီးကပ် နွေးထွေးစွာ ကြိုဆိုခဲ့သည်။

ယခု ထိပ်သီး အစည်းအဝေးသည် ၄၅ နှစ်တာ ကာလအတွင်း ဝါရှင်တန်မြို့တော်၌ ကျင်းပသည့် အာဆီယံ၏ ပထမဆုံး အစည်းအဝေးလည်း ဖြစ်သည်။

အိမ်ဖြူတော်သည် ယူကရိန်းစစ်ပွဲကို အာရုံစိုက်နေသော်လည်း တစ်ချိန်တည်းမှာပင် ပစိဖိတ်ဒေသဘက်တွင်လည်း အရှိန်မြှင့် တင်နေကြောင်း ပြသရန် ကြိုးစားလျက်ရှိသည်။

အရှေ့တောင်အာရှ၏ ရာသီဥတု၊ ရေကြောင်းနှင့် ပြည်သူ့ ကျန်းမာရေးဆိုင်ရာ အခြေခံ အဆောက်အအုံများ အားကောင်းလာ စေရန်အတွက် အမေရိကန်က စီမံကိန်းအသစ်ဖြင့် ဒေါ်လာ သန်း ၁၅၀ ကျော် ပေးအပ်ဖို့ ကတိပြု သွားမည်ဖြစ်ကြောင်း ယခု ထိပ်သီး အစည်းအဝေးတွင် ကြေညာခဲ့သည်။

ဘိုင်ဒန်နဲ့ အာဆီယံခေါင်းဆောင်များ(AP)

သို့သော် ရုရှား ကျူးကျော်မှုနှင့် ပတ်သက်၍ အာဆီယံ အဖွဲ့ဝင်များနှင့် သဘောတူညီချက်ရရန် ခက်ခဲနိုင်ကြောင်း ဘိုင်ဒန်က ကောင်းစွာ သိရှိထားသည်။

ယခု အာဆီယံ ခေါင်းဆောင်များတွင် ဆွေးနွေးသည့် အစီအစဉ်တွင် ယူကရိန်းကိစ္စလည်း ပါဝင်ကြောင်း အိမ်ဖြူတော် သတင်း ထောက် ဂျန်ဆာကီက မေလ ၁၂ ရက်တွင် ပြောကြားခဲ့သည်။ သို့သော် ထိပ်သီး အစည်းအဝေးအပြီး ထုတ်ပြန်ချက် ထွက်ရှိ လာသည့်အခါ ရုရှားကျူးကျော်မှုကို အာဆီယံဘက်မှ ထိရောက်စွာ ပြောဆိုခြင်း ရှိ/မရှိကိုမူ ဂျန်ဆာကီက ခန့်မှန်း ပြောကြား ခြင်း မရှိပေ။

“အာဆီယံအဖွဲ့ဝင် နိုင်ငံအတော်များများဟာ ရုရှားရဲ့ ရန်လိုတဲ့ လုပ်ရပ်ကို ဖိအားပေးဖို့ အရေးပါတဲ့ မိတ်ဖက်နိုင်ငံတွေ ဖြစ် တယ်လို့ ကျမ ပြောချင်ပါတယ်။ ဒီလို ဖိအားပေးဖို့ ပိတ်ဆို့အရေးယူမှုမှာ ပါဝင်တာ၊ ထောက်ခံတာနဲ့ အဲဒီ ပိတ်ဆို့မှုအတိုင်း လိုက်နာတာတို့ လိုအပ်ပါတယ်” ဟု ၎င်းက ပြောကြားခဲ့သည်။

အာဆီယံအဖွဲ့ဝင် အချို့ဖြစ်သည့် ဗီယက်နမ်၊ မြန်မာနှင့် လာအိုတို့သည် စစ်ဘက်ဆိုင်ရာ ပစ္စည်းကိရိယာများအတွက် ရုရှားကို မှီခိုနေရသည်မှာ နှစ်ပေါင်းများစွာ ကြာမြင့်ပြီဖြစ်သည်။ မော်စကိုအပေါ် အနောက်အုပ်စုက တိုက်ရိုက် အရေးယူပိတ်ဆို့မှုများ ချမှတ်ခြင်းကို အာဆီယံ ၁၀ နိုင်ငံအနက် စင်ကာပူ တစ်နိုင်ငံတည်းမှလွဲ၍ ကျန်နိုင်ငံများက သမ္မတ ဗလာဒီမာပူတင်ကို (သို့မဟုတ်) ရုရှားကျူးကျော်စစ်ကို အပြစ်တင် ဝေဖန်ခြင်းမှ ရှောင်ရှားခဲ့ကြသည်။

အင်ဒိုနီးရှားက ရုရှားကျူးကျော်မှုကို ၎င်းပြည်တွင်း၌ အများပြည်သူဆိုင်ရာ သဘောထား မှတ်ချက်များတွင် သတိကြီးကြီး စောင့်ကြည့်နေခဲ့ပြီး ဖိလစ်ပိုင်ကလည်း ရုရှားကို ပိတ်ဆို့ အရေးယူရန် အစီအစဉ်မရှိကြောင်း အတိအလင်း ပြောကြား ထား သည်။

ထိုင်းသည် ရုရှားကို ဆန့်ကျင်သည့် ကုလသမဂ္ဂအတွင်း မဲပေးမှုတွင် ပါဝင်ခဲ့သော်လည်း စစ်ပွဲနှင့်ပတ်သက်၍ ကြားနေ သဘောထားကိုသာ ဆက်လက်ထားရှိသည်။

အာဆီယံ ခေါင်းဆောင်များသည် မေလ ၁၃ ရက် (ယနေ့) တွင် အမေရိကန်နိုင်ငံခြားရေးဝန်ကြီးနှင့် တရားဝင်တွေ့ဆုံရန် စီစဉ်ထားပြီး ဘိုင်ဒန်က အာဆီယံခေါင်းဆောင်များ ရှေ့မှောက်၌ မိန့်ခွန်းပြောကြားမည် ဖြစ်သည်။

Source: AP

CNI International News

မိုဂါဒစ်ရှူး၊ မေလ ၁၃

ဆိုမာလီယာနိုင်ငံတွင် ကာလအတန်ကြာ နှောင့်နှေးနေခဲ့သည့် သမ္မတရွေးကောက်ပွဲကို မေလ ၁၅ ရက်တွင် ကျင်းပသွားရန် စီစဉ်ထားခြင်းဖြင့် ယမန်နှစ် သမ္မတသက်တမ်း ကုန်ဆုံးချိန်၌ ပြည်တွင်း တင်းမာမှုများ တိုးလာခဲ့သော ရှုပ်ထွေးလှသည့် ရွေးကောက်ပွဲ လုပ်ငန်းစဉ်ကို အပြီးသတ်တော့မည်ဖြစ်ကြောင်း အေပီသတင်းအရ သိရသည်။

လက်ရှိသမ္မတ မိုဟာမက် အဗ္ဗဒူလာဟီမိုဟာမက်၊ သမ္မတဟောင်းနှစ်ဦးနှင့် ဝန်ကြီးချုပ်ဟောင်းတစ်ဦး၊ အစိုးရထိပ်တန်း အရာ ရှိများနှင့် သတင်းတစ်ဦးတို့ကို သမ္မတလောင်းအဖြစ် ရွေးကောက်ပွဲ အာဏာပိုင်ကော်မရှင်၌ အမည်စာရင်း တင်သွင်းထားသည်။

ထိုအမည်စာရင်းထဲတွင် တစ်ချိန်က ဆိုမာလီယာ အစိုးရအဖွဲ့၌ နိုင်ငံခြားရေးဝန်ကြီးအဖြစ် တာဝန်ထမ်းခဲ့ဖူးသူ အမျိုးသမီး လွှတ်တော်အမတ် ဖော်ဇီယာ ယူဆက်ဖ် ဟာဂျီအဒမ်လည်း ပါဝင်ခဲ့သည်။

အယ်လ်ရှာဘတ် အမည်ရှိ အစ္စလာမ္မစ် အစွန်းရောက်အဖွဲ့ကြောင့် လုံခြုံရေး စိုးရိမ်နေသည့်ကြားမှ ယခုရွေးကောက်ပွဲကို ကျင်းပရန် စီစဉ်ခဲ့ခြင်း ဖြစ်သည်။

အာဖရိက ဦးချိုဒေသရှိ ဆိုမာလီယာနိုင်ငံတွင် ဖက်ဒရယ်အစိုးရကို ဆန့်ကျင်သည့် အနေဖြင့် မိုဂါဒစ်ရှူးမြို့တော်နှင့် အခြား နေရာများတွင် အစွန်းရောက်အဖွဲ့ လက်ချက်ကြောင့် အသေအပျောက်ရှိသော တိုက်ခိုက်မှုများ ဖြစ်ပွားနေဆဲရှိသည်။

လုံခြုံရေးများ ချထားသော ဆိုမာလီယာက ရွေးကောက်ပွဲပြင်ဆင်မှု(AP)

အယ်လ်ရှာဘတ် အစွန်းရောက်အဖွဲ့သည် မော်တာကျည်ဆန်နှင့် သေနတ်များသုံး၍ မကြာသေးမီ လများအတွင်း အာဖရိက သမဂ္ဂထံမှ ငြိမ်းချမ်းရေးလုပ်ငန်းများ တာဝန်ယူထားသည့် ဟာလန်းစစ်စခန်း၏ လုံခြုံရေးကို ထပ်တလဲလဲ အကဲစမ်းခဲ့ ကြသည်။

မေလ ၁၁ ရက်က အသေခံ ဗုံးခွဲမှုဖြစ်ပွားခဲ့ရာ အစိုးရတပ်သားနှစ်ဦး အပါအဝင် လူ ၄ ဦး သေဆုံးခဲ့သည်။ အဆိုပါ အသေခံ ဗုံးခွဲ တိုက်ခိုက်မှုမှာ သမ္မတအသစ် ရွေးချယ်ဖို့ ရွေးကောက်ပွဲဝင် လွှတ်တော်အမတ်များ မေလ ၁၅ ရက် တွေ့ဆုံကြမည့် အခိုင်အမာ ကာရံထားသော လေဆိပ်အနီး စစ်ဆေးရေးဂိတ်တွင် ဖြစ်ပွားခဲ့သည်။

ယခုရွေးကောက်ပွဲ မဲပေးကြမည့် ကိစ္စသည် ကနဦး စီစဉ်ထားခြင်းထက် ၁၅ လ နောက်ကျခဲ့သည်။ အကယ်၍ ဆိုမာလီ အာဏာပိုင်များ အနေဖြင့် မေလ ၁၇ ရက် နောက်ဆုံးထား၍ ရွေးကောက်ပွဲ မကျင်းပပေးလျှင် နိုင်ငံတကာ အလှူရှင်များထံမှ အရေးတကြီး လိုအပ်နေသော ငွေကြေးထောက်ပံ့မှုနှင့် ဆုံးရှုံးနိုင်ခြေများနေသည်။

ဆိုမာလီနိုင်ငံတွင် ရွေးကောက်ပွဲအကြို ကောက်ယူခဲ့သော စစ်တမ်းများအရ ထွက်ပေါ်လာမည့် ရလဒ်များကို မှန်းဆ၍ မရ သေးပေ။ ဖားမားဂျိုဟု လူသိများသော မိုဟာမက်သည် ပြန်လည် ရွေးကောက်တင်မြှောက်ခံရရန် ခက်ခဲနေပုံရသည်ဟု အေပီ သတင်းတွင် ဆက်လက် ရေးသားထားသည်။

၎င်းသည် ဝန်ကြီးချုပ် မိုဟာမက် ဟူစိန်ရိုဘဲနှင့်အတူ အာဏာလွန်ဆွဲမှုတွင် ပိတ်မိနေခဲ့ပြီး အစိုးရကို ထိန်းချုပ်ထားဆဲ ဖြစ်သည်။ ရိုဘဲသည် ယခုပွဲတွင် သမ္မတအဖြစ် ဝင်အရွေးခံမည် မဟုတ်သော်လည်း ၎င်းနှင့် အခြား ခေါင်းဆောင်ဟောင်းများသည် ထွက်ပေါ်လာမည့် မဲရလဒ်များကို အဆုံးအဖြတ် ပေးနိုင်သော အခန်းကဏ္ဍ၏ နောက်ကွယ်တွင် ရှိနေကြသည်။

Source: AP