CNI International News

အစ္စလာမ္မာဘတ်၊ မေလ ၂၆

ရာထူးမှ ဖယ်ရှားခံရသော ဝန်ကြီးချုပ်ဟောင်း အီမရန်ခမ်းကို အားပေးထောက်ခံသူများ အစ္စလာမ္မာဘတ်မြို့တော်အထိ ချီတက်နေခြင်းကို တားဆီးဟန့်တားရန် ပါကစ္စတန်ရဲတပ်ဖွဲ့က မျက်ရည်ယိုဗုံးနှင့် တုတ်များသုံး၍ မေလ ၂၅ ရက်နေ့က ဖြိုခွင်းခဲ့ကြောင်း တာဝန်ရှိသူများနှင့် မျက်မြင်သက်သေများ၏ပြောကြားချက်ကို ကိုးကားလျက် ရိုက်တာသတင်းဌာနက ရေးသားဖော်ပြခဲ့သည်။

အခြားမြို့ကြီးများတွင်လည်း ခမ်းကိုထောက်ခံသူများနှင့် ရဲများအကြား အလားတူ ရုန်းရင်းဆန်ခတ်ဖြစ်ခဲ့သည်။

ညွန့်ပေါင်းအဖွဲ့အတွင်း လုပ်ဖော်ကိုင်ဘက်များဆုံးရှုံးပြီး အယုံအကြည်မရှိ အဆိုတင်သွင်းခြင်းခံရ၍ ရာထူးမှ ပြုတ်ကျသွားခဲ့သည့် အီမရန်ခမ်းသည် ၎င်းအား ထောက်ခံသူများကို အစ္စလာမ္မာဘတ်မြို့တော်သို့ ချီတက်ရန်နှင့် အစိုးရ သစ်ဖျက်သိမ်းပြီး ရွေးကောက်ပွဲအသစ် ထပ်မံကျင်းပမည့်ရက်ကြေညာသည်အထိ ဆက်လက်လှုပ်ရှားကြရန် လှုံ့ဆော်ခဲ့သည်။

အစ္စလာမ္မာဘတ်မြို့တော်၏ အဝင်အထွက်လမ်းကြောင်းများအပြင် အရေးကြီးသောမြို့လယ်နေရာများကိုပါ ပိတ်ဆို့ကန့်သတ်ထားကြောင်း အစိုးရတာဝန်ရှိသူများက ပြောကြားခဲ့ကြသည်။

ချီတက်ဆန္ဒပြပွဲသို့ တက်ရောက်လာခြင်းကို ရဲတပ်ဖွဲ့များက မျက်ရည်ယိုဗုံးများသုံးပြီး နှိမ်နင်းနေစဉ်(ဓါတ်ပုံ-ရိုက်တာ)

“ကျနော်တို့ ပိတ်ဆို့ဟန့်တားလို့ မရပါဘူး” ဟု ပါကစ္စတန်အနောက်မြောက်ဘက်ရှိ ပက်ရှဝါမြို့မှ အစ္စလာမ္မာဘတ်သို့ သွားသည့် GT လမ်းမပေါ်တွင် မောင်းနှင်နေသော ကုန်တင်ကားတစ်ဦးပေါ် စီနင်းလိုက်ပါရင်း အီမရန်ခမ်းက ပြောကြားခဲ့သည်။

“ရွေးကောက်ပွဲကျင်းပမယ့်ရက် ကြေညာပြီးတဲ့အထိ ကျနော်တို့ အစ္စလာမ္မာဘတ်မှာ ဆက်ရှိနေဦးမှာပါ” ဟု ၎င်းက နောက်ပိုင်းတွင် တွစ်တာလူမှုကွန်ရက်ပေါ်သို့ ရေးသားလွှင့်တင်ခဲ့သည်။

ခမ်း၏ချီတက်မှုသည် တရားမဝင်ကြောင်း၊ ၎င်းသည့် ဆန္ဒပြသူများကို အစ္စလာမ္မာဘတ်မြို့တော်သို့ မကောင်းသောရည်ရွယ်ချက်ဖြင့် ခေါ်ဆောင်ရန် ကြိုးပမ်းနေကြောင်း အစိုးရက စွပ်စွဲထားသည်။

ခမ်းကို ထောက်ခံသူများသည် တောင်ပိုင်းဆိပ်ကမ်းမြို့ဖြစ်သည့် ကရာချိမြို့နှင့် လာဟိုးမြို့တို့တွင်လည်း လုံခြုံရေးရဲများနှင့် ထိပ်တိုက်ရင်ဆိုင်ခဲ့ကြသည်။

ကရာချိမြို့တွင် ရဲများနှင့် အဓိကရုဏ်းဖြစ်ပွားပြီး လူအုပ်ကြီးက အချုပ်ကားတစ်စီးကို မီးတင်ရှို့ခဲ့ကြသည်။ ထို့ပြင် အစ္စလာမ္မာဘတ်မြို့သို့သွားသည့် အဓိကလမ်းမကြီးဘေးရှိ သစ်ပင်များကိုလည်း ၎င်းတို့က မီးရှို့ခဲ့ကြကြောင်း တာဝန်ရှိသူများက ပြောကြားခဲ့သည်။

နိုင်ငံတကာငွေကြေးရန်ပုံငွေအဖွဲ့ (IMF) က ဒေါ်လာ ၆ ဘီလီယံ ဘဏ္ဍရေးကယ်ဆယ်မှုအစီအစဉ် ပြန်လည် စတင်နိုင်မှု ရှိ/မရှိ မကြေညာသေးမီ တောင်အာရှဒေသရှိ ပါကစ္စတန်နိုင်ငံတွင် အကြမ်းဖက်မှုများနှင့် မရေရာ မသေချာမှုများ တိုးပွားလာနေခဲ့သည်။

နိုင်ငံခြားအရန်ငွေကြေး ကျဆင်းခြင်း၊ ရူပီးတန်ဖိုးကျခြင်းနှင့် ငွေကြေးဖောင်းပွမှုများကြောင့် စီးပွားရေး အခြေအနေဆိုးရွားနေခြင်းကို ပါကစ္စတန်အစိုးရသစ်က မနည်းရုန်းကန်၍ ကိုင်တွယ်နေရသည်။

Source: Reuters

CNI International News

ဆစ်ဒနီ၊ မေလ ၂၅

ယခင်အစိုးရလက်ထက်၌ ကျဆင်းခဲ့သော နှစ်နိုင်ငံဆက်ဆံရေး ပြန်လည်မြှင့်တင်လိုလျှင် ကုန်သွယ်ရေး ပိတ်ဆို့မှုများ ရုပ်သိမ်း ဖယ်ရှားပေးရန် တရုတ်ကို ဩစတြေးလျအစိုးရသစ်က တောင်းဆိုခဲ့ကြောင်း အေပီသတင်းတစ်ပုဒ်တွင် တွေ့ရသည်။

ဩစတြေးလျဝန်ကြီးချုပ် အန်တိုနီအယ်လ်ဘန်နီးစ် ရွေးကောက်ပွဲ အနိုင်ရခြင်းနှင့်ပတ်သက်၍ ဂုဏ်ယူဝမ်းမြောက်ကြောင်း သဝဏ်လွှာတစ်စောင်အား တရုတ်ဝန်ကြီးချုပ်က ပေးပို့ခဲ့ရာ ဩစတြေးလျနှင့် တရုတ်တို့ အဆင့်မြင့် တာဝန်ရှိသူ အချင်းချင်း ဆက်ဆံရေးအပေါ် ဘေဂျင်း၏ (၂)နှစ် ပစ်ပယ်ထားခဲ့မှုမှ ဖြေလျော့လာကြောင်း ရှုမြင်နေကြသည်။

တရုတ်ဝန်ကြီးချုပ် လီခဲ့ချန်က “တရုတ်သည် ဩစတြေးလျနှင့် ပူးပေါင်းဆောင်ရွက်ရန် အသင့်ရှိကြောင်း” ပြောကြားခဲ့ခြင်း အားဖြင့် နှစ်နိုင်ငံဆက်ဆံရေးကို မြှင့်တင်လာခဲ့သည်။

သို့သော် မိမိတို့နိုင်ငံတွင် ၂၀၁၃ ခုနှစ် လက်ဝဲယိမ်း လေဘာပါတီ အာဏာရ လာကတည်းက နှစ်နိုင်ငံ ဆက်ဆံရေး စတင် ပြောင်းလဲခဲ့သူမှာ ဩစတြေးလျ မဟုတ်ဘဲ တရုတ်သာဖြစ်ကြောင်း အယ်လ်ဘန်နီးစ်က တုံ့ပြန်ခဲ့သည်။

မကြာသေးမီ နှစ်များအတွင်း တရုတ်သည် ကျောက်မီးသွေး၊ ဝိုင်၊ မုယောစပါး၊ အမဲသားနှင့် ပင်လယ်စာများ အပါအဝင် ဒေါ်လာ ဘီလီယံပေါင်းများစွာ တန်ဖိုးရှိသည့် ဩစတြေးလျ တင်သွင်းကုန်များအတွက် တရားဝင်ခြင်း၊ မဝင်ခြင်း စသည့် ကုန်သွယ်ရေး ပိတ်ဆို့မှုများစွာ ချမှတ်ခဲ့သည်။

“ဩစတြေးလျကို ပိတ်ဆို့ အရေးယူထားတာ တရုတ်ပါပဲ” ဟု တိုကျို ထိပ်သီး အစည်းအဝေးအတွင်း သတင်းထောက်များနှင့် သီးခြားတွေ့ဆုံရာ၌ အယ်လ်ဘန်နီးစ်က ပြောကြားခဲ့သည်။

တရုတ်ဝန်ကြီးချုပ် လီခဲ့ချန် (AP)

Quad နိုင်ငံများ၏ အဆိုပါ ထိပ်သီး အစည်းအဝေးသို့ အမေရိကန်သမ္မတ ဂျိုးဘိုင်ဒန်၊ ဂျပန်ဝန်ကြီးချုပ် ဖူမီယိုကီရှီဒါ၊ အိန္ဒိယ ဝန်ကြီးချုပ် နရိန္ဒရာမိုဒီတို့နှင့်အတူ ဩစတြေးလျဝန်ကြီးချုပ် အယ်လ်ဘာနီးစ်လည်း တက်ရောက်ဆွေးနွေးခဲ့သည်။

“အဲဒီလို ပိတ်ဆို့ထားတဲ့ အပေါ်မှာ အကြောင်းပြချက် ခိုင်ခိုင်လုံလုံ မတွေ့ရလို့ ဖယ်ရှားသင့်ပါတယ်” ဟု ၎င်းက ဆက်လက် ပြောကြားခဲ့သည်။

ဩစတြေးလျ ဘဏ္ဍာရေးဝန်ကြီး ဂျင်ချယ်မာကလည်း “လွတ်လပ်သော ကုန်သွယ်ရေး မိတ်ဖက်များအကြား ကုန်သွယ်ရေး ဆိုင်ရာ ပိတ်ဆို့ထားမှုများ ချက်ချင်းရုပ်သိမ်းပေးရန်” တရုတ်ကို တိုက်တွန်းခဲ့သည်။

“ဒီလို ပိတ်ဆို့ အရေးယူမှုတွေနဲ့ အခွန်စည်းကြပ်တာတွေ ရုပ်သိမ်းပေးဖို့ ကျနော်တို့ မြင်ချင်ပါတယ်။ အဲဒါတွေက ကျနော်တို့ စီးပွားရေးကို ထိတယ်ဗျ။ အဲဒီဆက်ရှိနေဦးမယ်ဆိုရင် ဩစတြေးလျက ကျနော်တို့ အလုပ်ရှင်တွေ၊ အလုပ်သမားတွေရဲ့ ဘဝတွေ ပိုခက်ခဲတာမို့လို့ ဒီလိုပိတ်ဆို့တဲ့ အစီအမံတွေ ရုပ်သိမ်းစေချင်ပါတယ်” ဟု ဂျင်ချယ်မာက မေလ ၂၅ ရက် (ယနေ့)တွင် ပြောကြားခဲ့သည်။

တရုတ်နိုင်ငံခြားရေးဝန်ကြီး ဝမ်ယိသည် မကြာမီ ၎င်း၏ ၁၀ ရက်ကြာ ခရီးစဉ်အဖြစ် ဆော်လမွန်ကျွန်းစု၊ ကီရီဘာတီ၊ ဆာမို အာ၊ ဖီဂျီ၊ တွန်ဂါ၊ ဗာနူအာတူ၊ ပါဝူဝါးနယူဂီနိနှင့် အရှေ့တီမော စသည့် အင်ဒို-ပစိဖိတ်ဒေသသို့ သွားရောက်မည်ဟု သိရသည်။

တောင်ပစိဖိတ်ဒေသတွင် တရုတ်ဩဇာ လွှမ်းမိုးလာမှုကို တန်ပြန်ရန်အတွက် အလျင်အမြန် လုပ်ဆောင်နေကြချိန်၌ ဩစတြေးလျ နိုင်ငံခြားရေးဝန်ကြီး ပဲနီဝေါင်သည် ဂျပန်နိုင်ငံ၊ တိုကျိုမြို့မှ ၎င်း၏နိုင်ငံ၊ ဆစ်ဒနီမြို့သို့ ပြန်လည်ရောက်ရှိပြီး နောက်တစ်နေ့ မေလ ၂၆ ရက်တွင် ဖီဂျီနိုင်ငံသို့ လေကြောင်းခရီးဖြင့် သွားရောက်မည်ဖြစ်ကြောင်း ဩစတြေးလျ(The Australian) သတင်းစာက ရေးသားဖော်ပြခဲ့သည်။

Source: AP

CNI International News

ဒါဘော့၊ မေလ ၂၅

အမေရိကန် ဘီလီယံနာသူဌေးကြီး ဂျော့ခ်ျဆိုးရော့စ်က “ယူကရိန်းကို ရုရှားကျူးကျော်မှုသည် တတိယကမ္ဘာစစ်၏ အစ ဖြစ်နိုင်ကြောင်း” မေလ ၂၄ ရက်တွင် ပြောကြားခဲ့သည်။

ထို့နောက် လွတ်လပ်သော ယဉ်ကျေးမှုကို ထိန်းသိမ်းရန် အကောင်းဆုံးနည်းလမ်းမှာ သမ္မတ ဗလာဒီမာပူတင်၏ တပ်ဖွဲ့များကို အနောက်နိုင်ငံများက အနိုင်ယူရေးဖြစ်ကြောင်း မှတ်ချက်ချခဲ့သည်။

၁၉၉၂ ခုနှစ်တွင် စတာလင်ပေါင်ဖြင့် လောင်းကစားလုပ်၍ ကမ္ဘာကျော်ကြားခဲ့ပြီး ငွေကြေးကစားကွက် ကျင်လည်သူ ဆိုးရော့စ်သည် ယခုအခါ အသက် ၉၁ နှစ် ရှိပြီဖြစ်ပြီး ၎င်း၏ ပွင့်လင်းလူ့အဖွဲ့အစည်းနှင့် ပိတ်ဆို့လူ့အဖွဲ့အစည်းများဖြင့် တရုတ်နှင့် ရုရှား ကဲ့သို့သော အသိုင်းအဝိုင်းများကြားတွင် ယူကရိန်းစစ်ပွဲအရှိန် အတက်အကျ ကစားရန် လိုလားနေသည်။

“ကျူးကျော် ဝင်ရောက်မှုသည် တတိယကမ္ဘာစစ်၏အစ ဖြစ်နိုင်ပြီး မိမိတို့ယဉ်ကျေးမှုအရ ထိုသို့ ကျူးကျော်သည့် အလေ့အထ ဆက်လက် ရှင်သန်နိုင်မည် မဟုတ်ကြောင်း” ဂျော့ချ်ဆိုးရော့စ်က ဒါဘော့ (Davos) ကမ္ဘာ့စီးပွားရေးဖိုရမ်သို့ ပြောကြားသည့် မိန့်ခွန်းထဲတွင် ထည့်ပြောခဲ့ကြောင်း ၎င်း၏ရုံးက သတင်းထုတ်ပြန်ခဲ့သည်။

“ကျနော်တို့ရဲ့ ယဉ်ကျေးမှု(အလေ့အထ)ကို ထိန်းဖို့ အကောင်းဆုံးနဲ့ အဖြစ်နိုင်ဆုံး နည်းလမ်းကတော့ ပူတင်ကို အမြန်ဆုံး နည်းနဲ့ အနိုင်ယူဖို့ပါပဲ။ အဲဒါ အဓိကအချက်ပဲ” ဟု ၎င်းက ပြောကြားခဲ့သည်။

သမ္မတ ဗလာဒီမာပူတင် (GETTY IMAGES)

ယူကရိန်းတွင် အထူးစစ်ဆင်ရေး ဆင်နွှဲနေပြီး ကရင်မလင်၏ ရည်မှန်းချက်အားလုံး ပြည့်မီရမည်ဟု အစောပိုင်းက ပြောကြားနေခဲ့သည့် ပူတင်သည် ယခုကဲ့သို့ ကျူးကျော်မိခြင်းအတွက် အမှားကြီး မှားခဲ့ပြီဟု နောက်ပိုင်း သဘောပေါက်လာသည့် အလျောက် အပစ်အခတ်ရပ်စဲရေး ညှိနှိုင်းဖို့ ပြင်ဆင်နေကြောင်း ဆိုးရော့စ်က ထပ်လောင်း ပြောကြားခဲ့သည်။

“ဒါပေမယ့် သူပြောတဲ့ အပစ်အခတ်ရပ်စဲရေးက ယုံကြည်စရာမရှိလို့ ဖြစ်နိုင်ခြေမရှိပါဘူး။ ပျော့ကွက်ရှိလာတဲ့ ပူတင်က သူ့ကိုယ်သူ မှန်းဆမရ ဖြစ်နေပြီ” ဟု ၎င်းက ဖြည့်စွက် ပြောကြားခဲ့သည်။

ဥရောပ လိုအပ်ချက်၏ ၄၀ ရာခိုင်နှုန်းဖြစ်သော လက်ရှိ လည်ပတ်သုံးစွဲနေသည့် ရုရှားသဘာဝဓာတ်ငွေ့ကို ပူတင် ပိတ်ပစ် နိုင်သည်ကို ဥရောပသမဂ္ဂ (EU) က နားလည်ထားရမည်ဟု ဆိုးရော့စ်က ထောက်ပြခဲ့သည်။

ပြီးခဲ့သည့် ဖေဖော်ဝါရီ ၂၄ ရက်တွင် ယူကရိန်းကို ရုရှားကျူးကျော်စစ် စတင်ခဲ့သဖြင့် လူထောင်နှင့်ချီ၍ သေဆုံးခဲ့ရပြီး သန်း နှင့်ချီ၍ အိုးမဲ့အိမ်မဲ့ ဖြစ်ခဲ့ရသည်။ ထိုဖြစ်စဉ်သည် ၁၉၆၂ ခုနှစ် ကျူးဘားဒုံးကျည် အကျပ်အတည်း နောက်ပိုင်း ရုရှားနှင့် အမေရိကန် တို့ကြား အဆိုးရွားဆုံး ထိပ်တိုက် ရင်ဆိုင်မှု ဖြစ်လာမည်ကို စိုးရိမ်စရာများလည်း တိုးပွားလာခဲ့သည်။

Source: Reuters

CNI International News

ပြုံယမ်း၊ မေလ ၂၅

အမေရိကန်သမ္မတ ဂျိုးဘိုင်ဒန်သည် အာရှနိုင်ငံများသို့ ခရီးလှည့်လည်ရင်း နျူကလီးယားပိုင်ဆိုင်သည့် မြောက်ကိုရီးယားကို ဟန့်တားဖို့ အစီအမံသစ် ချမှတ်ရန် သဘောတူညီခဲ့ပြီးနောက် တိုက်ချင်းပစ် ပဲ့ထိန်းဒုံးကျည် (ICBM) တစ်စင်း အပါအဝင် ဒုံးကျည် ၃ စင်းကို ပြုံယမ်းက မေလ ၂၅ ရက် (ယနေ့) ပစ်ခတ်ခဲ့ကြောင်း ရိုက်တာသတင်းဌာနက ရေးသားဖော်ပြသည်။

မြို့တော်ပြုံယမ်း လေဆိပ်အနီးရှိ ဒုံးကျည်စမ်းသပ်မှု အချက်အချာနေရာမှ တစ်နာရီအတွင်း ဒုံးကျည် ၃ စင်းကို ဆက်တိုက် ပစ်လွှတ်ခဲ့ကြောင်း တောင်ကိုရီးယား ပူးတွဲစစ်ဦးစီးချုပ်များအဖွဲ့ (JCS) က သတင်းထုတ်ပြန်ခဲ့သည်။

မေလ ၂၅ ရက် (ယနေ့) ပထမဆုံး စတင်ပစ်လွှတ်သော ဒုံးကျည်မှာ တိုက်ချင်းပစ် အမျိုးအစား ဖြစ်ပုံရကြောင်း၊ ဒုတိယမြောက် အမျိုးအမည်မသိ ဒုံးကျည်တစ်စင်းမှာတော့ ပျံသန်းနေစဉ် ပျက်ကျသွားပုံရကြောင်း၊ တတိယမြောက် ဒုံးကျည်မှာ တာတိုပစ် ပဲ့ထိန်းဒုံးကျည် (SRBM) ဖြစ်ကြောင်း JCS ၏ သတင်းထုတ်ပြန်ချက်ထဲတွင် ဆက်လက် ဖော်ပြထားသည်။

အဆိုပါလုပ်ရပ်ကို တုံ့ပြန်သည့်အနေဖြင့် မြေပြင်ပစ် ဒုံးကျည် စမ်းသပ်မှု အပါအဝင် အမေရိကန်၏ ကြည်းတပ် နည်းဗျူဟာသုံး ဒုံးကျည်စနစ် (ATACMS) နှင့် တောင်ကိုရီးယား၏ တာတိုပစ်ပဲ့ထိန်းဒုံးကျည် (Hyunmoo-2 SRBM) တို့ ပေါင်းစပ်၍ စစ်ရေး လေ့ကျင့်ခဲ့ကြကြောင်း နှစ်ဘက်စစ်တပ်များက အသီးသီး ပြောကြားခဲ့ကြသည်။

“မိမိတို့ စစ်အင်အား ပြသမှုသည် တိုက်ချင်းပစ် ဒုံးကျည်ပစ်လွှတ်ခြင်း အပါအဝင် မြောက်ကိုရီးယား၏ ရန်စမှုများကို ပြတ်ပြတ် သားသား တုံ့ပြန်သွားမည့် မိမိတို့၏ သန္နိဋ္ဌာန်ကို ပြသရန် ရည်ရွယ်ကြောင်း၊ ရန်လိုရန်စခြင်း၏ ဇာစ်မြစ်ကို ခွဲခြမ်း စိတ်ဖြာရန် မိမိတို့တွင် အသင့်ရှိနေကြောင်း” ဟု JCS ၏ ထုတ်ပြန်ချက်ထဲ၌ ရေးသားထားသည်။

ဘိုင်ဒန်နဲ့ ယွန်ဆော့ရွဲ (AP)

မြောက်ကိုရီးယားသည် ၎င်း၏အကြီးမားဆုံး တိုက်ချင်းပစ် ဒုံးကျည်များကို ၅ နှစ်တာ ကာလအတွင်း ပထမဆုံးအကြိမ်အဖြစ် ယခုနှစ်အတွင်း အရှိန်အဟုန် ကောင်းကောင်းဖြင့် ပစ်လွှတ်နေခဲ့သည်။ ၎င်းသည် ၂၀၁၇ ခုနှစ်နောက်ပိုင်း ပထမဆုံး နျူကလီး ယား စမ်းသပ်ရန်လည်း ပြင်ဆင်နေပုံရကြောင်း ရိုက်တာသတင်းတွင် ဆက်လက် ဖော်ပြထားသည်။

ဘိုင်ဒန်၏ ပထမဆုံးသော အာရှခရီးစဉ်အတွင်း တောင်ကိုရီးယားသမ္မတ ယွန်ဆော့ရွဲနှင့် ထိပ်သီးတွေ့ဆုံမှု အပြီးတွင် မြောက်ကိုရီးယား အနေဖြင့် နောက်ထပ် လက်နက်စမ်းသပ်ရန် အသင့်ဖြစ်‌ကြောင်း အမေရိကန်နှင့် တောင်ကိုရီးယား အစိုးရ တာဝန်ရှိသူများက မကြာသေးမီက သတိပေးခဲ့သည်။

မေလ ၁၀ ရက်တွင် သမ္မတတာဝန် စတင်ထမ်းဆောင်ခဲ့သော ယွန်ဆော့ရွဲသည် ၎င်း၏ပြည်တွင်း အမျိုးသားလုံခြုံရေး ကောင်စီ အစည်းအဝေးကို ခေါ်ယူကျင်းပခဲ့ပြီး ယခုကဲ့သို့ မြောက်ကိုရီးယား၏ နောက်ဆုံး ဒုံးကျည်ပစ်လွှတ်မှု ဖြစ်စဉ်သည် အတိအလင်း ရန်စခြင်း ဖြစ်ကြောင်း၊ အထူးသဖြင့် ဘိုင်ဒန်၏ ခရီးစဉ်နှင့် မရှေးမနှောင်း ပစ်လွှတ်သဖြင့် ပြင်းပြင်းထန်ထန် ရှုတ်ချကြောင်း ပြောကြားခဲ့သည်။

ဘိုင်ဒန်နှင့် သဘောတူ ထားသည့်အတိုင်း ကိုရီးယားကျွန်းဆွယ်၌ နျူကလီးယား တားဆီးမှုကို တိုးမြှင့်လုပ်ဆောင်ရန်နှင့် ကာကွယ်ရေး အနေအထား ပေါင်းစပ်သွားရန် ၎င်း၏ လက်ထောက်များကို ယွန်ဆော့ရွဲက အမိန့်ပေးခဲ့ကြောင်း သမ္မတရုံးက သတင်းထုတ်ပြန်ခဲ့သည်။

Source: Reuters

CNI International News

ဘေဂျင်း၊ မေလ ၂၄

တရုတ် ပြည်မကြီးက ထိုင်ဝမ်ကျွန်းကို အင်အားသုံး သိမ်းပိုက်ပါက အမေရိကန်က စစ်ရေးအရ ကြားဝင်စွက်ဖက်မည်ဟု ပြော ကြားခြင်းဖြင့် ဘိုင်ဒန် အစိုးရအဖွဲ့သည် တရုတ်တစ်နိုင်ငံတည်း မူဝါဒကို ဖောက်ဖျက်ရန် နောက်ထပ် ခြေတစ်လှမ်း လှမ်းနေ ကြောင်း၊ ဘိုင်ဒန်၏ မှတ်ချက်များသည် တရုတ်နိုင်ငံအပေါ်  ပြင်းထန်သော ဆန့်ကျင်မှုကို ဖြစ်စေခဲ့ကြောင်း ဘေဂျင်း အာဘော် ဂလိုဘယ်တိုင်းမ်က ရေးသားဖော်ပြသည်။

ထိုင်ဝမ်ကျွန်း၏ လက်တွေ့ "လွတ်လပ်ရေး" ကို ကူညီရန် အမေရိကန်နှင့် ဂျပန်တို့က ယူကရိန်း အကျပ်အတည်းအား အသုံး ချလာခြင်းကြောင့် ၎င်းတို့၏ အကြံအစည်များမှာ တရုတ်ပြည်မကြီး၏ ပိုမိုပြင်းထန်သော တုံ့ပြန်မှုနှင့် ရင်ဆိုင်ရမည် ဖြစ် ကြောင်း သုံးသပ်လေ့လာသူများက သတိပေးထားသည်။

ပြည်မကြီးသည် မိမိ၏ အဓိက အကျိုးစီးပွားနှင့် ပတ်သက်လာလျှင် အလျှော့အတင်း လုပ်မည် မဟုတ်ပေ။

ဂျပန်ဝန်ကြီးချုပ် ဖူမီယိုကီရှီဒါနှင့် မေလ ၂၃ ရက် ပထမဆုံး ထိပ်သီး ဆွေးနွေးပွဲအပြီးတွင် တရုတ်ပြည်မကြီးက ထိုင်ဝမ်ကျွန်း ကို အင်အားသုံး သိမ်းယူခဲ့လျှင် စစ်ရေးအရ အမေရိကန် ဝင်ရောက် စွက်ဖက်မည်ဖြစ်ကြောင်း ဘိုင်ဒန်က ပြောကြားခဲ့သည်။

ဘိုင်ဒန်နဲ့ ကီရှီဒါ(Reuters)

ကီရှီဒါကလည်း "ယူကရိန်းကဲ့သို့ လက်ရှိအနေအထားကို အင်အားသုံး၍ ပြောင်းလဲရန် တစ်ဖက်သတ် ကြိုးပမ်းမှုများကို အင်ဒို-ပစိဖိတ်ဒေသတွင် မည်သည့်အခါမျှ သည်းမခံကြောင်း" ပြောကြားခဲ့သည်။

ကီရှီဒါနှင့် ဘိုင်ဒန်တို့သည် ထိုင်ဝမ် ရေလက်ကြားတွင် ငြိမ်းချမ်းရေးနှင့် တည်ငြိမ်ရေး၏ အရေးပါမှုကို အလေးပေး ဆွေးနွေးခဲ့ ကြောင်းလည်း ကီရှီဒါက ပြောကြားခဲ့သည်။

ဘိုင်ဒန်၏ စကားလုံးများကို ကမ္ဘာ့မီဒီယာများက အာရုံစိုက်၍ ခေါင်းကြီးပိုင်းမှ ကောက်နုတ် ရေးသားခဲ့ကြသည်။ တရုတ်နိုင်ငံ သည် အမေရိကန်သမ္မတ၏ ယခု သဘောထား မှတ်ချက်ကို ပြတ်ပြတ်သားသား ဆန့်ကျင်ကြောင်း တုံ့ပြန်ခဲ့သည်။

ထိုင်ဝမ်ကျွန်းသည် တရုတ်နိုင်ငံ၏ ခွဲထွက်၍မရသော အစိတ်အပိုင်း တစ်ခုဖြစ်ပြီး ထိုင်ဝမ်အရေး၌  ပြည်ပမှ ဝင်ရောက် စွက် ဖက်စရာ မလိုဘဲ “တရုတ်ပြည်တွင်းရေး သက်သက်ဖြစ်တယ်” ဟု မေလ ၂၃ ရက် ပုံမှန် သတင်းစာ ရှင်းလင်းပွဲ တစ်ရပ်တွင် တရုတ်နိုင်ငံခြားရေးဌာန ပြောရေးဆိုခွင့်ရှိသူ ဝမ်ဝီဘင် (Wang Wenbin) က ပြောကြားခဲ့သည်။

ထို့ပြင် တရုတ်နိုင်ငံသည် နယ်မြေ တည်ငြိမ်မှုနှင့် အချုပ်အခြာအာဏာ ပိုင်ဆိုင်မှုအပေါ် ၎င်း၏အဓိက အကျိုးစီးပွားများနှင့် သက်ဆိုင်သည့် အရေးကိစ္စများတွင် အပေးအယူလုပ်မည် မဟုတ်ပေ။

တရုတ်စစ်တပ်

ဘိုင်ဒန်သည် ထိုင်ဝမ်ကျွန်းအား လုံခြုံရေး အာမခံချက် ပေးခဲ့ခြင်းမှာ ယခုအကြိမ်မှာ ပထမဆုံးအကြိမ် မဟုတ်သလို ၎င်း သဘောထား မှတ်ချက်များသည် လွဲချော်ခြင်း မတွေ့ရသော်လည်း အမေရိကန်က ၎င်း၏ တရုတ်တစ်နိုင်ငံတည်း မူဝါဒကို ထပ်မံဖျက်သိမ်းမည့် အန္တရာယ်များသော အရိပ်အမြွက်ပြသမှုဟု လေ့လာသုံးသပ်သူများက ပြောကြားခဲ့သည်။

၂၀၂၁ ခုနှစ်၊ အောက်တိုဘာလ ကလည်း ဘိုင်ဒန်က တရုတ်ပြည်မကြီး၏ တိုက်ခိုက်လာနိုင်ခြေ အလားအလာတွင် ထိုင်ဝမ်ကို အမေရိကန်သည် ကာကွယ်သွားမည်ဟု ပြောကြားခဲ့ဖူးသည်။

၂၀၂၁ ခုနှစ်က အတိုင်းပင် မကြာသေးမီကလည်း အိမ်ဖြူတော်မှ အမည်မဖော်လိုသူ အရာရှိတစ်ဦးက ထိုင်ဝမ်ကျွန်းအပေါ် အမေရိကန်၏ မူဝါဒကို ပြောင်းလဲမည်မဟုတ်ကြောင်း ပြောကြားခဲ့ခြင်းကို အခြေခံ၍ ရိုက်တာသတင်းဌာန ရေးသား ဖော်ပြခဲ့ သည်။

အဆိုပါ အရေးကိစ္စနှင့်ပတ်သက်ပြီး အမေရိကန်အစိုးရ၏ အစဉ်အလာ သဘောထားနှင့် ကွဲလွဲပြီး လှုပ်ရှားမှုများစွာသည်  ဘိုင်ဒန်အစိုးရ အနေဖြင့် ၎င်းမူဝါဒမှ ရုန်းထွက်ရန် နောက်ထပ် ခြေလှမ်းတစ်လှမ်းကို လှမ်းနေပြီဖြစ်ကြောင်း ဂလိုဘယ်တိုင်းမ် က ရေးသားထားသည်။

Source: Global Times

CNI International News

ဘာလင်၊ မေ ၂၄

ယူကရိန်းသို့ ရုရှားကျူးကျော်စစ်နှင့် အခြားအသေအပျောက်များသော ပဋိပက္ခများအပါအဝင် အကြမ်းဖက်မှု၊ လူ့ အခွင့်အရေးချိုးဖောက်မှုများနှင့် နှိပ်စက်ညှင်းပန်းမှုများကြောင့် ထွက်ပြေးခဲ့ရသည့် ဒုက္ခသည်ဦးရေသည် ကမ္ဘာ တဝန်း သန်း ၁၀၀ အထိ ပထမဆုံးအကြိမ် စံချိန်တင် များပြားလာခဲ့ကြောင်း ကုလသမဂ္ဂ ဒုက္ခသည်များဆိုင်ရာ အေဂျင်စီက မေလ ၂၃ ရက်တွင် ထုတ်ပြန်ခဲ့သည်။

“အဲဒီ သန်း ၁၀၀ ဟာ သတိကြီးကြီးထားရမယ့်ကိစ္စပါ။ ထိတ်လန့်စရာကောင်းတဲ့ ကိန်းဂဏန်းပါပဲ” ဟု ဒုက္ခသည် များဆိုင်ရာမဟာမင်းကြီး (UNHCR) ဖိလစ်ပိုဂရန်ဒီက ပြောကြားခဲ့သည်။

“ဒါဟာ အဖျက်သဘောဆောာင်တဲ့ ပဋိပက္ခတွေကို ဖြေရှင်းဖို့၊ တားဆီးဖို့၊ နှိပ်စက်ညှင်းပန်းတာတွေ ရပ်တန်းက ရပ်ဖို့နဲ့ အိုးအိမ်စွန့်ခွာလာရသူတွေရဲ့ အရင်းခံအကြောင်းတရားတွေ ဖြေရှင်းဖို့ နှိုးဆော်လုပ်ဆောင်ရမှာပါ” ဟု ၎င်းက ပြောကြားခဲ့သည်။

အီသီယိုးပီးယား၊ ဘာကီနာဖာဆို၊ မြန်မာ၊ နိုင်ဂျီးရီးယား၊ အာဖဂန်နစ္စတန်နှင့် ကွန်ဂိုတို့အပါအဝင် နိုင်ငံအချို့တွင် အကြမ်းဖက်မှုလိုင်းလုံးသစ်များ (သို့မဟုတ်) ရေရှည်ပဋိပက္ခများကြောင့် ကမ္ဘာတဝန်း အတင်းအကျပ် ရွှေ့ပြောင်း ရန် စေခိုင်းခံရသူ ဒုက္ခသည်ဦးရေမှာ ယမန်နှစ် ၂၀၂၁ တွင် သန်း ၉၀ သို့ ရောက်ရှိလာခဲ့ကြောင်း UNHCR ထုတ်ပြန် ချက်အရ သိရသည်။

ယခုနှစ်တွင် ယူကရိန်းစစ်ကြောင့် လူ ၆ သန်းကျော် ၎င်းနိုင်ငံအတွင်းမှ ထွက်ပြေးတိမ်းရှောင်ခဲ့ရပြီး နိုင်ငံအတွင်း၌ အိုးမဲ့အိမ်မဲ့ဖြစ်ခဲ့ရသူဦးရေမှာ ၈ သန်း ရှိသွားခဲ့သည်။

ဘင်္ဂလားဒေ့ရှ်နိုင်ငံ ဘလူခါလိ ဒုက္ခသည်စခန်းရှိ ရိုဟင်ဂျာကလေးများကို ၂၀၁၈ ခုနှစ် ဩဂုတ်လ ၂၇ ရက် နေ့တွင် တွေ့ရစဉ်(ဓါတ်ပုံ-အေပီ)

UNHCR မှ ထုတ်ပြန်သော ဒုက္ခသည် သန်း ၁၀၀ သည် ကမ္ဘာ့လူဦးရေ၏ ၁ ရာခိုင်နှုန်းကျော်ကို ကိုယ်စားပြုပြီး ယင်းအရေအတွက်ထဲ၌ ဒုက္ခသည်များနှင့်ခိုလှုံခွင့်တောင်းခံသူများအပါအဝင် ပြည်တွင်းပဋိပက္ခကြောင့် နေရပ် စွန့်ခွာခဲ့ရသူများကိုလည်း ထည့်သွင်းရေတွက်ထားသည်။

ပြည်တွင်းနေရပ်စွန့်ခွာသူဦးရေစောင့်ကြည့်ရေးဌာနမှ မကြာသေးမီက ထုတ်ပြန်ခဲ့သော ကိန်းဂဏန်းမှာ ၅၃ ဒသမ ၂ သန်းဖြစ်သည်။

“ယူကရိန်းစစ်ပွဲကနေ ထွက်ပြေးလာသူတွေကို နိုင်ငံတကာတုံ့ပြန်မှုက အင်မတန်အပြုသဘောဆောင်ပါတယ်။ သနားကရုဏာအပြည့်အဝနဲ့ဆိုတာ ထင်ရှားပါတယ်။ ကမ္ဘာတဝန်းက အကျပ်အတည်းတွေ အားလုံးအတွက်လည်း အလားတူ လှုံ့ဆော်မှုတစ်ခု လိုအပ်ပါတယ်” ဟု ဖိလစ်ပိုဂရန်ဒီက ပြောကြားခဲ့သည်။

“လူသားချင်းစာနာထောက်ထားမှုအကူအညီဆိုတာ သက်သာရာရစေဖို့ပဲ တတ်နိုင်ပါတယ်။ ကုစားပေးနိုင်တဲ့ ဆေး မဟုတ်ပါဘူး။ ဒါက ပြောင်းပြန်လှန်ဖို့ တစ်ခုတည်းသော ဖြေရှင်းနည်းကတော့ တည်ငြိမ်အေးချမ်းရေးဖြစ်ပါတယ်။ အပြစ်မဲ့သူတွေကို ပြည်တွင်းမှာ အန္တရာယ်များတဲ့ အလောင်းအစားထဲ မထည့်ကြဖို့ လိုပါတယ်” ဟု ၎င်းက ဆက်လက်ပြောကြားခဲ့သည်။

Source: AP

CNI International News

ကိုလံဘို၊ မေလ ၂၄

သီရိလင်္ကာနိုင်ငံ၌ ယနေ့ (မေလ ၂၄ ရက်)တွင် ဓာတ်ဆီဈေးမှာ ၂၀ ရာခိုင်နှုန်းမှ ၂၄ ရာခိုင်နှုန်းအထိ တက်သွားခဲ့ပြီး ဒီဇယ်ဈေးနှုန်းမှာလည်း ၃၅ ရာခိုင်နှုန်းမှ ၃၈ ရာခိုင်နှုန်းအထိ အဆမတန် ခုန်တက်ခဲ့ကြောင်း လျှပ်စစ်နှင့်စွမ်းအင်ဝန်ကြီး ကန်ချနာ ဝီဂျီစီကီရာက ပြောကြားခဲ့ပြီး အမှုထမ်း၊ အရာထမ်းများ ရုံးမတက်ကြဘဲ နေအိမ်မှပင် အလုပ်လုပ်ကြရန် အစိုးရဌာနဆိုင်ရာ များကို ညွှန်ကြားခဲ့သည်။

တွစ်တာလူမှုကွန်ရက်ပေါ် လွှင့်တင်ခဲ့သော ဝန်ကြီး၏ မက်ဆေ့ချ်အရ အစိုးရသတ်မှတ်ထားသော သယ်ယူပို့ဆောင်ရေးနှင့် အခြား ဝန်ဆောင်မှု စရိတ်များလည်း တိုးလာမည်ဟု သိရသည်။

“အိမ်ကနေ အလုပ်လုပ်ပြီး လောင်စာဆီသုံးစွဲမှု လျှော့ချဖို့နဲ့ စွမ်းအင် အကျပ်အတည်းကို စီမံခန့်ခွဲဖို့ အင်တိုက်အားတိုက် လုပ်ဆောင်ပေးသွားမှာ ဖြစ်ပါတယ်” ဟု ဝီဂျီစီကီရာက ပြောကြားခဲ့သည်။

သက်ဆိုင်ရာ အဖွဲ့အစည်း အကြီးအကဲ၏ ညွှန်ကြားချက်ရှိမှသာ အများပြည်သူ ဝန်ဆောင်မှုကဏ္ဍမှ အစိုးရဝန်ထမ်းအချို့ ရုံးတက်ကြရမည်ဖြစ်ကြောင်း ၎င်းက ဆက်လက် ပြောကြားခဲ့သည်။

စားနပ်ရိက္ခာနှင့် သယ်ယူပို့ဆောင်စရိတ် တိုးလာပါက အခြားကုန်စည်များသို့လည်း ရိုက်ခတ်မှုရှိမည်ဖြစ်ကြောင်း စီးပွားရေးပညာရှင်များက ပြောသည်။

ကျွန်းနိုင်ငံ တစ်နိုင်ငံဖြစ်သော သီရိလင်္ကာတွင် နှစ်စဉ်ငွေကြေး ဖောင်းပွမှုသည် ပြီးခဲ့သည့် မတ်လ၌ ၂၁ ဒသမ ၅ ရာခိုင်နှုန်း ရှိခဲ့ရာမှ ဧပြီလ အရောက်တွင် စံချိန်တင်အောင် ၃၃ ဒသမ ၈ ရာခိုင်နှုန်းအထိ တက်သွားခဲ့ကြောင်း မေလ ၂၃ ရက်တွင် ထုတ် ပြန်သော အစိုးရစာရင်း ဇယားများအရ သိရသည်။

လျှပ်စစ်နှင့်စွမ်းအင်ဝန်ကြီး ကန်ချနာ ဝီဂျီစီကီရာ (GETTY IMAGES)

ယခု ၎င်းနိုင်ငံသည် လွတ်လပ်ရေး ရပြီးနောက်ပိုင်း အဆိုးရွားဆုံး စီးပွားရေး အကျပ်အတည်း ရင်ဆိုင်နေရပြီး နိုင်ငံခြားငွေ ပြတ်လပ်၍ သွင်းကုန်များ ရပ်တန့်ကုန်သဖြင့် ပြည်တွင်းသုံးရန် လောင်စာဆီ၊ ဆေးဝါးများ ဝယ်မရတော့ပေ။ တစ်ချိန်တည်း မှာပင် လျှပ်စစ်ဓာတ်အားလည်း ဖြတ်တောက်ခံထားရသည်။

ခရီးသွားလုပ်ငန်းမှ နိုင်ငံခြားငွေကို မှီခိုနေသော တိုင်းပြည်အတွက် Covid-19 ကပ်ရောဂါကြောင့် အခက်အခဲ ကြီးမားစွာ တွေ့ခဲ့ရပြီးနောက် ယခုလ၌ ဝန်ကြီးချုပ်မှ နုတ်ထွက်ခဲ့ရသော မဟိန္ဒာနှင့် သမ္မတ ဂိုတာဘာယာ ညီအစ်ကိုတို့ ဦးစီးသည့် အစိုးရက ရေနံဈေးနှုန်း တက်လာခြင်းကြောင့် အခွန်ဖြတ်တောက်ခဲ့သည်။

ထို့ကြောင့် အစိုးရကို လူကြိုက်နည်းလာပြီး ဆန္ဒပြပွဲများ ဆက်တိုက် ဖြစ်ပွားခဲ့သည်။

လောင်စာဆီနှင့် ဓာတ်အားခ ဈေးနှုန်းများ တိုးလိုက်သည့်အခါ အစိုးရဝင်ငွေတွင် ကြီးမားသော ကွာဟချက်ကို ထိန်းညှိရန် လိုအပ်မည်ဟု ဘောဂဗေဒပညာရှင်များ ပြောကြားသော်လည်း ထိုလုပ်ရပ်သည် ရေတိုနာကျင်မှုကို ဖြစ်ပေါ်စေမည်ဟု လက်ခံထားကြသည်။

သီရိလင်္ကာမှာ လောင်စာဆီ ပြတ်လပ်လို့ တန်းစီးစောင့်နေ (GETTY IMAGES)

“ဆင်းရဲနွမ်းပါးတဲ့သူတွေ ဒီဒဏ်ကို အဆိုးဆုံး ခံရလိမ့်မယ်။ ဖြေရှင်းချက်ကတော့ ဆင်းရဲနွမ်းပါးသူတွေကို ထောက်ပံ့ပေးဖို့နဲ့ တတ်နိုင်သမျှ စွမ်းဆောင်ရည်မြင့်တဲ့ ငွေသား လွှဲပြောင်းတဲ့ စနစ်တစ်ခု ထူထောင်ဖို့ဖြစ်ပါတယ်” ဟု ကိုလံဘိုမြို့တော် အခြေ စိုက် ပညာရှင်အကြံပေးအဖွဲ့တစ်ဖွဲ့မှ သုတေသီ ဒါနန်နက်ဖာနန်ဒိုက ပြောကြားခဲ့သည်။

“ရေတိုမှာ ကျနော်တို့ဟာ ပိုပြီးတော့ ခက်ခဲကျပ်တည်းတဲ့ ကာလတစ်ခု ဖြတ်သန်းရဦးမှာပါ။ ငွေကြေးဖောင်းပွမှု ထပ်တိုးလာဖို့ ဖြစ်နိုင်ခြေရှိနေပါတယ်” ဟု ဝန်ကြီးချုပ်သစ် ရီနေးဝစ်ရီမတ်ဆင်းက ယခင်သီတင်းပတ်တွင် ပြောကြားခဲ့သည်။

Source: Reuters, Aljazeera

CNI International News

ဝါရှင်တန်၊ မေ ၂၄

ကမ္ဘာတလွှားမှ ကာကွယ်ရေးခေါင်းဆောင် ၅၀ နီးပါးသည် မေလ ၂၃ ရက်တွင် တွေ့ဆုံခဲ့ကြပြီး ယူကရိန်းနယ်တလျှောက် ကာကွယ်ရန်အတွက် ဟာပွန်း (Harpoon) လောင်ချာများနှင့် ဒုံးကျည်များအပါအဝင် ပို၍ နည်းပညာ အဆင့်မြင့်သောလက်နက်များ ပေးပို့သွားကြရန် သဘောတူညီခဲ့ကြကြောင်း ပင်တဂွန်စစ်ဌာနချုပ်မှ အမေရိကန်ကာကွယ်ရေးဝန်ကြီး လွိုက်အော်စတင်က သတင်းထောက်များကို အသိပေးခဲ့သည်။

ယူကရိန်းတပ်ဖွဲ့ဝင်များကို လေ့ကျင့်ပြင်ဆင်ပေးရန်နှင့် အမေရိကန်တပ်ဖွဲ့ဝင်အချို့ ယူကရိန်းတွင် အခြေစိုက်ရန်အတွက် ရာထူးငယ်အဆင့် ဆွေးနွေးမှုမျိုးလည်း လုပ်ဆောင်‌နေကြောင်း ပင်တဂွန် ပူးတွဲစစ်ဦးစီးချုပ်များ၏ အကြီးအကဲ ဗိုလ်ချုပ်ကြီး မာ့ခ်မိုင်လီက ပြောကြားခဲ့သည်။

လက်ရှိစစ်ပွဲ မစတင်မီကပင် အမေရိကန်သည် ယူကရိန်းရှိ ၎င်းတပ်ဖွဲ့ဝင်အနည်းငယ်ကို ရုပ်သိမ်းခဲ့ပြီး နောက်ထပ် တိုက်ခိုက်ရေးတာဝန်ဖြင့် စေလွှတ်ရန်လည်း အစီအစဉ်မရှိပေ။

မိုင်လီ၏သဘောထားမှတ်ချက်များသည် ကိယက်ဗ်ရှိ အမေရိကန်သံရုံးလုံခြုံရေးအတွက်(သို့မဟုတ်)အခြား တိုက်ခိုက်ရေးမဟုတ်သော အခန်းကဏ္ဍများအတွက် အမေရိကန်တပ်ဖွဲ့များ ပြန်လည်ဝင်ရောက်လာနိုင်ခြေကို လှစ်ဟထားကြောင်း ပြသနေခဲ့သည်။

ယခုအခါ ကိယက်ဗ်ရှိ အမေရိကန်သံရုံးကို တစိတ်တပိုင်း ပြန်ဖွင့်နေပြီး ဝန်ထမ်းများ ပြန်လည် ခန့်အပ်တာဝန်ချ ထားမှု ပြုနေသည်။ ထို့အတွက် သံရုံးလုံခြုံရေးအလို့ငှာ အမေရိကန်မရိန်းတပ်များ ပြန်လွှတ်မည့်အစီအစဉ်ရှိ/မရှိ (သို့မဟုတ်) အခြားရွေးချယ်စရာ စဉ်းစားခြင်းရှိ/မရှိ မေးခွန်းထုတ်မှုများလည်း ရှိလာခဲ့သည်။

“ယူကရိန်းပြည်တွင်းသို့ အမေရိကန်အထူးစစ်ဆင်ရေးတပ်ဖွဲ့များ ရောက်သွားနိုင်ပါသလား”ဟု သတင်းထောက် များက မေးမြန်းခဲ့ရာ အစိုးရတာဝန်ရှိသူများက “မလုပ်ဆောင်သေးကြောင်း” အခိုင်အမာ ပြန်လည်ဖြေကြား ခဲ့သည်။

“ယူကရိန်းပြည်တွင်းကို အမေရိကန်တွေ ပြန်ဖို့က သမ္မတရဲ့အဆုံးအဖြတ် လိုအပ်ပါလိမ့်မယ်။ ဒါကြောင့် ကျနော် တို့ အခု ဝေးဝေးနေပါတယ်” ဟု မိုင်လီက ဖြေကြားခဲ့သည်။

ယူကရိန်းမှ တောင်းဆိုထားသည့် နည်းပညာမြင့် မိုဘိုင်းဒုံးကျည်များ ပေးမည့်ကိစ္စကိုတော့ ပင်တဂွန်နှင့် သတင်း ထောက်များ တွေ့ဆုံမှု၌ ကာကွယ်ရေးဝန်ကြီး လွိုက်အော်စတင်က ငြင်းဆိုသွားခဲ့သည်။

ရုရှားနှင့်စစ်ပွဲမှာ ၃ လကြာမြင့်ပြီဖြစ်၍ နိုင်ငံပေါင်း ၂၀ ထံမှ ယူကရိန်းထံသို့ လုံခြုံရေးအကူအညီအသစ်များ ထပ်မံ ပေးပို့မည်ဟု မေလ ၂၃ ရက်တွင် အော်စတင်က အတိအလင်း ပြောကြားခဲ့သည်။

Source: AP

CNI International News

ဖူဆာဂါဆူကာ၊ မေ ၂၄

တစ်ချိန်က ဖာ့စ်သူပုန်(FARC)ဟောင်းဖြစ်ခဲ့သူ ဂူတာဗိုပီထရိုသည် ကျည်ကာဒိုင်းများဖြင့် သက်တော်စောင့်များ ခြံရံလျက် စင်မြင့်ထက်မှနေ၍ ဖူဆာဂါဆူကာ(Fusagasuga) မြို့ခံလူထုကို မိန့်ခွန်းပြောရင်း ကိုလံဘီယာနိုင်ငံရေးထိပ်သီးများကို အော်ဟစ်ဝေဖန်နေခဲ့ကြောင်း အေပီသတင်းအရ သိရသည်။

အဆိုပါမြို့လေးသည် လယ်သမားများ ဆင်းရဲနွမ်းပါးစွာဖြင့် ရုန်းကန်နေရသော ကျေးလက်မြို့လေးဖြစ်သည်။

လက်ဝဲဝါဒီ ဂူတာဗိုပီထရိုသည် သမ္မတလောင်းအဖြစ် ဝင်ရောက်ယှဉ်ပြိုင်စဉ်အတွင်း ပြည်တွင်း တောင်သူ လယ်သမားများကို နိုင်ငံခြားပြိုင်ဘက်များ၏လက်မှ အကာအကွယ်ပေးဖို့လိုအပ်ကြောင်း မဲဆွယ်စည်းရုံး နေခဲ့သည်။

လူစည်ကားရာ ရင်ပြင်ထက်တွင် ပီထရိုက “ရာဇဝတ်ကောင်တွေနဲ့ လက်တွဲလုပ်ချင်တဲ့ နိုင်ငံရေးလူတန်းစားကို ဖြုတ်ချပစ်မယ်” ဟု ကတိစကား ပြောကြားလိုက်သောအခါ အတိုက်အခံပါတီများ၏အလံများကို ဝှေ့ယမ်းရင်း ၎င်းအားထောက်ခံသူများက ဩဘာပေးကြသည်။

“ကျနော်တို့ ကမ်းလှမ်းတဲ့အရာက ကိုလံဘီယာနိုင်ငံကို နားလည်သဘောပေါက်ဖို့ ကွဲပြားခြားနားတဲ့ နည်းလမ်း ရှိတယ်ဆိုတာပါ။ နိုင်ငံတော်ကနေ ပညာရေးနဲ့ကျန်းမာရေးလိုမျိုး အခြေခံအခွင့်အရေးတွေပေးတာမျိုး လိုချင် ပါတယ်။ စီးပွားရေးဖြစ်ထွန်းပြီး လူတွေကို ငွေကြေးထောက်ပံ့နိုင်ရမယ်” စသည်ဖြင့် ၎င်း၏တစ်နာရီကြာ မိန့်ခွန်းထဲတွင် ပီထရိုက ထည့်သွင်းပြောကြားခဲ့သည်။

စိတ်ပိုင်းဆိုင်ရာထူထောင်မှုဟောပြောချက်၊ စီးပွားရေးတွင် နိုင်ငံတော်အစိုးရပါဝင်ပတ်သက်မှုကို မြှင့်တင်သွားရန် ကတိပြုမှုများနှင့်အတူ ပီထရိုသည် မေလ ၂၂ ရက် သမ္မတရွေးကောက်ပွဲကို အေးအေးလူလူဖြင့် အောင်ပွဲခံဖို့ ဖြတ်သန်းခဲ့သည်။

သမ္မတလောင်း ဂူတာဗိုပီထရို၏ ပုံပါ အလံကို ကိုင်ဆောင်ထားစဉ်(ပုံ-အေပီ)

ကိုလံဘီယာနိုင်ငံရေးလောကကို ချမ်းသာသောမိသားစုများ၊ ဩဇာကြီးမားသော စီးပွားရေးသမား၊ နိုင်ငံရေးသမား တောက်လျှောက် လွှမ်းမိုးနေခဲ့သော်လည်း သူပုန်အဖြစ် နိုင်ငံရေးစလုပ်ခဲ့သူ ပီထရိုသည် အထက်လွှတ်တော် အမတ်အဖြစ် ယနေ့ရပ်တည်လျက် ပထမဆုံးလက်ဝဲသမ္မတဖြစ်လာဖို့ ရည်ရွယ်ထားသည်။

ယခုရွေးကောက်ပွဲတွင် ပြန်အရွေးမခံရသူကတော့ ဘိုဂိုတာအထက်တန်းလွှာမှ ရှေးရိုးစွဲ (ကွန်ဆာဗေးတစ်) ဝါဒီတစ်ဦးဖြစ်သည့် လက်ရှိသမ္မတ အိုင်ဗန်ဒူကီ (Ivan Duque) ဖြစ်သည်။

ပီထရိုသည် ကိုလံဘီယာပြည်တွင်း၌ နှစ်ရှည်လများ မမျှမတဖြစ်နေခဲ့မှုများကို လျှော့ချသွားဖို့ အာရုံစိုက် လုပ် ဆောင်မည်ဟု ၎င်းအားထောက်ခံသူများက ယုံကြည်နေကြသည်။ ပြည်တွင်း၌ ဆယ်စုနှစ်များစွာတိုင်အောင် နိုင်ငံရေးအကြမ်းဖက်မှုများပေါ်ပေါက်ဖို့ လှုံ့ဆော်ပေးသူများရှိနေခဲ့သည့်အပြင် အင်အားကြီး မူးယစ်ဂိုဏ်းများက မင်းမူနေခဲ့သည်။

သို့ရာတွင် နိုင်ငံ၏ဈေးကွက်နှင့် လိုက်ဖက်သော စီးပွားရေးမဏ္ဍိုင်တစ်ခု ဖုံးလွှမ်းခံရမည့်အရေးကိုလည်း သူ့အား ဝေဖန်ထောက်ပြသူများက စိုးရိမ်နေကြသည်။ ပီထရိုသည် ကိုလံဘီယာနိုင်ငံရေး အသွင်ကူးပြောင်းရန်အတွက် ကြိုးပမ်းတိုက်ပွဲဝင်ခဲ့ရာ၌ ဆယ်စုနှစ်များစွာ သဘောထားကွဲလွဲသူများကို ဆန့်ကျင်ကျော်လွှားခဲ့ရသည်။

ကိုလံဘီယာနိုင်ငံတွင် ကိုလံဘီယာအစိုးရနှင့် ဖာ့စ်သူပုန်(FARC)တို့သည် နှစ်ပေါင်း ၅၀ ကျော်ကြာ တိုက်ခိုက် ခဲ့ကြပြီးနောက် ၂၀၁၆ ခုနှစ်၊ သြဂုတ်လတွင် နှစ်ဖက် အပစ်အခတ်ရပ်စဲခဲ့ကြကာ ထိုနှစ် နိုဝင်ဘာလတွင် ငြိမ်းချမ်းရေးသဘောတူညီချက် လက်မှတ် ထိုးခဲ့ကြသည်။

အဆိုပါ ငြိမ်းချမ်းရေးသဘောတူညီချက်အရ ၂၀၁၇ ခုနှစ်၊ ဖေဖော်ဝါရီလတွင် လက်နက်ဖြုတ်သိမ်းရေး၊ တပ်ဖျက်သိမ်းရေး၊ ပြန်လည်ပေါင်းစည်းရေး(DDR)ကို ဆောင်ရွက်ခဲ့သလို လုံခြုံရေးကဏ္ဍပြုပြင်ရေး(SSR) အရ ဖာ့စ်သူပုန် (FARC) တပ်ဖွဲ့ဝင်များကို နိုင်ငံရေးပါတီ ထူထောင်ခွင့်ပြုခြင်း၊ စစ်ဘက်နှင့် နိုင်ငံရေးဘက်တွင် မပါဝင်လိုသူများကို လူမှုရေးထောက်ပံ့မှု ပေးအပ်ကာ လက်မှုပညာများ သင်ကြားပေးခြင်း၊ ၂၀၂၆ ခုနှစ်အထိ ရွေးကောက်ပွဲဝင်စရာမလိုဘဲ လွှတ်တော်ကိုယ်စားလှယ် ၁၀ ဦးကို တင်မြှောက်ခွင့်ပေးခဲ့သည်။

Source: AP