CNI Sport News
၂၀၂၄ ခုနှစ်၊ ဇူလိုင် ၂၃
ဒတ်ချ်လူမျိုးနည်းပြ အဲရစ်တန်ဟတ်က ယူနိုက်တက်အသင်းကို သူတာဝန်ယူပြီးကတည်းက အင်္ဂလန်မှာ သူ့ထက်ပိုကောင်းအောင်လုပ်ဆောင်နိုင်တဲ့ နည်းပြက မန်စီးတီးအသင်းနည်းပြ ဂွာဒီယိုလာသာရှိတယ်လို့ ပြောခဲ့ပါတယ်။
အဲရစ်တန်ဟတ်က “FA ဖလားရယူအပြီးမှာ ကျနော်ပိုသန်မာလာတယ်လို့ ခံစားရပါတယ်။ ဒီအသင်းဟာ ကျနော်မရောက်ခင် ၆ နှစ်က ဆုဖလားတွေမရခဲ့ပါဘူး။ ဒီ ၂ နှစ်အတွင်းမှာ ဂွာဒီယိုလာပြီးရင် ကျနော်တို့ဟာ အင်္ဂလိပ်ဘောလုံးလောကမှာ ဆုဖလားအများဆုံးရရှိခဲ့ပါတယ်။ ဒါကြောင့် ကျနော်တို့ဟာ တောင့်တင်းတဲ့ အနေအထားမှာရှိပါတယ်။ ကျနော်တို့ဟာ ပြိုင်ဘက်တိုင်းကိုလည်း အနိုင်ယူခဲ့ပါတယ်”လို့ The Times ကို ပြောခဲ့တာပါ။
အဲရစ်တန်ဟတ်ဟာ ယူနိုက်တက်အသင်းကို ၂၀၂၂ ခုနှစ်၊မေက ရောက်ရှိခဲ့ပြီး ၁၁၄ ပွဲကိုင်တွယ်ထားတာမှာ နိုင်ပွဲ ၆၈ ပွဲရယူပေးထားတာဖြစ်ပါတယ်။
အဲရစ်တန်ဟတ်ဟာ ယူနိုက်တက်အသင်းကို ရောက်ရှိချိန်မှာ ဂွာဒီယိုလာ၊ ကလော့ပ်၊ပိုချက်တီနို၊အာတီတာတို့နဲ့ ယှဉ်ပြိုင်ခဲ့ရပါတယ်။
ဒတ်ချ်လူမျိုးနည်းပြဟာ ယူနိုက်တက်အသင်း နည်းပြ ဘဝပထမရာသီမှာ ကာရာဘောင်းဖလားရယူပေးခဲ့ပြီး ပရီးမီးယားလိဂ်ပြိုင်ပွဲမှာ အဆင့် ၃ နေရာ ရပ်တည်အောင် ကိုင်တွယ်ပေးနိုင်ခဲ့တာပါ။
ဒုတိယရာသီမှာတော့ ယူနိုက်တက်အသင်းရဲ့ ရလဒ်တွေဟာ ဆိုးရွားခဲ့ပြီး ပရီးမီးယား လိဂ်ပြိုင်ပွဲမှာ အဆင့် ၈ နေရာရပ်တည်ခဲ့ပေမယ့် FA ဖလားပြိုင်ပွဲမှာ မန်စီးတီးအသင်းကို အနိုင်ရပြီး ချန်ပီယံဆုကို ရယူနိုင်ခဲ့ပါတယ်။
အဲရစ်တန်ဟတ်ဟာ FA ဖလားရယူပေးနိုင်ခဲ့တာကြောင့် ယူနိုက်တက်အသင်းက ထုတ်ပယ်ခံရမယ့် အခြေအနေ က လွတ်မြောက်ခဲ့ပြီး ၂၀၂၆ ခုနှစ်အထိ အသင်းမှာရှိမယ့် စာချုပ်သက်တမ်းတိုးခြင်းခံခဲ့ရတာပါ။
အဲရစ်တန်ဟတ် ဟာ ရာသီသစ်မှာ ယူနိုက်တက်အသင်းကို ရလဒ်ကောင်းတွေရယူပေးနိုင်ဖို့ မျှော်လင့်နေပြီး အသင်းဘက်ကလည်း တိုက်စစ်မှူး ဇာခ့်ဇီ၊နောက်ခံလူ ယိုရိုတို့ကို ခေါ်ယူအားဖြည့်ပေးထားပါတယ်။
ဒါ့အပြင် ယူနိုက်တက်အသင်းဟာ နောက်ထပ်ကစားသမားတွေကိုခေါ်ယူဖို့ အပြောင်းအရွှေ့ဈေးကွက်ထဲမှာ လှုပ်ရှားနေတာပါ။
ယူနိုက်တက်အသင်းဟာ လက်ရှိအချိန်မှာ ရာသီကြိုခြေစမ်းပွဲ ၂ ပွဲကစားထားပြီး ပထမဆုံးပွဲမှာ ရိုစင်ဘော့ အသင်းကို ၁ ဂိုး-ဂိုးမရှိနဲ့ အရေးနိမ့်ခဲ့ပေမယ့် ဒုတိယပွဲမှာတော့ ရိန်းဂျားစ်အသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။
Source:DailyMail
