CNI Sport News
၂၀၂၄ ခုနှစ်၊ ဇူလိုင် ၂၃
ဆော်ဒီကို ပြောင်းရွှေ့ဖွယ်ရှိတယ်လို့ သတင်းတွေ ထွက်နေတဲ့ ကွင်းလယ်လူ ဒီဘရိုင်းဟာ မန်စီးတီးအသင်းမှာ ဆက်ရှိမယ်လို့ နည်းပြ ဂွာဒီယိုလာက ပြောခဲ့ပါတယ်။
ဂွာဒီယိုလာက “ကီဗင်ဒီဘရိုင်းက ဘယ်ကိုမှ မသွားပါဘူး။ ဒီလူစာရင်းနဲ့အတူ နှစ်ပေါင်းများစွာ ရှိနေတာကို ကျနော် ပျော်ရွှင်ပါတယ်။ ဈေးကွက်မှာ ဘာတွေဖြစ်မလဲဆိုတာ မသိပေမယ့် တစ်ယောက် ထွက်ခွာသွားခဲ့ရင်တော့ ဒီအကြောင်းကို ကျနော်တို့ ပြောမှာပါ။ ကျနော်တို့ဟာ ဈေးကွက်မှာ နှစ်ပေါင်းများစွာ သက်ရောက်မှုတွေရှိအောင် လုပ်ခဲ့ပြီး အခြေအနေတိုင်းက မတူညီပါဘူး”လို့ ပြောခဲ့တာပါ။
မန်စီးတီးအသင်းနဲ့ လာမယ့် ရာသီအကုန်မှာ စာချုပ်ကုန်ဆုံးမယ့် ဒီဘရိုင်းကို ခေါ်ယူဖို့ ဆော်ဒီကလပ် အသင်း အချို့က ချိတ်ဆက်မှုတွေ ပြုလုပ်နေတာ ဖြစ်ပါတယ်။
ဒီဘရိုင်းဟာ ဆော်ဒီကလပ် အယ်လ်အစ်တီဟတ်အသင်းထံ ပြောင်းရွှေ့ဖို့ ပုဂ္ဂိုလ်ရေး သဘောတူညီမှု ရရှိထား တယ်လို့ ပြီးခဲ့တဲ့ရက်ပိုင်းက သတင်းထွက်ပေါ်ခဲ့တာပါ။
ဒါပေမယ့် နည်းပြ ဂွာဒီယိုလာက ဒီဘရိုင်းဘယ်မှ မသွားဘူးလို့ ပြောခဲ့သလို အပြောင်းအရွှေ့ ဈေးကွက်မပိတ်ခင် အထိ အသင်းရဲ့လူစာရင်းက ကြီးကြီးမားမား ပြောင်းလဲမှု မရှိဘူးလို့ ယုံကြည်မှုရှိနေပါတယ်။
ဒီဘရိုင်းကို တွေ့ရစဉ်
မန်စီးတီးအသင်းဟာ ဒီနွေရာသီ အပြောင်းအရွှေ့မှာ ဘရာဇီးလ်တောင်ပံ ကစားသမား ဆာဗင်ဟို တစ်ဦးတည်း ကိုသာ ခေါ်ယူထားတာပါ။
မန်စီးတီးအသင်းရဲ့ အဓိက ကစားသမားတွေဖြစ်တဲ့ တိုက်စစ်မှူး အယ်လ်ဗာရက်ဇ်နဲ့ ဂိုးသမား အီဒါဆန်တို့ဟာ အသင်းအချို့ရဲ့ ချိတ်ဆက်မှုတွေကို ခံနေရတာ ဖြစ်ပါတယ်။
ပြီးခဲ့တဲ့ရာသီက ဝက်စ်ဟမ်းအသင်းမှာ အငှားသွားရောက်ကစားခဲ့တဲ့ ကယ်လ်ဗင်ဖီးလစ်ဟာ မန်စီးတီးအသင်းနဲ့ အတူ လေ့ကျင့်မှုတွေ ပြန်လည်ပြုလုပ်နေပေမယ့် ဒီအပြောင်းအရွှေ့မှာ အသင်းက ထွက်ခွာဖွယ်ရှိနေတာပါ။
မန်စီးတီးအသင်းဟာ လက်ရှိအချိန်မှာ ရာသီကြိုခြေစမ်းပွဲ ယှဉ်ပြိုင်ဖို့ အမေရိကန်နိုင်ငံကို ရောက်ရှိနေပြီး ဆဲလ်တစ်၊ အေစီမီလန်၊ ဘာစီလိုနာ၊ ချယ်လ်ဆီးအသင်းတို့နဲ့ ယှဉ်ပြိုင်သွားမှာ ဖြစ်ပါတယ်။
Source: CNA
