CNI New 

၂၀၂၅ ခုနှစ်၊ ဇွန် ၂၇

စိန်ခေါ်မှုများစွာနှင့် ရင်ဆိုင်နေရသည့် ယနေ့ နိုင်ငံတကာ အခင်းအကျင်းတွင် မိမိတို့အနေဖြင့် စုပေါင်းကျော်လွှားရ မည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဇွန်လ ၂၆ ရက်က ဘယ်လာရုစ်နိုင်ငံ၊ မင့်စ်မြို့၌ ကျင်းပသည့် စတုတ္ထအကြိမ် ဥရောပ-အာရှ စီးပွားရေး ဖိုရမ်(EEF 2025)မှာ ၎င်းက ပြောသည်။

နစကဥက္ကဋ္ဌက “ စိန်ခေါ်မှုများစွာနှင့် ရင်ဆိုင်နေရသည့် ယနေ့ နိုင်ငံတကာ အခင်းအကျင်းတွင် ခြိမ်းခြောက်မှုများ ကို ကျော်လွှားနိုင်ရန်အတွက် မိမိတို့အနေဖြင့် စုပေါင်းဆောင်ရွက်ကြရမည်၊ ထိုကဲ့သို့သော အခြေအနေများကို ရင် ဆိုင် ကျော်လွှားနိုင်ရန်အတွက် စုပေါင်းဆောင်ရွက်သည့် နေရာတွင် ဥရောပအာရှ စီးပွားရေးသမဂ္ဂသည် ပြင်ပ စီးပွားရေး စိန်ခေါ်မှုများနှင့် ပိတ်ဆို့ဒဏ်ခတ်မှုများကြားတွင် မကြာသေးမီ နှစ်များအတွင်း တည်ငြိမ်သော တိုး တက်မှုများနှင့် အရေးပါသော အောင်မြင်မှုများကို ပြသနိုင်ခဲ့သည်ကို ဝမ်းမြောက်စွာ တွေ့ရှိရတယ်”ဟု ပြော သည်။

မြန်မာနိုင်ငံအနေဖြင့် ဥရောပအာရှစီးပွားရေးသမဂ္ဂ အဖွဲ့ဝင်နိုင်ငံများနှင့် စီးပွားရေး၊ ကုန်သွယ်ရေး စသည့် ကဏ္ဍ များတွင် ပူးပေါင်းဆောင်ရွက်နိုင်မည့် အလားအလာများကို ရှာဖွေဖော်ထုတ်ပြီး တိုးမြှင့်ဆောင်ရွက်သွားလိုကြောင်း ၎င်းက ပြောသည်။ 

ဥရောပအာရှစီးပွားရေးဖိုရမ် ကျင်းပနေစဉ်

မြန်မာနိုင်ငံအနေဖြင့်လည်း ဥရောပအာရှစီးပွားရေးသမဂ္ဂ၏ အဖွဲ့ဝင်နိုင်ငံအဖြစ် ပါဝင်ရန် စိတ်အားထက်သန် လျက်ရှိကြောင်း၊ မြန်မာနိုင်ငံကို ဥရောပအာရှစီးပွားရေးသမဂ္ဂ၏ လေ့လာသူနိုင်ငံအဖြစ် ဆောလျင်စွာ ပါဝင် နိုင်ရန်အတွက် ၎င်းတို့မှ ထောက်ခံဆောင်ရွက်ပေးပါရန် မေတ္တာရပ်ခံလိုပါကြောင်း နစကဥက္ကဋ္ဌက ပြောသည်။

စီးပွားရေးနှင့်ပတ်သက်ပြီး ပိတ်ဆို့ခံထားရသည့် နိုင်ငံဖြစ်ခြင်းကြောင့် အင်မတန် သတိကြီးကြီးထား၍  ဆောင် ရွက်ရမည်ဖြစ်သည့်အတွက် အတူတူပူးပေါင်းဆောင်ရွက်မှ တော်ကာကြမည်ဟု စီးပွားရေးလုပ်ငန်းရှင် ဦးအောင်ပြည့်စုံက CNI သတင်းဌာနသို့ ပြောသည်။

၎င်းက “Sanctions တွေ ထိထားတဲ့ နိုင်ငံတစ်ခုအတွက်ကျတော့ ကျနော်တို့က နယ်ပယ်ဘောင်က ကျဥ်းမြောင်း ပါတယ်။ ဒီလို ကျဥ်မြောင်းတဲ့ နယ်ပယ်ဘောင်ထဲကနေ ကုန်သွယ်ရေးလုပ်ရတဲ့ အခါကျတော့ လုပ်ငန်းရှင်တွေ ဘက်မှာ လည်း ခက်ခဲသလို၊ အစိုးရပိုင်းဘက်က ပြန်ကြည့်တော့လည်း ဒီကျနော်တို့လို နိုင်ငံတွေအတွက်က အင်မတန် သတိကြီးကြီးထားပြီး ဆောင်ရွက်ရတာ ဖြစ်တဲ့အတွက် အကုန်လုံး တူတူပူးပေါင်းပြီးမှ ဆောင်ရွက်မှပဲ တော်ကာ ကြမှာပါ။ ပူးပေါင်းပြီး ဆောင်ရွက်တယ်ဆိုတာက အစိုးရတစ်ခုထဲ မဟုတ်ဘူး၊ စက်မူကုန်သွယ်ရေး လုပ်ငန်းရှင် တွေ တစ်ခုထဲ မဟုတ်ဘူး၊ အသင်းအဖွဲ့ တစ်ခုထဲ မဟုတ်ဘူးပေါ့။ အားလုံး ဒီကုန်သွယ်ရေး လမ်း ကြောင်း တလျောက်မှာရှိတဲ့ လူပုဂ္ဂိုလ်အသင်းအဖွဲ့ အဖွဲ့အစည်း အကုန်လုံးက ပူးပေါင်းဆောင်ရွက်ဖို့ လိုတယ်။ ဒီလမ်းကြောင်း တလျောက်လုံးမှာရှိတဲ့ နယ်မြေဒေသ စိုးမိုးမှုအတွက် တာဝန်ယူထားတဲ့ လုံခြုံရေး အဖွဲ့အစည်း တွေကလည်း ပူပေါင်းဆောင်ရွက်ပေးမှပဲ ကျနော်တို့က ဒီကုန်သွယ်မှု အခက်ခဲတွေကို ကျော်လွှားနိုင်မှာ ဖြစ်ပါတယ်”ဟု ပြောသည်။ 

ဥရောပအာရှစီးပွားရေးဖိုရမ် ကျင်းပနေစဉ်

ယနေ့ကမ္ဘာတွင် အင်အားကြီးနိုင်ငံများက နိုင်ငံငယ်များအပေါ် နိုင်ငံရေး၊ စီးပွားရေးအရ ဖိအားပေးမှုများ၊ ပိတ်ဆို့ မှုများသည် ကမ္ဘာ့နိုင်ငံငယ်များ၏ အခြေခံမှုများကို ချိုးဖောက်နေခြင်းပင်ဖြစ်ကြောင်း၊ ကမ္ဘာ့နိုင်ငံ အသီးသီးတွင် ရှိသင့်ရှိထိုက်သည့် ကောင်းမွန်သော အခြေခံမှုများကို အလေးထားပြီး ကမ္ဘာ့နိုင်ငံများ၏ ဖွံဖြိုးတိုးတက်မှုအား အကောင်အထည်ဖော်နေသည့် ဥရောပအာရှစီးပွားရေးသမဂ္ဂ(EAEU)၏ လုပ်ဆောင်ချက်များအား မြန်မာနိုင်ငံ အနေဖြင့် ထောက်ခံကြောင်း နစကဥက္ကဋ္ဌက ပြောသည်။

မြန်မာနိုင်ငံကို အမေရိကန်၊ ဥရောပနှင့် အနောက်အုပ်စုများက စီးပွားရေး ပိတ်ဆို့အရေးယူထားသလို အပြည်ပြည် ဆိုင်ရာ အလုပ်သမားအဖွဲ့အစည်း(ILO)ကလည်း ပိတ်ဆို့အရေးယူထားခြင်းကြောင့် ရင်းနှီးမြှုပ်နှံမှုများ မရှိသလို ရှိ ထားသော နိုင်ငံတကာ ရင်းနှီးမြှုပ်နှံမှုများလည်း ပြန်လည် ထွက်ခွာနေကြသည်။

သို့သော် နစကဥက္ကဋ္ဌသည် ရုရှား၊ ဘယ်လာရုစ်၊ တရုတ်၊ စင်္ကာပူ၊ ထိုင်း စသည့် နိုင်ငံများမှ ရင်းနှီးမြှုပ်နှံမှုများ လုပ်လာရေး စည်းရုံးလျက်ရှိနေသည်။