CNI News
၂၀၂၅ ခုနှစ်၊ မတ်လ ၂၈
ငလျင်ဒဏ် ခံစားလိုက်ရသော မြန်မာနိုင်ငံနှင့်ထိုင်းနိုင်ငံကို ကူညီများ ပေးအပ်ဖို့အသင့်ရှိသည်ဟု အိန္ဒိယဝန်ကြီးချုပ် မိုဒီက ၂၀၂၅ ခုနှစ်၊ မတ်လ ၂၈ ရက်တွင် သူ၏ တွစ်တာလူမှုကွန်ရက်မှာ ရေးသားခဲ့သည်။
၂၀၂၅ ခုနှစ်၊ မတ်လ ၂၈ ရက်နေ့ မွန်းလွဲ ၁၂ နာရီ ၅၁ မိနစ်က မန္တလေးမြို့၏ အရှေ့မြောက်ဘက် ၂၀ ကီလိုမီတာ ခန့်အကွာ၊ မြောက်လတ္တီတွဒ် ၂၂ ဒသမ ၀၉ ဒီဂရီ၊ အရှေ့လောင်ဂျီတွဒ် ၉၆ ဒသမ ၂၃ ဒီဂရီ၊ အနက် ၁၀ ကီလိုမီတာ ကို ဗဟိုပြု၍ အင်အားရစ်(ခ်)တာစကေး ၇ ဒသမ ၇ အဆင့်ရှိ အင်အားအလွန်ပြင်းထန်သော မြေငလျင်တစ်ခု လှုပ်ရှားသွားခဲ့သည်။
နောက်ဆက်တွဲ ငလျင်ငယ် ၃ ခုခန့် လှုပ်ရှားခဲ့သေးသည်။
အိန္ဒိယဝန်ကြီးချုပ် မိုဒီက “ မြန်မာနိုင်ငံနဲ့ ထိုင်းနိုင်ငံမှာ လှုပ်ခတ်သွားခဲ့တဲ့ ငလျင်ရဲ့ နောက်ဆက်တွဲ ဂယက် ရိုက်ခတ်မှုကို စိုးရိမ်မိပါတယ်။ လူတိုင်း လူတိုင်း ဘေးကင်းပြီး ကောင်းကျိုးချမ်းသာရရှိပါစေလို့ ဆုတောင်းပါ တယ်။ အိန္ဒိယနိုင်ငံကလည်း တတ်နိုင်တဲ့ အကူအညီတွေကိုပေးဖို့ အသင့်ရှိပါတယ်။ ဒါနဲ့ပတ်သက်ပြီး မိမိတို့က အာဏာပိုင်တွေကို အသင့်အနေအထား ကူညီပေးဖို့ တောင်းဆိုထားပါတယ်။ ဒါအပြင် မြန်မာနဲ့ထိုင်းအစိုးတွေနဲ့ အဆက်အသွယ် မပြတ်ရှိနေစေဖို့ နိုင်ငံခြားရေးဝန်ကြီးဌာနကိုလည်း တိုက်တွန်းထားပါတယ်”ဟု ပြောသည်။
၂၀၂၅ ခုနှစ်၊ မတ်လ ၂၈ ရက်က ငလျင်လှုပ်ခတ်မှုကြောင့် အဆောက်အအုံတစ်လုံး ပြိုကျနေစဉ်
အဆိုပါ ငလျင်လှုပ်ခတ်မှုကြောင့် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ နေပြည်တော် ကောင်စီနယ်မြေ၊ ရှမ်းပြည်နယ်အရှေ့မြောက်ဒေသတို့ရှိ ငလျင်ဒဏ်သင့်သည့် နေရာများကို အရေးပေါ် အခြေအနေအဖြစ် နစက၏ အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှု ကော်မတီမှ ကြေညာခဲ့သည်။
အလားတူ အရေးပေါ် သွေးလိုအပ်ချက်များလည်း ရှိနေသည့်အတွက် ကူညီကြရန်လည်း ပြည်သူလူထုကို နစက, က တိုက်တွန်းထားသည်။
မြန်မာနိုင်ငံတွင် မတ်လ ၂၈ ရက်က လှုပ်ခတ်ခဲ့သော ငလျင်ကြောင့် လမ်းတံတားများ၊ လူနေအိမ်များ၊ ဘာသာရေး အဆောက်အအုံများ ပြိုကျပျက်စီးခဲ့သလို လူပေါင်း ရာချီသေဆုံးခဲ့ကြောင်း ဒေသတွင်း သတင်းရင်းမြစ်များထံမှ သိရသည်။
