CNI Sport News

၂၀၂၂ ခုနှစ်၊ သြဂုတ် ၆

ဘာစီလိုနာအသင်းဟာ သြဂုတ်လ ၁၃ ရက်မှာ ဗယ်လက်ကာနိုနဲ့ လာလီဂါအဖွင့်ပွဲစဉ် ယှဉ်ပြိုင်ရမှာ ဖြစ်ပေမယ့် အခု အပြောင်းအရွှေ့မှာ ခေါ်ယူထားတဲ့ ကစားသမားသစ်တွေ အားလုံးကို စာရင်း မသွင်းနိုင်သေးဘဲ ဖြစ်နေပါတယ်။

ဘာစီလိုနာအသင်းဟာ ၂၀၂၁ မှာ အကြွေးယူရို ၁.၃၅ ဘီလီယံရှိကြောင်း ကြေညာခဲ့ပေမယ့် အခုနွေရာသီ အပြောင်းအရွှေ့မှာ ငွေကြေး အများအပြား အသုံးပြုထားပါတယ်။

စပိန်ကလပ်ဟာ ကလပ်အသင်းရဲ့ ရုပ်သံမူပိုင်ခွင့် ရာခိုင်နှုန်းနဲ့ ဘာကာစတူဒီယိုရဲ့ ရှယ်ယာ ၂၅ ရာခိုင်နှုန်းကို ရောင်းချပြီး အပြောင်းအရွှေ့အတွက် ငွေကြေးထောက်ပံ့ခဲ့ပါတယ်။ ဒါပေမယ့် လာလီဂါရဲ့ ဘဏ္ဍာရေးမျှခြေ စံနှုန်းတွေကို လိုက်နာနိုင်မှ သာ ကစားသမား အသစ်တွေကို စာရင်းသွင်း မှတ်ပုံတင်နိုင်မှာ ဖြစ်ပါတယ်။

ဘာစီလိုနာအသင်းဟာ အခုအပြောင်းအရွှေ့မှာ လီဝန်ဒေါစကီးကို ဘိုင်ယန်မြူးနစ်ကနေ ယူရိုသန်း ၅၀၊ ရာဖင်ဟာကို လိဒ်စ်ယူနိုက်တက်ကနေ ယူရို ၅၉ သန်း၊ ဆီဗီလာနောက်ခံလူ ကွန်ဒီကို ယူရိုသန်း ၆၀ ပေးပြီး ခေါ်ယူထားပါတယ်။

ဘာစီလိုနာ အသင်းကစားသမားများကိုတွေ့ရစဉ်(Sporting News)

စပိန်ကလပ်(ဘာစီလိုနာအသင်း) အနေနဲ့ အလွတ်ပြောင်းရွှေ့ကြေးနဲ့ ခေါ်ယူထားတဲ့ ကတ်ဆီနဲ့ ခရစ်တန်ဆန်တို့ကိုလည်း စာရင်းသွင်းနိုင်ဖို့ စောင့်ဆိုင်းနေရပါတယ်။ ဘာစီလိုနာအသင်းဟာ ကစားသမားအသစ်တွေ ခေါ်ယူနိုင်ဖို့အတွက် လာလီဂါ ရုပ်သံမူပိုင်ခွင့် ၁၀ ရာခိုင်နှုန်းကို Sixth Street ထံ ရောင်းချခဲ့ပြီး နောက်ထပ် ယူရို ၃၁၅ သန်း ရရှိဖို့ ၁၅ ရာခိုင်နှုန်းကိုပါ ထပ်မံ ရောင်းချခဲ့ပါတယ်။

ဒါ့အပြင် socios.com ထံ ယူရိုသန်း ၁၀၀ နဲ့ ဘာကာစတူဒီယိုရဲ့ ရာခိုင်နှုန်း ၂၅ ရာခိုင်နှုန်းကို ရောင်းချခဲ့ပါသေးတယ်။ ဒါပေမယ့် ခေါ်ယူထားတဲ့ သူတွေအားလုံးကို မှတ်ပုံတင်နိုင်ဖို့ နောက်ထပ် ပြုလုပ်ရမယ့် အပိုင်းတွေ ရှိနေ ပါသေးတယ်။

အဲ့ဒါကြောင့် စပိန်ကလပ်အနေနဲ့ နောက်ထပ် ယူရိုသန်း ၁၀၀ ထပ်မံရရှိဖို့အတွက် ဘာကာစတူဒီယိုရဲ့ ၂၄.၅ ရာခိုင်နှုန်းကို ရောင်းချနိုင်တာပါ။

ဘာစီလိုနာဥက္ကဋ္ဌ လာပေါ်တာက “ ကျနော်တို့အလုပ်ကို ကောင်းမွန်စွာ လုပ်ဆောင်ခဲ့ပြီး လိုအပ်ချက်တွေအားလုံး ပြည့်မီ နိုင်မယ်လို့ ယုံကြည်ပါတယ်။ စာရွက်စာတမ်းအားလုံးကို တင်ပြထားပြီးဖြစ်လို့ လာလီဂါရဲ့ တုံ့ပြန်မှုကို စောင့်ဆိုင်းနေတာပါ။ ကွာဟချက် တချို့တော့ ရှိကောင်းရှိနိုင်ပေမယ့် ကျနော်တို့ဟာ အရာအားလုံးကို လိုက်နာပြီး ကစားသမား စာရင်း တင်သွင်းခဲ့ တဲ့အတွက် ပြဿနာ မရှိနိုင်ဘူးဆိုတာ နားလည်ကြောင်း” ပြောခဲ့ပါတယ်။

လာလီဂါပြိုင်ပွဲမှာ ကစားသမားစာရင်း တင်သွင်းဖို့ စောင့်ဆိုင်းနေရတာဟာ ဘာစီလိုနာ တစ်သင်းတည်း မဟုတ်ဘဲ ဘက်တစ်၊ အယ်လ်မာရီယာ၊ အယ်လ်ချီ၊ ဗီလာရီးရယ်လ်၊ ဗယ်လာဒိုးလစ်တို့လည်း ဒီပြဿနာနဲ့ ရင်ဆိုင်နေရပါတယ်။

Source: Goal

CNI Sport News

၂၀၂၂ ခုနှစ်၊ဩဂုတ် ၆

ဆီရီယာလီယွန်တိုက်စစ်မှူး ဘူယာတူရေးဟာ ဆွီဒင်ထိပ်သီးကလပ် မယ်လ်မိုနဲ့ ပူးပေါင်းဖို့အတွက် သူ့ရဲ့ မင်္ဂလာ ပွဲကို အစ်ကိုဖြစ်သူနဲ့ လွှဲခဲ့တယ်လို့ သိရပါတယ်။

မင်္ဂလာပွဲအခမ်းအနားမှာ အစ်ကိုဖြစ်သူက သူ့ရဲ့နေရာအစားဝင်ရောက်ပြီး သတို့သမီးဖြစ်သူနဲ့အတူ ရပ်ခဲ့ရတယ်လို့ ဘူယာတူရေးက ဆွီဒင်သတင်းစာ Aftonbladet ကို ပြောခဲ့တာပါ။ “ကျနော်တို့ ဇူလိုင် ၂၁ ရက် ဆီရီယာလီယွန်မှာ လက်ထပ်ခဲ့ပါတယ်။ဒါပေမယ့် မယ်လ်မိုက ကျနော့်ကို စောစီးစွာလာရောက်ပူးပေါင်းဖို့ ပြောခဲ့လို့ အဲ့ဒီနေရာမှာ မရှိခဲ့ပါဘူး။ကျနော်တို့ ဓါတ်ပုံကို ကြိုပြီးရိုက်ထားတယ်။အဲဒါကြောင့် အဲ့ဒီမှာ ကျနော်ရှိနေသလို ဖြစ်ပေမယ့် မရှိခဲ့ပါဘူး။မင်္ဂလာဆောင်မှာ အစ်ကိုက ကျနော့်နေရာကိုယ်စားပြုပေးရမှာ”လို့ ပြောခဲ့ပါတယ်။

မင်္ဂလာပွဲကို ဇူလိုင် ၂၁ ရက်မှာပြုလုပ်ဖို့ သတ်မှတ်ထားပေမယ့် ဆွီဒင်ကလပ်က ဘူယာတူရေးကို အမြန်ဆုံး ပူးပေါင်းစေချင်နေတာကြောင့် မင်္ဂလာပွဲအခမ်းအနားကို လွှဲခဲ့ရတာပါ။ဇူလိုင် ၂၂ ရက်မှာတော့ မယ်လ်မိုက သူ့ကို ခေါ်ယူနိုင်တဲ့အပြောင်းအရွှေ့ကို ကြေညာခဲ့တာဖြစ်ပါတယ်။အဲဒါကြောင့် အစ်ကိုဖြစ်သူက မင်္ဂလာအခမ်းအနားမှာ ဘူယာတူရေးရဲ့ နေရာကို အစားဝင်ခဲ့ရတာပါ။တူရေးဟာ တရုတ်လိဂ်မှာ ၂ ရာသီကြာ ကစားပြီးနောက် မယ်လ်မို အသင်းကို ပြောင်းရွှေ့လာခဲ့တာဖြစ်ပါတယ်။

တူရေးဟာ လူဇင်ဘတ်ကလပ်ကို အနိုင်ရခဲ့တဲ့ ယူရိုပါလိဂ် တတိယအဆင့် ခြေစစ်ပွဲရဲ့ ပွဲစဉ်ပြီးဆုံးဖို့ ၉ မိနစ်အလို မှာ မယ်လ်မိုအသင်းအတွက် ပွဲဦးထွက်အဖြစ် ပါဝင်ကစားခွင့်ရခဲ့တာပါ။ ဆီရီယာလီယွန်ကစားသမားဟာ ဆွီဒင် လိဂ်အတွေ့အကြုံရှိပြီး မယ်လ်မိုအသင်းမတိုင်ခင် ဒီနိုင်ငံက ကလပ်အသင်းတွေဖြစ်တဲ့ ဒါကာ့၊ အက်စ်ကေးလ် စတူနာ၊ ဂျူဂါဒန်အသင်းတွေမှာ ကစားခဲ့တာဖြစ်ပါတယ်။သူဟာ ဂျူဂါဒန်အသင်းမှာ အငှားကစားခဲ့တဲ့ ၂၀၁၉ မှာ အမှတ်ပေးချန်ပီယံဆုကို ရယူနိုင်ခဲ့တာပါ။

ဘူယာတူရေးဟာ အဆိုပါရာသီ လိဂ်ပွဲ ၂၉ ပွဲမှာ ၁၅ ဂိုးသွင်းယူခဲ့ပြီး ထိပ်တန်းဂိုးသွင်းရှင်အဖြစ် ရပ်တည်ခဲ့ ပါတယ်။တူရေးဟာ လက်ထပ်ပြီးကတည်းက ဇနီးဖြစ်သူနဲ့ ပြန်လည်ဆုံတွေ့ရခြင်း မရှိသေးပေမယ့် ဟန်းနီးမွန်း အတူထွက်မယ်လို့ ကတိပေးထားခဲ့တာပါ။ “ပထမဆုံးက ကျနော်တို့လိဂ်ပြိုင်ပွဲကို အနိုင်ယူရပါမယ်။ပြီးရင် ဟန်းနီး မွန်းထွက်မယ်”လို့ တူရေးက ပြောခဲ့တာဖြစ်ပါတယ်။

Source:ChannelNewsAsia

CNI Sport News

၂၀၂၂ ခုနှစ်၊ ဩဂုတ် ၆

ယူကရိန်းကလပ် ဒိုင်နမိုကိဗ်အသင်းကို အရေးနိမ့်ခဲ့တဲ့ ချန်ပီယံလိဂ်ပွဲစဉ်မှာ ရုရှားသမ္မတ ဗလာဒီမာပူတင်ရဲ့ နာမည်ကြွေးကြော်ခဲ့တဲ့ ပရိသတ်တွေကြောင့် ဖီနာဘာချီအသင်းကို ယူအီးအက်ဖ်အေက ပြစ်ဒဏ်ချမှတ်လိုက်ပါ တယ်။

တူရကီကလပ်ဟာ ယူရို ၅၀,၀၀၀(ငါးသောင်း) ဒဏ်ရိုက်ခံခဲ့ရပြီး နောက်လာမယ့် ဥရောပပွဲစဉ်မှာ အနည်းဆုံး ပရိသတ် ၅၀၀၀(ထိုင်ခုံ ၅၀၀၀) သာ ခွင့်ပြုမယ့် တစ်ပိုင်းတစ်စကွင်းပိတ် ပြစ်ဒဏ်ချမှတ်ခံခဲ့ရတာပါ။ဒါပေမယ့် ဒီပြစ်ဒဏ်ကို ၂ နှစ်ကြာ ဆိုင်းငံ့ထားပါတယ်။ ယူအီးအက်ဖ်အေက “အရာဝတ္ထုတွေနဲ့ ပစ်ပေါက်ခြင်း၊ရန်စဖွယ် လှုံဆော်တဲ့ စကားတွေကြောင့်” အရေးယူခဲ့တာဖြစ်တယ်လို့ ပြောခဲ့တာပါ။ဒိုင်နမိုကိဗ်အသင်းဟာ ဒီပွဲမှာ ဖီနာ ဘာချီအသင်းကို နှစ်ကျော့ပေါင်းရလဒ် ၂ ဂိုး- ၁ ဂိုးနဲ့ အချိန်ပိုမှာ အနိုင်ရပြီး နောက်တစ်ဆင့်တက်နိုင်ခဲ့တာ ဖြစ်ပါတယ်။

ဒီပွဲစဉ်မှာ ဒိုင်နမိုကိဗ်ဘက်ကို ဂိုးပေးလိုက်ရပြီးနောက် ထောင်နဲ့ချီတဲ့ ဖီနာဘာချီအသင်း ပရိသတ်တွေဟာ ရုရှားသမ္မတရဲ့ နာမည်ကို ကြွေးကြော်ခဲ့ကြတာပါ။ဒိုင်နမိုကိဗ်ကွင်းလယ်ကစားသမား ဘူရယ်လ်စကီးက ဂိုးသွင်းယူပြီးချိန်မှာ လင်းယုန်လက်ဟန်ပုံစံနဲ့ အောင်ပွဲခံခဲ့တာဖြစ်ပြီး ဒါကို တူရကီကလပ်ပရိသတ်တွေက ပြိုင်ဘက် ဘက်ဆီးတပ်စ်ကို ရည်ညွှန်းတယ်လို့ ယူဆကြကာ ကြွေးကြော်သံတွေ ထွက်ပေါ်လာခဲ့တာ ဖြစ်ပါတယ်။ဖီနာဘာချီအသင်းကတော့ ပရိသတ်တွေရဲ့လုပ်ရပ်ဟာ ကလပ် ဒါမှမဟုတ် သူတို့အသင်းအဖွဲ့ရဲ့ ရပ်တည်ချက်ကို လုံးဝကိုယ်စားမပြုဘူးလို့ ပြောခဲ့ပါတယ်။

“အားကစားနဲ့ နိုင်ငံရေးကို အမြဲတမ်းသီးခြားခွဲထားသင့်တယ်ဆိုတဲ့ ကျနော်တို့ရဲ့ ရပ်တည်ချက်ကို ပြည်သူတွေကို ထပ်ပြီး သတိပေးပါတယ်”လို့ ဖီနာဘာချီအသင်းက ထုတ်ပြန်ခဲ့တာဖြစ်ပါတယ်။ ဒိုင်နမိုကိဗ်အသင်းနည်းပြ လူဆက်စ်ကူက အားကစားအနေနဲ့ ပရိသတ်တွေရဲ့အပြုအမူကို လက်မခံနိုင်ဘူးလို့ အဆိုပါပွဲအပြီးမှာ သတင်း ထောက်တွေကို ပြောခဲ့တာပါ။ “ဒီလိုကြွေးကြော်မယ်လို့ ကျနော်မမျှော်လင့်ထားပါဘူး။ သနားစရာကောင်းပါ တယ်” လို့ ပြောခဲ့ပြီး ပရိသတ်တွေရဲ့လုပ်ရပ်ကို ကန့်ကွက်တဲ့အနေနဲ့ ပွဲအပြီးသတင်းစာရှင်းလင်းပွဲကို တက်ရောက် ဖို့ ငြင်းဆန်ခဲ့ပါတယ်။

ယူကရိန်းသံအမတ်ကြီး ဘောဒ့်နာကတော့ ဒီအဖြစ်အပျက်ကြောင့် သူစိတ်မကောင်းဖြစ်ရတယ်လို့ ပြောခဲ့ကြောင်း သတင်းမှာ ဖော်ပြထားပါတယ်။

Source:BBC

CNI Sport News

၂၀၂၂ ခုနှစ်၊ ဩဂုတ် ၆

ပဲလေစ့်အသင်းကို အနိုင်ရတဲ့ ပရီးမီးယားလိဂ်ပွဲအပြီးမှာ အာဆင်နယ်အသင်းကို ကြည့်ရတာ ဆာလောင်နေပုံ ရတယ်လို့ နည်းပြ အာတီတာက ပြောလိုက်ပါတယ်။

အာတီတာက “ကောင်လေးတွေဟာ ရာသီကြိုစတင်ကတည်းက ပထမရက်သတ္တပတ်အနည်းငယ်အတွင်းမှာ ဒီခံစားချက်ကို ခံစားခဲ့ရပါတယ်။သူတို့ဟာ တကယ်ကိုအနိုင်ရချင်တဲ့စိတ်နဲ့အတူ အဆင်သင့်ဖြစ်နေသလို၊ ဆာလောင်မွတ်သိတ်နေကြပါပြီ။ကျနော်တို့ ကစားချင်တဲ့ပုံစံအတိုင်း ဒီကိုရောက်ရှိလာခဲ့တာပါ။ကျနော်တို့ဟာ ပွဲကိုကြီးစိုးနိုင်ခဲ့တယ်၊ခြိမ်းခြောက်မှုတွေပြုလုပ်နိုင်ခဲ့တယ်။ကျနော်တို့ဟာ အစပိုင်းကတည်းက တက်ကြွပြီး ထက်မြက်ခဲ့ကြပါတယ်။ဖိအားတွေအောက်မှာ ကစားရတဲ့အခါမှာလည်း ဒါကို ခံနိုင်ရည်ရှိအောင် ရင်ဆိုင်ခဲ့ကြ တယ်”လို့ Match of the Day ကို ပြောခဲ့တာပါ။

အာဆင်နယ်အသင်းဟာ ဒီပွဲမှာ ပဲလေစ့်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ဂိုးတွေကို မာတင်နယ်လီနဲ့ ပဲလေစ့်နောက်ခံလူ ဂီဟီက ကိုယ့်ဂိုးကိုယ်သွင်းယူခဲ့တာဖြစ်ပါတယ်။ဒီပွဲမှာ အာဆင်နယ်အတွက် ပထမဂိုးသွင်း ယူပေးခဲ့တဲ့ မာတင်နယ်လီရဲ့ ဂိုးဟာ ရာသီသစ် ပရီးမီးယားလိဂ်ပြိုင်ပွဲရဲ့ ပထမဆုံးဂိုးအဖြစ်လည်း မှတ်တမ်း ဝင်ခဲ့တာပါ။လန်ဒန်ကလပ်ဟာ ပရီးမီးယားလိဂ်အဖွင့်ပွဲမှာ အနိုင် ၃ မှတ်နဲ့အတူ ပေးဂိုးမပေးခဲ့ရတာကြောင့် ပြီးပြည့်စုံတဲ့ နိုင်ပွဲရယူနိုင်ခဲ့တာဖြစ်ပါတယ်။

အာတီတာက “အရေးကြီးဆုံးက ပထမပွဲစဉ်အနိုင်ရဖို့ဖြစ်ပြီး ဒါမှလည်း ယုံကြည်မှုနဲ့ အရှိန်အဟုန်ကို တည်ဆောက်မှာပါ။ပြီးမှ ကျနော်တို့တိုးတက်ဖို့ လိုအပ်နေတဲ့အရာတွေအကြောင်းကို ပြောနိုင်ပါတယ်။ ရိုးရိုး သားသား ပြောရမယ်ဆိုရင် ဒီနေ့မှာ တော်တော်လေးနည်းပါးပါတယ်”လို့ ပြောခဲ့တာပါ။ဒီပွဲမှာ ကစားသမားသစ် တွေဖြစ်တဲ့ ဂျီးဆပ်စ်နဲ့ ဇင်ချန်ကိုတို့ ပါဝင်ကစားခဲ့သလို မာဆေးလ်ကနေ ပြန်ရောက်လာတဲ့ နောက်ခံလူ ဆလီ ဘာလည်း ပါဝင်ကစားသွားခဲ့တာဖြစ်ပါတယ်။

ဆလီဘာကတော့ ဒီပွဲရဲ့ အကောင်းဆုံးကစားသမားအဖြစ် သတ်မှတ်ခံရသလို ချီးကျူးမှုတွေလည်း အများကြီး ရယူနိုင်ခဲ့တာပါ။ပဲလေစ့်အသင်းနည်းပြ ဗီအဲရာက “ဖန်တီးလို့ရတဲ့ အခွင့်အရေးအနည်းငယ်ကနေ ဂိုးတွေ သွင်းယူ နိုင်ရပါမယ်။ကောင်းမွန်စွာကစားနိုင်တဲ့ အချိန်တွေရှိခဲ့ပေမယ့် အခွင့်အရေးတွေတော့ အရယူရပါမယ်။အထူးသဖြင့် အာဆင်နယ်လို အသင်းမျိုးနဲ့ ရင်ဆိုင်ရတဲ့ အခါမှာပေါ့”လို့ ပြောခဲ့ပါတယ်။

အာဆင်နယ်အသင်းဟာ ပွဲစဉ် ၂ မှာ လက်စတာအသင်းနဲ့ ယှဉ်ပြိုင်ရမှာဖြစ်ပြီး ပဲလေစ့်အသင်းကတော့ လီဗာပူးလ် အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC

CNI Sport News

၂၀၂၂ ခုနှစ်၊ ဩဂုတ် ၅

အိုင်ယာလန်ဖိုက်တာ မက်ဂရီဂေါ ဟာ လေ့ကျင့်မှုတွေ ပြုလုပ်နေပေမယ့် MMA လောကကနေ ထွက်ခွာဖို့ အစီအစဉ် ရှိတယ်လို့ အရိပ်အမြွက် ဖော်ပြလိုက်ပါတယ်။

အသက် ၃၄ နှစ်အရွယ်ရှိ ချန်ပီယံဟောင်းဟာ ဒက်စတင်ပိုရီရာ ကို အရေးနိမ့်တဲ့ပွဲမှာ ခြေထောက်ကျိုးပြီးနောက် ၂၀၂၁ ခုနှစ်၊ ဇူလိုင်လ ကတည်းက ပြိုင်ပွဲထိုးသတ်ခြင်း မရှိတော့တာပါ။ မက်ဂရီဂေါ ဟာ ဒဏ်ရာကနေ ပြန်လည် ကောင်းမွန်လာဖို့ အတွက် အားကစားခန်းမမှာ ပြင်းပြင်းထန်ထန် လေ့ကျင့်နေပြီး ပြိုင်ပွဲထိုးသတ်ဖို့ ပြန်လာခဲ့မယ်လို့ အရင်က ပြောခဲ့ပါတယ်။

ဒါပေမယ့် မက်ဂရီဂေါ ဟာ “MMA မင်းကိုငါ ဘယ်တော့မှ မမေ့ပါဘူး။ လွယ်ကူတဲ့ အလုပ်ဆိုပြီး” တွစ်တာမှာ ရေးသားခဲ့ တာပါ။

ဒါနဲ့ ပတ်သက်ပြီး တုံ့ပြန်မှု အမျိုးမျိုးရှိခဲ့ကြတာ ဖြစ်ပါတယ်။ မက်ဂရီဂေါဟာ UFC ပြိုင်ပွဲကနေ အနားယူနိုင်ပေမယ့် မေဝယ်သာနဲ့ လက်ဝှေ့ မကျေပွဲအတွက် လက်အိတ်ကို ထပ်မံ ဝတ်ဆင်နိုင်တယ်လို့ သုံးသပ်နေကြတာပါ။

မက်ဂရီဂေါ ကိုတွေ့ရစဉ် (Bleacher Report)

သူတို့ နှစ်ဦးဟာ ဒေါ်လာ သန်းပေါင်းများစွာ တန်ကြေးရှိတဲ့ ထိုးသတ်ပွဲအတွက် သဘောတူညီမှု ရယူနိုင်ဖို့ အလွန်နီးစပ်နေပြီး မေဝယ်သာ ကလည်း သူ့ရဲ့ ရှုံးပွဲမရှိ စံချိန်ကို ဆက်ပြီး ထိန်းသိမ်းချင်နေတာ ဖြစ်ပါတယ်။ မက်ဂရီဂေါဟာ အရင်ကလည်း ကစားသမားဘဝက အနားယူပြီလို့ ဆုံးဖြတ်ပြီး ပြိုင်ပွဲတွေ ပြန်လည် ထိုးသတ်ခဲ့ပါတယ်။

မက်ဂရီဂေါဟာ ၂၀၁၆ ဧပြီလက ဒီပြိုင်ပွဲကနေ နုတ်ထွက်ကြောင်း ကြေညာခဲ့ပေမယ့် ၂၀၁၈ မှာ ခါဘစ်နဲ့ ပြန်လည် ထိုးသတ် ခဲ့ပြီး အရေးနိမ့်ခဲ့တာကြောင့် အနားယူကြောင်း ကြေညာခဲ့ပါတယ်။ ဒါပေမယ့် ၂၀၂၀ မှာ ပြန်လည် ထိုးသတ်ကာ ထပ်မံ အနား ယူခဲ့ပေမယ့် ၂၀၂၁ မှာ ဒတ်စတင်ပိုရီရာနဲ့ ၂ ပွဲထိုးသတ်ခဲ့ပြီး အရေးနိမ့်ခဲ့ပါတယ်။

မက်ဂရီဂေါဟာ MMA ပွဲပေါင်း ၂၈ ပွဲထိုးသတ်ခဲ့ပြီး ၂၂ ပွဲအနိုင်ရကာ ၆ ပွဲ ရှုံးနိမ့်ခဲ့ပါတယ်။ အိုင်ယာလန် ဖိုက်တာဟာ ဖယ်သာဝိတ်၊ လိုက်ဝိတ်နဲ့ ဝယ်လ်တာဝိတ်တန်းတွေမှာ ထိုးသတ်ခဲ့ပြီး ချန်ပီယံဆုတွေ ရယူနိုင်ခဲ့တာ ဖြစ်ပါတယ်။

Source: The Sun

CNI Sport News

၂၀၂၂ ခုနှစ်၊ ဩဂုတ် ၅

ရုရှားကလပ် PSK ဆာခလင်အသင်းကို ပြိုင်ဘက်အသင်းတွေက နိုင်ငံရေး အကြောင်းပြချက်တွေအပေါ် အခြေခံ ဆုံးဖြတ် ခဲ့ပြီးနောက် ၂၀၂၂-၂၃ ရာသီ အာရှလိဂ် ရေခဲပြင် ဟော်ကီပြိုင်ပွဲကနေ ယှဉ်ပြိုင်ခွင့် ပိတ်ပင်လိုက်ပါတယ်။

အင်္ဂါနေ့က ပြုလုပ်ခဲ့တဲ့ ဗွီဒီယိုကွန်ဖရန့်အပြီးမှာ သူတို့ကို အသိပေး အကြောင်းကြားခဲ့တယ်လို့ PSK ဆာခလင်အသင်းက ဆိုရှယ်မီဒီယာမှာ သတင်းကို မျှဝေခဲ့ပါတယ်။

“အစည်းအဝေးအပြီး အသင်းတွေနဲ့ သဘောတူညီမှုအရ လိဂ်ခေါင်းဆောင်တွေက နိုင်ငံရေး အခြေအနေတွေကြောင့်လို့ သုံးနှုန်းပြီး ရုရှားအားကစား သမားတွေ ပါဝင်တဲ့ အသင်းကို ပြိုင်ပွဲကနေ ဖယ်ရှားဖို့ ဆုံးဖြတ်ခဲ့တယ်”လို့ ဖော်ပြခဲ့တာ ဖြစ်ပါတယ်။

ဆာခလင်အသင်းကို ဟော်ကီဝါသနာအိုးဖြစ်တဲ့ ရုရှားသမ္မတ ပူတင်ရဲ့ အားပေးမှုနဲ့ ၂၀၁၃ မှာ စတင်တည် ထောင်ခဲ့တာ ဖြစ်ပါတယ်။ ဆာခလင်အသင်းဟာ အာရှလိဂ် ဟော်ကီရေခဲပြင် ဟော်ကီပြိုင်ပွဲမှာ ၂၀၁၈-၁၉ ရာသီက ချန်ပီယံဆုကို ရယူနိုင်ခဲ့သလို၊ နောက်တစ်နှစ် အကြာမှာလည်း ထိပ်တန်းချန်ပီယံဆုကို ရယူနိုင်ခဲ့ပါတယ်။

ရုရှားဟော်ကီအသင်း ချန်ပီယံဆုရစဉ် (Russia Posts)

ဒီပြိုင်ပွဲကို ၂၀၀၃ က စတင် ကျင်းပခဲ့တာဖြစ်ပြီး ဂျပန်နဲ့ တောင်ကိုရီးယား အသင်းတွေအပြင် အရင်ကလည်း တရုတ်အသင်း တွေ ပါဝင်ယှဉ်ပြိုင်ခဲ့ ကြပါတယ်။

ဆာခလင်အသင်းကို ပြိုင်ပွဲဝင်ခွင့် ပိတ်ပင်တာနဲ့ ပတ်သက်ပြီး တရားဝင် လိဂ်ဝက်ဘ်ဆိုဒ်မှာတော့ ရေးသား ဖော်ပြထားခြင်း မရှိပါဘူး။ ရုရှားအားကစားသမားတွေနဲ့ အသင်းတွေဟာ ယူကရိန်းကို ကျူးကျော်ပြီးချိန်က စတင်ပြီး ကျယ်ကျယ်ပြန့်ပြန့် ပိတ်ပင်မှုတွေနဲ့ ရင်ဆိုင်ခဲ့ရတာ ဖြစ်ပါတယ်။

နိုင်ငံတကာ အိုလံပစ်ကော်မတီကလည်း ရုရှားနဲ့ ဘယ်လာရုစ် အားကစားသမားတွေကို ပြိုင်ပွဲဝင်ခွင့်ပိတ်ပင်ဖို့ အားကစား အဖွဲ့ချုပ်တွေကို အကြံပြုထားပါတယ်။ ရုရှားတာဝန်ရှိသူတွေက အဆိုပါ ပိတ်ပင်မှုတွေကို ခွဲခြားဆက်ဆံမှု အဖြစ် ဖော်ပြခဲ့ သလို နိုင်ငံရေး ဝင်ရောက်စွက်ဖက်ခြင်းဟာ ကင်းစင်တဲ့ အားကစားနိယာမကို ပျက်ပြားစေတယ်လို့ ပြောခဲ့ပါတယ်။

ဆွီဒင်၊ လတ်ဗီးယားနဲ့ ဖင်လန်စတဲ့ နိုင်ငံတချို့ကလည်း ရုရှားဟော်ကီအသင်းမှာ ဆက်လက် ပါဝင်နေတဲ့ သူတို့ ကစားသမား တွေကို နိုင်ငံအသင်းအတွက် ရွေးချယ်မှုမှာ ထည့်သွင်းစဉ်းစားမှာ မဟုတ်ဘူးလို့ ပြောထားပါတယ်။

Source: အာတီရ်

CNI Sport News

၂၀၂၂ ခုနှစ်၊ ဩဂုတ် ၅

မန်စီးတီးဂန္တဝင် အဂွေရိုက အခုနှစ်ရာသီ ပရီးမီးယားလိဂ်ချန်ပီယံဆုအတွက် မန်စီးတီးနဲ့ လီဗာပူးလ်အသင်းကို အာဆင်နယ်အသင်းက စိန်ခေါ်နိုင်မယ်လို့ ပြောလိုက်ပါတယ်။

အဂွေရိုက “အမြဲတမ်းလိုပါပဲ ပရီးမီးယားလိဂ်ဟာ ကမ္ဘာပေါ်မှာပြိုင်ဆိုင်မှုအရှိဆုံး လိဂ်တွေထဲက တစ်ခု ဖြစ်ကြောင်းကို ပြသနိုင်မယ်လို့ ကျနော်ယုံကြည်ပါတယ်။ဒီရာသီမှာ ဆုဖလားရနိုင်ဖို့အတွက် မန်စီးတီး၊ လီဗာပူးလ်၊ချယ်လ်ဆီးနဲ့ ရာသီကြိုမှာ အလွန်အားကောင်းပြီး ရလဒ်ကောင်းတွေရခဲ့တဲ့ အာဆင်နယ်အသင်းကို ကျနော်ထည့်သွင်းချင်ပါတယ်။အာတီတာရဲ့အကူအညီနဲ့ ကောင်းမွန်တဲ့ ပရောဂျက်ကို စုစည်းထားတဲ့ အာဆင်နယ် ရဲ့ စွမ်းဆောင်ရည်ကို အာရုံစိုက်ရမှာဖြစ်ပါတယ်။ဒီနှစ်မှာတော့ သူတို့တွေဟာ လူတွေကို ပြောစရာတစ်ခုခု ပေးနိုင် မယ်လို့ ထင်တယ်” လို့ Stake.com ကို ပြောခဲ့တာပါ။

အာဆင်နယ်အသင်းဟာ ပြီးခဲ့တဲ့ရာသီက ချန်ပီယံလိဂ်ဝင်ခွင့်ကို လက်လွှတ်ခဲ့ရတာကြောင့် ဒီရာသီမှာ အသင်းရဲ့ လူစာရင်းကို တောင့်တင်းအောင် အားဖြည့်ထားခဲ့ပါတယ်။မန်စီးတီးအသင်းက ဂျီးဆပ်စ်နဲ့ ဇင်ချန်ကိုတို့ကို ခေါ်ယူ ထားပြီး ဖာဘီယိုဗီအဲရာ၊ မာကွင်ဟိုစ်နဲ့ မတ်တာနာတို့ကိုလည်း ခေါ်ယူခဲ့တာပါ။အာဆင်နယ်အသင်းဟာ ပြီးခဲ့တဲ့ ရာသီကြိုခြေစမ်းပွဲတွေမှာ ရလဒ်ကောင်းတွေရယူနိုင်ခဲ့ပြီး တိုက်စစ်မှူးသစ် ဂျီးဆပ်စ်ကလည်း ဂိုးသွင်းစွမ်းရည် ပြသခဲ့တာ ဖြစ်ပါတယ်။

အဲဒါကြောင့်လည်း အဂွေရိုက အာဆင်နယ်အသင်းကို အခုနှစ် ပရီးမီးယားလိဂ်ချန်ပီယံဆုအတွက် စောင့်ကြည့် ရမယ့် စာရင်းထဲ ထည့်သွင်းခဲ့တာပါ။ “ထိပ်ဆုံး ၄ သင်းက မန်စီးတီး၊ လီဗာပူးလ်၊ ချယ်လ်ဆီးနဲ့ အာဆင်နယ်တို့ ဖြစ်မယ်ဆိုတာ ကျနော်ယုံကြည်တယ်”လို့ အဂွေရိုက ပြောခဲ့ပါတယ်။ယူနိုက်တက်နဲ့ စပါးအသင်းကိုတော့ ထိပ်ဆုံး ၄ သင်းအပြင်ဘက်မှာသာ ရှိနိုင်ပြီး ဗီလာ၊ နယူးကာဆယ်နဲ့ ဘရိုက်တန်တို့ဟာ ဥရောပဝင်ခွင့်အတွက် တိုက်ပွဲဝင် နိုင်မယ်လို့ မန်စီးတီးဂန္တဝင်က ပြောခဲ့တာပါ။

၂၀၂၂-၂၃ ရာသီ ပရီးမီးယားလိဂ်ပြိုင်ပွဲကို သြဂုတ်လ ၆ ရက်မနက်ပိုင်းမှာ စတင်ကျင်းပတော့မှာဖြစ်ပြီး အဖွင့်ပွဲစဉ် အဖြစ် အာဆင်နယ်နဲ့ ပဲလေစ့်အသင်းတို့ ယှဉ်ပြိုင်မှာ ဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဩဂုတ် ၅

အမေရိကန်ဘတ်စကတ်ဘောကြယ်ပွင့် ဘရစ်တနီဂရိုင်နာကို ရုရှားတရားရုံးက မူးယစ်ဆေးဝါးစွဲချက်နဲ့ ထောင်ဒဏ် ၉ နှစ် ချမှတ်လိုက်ပါတယ်။

အသက် ၃၁ နှစ်အရွယ်ရှိ ဂရိုင်နာဟာ လက်ထိပ်ခတ်ပြီး တရားခွင်ကနေ ထွက်ခွာလာချိန်မှာ သူ့ရဲ့မိသားစုကို အလွန်ချစ်တယ်လို့ ပြောခဲ့တာကို ကြားခဲ့ရကြောင်း သတင်းမှာ ဖော်ပြထားတာပါ။အိုလံပစ်ချန်ပီယံဆုကို ၂ ကြိမ် ရရှိထားတဲ့ ဂရိုင်နာဟာ ဆေးခြောက်ဆီကို ပိုင်ဆိုင်ကြောင်း ဝန်ခံခဲ့ပြီး သူမဟာ ရိုးသားစွာအမှားကျူးလွန်မိခဲ့ တယ်လို့ တရားရုံးကို ပြောခဲ့ပါတယ်။မော်စကိုမြို့အနီးရှိ တရားရုံးက သူမကို မူးယစ်ဆေးဝါး မှောင်ခိုရောင်းဝယ်မှု၊ လက်ဝယ်ထားရှိမှုနဲ့ ပြစ်ဒဏ်ချမှတ်ခဲ့ပြီး ထောင်ဒဏ် ၉ နှစ်ချမှတ်ခဲ့တာပါ။

ကြာသပတေးနေ့က စီရင်ချက်ကို ဖတ်ကြားခဲ့တာမှာ ဂရိုင်နာဟာ ချုပ်နှောင်မှုမှာ အချိန်အတော်ကြာရှိနေပြီဆိုတဲ့ အချက်ကို ထည့်သွင်းစဉ်းစားခဲ့တယ်လို့ တရားသူကြီးက ပြောခဲ့ပါတယ်။ဂရိုင်နာရဲ့ရှေ့နေဖြစ်သူ ဘလာဂိုဗိုလီနာ က သူမရဲ့ အမှုသည်ဟာ အလွန်စိတ်ဆိုးစိတ်ပျက်နေပြီး အလွန်စိတ်ဖိစီးမှုလည်းဖြစ်နေတယ်လို့ ပြောခဲ့တာပါ။ ဒီစီရင်ချက်နဲ့ပတ်သက်ပြီး အယူခံဝင်သွားမယ်လို့လည်း ဂရိုင်နာရဲ့ရှေ့နေဖြစ်သူက ပြောခဲ့ပါတယ်။ဂရိုင်နာဟာ ဖေဖော်ဝါရီလက သူမရဲ့ ခရီးဆောင်အိတ်အတွင်း ဆေးခြောက်ဆီပါဝင်ခဲ့တာတွေကို တွေ့ရှိရပြီးနောက် မော်စကိုမြို့အနီးရှိ လေဆိပ်မှာ ဖမ်းဆီးထိန်းသိမ်းခံခဲ့ရတာပါ။

ဂရိုင်နာဟာ အမေရိကန်ရဲ့ ပြိုင်ပွဲရာသီနားနေတဲ့အချိန် ဘတ်စကတ်ဘောကစားဖို့ ရုရှားကို လာခဲ့တာဖြစ်ပါ တယ်။အမေရိကန်သမ္မတ ဂျိုးဘိုင်ဒန်က ဒီ စီရင်ချက်နဲ့ပတ်သက်ပြီး လက်ခံနိုင်စရာမရှိဘူးလို့ ပြောခဲ့တာပါ။ “ရုရှားက ဘရစ်တနီကို မတရားဖမ်းဆီးထားပါတယ်။ဒါက လက်ခံနိုင်စရာမရှိတဲ့အတွက် သူမကို ချက်ခြင်း ပြန်လွှတ်ပေးဖို့ ရုရှားကို တောင်းဆိုပါတယ်။ဒါကြောင့် သူမဟာ သူ့ဇနီး၊ သူချစ်ရတဲ့သူတွေ၊ သူငယ်ချင်းတွေ၊ အသင်းဖော်တွေနဲ့အတူ ရှိနေနိုင်ပါတယ်”လို့ ဂျိုးဘိုင်ဒန်က ကြေညာချက်ထုတ်ပြန်ခဲ့တာပါ။

အမေရိကန်နဲ့ ရုရှားတို့ဟာ ဘတ်စကတ်ဘောကစားသမား ပါဝင်လာနိုင်တဲ့ အကျဉ်းသားလဲလှယ်ရေးကိစ္စကို ဆွေးနွေးနေတာကြောင့် ဂရိုင်နာအနေနဲ့ ထောင်ထဲမှာ ဘယ်လောက်ကြာကြာနေရမလဲဆိုတာ ရှင်းရှင်းလင်းလင်း မသိရသေးတာဖြစ်ပါတယ်။

Source:BBC

CNI Sport News

၂၀၂၂ ခုနှစ်၊ သြဂုတ် ၄

မြန်မာကစားသမား ၂ ဦးဖြစ်တဲ့ ကောင်းထက်စိုးနဲ့ ရန်လင်းအောင်တို့ကို ထိုင်းလိဂ် ၃ ကလပ် ကမ်ဖမ်ဖတ်အသင်းက တစ်ရာသီစာချုပ်နဲ့ ခေါ်ယူလိုက်ပြီ ဖြစ်ပါတယ်။

ဒီကစားသမား ၂ ဦးစလုံးဟာ ထိုင်းလိဂ်မှာ ကစားချင်တာကြောင့် မြန်မာကလပ်တွေရဲ့ ကမ်းလှမ်းမှုကို ပယ်ချခဲ့တယ်လို့ အေးဂျင့်ဖြစ်သူက ပြောခဲ့ပါတယ်။

ကောင်းထက်စိုးဟာ မြန်မာ့လက်ရွေးစင် ကစားသမားတစ်ဦးဖြစ်ပြီး ရန်ကုန်ယူနိုက်တက် အသင်းနဲ့အတူ အာရှချန်ပီယံလိဂ်၊ အေအက်ဖ်စီဖလား ပြိုင်ပွဲတွေမှာ ဝင်ရောက် ကစားထားပါတယ်။ ရန်လင်းအောင် ကတော့ ယူ-၂၀ ကမ္ဘာ့ဖလားပြိုင်ပွဲဝင် ကစားသမားတစ်ဦးလည်း ဖြစ်ပါတယ်။

ရန်လင်းအောင်နဲ့ ကမ်ဖမ်ဖတ်အသင်း စာချုပ်ချုပ် (Kamphaengphet FC)

ကမ်ဖမ်ဖတ် အသင်းကတော့ ဒီကစားသမား ၂ ဦး အသင်းမှာ ခြေစွမ်းပြနိုင်လို့ အသင်းကြီးတွေက ကမ်းလှမ်းလာတဲ့ အခါမှာ ထွက်ခွာခွင့် ပေးမယ်လို့ ကတိပေးထားကြောင်း အေးဂျင့်ဖြစ်သူက ပြောပါတယ်။ ကမ်ဖမ်ဖတ်အသင်းဟာ ထိုင်းလိဂ် ၃ မြောက်ပိုင်းဒေသမှာ ကစားနေတာဖြစ်ပြီး မနှစ်က ရာသီက အသင်း ၁၂ သင်းရှိတဲ့လိဂ်ရဲ့ အမှတ်ပေးဇယား အဆင့် ၉ နေရာ မှာ ရပ်တည်ခဲ့တာပါ။

ဒီလိဂ်မှာ ထိပ်ဆုံးရတဲ့ ၂ သင်းဟာ လိဂ် ၂ ပြိုင်ပွဲကို တန်းတက်နိုင်ဖို့အတွက် ခြေစစ်ပွဲ ထပ်မံယှဉ်ပြိုင်ရတာ ဖြစ်ပါတယ်။

ကမ်ဖမ်ဖတ်အသင်းကို ၂၀၀၉ က စတင် ဖွဲ့စည်းခဲ့တာဖြစ်ပြီး အသင်းဟာ အခုအချိန်ထိ ထိုင်းလိဂ် ၂ ကို တန်းမတက်နိုင် သေးပဲ ထိုင်းလိဂ် ၃ မှာ ကျင်လည်နေတာပါ။ မြန်မာကစားသမား အများအပြားကတော့ အခုရာသီမှာ ထိုင်းလိဂ်ပြိုင်ပွဲကို ပြောင်းရွှေ့ပြီး ကစားနေကြတာ ဖြစ်ပါတယ်။

CNI Sport News

၂၀၂၂ ခုနှစ်၊ ဩဂုတ် ၄

လက်စတာအသင်းမှာ ၁၁ နှစ်ကြာကစားခဲ့တဲ့ ဂိုးသမား ကတ်စပါရှမိုက်ကယ်ဟာ ပြင်သစ်ကလပ် နိုက်စ်အသင်းကို ပြောင်းရွှေ့သွားခဲ့ပြီဖြစ်ပါတယ်။

လိဒ်စ်ယူနိုက်တက်ကနေ ၂၀၁၁ က ရောက်ရှိလာခဲ့တဲ့ ကတ်စပါရှမိုက်ကယ်ဟာ နိုက်စ်အသင်းနဲ့ ၃ နှစ်စာချုပ်ချုပ် ဆိုခဲ့တာပါ။သူဟာ လက်စတာအသင်းအတွက် ၄၇၈ ပွဲပါဝင်ကစားခဲ့ပြီး ၂၀၁၆ က ပရီးမီးယားလိဂ်ဆုဖလားကို ကိုင်မြှောက်နိုင်ခဲ့တာဖြစ်ပါတယ်။

ဝက်စ်မော်ဂန်အနားယူပြီးနောက် လက်စတာအသင်းခေါင်းဆောင် ဖြစ်လာတဲ့ ကတ်စပါရှမိုက်ကယ်ဟာ ၂၀၂၁ က အက်ဖ်အေဖလား ရယူနိုင်အောင်အသင်းကို ဦးဆောင်နိုင်ခဲ့တာပါ။ ဒိန်းမတ် ဂိုးသမားဟာ လက်စတာအသင်းနဲ့ ပြီးခဲ့တဲ့ရာသီက ကွန်မြူနတီဒိုင်းကိုလည်း ရယူနိုင်ခဲ့ပါတယ်။

ကတ်စပါရှမိုက်ကယ်က “မယုံနိုင်ဖွယ်ကောင်းမွန်တဲ့ ၁၁ ရာသီကို ဖြတ်သန်းအပြီးမှာတော့ ကျနော်ဟာ လက်စတာကနေ ထွက်ခွာဖို့ ခက်ခဲတဲ့ဆုံးဖြတ်ချက်ကို ချခဲ့ပါတယ်။ဒီအသင်းဟာ ကျနော့်အတွက် ကလပ်ဆိုတာ ထက်ကို ပိုပါတယ်။တစ်သက်လုံးအတွက် အမှတ်တရတွေကို ဖန်တီးထားခဲ့တဲ့နေရာဖြစ်ပြီး ကျနော့်ရဲ့အိမ်ပါပဲ။ ကွင်းထဲမှာရှိတဲ့သူတွေ၊ ပရိသတ်တွေနဲ့အတူ နောက်ကွယ်မှာရှိတဲ့သူတွေရဲ့ ပံ့ပိုးမှုတွေကလည်း အံမခန်းဖြစ်ခဲ့ပြီး တစ်ယောက်ချင်းစီတိုင်းကို ကျေးဇူးတင်ပါတယ်။အားလုံးကို မကြာခင်မှာတွေ့ကြမယ်”လို့ တွစ်တာမှာ ရေးသားခဲ့ ပါတယ်။

လက်စတာအသင်းဥက္ကဋ္ဌကလည်း ကလပ်အသင်းရဲ့ဂန္တဝင် ကတ်စပါရှမိုက်ကယ်ဟာ အသင်းရဲ့မိသားစုဝင်ထဲမှာ အမြဲတမ်းရှိနေမယ်လို့ ပြောခဲ့တာပါ။

လက်စတာအသင်းဟာ ကတ်စပါရှမိုက်ကယ်ရဲ့နေရာမှာ အစားထိုးဖို့ ဂိုးသမားအသစ်ခေါ်မှာမဟုတ်ဘဲ ဒန်နီးဝါတ့်က နံပတ်တစ်ဂိုးသမားအဖြစ် တာဝန်ယူရဖွယ် ရှိနေပါတယ်။

လက်စတာအသင်းဟာ အခုအပြောင်းအရွှေ့ ထိပ်တန်းလိဂ် ၅ လိဂ်မှာ ကစားသမားမခေါ်ယူတဲ့ တစ်သင်းတည်းသော အသင်းလည်း ဖြစ်ပါတယ်။

လက်စတာအသင်းရဲ့ အဓိကကစားသမားတွေဖြစ်တဲ့ မက်ဒီဆင်၊ တိုင်လီမန်စ်၊ ဘားနတ်စ်နဲ့ ဖိုဖာနာတို့ကိုလည်း အသင်းက ထွက်ခွာဖို့ ပရီးမီးယားလိဂ်ကလပ်တွေက ချိတ်ဆက်မှုတွေ ပြုလုပ်နေတာ ဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ ဩဂုတ် ၄

လူကျွံဘောခြေရာခံစနစ်ကို ရီးရယ်လ်နဲ့ ဖရန့်ဖတ်တို့ရဲ့ ယူအီးအက်ဖ်အေ စူပါဖလားပွဲစဉ်မှာ စတင်မိတ်ဆက်ပြီး နောက် အခုနှစ်ရာသီ ချန်ပီယံလိဂ်ပြိုင်ပွဲမှာအသုံးပြုမယ်လို့ ဥရောပဘောလုံးအဖွဲ့ချုပ်က ဗုဒ္ဓဟူးနေ့မှာ ထုတ်ပြန် လိုက်ပါတယ်။

“ယူအီးအက်ဖ်အေက ပွဲစဉ်တွေပိုမိုကောင်းမွန်ဖို့နဲ့ ဒိုင်လူကြီးတွေရဲ့လုပ်ဆောင်မှုတွေကို ပံ့ပိုးပေးနိုင်ဖို့ နည်းပညာ ဆိုင်ရာ ဖြေရှင်းချက်အသစ်တွေကို အစဉ်တစိုက်ရှာဖွေမှုတွေ ပြုလုပ်နေခဲ့တာပါ။ ဒီဆန်းသစ်ထီထွင်တဲ့ စနစ်က VAR အဖွဲ့တွေကို လူကျွံဘောအခြေအနေတွေကို မြန်မြန်ဆန်ဆန်နဲ့ ပိုမိုတိကျစွာ ဆုံးဖြတ်နိုင်မှာဖြစ်ပါတယ်”လို့ ယူအီးအက်ဖ်အေ ဒိုင်လူကြီးအကြီးအကဲ ရိုဆက်တီက ပြောခဲ့တာပါ။

ကစားသမားတွေရဲ့ ကိုယ်ခန္ဓာပေါ်ကရှိတဲ့ အမှတ်တွေကို ခြေရာခံမယ့် အထူးကင်မရာတွေကို အသုံးပြုထားတဲ့ ဒီစနစ်ကို ဟယ်လင်စကီးမှာ ကျင်းပမယ့် စူပါဖလားနဲ့ ချန်ပီယံလိဂ်အုပ်စုအဆင့်ပွဲစဉ်တွေမှာ အသုံးပြုသွားတော့ မှာဖြစ်ပါတယ်။ဒီစနစ်ဟာ ကစားသမားတစ်ဦးချင်းစီရဲ့ မတူညီတဲ့ ခန္ဓာကိုယ်အမှတ် ၂၉ ခုကို အထူးကင်မရာ တွေနဲ့ ခြေရာခံနေတာဖြစ်ပြီး ၂၀၂၀ ကတည်းက စတင်ကာ စမ်းသပ်မှုပေါင်း ၁၈၈ ကြိမ်ပြုလုပ်ခဲ့တာပါ။

ဒီစနစ်ကို တရားဝင်ပွဲတွေမှာ အသုံးပြုဖို့ အဆင်သင့်ဖြစ်နေပြီး ချန်ပီယံလိဂ်ကျင်းပတဲ့နေရာတိုင်းမှာ အကောင် အထည်ဖော်မှာပါ”လို့ ရိုဆက်တီက ပြောခဲ့ပါတယ်။ကမ္ဘာ့ဘောလုံးအဖွဲ့ချုပ်က ဒီစနစ်ကို အခုနှစ် ကာတာ ကမ္ဘာ့ ဖလားပြိုင်ပွဲမှာ အသုံးပြုသွားမှာဖြစ်တယ်လို့ ပြီးခဲ့တဲ့လက ပြောခဲ့ပြီး ဆုံးဖြတ်ချက်တွေဟာ ပိုတိကျပြီး ပိုမြန်ဆန် တယ်လို့ ကတိပေးခဲ့တာပါ။VAR အနေနဲ့ သူတို့ချမှတ်တဲ့ဆုံးဖြတ်ချက်တွေကို အားကစားကွင်းမှာရှိတဲ့ ရုပ်သံ မျက်နှာပြင်ပေါ်မှာ ပြန်လည်ပြသတဲ့အချိန် ပရိသတ်တွေဟာ 3D အန်နီမေးရှင်းတချို့ကိုလည်း ကြည့်ရှုနိုင်မှာ ဖြစ်ပါတယ်။

ယူအီးအက်ဖ်အေစူပါဖလားပွဲစဉ်ကို သြဂုတ်လ ၁၀ ရက်မှာကျင်းပသွားမှာဖြစ်ပြီး အင်္ဂလိပ်ဒိုင်လူကြီး မိုက်ကယ် အိုလီဗာက ကွင်းလယ်ဒိုင်လူကြီးအဖြစ် ဆောင်ရွက်မှာဖြစ်ပါတယ်။

Source:Reuters

CNI Sport News

၂၀၂၂ ခုနှစ်၊ ဩဂုတ် ၄

ပရီးမီးယားလိဂ်ကစားသမားတွေဟာ ပွဲမစတင်ခင် ဒူးထောက်တဲ့ အစီအစဉ်ကို ပွဲစဉ်တိုင်း ပြုလုပ်သွားတော့မှာ မဟုတ်ဘဲ အကန့်အသတ်နဲ့သာ ပြုလုပ်သွားတော့မှာ ဖြစ်ပါတယ်။

ပရီးမီးယားလိဂ်ဟာ ၂၀၂၀ မေလက အမေရိကန်မှာ ဂျော့ချ်ဖလွိုက်သေဆုံးပြီးနောက် Black Lives Matter လှုပ်ရှားမှုကို ထောက်ခံတဲ့အနေနဲ့ ကိုဗစ်ကြောင့် ရပ်နားခဲ့တဲ့ လိဂ်ပွဲတွေပြန်စတင်တဲ့အချိန်မှာ ပြုလုပ်ခဲ့တာပါ။

အခုအချိန်မှာတော့ ပရီးမီးယားလိဂ်အသင်းခေါင်းဆောင်တွေဟာ အသင်းဖော်တွေနဲ့တိုင်ပင်မှုတွေပြုလုပ်ပြီး နောက် အကန့်အသတ်နဲ့သာပြုလုပ်ဖို့ ဆုံးဖြတ်ခဲ့တာဖြစ်ပါတယ်။

ဒူးထောက်တဲ့အစီအစဉ်ကို ဘောက်ဆင်ဒေး ပွဲစဉ်တွေ၊ ဖလားဗိုလ်လုပွဲတွေအပါအဝင် တချို့ပွဲမတိုင်ခင်မှာတော့ တွေ့မြင်ရမှာပါ။ပြီးခဲ့တဲ့ မန်စီးတီးနဲ့ လီဗာ ပူးလ်အသင်းတို့ရဲ့ ကွန်မြူနတီဒိုင်းပွဲစဉ်မှာတော့ အဆိုပါပြုလုပ်မှုကို တွေ့မြင်ခဲ့ရပါတယ်။

“လူမျိုးရေးခွဲခြားမှုအားလုံးကို ဆန့်ကျင်တဲ့ ကျနော်တို့ရဲ့ စည်းလုံးညီညွတ်မှုကို မီးမောင်းထိုးပြဖို့အတွက် ရာသီ အတွင်း ဒူးထောက်မယ့်အစီအစဉ်အတွက် အရေးပါတဲ့ အခိုက်အတန့်တွေကို ရွေးချယ်ဖို့ ဆုံးဖြတ်ခဲ့ပါတယ်။ ဒီလိုလုပ်ဆောင်ခြင်းနဲ့ စည်းလုံးညီညွှတ်မှုကို ဆက်လက်ပြသနေပါတယ်” လို့ ပရီးမီးယားလိဂ်အသင်း ခေါင်းဆောင်တွေရဲ့ ပူးတွဲကြေညာချက်မှာ ဖော်ပြခဲ့တာပါ။

ပဲလေ့စ်အသင်းတိုက်စစ်မှူး ဇာဟာက ဒူးထောက်တဲ့အစီအစဉ်ကို ၂၀၂၁ ဖေဖော်ဝါရီလကတည်းက ရပ်တန့် ခဲ့တာဖြစ်ပါတယ်။

ဇာဟာက “အခုအချိန်မှာ ဒူးထောက်တာပဲဖြစ်စေ မတ်တပ်ရပ်တာပဲဖြစ်စေ ကိစ္စမရှိပါဘူး။ ကျနော်တို့ထဲက တချို့ဟာ အခုအချိန်ထိကို ခွဲခြားဆက်ဆံမှုကို ဆက်လက်ခံနေရဆဲဖြစ်တယ်”လို့ ပြောခဲ့တာပါ။

ချန်ပီယံရှစ်ကလပ်အသင်းတွေဖြစ်တဲ့ ဒါဘီ၊ ဘုန်းမောက်၊ ဘရန်ဖိုဒ့်၊ ကျူပီအာ တို့ကလည်း အဆိုပါအချိန်ကစပြီး ဒူးထောက်ခြင်းကို ပြုလုပ်ခြင်းမရှိတော့ပါဘူး။ဆွမ်ဆီးနဲ့ ဘရစ်စတိုးလ်တို့ကလည်း ဒီအစီအစဉ်ကို သူတို့ရပ်တန့် လိုက်ပြီလို့ မကြာသေးခင်က ကြေညာခဲ့ပါတယ်။

ပရီးမီးယားလိဂ်အမှုဆောင်ချုပ် ရစ်ချတ်မာစတာက “ ပြီးခဲ့တဲ့အပတ်က ကျနော်တို့ အသင်းခေါင်းဆောင်တွေနဲ့ တွေ့ဆုံခဲ့ပါတယ်။သူတို့တွေဟာ ဒီကိစ္စနဲ့ပတ်သက်ပြီး လုံးဝကတိကဝတ်ပြုထားဆဲပါ။ဒူးထောက်လာတာဟာ ၂ နှစ်ကြာရှိပြီဖြစ်တဲ့အတွက် ပွဲရဲ့ အစိတ်အပိုင်းလိုကိုဖြစ်လာပါပြီ။ကစားသမားတွေက သူတို့ စွမ်းအားတွေနဲ့ အရှိန်တွေကို ဆုံးရှုံးမှာ စိုးရိမ်နေတဲ့အတွက် မတူညီတဲ့ပုံစံနဲ့ ပြုလုပ်မှာကို တွေ့မြင်ရတော့မှာပါ။ကစားသမား တွေအနေနဲ့ သူတို့ကိုယ်တိုင်ဆုံးဖြတ်ရမှာဖြစ်ပြီး၊ ကလပ်အသင်းတွေလိုပဲ သူတို့ဆုံးဖြတ်ချက်ကို ထောက်ခံမှာပါ” လို့ BBC Sports ကို ပြောခဲ့တာဖြစ်ပါတယ်။

၂၀၂၂-၂၃ ရာသီသစ် ပရီးမီးယားလိဂ်ပြိုင်ပွဲကို သြဂုတ်လ ၅ ရက်မှာ စတင်ကျင်းပသွားတော့မှာ ဖြစ်ပါတယ်။

Source:BBC