CNI Sport News

၂၀၂၂ ခုနှစ်၊ဩဂုတ် ၉

အင်တာမီလန်အသင်းဟာ တိုက်စစ်မှူး ဆန်းချက်စ်နဲ့ ချုပ်ဆိုထားတဲ့စာချုပ်ကို နှစ်ဖက်သဘောတူ ဖျက်သိမ်း လိုက်ပြီလို့ တနင်္လာနေ့က ထုတ်ပြန်လိုက်ပါတယ်။

“နောက်ဆုံး ၃ ရာသီအတွင်းမှာ အဓိကဆုဖလား ၃ လုံးရရှိအောင်စွမ်းဆောင်ပေးနိုင်ခဲ့တဲ့ ဆန်းချက်စ်ကို အထူး ကျေးဇူးတင်ကြောင်းနဲ့ အနာဂတ်ကစားသမားဘ၀ အကောင်းဆုံးဖြစ်ဖို့အတွက် ဆုတောင်းပေးတယ်” လို့ အင်တာမီလန်အသင်း ရဲ့ ကြေညာချက်မှာ ဖော်ပြထားတာပါ။အသက် ၃၃ နှစ်အရွယ်ရှိ ဆန်းချက်စ်ဟာ ၂၀၁၉ က မန်ချက်စတာယူနိုက်တက်ကနေ အင်တာမီလန်အသင်းထံ ရောက်ရှိလာခဲ့တာဖြစ်ပြီး ပွဲပေါင်း ၁၀၉ ပွဲပါဝင် ကစားခဲ့ကာ ဂိုး ၂၀ သွင်းယူနိုင်ခဲ့ပါတယ်။

ဆန်းချက်စ်ဟာ အင်တာမီလန်အသင်းနဲ့အတူ နှစ်ပေါင်း ၁၁ နှစ်ကြာဝေးကွာနေတဲ့ စီးရီးအေဖလား၊ ကိုပါ အီတာလီယာဖလားနဲ့ စူပါဖလားတို့ကို ရယူနိုင်ခဲ့တာပါ။ဒါပေမယ့် ချီလီကစားသမားဟာ ပြီးခဲ့တဲ့ရာသီကတည်း က အင်တာမီလန်အသင်းမှာ ပုံမှန်ကစားခွင့်ရဖို့ ရုန်းကန်ခဲ့ရတာဖြစ်ပါတယ်။အီတလီကလပ်ဟာ အခု အပြောင်း အရွှေ့မှာ တိုက်စစ်မှူးဟောင်း လူကာကူကို ချယ်လ်ဆီးအသင်းကနေ အငှားနဲ့ ပြန်ခေါ်ယူခဲ့တာကြောင့် ဆန်းချက်စ်ဟာ ကစားခွင့်ရဖို့ ပိုမိုခက်ခဲသွားခဲ့တာပါ။အဲဒါကြောင့် အသင်းကထွက်ခွာဖို့ ကြိုးစားခဲ့ပြီး ကလပ် အသင်းကလည်း စာချုပ်ဖျက်သိမ်းပေးပြီး ထွက်ခွာခွင့်ပေးခဲ့တာဖြစ်ပါတယ်။

ဆန်းချက်စ်ဟာ လက်ရှိအချိန်မှာ ပြင်သစ်ကလပ် မာဆေးလ်အသင်းထံ အလွတ်ပြောင်းရွှေ့ကြေးနဲ့ ပြောင်းရွှေ့ တော့မယ်လို့ သတင်းဌာနအများအပြားက ဖော်ပြခဲ့တာပါ။လာကာဇတ်တာဒယ်လိုစပေါ့ကတော့ ဆန်းချက်စ်ဟာ မာဆေးလ်အသင်းနဲ့ ၂ နှစ်စာချုပ်ချုပ်ဆိုမှာဖြစ်ပြီး ၁ နှစ်ကို ယူရို ၃ သန်းရရှိမယ်လို့ ဖော်ပြထားခဲ့ပါတယ်။ ဆန်းချက်စ်ဟာ ကစားသမားဘဝမှာ အူဒီးနီးစ်၊ ဘာစီလိုနာ၊ အာဆင်နယ်နဲ့ ယူနိုက်တက်အသင်းတွေမှာ ကစားခဲ့ ပြီး အောင်မြင်မှုအများအပြားရယူနိုင်ခဲ့တာပါ။

ပြီးခဲ့တဲ့ရာသီက စီးရီးအေဖလားကို လက်လွှတ်ခဲ့ရတဲ့ အင်တာမီလန်အသင်းဟာ ရာသီသစ်စီးရီးအေ အဖွင့်ပွဲစဉ် အဖြစ် အခုလာမယ့် စနေနေ့မှာ လက်ချီအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Reuters

CNI Sport News

၂၀၂၂ ခုနှစ်၊ သြဂုတ် ၉

မြန်မာအသင်းဟာ ကျင်းပနေဆဲ အာဆီယံယူ-၁၆ ပြိုင်ပွဲမှာ အုပ်စု ပထမနေရာ ရယူပြီး အကြိုဗိုလ်လုပွဲကို တက်သွားပြီ ဖြစ်ပါတယ်။

အကြိုဗိုလ်လုပွဲ တက်နိုင်ဖို့ အဆုံးအဖြတ် ပွဲစဉ်အဖြစ် ကစားခဲ့ရတဲ့ ကမ္ဘောဒီးယားနဲ့ အုပ်စု နောက်ဆုံးပွဲစဉ်မှာ မြန်မာအသင်း က ၁ ဂိုး- ဂိုးမရှိနဲ့ အနိုင်ရရှိခဲ့တာပါ။

မြန်မာအသင်းအတွက် တစ်လုံးတည်းသော အနိုင်ဂိုးကို ပွဲချိန် ၄၈ မိနစ်မှာ ရရှိခဲ့တဲ့ ပင်နယ်တီကို အသင်းခေါင်းဆောင် လင်းထက်ဦးက သွင်းယူသွားခဲ့တာ ဖြစ်ပါတယ်။ မြန်မာအသင်းဟာ အဖိုးတန် အနိုင်ဂိုးရအပြီး လက်ကျန်ပွဲ ကစားချိန်တွေ အတွင်းမှာ အနိုင်ရလဒ်ကို ထိန်းခဲ့ကာ အကြိုဗိုလ်လုပွဲ အဆင့်ကို တက်လှမ်းနိုင်ခဲ့တာ ဖြစ်ပါတယ်။

မြန်မာအသင်းဟာ ကမ္ဘောဒီးယားကို အနိုင်ရရှိခဲ့တဲ့ ပွဲစဉ် အပါအဝင် အုပ်စုတွင်းမှာ သြစတြေးလျကို ၃ ဂိုး- ၂ ဂိုးနဲ့ အနိုင်ရပြီး မလေးရှားအသင်းနဲ့ ၁ ဂိုးစီ သရေကျခဲ့တာ ဖြစ်ပါတယ်။

ပင်နယ်တီကန်ဖို့ လုပ်နေတဲ့ လင်းထက်ဦး (MFF)

အဲ့ဒါကြောင့် အုပ်စုပွဲစဉ် ၃ ပွဲ ကစားအပြီး ရမှတ် ၇ မှတ်နဲ့ ထိပ်ဆုံးနေရာ ရပ်တည်နိုင်ခဲ့တာ ဖြစ်ပါတယ်။ တခြား အုပ်စုတွေမှာ အိမ်ရှင် အင်ဒိုနီးရှားနဲ့ ထိုင်း အသင်းတို့လည်း အုပ်စုထိပ်ဆုံးနဲ့ အကြိုဗိုလ်လုပွဲ တက်နိုင်ခဲ့တာ ဖြစ်ပါတယ်။ ဗီယက်နမ်အသင်း ကတော့ အကောင်းဆုံးအုပ်စု ဒုတိယနဲ့ နောက်တစ်ဆင့် တက်ခဲ့ပါတယ်။

မြန်မာအသင်းဟာ အကြိုဗိုလ်လုပွဲအဖြစ် အိမ်ရှင် အင်ဒိုနီးရှားအသင်းနဲ့ ယှဉ်ပြိုင်ရမှာဖြစ်ပြီး ထိုင်းအသင်းက ဗီယက်နမ် အသင်းနဲ့ ယှဉ်ပြိုင်ရမှာ ဖြစ်ပါတယ်။ ဒီပွဲတွေကို သြဂုတ်လ ၁၀ ရက်မှာ ကျင်းပသွားမှာ ဖြစ်ပြီး မြန်မာအသင်းရဲ့ ပွဲစဉ်ကိုတော့ မြန်မာစံတော်ချိန် ည ၇ နာရီ မိနစ် ၃၀ အချိန်မှာ ယှဉ်ပြိုင်သွားမယ်လို့ သိရပါတယ်။

အာဆီယံယူ-၁၆ ပြိုင်ပွဲကို ကိုဗစ်ကူးစက်မှုတွေကြောင့် ပြီးခဲ့တဲ့ ၂ နှစ်ဆက်တိုက် မကျင်းပခဲ့ရတာဖြစ်ပြီး အခုနှစ်မှ ပြန်လည် ကျင်းပ နိုင်ခဲ့တာလည်း ဖြစ်ပါတယ်။

မြန်မာအသင်းကတော့ အာဆီယံယူ-၁၆ ပြိုင်ပွဲရဲ့ ၂၀၀၂ နဲ့ ၂၀၀၅ ခုနှစ်တွေမှာ ချန်ပီယံဆု ၂ ကြိမ် ရယူထားပြီး အဲ့ဒီနောက်ပိုင်း အောင်မြင်မှုတွေနဲ့ ဝေးကွာနေတာ ဖြစ်ပါတယ်။

CNI Sport News

၂၀၂၂ ခုနှစ်၊ သြဂုတ် ၈

အန်သိုနီဂျိုရွာရဲ့ ပွဲစီစဉ်သူ အက်ဒီဟန်းက တိုင်ဆန်ဗျူရီက လက်ရှိ ကမ္ဘာ့အကောင်းဆုံး ဟဲဗီးဝိတ်သမားပဲလို့ ပြောလိုက် ပါတယ်။

အက်ဒီဟန်းက “ အခုအချိန်မှာ ခင်ဗျား ကျနော့်ကို ကမ္ဘာ့အကောင်းဆုံး ဟဲဗီးဝိတ်က ဘယ်သူလဲလို့မေးရင် တိုင်ဆန်ဗျူရီပဲလို့ ပြောရမှာပါ။ ဒါကို ပြောရတာ နာကျင်ပေမယ့် ဒါက အဖြစ်မှန်ပါ”လို့ Happy Hour Podcast ကို ပြောခဲ့တာပါ။

တိုင်ဆန်ဗျူရီဟာ ဧပြီလက နောက်ဆုံး ထိုးသတ်ခဲ့တဲ့ပွဲမှာ ဒီလီယန်ဝှိုက်ကို အနိုင်ရထားပြီး ကစားသမားဘဝက အနားယူပြီ လို့ ပြောထားခဲ့ပါတယ်။ ဒါပေမယ့် ဗြိတိန် ဟဲဗီးဝိတ် ချန်ပီယံနဲ့ ပတ်သက်ပြီး ကောလာဟာလ သတင်းတွေ ထွက်ပေါ်နေ ခဲ့ပါတယ်။

တိုင်ဆန်ဗျူရီဟာ အန်သိုနီဂျိုရွာနဲ့ အူဆက်ခ်တို့ ပွဲစဉ်က အနိုင်ရတဲ့သူနဲ့ ထိုးသတ်ပြီး အငြင်းပွားဖွယ်မရှိ ဟဲဗီးဝိတ်ချန်ပီယံ အဖြစ် အဆုံးသတ်ဖို့ ပြောဆိုမှုတွေလည်း ရှိနေခဲ့ပါတယ်။

အက်ဒီဟန်းကိုတွေ့ရစဉ်(Sky Sport)

ဒါ့အပြင် တစ်နိုင်ငံတည်းသား အန်သိုနီဂျိုရွာနဲ့ ဒီဇင်ဘာလထဲမှာ ထိုးသတ်ဖို့ ရှိနေတယ်လို့လည်း သတင်းတွေ ထွက်နေခဲ့တာ ပါ။ ရှုံးပွဲမရှိ ဟဲဗီးဝိတ်ချန်ပီယံအဖြစ် ရပ်တည်နေတဲ့ တိုင်ဆန်ဗျူရီဟာ သရုပ်ပြပွဲတွေ ထိုးသတ်ဖို့လည်း ရှိနေပါတယ်။

လက်ရှိအချိန်မှာတော့ သြဂုတ်လထဲ ထိုးသတ်မယ့် အန်သိုနီဂျိုရွာနဲ့ အူဆက်ခ်တို့ ပွဲပြီးရင်တော့ အခြေအနေတွေဟာ ပြောင်းလဲသွားဖို့ ရှိနေတာပါ။ သူတို့နှစ်ဦးဟာ အခုလ ၂၀ ရက် ဆော်ဒီနိုင်ငံမှာ မကျေပွဲအဖြစ် ထိုးသတ်မှာ ဖြစ်ပါတယ်။

နောက်ဆုံး ထိုးသတ်ခဲ့တဲ့ ပွဲမှာ အူဆက်ခ်က အနိုင်ရပြီး WBA, IBF, WBO နဲ့ IBO ဟဲဗီးဝိတ်ချန်ပီယံဆုတွေကို ရယူနိုင်ခဲ့တာပါ။ အဲ့ဒါကြောင့် အန်သိုနီဂျိုရွာက ဒီပွဲမှာ အနိုင်ရပြီး ချန်ပီယံဆုတွေကို ပြန်လည် ရယူချင်နေတာ ဖြစ်ပါတယ်။

အက်ဒီဟန်းကတော့ သူ့ရဲ့ကစားသမားဖြစ်တဲ့ အန်သိုနီဂျိုရွာ အနေနဲ့ အူဆက်ခ်နဲ့ပွဲမှာ အနိုင်ရခဲ့ရင် ကမ္ဘာ့အကောင်းဆုံး ဟဲဗီးဝိတ်သမား ဖြစ်လာနိုင်တယ်လို့ ပြောပါတယ်။

Source: The Sun

CNI Sport News

၂၀၂၂ ခုနှစ်၊ ဩဂုတ် ၈

ဘရာဇီးလ်ဂျူဂျစ်ဆု ကမ္ဘာ့ချန်ပီယံ လီအန်ဒရိုလိုဟာ ဦးခေါင်းကို သေနတ်နဲ့ပစ်ခံခဲ့ရတာကြောင့် တနင်္ဂနွေနေ့က သေဆုံးသွားခဲ့တယ်လို့ ရှေ့နေဖြစ်သူက အတည်ပြုလိုက်ပါတယ်။

အသက် ၃၃ နှစ်အရွယ်ရှိ လိုဟာ ဘရာဇီးလ်နိုင်ငံ ဆာအိုပေါ်လိုမြို့က ဖျော်ဖြေပွဲတစ်ခုမှာ အခြားအမျိုးသား တစ်ဦးနဲ့ စကားများရန်ဖြစ်ခဲ့ရာမှာ သေနတ်နဲ့နဖူးကို ပစ်ခတ်ခံခဲ့ရတယ်လို့သတင်းတွေက ဖော်ပြထားတာပါ။ သူ့ကို ဆေးရုံပို့ဆောင်ခဲ့ပေမယ့် နာရီပိုင်းအကြာမှာ ဦးနှောက်သေသွားခဲ့တာဖြစ်ပါတယ်။

ရဲအရာရှိ ဗယ်လိုဇိုဟာ Clube Sirio ဖျော်ဖြေပွဲမှာ လီအန်ဒရိုလိုရဲ့ စားပွဲဝိုင်းပေါ်က ပုလင်းကို လာရောက်ယူခဲ့ပြီး နောက် ၎င်းတို့နှစ်ဦးသား ပြဿနာဖြစ်ပွားခဲ့တာကို မျက်မြင်တွေ့ရှိခဲ့ကြောင်း သေဆုံးမှုနဲ့ပတ်သက်ပြီး ရဲမှတ်တမ်း ကို ကိုးကားလျက် MMA Fighting က ဖော်ပြထားတာပါ။

သူတို့နှစ်ဦး ပြဿနာဖြစ်ပွားရာကနေ လူစုကွဲသွားခဲ့တာမှာ ရဲအရာရှိဗယ်လိုဇိုက သေနတ်ထုတ်ပြီး လီအန်ဒရိုလိုရဲ့ နဖူးကို ပစ်ခတ်ခဲ့တာလို့ သိရပါတယ်။ဆာအိုပေါ်လိုရှိ မီဒီယာတွေကတော့ ဒီလူသတ်မှုကို စုံစမ်းစစ်ဆေးနေဆဲ ဖြစ်ကြောင်း ဖော်ပြခဲ့တာပါ။လီအန်ဒရိုလိုဟာ ၂၀၁၂ က စတင်ကာ ကမ္ဘာ့ချန်ပီယံခါးပတ် ၈ ခုကို ရယူထားနိုင်ခဲ့ပြီး ဘရာဇီးလ်ဂျူဂျစ်ဆု အားကစားသမားတွေထဲမှာ အအောင်မြင်ဆုံးသူတစ်ဦး ဖြစ်ပါတယ်။

လီအန်ဒရိုလိုသေဆုံးခဲ့တဲ့ သတင်းဟာ MMA လောကသားတွေကို တုန်လှုပ်စေခဲ့ပြီး နာမည်ကျော်ကြယ်ပွင့်တွေနဲ့ ဝေဖန်သုံးသပ်သူတွေက ဆိုရှယ်မီဒီယာတွေကနေ ဝမ်းနည်းကြောင်း ရေးသားခဲ့ကြပါတယ်။

UFC တိုက်ခိုက်ရေး သမားဟောင်း ဖလော်ရီယန်က “ဘရာဇီးလ်ဂျူဂျစ်ဆုအသိုင်းအဝိုင်းအတွက် အလွန် ဝမ်းနည်း စရာကောင်းတဲ့နေ့ဖြစ်ပြီး လီအန်ဒရိုက ဂန္တဝင်ပါ”လို့ ရေးသားခဲ့ပါတယ်။UFC ဟဲဗီးဝိတ်ချန်ပီယံဟောင်း ဒေါ့ဆန်းတို့စ်က “ငြိမ်းချမ်းစွာအနားယူပါချန်ပီယံ”ရေ ဆိုပြီး ဆုတောင်းပေးနေတဲ့ အီမိုဂျီနဲ့ တွစ်တာမှာ တင်ခဲ့တာ ပါ။

လီအန်ဒရိုလိုဟာ ကမ္ဘာ့ချန်ပီယံဆု ၈ ကြိမ် အပါအဝင် ကမ္ဘာ့ဖလားချန်ပီယံဆု ၅ ကြိမ်၊ ပန်အမေရိကန်ချန်ပီယံဆု ၈ ကြိမ်နဲ့ အောင်မြင်မှုအများအပြား ရယူနိုင်ခဲ့တာလည်း ဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ ဩဂုတ် ၈

ဘာစီလိုနာအသင်းတိုက်စစ်မှူးသစ် လီဝန်ဒေါစကီးဟာ မက္ကဆီကိုကလပ် ပူးမတ်စ်အသင်းနဲ့ ကစားခဲ့တဲ့ ဂျိုအန်ဂမ်ပါဖလားပွဲမှာ စပိန်ကလပ်အတွက် ဂိုးစတင်သွင်းယူနိုင်ခဲ့ပြီဖြစ်ပါတယ်။

ဒီပွဲမှာ ဘာစီလိုနာအသင်းဟာ ပူးမတ်စ်အသင်းကို ၆ ဂိုး- ဂိုးမရှိနဲ့ ဂိုးပြတ်အနိုင်ရရှိခဲ့တာပါ။ဘာစီလိုနာအသင်းဟာ ရာသီသစ်မစတင်ခင် နှစ်စဉ်နှစ်တိုင်း နူးကမ့်ပ်ကွင်းမှာ ဂျိုအန်ဂမ်ပါဖလားပွဲအဖြစ် ယှဉ်ပြိုင်ကစားခဲ့တာဖြစ်ပြီး ဒီနှစ်မှာ ပူးမတ်စ်အသင်းနဲ့ ကစားခဲ့တာပါ။

ဘာစီလိုနာအတွက် ဂိုးတွေကို ပီဒရီက ၂ ဂိုး၊ လီဝန်ဒေါစကီး၊ ဒမ်ဘီလီ၊ ဒီဂျောင်နဲ့ အူဘာမီယန်းတို့က ၁ ဂိုးစီသွင်းယူခဲ့တာပါ။အခုအပြောင်းအရွှေ့မှာ ဘိုင်ယန်မြူးနစ်ကနေ ရောက်ရှိ လာခဲ့တဲ့ လီဝန်ဒေါစကီးအတွက်တော့ ဒီပွဲမှာ ဘာစီလိုနာဂျာစီနဲ့ ပထမဆုံးဂိုးကို ရယူနိုင်ခဲ့တာဖြစ်ပါတယ်။

ပိုလန်တိုက်စစ်မှူးဟာ ပြီးခဲ့တဲ့ အမေရိကန်ခရီးစဉ်မှာ ဂိုးမသွင်းနိုင်ခဲ့ပေမယ့် နူးကမ့်ပ်ကွင်းကြီးထဲမှာ ကစားခဲ့ရတဲ့ ပွဲမှာတော့ သွင်းဂိုးရယူနိုင်ခဲ့တာပါ။

လီဝန်ဒေါစကီးဟာ ဒီပွဲမှာ ၁ ဂိုးသွင်းယူခဲ့တဲ့အပြင် အသင်းဖော် ပီဒရီသွင်းယူ ခဲ့တဲ့ ၂ ဂိုးစလုံးကိုလည်း ဖန်တီးပေးနိုင်ခဲ့တာဖြစ်ပါတယ်။အဲဒါကြောင့်လည်း အခုနှစ် ဂျိုအန်ဂမ်ပါဖလားပွဲရဲ့ အကောင်းဆုံးကစားသမားဆုကို ရရှိသွားခဲ့ပါတယ်။ “နူးကမ့်ပ်မှာ ပထမဆုံးပွဲကစားရလို့ ပျော်ရွှင်သလို ဆုဖလား လည်း ရယူနိုင်ခဲ့တယ်” လို့ လီဝန်ဒေါစကီးက ဆိုရှယ်မီဒီယာတစ်ခုကို ပြောခဲ့တာပါ။

ဘာစီလိုနာအသင်းဟာ ပြီးခဲ့တဲ့ရာသီက ဆုဖလားလက်မဲ့ဖြစ်ခဲ့တာကြောင့် ဒီရာသီမှာ အဓိက ကစားသမား အများအပြားကို အားဖြည့်ထားပြီး ဆုဖလားရယူနိုင်ဖို့ ပြင်ဆင်နေတာဖြစ်ပါတယ်။ ကတ်တလန်ကလပ်ဟာ ရီးရယ်လ်အသင်းကို အနိုင်ရခဲ့တဲ့ ပွဲစဉ်အပါအဝင် ရာသီကြိုခြေစမ်းပွဲတွေမှာလည်း ရလဒ်ကောင်းတွေကို ပိုင်ဆိုင်ထားတာပါ။

ဘာစီလိုနာအသင်းဟာ သြဂုတ်လ ၁၃ ရက်မှာ စပိန်လာလီဂါ ပွဲစဉ် ၁ အဖြစ် အိမ်ကွင်းမှာ ဗယ်လက်ကာနို အသင်းနဲ့ ယှဉ်ပြိုင်ရမှာဖြစ်ပြီး လီဝန်ဒေါစကီးကတော့ ဒီပွဲမှာ ပွဲထွက်ခွင့်ရဖို့ မျှော်လင့်နေတာ ဖြစ်ပါတယ်။

Source:Reuters

CNI Sport News

၂၀၂၂ ခုနှစ်၊ သြဂုတ် ၈

မန်စီးတီးတိုက်စစ်မှူးသစ် ဟာလန်းက ဝက်စ်ဟမ်းကို အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ၂ ဂိုးပဲ သွင်းယူနိုင်ခဲ့လို့ စိတ်ပျက်မိကြောင်း ပြောလိုက်ပါတယ်။

ဟာလန်းက “ ကျနော် ဟတ်ထရစ် ရခဲ့သင့်တာပါ။ လူစားလဲ မခံရချိန် ဂန်ဒိုဂန် ရတဲ့ အခွင့်အရေးမျိုးမှာ သူ့နေရာ မှာ ကျနော်ရှိ နေခဲ့သင့်တာပါ။ အနည်းငယ်တော့ စိတ်ပျက်မိပေမယ့် ဒါက ပြီးသွားပါပြီ။ လေ့ကျင့်မှုတွေနဲ့ လေ့ကျင့်ရေးတွေမှာ နေ့တိုင်း လုပ်ဆောင်နေတဲ့ ချိတ်ဆက်မှုတွေကြောင့် ပိုပြီးတော့ ကောင်းလာမှာပါ။ ဒီထက် ပိုကောင်းလာဖို့ပဲရှိလို့ စိတ်မပူပါဘူး။ ကျနော် ဂိုးတွေရဖို့ ဆက်သွားရမှာပါ”လို့ ပွဲအပြီး အင်တာဗျူးမှာ ပြောသွား ပါတယ်။

မန်စီးတီးအသင်းဟာ ပရီးမီးယားလိဂ် အဖွင့်ပွဲအဖြစ် ဝက်စ်ဟမ်းအသင်းရဲ့ အိမ်ကွင်းမှာ ကစားခဲ့တဲ့ ဒီပွဲမှာ ၂ ဂိုး- ဂိုး မရှိနဲ့ အနိုင်ရခဲ့တာဖြစ်ပြီး ၂ ဂိုးစလုံးကို ဟာလန်းက သွင်းယူခဲ့တာ ဖြစ်ပါတယ်။

နော်ဝေ လက်ရွှေးစင် တိုက်စစ်မှူးလည်းဖြစ်တဲ့ ဟာလန်းဟာဆိုရင် ပြီးခဲ့တဲ့ လီဗာပူးလ်နဲ့ ကွန်မြူနတီဒိုင်းပွဲစဉ်က လွဲချော်မှုတွေကနေ ဒီပွဲမှာ အကောင်းဆုံးပုံစံနဲ့ ပြန်လာနိုင်ခဲ့တာ ဖြစ်ပါတယ်။

ဂွာဒီယိုလာနဲ့ ဟာလန်းကိုတွေ့ရစဉ် (The Sun)

ဟာလန်းဟာ ဝက်စ်ဟမ်းနဲ့ ပွဲစဉ်မှာ ၂ ဂိုး သွင်းယူထားတာကြောင့် ဟတ်ထရစ် ရယူဖို့ ကြိုးစားနေခဲ့ပေမယ့် နည်းပြ ဂွာဒီယိုလာက ပွဲချိန် ၇၈ မိနစ်မှာ အယ်လ်ဗားရတ်စ်နဲ့ လူစားလဲခဲ့တာ ဖြစ်ပါတယ်။

ဂွာဒီယိုလာကတော့ “ဟာလန်းဟာ ကျနော်တို့ ကစားချင်တဲ့ပုံစံနဲ့ လိုက်လျောညီထွေ ဖြစ်အောင် လုပ်ဆောင်နေ ပါတယ်။ သူ့ကို ဂိုးတွေ သွင်းနိုင်ဖို့အတွက် ကျနော်တို့ဘက်က အခွင့်အရေးတွေ ပိုပေးနိုင်ဖို့ မျှော်လင့်ထားပါတယ်။ ပြီးခဲ့တဲ့ အပတ်က လီဗာပူးလ်နဲ့ ပွဲအပြီးမှာဆိုရင် ဟာလန်းက ပရီးမီးယားလိဂ်နဲ့ လိုက်လျောညီထွေဖြစ်မှာ မဟုတ် ဘူးဆိုပြီး လှောင်ပြောင် ခဲ့ကြပါတယ်။ အခုဆိုရင်သူက နောက်ထပ် အွန်နရီ ဒါမှမဟုတ် ရော်နယ်ဒိုဆိုပြီး ဖြစ်လာ တော့မှာပါ။ အချိန်ယူရဦးမယ်။ ဒါက သူ့ရဲ့ ပထမဆုံး ပရီးမီးယားလိဂ်ပွဲပါ”လို့ ပြောခဲ့ပါတယ်။

မန်စီးတီးအသင်းဟာ သြဂုတ်လ ၁၃ ရက်မှာ ပရီးမီးယားလိဂ် ဒုတိယပွဲစဉ်အဖြစ် အိမ်ကွင်းမှာ ဘုန်းမောက် အသင်းနဲ့ ယှဉ်ပြိုင်သွားမှာ ဖြစ်ပါတယ်။

Source: 90min

CNI Article

၂၀၂၂ ခုနှစ်၊ ဩဂုတ် ၇

အင်္ဂလန် အမျိုးသမီးအသင်းရဲ့ စံချိန်တင် ဂိုးသွင်းရှင် အယ်လန်ဝှိုက်ဟာ အသက် ၉ နှစ် အရွယ်တုန်းက အမျိုးသမီးဖြစ်နေလို့ ဆိုပြီးတော့ ဘောလုံးကစားခွင့် ပိတ်ပင် ခံခဲ့ရဖူးပါတယ်။

အခုအချိန်မှာတော့ အယ်လန်ဝှိုက်ဟာ အင်္ဂလန် အမျိုးသမီးအသင်းနဲ့ ယူရိုချန်ပီယံဆုကို ရယူနိုင်ခဲ့ပြီ ဖြစ်ပါတယ်။ အင်္ဂလန် အမျိုးသမီးအသင်းဟာ ပြီးခဲ့တဲ့ ယူရိုပြိုင်ပွဲမှာ ပြိုင်ဘက်ကြီး ဂျာမနီကို အနိုင်ရကာ ချန်ပီယံဆုကို ရယူနိုင်ခဲ့တာ ဖြစ်ပါတယ်။

ဒီပွဲကြီး ပွဲကောင်းမှာ အယ်လန်ဝှိုက် ဟာဆိုရင် ရှေ့တန်းမှာ ပွဲစတည်းက ပါဝင်ခဲ့ပါတယ်။ သူမဟာဆိုရင် ကလပ် အသင်း အနေနဲ့ မန်စီးတီးအသင်းမှာလည်း ကစားနေသူဖြစ်ပါတယ်။ ဒီမန်စီးတီး ကစားသမားဟာ ၂၀၁၀ မှာ အင်္ဂလန်အမျိုးသမီး အသင်းအတွက် စတင်ကစားခွင့်ရခဲ့ပြီး လက်ရွေးစင်အသင်းအတွက် ၅၂ ဂိုး သွင်းယူထားပါတယ်။

အယ်လန်ဝှိုက် ဟာ ပြီးခဲ့တဲ့ ယူရိုပြိုင်ပွဲမှာ နည်းပြ ဝီဂ်မန်းရဲ့ အဓိက ကစားသမားဖြစ်ခဲ့ပြီး အင်္ဂလန်မှာ အမျိုးသမီး ကစားနည်း ကို ပိုမိုကြီးထွားလာစေဖို့ အထောက်အကူဖြစ်မယ့် မျှော်လင့်ချက်များစွာ ရှိနေခဲ့ပါတယ်။

ဝှိုက်ဟာ ကလေးဘဝ ကတည်းက အားကစားကို ချစ်မြတ်နိုးလာခဲ့တာဖြစ်ပြီး ဒါက ကြီးမားတဲ့ ပြောင်းလဲမှု တစ်ခုကို ဖြစ်စေ ခဲ့ပါတယ်။ တွစ်တာအသုံးပြုသူ စကော့အော့ဒ်ဝေးက အသက် ၉ နှစ်အရွယ်ရှိ ဝှိုက်ကို ပြည်တွင်းလိဂ်မှာ ကစားနေတာကနေ တားမြစ်ခံခဲ့ရတဲ့ ၁၉၉၈ စက်တင်ဘာလက ထုတ်ဝေခဲ့တဲ့ သတင်းစာ တစ်စောင်ကို ပြန်လည် ဖော်ပြခဲ့ပါတယ်။

 အယ်လန်ဝှိုက် ငယ်ဘ၀ကိုတွေ့ရစဉ် (Nokia News)

သူတို့ပေးခဲ့တဲ့ အကြောင်းပြချက်က မိန်းကလေးတွေကို ယောင်္ကျားလေးတွေနဲ့ တွဲကစားခွင့် မပေးဘူးဆိုတာပါ။ ယောင်္ကျား လေးတွေရဲ့ လိဂ်ပြိုင်ပွဲမှာ မိန်းကလေးတွေကို ကစားခွင့် ပိတ်ပင်ထားတယ်ဆိုတဲ့ ခေါင်းစဉ်နဲ့ ဝှိုက်ဟာ ကစားခွင့် ပိတ်ပင်ခံခဲ့ ရတာ ဖြစ်ပါတယ်။ ဝှိုက်ဟာ ယူ-၁၁ အဆင့်မှာ အာဆင်နယ်အသင်းရဲ့ ခေါင်းဆောင်အဖြစ် တာဝန်ယူထားပေမယ့် ပိတ်ပင်ခံ ခဲ့ရတာပါ။

The Chiltern Youth League ကတော့ အဝတ်လဲခန်းကို ရောနှောပြီး အသုံးပြုနေရတာကြောင့် စိုးရိမ်မှု ရှိတဲ့အတွက် သူမကို ကစားခွင့် ပိတ်ပင်ခဲ့ခြင်း ဖြစ်ပါတယ်။ ဒါကို တုံ့ပြန်တဲ့အနေနဲ့ ဝှိုက်ဟာ Herald ရဲ့ အရှေ့စာမျက်နှာမှာ အာဆင်နယ်အသင်း ဂျာစီဝတ်ပြီး ဘောလုံးနဲ့ အိပ်နေတဲ့ပုံ ပါဝင်လာခဲ့တာပါ။

လိဂ်ဥက္ကဋ္ဌဖြစ်သူ ခရစ်ဒါဗစ်ဆန်က အဲဒီအချိန်က The Herald ကို “ကျနော်တို့လိဂ်က ဆုံးဖြတ်ချက် ချပြီးသွားပါပြီ။ ကျနော် တို့ အဲဒီအတိုင်း ရပ်တည်ပါတယ်”လို့ ပြောကြားခဲ့ပါတယ်။

ဒီဆုံးဖြတ်ချက်နဲ့ ပတ်သက်ပြီး Bedfordshire FA ကို အယူခံဝင်နိုင်ကြောင်း သူက ဝန်ခံခဲ့ပါတယ်။ အဆိုပါ ဆောင်းပါးရဲ့ ဖော်ပြမှုအရ ဝှိုက်ဟာ ပြီးခဲ့တဲ့ ရာသီက ဂိုးပေါင်း ၁၀၀ ကျော် သွင်းယူခဲ့တယ်လို့ သိရပါတယ်။ ဒါပေမယ့် The Chiltern Youth League က သူမရဲ့ မှတ်ပုံတင်မှုကို ငြင်းဆိုခဲ့ပြီး ဒီလိုလုပ်မှုကြောင့် လိင်ပိုင်းဆိုင်ရာ ခွဲခြားဆက်ဆံတယ်လို့ စွပ်စွဲခံခဲ့ရပါတယ်။

ဝှိုက်ရဲ့ ဖခင်က သူ့သမီးကစားနေတဲ့ အသင်းရဲ့ ဥက္ကဋ္ဌအဖြစ် ဆန္ဒပြတာကို ဦးဆောင်ခဲ့ပါတယ်။ ဝှိုက်ဟာ ဒီဆုံးဖြတ်ချက်တွေ အတွက် အလွန်စိတ်မကောင်း ဖြစ်ခဲ့တယ်လို့ ဖခင်ဖြစ်သူက The Herald ကို ပြောခဲ့တာပါ။ အခုအချိန်မှာတော့ ဝှိုက်ဟာ အင်္ဂလန် အမျိုးသမီးအသင်းရဲ့ ကြီးမားတဲ့ ကြယ်ပွင့် ဖြစ်လာခဲ့ပါပြီ။

 အယ်လန်ဝှိုက် ကစားသမားဘ၀ သတင်းဖော်ပြခံရမှု (The Mirror)

အသက် ၃၃ နှစ်အရွယ်ရှိ ဝှိုက်ဟာ ၁၉၆၆ က အမျိုးသားအသင်း ကမ္ဘာ့ဖလား ချန်ပီယံဆုကို ရယူနိုင်ခဲ့ပြီးနောက် နိုင်ငံအတွက် ပထမဆုံး အဓိက ဆုဖလားအဖြစ် အမျိုးသမီးယူရို ချန်ပီယံဆုကို ရရှိအောင် ကူညီပေးနိုင်ခဲ့ပါတယ်။

သူမဟာ ယူရိုပြိုင်ပွဲမှာ ၂ ဂိုး သွင်းယူခဲ့ပြီး ဒီဂိုးတွေကို အုပ်စုအဆင့်မှာ တွေ့ခဲ့တဲ့ နော်ဝေနဲ့ ပွဲစဉ်မှာ သွင်းယူနိုင်ခဲ့တာပါ။ နည်းပြ ဝီဂ်မန်းဟာ စံချိန်တင် ပရိသတ်ဦးရေ ၈၇,၁၉၂ အရှေ့မှာ ကစားခဲ့ရတဲ့ ဗိုလ်လုပွဲမှာ ဝှိုက်ကို ပွဲထွက် တိုက်စစ်မှူးအဖြစ် အသုံးပြုခဲ့တာ ဖြစ်ပါတယ်။

အယ်လန်ဝှိုက်ဟာ ဒီပြိုင်ပွဲမှာ၂ ဂိုး သွင်းယူခဲ့တာကြောင့် အင်္ဂလန်အသင်းရဲ့ ဂိုးသွင်းအများဆုံး ကစားသမားဖြစ်တဲ့ ဝိန်းရွန်နီရဲ့ နောက် ၁ ဂိုးသာ လိုအပ်တော့တာပါ။ ဝှိုက် အနေနဲ့ စက်တင်ဘာလမှာ ကစားမယ့် သြစတြီးယား၊ လူဇင်ဘတ်တို့နဲ့ ကမ္ဘာ့ ဖလား ခြေစစ်ပွဲမှာ ဝိန်းရွန်နီရဲ့ သွင်းဂိုးကို ကျော်ဖြတ်နိုင်ဖို့ ကောင်းမွန်တဲ့ အခွင့်အရေးတွေ ပိုင်ဆိုင်နေပါတယ်။

ဒါပေမယ့် အခုအချိန်မှာတော့ ဝှိုက်ဟာ အင်္ဂလန် အမျိုးသမီးအသင်းရဲ့ အောင်မြင်မှုအတွက် ဆက်လက် အောင်ပွဲခံရမယ့် အချိန်လည်း ဖြစ်ပါတယ်။

Source: Mirror

CNI Sport News

၂၀၂၂ ခုနှစ်၊ သြဂုတ် ၆

ဘာစီလိုနာအသင်းဟာ သြဂုတ်လ ၁၃ ရက်မှာ ဗယ်လက်ကာနိုနဲ့ လာလီဂါအဖွင့်ပွဲစဉ် ယှဉ်ပြိုင်ရမှာ ဖြစ်ပေမယ့် အခု အပြောင်းအရွှေ့မှာ ခေါ်ယူထားတဲ့ ကစားသမားသစ်တွေ အားလုံးကို စာရင်း မသွင်းနိုင်သေးဘဲ ဖြစ်နေပါတယ်။

ဘာစီလိုနာအသင်းဟာ ၂၀၂၁ မှာ အကြွေးယူရို ၁.၃၅ ဘီလီယံရှိကြောင်း ကြေညာခဲ့ပေမယ့် အခုနွေရာသီ အပြောင်းအရွှေ့မှာ ငွေကြေး အများအပြား အသုံးပြုထားပါတယ်။

စပိန်ကလပ်ဟာ ကလပ်အသင်းရဲ့ ရုပ်သံမူပိုင်ခွင့် ရာခိုင်နှုန်းနဲ့ ဘာကာစတူဒီယိုရဲ့ ရှယ်ယာ ၂၅ ရာခိုင်နှုန်းကို ရောင်းချပြီး အပြောင်းအရွှေ့အတွက် ငွေကြေးထောက်ပံ့ခဲ့ပါတယ်။ ဒါပေမယ့် လာလီဂါရဲ့ ဘဏ္ဍာရေးမျှခြေ စံနှုန်းတွေကို လိုက်နာနိုင်မှ သာ ကစားသမား အသစ်တွေကို စာရင်းသွင်း မှတ်ပုံတင်နိုင်မှာ ဖြစ်ပါတယ်။

ဘာစီလိုနာအသင်းဟာ အခုအပြောင်းအရွှေ့မှာ လီဝန်ဒေါစကီးကို ဘိုင်ယန်မြူးနစ်ကနေ ယူရိုသန်း ၅၀၊ ရာဖင်ဟာကို လိဒ်စ်ယူနိုက်တက်ကနေ ယူရို ၅၉ သန်း၊ ဆီဗီလာနောက်ခံလူ ကွန်ဒီကို ယူရိုသန်း ၆၀ ပေးပြီး ခေါ်ယူထားပါတယ်။

ဘာစီလိုနာ အသင်းကစားသမားများကိုတွေ့ရစဉ်(Sporting News)

စပိန်ကလပ်(ဘာစီလိုနာအသင်း) အနေနဲ့ အလွတ်ပြောင်းရွှေ့ကြေးနဲ့ ခေါ်ယူထားတဲ့ ကတ်ဆီနဲ့ ခရစ်တန်ဆန်တို့ကိုလည်း စာရင်းသွင်းနိုင်ဖို့ စောင့်ဆိုင်းနေရပါတယ်။ ဘာစီလိုနာအသင်းဟာ ကစားသမားအသစ်တွေ ခေါ်ယူနိုင်ဖို့အတွက် လာလီဂါ ရုပ်သံမူပိုင်ခွင့် ၁၀ ရာခိုင်နှုန်းကို Sixth Street ထံ ရောင်းချခဲ့ပြီး နောက်ထပ် ယူရို ၃၁၅ သန်း ရရှိဖို့ ၁၅ ရာခိုင်နှုန်းကိုပါ ထပ်မံ ရောင်းချခဲ့ပါတယ်။

ဒါ့အပြင် socios.com ထံ ယူရိုသန်း ၁၀၀ နဲ့ ဘာကာစတူဒီယိုရဲ့ ရာခိုင်နှုန်း ၂၅ ရာခိုင်နှုန်းကို ရောင်းချခဲ့ပါသေးတယ်။ ဒါပေမယ့် ခေါ်ယူထားတဲ့ သူတွေအားလုံးကို မှတ်ပုံတင်နိုင်ဖို့ နောက်ထပ် ပြုလုပ်ရမယ့် အပိုင်းတွေ ရှိနေ ပါသေးတယ်။

အဲ့ဒါကြောင့် စပိန်ကလပ်အနေနဲ့ နောက်ထပ် ယူရိုသန်း ၁၀၀ ထပ်မံရရှိဖို့အတွက် ဘာကာစတူဒီယိုရဲ့ ၂၄.၅ ရာခိုင်နှုန်းကို ရောင်းချနိုင်တာပါ။

ဘာစီလိုနာဥက္ကဋ္ဌ လာပေါ်တာက “ ကျနော်တို့အလုပ်ကို ကောင်းမွန်စွာ လုပ်ဆောင်ခဲ့ပြီး လိုအပ်ချက်တွေအားလုံး ပြည့်မီ နိုင်မယ်လို့ ယုံကြည်ပါတယ်။ စာရွက်စာတမ်းအားလုံးကို တင်ပြထားပြီးဖြစ်လို့ လာလီဂါရဲ့ တုံ့ပြန်မှုကို စောင့်ဆိုင်းနေတာပါ။ ကွာဟချက် တချို့တော့ ရှိကောင်းရှိနိုင်ပေမယ့် ကျနော်တို့ဟာ အရာအားလုံးကို လိုက်နာပြီး ကစားသမား စာရင်း တင်သွင်းခဲ့ တဲ့အတွက် ပြဿနာ မရှိနိုင်ဘူးဆိုတာ နားလည်ကြောင်း” ပြောခဲ့ပါတယ်။

လာလီဂါပြိုင်ပွဲမှာ ကစားသမားစာရင်း တင်သွင်းဖို့ စောင့်ဆိုင်းနေရတာဟာ ဘာစီလိုနာ တစ်သင်းတည်း မဟုတ်ဘဲ ဘက်တစ်၊ အယ်လ်မာရီယာ၊ အယ်လ်ချီ၊ ဗီလာရီးရယ်လ်၊ ဗယ်လာဒိုးလစ်တို့လည်း ဒီပြဿနာနဲ့ ရင်ဆိုင်နေရပါတယ်။

Source: Goal

CNI Sport News

၂၀၂၂ ခုနှစ်၊ဩဂုတ် ၆

ဆီရီယာလီယွန်တိုက်စစ်မှူး ဘူယာတူရေးဟာ ဆွီဒင်ထိပ်သီးကလပ် မယ်လ်မိုနဲ့ ပူးပေါင်းဖို့အတွက် သူ့ရဲ့ မင်္ဂလာ ပွဲကို အစ်ကိုဖြစ်သူနဲ့ လွှဲခဲ့တယ်လို့ သိရပါတယ်။

မင်္ဂလာပွဲအခမ်းအနားမှာ အစ်ကိုဖြစ်သူက သူ့ရဲ့နေရာအစားဝင်ရောက်ပြီး သတို့သမီးဖြစ်သူနဲ့အတူ ရပ်ခဲ့ရတယ်လို့ ဘူယာတူရေးက ဆွီဒင်သတင်းစာ Aftonbladet ကို ပြောခဲ့တာပါ။ “ကျနော်တို့ ဇူလိုင် ၂၁ ရက် ဆီရီယာလီယွန်မှာ လက်ထပ်ခဲ့ပါတယ်။ဒါပေမယ့် မယ်လ်မိုက ကျနော့်ကို စောစီးစွာလာရောက်ပူးပေါင်းဖို့ ပြောခဲ့လို့ အဲ့ဒီနေရာမှာ မရှိခဲ့ပါဘူး။ကျနော်တို့ ဓါတ်ပုံကို ကြိုပြီးရိုက်ထားတယ်။အဲဒါကြောင့် အဲ့ဒီမှာ ကျနော်ရှိနေသလို ဖြစ်ပေမယ့် မရှိခဲ့ပါဘူး။မင်္ဂလာဆောင်မှာ အစ်ကိုက ကျနော့်နေရာကိုယ်စားပြုပေးရမှာ”လို့ ပြောခဲ့ပါတယ်။

မင်္ဂလာပွဲကို ဇူလိုင် ၂၁ ရက်မှာပြုလုပ်ဖို့ သတ်မှတ်ထားပေမယ့် ဆွီဒင်ကလပ်က ဘူယာတူရေးကို အမြန်ဆုံး ပူးပေါင်းစေချင်နေတာကြောင့် မင်္ဂလာပွဲအခမ်းအနားကို လွှဲခဲ့ရတာပါ။ဇူလိုင် ၂၂ ရက်မှာတော့ မယ်လ်မိုက သူ့ကို ခေါ်ယူနိုင်တဲ့အပြောင်းအရွှေ့ကို ကြေညာခဲ့တာဖြစ်ပါတယ်။အဲဒါကြောင့် အစ်ကိုဖြစ်သူက မင်္ဂလာအခမ်းအနားမှာ ဘူယာတူရေးရဲ့ နေရာကို အစားဝင်ခဲ့ရတာပါ။တူရေးဟာ တရုတ်လိဂ်မှာ ၂ ရာသီကြာ ကစားပြီးနောက် မယ်လ်မို အသင်းကို ပြောင်းရွှေ့လာခဲ့တာဖြစ်ပါတယ်။

တူရေးဟာ လူဇင်ဘတ်ကလပ်ကို အနိုင်ရခဲ့တဲ့ ယူရိုပါလိဂ် တတိယအဆင့် ခြေစစ်ပွဲရဲ့ ပွဲစဉ်ပြီးဆုံးဖို့ ၉ မိနစ်အလို မှာ မယ်လ်မိုအသင်းအတွက် ပွဲဦးထွက်အဖြစ် ပါဝင်ကစားခွင့်ရခဲ့တာပါ။ ဆီရီယာလီယွန်ကစားသမားဟာ ဆွီဒင် လိဂ်အတွေ့အကြုံရှိပြီး မယ်လ်မိုအသင်းမတိုင်ခင် ဒီနိုင်ငံက ကလပ်အသင်းတွေဖြစ်တဲ့ ဒါကာ့၊ အက်စ်ကေးလ် စတူနာ၊ ဂျူဂါဒန်အသင်းတွေမှာ ကစားခဲ့တာဖြစ်ပါတယ်။သူဟာ ဂျူဂါဒန်အသင်းမှာ အငှားကစားခဲ့တဲ့ ၂၀၁၉ မှာ အမှတ်ပေးချန်ပီယံဆုကို ရယူနိုင်ခဲ့တာပါ။

ဘူယာတူရေးဟာ အဆိုပါရာသီ လိဂ်ပွဲ ၂၉ ပွဲမှာ ၁၅ ဂိုးသွင်းယူခဲ့ပြီး ထိပ်တန်းဂိုးသွင်းရှင်အဖြစ် ရပ်တည်ခဲ့ ပါတယ်။တူရေးဟာ လက်ထပ်ပြီးကတည်းက ဇနီးဖြစ်သူနဲ့ ပြန်လည်ဆုံတွေ့ရခြင်း မရှိသေးပေမယ့် ဟန်းနီးမွန်း အတူထွက်မယ်လို့ ကတိပေးထားခဲ့တာပါ။ “ပထမဆုံးက ကျနော်တို့လိဂ်ပြိုင်ပွဲကို အနိုင်ယူရပါမယ်။ပြီးရင် ဟန်းနီး မွန်းထွက်မယ်”လို့ တူရေးက ပြောခဲ့တာဖြစ်ပါတယ်။

Source:ChannelNewsAsia

CNI Sport News

၂၀၂၂ ခုနှစ်၊ ဩဂုတ် ၆

ယူကရိန်းကလပ် ဒိုင်နမိုကိဗ်အသင်းကို အရေးနိမ့်ခဲ့တဲ့ ချန်ပီယံလိဂ်ပွဲစဉ်မှာ ရုရှားသမ္မတ ဗလာဒီမာပူတင်ရဲ့ နာမည်ကြွေးကြော်ခဲ့တဲ့ ပရိသတ်တွေကြောင့် ဖီနာဘာချီအသင်းကို ယူအီးအက်ဖ်အေက ပြစ်ဒဏ်ချမှတ်လိုက်ပါ တယ်။

တူရကီကလပ်ဟာ ယူရို ၅၀,၀၀၀(ငါးသောင်း) ဒဏ်ရိုက်ခံခဲ့ရပြီး နောက်လာမယ့် ဥရောပပွဲစဉ်မှာ အနည်းဆုံး ပရိသတ် ၅၀၀၀(ထိုင်ခုံ ၅၀၀၀) သာ ခွင့်ပြုမယ့် တစ်ပိုင်းတစ်စကွင်းပိတ် ပြစ်ဒဏ်ချမှတ်ခံခဲ့ရတာပါ။ဒါပေမယ့် ဒီပြစ်ဒဏ်ကို ၂ နှစ်ကြာ ဆိုင်းငံ့ထားပါတယ်။ ယူအီးအက်ဖ်အေက “အရာဝတ္ထုတွေနဲ့ ပစ်ပေါက်ခြင်း၊ရန်စဖွယ် လှုံဆော်တဲ့ စကားတွေကြောင့်” အရေးယူခဲ့တာဖြစ်တယ်လို့ ပြောခဲ့တာပါ။ဒိုင်နမိုကိဗ်အသင်းဟာ ဒီပွဲမှာ ဖီနာ ဘာချီအသင်းကို နှစ်ကျော့ပေါင်းရလဒ် ၂ ဂိုး- ၁ ဂိုးနဲ့ အချိန်ပိုမှာ အနိုင်ရပြီး နောက်တစ်ဆင့်တက်နိုင်ခဲ့တာ ဖြစ်ပါတယ်။

ဒီပွဲစဉ်မှာ ဒိုင်နမိုကိဗ်ဘက်ကို ဂိုးပေးလိုက်ရပြီးနောက် ထောင်နဲ့ချီတဲ့ ဖီနာဘာချီအသင်း ပရိသတ်တွေဟာ ရုရှားသမ္မတရဲ့ နာမည်ကို ကြွေးကြော်ခဲ့ကြတာပါ။ဒိုင်နမိုကိဗ်ကွင်းလယ်ကစားသမား ဘူရယ်လ်စကီးက ဂိုးသွင်းယူပြီးချိန်မှာ လင်းယုန်လက်ဟန်ပုံစံနဲ့ အောင်ပွဲခံခဲ့တာဖြစ်ပြီး ဒါကို တူရကီကလပ်ပရိသတ်တွေက ပြိုင်ဘက် ဘက်ဆီးတပ်စ်ကို ရည်ညွှန်းတယ်လို့ ယူဆကြကာ ကြွေးကြော်သံတွေ ထွက်ပေါ်လာခဲ့တာ ဖြစ်ပါတယ်။ဖီနာဘာချီအသင်းကတော့ ပရိသတ်တွေရဲ့လုပ်ရပ်ဟာ ကလပ် ဒါမှမဟုတ် သူတို့အသင်းအဖွဲ့ရဲ့ ရပ်တည်ချက်ကို လုံးဝကိုယ်စားမပြုဘူးလို့ ပြောခဲ့ပါတယ်။

“အားကစားနဲ့ နိုင်ငံရေးကို အမြဲတမ်းသီးခြားခွဲထားသင့်တယ်ဆိုတဲ့ ကျနော်တို့ရဲ့ ရပ်တည်ချက်ကို ပြည်သူတွေကို ထပ်ပြီး သတိပေးပါတယ်”လို့ ဖီနာဘာချီအသင်းက ထုတ်ပြန်ခဲ့တာဖြစ်ပါတယ်။ ဒိုင်နမိုကိဗ်အသင်းနည်းပြ လူဆက်စ်ကူက အားကစားအနေနဲ့ ပရိသတ်တွေရဲ့အပြုအမူကို လက်မခံနိုင်ဘူးလို့ အဆိုပါပွဲအပြီးမှာ သတင်း ထောက်တွေကို ပြောခဲ့တာပါ။ “ဒီလိုကြွေးကြော်မယ်လို့ ကျနော်မမျှော်လင့်ထားပါဘူး။ သနားစရာကောင်းပါ တယ်” လို့ ပြောခဲ့ပြီး ပရိသတ်တွေရဲ့လုပ်ရပ်ကို ကန့်ကွက်တဲ့အနေနဲ့ ပွဲအပြီးသတင်းစာရှင်းလင်းပွဲကို တက်ရောက် ဖို့ ငြင်းဆန်ခဲ့ပါတယ်။

ယူကရိန်းသံအမတ်ကြီး ဘောဒ့်နာကတော့ ဒီအဖြစ်အပျက်ကြောင့် သူစိတ်မကောင်းဖြစ်ရတယ်လို့ ပြောခဲ့ကြောင်း သတင်းမှာ ဖော်ပြထားပါတယ်။

Source:BBC

CNI Sport News

၂၀၂၂ ခုနှစ်၊ ဩဂုတ် ၆

ပဲလေစ့်အသင်းကို အနိုင်ရတဲ့ ပရီးမီးယားလိဂ်ပွဲအပြီးမှာ အာဆင်နယ်အသင်းကို ကြည့်ရတာ ဆာလောင်နေပုံ ရတယ်လို့ နည်းပြ အာတီတာက ပြောလိုက်ပါတယ်။

အာတီတာက “ကောင်လေးတွေဟာ ရာသီကြိုစတင်ကတည်းက ပထမရက်သတ္တပတ်အနည်းငယ်အတွင်းမှာ ဒီခံစားချက်ကို ခံစားခဲ့ရပါတယ်။သူတို့ဟာ တကယ်ကိုအနိုင်ရချင်တဲ့စိတ်နဲ့အတူ အဆင်သင့်ဖြစ်နေသလို၊ ဆာလောင်မွတ်သိတ်နေကြပါပြီ။ကျနော်တို့ ကစားချင်တဲ့ပုံစံအတိုင်း ဒီကိုရောက်ရှိလာခဲ့တာပါ။ကျနော်တို့ဟာ ပွဲကိုကြီးစိုးနိုင်ခဲ့တယ်၊ခြိမ်းခြောက်မှုတွေပြုလုပ်နိုင်ခဲ့တယ်။ကျနော်တို့ဟာ အစပိုင်းကတည်းက တက်ကြွပြီး ထက်မြက်ခဲ့ကြပါတယ်။ဖိအားတွေအောက်မှာ ကစားရတဲ့အခါမှာလည်း ဒါကို ခံနိုင်ရည်ရှိအောင် ရင်ဆိုင်ခဲ့ကြ တယ်”လို့ Match of the Day ကို ပြောခဲ့တာပါ။

အာဆင်နယ်အသင်းဟာ ဒီပွဲမှာ ပဲလေစ့်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ဂိုးတွေကို မာတင်နယ်လီနဲ့ ပဲလေစ့်နောက်ခံလူ ဂီဟီက ကိုယ့်ဂိုးကိုယ်သွင်းယူခဲ့တာဖြစ်ပါတယ်။ဒီပွဲမှာ အာဆင်နယ်အတွက် ပထမဂိုးသွင်း ယူပေးခဲ့တဲ့ မာတင်နယ်လီရဲ့ ဂိုးဟာ ရာသီသစ် ပရီးမီးယားလိဂ်ပြိုင်ပွဲရဲ့ ပထမဆုံးဂိုးအဖြစ်လည်း မှတ်တမ်း ဝင်ခဲ့တာပါ။လန်ဒန်ကလပ်ဟာ ပရီးမီးယားလိဂ်အဖွင့်ပွဲမှာ အနိုင် ၃ မှတ်နဲ့အတူ ပေးဂိုးမပေးခဲ့ရတာကြောင့် ပြီးပြည့်စုံတဲ့ နိုင်ပွဲရယူနိုင်ခဲ့တာဖြစ်ပါတယ်။

အာတီတာက “အရေးကြီးဆုံးက ပထမပွဲစဉ်အနိုင်ရဖို့ဖြစ်ပြီး ဒါမှလည်း ယုံကြည်မှုနဲ့ အရှိန်အဟုန်ကို တည်ဆောက်မှာပါ။ပြီးမှ ကျနော်တို့တိုးတက်ဖို့ လိုအပ်နေတဲ့အရာတွေအကြောင်းကို ပြောနိုင်ပါတယ်။ ရိုးရိုး သားသား ပြောရမယ်ဆိုရင် ဒီနေ့မှာ တော်တော်လေးနည်းပါးပါတယ်”လို့ ပြောခဲ့တာပါ။ဒီပွဲမှာ ကစားသမားသစ် တွေဖြစ်တဲ့ ဂျီးဆပ်စ်နဲ့ ဇင်ချန်ကိုတို့ ပါဝင်ကစားခဲ့သလို မာဆေးလ်ကနေ ပြန်ရောက်လာတဲ့ နောက်ခံလူ ဆလီ ဘာလည်း ပါဝင်ကစားသွားခဲ့တာဖြစ်ပါတယ်။

ဆလီဘာကတော့ ဒီပွဲရဲ့ အကောင်းဆုံးကစားသမားအဖြစ် သတ်မှတ်ခံရသလို ချီးကျူးမှုတွေလည်း အများကြီး ရယူနိုင်ခဲ့တာပါ။ပဲလေစ့်အသင်းနည်းပြ ဗီအဲရာက “ဖန်တီးလို့ရတဲ့ အခွင့်အရေးအနည်းငယ်ကနေ ဂိုးတွေ သွင်းယူ နိုင်ရပါမယ်။ကောင်းမွန်စွာကစားနိုင်တဲ့ အချိန်တွေရှိခဲ့ပေမယ့် အခွင့်အရေးတွေတော့ အရယူရပါမယ်။အထူးသဖြင့် အာဆင်နယ်လို အသင်းမျိုးနဲ့ ရင်ဆိုင်ရတဲ့ အခါမှာပေါ့”လို့ ပြောခဲ့ပါတယ်။

အာဆင်နယ်အသင်းဟာ ပွဲစဉ် ၂ မှာ လက်စတာအသင်းနဲ့ ယှဉ်ပြိုင်ရမှာဖြစ်ပြီး ပဲလေစ့်အသင်းကတော့ လီဗာပူးလ် အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC