CNI News

၂၀၂၂ ခုနှစ် မေလ ၃၀

အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလသည် ရှေ့တန်းစခန်းတစ်နေရာရှိ ဒေသကာကွယ်ရေးတပ် (PDF) များကို မေလ (၂၄) ရက်တွင် သွားရောက် ကြည့်ရှုအားပေးစကား ပြောကြားခဲ့ကြောင်း ထုတ်ပြန်ခဲ့သည်။

PDF သည် အနာဂတ်ဖက်ဒရယ် တပ်မတော်တည်ဆောက်ရာတွင်လည်း အဓိကအရေးကြီးသော အခန်းကဏ္ဍတွင် ပါဝင်မည်ဖြစ်၍ ယခုကတည်းကပင် ဖက်ဒရယ်စနစ်နှင့် ဒီမိုကရေစီသဘောတရားတို့ကို လက်ကိုင်ပြု ကျင့်ကြံဖို့ လိုအပ်ကြောင်း ဒူဝါလရှီးလက ပြောကြားခဲသည်။

တနိုင်ငံလုံးတွင် PDF ၏ တပ်ရင်းတပ်ဖွဲ့ပေါင်းများစွာ စနစ်တကျ စုဖွဲ့လာနိုင်ပြီဖြစ်၍ လူထုက များစွာအားတက်လျက်ရှိကြောင်း၊ PDF သည် နွေဦး‌တော်လှန်ရေး၏ အသက်ပမာ အရေးကြီး၍ လူထုမျှော်လင့်ချက်ပန်းတိုင်ရောက်သည်အထိ ဉာဏ်ပညာ ဇွဲ သတ္တိ လုံ့လ ဝိရိယအပြည့်ဖြင့် ဦးဆောင်ပါဝင်သွားကြရန် လိုအပ်ကြောင်းစသဖြင့် ဆွေးနွေးမှာကြားခဲ့ကြောင်း ထုတ်ပြန်ချက်တွင် ဖော်ပြထားသည်။

CNI News

၂၀၂၂ ခုနှစ်၊ မေလ ၃၀

“ဝ”ပြည်သွေးစည်းညီညွတ်ရေးတပ်မတော်(UWSA)ဒုဥက္ကဋ္ဌ ဦးလော့ယာကု ဦးဆောင်သည့် ကိုယ်စားလှယ် အဖွဲ့နှင့် တွေ့ဆုံ၍ ပြည်ထောင်စု တည်ဆောက်ရေး နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ရှင်းပြ ဆွေးနွေးခဲ့ကြောင်း သိရသည်။

UWSA ဒုဥက္ကဋ္ဌ ဦးလော့ယာကု ဦးဆောင်သည့် ကိုယ်စားလှယ်အဖွဲ့နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင် လှိုင် တို့ ယနေ့ (မေလ ၃၀ ရက်) နံနက်ပိုင်းက နေပြည်တော်မှာ တွေ့ဆုံ၍ ငြိမ်းချမ်းရေး ဖြစ်စဉ်များကို ဆွေးနွေး ခဲ့ကြသည်။

ဗိုလ်ချုပ်မှူးကြီးမင်းအောင်လှိုင်က ငြိမ်းချမ်းမှု ရှိမှသာလျင် ဒေသတည်ဆောက်ရေး တိုင်းပြည်တည်ဆောက် ရေးကို ပိုမိုသွက်လက်စွာ ဆောင်ရွက်နိုင်မည် ဖြစ်သည့်အတွက် တိုင်းပြည်၏ လိုအပ်ချက်၊ ဒေသခံ တိုင်းရင်း သားတို့၏ လိုအပ်ချက်များနှင့် မိမိဒေသ ဖွံ့ဖြိုးတိုးတက်ရေးမှစ၍ တိုင်းပြည်ဖွံ့ဖြိုးတိုးတက်ရေးကို ဦးတည်စဉ်းစား လုပ်ဆောင်သွားရန် လိုအပ်သည့် အခြေအနေများ၊ ဒေသတည်ငြိမ်အေးချမ်းရေး၊ ပညာရေး၊ ကျန်းမာရေးတို့ကို ပူးပေါင်းဆောင်ရွက်ပြီး ဒေသခံများ၏ လိုအပ်ချက်များကို ဖြည့်ဆည်းဆောင်ရွက်နိုင်မှသာလျင် ဒေသဖွံ့ဖြိုးတိုး တက်ရေးကို ပိုမို အထောက်အကူ ဖြစ်စေနိုင်မည့် အခြေအနေများ စသည်တို့ကို ဆွေးနွေးခဲ့သည်ဟု ထုတ်ပြန် ခဲ့သည်။

၎င်းက “ ပြည်သူလူထုဆန္ဒနှင့် ကိုက်ညီသည့် ပါတီစုံ ဒီမိုကရေစီစနစ် ကျင့်သုံးဆောင်ရွက်ရေးဆိုင်ရာ ကိစ္စရပ် များ၊ ဒီမိုကရေစီနှင့်ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးဆိုင်ရာကိစ္စရပ်များကို ရှင်းလင်း ဆွေးနွေးခဲ့သည်”ဟု နစက-က သတင်းထုတ်ပြန်ခဲ့သည်။

၂၀၂၂ ခုနှစ်၊ မေလ ၃၀ ရက် UWSA ဒုဥက္ကဋ္ဌ ဦးလော့ယာကုနဲ့ ဗိုလ်ချုပ်မှူးကြီး မင်းအောင်လှိုင် တွေ့ဆုံစဉ်

ထို့နောက် UWSA ဒုဥက္ကဋ္ဌ ဦးလော့ယာကုက ပါတီစုံဒီမိုကရေစီစနစ်ကျင့်သုံးရေး၊ ဒီမိုကရေစီနှင့် ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးနှင့်ပတ်သက်၍ “ဝ”ပြည်သွေးစည်းညီညွတ်ရေးပါတီ(UWSP ) မှ သဘောတူညီကြောင်းနှင့် ဒေသဖွံ့ဖြိုးတိုးတက်ရေး ဆိုင်ရာများကို ပြန်လည် ဆွေးနွေးခဲ့သည်ဟု သိရသည်။

မေလ ၃၁ ရက်နေ့တွင် နစကမှ ဖွဲ့စည်းပေးထားသည့် ကောင်စီဝင်များ ပါဝင်သော ငြိမ်းချမ်းရေးဆွေးနွေးရေး အဖွဲ့၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)မှ ဥက္ကဋ္ဌ ဒုဗိုလ်ချုပ်ကြီး ရာပြည့် ဦးဆောင်သော ကိုယ်စားလှယ်တို့နှင့် UWSA ဒုဥက္ကဋ္ဌ ဦးလော့ယာကုတို့ ဆက်လက် ဆွေးနွေးကြမည် ဖြစ်သည်။

လက်ရှိတွင် နစကသည် ရှမ်းပြည်ပြန်လည်ထူထောင်ရေးကောင်စီ(RCSS) မှ ဗိုလ်ချုပ်ကြီးယွက်စစ်နှင့် လည်း ကောင်း၊ မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့်လည်းကောင်း၊ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC)ဥက္ကဋ္ဌ ဦးစောထော့လေး နှင့်လည်းကောင်း တွေ့ဆုံ ဆွေးနွေးထားပြီး ဖြစ်သည်။

CNI News

၂၀၂၂ ခုနှစ်၊ မေလ ၃၀

တပ်မတော်ကို နိုင်ငံရေးမှ အချိန်အတိုင်းအတာ တစ်ခုတွင် ထွက်ခွာရန် တင်ပြခဲ့ကြောင်း UPDJC ၏ နိုင်ငံရေးပါတီများ အလုပ် အစုအဖွဲ့မှ အတွင်းရေးမှူး ဒေါ်ချိုချိုကျော်ငြိမ်းက CNI သတင်းဌာနသို့ ပြောသည်

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) နှင့် ပြည်ထောင်စုငြိမ်းချမ်းရေး ဆွေးနွေးမှုပူးတွဲကော်မတီ(UPDJC)မှ နိုင်ငံရေးပါတီများ အလုပ်အစုအဖွဲ့တို့ နေပြည်တော်တွင် မေလ ၂၉ ရက်က တွေ့ဆုံ ဆွေးနွေးခဲ့ ကြသည်။

ဒေါ်ချိုချိုကျော်ငြိမ်းက “အန်တီပြောတဲ့ဟာကတော့ အချက်ကတော့ အန်တီက နံပါတ် ၂ အချက် ပြောတာပေါ့နော်၊ အန်တီ ပြောခဲ့တာကတော့ တပ်မတော်ကြီးက အခုက ၂၅ ရာခိုင်နှုန်း ပါနေတယ်နော်၊ ၂၅ ရာခိုင်နှုန်း အခုချက်ချင်း မထွက်ခိုင်းဘူး၊ ချက်ချင်းလည်း သူတို့ (တပ်မတော်) မနက်ဖြန်၊ သန်ဘက်ခါ Times Limit မပေးဘူး။ ဒါပေမဲ့ တချိန်ချိန်မှာ တပ်မတော်က လည်း ထွက်မယ်လို့ အန်တီတို့က နားလည်တယ်၊ ဒါပေမဲ့ အဲဒီလို ထွက်မယ်လို့တော့ ပြောတယ်ပေါ့၊ ဒါပေမဲ့ အခြေခံ ဥပဒေမှာက နိုင်ငံတော်ရဲ့ ဦးဆောင်မှုကို အမြဲတစေ ဆိုလားမသိဘူး၊ ဥပဒေရေးထားတယ်နော်၊ အဲဒီစာပိုဒ်လေးကို အန်တီက အချိန် အတိုင်းအတာ တစ်ခုအထိ ဆိုပြီးတော့ ပြောင်းခိုင်းတယ်၊ အဲဒါကိုတော့ သဘာတူဖို့ များပါတယ်၊ ချက်ချင်းတော့ သဘောတူ တယ်ဆိုတာ မရှိပါဘူး နောက်လမှ သူတို့ အဖြေပေးမှာပေါ့၊ အန်တီက တပ်မတော်က ၂၅ ရာခိုင်နှုန်းကို အချိန်တစ်ခု အထိမှာ ထွက်ပေးပါ၊ ဘာဖြစ်လို့လဲဆိုတော့ အန်တီတို့ တချိန်မှာ အနာဂတ်မှာ ဖက်ဒရယ်ဒီမိုကရက်တစ် နိုင်ငံတော် တည်ထောင်ပြီးတော့ လွှတ်တော်ပါလာမယ်လေ၊ အဲဒီမှာ ၂၅ ရာခိုင်နှုန်းတို့ ဘာရာခိုင်နှုန်းပဲ ဖြစ်ဖြစ်ပါလာရင် အန်တီတို့က ဒီမိုကရက်တစ် နိုင်ငံတော်လွတ်လွတ်ကျွတ်ကျွတ် ဖြစ်ဖို့၊ မဖြစ်ဘူးဆိုတာ အဲဒါတော့ အန်တီက တင်ပြခဲ့တယ်၊ အားလုံးတော့ သဘောတူ တယ်လို့ မဟုတ်သေးဘူး နောက်လမှ သူတို့ အဖြေပေးလိမ့်မယ်” ဟု CNI သတင်းဌာနသို့ ပြောသည်။

၂၀၂၂ ခုနှစ်၊ မေလ ၂၉ ရက်က UPDJC နိုင်ငံရေးပါတီ အလုပ်အစုအဖွဲ့နှင့် NSPNC တို့ တွေ့ဆုံစဉ်

မေလ ၂၉ ရက်နေ့တွင် UPDJC နိုင်ငံရေးပါတီများ အလုပ် အစုအဖွဲ့က ၂၀၀၈ ဖွဲ့စည်းပုံအခြေခံဥပဒေမှ ပြင်ဆင်လိုသည့် အချက် ၉ ချက်ကို အဆိုပြု ဆွေးနွေးပြီး NSPNC မှ တက်ရောက်သူများနှင့် အလွတ်သဘော ဆွေးနွေးခဲ့ကြကြောင်း ထုတ် ပြန်ခဲ့သည်။

အလားတူ ပြည်ထောင်စု သဘောတူစာချုပ် အစိတ်အပိုင်း (၁/၂/၃)ပါ သဘောတူညီချက်များနှင့် ပတ်သက်၍လည်းကောင်း၊ အစိတ်အပိုင်း (၃)မှ ဆက်လက်ဆွေးနွေးရန် ကျန်ရှိသည့် ဇယား-၂ပါ ဆွေးနွေးရန်အချက်များနှင့် ပတ်သက်၍ လည်းကောင်း၊ NSPNC မှ လေ့လာဆန်းစစ် ဖော်ထုတ်စိစစ်ရေးအဖွဲ့၏ တွေ့ရှိချက်များကို တင်ပြဆွေးနွေးခဲ့ကြကြောင်း သိရသည်။

၂၀၀၈ ဖွဲ့စည်းပုံပြင်ဆင်ရေးနှင့် ပတ်သက်၍ အချက်အများစုကို သဘောတူထားကြောင်း၊ ဖက်ဒရယ်ပြည်ထောင်စု တည် ဆောက်ရေး စသည်တို့ကို တင်ပြခဲ့ကြောင်း ဒေါ်ချိုချိုကျော်ငြိမ်းက ပြောသည်။

ဒေါ်ချိုချိုကျော်ငြိမ်းက “လတိုင်း၊ လတိုင်း တွေ့ပါတယ်၊ အဲဒီ ၅ ခါမှာ အန်တီတို့က အခြေခံဥပဒေတွေကို ပြင်ဖို့ ကြိုးစားပြီး တော့ တော်တော်များများလည်း သဘောတူ ထားတာရှိတယ်၊ အခု ဒီတစ်ပတ်မှာတော့ အန်တီက ဒါကို တင်ပြသွားတယ်၊ တချို့ လူကြတော့လည်း သစ်တောလုပ်ပိုင်ခွင့်တို့၊ အန်တီတို့က ဖက်ဒရယ်သွားမှာကိုး နိုင်ငံတည်ဆောက်မယ်ဆိုတော့ အဲဒါ တွေ အများကြီးတင်တယ်” ဟု ပြောသည်။

၂၀၂၂ ခုနှစ်၊ မေလ ၂၉ ရက်က NSPNC ကိုယ်စားလှယ်များကို တွေ့ရစဉ်

UPDJC ကို အစိုးရ၊ လွှတ်တော်နှင့် တပ်မတော် ကိုယ်စားလှယ် ၁၆ ဦး၊ NCA ထိုးထားသည့် လက်နက်ကိုင် အဖွဲ့အစည်းများမှ ကိုယ်စားလှယ် ၁၆ ဦး၊ နိုင်ငံရေးပါတီများ အစုအဖွဲ့မှ ကိုယ်စားလှယ် ၁၆ ဦးတို့ဖြင့် ဖွဲ့စည်းရန် NCA စာချုပ်တွင် ပြဋ္ဌာန်းထား သည်။

ပြီးခဲ့သည့် ၂၀၂၂ ခုနှစ်၊ ဧပြီ ၂၇ ရက်က ပြန်လည်ရွေးချယ်ခဲ့သည့် UPDJC နိုင်ငံရေးပါတီများ အစုအဖွဲ့တွင် ဦးစိုင်းအိုက်ပေါင်း၊ ဒေါ်ချိုချို ကျော်ငြိမ်း၊ ဦးစောသန်းမြင့်၊ တ.စ.ည ပါတီ၊ ပအိုဝ်းအမျိုးသားအဖွဲ့(PNO)၊ ရခိုင်အမျိုးသားပါတီ(ANP)၊ ကရင် အမျိုးသား ဒီမိုကရက်တစ်ပါတီ၊ မွန်ညီညွတ်ရေးပါတီ(MUP)တို့ ရွေးချယ်ခံခဲ့ရကြောင်း သိရသည်။

CNI News

၂၀၂၂ ခုနှစ်၊ မေလ ၂၉

၂၀၀၈ ဖွဲ့စည်းပုံအခြေခံဥပဒေမှ ပြင်ဆင်လိုသည့် အချက် ၉ ချက်အား UPDJC နိုင်ငံရေးပါတီ အစုအဖွဲ့မှ အဆိုပြု၍ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)တို့ ယနေ့ (မေလ ၂၉ ရက်) တွေ့ဆုံ ဆွေးနွေးခဲ့ကြသည်။

ယနေ့ (မေလ ၂၉ ရက်) နံနက်ပိုင်းက နေပြည်တော်မှာ ဦးစိုင်းအိုက်ပေါင်း ဦးဆောင်သည့် ပြည်ထောင်စုငြိမ်းချမ်းရေး ဆွေးနွေးညှိနှိုင်းမှု ပူးတွဲကော်မတီ (UPDJC)၏ နိုင်ငံရေးပါတီ အစုအဖွဲ့၏ အလုပ်အဖွဲ့နှင့် NSPNC ဥက္ကဋ္ဌ ဒုဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ်အဖွဲ့တို့ တွေ့ဆုံ ဆွေးနွေးခဲ့ကြခြင်း ဖြစ်သည်။

UPDJC နိုင်ငံရေးပါတီ အစုအဖွဲ့ကို ၂၀၂၂ ခုနှစ်၊ မေလ ၂၉ ရက်က တွေ့ရစဉ်

အဆိုပါ တွေ့ဆုံ ဆွေးနွေးပွဲတွင် ဆွစ်ဇာလန်နိုင်ငံ၏ ဖက်ဒရယ်စနစ်အပေါ် လေ့လာတွေ့ရှိချက်များအား ညှိနှိုင်းရေး ကော်မတီ(နစက)မှ ရှင်းလင်း ဆွေးနွေးခဲ့ကြောင်း၊ နိုင်ငံရေးပါတီများ အစုအဖွဲ့၏ အလုပ်အဖွဲ့ကလည်း ၂၀၀၈ ဖွဲ့စည်းပုံ အခြေခံဥပဒေမှ ပြင်ဆင်လိုသည့် အချက် ၉ ချက်အား အဆိုပြု ဆွေးနွေးခဲ့ကြောင်း သိရသည်။

ထို့နောက် နစက၏ ညှိနှိုင်းရေးကော်မတီအဖွဲ့ဝင် ဒုဗိုလ်ချုပ်ကြီး ဝင်းဗိုလ်ရှိန်က ပြည်ထောင်စုသဘောတူစာချုပ် အစိတ် အပိုင်း(၁/၂/၃)ပါ သဘောတူညီချက်များနှင့်ပတ်သက်၍ လည်းကောင်း၊ အစိတ်အပိုင်း (၃)မှ ဆက်လက် ဆွေးနွေးရန် ကျန်ရှိသည့် ဇယား-၂ ပါ ဆွေးနွေးရန် အချက်များနှင့်ပတ်သက်၍ လည်းကောင်း၊ NSPNC မှ လေ့လာဆန်းစစ် ဖော်ထုတ် စိစစ်ရေးအဖွဲ့၏ တွေ့ရှိချက်များကိုလည်းကောင်း ရှင်းလင်းတင်ပြခဲ့ကြောင်း သိရသည်။

NSPNC ကိုယ်စားလှယ်အဖွဲ့ကို ၂၀၂၂ ခုနှစ်၊ မေလ ၂၉ ရက်က တွေ့ရစဉ်

ပြည်ထောင်စုသဘောတူစာချုပ် အစိတ်အပိုင်း (၁/၂/၃)ဆိုသည်မှာ ဦးသိန်းစိန် အစိုးရလက်ထက် ၂၀၁၆ ခုနှစ်ကနေ ဒေါ်အောင်ဆန်းစုကြည် အစိုးရလက်ထက် ၂၀၂၀ ခုနှစ်၊ သြဂုတ်လက ကျင်းပခဲ့သည် စတုတ္ထအကြိမ် အစည်းအဝေး အတွင်း ရရှိခဲ့သော သဘောတူညီချက်များ ဖြစ်သည်။

CNI News

၂၀၂၂ ခုနှစ်၊ မေလ ၂၉

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံ၍ ငြိမ်းချမ်းရေး ဆွေးနွေးရန် “ဝ”ပြည်သွေးစည်းညီညွတ်ရေးတပ် မတော် (UWSA)ဒုဥက္ကဋ္ဌ ဦးလော့ယာကု ဦးဆောင်သည့် ကိုယ်စားလှယ်အဖွဲ့ ယနေ့ (မေလ ၂၉ ရက်) နံနက်က နေပြည် တော်သို့ ရောက်ရှိလာကြောင်း သိရသည်။

UWSA ဒုဥက္ကဋ္ဌ ဦးလော့ယာကု ဦးဆောင်သည့် ကိုယ်စားလှယ်အဖွဲ့နှင့် ဗိုလ်ချုပ်မှူးကြီး မင်းအောင်လှိုင်တို့ မေလ ၃၀ ရက် တွင် တွေ့ဆုံကြမည်ဖြစ်ကြောင်း၊ ထို့နောက် မေလ ၃၁ ရက်နေ့တွင်  နစက အဖွဲ့ဝင် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)ဥက္ကဋ္ဌ ဒုဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ် အဖွဲ့နှင့် ဆက်လက် တွေ့ဆုံ ဆွေးနွေးကြမည် ဖြစ်ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ငြိမ်းချမ်းရေး ဆွေးနွေးရန် တိုင်းရင်းသား လက်နက်ကိုင်အဖွဲ့များကို ဖိတ်ခေါ်ခဲ့သလို EAO ခေါင်းဆောင်များကို မိမိ ကိုယ်တိုင် တွေ့ဆုံ ဆွေးနွေးမည် ဖြစ်ကြောင်း ဧပြီ ၂၂ ရက်က မိန့်ခွန်း ပြော၍ ဖိတ်ခေါ် ကမ်းလှမ်းခဲ့သည်။

UWSA ဒုဥက္ကဋ္ဌ ဦးလော့ယာကု ၂၀၂၂ ခုနှစ်၊ မေလ ၂၉ ရက်က နေပြည်တော်ရောက်စဉ်

ထို့နောက် မေလ ၂၀ ရက်တွင် ရှမ်းပြည် ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌ ဗိုလ်ချုပ်ကြီး ယွက်စစ်နှင့် လည်းကောင်း၊ မေလ ၂၃ ရက်တွင် မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့်လည်းကောင်း၊ မေလ ၂၆ ရက် တွင် ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC) ဥက္ကဋ္ဌ စောထော့လေးနှင့် လည်းကောင်း စသဖြင့် တွေ့ဆုံ ဆွေးနွေးထားပြီး ဖြစ်သည်။

ဗိုလ်ချုပ်မှူးကြီး မင်းအောင်လှိုင် ဖိတ်ခေါ်သည့် ငြိမ်းချမ်းရေး ဆွေးနွေးပွဲသို့ အမျိုးသားဒီမိုကရေစီမဟာမိတ်တပ်မတော် (NDAA)၊ ရှမ်းပြည်တိုးတက်ရေးပါတီ(SSPP/SSA)၊ ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO)၊ ဒီမိုကရေစီ အကျိုးပြု ကရင်တပ်မတော်(DKBA)၊ ရခိုင်ပြည်လွတ်မြောက်ရေးပါတီ(ALP)၊ လားဟူဒီမိုကရက်တစ် အစည်းအရုံး (LDU) တို့လည်း တက်ရောက်ကြမည် ဖြစ်သည်။

CNI International News

ဟာဗားနား၊ မေလ ၂၈

လာမည့်လ၌ အမေရိကန်က ဒေသတွင်းနိုင်ငံများ ထိပ်သီးအစည်းအဝေးသို့ ဒီမိုကရေစီ လေးစားသည့် ခေါင်းဆောင်များကိုသာ တက်ရောက်စေလိုကြောင်း အမေရိကန်က ပြောကြားလိုက်ပြီးနောက် ကျူးဘားနိုင်ငံ၊ ဟာဗားနားမြို့မှ လက်ဝဲဝါဒီ နိုင်ငံများ အဖွဲ့တစ်ဖွဲ့က ယင်းသို့ နိုင်ငံအချို့ ချန်လှပ်ထားမှုကို ရှုတ်ချကြောင်း ကြေညာခဲ့သည်။

ဇွန်လ ၆ ရက်မှ ၁၀ ရက်အထိ လော့အင်ဂျလိစ်မြို့တွင် ကျင်းပမည့် အဆိုပါ ထိပ်သီး အစည်းအဝေးကို အမေရိကန်က အိမ်ရှင် အဖြစ် လက်ခံကျင်းပမည်ဖြစ်ပြီး ဗင်နီဇွဲလား (သို့မဟုတ်) နီကာရာဂွါ အစိုးရများကို ဖိတ်ကြားမည် မဟုတ်ဟု ပြောကြား ထား ခဲ့သည်။

ကျူးဘားနိုင်ငံကို ထည့်သွင်း ဖိတ်ကြားရန် ရှိ/မရှိမှာ အိမ်ဖြူတော်အပေါ် မူတည်ကြောင်း၊ ကျူးဘား အရပ်ဘက် အဖွဲ့အစည်း များ တက်ကြွ လှုပ်ရှားသူများက တက်ရောက်ခွင့်ရရန် တောင်းဆိုထားကြောင်း ထိုထိပ်သီး အစည်းအဝေးအတွက် ညှိနှိုင်း ရေးမှူး တာဝန်ယူထားသူက ပြောကြားခဲ့သည်။

ကျူးဘားသမ္မတ မီဂွဲဒေ့ဇ်ကန်နယ်က မိမိကို ဖိတ်ကြားထားသော်လည်း မည်သည့် အခြေအနေမျိုးတွင် မဆို တက်ရောက်မည် မဟုတ်ကြောင်း ယခုသီတင်းပတ်တွင် ပြောကြားခဲ့သည်။

ကျူးဘား၊ ဗင်နီဇွဲလားနှင့် နီကာရာဂွါ အပါအဝင် ALBA အစုအဖွဲ့ဟု ထင်ရှားသည့် ၁၀ နိုင်ငံအဖွဲ့သည် လော့အင်ဂျလိစ်မြို့ တွင် ကျင်းပမည့် အမေရိကန်၏ ဒေသတွင်း ထိပ်သီးအစည်းအဝေးသို့ ချန်လှပ်ခံရမှုနှင့် ခွဲခြားဆက်ဆံမှုများကို ရှုတ်ချကြောင်း ဟာဗားနားမြို့မှ ကြေညာချက်တစ်စောင် ထုတ်ပြန်ခဲ့သည်။

အမေရိကန် သမ္မတ ဘိုင်ဒန်ကို တွေ့ရစဉ် (Reuters)

ထို့ပြင် ဤသို့ ချန်လှပ်ဖိတ်ကြားခြင်းသည် ထင်သလိုပြုမှုခြင်း၊ ဝါဒရေးရာနှင့် နိုင်ငံရေးအရ လှုံ့ဆော်မှု ဖြစ်ကြောင်း အဆိုပါ ကြေညာချက်တွင် ဆက်လက် ဖော်ပြထားပြီး “အခုလို တဖက်သတ် ဆုံးဖြတ်ချက်ဟာ ကမ္ဘာ့နိုင်ငံများ အချင်းချင်း ဆက်ဆံ ရေးမှာ သမိုင်းတွင်စေမယ့် ဆုတ်ယုတ်မှုတစ်ခုလို့ ပြောချင်ပါတယ်” ဟု ရေးသားတုံ့ပြန်ထားသည်။

မကြာသေးမီက ထုတ်လွှင့်ခဲ့သည့် အသံလွှင့် မိန့်ခွန်းတွင် ဗင်နီဇွဲလားသမ္မတ နီကိုလက်စ်မာဒူရိုက “လာမည့် ထိပ်သီး အစည်း အဝေး စီစဉ်နေခြင်းသည် အပြောင်းအလဲ မြန်ဆန်လွန်းကြောင်း” သဘောထား မှတ်ချက်ပေးခဲ့သည်။ ALBA အဖွဲ့ဝင် မဟုတ်သည့် မက္ကစီကိုကဲ့သို့ အခြားနိုင်ငံများကိုလည်း “မြောက်အမေရိက တိုက်ကြီး တစ်ခုလုံးအတွက် အမှန်တရား၏အသံ ကျယ် လောင်စေဖို့ ရပ်တည်ပေးခဲ့ကြောင်း” နီကိုလက်စ်မာဒူရိုက ချီးကျူးပြောကြားခဲ့သည်။

အထက်ပါ အခြေအနေများနှင့်ပတ်သက်၍ အိမ်ဖြူတော်နှင့် အမေရိကန် နိုင်ငံခြားရေးဌာနများထံသို့ ရိုက်တာက သဘောထား မှတ်ချက် တောင်းခံခဲ့သော်လည်း ချက်ချင်းတုံ့ပြန်ခြင်း မရှိသေးပေ။

အကယ်၍ နိုင်ငံအချို့က အစည်းအဝေးမှ ဖယ်ထုတ်ခြင်း၊ ချန်လှပ်ခြင်းရှိခဲ့လျှင် ဘိုလီဗီးယားနှင့် အခြားနိုင်ငံများမှ ခေါင်း ဆောင်များနှင့်အတူ မိမိလည်း ယင်းထိပ်သီး အစည်းအဝေးကို သပိတ်မှောက်သွားမည်ဟု မက္ကစီကို သမ္မတ အန်ဒရီးမာနွယ် လိုပက်ဇ် အော်ဘရာဒေါက ခြိမ်းခြောက်ထားသည်။

ကျူးဘား မပါဝင်သည် ကာရေဘီယံ ပင်လယ်ဒေသတွင်း အသိုက်အဝန်းရှိ နိုင်ငံပေါင်း ၁၄ နိုင်ငံအနက် ၁၃ နိုင်ငံသည် လော့အင်ဂျလိစ် ထိပ်သီးအစည်းအဝေးသို့ တက်ရောက်ရန် စီစဉ်နေကြကြောင်း ယခုသီတင်းပတ်၌ ရိုက်တာက သတင်း အတည်ပြု ဖော်ပြပြီး ဖြစ်သည်။

Source: Reuters

CNI International News

ဝါရှင်တန်၊ မေလ ၂၈

အမေရိကန်နိုင်ငံ၊ တက္ကဆက်ပြည်နယ်၊ ယူဗယ်ဒီမြို့ရှိ စာသင်ကျောင်းတွင် မေလ ၂၄ ရက်၌ လူအများအပြား ပစ်သတ်ခံရခြင်း အတွက် သမ္မတဟောင်း ဒေါ်နယ်ထရမ့်က ဝေဖန်ပြောကြားခဲ့ပြီး ရုရှားကို ဆန့်ကျင်၍ ယူကရိန်းစစ်ပွဲသို့ ပါဝင်ကူညီခြင်း၊ မအောင်မြင်သော စီမံကိန်းများအတွက် ပြည်ပတွင် ရင်းနှီးမြှုပ်နှံခြင်းတို့အစား အမေရိကန် ကလေးသူငယ်များ၏ လုံခြုံရေးကို ရှေ့တန်းတင် ဦးစားပေးဖို့ တိုက်တွန်းတောင်းဆိုခဲ့သည်။

“ယူကရိန်းပို့ဖို့ အမေရိကန်ဒေါ်လာ ၄၀ ဘီလီယံ ထားမယ်ဆိုရင် ကျနော်တို့ကလေးတွေ ပြည်တွင်းမှာ လုံခြုံစေဖို့ ကျနော်တို့ လိုအပ်တာတွေ လုပ်ဆောင်ပေးသင့်တယ်” ဟု မေလ ၂၇ ရက်တွင် ဟူစတန်မြို့၌ ကျင်းပသော အမျိုးသားရိုင်ဖယ်အသင်း (NRA) ညီလာခံ၌ ဒေါ်နယ်ထရမ့်က ပြောကြားခဲ့သည်။

“အီရတ်မှာ ထရီလီယံနဲ့ ချီပြီး၊ အာဖဂန်နစ္စတန်မှာ ထရီလီယံနဲ့ ချီပြီး သုံးစွဲခဲ့ပါတယ်။ ဘာမှ ပြန်မရပါဘူး။ ကမ္ဘာ့တခြား နေရာ တွေအတွက် မတည်ဆောက်ခင်မှာ ကိုယ့်နိုင်ငံမှာရှိတဲ့ ကိုယ့်သားသမီးတွေအတွက် ဘေးကင်းတဲ့ကျောင်းတွေ ဆောက်ပေး သင့်တယ်” ဟု ထရမ့်က ဆက်လက် ပြောကြားခဲ့သည်။

ယူဗယ်ဒီမြို့ရှီ ရော့ဗ်မူလတန်းကျောင်းတွင် ကလေးငယ် ၁၉ ဦးနှင့် ဆရာနှစ်ဦးတို့ကို သေနတ်သမားက ပစ်သတ်ပြီးနောက် ၃ ရက် အကြာတွင် အမေရိကန်ပြည်တွင်း သေနတ်ကိုင်ဆောင်ခွင့် စည်းရုံးလှုံ့ဆော်သည့် NRA အသင်း၏ ညီလာခံသို့ ထရမ့် တက်ရောက်၍ စကားပြောခဲ့ခြင်းအတွက် ဒီမိုကရက်အမတ်များက အပြစ်တင် ဝေဖန်ခဲ့ကြသည်။

ယူဗယ်ဒီမြို့ရှိ စာသင်ကျောင်း ပစ်ခတ်ခံရမှု သေဆုံးသွားသော ကလေးငယ်များအတွက် အထိမ်းအမှတ်လုပ်

သို့သော် ထိုသို့ အပြစ်တင်သူများသည် ဖြစ်ရပ်ဆိုးကို ကြိုတင်တားဆီးနိုင်မည့် ပြုပြင်ပြောင်းလဲရေးများကို အဆိုပြုခြင်းမရှိဘဲ လူအစုလိုက် အပြုံလိုက် သတ်ဖြတ်မှုကို နိုင်ငံရေးအရ အခွင့်ကောင်းယူဖို့သာ ကြိုးစားနေကြကြောင်ထရမ့်က စောဒက တက်ခဲ့သည်။

ဖလော်ရီဒါပြည်နယ်မှ ဘီလျံနာသူဌေးဖြစ်သူ ထရမ့်က “အခုအချိန်ဟာ ဘုံအခြေခံတစ်ရပ်ကို ရှာဖွေရမယ့် အချိန်ပါ။ ဒီလို အဖြစ်ဆိုးနေ့တစ်နေ့ နေမဝင်ခင်မှာ ငိုကြွေးနေတဲ့ မိသားစုတွေရဲ့ မျက်ရည်တွေကို အသုံးချဖို့ ကြိုးစားနေတဲ့ နိုင်ငံရေး သမား တွေဟာ သူတို့ကိုယ်ပိုင် အခွင့်အာဏာကို တိုးမြှင့်ပြီး ဖွဲ့စည်းပုံ အခြေခံဥပဒေဆိုင်ရာ အခွင့်အရေး အတွက်ပဲ ကြိုးစားနေကြ တာ ဝမ်းနည်းစရာ ကောင်းပါတယ်” ဟု ဆက်လက် ပြောကြားခဲ့သည်။
“လက်ရှိသမ္မတ ဂျိုးဘိုင်ဒန်နှင့် အခြား ဒီမိုကရက်တစ် အမတ်များသည် မှားယွင်းစွာ အကြံပြုခြင်းဖြင့် နိုင်ငံရေးအရ အမြတ် ထွက်ဖို့ကိုပဲ ရှက်ဖွယ်လိလိ ကြိုးစားနေခဲ့ကြကြောင်း” ဟု ထရမ့်က ထောက်ပြခဲ့သည်။

ဘိုင်ဒန်သည် သေနတ်ကိုင်ဆောင်မှု အခွင့်အရေး ထောက်ခံသူများအား အပြစ်တင်ခြင်းဖြင့် တက္ကဆက်ပြည်နယ်တွင် လူသတ် မှုများအတွက် လှည့်ဖြားနေခဲ့ကြောင်း ၎င်းက ထပ်လောင်း ပြောကြားခဲ့သည်။

မေလ ၂၄ ရက်၌ ရဲတပ်ဖွဲ့က အသေဖမ်းဆီးခဲ့သော ယူဗယ်ဒီ စာသင်ကျောင်းအတွင်း ပစ်ခတ်ခဲ့သည့် အသက် ၁၈ နှစ်အရွယ် သေနတ်သမား ဆယ်ဗာဒေါရားမို့စ်ကိုလည်း ထရမ့်က ပြင်းထန်သော စကားလုံးများဖြင့် ရှုတ်ချခဲ့သည်။