CNI International News

ဗျူရိုနိုအေရိစ်၊ စက်တင်ဘာ ၂

အာဂျင်တီးနားတွင် နိုင်ငံရေးအရ ဩဇာတိက္ကမ ကြီးမားသော ဒုတိယသမ္မတ ခရစ္စတီးနား ဖာနန်ဒက်ဇ်ကို သေနတ် ဖြင့် ချိန်ရွယ်ခဲ့သည့် အမျိုးသားတစ်ဦးကို စက်တင်ဘာ ၁ ရက်၊ ညပိုင်းက ဖမ်းဆီးထိန်းသိမ်းခဲ့ကြောင်း၊ သေနတ်မှ ကျည်မထွက်သဖြင့် လုပ်ကြံသတ်ဖြတ်မှု မအောင်မြင်ခဲ့ကြောင်း သမ္မတ အယ်လ်ဘာတို ဖာနန်ဒက်ဇ်က ပြော ကြားခဲ့သည်။

“လူတစ်ယောက်က သူ့ခေါင်းကို သေနတ်နဲ့ချိန်ပြီး မောင်းခလုတ်ကို ဆွဲလိုက်တာဗျ” ဟု သမ္မတက တနိုင်ငံလုံးသို့ ထုတ်လွှင့် တင်ဆက်မှုတစ်ခုတွင် ပြောကြားခဲ့သည်။

အဆိုပါ ဖြစ်စဉ်သည် အာဂျင်တီးနားနိုင်ငံတွင် ၁၉၈၃ ခုနှစ် ဒီမိုကရေစီ လမ်းကြောင်းပေါ် ပြန်ရောက်ပြီး နောက်ပိုင်း အဆိုးရွားဆုံး ဖြစ်စဉ်ဟု သမ္မတက မှတ်ချက်ချလိုက်ပြီး ထိုဖြစ်စဉ်မျိုးကို ဆန့်ကျင် ကန့်ကွက်သွား ကြရန် နိုင်ငံရေး ခေါင်းဆောင်များနှင့် လူ့အဖွဲ့အစည်း တစ်ခုလုံးအား တိုက်တွန်းခဲ့သည်။

ခရစ္စတီးနား ဖာနန်ဒက်ဇ်၏ ၂၀၀၇-၂၀၁၅ ဒုတိယသမ္မတ သက်တမ်းအတွင်း အကျင့်ပျက် ခြစားမှု စွပ်စွဲချက်များ ပါဝင်သည့် အမှုနှင့်ပတ်သက်၍ ထောင်ဒဏ် ၁၂ နှစ် ချမှတ်ရန် အစိုးရရှေ့နေက တောင်းဆိုခဲ့ပြီးနောက် ၎င်းကို ထောက်ခံသူများက ယခင်သီတင်းပတ်မှ စတင်၍ သူမ၏ နေအိမ်အနီးတဝိုက် လမ်းမပေါ် စုဝေးလာခဲ့ကြသည်။

ဒုတိယသမ္မတ ခရစ္စတီးနား ဖာနန်ဒက်ဇ်ကို ထောက်ခံသူများ အထိတ်တလန့်ဖြစ်သွားစဉ် (AP)

လက်ရှိ သမ္မတနှင့် မသက်ဆိုင်သည့် ခရစ္စတီးနား ဖာနန်ဒက်ဇ်ကတော့ သူမအပေါ် စွပ်စွဲချက်အားလုံးကို ငြင်းဆို ထားသည်။

ပြည်တွင်း ရုပ်သံလိုင်းများမှ ထုတ်လွှင့်ခဲ့သည့် အခင်းဖြစ်ပွားပုံ ဗွီဒီယိုမှတ်တမ်းတွင် သူမသည် နေအိမ်အပြင်ဘက် ရှိ ထောက်ခံသူများ ဝန်းရံထားစဉ် မော်တော်ယာဉ်ဖြင့် မောင်းနှင်ထွက်လာရင်း ပစ္စတိုနှင့်တူသော အရာကို ကိုင်၍ လက်ဆန့်တန်းထားသူတစ်ဦးက သူမကို ချိန်ရွယ်ခဲ့ကြောင်း တွေ့ရှိရသည်။

ယင်းဗွီဒီယိုကို ထုတ်လွှင့်ပြသပြီးနောက် မကြာမီ၌ အာဂျင်တီးနားသမ္မတက ဖြစ်စဉ်နှင့်ပတ်သက်၍ ဆက်လက် ပြောကြားခဲ့ခြင်း ဖြစ်သည်။

အခင်းဖြစ်ပွားရာ အာဂျင်တီးနားမြို့တော် ဗျူရိုနိုအေရိစ်ရှိ ရီကိုလီတာ ရပ်ကွက်အတွင်း အဆိုပါ သေနတ်သမား ပေါ်ထွက်လာခြင်းကြောင့် ဒုတိယသမ္မတကို ဝန်းရံထောက်ခံသူများ တုန်လှုပ်ခြောက်ခြား သွားသည့်နည်းတူ ဒုတိယသမ္မတလည်း အထိတ်တလန့် ဖြစ်ခဲ့ရသည်။

ဒုတိယသမ္မတ ခရစ္စတီးနား ဖာနန်ဒက်ဇ်ကို တွေ့ရစဉ် (IMAGO)

သေနတ် ကိုင်ဆောင်ထားသော ယင်းအမျိုးသားကို အခင်းဖြစ်ပွားပြီး စက္ကန့်ပိုင်းအတွင်း ဖမ်းဆီးထိန်းသိမ်း နိုင်ခဲ့ သော်လည်း မည်သူမည်ဝါဖြစ်ကြောင်း အာဏာပိုင်များက ထုတ်ဖော်ပြောကြားခြင်း မရှိပေ။ ၎င်းနှင့်အတူ သိမ်း ဆည်း ရမိသော သေနတ်ထဲမှာ ကျည်ဆန် ၅ တောင့် ထည့်ထားပြီး မောင်းခလုတ်ကို ဆွဲခဲ့သော်လည်း ပစ်ခတ် နိုင်ခဲ့ခြင်း မရှိကြောင်း သမ္မတက တိုင်းပြည်သို့ ရှင်းပြခဲ့သည်။

ဒုတိယသမ္မတဖြစ်သူမှာ ထိခိုက်ဒဏ်ရာရသည့် အရိပ်အယောင် မတွေ့ရသော်လည်း လက်ရှိ ၎င်းမှာ မည်သည့် နေရာ ရောက်နေမှန်း မသိရသေးပေ။

“သေနတ်ကိုင်ထားတဲ့လူကို ဒုသမ္မတရဲ့ လုံခြုံရေးဝန်ထမ်းက ဖမ်းထားပြီးပါပြီ” ဟု အာဂျင်တီးနား လုံခြုံရေး ဝန်ကြီး အနီဘယ်ဖာနန်ဒက်ဇ်က ပြည်တွင်း ရုပ်သံလိုင်း တစ်ခုဖြစ်သော C5N ကို ပြောကြားခဲ့သည်။

Source: AP

CNI News

၂၀၂၂ ခုနှစ်၊ စက်တင်ဘာ ၂

နစက၏ ငြိမ်းချမ်းရေးဆွေးနွေးရေးအဖွဲ့က ဆွေးနွေးသည့် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ခြင်းအပေါ် RCSS ကိုယ်စားလှယ်အဖွဲ့က ပြန်လည် ဆွေးနွေးရန် အဆင်သင့် မဖြစ်သေးဟု ရှမ်းပြည်ပြန်လည်ထူထောင် ရေးကောင်စီ(RCSS/SSA)က စက်တင်ဘာ ၂ ရက်တွင် ထုတ်ပြန်ခဲ့သည်။

နစက၏ ငြိမ်းချမ်းရေး ဖိတ်ခေါ်မှုအရ ၂၀၂၂ ခုနှစ်၊ သြဂုတ် ၂၉ ရက်တွင် RCSS ဥက္ကဋ္ဌ ဗိုလ်ချုပ်ကြီးယွက်စစ် ဦးဆောင်သည့် ကိုယ်စားလှယ်အဖွဲ့သည် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်လည်းကောင်း၊ နစက ၏ ငြိမ်းချမ်းရေးဆွေးနွေးရေးအဖွဲ့နှင့် သြဂုတ် ၃၀ ရက်မှ စက်တင်ဘာ ၁ ရက်နေ့အထိ လည်းကောင်း တွေ့ဆုံ ဆွေးနွေးခဲ့ကြသည်။

RCSS က “ ထိုသို့ တွေ့ဆုံဆွေးနွေးရာတွင် အနာဂတ် ဖက်ဒရယ် ပြည်ထောင်စုတည်ဆောက်ရေးဆိုင်ရာ အခြေ ခံမူများအပေါ် နှစ်ဖက် ရပ်တည်ချက်များနှင့် ပတ်သက်၍ ညှိနှိုင်းရန် အချိန်လိုအပ်ခြင်း၊ နိုင်ငံတော်ငြိမ်းချမ်းရေး ဆွေးနွေးရေးအဖွဲ့က ဆွေးနွေးသည့် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ခြင်းအပေါ် RCSS ကိုယ်စားလှယ် အဖွဲ့က ပြန်လည်ဆွေးနွေးရန် အဆင်သင့်မဖြစ်ခြင်း၊ RCSS ၏ အဆိုပြုချက်များကိုလည်း ပြန်လည် ဆွေးနွေးရန် အတွက် နိုင်ငံတော်ငြိမ်းချမ်းရေး ဆွေးနွေးရေးအဖွဲ့က ပြင်ဆင်ချိန်လိုအပ်သဖြင့် နောင်တွေ့ဆုံပွဲများတွင် နှစ်ဖက် အဆိုပြုချက်များအား ဆက်လက် တွေ့ဆုံ ဆွေးနွေးညှိနှိုင်းသွားရန် သဘောတူ လက်မှတ်ရေးထိုးခဲ့သည်”ဟု ထုတ်ပြန်ချက်တွင် ပြောကြားထားသည်။

RCSS ကိုယ်စားလှယ်အဖွဲ့နဲ့ NSPNC ကိုယ်စားလှယ်အဖွဲ့ ဆွေးနွေးစဉ်

ထို့နောက် ၃ ရက်တာ တွေ့ဆုံ ဆွေးနွေးမှုတွင် လက်ရှိ နိုင်ငံရေး အထွေထွေ အကျပ်အတည်း ဖြေရှင်းရေး အတွက် RCSS ၏ ငြိမ်းချမ်းရေးလမ်းပြမြေပုံ၊ အနာဂတ် ဖက်ဒရယ် ပြည်ထောင်စု တည်ဆောက်ရေးဆိုင်ရာ RCSS ၏ ဖက်ဒရယ်အခြေခံမူများ၊ ယုံကြည်မှု တည်ဆောက်ရေးဆိုင်ရာ လုပ်ငန်းများ၊ ဒေသခံ ပြည်သူလူထု အတွက် ဖွံ့ဖြိုးရေးလုပ်ငန်းများ စသည့် အခြေအနေများကို RCSS ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သည့် ကိုယ်စားလှယ်အဖွဲ့က ဆွေးနွေးခဲ့သည်။

အလားတူ နစက၏ ငြိမ်းချမ်းရေးဆွေးနွေးရေးအဖွဲ့က ၂၀၀၈ ဖွဲ့စည်းပုံအခြေခံဥပဒေပါ ဇယား(၁) ပြည်ထောင်စု ဥပဒေပြုစာရင်း၊ ဇယား(၂) ပြည်နယ် သို့မဟုတ် တိုင်းဒေသကြီး ဥပဒေပြုစာရင်း၊ ပြည်ထောင်စု သဘောတူ စာချုပ် အစိတ်အပိုင်း(၁၊ ၂၊ ၃)ပါ သဘောတူညီချက်များအား ၂၀၀၈ ဖွဲ့စည်းပုံအခြေခံဥပဒေ၊ တည်ဆဲဥပဒေ များနှင့် ကိုက်ညီမှု ရှိ/မရှိ လေ့လာသုံးသပ်ချက်များနှင့် အခြား အကြောင်းအရာများကို ဆွေးနွေးရှင်းလင်းခဲ့ သည်ဟု RCSS က ထုတ်ပြန်ခဲ့သည်။

ဗိုလ်ချုပ်ကြီး ယွက်စစ်က ငြိမ်းချမ်းရေး ဆွေးနွေးပွဲများကို အလွတ်သဘော ဆွေးနွေးပွဲများလည်း ပြုလုပ်သင့်ကြောင်း၊ သူ့ဘက်ကိုယ့်ဘက် မျှမျှတတဖြစ်သည့် ဆွေးနွေးပွဲများ ဖြစ်ရန်လိုအပ်ကြောင်း၊ ပါဝင်သင့် ပါဝင်ထိုက် သူများ အားလုံးပါဝင်သော ဆွေးနွေးပွဲဖြစ်ရန်လည်း လိုအပ်ကြောင်း စက်တင်ဘာ ၁ ရက်နေ့က ဒုတိယဗိုလ်ချုပ် ကြီး ရာပြည့် ဦးဆောင်သော ကိုယ်စားလှယ်အဖွဲ့နှင့်တွေ့ဆုံစဉ် ပြောကြားခဲ့သည်။

RCSS သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ကို လက်မှတ်ရေးထိုးထားသည့် ရှမ်းလက်နက်ကိုင် အဖွဲ့ဖြစ်သည်။

CNI News

၂၀၂၂ ခုနှစ်၊ စက်တင်ဘာ ၂

ငြိမ်းချမ်းရေး လုပ်ငန်းစဉ် ဦးဆောင်အဖွဲ့(PPST)၏ ဦးဆောင် နာယက အဖြစ် လက်ခံထားမှုကို ပြန်လည် ရုပ်သိမ်းပါကြောင်း ကရင်အမျိုးသားအစည်းအရုံး(KNU) ဥက္ကဋ္ဌ ဗိုလ်ချုပ်ကြီး စောမူတူးစေးဖိုးက ပြောသည်။

၂၀၂၂ ခုနှစ်၊ ဩဂုတ် ၃၁ ရက်နေ့က KNU ၏ ဗဟိုအလုပ်အမှုဆောင်ကော်မတီ အစည်းအဝေး ကျင်းပခဲ့ရာ PPST ၏ ဦးဆောင်နာယကအဖြစ် တာဝန်မယူသင့်ကြောင်း ဆုံးဖြတ်ခဲ့သည်ကို လိုက်နာခဲ့သည်ဟု PPST သို့ ပေးပို့သော စာတွင် ဖော်ပြထားသည်။

PPST က အဖွဲ့အစည်းကို ကိုယ်စားမပြုဘဲ ပုဂ္ဂိုလ်ရေးအရ ဦးဆောင်နာယကအဖြစ် တာဝန်ယူပေးရန် ကမ်း လှမ်းခဲ့ခြင်းကို လက်ခံကြောင်း KNU ဥက္ကဋ္ဌ ဗိုလ်ချုပ်ကြီးစောမူတူးစေးဖိုးက ဩဂုတ် ၄ ရက်နေ့စွဲဖြင့် PPST ထံ စာပေးပို့ခဲ့သည်။

ဗိုလ်ချုပ်ကြီးစောမူတူးစေးဖိုး (EPA)

ဗိုလ်ချုပ်ကြီး စောမူတူးစေးဖိုးက "ကျနော်၏ ကိုယ်ပိုင်သဘောထား ဆုံးဖြတ်ချက်ဖြင့် အဖွဲ့အစည်းကိုယ်စားမပြု ဘဲ ပုဂ္ဂိုလ်အရလွတ်လပ်စွာ ပါဝင်ရန် ပြန်ကြားစာပေးပို့ခဲ့သော်လည်း ဩဂုတ် ၃၁ ရက်တွင် ကျင်းပသော KNU ဗဟိုအလုပ်အမှုဆောင်ကော်မတီ အစည်းအဝေးတွင် ကျနော်သည် PPST ၏ ဦးဆောင်နာယကအဖြစ် တာဝန် မယူသင့်ကြောင်း ဆုံးဖြတ်ခဲ့ပါသည်”ဟု PPST သို့ ပေးပို့သော စာတွင် ဖော်ပြထားသည်။

ထို့နောက် KNU ၏ ဥက္ကဋ္ဌတစ်ဦးဖြစ်သော ကျနော်သည် ဒီမိုကရေစီစနစ်ကို လက်ခံယုံကြည်သူဖြစ်ပြီး KNU က ချမှတ်ထားသော ဖွဲ့စည်းပုံအခြေခံဉပဒေ၊ နည်းဉပဒေများကို တာဝန်ခံထိန်းသိမ်းရန် တာဝန်ရှိသည့်အလျောက် ပုဂ္ဂိုလ်ရေးအမြင်ထက် အဖွဲ့အစည်း၏ “မူ”၊ လမ်းစဉ်အား ဦးစားပေး ရှေ့ဆောင်မှုပြုရန် ရည်ရွယ်၍ PPST ၏ ဦးဆောင်နာယက အဖြစ် တာဝန်ယူရန် သဘောတူသည့် ပေးစာအား ပြန်လည် ရုပ်သိမ်းပါကြောင်း ဗိုလ်ချုပ်ကြီး စောမူတူးစေးဖိုးက PPST သို့ စာတစ်စောင် ပေးပို့ခဲ့သည်။

ဗိုလ်ချုပ်ကြီးစောမူတူးစေးဖိုးကို NCA-S EAO Summit မှာတွေ့ရစဉ် (NCA-S EAO)

ဗိုလ်ချုပ်ကြီးစောမူတူးစေးဖိုးသည် PPST ကို စတင် ဖွဲ့စည်းသည့် ၂၀၁၇ ခုနှစ်မှ ၂၀၁၉ ခုနှစ်အထိ ဥက္ကဋ္ဌအဖြစ် တာဝန်ယူပြီးနောက် နုတ်ထွက်သွားခဲ့သည်။

လက်ရှိတွင် PPST ကို ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(AL P)၊ လားဟူဒီမိုကရက်တစ် အစည်းအရုံး (LDU)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ် တပ်ဦး (ABSDF)၊ ဒီမိုကရေစီအကျိုးပြုကရင်တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသား လွတ်မြောက်ရေးတပ်မတော်- ငြိမ်းချမ်းရေးကောင်စီ(KNU/KNLA-PC)၊ မွန်ပြည်သစ်ပါတီ(NMSP)တို့ဖြင့် ဖွဲ့စည်း ထားသည်။

ကျန် ရှမ်းပြည်ပြန်လည်ထူထောင်ရေးကောင်စီ(RCSS/SSA)၊ ကရင်အမျိုးသားအစည်းအရုံး(KNU)၊ ချင်းအမျိုး သားတပ်ဦး(CNF)တို့က အဖွဲ့အဝင်များအဖြစ် ပါဝင်မှုကနေ ရပ်နားထားကြောင်း သိရသည်။

CNI News

၂၀၂၂ ခုနှစ်၊ စက်တင်ဘာ ၂

ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ(UPDJC) ၏ ယန္တရားမှာ ပျက်နေသလို ဖြစ်နေကြောင်း ပြည်သူ့ပါတီ (PP) ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

UPDJC ဆိုသည့် အသုံးအနှုန်းကို နစက ကိုယ်တိုင်လည်း မသုံးသလို လက်ရှိ အခြေအနေမှာ UPDJC ယန္တရား ပေါ်မလာကြောင်း ၎င်းက ပြောသည်။

ဦးကိုကိုကြီးက “အခုဟာက UPDJC အသုံးအနှုန်းကို နစက ကိုယ်၌ကိုက မသုံးဘူး။ ဘာကြောင့်လဲဆိုတော့ UPDJC ဆိုတာက အစိုးရ၊ တပ်၊ လွှတ်‌တော်က တစ်စု၊ NCA ထိုးထားတဲ့ တိုင်းရင်းသားလက်နက်ကိုင်များက တစ်စု၊ နိုင်ငံရေးပါတီများက တစ်စုဆိုပြီးတော့ ၃ စုပေါင်းမှ UPDJC လို့ ကျနော်တို့က သတ်မှတ်လို့ ရတာဖြစ်တဲ့ အတွက်ကြောင့် အခုအခြေအနေမှာ UPDJC ဆိုတဲ့ ယန္တရားကိုယ်၌က ပေါ်မလာဘူး။ ပျက်သလိုဖြစ်နေတယ်၊ အဲဒါကြောင့်မို့လို့ ကျနော်တို့ ဒါ UPDJC ဆိုတာကို နစက-ကလည်း မသုံးဘူးဆိုတာ ကျ‌နော်က သတိထားမိတယ်” ဟု ပြောသည်။

ဒုတိယဗိုလ်ချုပ်ကြီးရာပြည် ဦးဆောင်သည့် NSPNC ကိုတွေ့ရစဉ်

UPDJC နိုင်ငံရေးပါတီများ အစုအဖွဲ့နှင့် ဒုတိယဗိုလ်ချုပ်ကြီးရာပြည့် ဦးဆောင်သည့် အမျိုးသား စည်းလုံး ညီညွတ် ရေးနှင့် ငြိမ်းချမ်းရေးဖော်ဆောင်မှု ညှိနှိုင်ရေးကော်မတီ(NSPNC)တို့ မတ်လ ၆ ရက်နေ့က နေပြည်တော်တွင် တွေ့ဆုံခဲ့ပြီးနောက် ၂၀၂၂ ခုနှစ်၊ ဧပြီ ၂၇ ရက်က UPDJC နိုင်ငံရေးပါတီများ အစုအဖွဲ့ကို ပြန်လည်ရွေးချယ်ခဲ့သည်။

UPDJC နိုင်ငံရေးပါတီများ အစုအဖွဲ့အနေဖြင့် လုပ်ငန်းစဉ်များကို ဆက်လက် လုပ်ဆောင်နေကြောင်း၊ NSPNC နှင့် တစ်လတွင် တစ်ကြိမ် တွေ့ဆုံဆွေးနွေးနေကြောင်း UPDJC နိုင်ငံ‌ရေးပါတီများ အစုအဖွဲ့မှ အတွင်းရေးမှူး ဒေါ်ချိုချိုကျော်ငြိမ်းက CNI သတင်းဌာနသို့ ပြောသည်။

ဒေါ်ချိုချိုကျော်ငြိမ်းက “နစက-က တာဝန်ယူပြီး လုပ်ပေးတဲ့အတွက် ဒီရွေးကောက်ပွဲဟာ တရားမျှတတယ်လို့ လက်ခံပြီးတော့ ဥက္ကဋ္ဌ ဦးစိုင်းအိုက်ပေါင်းပဲ၊ အတွင်းရေးမှူးကလည်း အန်တီပဲ ပြန်ဖြစ်ပါတယ်။ ဆိုတော့ သားပြော တာ မှားတယ်၊ သားတို့ ကြားတာတွေက မဟုတ်ပါဘူး။ အမြဲတမ်းပဲ သူတို့ (နစက) နဲ့လည်း တွေ့နေပါတယ်။ သူတို့ကလည်း အန်တီတို့ဆီက အကြံဥာဏ်တွေ ယူနေပါတယ်” ဟု ပြောသည်။

NSPNC နှင့် UPDJC နိုင်ငံရေးပါတီ အစုအဖွဲ့ တွေ့ဆုံ ဆွေးနွေးစဉ်

UPDJC နိုင်ငံရေးပါတီများ အစုအဖွဲ့တွင် ဥက္ကဋ္ဌအဖြစ် ရှမ်းတိုင်းရင်းသားများ ဒီမိုကရက်တစ်ပါတီ (SNDP)မှ စိုင်းအိုက်ပေါင်းက တာဝန်ယူထားပြီး အတွင်းရေးမှူးအဖြစ် ဒီမိုကရက်တစ်ပါတီ(မြန်မာ)မှ ဒေါ်ချိုချိုကျော်ငြိမ်းက တာဝန်ယူထားကြောင်း၊ တခြားသော ကိုယ်စားလှယ်များကတော့ အဖွဲ့ဝင်များအဖြစ် တာဝန်ယူထားကြောင်း သိရ သည်။

UPDJC ကို အစိုးရ၊ လွှတ်တော်နှင့် တပ်မတော် ကိုယ်စားလှယ် ၁၆ ဦး၊ NCA ထိုးထားသည့် လက်နက်ကိုင် အဖွဲ့အစည်းများမှ ကိုယ်စားလှယ် ၁၆ ဦး၊ နိုင်ငံရေးပါတီများ အစုအဖွဲ့မှ ကိုယ်စားလှယ် ၁၆ ဦးတို့ဖြင့် ဖွဲ့စည်းရ မည်ဖြစ်ကြောင်း သိရသည်။

သို့သော် လက်ရှိတွင် တိုင်းရင်းသားလက်နက်ကိုင်များနှင့် အစိုးရ-တပ်မတော်-လွှတ်တော်ဘက်မှ ကိုယ်စားလှယ် များ ဖွဲ့စည်း ထားခြင်း မရှိသေးသလို နိုင်ငံရေးပါတီများဘက်ကလည်း ယခု UPDJC နိုင်ငံရေးပါတီများ အစုအဖွဲ့ သည် နိုင်ငံရေးပါတီများ အားလုံးကို ကိုယ်စားပြုမှု ရှိ/မရှိ အငြင်းပွားနေသည်။

CNI News

၂၀၂၂ ခုနှစ်၊ စက်တင်ဘာ ၁

ဆွေးနွေးပွဲများ၏ အခင်းအကျင်းကို ပြင်ဆင်သည့်အခါ သူ့ဘက်ကိုယ့်ဘက် မျှမျှတတဖြစ်မည့် ဆွေးနွေးပွဲများ ဖြစ်ရန် လိုအပ် သည်ဟု ရှမ်းပြည်ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌ ဗိုလ်ချုပ်ကြီး ယွက်စစ်က ပြောသည်။

စက်တင်ဘာ ၁ ရက်နေ့က RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သည့် ကိုယ်စားလှယ်အဖွဲ့နှင့် အမျိုးသား စည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)ဥက္ကဋ္ဌ ဒုဗိုလ်ချုပ်ကြီးရာပြည့် ဦးဆောင် သော ကိုယ်စားလှယ်အဖွဲ့တို့ တွေ့ဆုံ ဆွေးနွေးစဉ် အထက်ပါအတိုင်း ပြောကြားခဲ့ခြင်း ဖြစ်သည်။

ဗိုလ်ချုပ်ကြီးယွက်စစ်နဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

ဗိုလ်ချုပ်ကြီးယွက်စစ်က “ ဆွေးနွေးညှိနှိုင်းရာမှာ တရားဝင်ပွဲတွေ ကျင်းပသလို အလွတ်သဘောပွဲတွေကိုလည်း မကြာခဏ လုပ်ပေးဖို့လိုအပ်ပါတယ်။ ဆွေးနွေးပွဲရဲ့ အခင်းအကျင်းကိုလည်း နှစ်ဦးနှစ်ဖက်အတွက် အဆင်ပြေတဲ့ အခင်းအကျင်းမျိုး ဖြစ်အောင်လည်း နှစ်ဖက်ညှိနှိုင်းပြီး စီစဉ် ဆောင်ရွက်ဖို့ လိုအပ်ပါတယ်။ ဒါမှသာ မိမိတို့လိုချင်တဲ့ ရလဒ် မျိုးရရှိအောင် စွမ်းဆောင်နိုင်မှာ ဖြစ်ပါတယ်။ သူ့ဖက်ကိုယ့်ဖက် မျှမျှတတ ဖြစ်စေဖို့လည်း ဝိုင်းဝန်း ကြိုးပမ်းဆောင်ရွက်ဖို့၊ ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စု တည်ဆောက်ရာမှာ အကောင်းဆုံးဖြစ်အောင် ဝိုင်းဝန်းကြိုးပမ်း ဆောင်ရွက်ဖို့ တိုက်တွန်းလိုပါတယ်”ဟု ပြောသည်။

ဗိုလ်ချုပ်ကြီး ယွက်စစ်၏ မိန့်ခွန်းပါ ကောက်နုတ်ချက်တချို့ကို RCSS ၏ သတင်းပြန်ကြားရေးဌာနအောက်ရှိ Tai Freedom ကနေရေးသားဖော်ပြထားသည်။

RCSS ဥက္ကဋ္ဌ ဗိုလ်ချုပ်ကြီး ယွက်စစ်က “ငြိမ်းချမ်းရေးလုပ်ငန်းစဉ် ဆောင်ရွက်ရာမှာ ယုံကြည်မှု တည်ဆောက်ခြင်းဟာ အဓိကကျပါတယ်၊ ယုံကြည်မှု တည်ဆောက်နိုင်ရေးအတွက် နှစ်ဦးနှစ်ဖက်က လက်တွေ့လုပ်ဆောင်ပြရမှာ ဖြစ်ပါတယ်၊ ဆွေးနွေးညှိနှိုင်းတဲ့ နေရာမှာလည်း သူ့မူကိုယ့်မူကို အလျှော့အတင်းလုပ်ပြီး ညှိနှိုင်းမှသာ ကောင်းမွန်တဲ့ရလဒ်၊ နှစ်ဦးနှစ် ဖက်အတွက် Win Win Solution ရရှိမှာ ဖြစ်ပါတယ်၊ ငြမ်းချမ်းရေးလုပ်ငန်းစဉ်ဟာ တစ်ဦးတစ်ယောက်တည်း တစ်ဖွဲ့ တစ်စည်းတည်း တဘက်တည်းနဲ့ ဆောင်ရွက်တာ မရနိုင်သလို ထိုက်သင့်တဲ့ ပါဝင်သင့်တဲ့ အဖွဲ့အစည်းတွေ များများ ပါဝင်လာနိုင်ရေးကိုလည်း မိမိတို့ စီစဉ်ဖန်တီးပေးဖို့ လိုအပ်ပါတယ်”ဟု နောက်ဆုံးပိတ် မိန့်ခွန်း ပြောစဉ် ထည့်သွင်း ပြောသွားခဲ့သည်။

RCSS နှင့် NSPNC ဆွေးနွေးနေခြင်း

RCSS ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သည့် ကိုယ်စားလှယ်အဖွဲ့သည် ၂၀၂၂ ခုနှစ်၊ သြဂုတ် ၂၉ ရက်နေ့က နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့သည်။

ထို့နောက် နစက အဖွဲ့ဝင်များပါဝင်သော ဒုဗိုလ်ချုပ်ကြီးရာပြည့် ဦးဆောင်သည့် ကိုယ်စားလှယ်အဖွဲ့နှင့် RCSS ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သော ကိုယ်စားလှယ်အဖွဲ့တို့ သြဂုတ် ၃၀ ရက်မှ စက်တင်ဘာ ၁ ရက်နေ့အထိ ဆက် လက် ဆွေးနွေးခဲ့ကြသည်။

RCSS သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးထားသည့် ရှမ်းလက်နက်ကိုင် အဖွဲ့ဖြစ်သည်။

CNI International News

မော်စကို၊ စက်တင်ဘာ ၁

သမိုင်းဝင်ကာလတစ်ခုကို အချိန်ကြာမြင့်စွာ ဖြတ်သန်းနေရသည့် ရုရှားနိုင်ငံအတွက် မိမိကိုယ်သာ အားကိုးစရာ ရှိတော့ကြောင်း နိုင်ငံခြားရေးဝန်ကြီး လာဗရော့လ်က ဩဂုတ် ၃၁ ရက်၌ ကျင်းပသည့် Znaiye ပညာရေး မာရသွန် (ဗဟုသုတ)ဟောပြောပွဲ မိန့်ခွန်း၌ ထည့်သွင်းပြောကြားခဲ့သည်ဟု တာ့စ်သတင်းဌာနက ရေးသားဖော်ပြသည်။

“ကျနော်တို့မြင်တဲ့ အတိုင်းပါပဲ။ ရုရှားရဲ့ အထူးစစ်ဆင်ရေး ရည်မှန်းချက်တွေကို အကောင်အထည်ဖော်တာကို အနောက်အုပ်စုက ကမ္ဘာနဲ့ချီပြီး ကျနော်တို့ အားပျော့သွားအောင် ရည်ရွယ်ထားတယ်ဆိုတာ ရှင်းရှင်းလင်းလင်း ပြသနေပါတယ်။ ဒီလို ရည်ရွယ် လုပ်ဆောင်တာဟာ ကျနော်တို့နိုင်ငံကို ယိုင်လဲစေဖို့ဆိုတာ အနောက်အုပ်စုနိုင်ငံ တွေက နိုင်ငံရေးသိပ္ပံပညာရှင်တချို့လည်း ဝန်ခံကြပါတယ်” ဟု လာဗရော့လ်က ပြောကြားခဲ့သည်။

“အခုဖြတ်သန်းနေရတဲ့ ခေတ်ကာလမှာ၊ အတိအကျပြောရရင် သမိုင်းတွင်မယ့် ကာလရှည်ကြီးမှာ … ကျနော်တို့ ဟာ ကိုယ့်ကိုယ်ကို အားကိုးဖို့ကလွဲလို့ တခြားမရှိဘူးဆိုတာ နားလည်ဖို့ ပြင်ဆင်ထားရမယ်” ဟု ၎င်းက ဆက် လက် ပြောကြားခဲ့သည်။

နေတိုး အထွေထွေအတွင်းရေးမှူးကိုတွေ့ရစဉ် (GETTY IMAGES)

အနောက်အုပ်စု၏ စေ့စပ်ညှိနှိုင်းနိုင်မှုနှင့် ကတိကဝတ်များ ထိန်းသိမ်းနိုင်စွမ်း ကင်းမဲ့ခြင်းကို ရုရှား ကောင်းစွာ သဘောပေါက်ကြောင်း၊ အနောက်အုပ်စုသည် မြောက်အတ္တလန္တိတ်စစ်စာချုပ်(နေတိုး)အဖွဲ့ကို အရှေ့ဘက်သို့ ချဲ့ထွင်ရန်နှင့် လုံခြုံရေးမူဝါဒများကို မလိုက်နာဘဲ အမှိုက်ပုံးထဲ ထည့်ခဲ့ကြကြောင်း လာဗရော့လ်က အလေးပေး ပြောကြားခဲ့သည်။

“အမေရိကန်နဲ့ သူ့ရဲ့ ဥရောပမဟာမိတ်တွေ၊ တခြားမဟာမိတ်တွေ ချိုးဖောက်ခဲ့ကြတဲ့ ကုလသမဂ္ဂ ပဋိညာဉ် စာတမ်းပါ အခြေခံမူတွေ၊ အချုပ်အခြာအာဏာ တန်းတူညီမျှမှုတွေကို ကျနော်တို့က လေးစားလိုက်နာပြီးတော့ ရှေ့ဆက်ရမယ့် အစီအစဉ်တွေကို ချဲ့ထွင်ဆောင်ရွက်သွားမှာပါ” ဟု ၎င်းက ထပ်လောင်း ပြောကြားခဲ့သည်။

“ရုရှားဆန့်ကျင်ရေး၊ ရုရှားမုန်းတီးရေး ကိုင်စွဲပြီး နိုင်ငံရေးပင်မ ရေစီးကြောင်းထဲ နေ့စဉ် ဖိအားတွေရှိနေပေမယ့် ကျနော့်ဘက်မှာ ကုလသမဂ္ဂပဋိညာဉ် စာတမ်းတင်မကဘဲ ကျနော်တို့နဲ့အတူ ရပ်တည်ပေးတဲ့ နိုင်ငံတွေ အုပ်စုလိုက် ရှိပါသေးတယ်” ဟု လာဗရော့လ်က ပြောကြားရင်း ၎င်း၏မိန့်ခွန်းကို နိဂုံးချုပ်ခဲ့သည်။

Source: တာ့စ်သတင်းဌာန

CNI News

၂၀၂၂ ခုနှစ်၊ စက်တင်ဘာ ၁

ကချင်လွတ်လပ်ရေးတပ်မတော် (KIA)၊ ‌ဒေသကာကွယ်ရေးတပ် (PDF) တို့ အနေဖြင့် စစ်တပ်ကို မတိုက်ဘဲ ရှမ်းနီအမျိုးသားများတပ်မတော်(SNA)အား ဦးတည်တိုက်ခိုက်လာနေကြောင်း SNA မှ ပြောခွင့်ရပုဂ္ဂိုလ် ဗိုလ်မှူးကြီး စိုင်းအောင်မိန်းက CNI သတင်းဌာနသို့ ပြောသည်။

ရှမ်းနီမျိုးနွယ်စုများ နေထိုင်ရာဒေသတွင် KIA မှ ဦးဆောင်၍ တိုက်ပွဲဖော်ဆောင်လာကြောင်း၊ ရှမ်းနီမျိုးနွယ်စု အလုံးစုံ ပျက်သုဉ်းရေးကို လုပ်ဆောင်ခြင်းဖြစ်ကြောင်း ၎င်းက ပြောသည်။

ဗိုလ်မှူးကြီးစိုင်းအောင်မိန်းက “KIA နဲ့ KIA၊ PDF တွေက စစ်ကောင်စီကို မတိုက်ဘဲနဲ့ ကျ‌နော်တို့ SNA ကို ဦးတည် ပြီး တိုက်ခိုက်နေတာက ဘာကြောင့်လဲဆိုလို့ရှိရင် ကျနော်တို့ SNA ထိန်းချုပ်နယ်မြေတွေ နံပါတ်တစ် အချက်ပေါ့ ဗျာ၊ ကျနော်တို့ SNA ထိန်းချုပ်နယ်မြေတွေ ရေပေါ်ရေအောက်၊ မြေပေါ်မြေအောက် သယံဇာတပစ္စည်းတွေ ကြွယ် ဝ နေတယ်၊ ဒီဟာတွေကို KIA က ထိုးဖောက် ဝင်ရောက်ချင်နေတာ ကြာပြီဗျ။ ကြာတဲ့အခါကြတော့ သူတို့က အခု နိုင်ငံရေး အကျပ်အတည်းကာလမှာ PDF ကို အသုံးချပြီးတော့ ဝင်ရောက်လာတာ ဖြစ်တယ်၊ ဒါက တစ်ချက်။ နောက်တစ်ချက်ကြတော့ သူတို့ အခုတိုက်ပွဲ ပုံဖော်နေတဲ့ နေရာတွေ အကုန်လုံးက ရှမ်းနီမျိုးနွယ်စုတွေ နေထိုင်တဲ့ ဒေသတွေနဲ့ ကျနော်တို့ ထိန်းချုပ်နယ်မြေတွေမှာပဲ KIA က ဦးဆောင်ပြီး တိုက်ပွဲတွေ ပုံဖော်နေတယ်၊ ဒါက ဘာလဲ ဆိုလို့ရှိရင် သေကြေထိခိုက်ဒဏ်ရာရ မြို့ရွာတွေ ပျက်စီး၊ ဒေသပျက်စီး၊ စစ်ဘေးစစ်ဒဏ်ခံရဆိုတဲ့ ကိစ္စတွေ အကုန် လုံးကို ကျနော်တို့ ရှမ်းနီမျိုးနွယ်စုတွေနဲ့ ရှမ်းနီမျိုးနွယ်စုတွေ အများဆုံးနေထိုင်တဲ့ ‌ဒေသကလူတွေပဲ ခံရစေ၊ သူတို့ ကချင်တွေ ရှိတဲ့ နေရာမှာ ဒီဒုက္ခ၊ ဒုက္ခတွေ၊ စစ်ဘေးစစ်ဒဏ်တွေ မခံရစေနဲ့ ဆိုတဲ့ ပုံစံမျိုးကို ဦးတည်ထားသလို ရှမ်းနီမျိုးနွယ်စုအားလုံး အလုံးစုံပျက်သုဉ်းရေးကို သူတို့ ဦးတည်ပြီးတော့မှ လုပ်ကိုင်ဆောင်ရွက်နေတယ်လို့လည်း ပြောလို့ ရပါတယ်” ဟု CNI သတင်းဌာနသို့ ပြောသည်။

ဗန်းမောက်မြို့အတွင်းကို တွေ့ရစဉ်

ဩဂုတ်လ ၃၁ ရက် နံနက်ပိုင်းက ဗန်းမောက်မြို့နယ် အရှေ့ကုန်းရွာကို KIA၊ PDF ပူးပေါင်းတပ်နှင့် SNA တို့ တိုက်ပွဲ ဖြစ်ပွားခဲ့ကြောင်း သိရသည်။

လက်ရှိ ဗန်းမောက်မြို့နယ်တွင် KIA၊ PDF တို့က ကျေးရွာတစ်ရွာကို လူ ၅ ယောက်ပေးရန် တောင်းခံနေကြောင်း သတင်းထွက်ပေါ်နေသော်လည်း CNI အနေဖြင့် သီးခြား အတည်မပြုနိုင်သေးပေ။

ဗန်း‌မောက်မြို့နယ်တွင် ဖြစ်ပွားနေသည့် တိုက်ပွဲနှင့် ပတ်သက်၍ မိမိတို့ အနေဖြင့် မကြားမိသေးကြောင်း KIA မှ ပြန်ကြားရေးတာဝန်ခံ ဗိုလ်မှူးကြီးနော်ဘူက CNI သတင်းဌာနသို့ ပြောသည်။

ဗိုလ်မှူးကြီးနော်ဘူက “ကျနော်တို့ အခုလောလောဆယ်တော့ SNA နဲ့ တိုက်ပွဲဖြစ်တယ်ဆိုတာတော့ မကြားမိဘူး ခင်ဗျ၊ အဲဒါတော့ ကျနော်တို့တော့ မကြားမိဘူး။ စစ်ကိုင်းဖက်ခြမ်းမှာပါ၊ စစ်ကိုင်းနယ်စပ်ဖက်မှာပေါ့နော်၊ ဆို တော့ အခုလောလောဆယ်တော့ ကျနော်တို့ဆီမှာ ဘာမှ သတင်းက သူတို့ တင်ပြတာ မရှိသေးဘူး။ ကျနော်တို့ လည်း အဲဒီဟာ အသေးစိတ်ကတော့ ဘာမှမသိဘူး။ သတင်းအစအနတောင်မှ အခုလိုက်လို့ မရသေးဘူး” ဟု ပြောသည်။

ရှမ်းနီအမျိုးသားများတပ်မတော်(SNA)ကို တွေ့ရစဉ် 

ပြီးခဲ့သည့် ဩဂုတ် ၈ ရက်နေ့က ဖားကန့်မြို့နယ်၊ ဆယ်ဇင်းကျေးရွာအနီးရှိ SNA ၏ ရှေ့တန်း စခန်းတစ်ခု ကို KIA၊ PDF ပူးပေါင်းတပ်ဖွဲ့က ဝင်ရောက် တိုက်ခိုက်ခဲ့သည်။

အလားတူ ဩဂုတ် ၂၃ ရက်နေ့ကလည်း ဗန်းမောက်မြို့နယ် နမ့်သောင်ကျေးရွာအနီးရှိ SNA ၏ စခန်းတစ်ခုကို KIA၊ PDF ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ပြီး နှစ်ဘက်စလုံးထိခိုက်ကျဆုံးမှုများ ရှိခဲ့ကြောင်း သိရသည်။

ရှမ်းနီအမျိုးသားများ တပ်မတော်(SNA)သည် စစ်ကိုင်းတိုင်းဒေသကြီးတွင် ပါဝင်နေသည့် မော်လိုက်ခရိုင်၊ ကလေး ခရိုင်၊ ခန္တီးခရိုင်၊ ကသာခရိုင်၊ တမူးခရိုင်နှင့် ကချင်ပြည်နယ်အတွင်း ပါဝင်နေသော ဗန်းမော်ခရိုင်၊ မြစ်ကြီးနားခရိုင်၊ မိုးညှင်းခရိုင်၊ မိုးကောင်း ဒေသတို့ကို စုစည်း၍ ရှမ်းနီပြည်နယ် ပြန်လည်ရရှိရေး ကြိုးပမ်း နေသည့် တိုင်းရင်းသား လက်နက်ကိုင်အဖွဲ့ ဖြစ်သည်။

CNI International News

နယူးယောက်၊ စက်တင်ဘာ ၁

နယူးယောက်မြို့၏ တိုင်းမ်ရင်ပြင် (Times Square) တွင် တောက်ပသော မီးရောင်များနှင့် အီလက်ထရောနစ် ကြော်ငြာဘုတ်များအကြား လူစည်ကားရာ လမ်းဆုံများ၌ မြို့အာဏာပိုင်များက ‘သေနတ်ကင်းမဲ့ဇုန်’ ဟု ရေး ထားသည့် ဆိုင်းဘုတ်များကို စိုက်ထူလိုက်ကြကြောင်း စက်တင်ဘာ ၁ ရက်တွင် အေပီသတင်းဌာနက ရေးသား ဖော်ပြသည်။

စက်တင်ဘာ ၁ ရက်တွင် စတင် အသက်ဝင်သည့် နယူးယောက်ပြည်နယ် ဥပဒေသစ်အရ သေနတ်ကိုင်ဆောင်ခွင့် ကို ပန်းခြံများ၊ ဘုရားကျောင်းများ၊ ပြဇာတ်ရုံများ အပါအဝင် ထိလွယ်ရှလွယ်သော အများပြည်သူဆိုင်ရာ နေရာ များမှာ တားမြစ်လိုက်ပြီ ဖြစ်သည်။

ပြီးခဲ့သည့် ဇွန်လတွင် အမေရိကန် တရားရုံးချုပ်က သေနတ်ကိုင်ဆောင်ခွင့်နှင့်ပတ်သက်၍ စီရင်ဆုံးဖြတ်ခဲ့ ပြီးသည့်နောက် ယခုကဲ့သို့ တင်းကြပ်သည့်အစီအမံများကို ချမှတ်ကျင့်သုံးလာခဲ့သည်။

သေနတ်ကိုင်ဆောင်ခွင့် တားမြတ်သည့် ဆိုင်းဘုတ်နှင့်အတူ တိုင်းမ်ရင်ပြင်ရှိ လမ်းမ(ဓါတ်ပုံ-အေပီ)

သေနတ်ကိုင်ဆောင်ခွင့်လျှောက်ထားသူများသည် သင့်လျော်သောအကြောင်းပြချက် ခိုင်လုံရန် လိုအပ်မည် ဖြစ်သည်။

အမေရိကန်နိုင်ငံတွင် နယူးယောက်ပြည်နယ်သည်လည်း အထက်တရားရုံး၏တားမြစ်ချက်အရ သေနတ် ကိုင်ဆောင်ခွင့်ဆိုင်ရာဥပဒေ ပြဋ္ဌာန်းထားသော ဆယ်ဂဏန်းမျှရှိသည့် ပြည်နယ်များစာရင်းထဲတွင် ပါဝင်သွားခဲ့ သည်။

ယခုအစီအမံသစ်နှင့်စပ်လျဉ်း၍ မိမိနှင့်ပြည်နယ်လွှတ်တော်မှ ဒီမိုကရက်တစ်ပါတီဝင်အမတ်များသည် လာမည့် ရက်သတ္တပတ်တွင် အရေးယူကိုင်တွယ်မှုများ ဆောင်ရွက်သွားတော့မည်ဖြစ်ကြောင်း ပြည်နယ်အုပ်ချုပ်ရေးမှူး ကာသီဟိုချွဲက ဩဂုတ် ၂၆ ရက်တွင် ပြောကြားခဲ့သည်။ ယင်းသို့ အရေးယူသွားမည့်အကြောင်းရင်းမှာ ပြည်နယ် အတွင်း ပုန်းလျှိုးကွယ်လျှိုး လက်နက်ကိုင်သူ၏အန္တရာယ်မှ မိမိတို့နိုင်ငံသားများကို ဥပဒေဖြင့် အကာအကွယ် ပေးနိုင်ရန်ဖြစ်ကြောင်း ၎င်းက ဆက်လက်ပြောကြားခဲ့သည်။

နယူးယောက် မြို့တော်ဝန် အဲရစ်အဒမ်ကို “Gun Free Zone” အားအကောင်အထည်ဖော်မှုဆိုင်ရာ သတင်းစာရှင်းလင်းပွဲတွင် တွေ့ရစဉ်(ဓါတ်ပုံ-အေပီ)

သို့သော် သေနတ်ကိုင်ဆောင်သူများဆိုင်ရာဥပဒေသည် ရှုပ်ထွေးမှုများရှိနေခဲ့ပြီး တရားရုံးတွင် စိန်ခေါ်စရာလည်း ဖြစ်လာခဲ့သည်။ သေနတ်ကိုင်ဆောင်သူအချို့က ယင်းဥပဒေသည် ဖွဲ့စည်းပုံအခြေခံဥပဒေပါ အခွင့်အရေးများကို လွဲမှားစွာ ကန့်သတ်ထားကြောင်း စောဒကတက်ခဲ့ကြသည်။

“သူတို့က သေနတ်နဲ့ အကြမ်းဖက်မှုတွေကို ကိုင်တွယ်ဖြေရှင်းနိုင်ခြေ နည်းပုံရပါတယ်။ အဲဒီတော့ လူတွေ သေနတ်မကိုင်နိုင်အောင် တားဆီးဖို့ ဥပဒေရေးဆွဲထားပုံလည်း ရတယ်။ တကယ်လို့ သေနတ်ကိုင်တဲ့သူတွေဟာ တရားဥပဒေကို လေးစားလိုက်နာပြီး ထက်မြက်တဲ့နိုင်ငံသားတွေ ဖြစ်နေရင်တောင်မှ တရားရုံးချုပ်က သူတို့ရဲ့ရပိုင်ခွင့် ပေးအပ်ရမှာဖြစ်ပါတယ်” ဟု ဂျွန်သန်ကော်ဘက် (Jonathan Corbett) က ဝေဖန်ခဲ့သည်။

၎င်းသည် ဘရွတ်ကလင်းမှ ရှေ့နေတစ်ဦးဖြစ်ပြီး ယခုဥပဒေအတွက် တရားရုံးတွင် စိန်ခေါ်သူအများအပြားထဲမှ တစ်ဦးဖြစ်သည်။

Source: AP

CNI International News

ရောမ၊ စက်တင်ဘာ ၁

ယူကရိန်းသမ္မတ ဇာလန်းစကီးသည် အီတလီနိုင်ငံ၊ တက်ကန်နီ (Tuscany) ဒေသရှိ ၎င်း၏ဇိမ်ခံအိမ်ကို ရုရှား နိုင်ငံသားများထံ ငှားရမ်းခဲ့ကြောင်း အီတလီပြည်တွင်း၌ ထုတ်ဝေသည့် အီတီရန်နို (II Tirreno) သတင်းစာမှ ဩဂုတ် ၃၁ ရက်တွင် ရေးသားခဲ့သည်ဟု အာရ်တီသတင်းဌာနက ဖော်ပြသည်။

တစ်ချိန်တည်းမှာပင် ဇာလန်းစကီးသည် ရုရှားခရီးသွား ဧည့်သည်များ၏ ပြည်ဝင်ခွင့်(ဗီဇာ)များကို ငြင်းပယ်ရန် ဥရောပသမဂ္ဂ (EU) အုပ်စုဝင်နိုင်ငံများထံသို့လည်း တောင်းဆိုခဲ့သည်။

လန်ဒန်မြို့ နေရပ်လိပ်စာ ပေးထားသည့် ရုရှားလူမျိုး စုံတွဲတစ်တွဲသည် ပြီးခဲ့သည့် ဩဂုတ်လ၌ ဇာလန်းစကီး ပိုင်ဆိုင်သည့် နေအိမ်ကို ယူရိုငွေ ၅၀,၀၀၀ (၅၀,၂၃၇ ဒေါ်လာ)ဖြင့် ငှားရမ်းနေထိုင်ခဲ့ကြောင်း အီတီရန်နို သတင်းစာက ဆက်လက် ရေးသားထားသည်။

သတင်းထောက်များ အီတလီရှိ ဇာလန်းစကီးနေအိမ်ရှေ့မှာ သတင်းတင်ဆက်နေစဉ်(Reuters)

အီတလီနိုင်ငံ၊ ပင်လယ်ကမ်းခြေမြို့လေးဖြစ်သော ဖော်တစ်တီးမာရမီ (Forte dei Marmi)တွင် တည်ရှိသော ဇိမ်ခံရိပ်သာနေအိမ်ကို ဇာလန်းစကီးက ယူရိုငွေ ၄ သန်းဖြင့် ဝယ်ယူခဲ့ကြောင်း၊ ထိုစဉ်က သရုပ်ဆောင်အလုပ် လုပ်ကိုင်နေဆဲ အချိန်ဖြစ်ကြောင်း သိရသည်။

ငှားရမ်းနေထိုင်ခဲ့ကြသည့် စုံတွဲ၏ လူမှုကွန်ရက်ပေါ် တင်ထားသော ဓာတ်ပုံများသည် ဇာလန်းစကီး ပိုင်ဆိုင်သည့် နေအိမ်တွင် ရိုက်ကူးထားခြင်းဖြစ်ကြောင်း အီတီရန်နိုသတင်းစာက အတည်ပြုခဲ့သည်။

အခြား အီတလီ သတင်းစာ တစ်စောင်ဖြစ်သည့် ကိုရေးဒယ်လာစီရာတွင်လည်း “အိမ်ငှားတွေက ရုရှားလူမျိုးတော့ မဟုတ်ပါဘူး။ ဒါပေမယ့် သူတို့ကိုယ်ရေးကိုယ်တာဖြစ်လို့ ကျနော့်ကို တားမြစ်ထားတဲ့အတွက် ထုတ်ပြောလို့ မရပါဘူး” ဟု ၎င်းနေအိမ်ကိစ္စ စီမံနေသည့် အိမ်ခြံမြေ အကျိုးဆောင်သမား၏ ပြောကြားချက်ကို ဖော်ပြထားသည်။

၎င်းအိမ်ငှားများသည် ရုရှားနွယ်ဖွားများ ဖြစ်နိုင်သော်လည်း မူလနေရပ်လိပ်စာမှာ အင်္ဂလန်ဖြစ်ကြောင်း အဆိုပါ သတင်းစာက ဆက်လက် ရေးသားထားသည်။

 ဇာလန်းစကီးနဲ့ ဉရောပခေါင်းဆောင်များကိုတွေ့ရစဉ် (GETTY IMAGES)

ရုရှားတပ်ဖွဲ့ဝင်များ ပြီးခဲ့သည့် ဖေဖော်ဝါရီလ၌ ယူကရိန်းသို့ ကျူးကျော်လာပြီးကတည်းက ဇာလန်းစကီးသည် ရုရှားခရီးသွား ဧည့်သည်များကို ခရီးသွားဗီဇာ ပိတ်ပင်ရန် EU နိုင်ငံများကို တိုက်တွန်းခဲ့သည်။

ရုရှားပြည်သူများအနေဖြင့် ၎င်းတို့အတွေးအခေါ် အယူအဆ မပြောင်းမချင်း သူတို့၏ သီးခြားကမ္ဘာထဲတွင်သာ နေထိုင်သင့်ကြောင်း ဇာလန်းစကီးက ဩဂုတ်လ အစောပိုင်းတွင် ဝါရှင်တန်ပို့စ် မီဒီယာသို့ ပြောကြားခဲ့သည်။

ထို့ပြင် ယခင်မတ်လကလည်း ဇာလန်းစကီးက “ရုရှားလူမျိုးများ ပိုင်ဆိုင်သော အိမ်ခြံမြေနှင့် လူမှုကွန်ရက် account များကို ပိတ်ပင်သွားရန်” အီတလီအစိုးရကို တောင်းဆိုခဲ့သေးသည်။

မော်စကို၏ ယူကရိန်း စတင်ကျူးကျော်စဉ်ကပင် EU နိုင်ငံများနှင့် ရုရှားတို့အကြား လေယာဉ်ပျံသန်း ပြေးဆွဲခြင်း အားလုံး ရပ်ဆိုင်းခဲ့ပြီး EU တစ်နိုင်ငံချင်းနှင့် ရုရှားတို့အကြား ဗီဇာကိစ္စ ညှိနှိုင်းဆောင်ရွက်ခြင်းများကို ဩဂုတ် ၃၁ ရက်တွင် ဖြတ်တောက်ခဲ့သည်။

Source: အာရ်တီသတင်းဌာန