CNI International News

ကိယက်ဗ်၊ စက်တင်ဘာ ၉၀

အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ယူကရိန်းနိုင်ငံ၊ ကိယက်ဗ်မြို့တော်သို့ ရောက်ရှိလာစဉ် အတွင်း ယူကရိန်းတပ်ဖွဲ့များက နိုင်ငံ၏ အရှေ့ပိုင်းနှင့်တောင်ပိုင်း နယ်မြေ အများအပြားကို ရုရှားဘက်ထဲမှ ပြန်လည် သိမ်းပိုက်နိုင်ခဲ့ခြင်းအတွက် ချီးကျူးစကား ပြောကြားခဲ့ကြောင်း ရိုက်တာသတင်းဌာနက စက်တင်ဘာ ၉ ရက်နေ့တွင် ရေးသားဖော်ပြသည်။

ယူကရိန်းသမ္မတ ဗိုလိုဒီမီယာ ဇာလန်းစကီးက စက်တင်ဘာ ၈ ရက်က ပြောကြားခဲ့သော ဗွီဒီယိုမိန့်ခွန်းထဲတွင် “ယူကရိန်းတပ်ဖွဲ့များသည် ရုရှားဘက်မှ ဆယ်ဂဏန်းနှင့်ချီ၍ အခြေချ နေထိုင်လာမှုများကို နှင်ထုတ်နိုင်ခဲ့ ကြောင်း၊ အရှေ့ဘက်နှင့် တောင်ဘက်ရှိ နယ်မြေ စတုရန်းကီလိုမီတာ ၁ ထောင် (၃၈၅ မိုင်) ကို စက်တင်ဘာ ၁ ရက်မှစ၍ ပြန်သိမ်းနိုင်ခဲ့ကြောင်း” ထည့်သွင်းပြောကြားခဲ့သည်။

ယူကရိန်းတပ်သားများက နိုင်ငံ၏ ဒုတိယအကြီးဆုံးဖြစ်သော ခါကိဗ်မြို့အနီး အရှေ့ပိုင်း ဘာလက်ကလီယာမြို့ကို ပြန်သိမ်းနိုင်ခဲ့ကြောင်း ၎င်း၏ ဗွီဒီယိုမိန့်ခွန်းထဲတွင် ဇာလန်းစကီးက ပြောကြားခဲ့သည်။

ဇာလန်းစကီးနဲ့ ဘလင်ကင်ကို တွေ့ရစဉ်

ယူကရိန်းစစ်သတင်း စုစည်းသူတစ်ဦး လွှင့်တင်ထားသော ဗွီဒီယိုဖိုင်တစ်ခုထဲတွင် ရုရှားနိုင်ငံသားများသည် ထရပ်ကားများ၊ အမြောက်များနှင့် ခဲယမ်းမီးကျောက်များ၏ အနောက်တွင် ကျန်ရစ်နေခဲ့ကြောင်း တွေ့ရသည်။

ဘာလက်ကလီယာမြို့ကို ယူကရိန်းတို့ ဝိုင်းထားရန် ကြိုးပမ်းမှုကို ရုရှားတပ်များက တွန်းလှန်နိုင်ခဲ့ကြောင်း၊ ထိုမြို့ မှာ ရုရှားလက်ထဲတွင် ကျန်ရှိနေသေးကြောင်း ရုရှားလိုလားသူ ဗီတလေဂန်ချက် (Vitaly Ganchev) က ရုရှား ရုပ်သံ သတင်းဌာနတစ်ခုသို့ ပြောကြားခဲ့သည်။

ရိုက်တာအနေဖြင့် စစ်မြေပြင်အကြောင်း လွှင့်တင်နေသည့် လူမှုကွန်ရက် account များကို သီးခြား အတည်ပြု နိုင်ခြင်း မရှိပါ။

အစောပိုင်းတွင် ယူကရိန်းတပ်များသည် ရုရှားနယ်နိမိတ်မျဉ်း၏ အနောက်ဘက် ကီလိုမီတာ ၅၀ (မိုင် ၃၀) အထိ ချီတက်လာခဲ့ပြီး ခါကိဗ်ဒေသရှိ ကျေးရွာ ၂၀ ကျော် ပြန်သိမ်းနိုင်ခဲ့သည်ဟု ယူကရိန်း ဗိုလ်မှူးချုပ် အိုလက်ဆေး ဂရိုမော့ဗ် (Oleksiy Gromov) က ပြောကြားခဲ့သည်။

ယူကရိန်းတပ်ဖွဲ့၀င် တစ်ဦးက နိုင်ငံပိုင်နက်နယ်မြေကို ကြည့်နေစဉ်

ဒဏ်ရာရနေသူများကို ကယ်ထုတ်ရန် ရုရှားတပ်များ ကြိုးစားနေကြောင်း ယူကရိန်းစစ်တပ်က စက်တင်ဘာ ၉ ရက် အစောပိုင်းတွင် သတင်းထုတ်ပြန်ခဲ့သည်။ ခါကိဗ်မြို့၏ အနောက်တောင်ဘက် ဘိုရိုဒိုယာစကီကျေးရွာနှင့် အရှေ့တောင်ဘက် ဗီခူဗာတာကာ ကျေးရွာများရှိ ရုရှား၏ စစ်လက်နက်များလည်း ပျက်စီးသွားခဲ့သည်။

ယူကရိန်းတပ်ဖွဲ့ဝင်များ၏ အခြေအနေမှာ တိုးတက်မှုရှိကြောင်း၊ လိုအပ်ချက်ရှိနေသမျှ ကာလပတ်လုံး အမေရိကန်အနေဖြင့် အထောက်အပံ့ ပေးသွားမည်ဖြစ်ကြောင်း ဘလင်ကင်က ပြောကြားခဲ့သည်။

“တန်ပြန်ထိုးစစ်နဲ့ပတ်သက်ပြီး ကျယ်ကျယ်ပြန့်ပြန့် ဖြစ်ပြီဆိုတာ ပြောဖို့ စောပါသေးတယ်။ ဒါပေမယ့် အထူး သဖြင့် ခါဆွန်ဒေသတဝိုက်မှာ လက်တွေ့အားဖြင့် တကယ်တိုးတက်နေတယ်ဆိုတာ တွေ့ရပါတယ်။ အရှေ့ ဘက်ခြမ်း ဒွန်ဘတ်စ်မှာလည်း စိတ်ဝင်စားစရာ တိုးတက်မှုတချို့ ရှိနေပါတယ်” ဟု ဘလင်ကင်က သတင်း ထောက်များကို ပြောကြားခဲ့သည်။

Source: Reuters

CNI International News

ပြုံယမ်း၊ စက်တင်ဘာ ၉

အမေရိကန်ကို တန်ပြန်ဖို့ လိုအပ်သည့် နျူကလီးယားလက်နက်များကို မည်သည့်အခါမှ စွန့်လွှတ်မည် မဟုတ်ကြောင်း မြောက်ကိုရီးယားခေါင်းဆောင် ကင်မ်ဂျုံအန်းက ပြောကြားခဲ့သည်ဟု ၎င်း၏နိုင်ငံပိုင် မီဒီယာမှနေ၍ စက်တင်ဘာ ၉ ရက်နေ့တွင် သတင်းထုတ်လွှင့်ခဲ့သည်။

အမေရိကန်သည် မြောက်ကိုရီးယား၏ ကာကွယ်ရေးကို အားနည်းစေပြီး နောက်ဆုံးတွင် ၎င်းအစိုးရ ပြိုလဲသွား သည်အထိ တွန်းအားပေးနေကြောင်း ကင်မ်ဂျုံအန်းက စွပ်စွဲခဲ့သည်ဟု အေပီသတင်းမှ ဖော်ပြခဲ့သည်။

မြောက်ကိုရီးယားနိုင်ငံ၏ (အမည်ခံ) လွှတ်တော်ထဲ၌ စက်တင်ဘာ ၈ ရက်တွင် ကင်မ်ဂျုံအန်း မိန့်ခွန်းပြောကြားခဲ့ ပြီးနောက် နျူကလီးယား လက်နက် အသုံးပြုမှုဆိုင်ရာ ဥပဒေများကို အတည်ပြုခဲ့သည်။

ထိုဥပဒေများ အတည်ပြုခြင်းသည် မိမိတို့နိုင်ငံ၏ နျူကလီးယား အဆင့်အတန်းကို ခိုင်မာစေရန် ခြေလှမ်းတစ်ရပ် ဖြစ်ကြောင်း၊ ထိုသို့ လက်နက်များကို အပေးအယူလုပ်၍ ညှိနှိုင်းသွားမည် မဟုတ်ကြောင်း ၎င်းက ရှင်းလင်း ပြော ကြားခဲ့သည်။

အမေရိကန်နဲ့ တောင်ကိုရီးယား မဟာမိတ်ဖွဲ့မှု (GETTY IMAGES)

ထို့နောက် အဆိုပါဥပဒေတွင် မြောက်ကိုရီးယား စစ်တပ်အနေဖြင့် ရန်သူတပ်များကို နျူကလီးယား လက်နက်သုံး ၍ တိုက်ခိုက်ခြင်းဖြင့် အလိုအလျောက် လုပ်ဆောင်သွားနိုင်မည့် ပြဋ္ဌာန်းချက်လည်း ပါဝင်သည်။

မြောက်ကိုရီးယားကို တုံ့ပြန်ဖို့ အမေရိကန်နှင့်ပူးပေါင်း၍ စစ်ရေးလေ့ကျင့် အသက်သွင်းရန်၊ သမားရိုးကျ တိုက်ခိုက်မှု စွမ်းရည်ကို မြှင့်တင်ရန် ကြိုးပမ်းနေသည့် တောင်ကိုရီးယား၏ အစီအစဉ်များကိုလည်း ကင်မ်ဂျုံအန်းက အပြစ် တင် ဝေဖန်ခဲ့သည်။

တောင်ကိုရီးယား၏ လုပ်ရပ်သည် တင်းမာမှုများကို ပိုဆိုးစေပြီး အန္တရာယ်ကြီးလှသည့် စစ်ရေးဆောင်ရွက်မှုအဖြစ် ၎င်းက ဆက်လက် ပြောကြားခဲ့သည်။

ကင်မ်ဂျုံအန်းသည် ယခုတလော အမေရိကန်နှင့် အာရှမဟာမိတ်နိုင်ငံများကို နျူကလီးယား ပဋိပက္ခနှင့်စပ်လျဉ်း ၍ ခြိမ်းခြောက်မှုများ တိုးမြှင့်လုပ်ဆောင်နေသည်။

မြောက်ကိုရီးယားသည် မိမိပိုင်ဆိုင်ထားသော နျူကလီးယားလက်နက်များကို လက်မတွန့်ဘဲ သုံးစွဲသွားမည်ဟု သတိပေးထားသည်။

ကင်မ်ဂျုံအန်း နောက်ဆုံး ပြောကြားထားသော သဘောထား မှတ်ချက်များတွင် “နျူကလီးယား လက်နက်နှင့် ဒုံးကျည်များ အရှိန်မြှင့်လုပ်ဆောင်နေချိန်၌ ဒေသတွင်း တင်းမာမှုတိုးလာခြင်းကို အလေးပေး” ဖော်ပြခဲ့သည်။

Source: AP

CNI News

၂၀၂၂ ခုနှစ်၊ စက်တင်ဘာ ၉

၂၀၀၈ ဖွဲ့စည်းပုံအခြေခံဥပဒေတွင် မြန်မာနိုင်ငံအတွင်း နိုင်ငံခြားတပ်ဖွဲ့များကို အခြေစိုက်ခွင့်မပြုကြောင်း ပြဋ္ဌာန်း ထားသည့်အတွက် ဖွဲ့စည်းပုံအခြေခံဥပဒေကို ကျော်လွန်လုပ်ဆောင်၍မရကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

အရှေ့ဖျားစီးပွားရေးဖိုရမ်(EEF)ကို တက်ရောက်ရန် ရုရှားနိုင်ငံသို့ စက်တင်ဘာ ၄ ရက်မှ ၈ ရက်နေ့အထိ သွားရောက်ခဲ့စဉ်အတွင်း ရုရှားနိုင်ငံမှ RIA သတင်းဌာနနှင့် တွေ့ဆုံ မေးမြန်းခန်းတွင် ၎င်းက အထက်ပါအတိုင်း ဖြေကြားသွားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ မြန်မာနိုင်ငံမှာ နိုင်ငံခြားတပ်ဖွဲ့များ တပ်စွဲနေရာချထားရေးပေါ့လေ။ ဒါနဲ့ ပတ်သက်ပြီးတော့ ကျနော်တို့ရဲ့ အခြေခံ ဥပဒေမှာ ခွင့်ပြုထားတာမရှိဘူး။ အခြေခံဥပဒေကို ကျော်လွန်ပြီး လုပ်လို့တော့ မရဘူး။ အခြေခံဥပဒေ ဘောင် အတွင်းမှာပဲ အကောင်းဆုံးကို ဘယ်လိုပူးပေါင်းဆောင်ရွက်မလဲ ဆိုတာ နည်းလမ်းရှာရမှာဖြစ်ပါတယ်။ စခန်းချဖို့ တော့ ကျနော်တို့ မပေးထားပါဘူး။ဒါပေမယ့် ပူးပေါင်းဆောင်ရွက်မှုနယ်ပယ်တွေ၊ အခွင့်အလှမ်းတွေများသာရှိတယ် ဆိုတာလေးတော့ ကျနော်တွေ့ပါတယ်”ဟု ပြောသည်။

 ဗိုလ်ချုပ်မှူးကြီးမင်းအောင်လှိုင်နဲ့ RIA သတင်းဌာန အင်တာဗျူး လုပ်ကြစဉ်

ထို့နောက် မြန်မာနိုင်ငံနှင့် ရုရှားနိုင်ငံသည် ကာကွယ်ရေးဆိုင်ရာ ပူးပေါင်းဆောင်ရွက်မှုများကို ဆယ်စုနှစ် နှစ်စု ကျော် လက်တွဲခဲ့ပြီးဖြစ်ကြောင်း၊ ဆက်လက်၍ တိုးချဲ့ဆောင်ရွက်သွားရန် စီစဉ်ထားကြောင်း ၎င်းက ပြောသည်။

ဗိုလ်ချုပ်မှူးကြီးမင်းအောင်လှိုင်က “ မြန်မာနိုင်ငံနဲ့ ရုရှားနိုင်ငံနဲ့ကတော့ ကာကွယ်ရေးဆိုင်ရာ ပူးပေါင်းဆောင် ရွက်မှုက ဆယ်စုနှစ် နှစ်စုကျော် လောက်တော့ ဖြစ်သွားပြီး။ တော်တော်လေးလည်း အရှိန်အဟုန်လည်း ကျနော်တို့ ရပါတယ်။ တော်တော် လေးလည်း မြင့်မားပါတယ်။ ရုရှားနိုင်ငံရဲ့ ကာကွယ်ရေးအသုံးအဆောင် ပစ္စည်းတွေက တကယ်ကို အဆင့် အတန်းလည်း မြင့်ပါတယ်။ နိုင်ငံတော်ကာကွယ်ရေးအတွက်လည်း များစွာ အထောက်အကူရပါတယ်။ ကျနော် တို့လည်း အင်မတန် နှစ်ခြိုက်ပါတယ်။ ဆက်လက်ပြီးလည်း တိုးချဲ့ ဆောင် ရွက်သွားဖို့ စီစဉ်နေဆဲ ရှိကြောင်း ပြောလိုပါတယ်”ဟု ပြောသည်။

 ပူတင်နဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

မြန်မာနိုင်ငံတွင် နိုင်ငံခြားတပ်ဖွဲ့များ အခြေစိုက်ခွင့်မပြုကြောင်း ၂၀၀၈ ဖွဲ့စည်းပုံအခြေခံဥပဒေတွင် ပြဋ္ဌာန်းထား သည့်အတွက် နစကဥက္ကဋ္ဌ ပြောသွားသည်မှာ မှန်ကန်ကြောင်း နိုင်ငံရေးလေ့လာသုံးသပ်သူ ဦးရဲထွန်းက ပြော သည်။

ဦးရဲထွန်း “သူကလည်း ရုရှားခေါင်းဆောင်ကို နည်းနည်း မြှောက်ပြောထားတာ ရှိတာကိုး။ ကမ္ဘာ့ခေါင်းဆောင် ဖြစ်တယ်။ ကမ္ဘာ့တည်ငြိမ်ရေးအတွက် စောင့်ကြည့်ထိန်းကြောင်းနေတဲ့လူဖြစ်တယ် ဘာညာဆိုပြီးတော့ အဲလိုမျိုးတွေ ချီးမြှောက်ထားတော့ ဟိုဘက်ကလည်း မေးလို့နေမှာပေါ့။ ရုရှားရေတပ်စခန်းတွေ ဘာတွေ တောင်းဆိုရင် ဖွင့်ခွင့်ပြုမှာလားဆိုတာတွေ မေးလို့နေမှာပေါ့။အခုကတော့ သူဖြေလိုက်တဲ့ဟာက မှန်ပါတယ်။ သူကအခြေစိုက်ခွင့် ပြုမယ်လို့ ဖြေလိုက်ရင်တော့ ပြဿနာတက်မှာ ကျနော်တို့ အခြေခံဥပဒေမှာ နိုင်ငံခြား တပ်တွေ အခြေစိုက်ခွင့်မပြုဆိုတာ ပါပြီးသားလေ”ဟု ပြောသည်။

၂၀၀၈ ဖွဲ့စည်းပုံအခြေခံဥပဒေ ပုဒ်မ ၄၂ (ခ)တွင် နိုင်ငံတော်အတွင်း မည်သည့်နိုင်ငံခြားတပ်ဖွဲ့ကိုမျှ တပ်ချခွင့်မ ပြုဟု ပြဋ္ဌာန်းထားသည်။

နိုင်ငံကြီးတချို့သည် မြန်မာနိုင်ငံအတွင်းရှိ ကိုကိုးကျွန်းတွင် ရေတပ်စခန်း အခြေစိုက်ခွင့် ရရှိရေး ကြိုးပမ်းမှု များရှိကြောင်း ကမ္ဘာ့အရေးစောင့်ကြည့်သူများက ပြောသည်။

CNI International News

ကိယက်ဗ်၊ စက်တင်ဘာ ၈

ယူကရိန်းစစ်မျက်နှာတွင် ရုရှားတို့ နျူကလီးယား အသုံးပြုဖို့ ခြိမ်းခြောက်နေကြောင်း ယူကရိန်းစစ်ဦးစီးချုပ်က စက်တင်ဘာ ၇ ရက်တွင် သတိပေးခဲ့သည်ဟု ရိုက်တာသတင်းအရ သိရသည်။

အဆိုပါ သတိပေးမှုသည် ၎င်း၏ရှားရှားပါးပါး အများသိစေသည့် သဘောထား မှတ်ချက်လည်း ဖြစ်သည်။

ရုရှား၏ ခြိမ်းခြောက်မှုသည် အင်အားကြီးနိုင်ငံများ အကန့်အသတ်ဖြင့် နျူကလီးယားပဋိပက္ခ ဖန်တီးနိုင်ဖွယ် ရှိနေကြောင်း ယူကရိန်းစစ်ဦးစီးချုပ် ဗိုလ်ချုပ်ကြီး ဗယ်လာရီးလီးဇလူဇညယ်က ပြောကြားခဲ့သည်ဟု လွှတ်တော် အမတ် တစ်ဦးဖြစ်သူ မီခေလိုဇာဘရိုစကီး၏ ဆောင်းပါးထဲတွင် ထည့်သွင်း ရေးသားထားသည်။

အဆိုပါ ဆောင်းပါးကို ယူကရိန်းပိုင် သတင်းအေဂျင်စီ တစ်ခုဖြစ်သည့် Ukrinform က ဖော်ပြခဲ့သည်။

ရုရှား၏ နျူကလီးယား ထိပ်ဖူးကို သယ်ဆောင်လာစဉ် (EPA)

ထိုဆောင်းပါးထဲတွင် ယူကရိန်းစစ်ဦးစီးချုပ်ထံမှ ယနေ့ကာလအထိ စစ်နှင့်ပတ်သက်၍ အသေးစိတ် အကဲဖြတ်ချက်အများဆုံး ပါရှိပြီး ယူကရိန်းတပ်၏ ပြတ်သားသည့် သဘောထားများ ထင်ဟပ်နေခဲ့သည်။

“ရုရှားစစ်တပ်က နည်းဗျူဟာမြောက် နျူကလီးယား လက်နက်တွေကို တချို့အခြေအနေတွေမှာ ထုတ်သုံးမယ် ဆိုပြီး တိုက်ရိုက် ခြိမ်းခြောက်တာတွေ ရှိပါတယ်” ဟု ဇလူဇညယ်က ပြောကြားခဲ့သည်။

အကန့်အသတ်ဖြင့် ဖြစ်ပွားလာနိုင်သည့် နျူကလီးယား ပဋိပက္ခတွင် ကမ္ဘာ့ထိပ်တန်းနိုင်ငံများ တိုက်ရိုက် ပါဝင် ပတ်သက်နိုင်ခြေမရှိဟု လုံးဝငြင်းဆိုရန် မဖြစ်နိုင်ပေ။

ယခင်ကလည်း နျူကလီးယား (သို့မဟုတ်) ဓာတုလက်နက် သုံးစွဲနိုင်ခြေ ထင်ကြေးများကိုလည်း မော်စကိုက ငြင်းဆိုခဲ့ပြီး ဖြစ်သည်။

စစ်ပွဲရေစီးကြောင်း အပြောင်းအလဲအတွက် မော်စကို၏ လက်နက်များနှင့် တိုက်ခိုက်မှု အကွာအဝေးတို့ကို ယူကရိန်းက ဟန်ချက်ညီညီ တုံ့ပြန်နိုင်ဖို့ လိုအပ်ကြောင်း ဗိုလ်ချုပ်ကြီး ဇလူဇညယ်နှင့် ဆောင်းပါးရှင်း ဇာဘရိုစကီးတို့က သုံးသပ်ပြခဲ့သည်။

ယူကရိန်းတပ်ဖွဲ့ကိုတွေ့ရစဉ် (GETTY IMAGES)

“ဗျူဟာမြောက် အခြေအနေမှာ အခြေခံအကျဆုံး အပြောင်းအလဲဖြစ်ဖို တစ်ခုတည်းသော လမ်းကြောင်းကတော့ လာမယ့် ၂၀၂၃ ခုနှစ် စစ်ဆင်ရေးတွေကျရင် ယူကရိန်းတပ်တွေ တန်ပြန်တိုက်ခိုက်မှု အဆက်မပြတ် လုပ်တာမျိုး (ဒါမှမဟုတ်) စံနမူနာပြ တိုက်ခိုက်တာမျိုး တပြိုင်တည်း လုပ်ပြနိုင်မှ ရမယ်” ဟု ၎င်းတို့က ဆက်လက် သုံးသပ်ပြသည်။

ရုရှားပိုင်နက်ထဲရှိ ပစ်မှတ်များကို ထိမှန်ရန် သုံးစွဲခွင့်မရှိသော တာဝေးပစ် လက်နက်များကို ကိယက်ဗ် အစိုးရထံသို့ ထောက်ပံ့ခဲ့ကြောင်း အမေရိကန်က ပြောခဲ့ပြီး ဖြစ်သည်။

ပြီးခဲ့သည့်လ၌ ခရိုင်းမီးယားကျွန်းဆွယ်ရှိ ရုရှားလေတပ် အခြေစိုက် စခန်းများကို ဒုံးကျည်ဖြင့် ထိမှန်ပျက်စီးစေခဲ့ ခြင်းအတွက် မိမိတို့တာဝန်ရှိကြောင်း ပထမဆုံး ယူကရိန်းဘက်မှ အသိအမှတ်ပြုသည့် အချက်လည်း ယခု ဆောင်းပါးထဲတွင် ဖော်ပြထားသည်။

ရုရှားတပ်ဖွဲ့ကိုတွေ့ရစဉ် (GETTY IMAGES)

လက်ရှိ ကာလအထိ ခရိုင်းမီးယား ပေါက်ကွဲမှု ဖြစ်စဉ်များ၌ ယူကရိန်း ပါဝင်ပတ်သက်မှုကို ငြင်းဆိုနေဆဲဖြစ်ပြီး ရုရှား၏ လက်တုံ့ပြန်မှုကို စိုးရိမ်နေရကြောင်း အမည်မဖော်လိုသူ စစ်ဘက် အကြီးတန်းအရာရှိတစ်ဦးက ပြောကြားခဲ့သည်။

“ကျနော်တို့က ရန်သူရဲ့ ခရိုင်းမီးယား လေတပ်စခန်းတွေကို ဒုံးကျည်နဲ့ အောင်အောင်မြင်မြင် ချေမှုန်းနိုင်ခဲ့တယ်။ ပထမဆုံး ပစ်မှတ်ချက် ဆာကီ (Saky) လေယာဉ်ကွင်းပဲဖြစ်တယ်” ဟု ဆောင်းပါးထဲတွင် ဖော်ပြထားသည်။

မည်သည့် ဒုံးကျည် အမျိုးအစား ဖြစ်ကြောင်းကိုတော့ ဆောင်းပါး၌ မတွေ့ရပေ။

ဆာကီလေယာဉ်ကွင်း တိုက်ခိုက်ခံရမှုကြောင့် ဩဂုတ် ၉ ရက်တွင် ရုရှားစစ်လေယာဉ် ၁၀ စင်း ပျက်စီးခဲ့ရသည်ဟု ၎င်းဆောင်းပါးထဲတွင် ဆက်လက်ဖော်ပြထားသည်။

ယူကရိန်းပိုင်နက်ထဲမှ အနည်းဆုံး ကီလီုမီတာ ၂၀၀ ကွာဝေးသည့် လေယာဉ်ကွင်းသို့ တိကျစွာ ထိမှန်နိုင်သည့် လက်နက်မျိုး ယူကရိန်းထံတွင် ရှိ/မရှိ ရှင်းရှင်းလင်းလင်း မသိရပေ။

Source: Reuters

CNI International News

နယူးဒေလီ၊ စက်တင်ဘာ ၈

တရုတ်နှင့်ပါကစ္စတန်တို့၏ ခြိမ်းခြောက်မှုများကို ခံနိုင်ရည်ရှိစေရန်အတွက် အိန္ဒိယအနေဖြင့် ပြည်တွင်း ကာကွယ်ရေးစနစ်များ ထုတ်လုပ်မှုမြှင့်တင်ရန် ဝန်ကြီးချုပ်နရိန္ဒာမိုဒီက ညွှန်ကြားခဲ့ကြောင်း အဆိုပါ ကိစ္စနှင့်နီးစပ်သူများကို ကိုးကားလျက် South China Morning Post သတင်းစာက စက်တင်ဘာ ၈ ရက် (ယနေ့) ရက်စွဲဖြင့် ရေးသားထားသည်။

အိန္ဒိယ၏ ကြည်း၊ ရေ၊ လေတပ်များအနေဖြင့် သက်တမ်းကြာမြင့်၍ အိုဟောင်းသွားသည့် စစ်ရေးအသုံးအဆောင် များနေရာတွင် အစားထိုးရန် အရေးကြီးသည့် လက်နက်စနစ်တချို့ကို ပြည်ပမှ တင်သွင်းတော့မည် မဟုတ် ကြောင်း တာဝန်ရှိသူများက ထုတ်ဖော်ပြောကြားခဲ့ကြသည်။

ထို့ကြောင့် အိန္ဒိယသည် ၂၀၂၆ ခုနှစ်အရောက်တွင် ရဟတ်ယာဉ်များ ပြတ်တောက်သွားမည့်အပြင် ၂၀၃၀ ပြည့်နှစ်အရောက်တွင် ရာနှင့်ချီသော တိုက်လေယာဉ်များ လက်ကျန်ကုန်သွားနိုင်သည့်အန္တရာယ်ရှိကြောင်း ၎င်းတို့က ဆက်လက်ပြောကြားခဲ့ကြသည်။

မိုဒီသည် ၂၀၁၄ ခုနှစ်တွင် အာဏာလရလာပြီး မကြာမီမှာပင် အလုပ်အကိုင်များ ဖန်တီးရန်နှင့် နိုင်ငံခြားငွေကြေး စီးဆင်းမှုလျှော့ချရန်တို့အတွက် အိန္ဒိယပြည်တွင်း၌ပင် မိုဘိုင်းလ်ဖုန်းများမှ ဂျက်တိုက်လေယာဉ်များအထိ ထုတ်လုပ်သွားနိုင်ရန် Make in India မူဝါဒကို ချမှတ်ခဲ့သည်။

သို့သော် ၈ နှစ်အကြာတွင် ကမ္ဘာ့အကြီးဆုံးစစ်လက်နက်ပစ္စည်းတင်သွင်းနေသူ အိန္ဒိယသည် ကာကွယ်ရေး လိုအပ်ချက်များကို ဖြည့်ဆည်းရန်အတွက် လက်နက်များ ပြည်တွင်း၌ အလုံအလောက် မထုတ်လုပ်နိုင်ခဲ့ပေ။ ထို့ပြင် အစိုးရ၏မူဝါဒနှင့်စည်းမျဉ်းအရ ပြည်ပမှ တင်သွင်းမှုကိုလည်း ပိတ်ပင်ထားခဲ့သည်။

အိန္ဒိယနိုင်ငံထုတ် စက်လက်နက်ပစ္စည်းများကိုတွေ့ရစဉ်

မိုဒီ၏အစီအစဉ်အရ စစ်တပ်အတွက် လက်နက်များ ဝယ်ယူဖြည့်တင်းရာတွင် ပြည်တွင်းဖြစ်အရေအတွက်၏ ၃၀ ရာခိုင်နှုန်းမှ ၆၀ ရာခိုင်နှုန်းကြား ဝယ်ယူပိုင်ခွင့်ပေးထားသည်။

၂၀၂၀ ပြည့်နှစ်တွင် ဟိမဝန္တာနယ်စပ်တလျှောက် အိန္ဒိယတပ်ဖွဲ့ဝင်များသည် ပါကစ္စတန်နှင့်တရုတ်တို့ကို အားပြိုင် လာရသည့်အခါ အိန္ဒိယစစ်ရေးပြင်ဆင်မှုများမှာ သတိပြုစရာဖြစ်လာခဲ့သည်။

အထူးသဖြင့် တရုတ်နှင့်ထိစပ်နေသော နယ်စပ်တလျှောက် ကျူးကျော်ရန်စမှုများကို ဟန့်တားရန် မြေပြင်တွင် လှုပ်ရှားရမည့် တပ်ဖွဲ့ဝင်ဦးရေး နှစ်ဆလိုအပ်ကြောင်း အိန္ဒိယအစိုးရက ပြောကြားခဲ့သည်။

ထိုသို့အခြေအနေများနှင့်ပတ်သက်၍ အိန္ဒိယကာကွယ်ရေးဝန်ကြီးဌာနသို့ အီးမေးလ်ဖြင့် သဘောထားမှတ်ချက် တောင်းခံခဲ့သော်လည်း တုံ့ပြန်ခြင်းမရှိပေ။

အိန္ဒိယစစ်တပ်သည် ကာကွယ်ရေးပစ္စည်းအချို့ကို ပြည်တွင်း၌ တိုးမြှင့်ထုတ်လုပ်နေသော်လည်း ဒီဇယ်-လျှပ်စစ် နှစ်မျိုးသုံး ရေငုပ်သင်္ဘောများနှင့် အင်ဂျင်နှစ်လုံးတပ် တိုက်လေယာဉ်ကဲ့သို့ ရှုပ်ထွေးသော နည်းပညာ ပလက်ဖောင်းများကိုတော့ မထုတ်လုပ်နိုင်သေးပေ။

ပြည်တွင်းထုတ် အင်ဂျင်တစ်လုံးတည်းတပ်ဆင်ထားသော တိုက်လေယာဉ်များ ရှားပါးလာသည့်အပြင် အင်ဂျင် နှစ်လုံးတပ် တိုက်လေယာဉ်များကိုလည်း ပြည်ပမှ ဝယ်ယူမည့်အစီအစဉ်ကိုလည်း မိုဒီအစိုးရက ခေတ္တဆိုင်းငံ့ခဲ့သည်။

အိန္ဒိယလေတပ်၏အခြေအနေမှာ အထူးဆိုးရွားလှပြီး ၂၀၃၀ ပြည့်နှစ်အရောက်တွင် တိုက်လေယာဉ် အစင်း ၃၀ အောက်သာ ကျန်တော့မည်ဖြစ်သော်လည်း တရုတ်နှင့်ပါကစ္စတန်နယ်စပ်များကို ထိရောက်စွာ ကာကွယ်ရန်မှာ အရေးကြီးကြောင်း၊ ဂျက်တိုက်လေယာဉ် ၁၆ စင်းမှ ၁၈ စင်းခန့် အခြေစိုက်စခန်းချနိုင်အောင် တွန်းအားပေးသွား မည်ဖြစ်ကြောင်း စစ်ဘက်အရာရှိတစ်ဦးက ပြောကြားခဲ့သည်။

Source: South China Morning Post