CNI International News

ပေါ့ဒ်ဂျိုရီကာ၊ ဇူလိုင် ၂၈

မွန်တီနီဂရိုးအစိုးရသည် ရုရှားနိုင်ငံသားများ၏ အိမ်ခြံမြေများကို စတင် သိမ်းဆည်းလိုက်ပြီဖြစ်ကြောင်း ၎င်းအစိုးရ၏ ဝက်ဘ်ဆိုက် တွင် ဇူလိုင် ၁၇ ရက်က ကြေညာခဲ့သည်ဟု တာ့စ်က ဖော်ပြသည်။

ဥရောပအရှေ့တောင်ပိုင်းရှိ မွန်တီနီဂရိုးနိုင်ငံရှိ ရုရှားနိုင်ငံသားများ ပိုင်ဆိုင်သည့် အိမ်ခြံမြေ အဆောက်အအုံ ၄၄ လုံးကို မိမိတို့ အစိုးရက သိမ်းဆည်းလိုက်ကြောင်း၊ ယူကရိန်းသို့ ရုရှားကျူးကျော်မှုအပေါ် ပိတ်ဆို့ဒဏ်ခတ်မှု၏ တစိတ်တပိုင်းအဖြစ် ယခုလို သိမ်းဆည်းလိုက်ခြင်းဖြစ်ကြောင်း မွန်တီနီဂရိုးပြည်ထဲရေးဝန်ကြီး ဖိလစ်အက်ဇစ် (Filip Adzic) က ပြောကြားခဲ့သည်။

ရုရှားနိုင်ငံသားများနှင့် ရုရှားကုမ္ပဏီများသည် မွန်တီနီဂရိုးနိုင်ငံ၏ စီးပွားရေးကဏ္ဍတွင် ယမန်နှစ် တစ်နှစ်တည်း၌ ယူရိုငွေ ၁၂၉ သန်းကျော် ရင်းနှီးမြှုပ်နှံခဲ့ကြရာ ယူရိုငွေ ၄၉ ဒသမ ၄၆ သန်းခန့်မှာ ထိုနိုင်ငံ၏ အိမ်ခြံမြေလုပ်ငန်းများတွင် ရင်းနှီးမြှုပ်နှံ ခဲ့ကြခြင်းဖြစ်ကြောင်း ကျွမ်းကျင်သူများ၏ ခန့်မှန်းချက်အရ သိရသည်။

မွန်တီနီဂရိုးသမ္မတ မီလို ဒူကာနိုဗစ်

လွန်ခဲ့သည့် ၁၅ နှစ်အတွင်း ရုရှားသည် မွန်တီနီဂရိုးနိုင်ငံ၌ စီးပွားရေးအတွက် အကြီးမားဆုံး ရင်းနှီးမြှုပ်နှံသူ ဖြစ်ခဲ့ပြီး တစ်နှစ် လျှင် ရင်းနှီးမြှုပ်နှံမှုပမာဏ အနည်းဆုံး ပျမ်းမျှ ယူရိုငွေ ၁.၅ ဘီလီယံ (သို့မဟုတ်) ယူရိုငွေ သန်း ၁၀၀ ခန့် ရှိကြောင်း မွန်တီနီ ဂရိုးဆိုင်ရာ ရုရှားသံအမတ် ဗလာဒီစလပ်ဗ် မက်စ်လန်နီကော့ဗ် (Vladislav Maslennikov) က ပြန်ပြောင်း ပြောပြခဲ့သည်။

မွန်တီနီဂရိုးသည် ပြီးခဲ့သည့် မတ်လ ၁ ရက်၌ ဥရောပသမဂ္ဂ (EU) ၏ ရုရှားဆန့်ကျင်ရေး ပိတ်ဆို့ဒဏ်ခတ်မှုတွင် ပါဝင်ခဲ့သည်။

မြောက်အတ္တလန္တိတ်စစ်စာချုပ်(နေတိုး) အဖွဲ့ဝင်နိုင်ငံများ၏ ထိပ်သီး အစည်းအဝေးအပြီး မွန်တီနီဂရိုးသမ္မတ မီလို ဒူကာနိုဗစ် (Milo Dukanovic) က ယူကရိန်းနှင့်အတူ ရပ်တည်ကြောင်း ကြေညာခဲ့သည်။

တစ်ချိန်တည်းမှာပင် မွန်တီနီဂရိုးနိုင်ငံရှိ မြို့ကြီးများတွင် ရုရှားထောက်ခံသည့် ချီတက်ပွဲများလည်း အခါအားလျော်စွာ ပေါ်ပေါက်လာခဲ့သည်။

အဆိုပါ ချီတက်ပွဲများတွင် ရုရှားအပေါ် ပိတ်ဆို့ဒဏ်ခတ်မှု ရုပ်သိမ်းပေးရန် ဆန္ဒပြ တောင်းဆိုခဲ့ကြသည်။ မွန်တီနီဂရိုး လွှတ်တော်ထဲတွင် သက်ဆိုင်ရာ ဆုံးဖြတ်ချက်ကို ထည့်သွင်းစဉ်းစားရန်အတွက် လက်မှတ်ပေါင်း ၆ ထောင်ခန့်ကို စုဆောင်းထားရှိသည်။

Source: တာ့စ်သတင်းဌာန