CNI International News

စင်္ကာပူ၊ ဩဂုတ် ၂၉

တရုတ်နှင့် အမေရိကန်ကြား တင်းမာမှုများ မြင့်တက်နေပြီး နှစ်နိုင်ငံကြား ဆွေနွေးမှုများ မလုပ်ဆောင်နိုင်သော် လည်း စင်္ကာပူသည် တရုတ်နှင့်အမေရိကန် ဆွေးနွေးပွဲများအတွက် အဓိကအခန်းကဏ္ဍမှ ပါဝင်ဆောင်ရွက်ပေးနိုင် သည်ဟု စင်္ကာပူ သံတမန်ဟောင်း တွန်မီ ခို (Tommy Koh) က ပြောကြားခဲ့သည်ဟု South China Morning Post တွင် ဖော်ပြခဲ့သည်။

စင်္ကာပူသည် ယခင်ကလည်း မတူကွဲများမှုများကို ဆွေးနွေးပွဲ စားပွဲဝိုင်းများပေါ်တွင် ဆွေးနွေးရန် နိုင်ငံများကြား ဆွေးနွေးပွဲများ လက်ခံကျင်းပ ပေးခဲ့ဖူးကြောင်း ခိုက ဩဂုတ် ၂၇ ရက်က စင်္ကာပူနိုင်ငံတကာကြားဝင်စေ့စပ်ရေး စင်တာတွင် ပြောကြားခဲ့သည်။

ထိုဆွေးနွေးပွဲများအနက် ၂၀၁၅ ခုနှစ်က တရုတ်သမ္မတ ရှီကျင့်ဖျင် (Xi Jinping) နှင့် ထိုင်ဝမ်ခေါင်းဆောင် မာယင်ကျိုး (Ma Ying-jeou) တို့၏ ဆွေးနွေးပွဲ၊ ၂၀၁၈ ခုနှစ်က အမေရိကန်သမ္မတ ဒေါ်နယ်ထရမ့် (Donald Trump) နှင့် မြောက်ကိုရီးယားခေါင်းဆောင် ကင်မ်ဂျုံအန် (Kim Jong-un) တို့၏ ဆွေးနွေးပွဲများက စင်္ကာပူတွင် လက်ခံကျင်းပခဲ့သည့် အထင်ကရ ဆွေးနွေးပွဲများထဲ၌ ပါဝင်နေကြောင်း အမေရိကန်နှင့် ကုလသမဂ္ဂဆိုင်ရာ စင်္ကာပူသံအမတ်ဟောင်း ခိုက ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ တရုတ်သမ္မတ ရှီကျင့်ဖျင်ကို တွေ့ရစဉ်

“ဒါတွေက စင်္ကာပူနိုင်ငံ စွမ်းဆောင်နိုင်တဲ့ အခန်းကဏ္ဍ ဖြစ်ပါတယ်။ ကျနော်တို့က လူတိုင်းနဲ့ ခင်မင်တယ်လေ။ သူတို့အားလုံးနဲ့ ကောင်းမွန်တဲ့ ဆက်ဆံရေးတွေ ရှိတယ်။ စင်္ကာပူက တစ်ဖက်နဲ့ တစ်ဖက် တွေ့ဆုံဖို့ ခက်ခဲနေတဲ့ နိုင်ငံတွေကြားမှာ ဆွေးနွေးပွဲတွေ ဖြစ်မြောက်စေဖို့ ကူညီပေးနိုင်တဲ့ နိုင်ငံဖြစ်ပါတယ်”ဟု ခိုက ပြောကြားခဲ့သည်။

တရုတ်-အမေရိကန် ဆက်ဆံရေးသည် အမေရိကန်၏ နံပါတ် ၁ ဦးစားပေး ကိစ္စဖြစ်ပြီး အမေရိကန်က တရုတ်၏ အင်အား ကြီးထွားလာမှုကို ဟန့်တားရန် ဆုံးဖြတ်ထားကြောင်း ခိုက ပြောသည်။

သို့သော် အမေရိကန်က ပိတ်ဆို့မှုများနှင့် ဆန့်ကျင်ကန့်ကွက်မှုများ ပြုလုပ်ခဲ့သည့်တိုင် တရုတ်ကို ဟန့်တားနိုင် မည် မဟုတ်ဘဲ တရုတ်သည် အမေရိကန်နှင့် တန်းတူ ရင်ဘောင်တန်း လာနိုင်လိမ့်မည်ဟု ခိုက ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်နဲ့ မြောက်ကိုရီးယား ခေါင်းဆောင် ကင်မ်ကို တွေ့ရစဉ်

“တရုတ်နဲ့ အမေရိကန် ဆွေးနွေးမှုတွေ ပြုလုပ်ဖို့ တိုက်တွန်းရေးဟာ ကျနော်တို့အတွက် အရမ်းအရေးကြီးတဲ့ကိစ္စ ဖြစ်ပါတယ်။ စိတ်မကောင်းစရာကတော့ လက်ရှိ အခြေအနေမှာ အမေရိကန်နဲ့ တရုတ် ဆွေးနွေးမှုတွေ ဖြစ် မြောက်ဖို့ အင်စတီကျူးရှင်းဆိုင်ရာ လုပ်ငန်းစဉ် ရှိမနေပါဘူး”ဟု ၎င်းက ပြောကြားခဲ့သည်။

ဩဂုတ် ၁၁ ရက်က ကမ္ဘာ့စီးပွားရေး အင်အားအကြီးဆုံး နှစ်နိုင်ငံဖြစ်သည့် အမေရိကန်နှင့် တရုတ်သည် ကုန်သွယ်ခွန် တိုးမြှင့်မှုများ အသက်ဝင်လာမည့်ရက်ကို နောက်ထပ် ရက်ပေါင်း ၉၀ ကြာ ထပ်မံဆိုင်းငံ့ရန် သဘောတူခဲ့ကြသည်။

ထရမ့်ကမူ ကုန်သွယ်ရေး သဘောတူညီမှု မရခဲ့ပါက ယခုနှစ် မကုန်မီ ရှီနှင့် တွေ့ဆုံသွားမည်ဖြစ်ပြီး သဘောတူညီ မှု ရရှိကာနီး အခြေအနေဖြစ်ကြောင်း ပြောကြားခဲ့သည်။

Source: South China Morning Post