CNI International News
ဘေဂျင်၊ ဩဂုတ် ၂၉
တရုတ်နှင့် တောင်ကိုရီးယား ဆက်ဆံရေးကို ပြည်ပက တတိယအင်အားစုများ အနေဖြင့် ဝင်ရောက်စွက်ဖက်မှု မလုပ်ရန် တရုတ်က ဩဂုတ် ၂၇ ရက်တွင် ပြောကြားခဲ့သည်ဟု South China Morning Post မှ ဖော်ပြခဲ့သည်။
တောင်ကိုရီးယားသည် အမေရိကန်၏ မူဝါဒကို တန်ပြန်သည့် အစီအစဉ်များ လုပ်ဆောင်သွားမည် မဟုတ်ကြောင်း ပြောကြားခဲ့ပြီးနောက် ယခုလို တရုတ်၏ ပြောကြားချက် ထွက်ပေါ်လာခြင်းဖြစ်သည်။
“တရုတ်နဲ့ တောင်ကိုရီးယား ဆက်ဆံရေးဟာ နှစ်နိုင်ငံ အကျိုးစီးပွားပေါ်မှာ အခြေခံထားတာ ဖြစ်ပါတယ်။ ဒီဆက်ဆံရေးဟာ တတိယပါတီကို ပစ်မှတ်ထားတာမျိုး မဟုတ်ပါဘူး။ ပြီးတော့ ဒီဆက်ဆံရေးကို ဝင်ရောက် မစွက်ဖက်သင့်ပါဘူး” ဟု တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ ကော်ကျားကွမ် (Guo Jiakun) က ပြောကြားခဲ့သည်။
တရုတ်၏ မူဝါဒသည် အပြောင်းအလဲမရှိဘဲ တည်ငြိမ်နေကြောင်း၊ တောင်ကိုရီးယားအနေဖြင့် မဟာဗျူဟာ မြောက် မိတ်ဖက်ဆက်ဆံရေးကို ဆက်လက် တိုးမြှင့်ရန် တရုတ်နှင့် လက်တွဲ ဆောင်ရွက်လိမ့်မည်ဟု မိမိတို့ မျှော်လင့်ထားကြောင်း ကော်က ပြောကြားခဲ့သည်။
အမေရိကန်သမ္မတ ဒေါ်နယ်ထရမ့်နဲ့ တောင်ကိုရီးယားသမ္မတ လီဂျေမြောင်ကို တွေ့ရစဉ်
အမေရိကန်နှင့် တရုတ်ကြား ပြိုင်ဆိုင်မှု ပြင်းထန်နေချိန်တွင် တောင်ကိုရီးယားသည် တရုတ်နှင့်ဆက်ဆံရေးကို ဟန်ချက်ညီအောင် ပြန်လည်ချိန်ညှိခဲ့ကြောင်း တောင်ကိုရီးယားသမ္မတ လီဂျေမြောင် (Lee Jae-myung) က ပြောကြားခဲ့ပြီးနောက် ကော်၏ မှတ်ချက်စကားများ ထွက်ပေါ်ခဲ့ခြင်းဖြစ်သည်။
ဩဂုတ် ၂၅ ရက်က လီသည် ဝါရှင်တန်အခြေစိုက် နိုင်ငံတကာလေ့လာရေးနှင့် မဟာဗျူဟာစင်တာတွင် အမှာ စကား ပြောကြားချိန်အတွင်း တောင်ကိုရီးယားသည် စီးပွားရေးအရ တရုတ်နှင့် ပူးပေါင်း ဆောင်ရွက်နေပြီး လုံခြုံရေးအရ အမေရိကန်အပေါ် မှီခိုထားသည့် မူဝါဒကို ကာလကြာရှည် ဆက်လက်ကိုင်စွဲတော့မည် မဟုတ် ကြောင်း ပြောကြားခဲ့သည်။
“ဒီလို အခြေအနေမျိုးမှာ ကျနော်တို့ဟာ အမေရိကန်ရဲ့ အခြေခံမူဝါဒကို ဆန့်ကျင်တဲ့ ဆုံးဖြတ်ချက်တွေ၊ လုပ်ဆောင်ချက်တွေကို လုပ်ဆောင်နိုင်မှာ မဟုတ်ပါဘူး” ဟု လီက ပြောကြားခဲ့သည်။
ထို့ကြောင့် တောင်ကိုရီးယားသည် အမေရိကန်၏ ပို့ကုန် ထိန်းချုပ်မှုများနှင့် ပတ်သက်သည့် အရေးကိစ္စများတွင် တရုတ်နှင့် အထူးဆက်ဆံရေး ထူထောင်ခြင်း မရှိခဲ့ကြောင်း လီက ပြောကြားခဲ့သည်။
သို့သော် တောင်ကိုရီးယားသည် အိမ်နီးချင်းဖြစ်သည့် တရုတ်နှင့် ပုံမှန်ဆက်ဆံရေးကို ထိန်းသိမ်းထားဆဲ ဖြစ် ကြောင်း၊ တရုတ်နှင့်ဆက်ဆံရေးများ မြှင့်တင်ရန် တောင်ကိုရီးယား၏ အထူးသံတမန်ကို တရုတ်သို့ စေလွှတ်ခဲ့ ကြောင်း လီက ပြောကြားခဲ့သည်။
Source: South China Morning Post
