CNI News
၂၀၂၅ ခုနှစ်၊ မေလ ၇
နစကနှင့် အာရက္ခတပ်တော် (AA) တို့ ဆွေးနွေးပွဲ ဖြစ်မြောက်လာပါက AA သည် “ဝ”၊ ကိုးကန့်တို့ထက် ပိုမိုမြင့်မား သည့် တောင်းဆိုချက်များ တောင်းလာနိုင်ကြောင်း NCA ထိုးထားသည့် ပအိုဝ်းအမျိုးသား လွတ်မြောက်ရေးအဖွဲ့ ချုပ်(PNLO- NCA/S)မှ ဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။
အဓိကအနေဖြင့် ရခိုင်ပြည်နယ်အား ရခိုင်အစိုးရမှ အုပ်ချုပ်မည်ဆိုသည့် သဘောထားမျိုး တောင်းလာနိုင်ကြောင်း ၎င်းက ပြောသည်။
ဗိုလ်မှူးကြီးခွန်ဥက္ကာက “ဆွေးနွေးပွဲဖြစ်ရင်တော့ သူကတော့ “ဝ” တို့၊ ကိုးကန့်တို့ တောင်းတာထက်တော့ ပိုခပ် မြင့်မြင့် တောင်းနိုင်တယ် ထင်တယ်၊ သူက ရခိုင်ပြည်နယ်က ရှိပြီးသားဆိုတော့ ရခိုင်ပြည်နယ်ရဲ့ လုပ်ပိုင်ခွင့် အာဏာတွေ နောက်ပြီးတော့ ပြည်နယ်အဆင့်အတန်းတွေ သူနည်းနည်း ပိုတောင်းနိုင်တဲ့ သဘောတော့ရှိတာပေါ့၊ ဘာကြောင့်လဲဆိုတော့ သူနယ်မြေ ရထားပြီးသားဆိုတော့ ရခိုင်မှာရှိတဲ့ သယံဇာတ ခွဲဝေတဲ့နေရာမှာ ရခိုင် ပြည်နယ်ကို ၇၀ ရာခိုင်နှုန်း၊ ဗဟိုအစိုးရက ၃၀ ရာခိုင်နှုန်း ယူဖို့စသည်ဖြင့်ပေါ့၊ အဲဒီကိစ္စတွေပါ ဆွေးနွေးနိုင်တဲ့ အခြေအနေ ရောက်သွားတာပေါ့ဗျာ၊ အဲဒီမှာ ဆွေးနွေးလို့ နိုင်ငံရေးအရရော ဘဏ္ဍာရေးအရရော သဘောတူတယ် ဆိုရင်တော့ သူရပ်ချင်လည်း ရပ်နိုင်တာပေါ့၊ ဒါပေမယ့် သူရထားတဲ့ ရခိုင်ဒေသကိုတော့ လျှော့ပေးမယ့်ပုံတော့ မပေါ်ဘူးပေါ့ဗျာ၊ သူက ပြည်နယ်အဆင့်အတန်း ရပြီးသားဖြစ်နေတော့ ကိုယ်ပိုင်အုပ်ချုပ်ခွင့်ဒေသထက်တော့ မြင့်ပြီးသားလေဗျာ၊ အဲဒီပြည်နယ်ထဲမှာကိုပဲ ကိုယ်ပိုင်အစိုးရဖွဲ့နိုင်တဲ့ပြည်နယ်ပေါ့၊ ရခိုင်ပြည်နယ်ကို ရခိုင်အစိုးရ က အုပ်ချုပ်မယ်ပေါ့ဗျာ၊ ဒါပေမယ့် ပြည်ထောင်စုနဲ့ကတော့ တချို့နေရာမှာ ခွဲဝေမှာပေါ့၊ ဒါပေမယ့် အဓိက, က တော့ ရခိုင်အစိုးရ အုပ်ချုပ်မယ်ဆိုတဲ့ သဘောမျိုးလောက် တောင်းနိုင်တာပေါ့ 1 Country 2 System (တစ်နိုင်ငံ တည်း စနစ် ၂ မျိုး)ပေါ့ဗျာ” ဟု ပြောသည်။
UWSA တပ်ဖွဲ့ကို တွေ့ရစဉ်
“ဝ”တပ်ဖွဲ့(UWSA)သည် ၂၀၀၈ ဖွဲ့စည်းပုံအခြေခံဥပဒေအရ ရှမ်းပြည်နယ်ရှိ ဟိုပန်၊ မိုင်းမော၊ ပန်ဝိုင်၊ နားဖန်း၊ မက်မန်းနှင့် ပန်ခမ်း (ပန်ဆန်း) မြို့နယ် ခြောက်ခုအား ခရိုင်နှစ်ခုဖွဲ့ကာ “ဝ” ကိုယ်ပိုင်အုပ်ချုပ်ခွင့်ရတိုင်း အဖြစ် သတ်မှတ်ပေးထားသော နယ်မြေများကို အုပ်ချုပ်လျက်ရှိသည်။
အလားတူ ကိုးကန့်တပ်ဖွဲ့ (MNDAA) က တရုတ်၏ ကြားဝင်စေ့စပ်ပေးမှုဖြင့် လားရှိုးမြို့အား တပ်မတော်ထံ ပြန်လည်လွှဲပြောင်းပေးခဲ့တဲ့နောက် ရှမ်းပြည်နယ်အတွင်းက လောက်ကိုင်၊ ကုန်ကြမ်းမြို့တို့ ပါဝင်သော ကိုးကန့်ကိုယ်ပိုင်အုပ်ချုပ်ခွင့်ရဒေသကို အုပ်ချုပ်လျက်ရှိသည်။
AA အနေဖြင့် “ဝ”ကဲ့သို့ အနေအထားအား ညှိနှိုင်းတိုင်ပင်မှုတစ်ခု မရှိပါက ရရန်မလွယ်ကူကြောင်း ရခိုင့် ဦးဆောင်ပါတီ (AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။
ရခိုင်ပြည်နယ်က လမ်းဆုံတစ်နေရာကို တွေ့ရစဉ်
၎င်းက “ရခိုင်ဒေသရဲ့ အနေအထားသည် လက်နက်ကိုင်တွေရဲ့ မျှော်မှန်းချက်အတိုင်းဖြစ်ဖို့က ရာခိုင်နှုန်း အလွန် နည်းတယ်ဗျ၊ “ဝ” လိုဖြစ်ဖို့ အနေအထားကတော့ ညှိနှိုင်းတိုင်ပင်မှုတစ်ခု မရှိဘဲနဲ့ရဖို့က မလွယ်ဘူးဆိုတဲ့ အနေ အထားကို တွေ့ရတာပေါ့၊ “ဝ” နဲ့က မတူဘူးဗျ၊ အဲဒီတော့ “ဝ”သည် ၁၉၈၉ က စပြီးတော့ သူ့ဒေသကို သူအုပ်ချုပ် ဖို့ ကြိုးစားတာပေါ့၊ အဲဒီတော့ ဗိုလ်ချုပ်သန်းရွှေတို့နဲ့ ညှိနှိုင်းခဲ့တာပေါ့၊ “ဝ” သည် ဖွဲ့စည်းပုံအခြေခံဥပဒေ မတိုင်ခင် ကတည်းက အထူးဒေသဖြစ်တာပေါ့၊ အထူးဒေသ ဧရိယာတော်တော်များများလည်း ရှိကြတာပေါ့၊ အဲဒါ အခြေခံ ဥပဒေ မတိုင်ခင်က ယူထားတာဗျ နိုင်ငံရေးညှိနှိုင်းမှုအရ။ ဆိုတော့ အခြေခံဥပဒေ ၂၀၀၈ ကြီးပေါ်လာတဲ့နောက် မှာ ကိုယ်ပိုင်အုပ်ချုပ်ခွင့်ရတိုင်းတို့၊ ဒေသတို့အဖြစ် သတ်မှတ်တာပေါ့၊ ဆိုတော့ “ဝ” နဲ့ ရခိုင်နဲ့က မတူဘူးဗျ၊ ရခိုင် က ဖွဲ့စည်းပုံအခြေခံဥပဒေအရ ပြည်နယ်ဖြစ်နေတာကိုး၊ အဲဒီတော့ အဲဒီမတိုင်ခင်က လက်နက်ကိုင်နဲ့ ပတ်သက် တဲ့ ညှိနှိုင်းမှုက မရှိသေးဘူး၊ အဲဒီတော့ အခုလက်ရှိ အနေအထားကို ပြန်ကြည့်ရင် “ဝ” လို ရခိုင်သည် ဖြစ်လာနိုင် ခြေရှိမလား၊ မရှိဘူးလားကတော့ဖြင့် တည်ဆဲအစိုးရဖက်ကတော့ အခြေခံဥပဒေအရပဲ သုံးသပ် တဲ့ အခါကျတော့ သွားဖို့က ခက်ခဲတာပေါ့” ဟု ပြောသည်။
လက်ရှိတွင် AA သည် ဧရာဝတီတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ စစ်ကိုင်းတိုင်း ဒေသကြီး၊ ရခိုင်ပြည်နယ်နှင့် ချင်းပြည်နယ်တို့တွင် တခြားသော လက်နက်ကိုင်များဖြင့် ပူးပေါင်း၍ မြန်မာ့ တပ်မတော်နှင့် တိုက်ပွဲများ ဖြစ်ပွားလျက်ရှိနေသည်။
AA သည် အနိမ့်ဆုံး အဆင့်အနေဖြင့် “ဝ”ကဲ့သို့ ကွန်ဖက်ဒရေးရှင်း အဆင့်အတန်းကိုရလိုပြီး အမြင့်ဆုံးအနေဖြင့် သီးခြားလွတ်လပ်သော နယ်မြေထူထောင်ရေး ရည်မှန်းချက်များ ရှိနေကြောင်း ပြောကြားထားသည်။
လက်ရှိတွင် AA သည် ရခိုင်ပြည်နယ်ရှိ သံတွဲ၊ ဂွ၊ အမ်း၊ မင်းပြား၊ မြောက်ဦး၊ မောင်တော၊ ရသေ့တောင်၊ ဘူးသီး တောင်၊ ကျောက်တော်၊ ပုဏ္ဏကျွန်း၊ မာန်အောင်၊ ပေါက်တော၊ တောင်ကုတ်၊ မြေပုံ စသည့် ဒေသများကို ထိန်းချုပ် ထားသည်။
