CNI News

၂၀၂၅ ခုနှစ်၊ မေလ ၇

နစကနှင့် တရုတ်ဖိအားများ ဆက်တိုက်ရှိနေသော်လည်း မိမိတို့အဖွဲ့အစည်းထက် လူထုအပေါ်ကိုသာ ကျရောက် ကြောင်း TNLA တွဲဖက်အထွေထွေ အတွင်းရေးမှူး(၂) ဗိုလ်မှူးကြီးတားပန်လက ပြောသည်။

TNLA က ကျင်းပသည့် ၂၀၂၅ ခုနှစ်၊ မေလ ၄ ရက်နေ့ သတင်းစာ ရှင်းလင်းပွဲမှာ ၎င်းက ပြောကြားခဲ့ခြင်း ဖြစ်သည်။

ဗိုလ်မှူးကြီးတားပန်လက “ဖိအားပေးမှုကတော့ အရင်ကတည်းကလည်း ရှိခဲ့တယ် အခုလည်း တောက်လျှောက် ရှိနေတယ်။ အခုကြုံနေရတာပေါ့လေ ဖိအားပေးမှုက တောက်လျှောက်ပေါ့။ ဖိအားပေးမှုမှာ ဘယ်လိုမျိုး အနေ အထား ဖြစ်လဲဆိုတော့ အထူးသဖြင့် လူထုထိခိုက်မှု အလွန်ပဲ ထိထိရောက်ရောက် ပြင်းထန်ပါတယ်။ ၂၀၂၄၊ ၁ လ ပိုင်းလောက်ကနေ စပြီးမှ စကစ ဘက်ကနေမှ ပြည်အောက်ရွာကနေမှ ရှမ်းမြောက်ကို တက်လာဖို့ လမ်းကြောင်း တွေကို ပိတ်ဆို့ထားတယ်၊ ဒီကနေမှ အောက်ကိုပြန်ဆင်းဖို့ အတွက်ကိုလည်း လမ်းကြောင်းတွေ ပိတ်ဆို့ထား တယ်၊ ဖြတ် ၄ ဖြတ် ပုံစံလိုမျိုး ပြုလုပ်ထားတယ်။ အဲဒါကြောင့် လူထုတွေသွားလာတဲ့ နေရာမှာ အရောင်းအဝယ် လုပ်တဲ့နေရာမှာ စားဝတ်နေရေးကိစ္စ ဖြေရှင်းတဲ့နေရာမှာ အားလုံးပဲ အခက်အခဲဖြစ်ပါတယ်။ အဲဒီနောက်ကနေ စပြီးမှ လွန်ခဲ့တဲ့ ၂၀၂၄၊ ၆ လပိုင်းကနေ စပြီးမှ တရုတ်နိုင်ငံဘက်ကလည်း ဖြတ် ၅ ဖြတ်ပုံစံမျိုး အားလုံးကြားသိရ တဲ့အတိုင်းပဲ ဆောင်ရွက်လာတဲ့အတွက် တရုတ်နိုင်ငံနယ်စပ်မှာ နေကြတဲ့လူထုတွေက နယ်စပ်ကို အခြေပြုပြီးမှပဲ စားဝတ်နေရေးကိစ္စ ဖြေရှင်းနေရတော့ နယ်စပ်တွေ ပိတ်လိုက်တော့ လူထုတွေပဲ ထိခိုက်မှုဖြစ်ပါတယ်။ စကစ ဘက်ကလည်း ပိတ်တယ်၊ တရုတ်နိုင်ငံ အစိုးရဘက်ကလည်းပိတ်တယ် ဒီနှစ်ဖက် ပိတ်ဆိုမှုကြားထဲမှာတော့ လူထု က တော်တော်လေးကိုပဲ ကြပ်ကြပ်တည်းတည်း ဖြစ်နေရတာပေါ့။ အဓိက ဖိအားကတော့ လူထုကိုကျရောက်တာ ပဲ ဖြစ်ပါတယ်”ဟု ပြောသည်။

 TNLA နဲ့ လူထုတွေ့ဆုံမှုကိုတွေ့ရစဉ်

လားရှိုးမြို့ကို တိုက်ခိုက်သိမ်းပိုက်ကာ အုပ်ချုပ်ရေးလုပ်ငန်း စတင်ထားသည့် ကိုးကန့်တပ်ဖွဲ့သည် တရုတ်၏ ကြားဝင်စေ့စပ်ပေးမှုကြောင့်  ၂၀၂၅ ခုနှစ်၊ ဧပြီ ၂၁ ရက်နေ့က နစကထံသို့ လားရှိုးမြို့အား ပြန်လည် လွှဲပြောင်း ပေးခဲ့ရသည်။

ထိုဖြစ်စဉ်ကြောင့် TNLA အနေဖြင့်လည်း ၎င်းတို့ရရှိထားသည့် မြို့နယ်များထဲမှ တချို့ကို ပြန်လည်လွှဲပြောင်း ပေးရနိုင်ခြေရှိသည်ဟု သုံးသပ်ယူဆချက်များရှိနေသည်။

အဆိုပါ လားရှိုးမြို့နယ် ပြန်လည်လွှဲပြောင်း ပေးလိုက်ရသည့် ဖြစ်စဉ်ကြောင့် တအာင်းလူမျိုးများအတွက် ထိခိုက် မှုများရှိကြောင်း TNLA တွဲဖက်အထွေထွေ အတွင်းရေးမှူး(၂) ဗိုလ်မှူးကြီးတားပန်လက ပြောသည်။

TNLA ရဲဘော်တစ်ဦးကို တွေ့ရစဉ်

၎င်းက “လားရှိုးဖြစ်စဉ်ကြောင့် ကျနော်တို့ဒေသကို ဘယ်လောက်အထိ ထိခိုက်မှု ဖြစ်သွားရလဲဆိုရင် နောက်ဆက် တွဲ ရင်ဆိုင်နေရပါပြီ။ အထူးသဖြင့်ကတော့ လားရှိုးထဲမှာလည်း ကျနော်တို့ တအာင်းလူမျိုးတွေ၊ တအာင်းလူထု တွေ ရှိပါတယ်။ အဲဒီမှာ သူတို့ဘက်က ထိခိုက်မှုတွေလည်း ကျနော်တို့ ကြားသိရပါတယ်။ အဲဒီအပြင် လူထုတွေရဲ့ သွားလာမှု၊ ဈေးဝယ်တာတို့၊ စားစရာဝယ်တာတို့၊ အသုံးဆောင်ပစ္စည်းတွေ ဝယ်တာတို့ အဲဒီအခါမျိုးမှာလည်း ကန့်သတ်မှု ပိတ်ပင်မှုတွေ အများကြီး ကြားသိနေရပြီး အဲဒီလိုမျိုး ထိခိုက်မှုတွေတော့ ရှိနေပြီလို့ ကြားသိရပါ တယ်” ဟု ပြောသည်။

တရုတ်၏ ကြားဝင်စေ့စပ်ပေးမှုကြောင့် နစကနှင့် TNLA တို့ တွေ့ဆုံဆွေးနွေး ခဲ့ကြသော်လည်း တရုတ်နှင့် TNLA ကြား မြန်မာ့နိုင်ငံရေး ချဉ်းကပ်မှု ကွာခြားနေ၍ အဖြေရှာသည့် အခြေအနေမှာလည်း ကွာခြားသွားကြောင်း TNLA ဘက်မှ ပြောသည်။

၂၀၂၅ ခုနှစ်၊ ဧပြီလ ၂၈-၂၉ ရက်က မြန်မာ့တပ်မတော်နှင့် TNLA ဘက်မှ ကိုယ်စားလှယ်တို့ တရုတ်နိုင်ငံ၊ ကူမင်းမြို့ တွင် တွေ့ဆုံဆွေးနွေးခဲ့ကြသော်လည်း သဘောတူညီမှုမရဘဲ ဆွေးနွေးပွဲ အဆုံးသတ်ခဲ့ပြီး လာမည့် ဩဂုတ်လ၌ ထပ်မံတွေ့ဆုံရန် နှစ်ဖက်သဘောတူထားကြောင်း သိရသည်။