CNI News
၂၀၂၃ ခုနှစ်၊ အောက်တိုဘာ ၄
တရုတ်နိုင်ငံ၊ ယူနန်ပြည်နယ်၊ လင်းချန်းမြို့နယ်တွင် ကျင်းပသည့် ကုန်စည်ပြပွဲသို့ တက်ရောက်နေသည့် ကိုးကန့်လုပ်ငန်းရှင် ၁၁ ဦးကို တရုတ်ရဲတပ်ဖွဲ့က အောက်တိုဘာ ၁ ရက်နေ့တွင် ဖမ်းဆီးထားကြောင်း နီးစပ်သူများက CNI သတင်းဌာနသို့ ပြောသည်။
အဆိုပါ လုပ်ငန်းရှင် ၁၁ ဦး တည်းခိုနေသော ဟိုတယ်သို့ တရုတ်ရဲတပ်ဖွဲ့က ရောက်ရှိလာပြီး ဟိုတယ်တံခါးများ ကို ဖျက်၍ ဝင်ဖမ်းခဲ့ကြောင်း သိရသည်။
ကျိန်းခမ်းခရိုင် ကုန်သည်များ စက်မှုလက်မှုနှင့်ကူးသန်းရောင်းဝယ်ရေး လုပ်ငန်းရှင်များအသင်း (ကုန်သည် အသင်း)က ကိုးကန့်ကုန်သည်များနှင့် စက်မှုလက်မှုလုပ်ငန်းရှင်များအသင်းကို ဖိတ်ကြား၍ ဖမ်းဆီးခံရသော ကိုးကန့်လုပ်ငန်းရှင်များမှ သွားရောက် တက်ရောက်ခဲ့ခြင်း ဖြစ်သည်။
လက်ရှိ တရုတ်ပြည်မှာ ဖမ်းဆီးခံထားရသော ကိုးကန့်လုပ်ငန်းရှင်များမှာ ဝေချင်းထောင်၊ လျိုကျိန်းချီ၊ ပီဟွေကျွင်း (ခေါ်) ရန်လောက်ပီ၊ တိန်ကျီးတာ၊ ကျိုရှောက်ခိုက်၊ ဝင်းချောက်နိန်း၊ စူးဟုန်းရှန်း၊ လီအားဖူး၊ လျိုစွတ်နိန်း၊ ချွေးစောက်ပန်း (ခေါ်) ချဲအိုက်ဟွာ၊ ပီလင်းကော် တို့ဖြစ်ကြသည်။
၂၀၂၃ ခုနှစ်၊ စက်တင်ဘာ ၆ ရက်က UWSA က တရုတ်အွန်လိုင်းလောင်းကစားလုပ်နေသူ ၁၀၀၀ ကျော်ကို တရုတ်ကို လွှဲပြောင်းပေးနေစဉ်
ထိုပုဂ္ဂိုလ်များသည် တရုတ်နိုင်ငံ၏ သက်ဆိုင်ရာဥပဒေ စည်းမျဉ်းများကို ချိုးဖောက်သည်ဟု ယူဆသည့်အတွက် ကြောင့် တရုတ်ရဲတပ်ဖွဲ့မှ ဥပဒေနှင့်အညီ ဖမ်းဆီးချုပ်နှောင်ထားကြောင်း၊ လက်ရှိတွင် တရုတ်ဘက်မှ ဥပဒေအရ အမှုများကို စစ်ဆေးနေကြောင်း စာတစ်စောင် ပို့လာသည်ကို တွေ့ရသည်။
လက်ရှိတွင် တရုတ်-မြန်မာ ပူးပေါင်း၍ မြန်မာနိုင်ငံအတွင်းရှိ တရုတ်အွန်လိုင်း လောင်းကစား (ကျားဖြန့်ဟု ခေါ်ဝေါ်ကြ)များကို “ဝ”ဒေသနှင့် ကိုးကန့်ဒေသတို့တွင် ပြင်းပြင်းထန်ထန် ဖမ်းဆီးနေချိန်နှင့် တိုက်ဆိုင်နေခြင်း ကြောင့် ယခု ဖမ်းဆီးခံရသူများသည် တရုတ်အွန်လိုင်း လောင်းကစားများဖြင့် ပတ်သက်နေနိုင်ကြောင်း သုံးသပ် မှုများလည်း ရှိသည်။
တရုတ်နှင့်နီးစပ်သူ တစ်ဦးကတော့ တရုတ်အစိုးရသည် ကျားဖြန့် လုပ်ငန်းသည် အမျိုးသားလုံခြုံရေးကို ထိခိုက် စေသည်ဟု ရှုမြင်သည့်အတွက် အပြင်းအထန် ဖမ်းဆီးမှုများ ပြုလုပ်လာနိုင်သည်ဟု ပြောသည်။
