CNI News

၂၀၂၃ ခုနှစ်၊ဖေဖော်ဝါရီ ၁

ပြည်ပအလုပ်အကိုင်အေဂျင်စီများဖြင့် သွားရောက်အလုပ်လုပ်ကိုင်မည့် အလုပ်သမားများ၏ အခွင့်အရေးများ မနစ်နာစေရန်အတွက် နိုင်ငံကူးလက်မှတ်ထုတ်ပေးခြင်းအား ပြည်ထဲရေးဝန်ကြီးဌာနနှင့် ညှိနှိုင်းသွားမည် ဖြစ်ကြောင်း အလုပ်သမားဝန်ကြီးဌာနမှ အမြဲတမ်းအတွင်းဝန် ဦးညွန့်ဝင်းက CNI သတင်းဌာနသို့ ပြောသည်။

အလုပ်သမားဝန်ကြီးဌာနအနေဖြင့် အလုပ်သမားများ၏ အခွင့်အရေး မနစ်နာစေရန် လုပ်ဆောင်နိုင်သည့် မူဘောင်အတွင်းမှ အတတ်နိုင်ဆုံး ကြိုးစားဆောင်ရွက်နေကြောင်း ၎င်းက ပြောသည်။

“တတ်နိုင်သလောက် အလုပ်သမားဝန်ကြီးဌာနကနေပြီးတော့ Black List အသွင်းခံထားရတဲ့ ပြည်ပအလုပ် အကိုင်အေဂျင်စီတွေနဲ့ ပတ်သက်ပြီးတော့ အသင်းချုပ်ပေါ့ MOEAF နဲ့ ပေါင်းစပ်ပြီးတော့ စိစစ်မှုတွေ လုပ်နေ ပါတယ်။ အဲဒီထဲကနေပြီးတော့ ရာခိုင်နှုန်းအရ အမှန်များတာပေါ့နော်။ သံသယဖြစ်ဖွယ် ကိစ္စမျိုး မရှိရတဲ့လူ၊ clear ဖြစ်လောက်မယ့်အနေအထားမျိုး ဆိုရင်တော့ ပြည်ထဲရေးဘက်ကို မေတ္တာရပ်ခံပြီး သူတို့နဲ့ ဆက်စပ်ပြီး တော့ လုပ်နေတဲ့ MOU လုပ်သားတွေ၊ နောက်တစ်ခါ အခြား ပြည်ပနိုင်ငံတွေကို သွားမယ့် လုပ်သားတွေရှိတဲ့အတွက် သူတို့ရဲ့အခွင့်အရေးတွေ၊ သူတို့ရဲ့ ရင်းနှီးမြှုပ်နှံထားရမှုတွေ မနစ်နာစေဖို့အတွက် အတတ်နိုင်ဆုံး ဒါလေးတွေ ပြန်ဖွင့်ပေးဖို့တော့ ကျနော်တို့ စိစစ်မှုတွေ လုပ်နေပါတယ်။ စိစစ်မှုတွေလုပ်ပြီးရင်တော့ ပြည်ထဲရေးဘက်ကို ကျနော်တို့ဘက်ကနေတဆင့် စိစစ်တင်ပြပြီးတော့ ညှိနှိုင်းတဲ့ဥစ္စာလေး ဆောင်ရွက်သွားဖို့ လုပ်နေတယ် ဆိုတဲ့ အတွက် ပြောချင်တာကတော့ အလုပ်သမားတွေရဲ့ အခွင့်အရေးတွေ မနစ်နာနိုင်အောင်အတွက် အလုပ်သမား ဝန်ကြီးဌာနအနေနဲ့ ကိုယ့်ရဲ့လုပ်နိုင်တဲ့ မူဘောင်အတွင်းက လုပ်နိုင်တဲ့လုပ်ပိုင်ခွင့်အတွင်းက အတတ်နိုင်ဆုံး စိစစ်ကြိုးစား ဆောင်ရွက်နေတယ်လို့ ပြောချင်ပါတယ်”ဟု ၎င်းက ပြောသည်။

လက်ရှိတွင် အလုပ်သမားညွှန်ကြားရေးဦးစီးဌာန၏ ခွင့်ပြုပြီး အလုပ်ခေါ်စာဖြင့် စေလွှတ်မည့် အလုပ်သမား များအတွက် ပြည်ထဲရေးဝန်ကြီးဌာနမှ Black List သွင်းထားသည့် အေဂျင်စီ ၁၃၃ ခုမှအပ ကျန်အေဂျင်စီ များသည် နိုင်ငံကူးလက်မှတ်လျှောက်ထားမည့် စာရင်းများအား ပြည်ထဲရေးဝန်ကြီးဌာနသို့ တင်ပြထားကြောင်း သိရသည်။

နိုင်ငံကူးလက်မှတ်ရရှိရန် တန်းစီစောင့်ဆိုင်းနေကြသူများ

ထိုအလုပ်သမားများထဲတွင် MOU ဖြင့် သွားရောက်မည့်သူများအပြင် အခြားနိုင်ငံများသို့ အေဂျင်စီများမှတဆင့် သွားရောက်လုပ်ကိုင်မည့်သူများလည်း ပါဝင်ကြောင်း သိရသည်။

၎င်းတို့အား နိုင်ငံကူးလက်မှတ်ထုတ်ပေးခြင်းအား မည်သည့်ကာလတွင် ထုတ်ပေးမည်ကို ပြော၍မရသော်လည်း တင်ပြထားသည့် စာရင်းများအား ပြည်ထဲရေးဝန်ကြီးဌာနမှ စိစစ်ပြီးပါက နိုင်ငံကူးလက်မှတ် ထုတ်ပေးရေးနှင့် ပတ်သက်၍ ပြည်ထဲရေးဝန်ကြီးဌာနလက်အောက်ရှိ သက်ဆိုင်ရာမှ ထုတ်ပြန်ပေးသွားမည်ဖြစ်ကြောင်းလည်း အလုပ်သမားဝန်ကြီးဌာနမှ သိရသည်။

မြန်မာတစ်နိုင်ငံလုံးအတိုင်းအတာဖြင့် နိုင်ငံကူးလက်မှတ်ထုတ်ပေးသည့် ရုံးများအားလုံးတွင် နိုင်ငံကူးလက်မှတ် လျှောက်ထားခြင်းအား ၂၀၂၂ ခုနှစ် နှစ်ကုန်ပိုင်းမှ စတင်ကာ ရက်အကန့်အသတ်မရှိ ယာယီရပ်ဆိုင်းထားခြင်း ဖြစ်သည်။

ထိုသို့ ရပ်ဆိုင်းထားခြင်းကြောင့် အိမ်နီးချင်းနိုင်ငံများသို့ တရားဝင် သွားရောက်လုပ်ကိုင်မည့်သူများအနေဖြင့် တရားမဝင်လမ်းကြောင်းအား ရွေးချယ်ကာ သွားရောက်လုပ်ကိုင်မှုများ ရှိလာနိုင်ကြောင်း FED မှ အမှုဆောင် ဒါရိုက်တာ ဦးထူးချစ်က CNI သတင်းဌာနသို့ ပြောသည်။

ထို့အပြင် ယခုကဲ့သို့ နိုင်ငံကူးလက်မှတ်ထုတ်ပေးမှုအား ရက်အကန့်အသတ်မရှိ ရပ်ဆိုင်းထားခြင်းသည် နိုင်ငံ တစ်နိုင်ငံအနေဖြင့် မလုပ်သင့်သည့် ကိစ္စရပ်တစ်ခုဖြစ်ကြောင်းလည်း ၎င်းက ပြောသည်။

ဦးထူးချစ်က “အဓိကက ဘယ်အစိုးရပဲဖြစ်ဖြစ်၊ အစိုးရတွေအနေနဲ့ အစိုးရတစ်ရပ်အနေနဲ့ ကျနော်တို့ နိုင်ငံကူး လက်မှတ်ကို ရပ်ဆိုင်းတာတို့၊ မထုတ်ပေးတာတို့ ဖြစ်တဲ့ဟာက ကျနော်တို့ရွှေ့ပြောင်း အလုပ်သမားတွေကို တရားမဝင်တဲ့ အလုပ်သမားတွေဖြစ်အောင် တွန်းပို့နေသလိုဖြစ်တယ်။ အဲဒါတွေကတော့ မလုပ်သင့် မလုပ်ထိုက် တဲ့ ကိစ္စဖြစ်တယ်။ ဘာဖြစ်လို့လဲဆိုတော့ အလုပ်သမားတွေက ဘာပဲပြောပြော သူတို့ တရားဝင်သွားဖို့ ကြိုးစား တဲ့အချိန်မှာ အစိုးရတွေအနေနဲ့ တရားဝင်သွားလို့ လာလို့ရအောင် သူတို့ကိုယ်တိုင်တောင်မှ ပံ့ပိုးသင့်တဲ့ကိစ္စမှာ အခုလိုမျိုး ကြန့်ကြာတာတို့၊ နောက်တစ်ခုက ပတ်စပို့တစ်ခုရဖို့ကို အင်မတန်မှ ဈေးနှုန်းကြီးတာတို့၊ ခက်ခဲတာတို့ ဖြစ်တဲ့ကိစ္စတွေသည် နိုင်ငံတကာမှာသွားပြီးတော့ တရားမဝင်ပေါ့။ အဓိကတော့ ထိုင်းနိုင်ငံကို တရားမဝင် သွားလုပ်ကြပါဆိုတဲ့ ပုံစံမျိုးကို တွန်းပို့တဲ့ ပုံစံမျိုး ဖြစ်နေတယ်လို့ မြင်တယ်။ အဓိကကတော့ နိုင်ငံတစ်နိုင်ငံ အနေနဲ့ အဲဒီ နိုင်ငံကူးလက်မှတ်ပေါ့ သူတို့ရဲ့ အခွင့်အရေးဖြစ်တဲ့ နိုင်ငံသား တစ်ယောက်က နိုင်ငံကူးလက်မှတ်ကို ထိန်းချုပ်တယ်၊ ကြန့်ကြာအောင်လုပ်တယ်ဆိုတာက မလုပ်သင့် မလုပ်ထိုက်တဲ့ဟာပေါ့။ ကျနော်တို့အနေနဲ့လည်း ပြောရခက်တာက သူ ဘယ်အချိန်မှ သူတို့ကိုယ်တိုင်လည်း မထုတ်ပြန်သေးတော့လေ။ ဒါပေမယ့်လည်း ကျနော် ထင်ပါတယ် အဲဒီလိုကြီး ပိတ်ထားလို့တော့ မရဘူး။ သူတို့ အချိန်ကာလတစ်ခုမှာတော့ ထုတ်ပေးမယ်လို့တော့ မျှော်လင့်ရပါတယ်” ဟု ပြောသည်။

ထို့အပြင် သက်ဆိုင်ရာအစိုးရတစ်ရပ်အနေဖြင့် မြန်မာနိုင်ငံသားများအား လွယ်ကူစွာဖြင့် ပြည်ပနိုင်ငံတွင် သွားရောက်လုပ်ကိုင်နိုင်စေရန် စနစ်တကျ ကူညီဆောင်ရွက်ပေးသင့်ကြောင်းလည်း FED မှ အမှုဆောင်ဒါရိုက်တာ ဦးထူးချစ်က ဆက်ပြောသည်။

လူမှုကွန်ရက်စာမျက်နှာတွင် ဇန်နဝါရီလကုန်ပိုင်း၌ ပြန်လည်ဖွင့်လှစ်မည်ဟု ပြောဆိုမှုများရှိခဲ့သော်လည်း ယနေ့ အထိ ပြန်လည်ဖွင့်လှစ်ခြင်း မရှိပေ။

မြန်မာနိုင်ငံရှိ နိုင်ငံကူးလက်မှတ်ထုတ်ပေးရေးရုံးများအား ရက်အကန့်အသတ်မရှိ ရပ်ဆိုင်းထားခြင်းသည် စနစ် အသစ်ပြင်ဆင်ရေးဆွဲခြင်း၊ နိုင်ငံရေးနှင့် လုံခြုံရေးကိစ္စရပ်များ၊ လူသားအရင်းအမြစ်ဆုံးရှုံးမှု အစရှိသည့် အကြောင်း များကြောင့် ဖြစ်နိုင်သည်ဟုလည်း ထင်မြင်ပြောဆိုမှုများ ရှိနေသည်။