CNI Sport News
၂၀၂၆ ခုနှစ်၊ ဇွန်လ ၁၅
ဂျပန်အသင်းနည်းပြ မိုရီယာဆုက နယ်သာလန်အသင်းနဲ့ ၂ ဂိုးစီ သရေကျခဲ့တဲ့ ကမ္ဘာ့ဖလားအဖွင့်ပွဲမှာ အသင်းရဲ့ တိုက်ပွဲဝင်နိုင်မှုကို ချီးကျူးခဲ့ပေမယ့် အနိုင် ၃ မှတ် မရခဲ့တဲ့အတွက် စိတ်ပျက်မိတယ်လို့ ပြောခဲ့ပါတယ်။
မိုရီယာဆုက “နယ်သာလန်က အလွန်အားကောင်းပြီး ခက်ခဲတဲ့ ပြိုင်ဘက်အသင်းပါ။ ဒါပေမယ့် ကျနော်တို့ ကစားသမားတွေက စည်းလုံးမှု၊ ဇွဲရှိမှုတို့နဲ့အတူ အဆုံးထိ တိုက်ပွဲဝင်ခဲ့ကြပါတယ်။ ကျနော်တို့ဟာ ရမှတ် ၁ မှတ် မဟုတ်ဘဲ ၃ မှတ်ရဖို့ ရည်ရွယ်ခဲ့တာကြောင့် ဒီသရေရလဒ်က စိတ်ပျက်ဖို့ကောင်းခဲ့ပါတယ်”လို့ ပြောခဲ့တာပါ။
ဒီပွဲရဲ့ပထမပိုင်းက ဂိုးမရှိ သရေကျခဲ့ပြီး ပွဲချိန် ၅၁ မိနစ်မှာ ဗန်ဒိုက်က နယ်သာလန်အသင်းအတွက် ဦးဆောင်ဂိုး စတင်သွင်းယူခဲ့တာပါ။
ဒါပေမယ့် ၆ မိနစ်အကြာမှာ နာကာမူရာက ဂျပန်အသင်းအတွက် ချေပဂိုး ပြန်သွင်းခဲ့တာကြောင့် ပွဲက အကြိတ် အနယ် ရှိခဲ့ပါတယ်။
ပွဲချိန် ၆၄ မိနစ်မှာ ဆမ်မာဗယ်လီက နယ်သာလန်အသင်းအတွက် ဦးဆောင်ဂိုး သွင်းယူခဲ့တာကို ၈၉ မိနစ်မှာ ကာမာဒါက ဂျပန်အသင်းအတွက် အဖိုးတန် ချေပဂိုး သွင်းယူပေးခဲ့တာ ဖြစ်ပါတယ်။
နယ်သာလန်နဲ့ဂျပန် ယှဉ်ပြိုင်နေစဉ်
ဂျပန်အသင်းဟာ ဒီပွဲမှာ နယ်သာလန်အသင်းကို အနောက်ကနေ လိုက်ကစားခဲ့ရပေမယ့် နည်းပြမိုရီယာဆုက အနိုင်မရခဲ့လို့ စိတ်ပျက်နေပါတယ်။
နယ်သာလန်အသင်း နည်းပြ ရော်နယ်လ်ကိုးမန်းက ဒီပွဲမှာ ပြသခဲ့တဲ့အရာက သူတို့ရဲ့ အနည်းဆုံး စံနှုန်းဖြစ်ပြီး ပြိုင်ပွဲအတွင်းမှာ ဒီထက်ပိုကောင်းတဲ့ စွမ်းဆောင်ရည်ပြသဖို့ လိုအပ်တယ်လို့ ပြောခဲ့ပါတယ်။
ဒါ့အပြင် ရော်နယ်လ်ကိုးမန်းက သူတို့ဟာ ၂ ကြိမ်တိုင်တိုင် ဦးဆောင်နိုင်ခဲ့တဲ့အတွက် အနိုင်မရခဲ့တာကို စိတ်ပျက် မိပေမယ့် ဂျပန်အသင်းကို လျှော့တွက်ရင် ပြဿနာ ဖြစ်သွားလိမ့်မယ်လို့ ပြောခဲ့တာပါ။
လာမယ့်အုပ်စု ဒုတိယပွဲအဖြစ် နယ်သာလန်အသင်းက ဆွီဒင်အသင်း၊ ဂျပန်အသင်းက တူနီရှားအသင်းနဲ့ ယှဉ်ပြိုင် ရမှာ ဖြစ်ပါတယ်။
Source: CNA
