CNI Sport News
၂၀၂၅ ခုနှစ်၊ အောက်တိုဘာ ၈
ဒတ်ချ်တိုက်စစ်မှူး ဇက်ခ်ဇီဟာ နည်းပြအာမိုရင် လက်ထက် ဒီရာသီမှာ ပွဲကစားချိန် နည်းပါးနေတဲ့အပေါ် အလွန် စိတ်ပျက်နေပြီး လာမယ့် ဇန်နဝါရီအပြောင်းအရွှေ့မှာ ယူနိုက်တက်အသင်းကနေ ထွက်ခွာဖို့ ဆန္ဒရှိနေပါတယ်။
ဇက်ခ်ဇီဟာ ပြီးခဲ့တဲ့ရာသီက တံကောက်ကြောဒဏ်ရာကြောင့် အနားမယူမီအထိ နည်းပြအာမိုရင်က သူ့ကို ပရီးမီးယားလိဂ်ပြိုင်ပွဲမှာ ၂၁ ပွဲဆက်တိုက် အသုံးပြုခဲ့တာပါ။
ဒါပေမယ့် ဒီရာသီမှာ ယူနိုက်တက်အသင်းဟာ တိုက်စစ် ကစားသမားသစ် ၃ ဦး ခေါ်ယူအားဖြည့်ခဲ့မှုကြောင့် ဇက်ခ်ဇီဟာ ပွဲကစားခွင့်ရဖို့ ခက်ခဲနေတာ ဖြစ်ပါတယ်။
ဇက်ခ်ဇီဟာ ဒီရာသီကစားထားတဲ့ ပရီးမီးယားလိဂ် ၃ ပွဲမှာ လူစားဝင်အဖြစ်သာ ပါဝင်ခဲ့ရပြီး သူ့ရဲ့ပွဲကစားချိန်က စုစုပေါင်း ၈၂ မိနစ်သာရှိတာပါ။
ဇက်ခ်ဇီဟာ လာမယ့် ၂၀၂၆ ကမ္ဘာ့ဖလားပြိုင်ပွဲမှာ နယ်သာလန်အသင်း လူစာရင်းထဲ ပါဝင်ဖို့ ရည်ရွယ်ထား တာကြောင့် ပုံမှန်ကစားခွင့် ရနိုင်မယ့် အသင်းတစ်သင်းထံ ပြောင်းရွှေ့ချင်နေပါတယ်။
ဇက်ခ်ဇီကို တွေ့ရစဉ်
ဇက်ခ်ဇီဟာ အောက်တိုဘာထဲကစားမယ့် ၂၀၂၆ ကမ္ဘာ့ဖလား ခြေစစ်ပွဲတွေအတွက် နယ်သာလန်အသင်း လူစာရင်းမှာ ရွေးချယ်ခြင်း မခံခဲ့ရပါဘူး။
အဲဒါကြောင့်လည်း ဇက်ခ်ဇီဟာ ဇန်နဝါရီမှာ ယူနိုက်တက်အသင်းကနေ ထွက်ခွာဖို့ ဆန္ဒရှိနေတာပါ။
အသက် ၂၄ နှစ်အရွယ်ရှိ ကစားသမားကို ပြီးခဲ့တဲ့နွေရာသီက ဂျူဗင်တပ်စ်နဲ့ နာပိုလီအသင်းတို့က စိတ်ဝင်စား ခဲ့ပေမယ့် ယူနိုက်တက်အသင်းက သူတို့ရဲ့စိတ်ဝင်စားမှုတွေကို ပယ်ချခဲ့ပါတယ်။
လက်ရှိအချိန်မှာ ဇက်ခ်ဇီကို ခေါ်ယူဖို့ ဖာဘရီဂတ်စ် ကိုင်တွယ်နေတဲ့ စီးရီးအေကလပ် ကိုမိုအသင်းက စိတ်ဝင် စားနေပါတယ်။
ကိုမိုအသင်းဟာ သူတို့ရဲ့ တိုက်စစ်ပိုင်းကို ပိုပြီးအားကောင်းစေဖို့နဲ့ အမှတ်ပေးဇယား အထက်ပိုင်းကို တက်နိုင်ဖို့ ဇက်ခ်ဇီကို ဇန်နဝါရီမှာ ခေါ်ယူချင်နေတာပါ။
ဇက်ခ်ဇီဟာ စီးရီးအေကလပ် ဘိုလော့ဂ်နာအသင်းမှာ ကစားခဲ့ချိန်က ခြေစွမ်းပြသနိုင်ခဲ့တာကြောင့် စီးရီးအေပြိုင်ပွဲ ထံ ပြန်သွားဖို့ စိတ်ဝင်စားနေပါတယ်။
ယူနိုက်တက်အသင်းဟာ ပြီးခဲ့တဲ့နွေရာသီက တိုက်စစ်မှူး ဟော့ဂျ်လန်းကို နာပိုလီအသင်းထံ အငှားနဲ့ ထွက်ခွာခွင့် ပေးခဲ့တာကြောင့် နောက်ထပ် တိုက်စစ်မှူးတစ်ဦးကို ဇန်နဝါရီမှာ ထွက်ခွာခွင့် ပေးမလားဆိုတာ စောင့်ကြည့်ရဦး မှာ ဖြစ်ပါတယ်။
Source: Goal
