CNI Sport News
၂၀၂၄ ခုနှစ်၊ အောက်တိုဘာ ၄
ဂျူဗင်တပ်စ်အသင်းဟာ အဓိကနောက်ခံလူ ဘရီမာ ဒူးအရွတ်(ACL)ဒဏ်ရာ ရရှိခဲ့တာကြောင့် အသင်းလက်မဲ့ ဖြစ်နေတဲ့ ဝါရင့်နောက်ခံလူ ရာမို့စ်ကို ခေါ်ယူဖို့ စဉ်းစားနေပါတယ်။
ဘရီမာဟာ ဂျူဗင်တပ်စ်အသင်းက လိုက်ပ်ဇစ်အသင်းကို အနိုင်ရခဲ့တဲ့ ချန်ပီယံလိဂ်ပွဲစဉ်မှာ ဒဏ်ရာရရှိခဲ့တာ ကြောင့် ရာသီအကုန်ထိ အနားယူရဖွယ်ရှိနေတာပါ။
ဘရီမာဟာ နည်းပြ သီယာဂိုမော့တာရဲ့ နည်းဗျူဟာ အစီအစဉ်တွေမှာ အရေးပါတဲ့သူ ဖြစ်တာကြောင့် သူ့ရဲ့ ဒဏ်ရာ အခြေအနေဟာ ဂျူဗင်တပ်စ်အသင်းအတွက် ကြီးမားတဲ့ ထိုးနှက်ချက်ဖြစ်ခဲ့ပါတယ်။
Tuttosport က ဂျူဗင်တပ်စ်အသင်းဟာ ဘရီမာ အနားယူနေရချိန်မှာ ခံစစ်ပိုင်းအတွက် ရာမို့စ်ကို အားဖြည့်ဖို့ စဉ်းစားနေတယ်လို့ ဖော်ပြထားတာပါ။
ရာမို့စ်ဟာ ပြီးခဲ့တဲ့နွေရာသီက ဆီဗီလာအသင်းကနေ ထွက်ခွာပြီးကတည်းက အသင်းအများအပြားနဲ့ သတင်း ထွက်ခဲ့ပေမယ့် အခုအချိန်ထိ ဘယ်အသင်းကိုမှ ပြောင်းရွှေ့ခြင်း မရှိသေးတာ ဖြစ်ပါတယ်။
ရာမို့စ်ကို တွေ့ရစဉ်
ရာမို့စ်ဟာ လက်ရှိအချိန်မှာ သူ့ရဲ့ကြံ့ခိုင်မှုပိုင်း အကောင်းဆုံးဖြစ်ဖို့ ပြင်ဆင်နေပြီး ထိပ်တန်းအဆင့်မှာ ကစားဖို့ အဆင့်သင့် ဖြစ်နေတယ်ဆိုတာကို သူ့ရဲ့ဆိုရှယ်မီဒီယာမှာ ပြသထားတာပါ။
ရာမို့စ်အပြင် အသင်းလက်မဲ့ဖြစ်နေတဲ့ မာတစ်၊ ကေဂျာနဲ့ မန်နိုလက်စ်တို့လည်း ဂျူဗင်တပ်စ်အသင်းရဲ့ စာရင်းထဲ မှာ ပါဝင်နေတာ ဖြစ်ပါတယ်။
ဒါပေမယ့် ရာမို့စ်ရဲ့ ကြီးမားတဲ့ အတွေ့အကြုံနဲ့ ဂန္ထဝင် အဆင့်အတန်းတွေက ဘရီမာရဲ့နေရာကို အစားထိုးဖို့ အကောင်းဆုံးဖြစ်နိုင်တယ်လို့ သတင်းတွေမှာ ဖော်ပြထားပါတယ်။
ရာမို့စ်ဟာ လာလီဂါနဲ့ ပြင်သစ်လိဂ်တွေမှာ ကစားပြီးဖြစ်လို့ ဂျူဗင်တပ်စ်အသင်းထံ ပြောင်းရွှေ့ခဲ့ရင် စီးရီးအေဟာ သူ့အတွက် တတိယမြောက်အဓိက ဥရောပလိဂ် ဖြစ်လာမှာပါ။
ဂျူဗင်တပ်စ်အသင်းဟာ နည်းပြ သီယာဂိုမော့တာ လက်ထက် ဒီရာသီမှာ ရှုံးပွဲမရှိ ရလဒ်ကောင်းတွေ ရရှိနေပြီး စီးရီးအေပြိုင်ပွဲမှာ အဆင့် ၂ နေရာ ရပ်တည်နေပါတယ်။
ဂျူဗင်တပ်စ်အသင်းဟာ ဒီတစ်ပတ် စီးရီးအေပွဲစဉ်အဖြစ် ကာဂလီယာရီအသင်းနဲ့ ယှဉ်ပြိုင်ရမှာဖြစ်ပါတယ်။
Source: Goal
