CNI News

၂၀၂၆ ခုနှစ်၊ ဧပြီ ၂၇

မြန်မာနိုင်ငံတွင် ဒေါ်လာ၊ ရွှေ၊ အိမ်ခြံမြေနှင့် ကားဈေးကွက် စသည့် နေရာများသို့ ငွေကြေးများ မရောက်ရှိစေရန် အတွက် ဘဏ်မှတဆင့် ငွေသားထုတ်ယူမှုများကို ဗဟိုဘဏ်က ပြီးခဲ့သည့် ဖေဖော်ဝါရီလတွင် ကန့်သတ်ထား ခြင်းကြောင့် လုပ်ငန်းများ လုပ်ကိုင်ရာ၌ ကြန့်ကြာမှုများ ရှိလာကြောင်း စီးပွားရေးလုပ်ငန်းရှင်များက ပြောသည်။

ထိုသို့ စီးပွားရေးနှင့် ပတ်သက်ပြီး ထိန်းချုပ် ကန့်သတ်မှုများ လုပ်ဆောင်ခြင်းသည် တိုင်းပြည်စီးပွားရေး တိုးတက် မှုကို ကြန့်ကြာစေပြီး တိုးတက်သင့်သလောက် တိုးတက်စေရန်အတွက် အဟန့်အတား ဖြစ်စေသည်ဟု စီးပွားရေး လုပ်ငန်းရှင်များနှင့် စီးပွားရေးလေ့လာသုံးသပ်သူများက ထောက်ပြကြသည်။

ဘဏ် ငွေသွင်းငွေထုတ် အပါအဝင် ပို့ကုန်ရငွေများ၊ အိမ်ခြံမြေဈေးကွက်၊ ဒေါ်လာဈေး၊ ရွှေဈေးများကို ထိန်းချုပ်ရာ တွင် အရောင်းအဝယ် ကန့်သတ်ခြင်းမျိုး မဟုတ်ဘဲ အစိုးရ၏ လုပ်ပိုင်ခွင့်နှင့် တခြားသော အခွန်စနစ်များဖြင့် ထိန်းချုပ်၍ ရနိုင်သည်ဟု စီးပွားရေးလေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

၎င်းက “ထိန်းချုပ်ချင်တာ ထိန်းချုပ်ချင်တဲ့နည်းနဲ့ ထိန်းချုပ်လေ။ အခွန်နဲ့ ထိန်းချုပ်လို့ရတယ်။ သူ့ဆီမှာရှိတဲ့ ရှင်းရှင်း ပြောရရင်တော့ E – government စနစ်ကို ကောင်းအောင်လုပ်လေ။ E – government ကောင်းရင် လှုပ်လို့ မရပါဘူး။ မြန်မာပြည်မှာ တစ်ခုတည်း limitation တွေ လုပ်ပြီးတော့ ဟိုချုပ်ဒီချုပ်ဆိုတာက ဆရာတို့ အမြဲတမ်း ပြောပြောပါတယ်။ ဒါကြီးကို reform ပြန်လုပ်ရမယ်။ အခု ခက်တာကလည်း စီးပွားရေးကို ဘယ်သူ အကြံဉာဏ် ပေးနေလဲတော့ မသိဘူး။ သွားတဲ့ main structure ကြီးတွေကိုက မှားနေတဲ့ အခါကျတော့ တိုင်းပြည် စီးပွားရေးက တိုးတက်သလောက် မတိုးတက်ဘူး” ဟု ပြောသည်။ 

မြန်မာနိုင်ငံသားများ ဘဏ်ကို တွေ့ရစဉ်

၂၀၂၁ ခုနှစ် နိုင်ငံရေး အပြောင်းအလဲ ဖြစ်ပေါ်ပြီး နောက်ပိုင်းတွင် ဘဏ်များမှတဆင့် ငွေသားထုတ်ယူမှု ခက်ခဲ သည့်ပြဿနာ ပေါ်ပေါက်လာပြီး လက်ရှိ ပြည်သူနှင့် လုပ်ငန်းရှင်များ အဓိက ကြုံတွေ့နေရသည့် ကိစ္စသည် ဘဏ် များမှ ငွေထုတ်ရာတွင် အကန့်အသတ်ဖြင့် ထုတ်ပေးနေခြင်းဖြစ်သည်။

ဘဏ်များမှ ယခင်က ကျပ်သိန်း ရာကဏန်း ထုတ်ပေးခဲ့သော်လည်း လက်ရှိတွင် ကျပ်သိန်း ၅၀ အထိသာ ထုတ်ပေးနေခြင်းကြောင့် လုပ်ငန်းကြန့်ကြာမှုများ ဖြစ်ပေါ်နေသည်။

ထို့အပြင် ရွှေဆိုင်များတွင် ရွှေဝယ်ယူမှုများ၌ အွန်လိုင်းငွေပေးချေမှုထက် ငွေသားဖြင့် ဝယ်ယူသူကိုသာ ဦးစားပေး ရောင်းချပေးသည့် သတင်းများလည်း ထွက်ပေါ်လျက် ရှိနေသည်။

ငွေသားထုတ်ယူမှုများကို ကန့်သတ်ခြင်းကြောင့် အောက်ခြေလူတန်းစား ပြည်သူလူထုကို အဓိက သက်ရောက်မှု ဖြစ်ပေါ်စေပြီး ငွေကြေးဖောင်းပွမှုကို ပို၍ ဖြစ်ပေါ်စေသည်ဟု စီးပွားရေးနှင့်ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

UAB ဘဏ်ခွဲတစ်ခုကို တွေ့ရစဉ်

၎င်းက “အဓိက,ကတော့ အောက်ခြေ လူတန်းစားပဲ ထိခိုက်မှာပေါ့ဗျာ။ သူတို့ကတော့ ဒီဥစ္စာရပြီးရင် ဘာလုပ်မလဲ ဆိုတော့ မြေသွားဝယ်မယ်၊ ရွှေသွားဝယ်မယ်၊ ဘယ်လိုမှ မရှုံးဘူးလေ။ ပြီးရင် နည်းနည်းပါးပါး ၁ လ၊ ၂ လ ထား မယ်၊ မဟုတ်ရင် ၂ ရက် ၃ ရက် ထားမယ်၊ မြတ်မယ် ရောင်းမယ် ငွေတွေရလာမယ်၊ အဓိက,က စားသုံးသူ ရှိတယ်ဆိုတာ ဒီလိုလုပ်ဆောင်မှုတွေကြောင့် ပိုပြီး ငွေဖောင်းပွလာမယ် လိုအပ်တာထက်” ဟု ပြောသည်။

လက်ရှိ အစိုးရသစ်၏ ရက် ၁၀၀ စီမံကိန်းတွင် စီးပွားရေး လုပ်ငန်းများနှင့် ပတ်သက်၍ လုပ်ဆောင်နေမှုများ ရှိသော်လည်း ငွေကြေးပိုင်းတွင် အဓိကကျသည့် ဗဟိုဘဏ် အနေဖြင့် မည်ကဲ့သို့ ပြင်ဆင်မည်ကို စီးပွားရေး လုပ်ငန်းရှင်များနှင့် လေ့လာသူများက စောင့်ကြည့်နေကြသည်။

နိုင်ငံတကာ၌ ငွေသား အသုံးပြုမှုကို လျှော့ချလာနေသည့် အနေအထားတွင် မြန်မာနိုင်ငံ အနေဖြင့်လည်း ဒစ်ဂျစ်ဒယ် ငွေပေးချေမှုစနစ်ကို အလေးထား ဆောင်ရွက်ရန် လိုအပ်သည်ဟု ထောက်ပြကြသည်။

လက်ရှိတွင် AYA, KBZ, CB နှင့် တခြားသော ဘဏ်များသည် ဘဏ်အပ်ငွေများကို ပြန်လည်ထုတ်ယူရာတွင် အကန့်အသတ်ဖြင့်သာ ထုတ်ပေးနေသော်လည်း UAB ဘဏ်ကမူ ကန့်သတ်ထုတ်ပေးခြင်းမရှိကြောင်း၊ ထို့ကြောင့် UAB ဘဏ် အကောင့်များ ဖွင့်လှစ်မှု ပိုများလာကြောင်း ပြည်သူလူထုက ပြောသည်။