CNI News
၂၀၂၅ ခုနှစ်၊ ဇူလိုင် ၃
ထိုင်းနိုင်ငံတွင် လက်ရှိ အလုပ်သမားဝန်ကြီးအသစ် လက်ထက်၌ အထောက်အထား စာရွက်စာတမ်း သက်တမ်း ကုန်ဆုံးနေသည့် မြန်မာရွှေ့ပြောင်းလုပ်သား ၁၈ သိန်းခန့်ကို အမြန်ဆုံး သက်တမ်းတိုးခွင့် ပြုစေလိုကြောင်း ရွှေ့ပြောင်းအလုပ်သမားအရေး ဆောင်ရွက်သူများက CNI သတင်းဌာနသို့ ပြောသည်။
အဆိုပါ မြန်မာရွေ့ပြောင်းလုပ်သား ၁၈ သိန်းခန့်သည် ပြီးခဲ့သည့် ၂၀၂၅ ခုနှစ်၊ ဖေဖော်ဝါရီလ ၁၃ ရက်နေ့ ကတည်းက ဗီဇာ အပါအဝင် အထောက်အထား စာရွက်စာတမ်းများ သက်တမ်းကုန်ဆုံး နေခြင်းဖြစ်ကာ ထိုင်းအစိုးရမှ သက်တမ်းတိုးခွင့်ကို ယာယီရပ်ဆိုင်းထားခြင်းဖြစ်သည်။
လက်ရှိ ထိုင်းနိုင်ငံ၌ အစိုးရအဖွဲ့ အပြောင်းအလဲကြား သက်တမ်းတိုးရေးကိစ္စကို တစ်စုံတစ်ရာ ထုတ်ပြန်ခြင်း မရှိသေးသော်လည်း အလျင်အမြန် ဆောင်ရွက်ပေးရန် မျှော်လင့်ကြောင်း အလုပ်သမားအရေး ဆောင်ရွက်နေသူ ဦးအောင်ကျော်က CNI သတင်းဌာနသို့ ပြောသည်။
မြန်မာရွှေ့ပြောင်းလုပ်သားများကိုတွေ့ရစဉ်
၎င်းက “ ကျနော်တို့လည်း အဲဒါကို လေ့လာစောင့်ကြည့်နေတာပါ။ ထိုင်းနိုင်ငံရေး အပြောင်းအလဲမှာ ကျနော်တို့ရဲ့ အလုပ်သမားအရေး စီမံခန့်ခွဲအုပ်ချုပ်တဲ့ လူကြီးကိုယ်တိုင် နုတ်ထွက်သွားပြီးတဲ့အခါမှာ လက်ရှိအချိန်မှာ ကျနော် တို့ ထိုင်းနိုင်ငံမှာရှိတဲ့ ရွှေ့ပြောင်းလုပ်သား ၁၈ သိန်းဟာ စာရွက်စာတမ်း သက်တမ်းတိုးတဲ့ကိစ္စတွေ ဒုက္ခရောက် နေတယ်။ အလုပ်သမားဝန်ကြီးသစ် တက်လာတဲ့အခါမှာ လေ့လာသုံးသပ်ရာမှာ ဒီအလုပ်သမားတွေနဲ့ပတ်သက်ပြီး သက်တမ်းတိုးတဲ့ကိစ္စကို အလျင်အမြန် ပြန်လည်ဆောင်ရွက်ပေးလိမ့်မယ်လို့ ယုံကြည်မျှော်လင့်တာပေါ့။ ကျနော် တို့ လောလောဆယ် ထိုင်းနိုင်ငံမှာ ရွှေ့ပြောင်းလုပ်သား ၁၈ သိန်းဟာ ၂၀၂၅ ဖေဖော်ဝါရီ ၁၃ ရက်ကတည်းက သက်တမ်းတွေ ကုန်တယ်။ အဲဒါကို သက်တမ်းတိုးဖို့ ကိစ္စတွေက အခုထိ ဘာမှ အကောင်အထည် ဖော်နိုင်တာ တော့ မတွေ့ရသေးဘူး။ သူတို့ကတော့ ဖြေလျှော့ဥပဒေနဲ့ ဩဂုတ်လ ၁၃ ရက်နေ့အထိ ဒီအလုပ်သမားတွေက ပုံမှန်လုပ်ကိုင် သွားလာနေထိုင် စားသောက်နေရတယ်ဆိုတဲ့ ပုံစံမျိုးခွင့်ပြုထားတာပဲရှိတယ်။ ဒါတွေကို သက်တမ်း ဘယ်အချိန်တိုးမလဲ။ ဝန်ကြီးအသစ် ရောက်လာလို့ သက်တမ်းတိုးတဲ့ကိစ္စတွေများ အလျင်အမြန် ဆောင်ရွက် မလားလို့ မျှော်လင့်တာပေါ့" ဟု ပြောသည်။
ထိုင်းနှင့်ကမ္ဘောဒီးယားတို့အကြား နယ်စပ်အငြင်းပွားမှု ပြဿနာဖြစ်ပြီးနောက် ထိုင်းအလုပ်သမားဝန်ကြီး ဖိဖတ်ရတ်ချကစ်ပရကန်သည် ဇွန်လ ၁၉ ရက်နေ့တွင် ရာထူးမှ နှုတ်ထွက်သွားခဲ့ပြီးနောက် လက်ရှိတွင် ဝန်ကြီးအသစ် ဖုန်ကဝင် ဂျင်ရွန်းရန်ကစ် (Pongkawin Juangroongruangkit) ကို ခန့်အပ် တာဝန်ပေး ထားသည်။
အလုပ်သမားဝန်ကြီး အပြောင်းအလဲ ဖြစ်သော်လည်း အလုပ်သမား အရေးနှင့်ပတ်သက်၍ ယခင်ဝန်ကြီး လက်ထက်က စီစဉ်ခဲ့သည့်အတိုင်း ဆက်လက် လုပ်ဆောင်သွားနိုင်ဖွယ်ရှိသော်လည်း လွှတ်တော် ဖျက်သိမ်းခဲ့ မည်ဆိုပါက အပြောင်းအလဲ ဖြစ်သွားနိုင်ကြောင်း အလုပ်သမားအရေး ကူညီဆောင်ရွက်နေသူ ဦးမင်းဦးက CNI သတင်းဌာနသို့ ပြောသည်။
ရာထူးဆိုင်းငံ့ခံထားရသော ဝန်ကြီးချုပ်ပေတုန်တန်ကိုတွေ့ရစဉ်
၎င်းက “အခုအလုပ်သမားရေးဝန်ကြီး အသစ်ကတော့ အလုပ်သမားအရေးနဲ့ ပတ်သက်တာတွေကို ပုံမှန် ဆက်လုပ်နေတာ တွေ့ရတယ်။ အလုပ်သမားဝန်ကြီးဌာန website မှာ ဝန်ကြီး ပြောင်းသွားတယ်ဆိုပေမယ့် ဥပမာအားဖြင့် လုပ်အားခကိစ္စ အဲဒါလည်း ဇူလိုင် ၁ ရက်နေ့က စပြီး ၄၀၀ ဖြစ်တဲ့ကိစ္စ တရားဝင် အတည်ပြု တယ်ပေါ့။ အဲဒါမျိုးတွေ။ ဒီဟာတွေကတော့ ရှေ့ကလုပ်ငန်းစဉ်တွေ ချမှတ်ထားတဲ့ဟာတွေ၊ စီစဉ်ထားတဲ့ဟာတွေ အခုနောက် အသစ်တက်လာတဲ့ ဝန်ကြီးအဖွဲ့ကနေ ဆက်တော့ လုပ်သွားမယ့် သဘောရှိတယ်။ သို့သော် ခုနက ပြောတဲ့ အတိုက်အခံတွေရော တောင်းဆိုနေတဲ့ အနေအထားတွေ အရဆိုရင် တကယ်လို့သာ လွှတ်တော်ကို ဖျက်သိမ်းတယ်ဆိုရင် အဲဒါဆိုရင်တော့ ရွေးကောက်ပွဲတွေဘာတွေ ပြန်ဖြစ်တယ်ဆိုရင် အပြောင်းအလဲ ဖြစ်သွား နိုင်တယ်။ လောလောဆယ်ကတော့ ရှေ့မှာရှိနေတဲ့ ဝန်ကြီးတွေရဲ့ ချမှတ်ထားတဲ့ အတိုင်းကတော့ လောလော ဆယ် ဒီကာလမှာတော့ သွားဦးမှာပဲ” ဟု ပြောသည်။
လက်ရှိ ထိုင်းနိုင်ငံတွင် ထိုင်းနှင့်ကမ္ဘောဒီးယား နယ်စပ်ပဋိပက္ခသည် နိုင်ငံရေး အကျပ်အတည်း ဖြစ်ပွားနေပြီး ဝန်ကြီးချုပ် ပေတုန်တန် ရာထူးမှ ဆိုင်းငံ့ခံထားရကာ တရားရုံးက စစ်ဆေးနေသည်။
ထို့နောက် ဒုတိယဝန်ကြီးချုပ်ဖြစ်သည့် သူရိယ ဂျူအန်ရွန်ရူအန်ကစ် (၇၀ နှစ်)က ယာယီဝန်ကြီးချုပ်အဖြစ် တာဝန်ယူထားသည်။
လက်ရှိတွင် တရားရုံး၏ နောက်ဆုံး စီရင်ချက် မချမီ အချိန်အထိ ပေတုန်တန်သည် ရာထူးမှ ဆိုင်းငံ့ခံထားရမည် ဖြစ်သော်လည်း အစိုးရအဖွဲ့တွင် ယဥ်ကျေးမှုဝန်ကြီးအဖြစ် ဆက်ရှိနေကြောင်း သိရသည်။
