- By CNI
- Category: အားကစား
- Hits: 1110
CNI Sport News
၂၀၂၂ ခုနှစ်၊ ဒီဇင်ဘာ ၃၀
ပီအက်စ်ဂျီအသင်း တိုက်စစ်မှူး ဘတ်ပီက ကမ္ဘာ့ဖလားပြိုင်ပွဲမှာ ဖြစ်ခဲ့တာနဲ့ ပတ်သက်ပြီး အာဂျင်တီးနား ဂိုးသမား မာတီးနတ်စ်နဲ့ စကားလုံးစစ်ပွဲကို စတင်ဖို့အတွက် အချိန်ဖြုန်းတီးနေမှာ မဟုတ်ဘူးလို့ ပြောလိုက် ပါတယ်။
ဘတ်ပီက “သူတို့က ကျနော့်ရဲ့ ပြဿနာမဟုတ်ပါဘူး။ ဒီလို အရာတွေနဲ့ပတ်သက်ပြီး ကျနော့်မှာ အချိန်ဖြုန်းတီးဖို့ စွမ်းအားတွေ မရှိပါဘူး။ ဘယ်တော့မှချေဖျက်ပြီး တုန့်ပြန်နေမှာ မဟုတ်ပါဘူး။ နည်းပြနဲ့ အသင်းဖော်တွေကို ကျနော် ပြောခဲ့သလိုပဲ ကျနော့်အသင်းက နိုင်ငံအသင်း ရှုံးနိမ့်မှုအတွက် ပေးချေရမယ်ဆိုတဲ့ အကြောင်းပြချက် မရှိပါဘူး။ ဒါဟာ မတူညီတဲ့ အခြေအနေနှစ်ခုပါ”လို့ ပြောခဲ့တာပါ။
မာတီးနတ်စ်ဟာ ကမ္ဘာ့ဗိုလ်လုပွဲအပြီး အဝတ်စားလဲခန်းအတွင်း အောင်ပွဲခံတာမှာ ဘတ်ပီအတွက် တစ်မိနစ် လောက် ငြိမ်သက်ပေးပါလို့ ပြောပြီး အားလုံးက လှောင်ပြောင်ကာ အောင်ပွဲခံခဲ့ကြတာ ဖြစ်ပါတယ်။
ဒါ့အပြင် ဗျူနိုအေရိစ်မှာ ကမ္ဘာ့ဖလား ချန်ပီယံဆုအတွက် အောင်ပွဲခံတာမှာလည်း ဘတ်ပီရဲ့ မျက်နှာပါဝင်တဲ့ ကလေးအရုပ်ကို ကိုင်ဆောင်ပြီး အောင်ပွဲခံခဲ့တာပါ။ ဘတ်ပီကတော့ ဒါနဲ့ ပတ်သက်ပြီး တုန့်ပြန်နေမှာ မဟုတ်ဘူး လို့ ပြောခဲ့ပါတယ်။
ဘတ်ပီ၊ မက်ဆီ၊ မာတီးနတ်စ်တို့ ဆုများ လက်ခံရယူနေစဉ်
ဘတ်ပီဟာ ပီအက်စ်ဂျီအသင်းက စထရာဘောင်းအသင်းကို ၂ ဂိုး- ၁ ဂိုးနဲ့ အနိုင်ရခဲ့တဲ့ ပြင်သစ်လီဂူးဝမ်း ပွဲစဉ်မှာ အသင်းအတွက် ပါဝင်ကစားခဲ့ပြီး နာကျင်အချိန်ပိုမှာ အဖိုးတန် အနိုင်ဂိုးကို သွင်းယူပေးခဲ့တာပါ။
ပြီးခဲ့တဲ့ ကမ္ဘာ့ဖလားပြိုင်ပွဲမှာ ဘတ်ပီဟာ ဂိုးသွင်းရွှေဖိနပ်ဆုကို ရယူနိုင်ခဲ့သလို ဒီရာသီမှာ ပီအက်စ်ဂျီအသင်း အတွက် ပြိုင်ပွဲစုံ ၂၁ ပွဲ ပါဝင်ကစားထားပြီး ၂၀ ဂိုး သွင်းယူထားတာ ဖြစ်ပါတယ်။
စထရာဘောင်းကို အနိုင်ရတဲ့ပွဲမှာ မက်ဆီကလွဲပြီး ပီအက်စ်ဂျီအသင်းမှာ ကမ္ဘာ့ဖလား သွားရောက်ခဲ့တဲ့ ကစား သမားတွေ အကုန် ပါဝင်လာခဲ့တာပါ။ မက်ဆီကိုတော့ ဇန်နဝါရီလ ပထမအပတ်မှာ အသင်းနဲ့ လာရောက် ပူးပေါင်းဖို့ နည်းပြ ဂယ်လ်တီယာက ပြောထားပါတယ်။
Source: Metro
- By CNI
- Category: အားကစား
- Hits: 1537
CNI Sport News
၂၀၂၂ ခုနှစ်၊ ဒီဇင်ဘာ ၂၉
မြန်မာအသင်းနည်းပြ အန်တွမ်နီဟေးက လာအိုအသင်းနဲ့ပွဲမှာ အနိုင်ရဖို့ အကောင်းဆုံး ပြင်ဆင်ပြီးတော့ ကစား သွားမယ်လို့ ပွဲကြို သတင်းစာ ရှင်းလင်းပွဲမှာ ပြောလိုက်ပါတယ်။
အန်တွမ်နီဟေးက “စင်ကာပူနဲ့ ကစားတဲ့ ပွဲအပြီးမှာ ဂိုးသမား အပါအဝင် ကစားသမားအချို့ ဒဏ်ရာပြဿနာတွေ ရှိနေပါတယ်။ မလေးရှား၊ စင်ကာပူနဲ့ပွဲမှာ ရလဒ်ကောင်း မရယူနိုင်ပေမယ့် အသင်းရဲ့ ကစားပုံက ကောင်းမွန်ခဲ့ ပါတယ်။ ကစားသမားတွေရဲ့ ကြိုးစားအားထုတ်မှုကိုလည်း ကျေနပ်ပါတယ်။ အသင်းရဲ့ အနာဂတ်နဲ့ ပတ်သက်ပြီး အကောင်းဆုံး အစီအစဉ်တွေကို ရေးဆွဲထားပြီး ဖြစ်ပါတယ်။ ပြီးခဲ့တဲ့ပွဲတွေမှာ မြန်မာအသင်း ခြေစွမ်းတိုးတက် လာတာကို မြင်တွေ့ရမှာပါ။ လာအိုနဲ့ပွဲမှာ အနိုင်ရဖို့ အကောင်းဆုံး ပြင်ဆင်ကစားသွားမှာပါ”လို့ ပြောခဲ့တာပါ။
မြန်မာအသင်းဟာ အုပ်စုတွင်း အဖွင့်ပွဲစဉ် ၂ ပွဲအဖြစ် မလေးရှား၊ စင်ကာပူအသင်းတို့နဲ့ ကစားခဲ့တာမှာ ၂ ပွဲစလုံး အရေးနိမ့်ခဲ့တာကြောင့် အုပ်စုကနေ နောက်တဆင့်တက်ဖို့ မျှော်လင့်ချက် နည်းပါးသွားခဲ့တာ ဖြစ်ပါတယ်။
မြန်မာအသင်း ယှဉ်ပြိုင်ကစားနေစဉ်(MFF)
မြန်မာအသင်းကစားသမား ဒေးဗစ်ထန်းကလည်း လာအိုနဲ့ပွဲမှာ နိုင်ပွဲရယူဖို့ ကြိုးစားသွားမယ်လို့ ပြောခဲ့တာပါ။
ဒေးဗစ်ထန်းက “လာအိုနဲ့ပွဲမှာ ရလဒ်ကောင်းဖို့ အကောင်းဆုံး ပြင်ဆင်ထားပါတယ်။ နိုင်ပွဲရဖို့ ကျနော်တို့ ကစား သမားတွေ ကြိုးစားသွားမှာ ဖြစ်ပါတယ်။ ဒီပွဲမှာ တစ်သင်းလုံးရဲ့ စွမ်းဆောင်မှုရော၊ တစ်ဦးချင်းစီရဲ့ စွမ်းဆောင်မှုပါ အကောင်းဆုံးပုံစံ ရရှိဖို့ ကြိုးစားမှာပါ။ ကျနော်တို့ အသင်း ရလဒ်ဆိုးဆိုး၊ ကောင်းကောင်း အမြဲတမ်း အားပေးနေ တဲ့ ပရိသတ်ကိုလည်း ကျေးဇူးတင်ပါတယ်”လို့ ပြောခဲ့တာ ဖြစ်ပါတယ်။
လာအိုအသင်းကတော့ အုပ်စုတွင်း ၃ ပွဲ ကစားအပြီးမှာ ၃ ပွဲစလုံး အရေးနိမ့်ကာ အုပ်စုကနေ ထွက်ခွာခဲ့ရပြီဖြစ်ပါ တယ်။ မြန်မာအသင်းနဲ့ လာအိုအသင်းတို့ဟာ ဒီဇင်ဘာလ ၃၀ ရက်မှာ ယှဉ်ပြိုင်ကြမှာ ဖြစ်ပါတယ်။
- By CNI
- Category: Watch TV
- Hits: 647
- By CNI
- Category: အားကစား
- Hits: 2027
CNI Sport News
၂၀၂၂ ခုနှစ်၊ ဒီဇင်ဘာ ၂၈
အယ်လ်နာဆာအသင်းဥက္ကဋ္ဌ အယ်လ်မူအန်မာက ရော်နယ်ဒိုကို ငွေကြေးအများအပြားနဲ့ ဆော်ဒီလိဂ်ကို လာရောက်ဖို့ ချိတ်ဆက်နေတယ်ဆိုတဲ့ သတင်းတွေကို ငြင်းဆန်လိုက်ပါတယ်။
အခုပျံ့နှံနေတဲ့ သတင်းတွေထဲက “အများစုဟာ အလိမ်အညာ”တွေဖြစ်တယ်လို့ အယ်လ်နာဆာ အသင်းဥက္ကဋ္ဌက ပြောခဲ့တာကို စပိန်ကလာတဲ့ သတင်းတွေမှာ ဖော်ပြထားပါတယ်။
ရော်နယ်ဒိုဟာ ယူနိုက်တက်အသင်းနဲ့ စာချုပ်ဖျက်သိမ်းခဲ့ပြီးနောက် လက်ရှိအချိန်မှာ အသင်းသစ် ရှာဖွေနေပါတယ်။
ဆော်ဒီကလပ် အယ်လ်နာဆာအသင်းဟာ ရော်နယ်ဒိုကို တစ်နှစ်လုပ်ခ ပေါင် ၁၇၃ သန်းနဲ့ ကမ်းလှမ်းထားတယ်လို့ သတင်းတွေ ထွက်ပေါ်နေခဲ့တာ ဖြစ်ပါတယ်။
အယ်လ်နာဆာအသင်း အားကစားဒါရိုက်တာကတော့ သူ့ဘက်ကတော့ အပြောင်းအရွှေ့နဲ့ ပတ်သက်ပြီး ပြောခွင့် မရှိဘူးလို့ ပြောထားတာပါ။
ရော်နယ်ဒိုကိုတွေ့ရစဉ်
မာဆယ်လိုဆလာဇာက “ဒီနှစ်ကုန်တဲ့အထိ ဘယ်လိုတွေ ဖြစ်လာမလဲဆိုတာကို စောင့်ကြည့်လိုက်ပါ။ ဒါက ကလပ်အတွက် တင်မဟုတ်ဘဲ ကြီးမားတဲ့ ညှိနှိုင်းမှုတစ်ခုပါ။ ဒါက နိုင်ငံအတွက်ရော ကမ္ဘာ့ဘောလုံးအတွက်ပါ တာဝန်ရှိသူတွေ လုပ်ဆောင်ပေးရမယ့် အရာပါ။ ကျနော်ပြောနိုင်တာက ရော်နယ်ဒိုဟာ ဘောလုံးသမိုင်းရဲ့ အကောင်းဆုံး ကစားသမားတွေထဲက တစ်ဦးပါ။ သူ့ရဲ့ နိုင်လိုစိတ်တွေကြောင့် အားကစားသမားတစ်ဦး အနေနဲ့ စံနမူနာပါပဲ”လို့ ပြောခဲ့ပါတယ်။
ဒါပေမယ့် ရော်နယ်ဒိုဟာ အယ်လ်နာဆာအသင်းနဲ့ ၂၀၃၀ အထိ စာချုပ်ချုပ်မယ်လို့ ဖော်ပြနေပြီး ကစားသမားဟာ ဆော်ဒီနိုင်ငံက ကမ္ဘာ့ဖလားအိမ်ရှင်အဖြစ် ပြုလုပ်ဖို့ ကြိုးပမ်းတာမှာ သံတမန်အဖြစ် ဆောင်ရွက်ပေးရမယ်လို့ သိရပါတယ်။
ရော်နယ်ဒိုအတွက် နောက်ထပ် ရွေးချယ်စရာအသင်းကတော့ ငယ်ဘဝကလပ် စပို့တင်းလစ္စဘွန်းဖြစ်ပြီး အဲဒီ အသင်းကတော့ ကစားသမားကို ခေါ်ယူချင်ပေမယ့် လုပ်ခလစာ ပေးချေဖို့ မတက်နိုင်ဘူးလို့ ပြောထားပါတယ်။
ရော်နယ်ဒိုကတော့ လက်ရှိအချိန်မှာ မိသားစုနဲ့အတူ အနားယူနေပြီး မကြာခင်မှာ သူကစားမယ့် အသင်းသစ်ကို အတည်ပြုပေးဖွယ်ရှိနေပါတယ်။
Source: The Sun
- By CNI
- Category: Watch TV
- Hits: 675
- By CNI
- Category: အားကစား
- Hits: 2397
CNI Sport News
၂၀၂၂ ခုနှစ်၊ ဒီဇင်ဘာ ၂၇
ဝက်စ်ဟမ်းအသင်းကို အနိုင်ရခဲ့တဲ့ ဘောက်ဆင်ဒေးပွဲစဉ်မှာ အသင်းရဲ့ပွဲကိုလာရောက်ကြည့်ရှူခဲ့တဲ့ အာဆင် ဝင်းဂါးဟာ မှန်ကန်တဲ့အချိန်မှာ ရောက်လာခဲ့တာလို့ အာတီတာက ပြောလိုက်ပါတယ်။
အာတီတာက “အာဆင်ဝင်းဂါးဟာ မှန်ကန်တဲ့အချိန်ကို ရွေးချယ်နိုင်ခဲ့ပါတယ်။ဒီနေ့ အသင်းရဲ့စွမ်းဆောင်ရည်က သူနဲ့ထိုက်တန်တဲ့ အဆင့်မှာရှိနေတယ်လို့ ကျနော်ထင်ပါတယ်။သူလာတယ်ဆိုတာကို ကစားသမားတွေ မသိပါဘူး။ဒါဟာ အထူးနေ့တစ်နေ့ပါပဲ။ဒါကြောင့် အခုလိုလာရောက်တဲ့အတွက် အာဆင်ဝင်းဂါးကို ကျေးဇူးတင်ပါတယ်။သူဟာ ကျနော်တို့နဲ့အတူ အချိန်ပိုပေးနိုင်ဖို့ မျှော်လင့်ပါတယ်။သူဟာ သြဇာကြီးမားတဲ့သူ ဖြစ်လို့ ကျနော်တို့ပတ်ဝန်းကျင်မှာရှိတာကောင်းပါတယ်” လို့ ပြောခဲ့တာပါ။
အာဆင်ဝင်းဂါးဟာ အာဆင်နယ်အသင်းကို ၂၂ နှစ်ကြာကိုင်တွယ်ခဲ့ပြီး ၂၀၁၈ မှာ နည်းပြရာထူးကနေ ထွက်ခွာ ခဲ့တာဖြစ်ပါတယ်။အဲဒီနောက်ပိုင်းမှာ အာဆင်ဝင်းဂါးဟာ အာဆင်နယ်အသင်းထံ မလာရောက်တော့ဘဲ ဝက်စ်ဟမ်းနဲ့ ပွဲစဉ်မှ ပြန်လည်လာရောက်ခဲ့တာပါ။ပရိတ်သတ်တွေဟာ သူတို့ရဲ့ဂန္တဝင်နည်းပြကြီး အာဆင်ဝင်းဂါး နာမည်ကို အော်ဟစ်သီကြွေးခဲ့ကြတာဖြစ်ပါတယ်။အာဆင်နယ်အသင်းဟာ ဒီပွဲမှာ ဝက်စ်ဟမ်းအသင်းကို ၃ ဂိုး- ၁ ဂိုးနဲ့ အနိုင်ရရှိခဲ့တာပါ။
ဝက်စ်ဟမ်းအသင်းအတွက် ဘန်နာရာမာက ပင်နယ်တီကနေ ဦးဆောင်ဂိုးသွင်းယူခဲ့တာကို ဆာကာ၊ မာတင် နယ်လီနဲ့ အန်ကိတ်တီယာတို့က သွင်းယူခဲ့တာဖြစ်ပါတယ်။အာဆင်နယ်အသင်းဟာ ဝက်စ်ဟမ်းအသင်းကို အနိုင်ရ ခဲ့တာကြောင့် ပရီးမီးယားလိဂ်အမှတ်ပေးဇယားထိပ်ဆုံးနေရာမှာ ဒုတိယနေရာက နယူးကာဆယ်ကို ၇ မှတ်၊ တတိယနေရာက မန်စီးတီးကို ၈ မှတ်ဖြတ်ပြီး ဦးဆောင်နေတာပါ။
ဂျီးဆပ်စ်မပါဝင်နိုင်တဲ့အချိန်မှာ ပွဲထွက်ခွင့်ရပြီး ဂိုးသွင်းနိုင်ခဲ့တဲ့ အန်ကိတ်တီယာနဲ့ပတ်သက်ပြီး “ ဒီနေ့ သူကစား ခဲ့တဲ့ပုံက လုံးဝထိုက်တန်မှုရှိလို့ သူ့ကို ကြီးမားတဲ့ ပွေ့ဖက်မှုကိုပေးချင်ပါတယ်။ဒါက အန်ကိတ်တီယာသွင်းယူ နေကျပုံစံဖြစ်ပြီး ထူးချွန်တဲ့ စွမ်းဆောင်ရည်ကို ပြသနိုင်ခဲ့ပါတယ်။ဒီနေ့ သူလုပ်ဆောင်ခဲ့တဲ့အရာတွေကို တွေ့မြင် ရတာ ကျနော်ကျေနပ်ပါတယ်။ဂျီးဆပ်စ်ကတော့ မကစားနိုင်ပေမယ့် အသင်းနဲ့အတူရှိနေပါတယ်။သူဟာ ကွင်း ထဲမှာ သက်ရောက်မှုရှိပြီး အန်ကိတ်တီယာကို အကူအညီပေးနေပါတယ်” လို့ အာတီတာက ပြောခဲ့တာဖြစ်ပါတယ်။
အာဆင်နယ်အသင်းဟာ အခုလာမယ့်အပတ်မှာ ပရီးမီးယားလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင် ရမှာဖြစ်ပါတယ်။
Source:DailyMail
- By CNI
- Category: Watch TV
- Hits: 630
- By CNI
- Category: Watch TV
- Hits: 640
- By CNI
- Category: အားကစား
- Hits: 1345
CNI Sport News
၂၀၂၂ ခုနှစ်၊ ဒီဇင်ဘာ ၂၆
စူပါကွန်ပျူတာက အာဆင်နယ်အသင်းဟာ ပရီးမီးယားလိဂ် ဒုတိယရာသီဝက်မှာ အဆင့်ကျဆင်းသွားမှာဖြစ်ပြီး မန်စီးတီးက ၃ နှစ်ဆက် ပရီးမီးယားလိဂ်ဖလားကို ရယူနိုင်မယ်လို့ ခန့်မှန်းလိုက်ပါတယ်။
ပရီးမီးယားလိဂ်ပွဲစဉ် ၁၇ မတိုင်ခင်မှာ အာဆင်နယ်အသင်းဟာ မန်စီးတီးအသင်းကို ၅ မှတ် အသာရပြီး အမှတ်ပေး ဇယားကို ဦးဆောင်ထားကာ ကမ္ဘာ့ဖလားမတိုင်ခင်အထိ ရှုံးပွဲ ၁ ပွဲသာ ကြုံတွေ့ထားတာပါ။
တိုက်စစ်မှူး ဂျီးဆပ်စ် ဒဏ်ရာရတာနဲ့အတူ ရမှတ်တွေ ဆုံးရှုံးသွားနိုင်တယ်လို့ သုံးသပ်နေကြပြီး မန်စီးတီးကတော့ ၂ ပွဲ ရှုံးနိမ့်ထားပေမယ့် တိုက်စစ်မှူး ဟာလန်းရဲ့ ဂိုးသွင်းစွမ်းရည်တွေနဲ့အတူ အာဆင်နယ်ကို အနီးကပ် ဖိအားပေး နေတာ ဖြစ်ပါတယ်။
ပရီးမီးယားလိဂ် ဖလားနဲ့ စူပါကွန်ပျူတာကိုတွေ့ရစဉ်
စူပါကွန်ပျူတာကတော့ မန်စီးတီးအသင်းဟာ မေလမှာ ဆုဖလား ရယူနိုင်မယ်လို့ ခန့်မှန်းထားပြီး အာဆင်နယ် အသင်းကို အမှတ်ပေးဇယား ဒုတိယနေရာမှာ ရပ်တည်မယ်လို့ ပြောထားတာပါ။
ပထမရာသီဝက်မှာ ရလဒ်တွေ မကောင်းခဲ့တဲ့ လီဗာပူးလ်အသင်းကိုတော့ တတိယနေရာနဲ့ အဆုံးသတ်မယ်လို့ ခန့်မှန်းထားပြီး စပါးအသင်းကို ချန်ပီယံလိဂ်ဝင်ခွင့် တစ်နေရာဖြစ်တဲ့ အဆင့် ၄ နေရာ ထားရှိထားပါတယ်။
ဒီရာသီမှာ ရလဒ်ပိုင်း ကောင်းမွန်လာတဲ့ နယူးကာဆယ်ကို အဆင့် ၅ နဲ့ ယူနိုက်တက်အသင်းကို အဆင့် ၆ သာရ မယ်လို့ ခန့်မှန်းထားတာပါ။
တူချယ်လ်ကို ထုတ်ပယ်ပြီး ဂရေဟမ်ပေါ်တာကို ခန့်အပ်ထားတဲ့ ချယ်လ်ဆီးအသင်းကို အဆင့် ၇၊ ဘရိုက်တန်၊ ပဲလေ့စ်နဲ့ အက်စတွန်ဗီလာအသင်းတို့ကို အဆင့် ၈ ကနေ ၁၀ အထိ ရပ်တည်မယ်လို့ ပြောထားတာ ဖြစ်ပါတယ်။
လိစ်၊ ဆောက်သမ်တန်နဲ့ အဲဗာတန်အသင်းတို့ဟာ တန်းဆင်းဇုန်က လွတ်မြောက်မယ်လို့ စူပါကွန်ပျူတာက ခန့်မှန်းထားတာပါ။
လာမယ့်ရာသီ ချန်ပီယံရှစ်ကို တန်းဆင်းရမယ့် အသင်းအဖြစ် ဝုလ်ဗ်စ်၊ ဘုန်းမောက်နဲ့ နော်တင်ဟမ်ဖောရက်စ် တို့ကို ခန့်မှန်းသွားခဲ့တာ ဖြစ်ပါတယ်။ နော်တင်ဟမ်ဖောရက်စ်နဲ့ ဝုလ်ဗ်စ်အသင်းတို့ဟာ လက်ရှိအချိန်မှာလည်း ပရီးမီးယားလိဂ် အမှတ်ပေးဇယား တန်းဆင်းဇုန်မှာ ရပ်တည်နေတာဖြစ်ပါတယ်။
Source: Mirror
- By CNI
- Category: အားကစား
- Hits: 1674
CNI Sport News
၂၀၂၂ ခုနှစ်၊ ဒီဇင်ဘာ ၂၆
ဘရာဇီးလ်အသင်းဟာ တိုင်ထီနေရာ အစားထိုးဖို့အတွက် ဖြစ်နိုင်ဖွယ်ရှိတဲ့ နည်းပြစာရင်းထဲမှာ ဇီဒန်းကို ထည့်သွင်းခဲ့တယ်လို့ သိရပါတယ်။
ဇီဒန်းဟာ ဘရာဇီးလ် ဘောလုံးအဖွဲ့ချုပ် ရှာဖွေနေတဲ့ အခြေအနေနဲ့ ကိုက်ညီမှုရှိပြီး သူဟာ နိုင်ငံခြားသား နည်းပြ ဖြစ်သလို နည်းပြဘဝမှာလည်း အောင်မြင်မှု ရရှိထားပါတယ်။
ရီးရယ်လ်အသင်းကနေ ဇီဒန်း ထွက်ခွာပြီးကတည်းက အနားယူနေတာ ဖြစ်ပါတယ်။ ဇီဒန်းဟာ ပြင်သစ်နည်းပြ ရာထူးကို ရယူဖို့လည်း စိတ်ဝင်စားနေပြီး နည်းပြ ဒက်ချမ့်ပ်စ်သာ ထွက်ခွာခဲ့မယ်ဆိုရင် ဒီရာထူးကို ရယူဖို့ အဆင်သင့် ဖြစ်နေတာပါ။
ဘရာဇီးလ်နဲ့ ပြင်သစ် ၂ သင်းစလုံးက ကမ်းလှမ်းလာခဲ့မယ်ဆိုရင် ဇီဒန်းဟာ ပြင်သစ်အသင်းကိုသာ ရွေးချယ်နိုင် တာကြောင့် ဘရာဇီးလ်အသင်းဟာ နောက်ထပ် နည်းပြတစ်ဦးကို ရှာဖွေရမှာ ဖြစ်ပါတယ်။
ဘရာဇီးလ် အသင်းက ကစားသမား တချို့ဖြစ်တဲ့ ကတ်စမဲရိုး၊ မီလီတာအို၊ ဗီနီစီးယက်စ်နဲ့ ရိုဒရီဂိုတို့ဟာ ဇီဒန်းနဲ့ ရီးရယ်လ်အသင်းမှာ လက်တွဲ အလုပ်လုပ်ကိုင်ခဲ့ဖူးပါတယ်။
ဘရာဇီးလ်အသင်းကိုတွေ့ရစဉ်
ဘရာဇီးလ်အသင်းဟာ လက်ရှိအချိန်မှာ ပြည်တွင်း နည်းပြတွေထက် ဘရာဇီးလ်လူမျိုး မဟုတ်တဲ့သူကို နည်းပြ သစ်အဖြစ် ရှာဖွေနေတာ ဖြစ်ပါတယ်။
ရိုးမားအသင်းကို ကိုင်တွယ်နေတဲ့ မော်ရင်ဟိုလည်း ဘရာဇီးလ်နည်းပြလောင်း စာရင်းထဲမှာ ပါဝင်နေပါတယ်။
မော်ရင်ဟိုရဲ့ အခြေအနေဟာ ဇီဒန်းနဲ့ တူညီနေပြီး သူ့ရဲ့ ပေါ်တူဂီ လက်ရွေးစင်အသင်းရဲ့ ချိတ်ဆက်မှုတွေလည်း ခံနေရတာ ဖြစ်ပါတယ်။
အဲ့ဒါကြောင့် ဘရာဇီးလ်အသင်းထက် သူတို့ရဲ့ နိုင်ငံအသင်းကိုသာ ပိုပြီးရွေးချယ်ဖို့ ရှိနေတာပါ။ တောင်အမေရိက အသင်းဟာ ၂၀၀၂ နောက်ပိုင်း ကမ္ဘာ့ဖလားနဲ့ ဝေးကွာနေတာကြောင့် လာမယ့် ၂၀၂၆ မှာ အောင်မြင်မှုရယူနိုင်ဖို့ အခုကတည်းက ပြင်ဆင်နေတာ ဖြစ်ပါတယ်။
ဘရာဇီးလ်အသင်းဟာ ၁၉၆၅ ခုနှစ်က အာဂျင်တီးနားလူမျိုး ဖိလစ်ပိုနူနက်စ်ကို ခန့်အပ်ပြီးနောက် နိုင်ငံခြားသား နည်းပြ မခန့်တော့ဘဲ ဘရာဇီးလ်လူမျိုးတွေကိုသာ နည်းပြအဖြစ် ခန့်အပ်ခဲ့တာ ဖြစ်ပါတယ်။
Source: Besoccer
- By CNI
- Category: အားကစား
- Hits: 1518
CNI Sport News
၂၀၂၂ ခုနှစ်၊ ဒီဇင်ဘာ ၂၆
ပေါ့ဘာက ယူနိုက်တက် အသင်းဖော်ဟောင်း ရော်နယ်ဒိုရဲ့ စည်းကမ်းပိုင်းနဲ့ ပတ်သက်ပြီး ချီးကျူးသွားခဲ့သလို သူ့လိုလူမျိုးကို မတွေ့ဖူးဘူးလို့ ပြောလိုက်ပါတယ်။
ပေါ့ဘာက “ရော်နယ်ဒိုရဲ့ စည်းကမ်းပိုင်းကတော့ တကယ်ကို မယုံနိုင်စရာပါပဲ။ ဒီလိုမျိုးကို ကျနော် မမြင်တွေ့ဖူးပါဘူး။ သူ့ရဲ့ စည်းကမ်းပိုင်းက နောက်ထပ် အဆင့်တစ်ခုကို ရောက်ရှိနေပါပြီ။ ကျနော်ဟာ ပရော်ဖက်ရှင်နယ် ကစားသမား အများအပြားကို တွေ့ခဲ့ဖူးပါတယ်။ သူတို့တွေဟာ အလွန် ပရော်ဖက်ရှင်နယ်ဆန်ပြီး စောစောစီးစီး ရောက်လာခဲ့ပါတယ်။ သူတို့တွေဟာ ပြန်လည်ထူထောင်ရေးနဲ့ ဒီလိုမျိုး အရာတွေကို လုပ်ကြပါတယ်။ ဒါပေမယ့် ရော်နယ်ဒိုကတော့ ဒီလိုမျိုးတွေကို နေ့တိုင်းလုပ်ပြီး မရပ်တန့်ခဲ့ပါဘူး။ တစ်ရက်လေးတောင် လွဲချော်တဲ့သူ မဟုတ် ပါဘူး။ သူ့ရဲ့ စည်းကမ်းပိုင်းက ဒါတွေကို နေ့တိုင်းလုပ်ဖို့ တွန်းအားပေးနေတာပါ”လို့ ပြောခဲ့တာပါ။
ရော်နယ်ဒိုနဲ့ ပေါ့ဘာတို့ဟာ ယူနိုက်တက်အသင်းမှာ ပြီးခဲ့တဲ့ရာသီက အတူတွဲကစားခဲ့ကြပြီး အခုအချိန်မှာတော့ ၂ ဦးစလုံးဟာ ယူနိုက်တက်အသင်းကနေ ထွက်ခွာခဲ့ကြပြီ ဖြစ်ပါတယ်။
သူတို့ ၂ ဦးစလုံးဟာ ယူနိုက်တက်အတွက် ဒုတိယအကြိမ်မြောက်အဖြစ် ပြန်လာကစားခဲ့ကြသလို ဂျူဗင်တပ်စ် အသင်းမှာလည်း ကစားခဲ့ကြတာပါ။ ပေါ့ဘာဟာ ရော်နယ်ဒိုနဲ့ ပြီးခဲ့တဲ့ရာသီကသာ အတူတွဲ ကစားခဲ့ဖူးပေမယ့် သူ့ရဲ့ စိတ်နေစိတ်ထားနဲ့ ခံယူချက်တွေကို ချီးကျူးခဲ့တာ ဖြစ်ပါတယ်။
ပေါ့ဘာနဲ့ရော်နယ်ဒိုကိုတွေ့ရစဉ်
ပေါ့ဘာဟာ လက်ရှိအချိန်မှာ အသင်းဟောင်း ဂျူဗင်တပ်စ်အသင်းထံ ပြန်လည်ရောက်ရှိနေပြီး ခြေစမ်းပွဲ ၁ ပွဲ တည်းသာ ပါဝင်ကစားထားရပြီးနောက် ဒဏ်ရာကြောင့် အနားယူနေရပါတယ်။
ဒဏ်ရာကြောင့် ပြင်သစ်အသင်းနဲ့ ကမ္ဘာ့ဖလားပြိုင်ပွဲကို မပါဝင်နိုင်ခဲ့တဲ့ ပေါ့ဘာဟာ ဂျူဗင်တပ်စ်အသင်းနဲ့အတူ အမြန်ဆုံး ပါဝင်ကစားနိုင်ဖို့ မျှော်လင့်နေတာ ဖြစ်ပါတယ်။
ရော်နယ်ဒိုကတော့ လက်ရှိအချိန်မှာ အသင်းလက်မဲ့ ဖြစ်နေပေမယ့် ဆော်ဒီကလပ် အယ်လ်နာဆာအသင်းထံ ပြောင်းဖို့ နီးစပ်နေတယ်လို့ နိုင်ငံတကာသတင်းတွေမှာ ဖော်ပြထားပါတယ်။
အယ်လ်နာဆာအသင်းဟာ ရော်နယ်ဒိုကို ၂၀၃၀ အထိ စာချုပ်ဖို့ စီစဉ်နေပြီး တစ်နှစ်လုပ်ခ ယူရိုသန်း ၂၀၀ အထိ ပေးသွားဖို့ ရှိနေတယ်လို့ သိရပါတယ်။
Source: Daily Mail
- By CNI
- Category: ဆောင်းပါး
- Hits: 1200
CNI Sport News
၂၀၂၂ ခုနှစ်၊ ဒီဇင်ဘာ ၂၅
မော်ရိုကိုကတော့ ပြီးခဲ့တဲ့ ကမ္ဘာ့ဖလားပြိုင်ပွဲမှာ ဘယ်သူကမှ မထင်မှတ်ထားတဲ့ အရာကို လုပ်ဆောင် သွားနိုင်ခဲ့တာ ဖြစ်ပါတယ်။
ကမ္ဘာ့ဖလားပြိုင်ပွဲအတွက် မဲခွဲတဲ့အချိန် ဘယ်လ်ဂျီယံ၊ ခရိုအေးရှားတို့ ပါဝင်နေတဲ့ ဒီအုပ်စုမှာ မော်ရိုကို အသင်း အနေနဲ့ အုပ်စုကနေပဲ လှည့်ပြန်ရနိုင်တယ်လို့ သုံးသပ်မှုတွေ ရှိခဲ့ကြတာပါ။ ဒါပေမယ့် မော်ရိုကိုအသင်းရဲ့ စွမ်းဆောင်မှုတွေဟာ အားလုံးရဲ့ ပါးစပ်ဖျားမှာ ကျန်ရစ်နေခဲ့တာ ဖြစ်ပါတယ်။
မော်ရိုကိုအသင်းဟာ အုပ်စုတွင်းမှာ ဘယ်လ်ဂျီယံနဲ့ ကနေဒါကို အနိုင်၊ ခရိုအေးရှားကို သရေကျပြီး အုပ်စုပထမနဲ့ ၁၆ သင်းအဆင့်ကို တက်နိုင်ခဲ့တာပါ။ အုပ်စုအဆင့်ကနေ တက်ခဲ့ပေမယ့် မော်ရိုကိုအသင်းအတွက် ၁၆ သင်း အဆင့်က အမြင့်ဆုံး ဖြစ်နိုင်တယ်လို့ ထင်မှတ်ခဲ့ကြပေမယ့် စပိန်အသင်းကို ဖြတ်ကျော် ပြနိုင်ခဲ့တာ ဖြစ်ပါတယ်။
မော်ရိုကိုအသင်းနဲ့ ပေါ်တူဂီအသင်းတို့ ယှဉ်ပြိုင်နေစဉ်
ကွာတားဖိုင်နယ် အဆင့်မှာလည်း မော်ရိုကိုအသင်းဟာ နာမည်ကြီး ပေါ်တူဂီကို ထပ်ပြီး ဖြုတ်ချနိုင်ခဲ့ပါတယ်။ အဲ့ဒါကြောင့် မော်ရိုကိုအသင်းဟာ ကမ္ဘာ့ဖလား သမိုင်းတလျှောက် ပထမဆုံး ဆီမီးဖိုင်နယ်တက်တဲ့ အာဖရိကနဲ့ အာရပ်အသင်းအဖြစ် စံချိန်သစ်တင်ခဲ့တာပါ။
ဆီမီးဖိုင်နယ်တက်တဲ့အချိန်ထိ မော်ရိုကိုအသင်းဟာ ပေးဂိုး ၁ ဂိုးသာ ခွင့်ပြုခဲ့ရပြီး အဲ့ဒီ ၁ ဂိုးကလည်း ကိုယ့်ဂိုး ကိုယ် သွင်းယူမှုကြောင့် ပေးခဲ့ရတာ ဖြစ်ပါတယ်။ မော်ရိုကိုအသင်းဟာ ခံစစ်ပိုင်းကို အဓိကတည်ဆောက် ခဲ့တယ် ဆိုပေမယ့် သူတို့ရဲ့ တိုက်စစ်ဆင်မှုတွေက ပြိုင်ဘက်တွေအတွက် တကယ်ကို ကြောက်လန့်စရာ အဖြစ်ရှိခဲ့တာပါ။
ညာအခြမ်းက ဇီယက်ချ်နဲ့ ဟာကီမီအတွဲ၊ ဘယ်အခြမ်းက ဘူဖယ်လ်နဲ့ မက်ဇာအိုရီတို့ အတွဲတွေက ပြိုင်ဘက်တွေ ကို ဒုက္ခပေးနိုင်ခဲ့ပြီး၊ ကွင်းလယ်က အမ်ရာဘတ်ရဲ့ စွမ်းဆောင်ရည်တွေက အသင်းကြီးတွေရဲ့ ပစ်မှတ်အဖြစ် ရှိလာခဲ့ ပါတယ်။ ခံစစ်ပိုင်းကလည်း မာကျောပြီး ဂိုးသမား ဘိုနိုရဲ့ လက်စွမ်းကလည်း ထိပ်တန်းအဆင့် ရှိခဲတာပါ။
မော်ရိုကိုအသင်းကို ပရိသတ်များ ကြိုဆိုနေကြစဉ်
ဆီမီးဖိုင်နယ်အထိ တက်ခဲ့တဲ့ မော်ရိုကိုအသင်းကို အားလုံးက အသိအမှတ် ပြုလာခဲ့ရပြီး ချန်ပီယံဆုပါ အံ့အားသင့် ဖွယ် ရယူသွားမလားလို့ အားလုံးက စောင့်ကြည့်ခဲ့ရတဲ့ အသင်းဖြစ်လာခဲ့တာပါ။
ဒါပေမယ့် ဆီမီးဖိုင်နယ်မှာ ပြင်သစ်၊ တတိယနေရာလုပွဲမှာ ခရိုအေးရှားအသင်းတို့ကို အရေးနိမ့်ခဲ့လို့ ဆီမီးဖိုင်နယ် အဆင့်နဲ့ပဲ ကျေနပ်ခဲ့ရတာပါ။
ဒီပွဲတွေမှာလည်း မော်ရိုကိုအသင်းရဲ့ တိုက်စစ်ပိုင်းဟာ ပြိုင်ဘက် အသင်းတွေကို အန္တရာယ်ပေးနိုင်ခဲ့ပြီး ရသင့်တဲ့ ပင်နယ်တီနဲ့ အခွင့်အရေးတွေကိုသာ ဂိုးအဖြစ် ပြောင်းလဲနိုင်မယ်ဆိုရင် မော်ရိုကိုအတွက် ကံကြမ္မာက တစ်မျိုး တစ်ဖုံ ပြောင်းလဲသွားနိုင် ပါတယ်။
ဒါပေမယ့် မော်ရိုကိုအတွက် ဂုဏ်ငယ်စရာ မရှိခဲ့ပါဘူး။ မော်ရိုကိုအသင်းဟာ အားလုံးရဲ့ အသိအမှတ်ပြုမူကို ခံခဲ့ရပြီး သမိုင်းရဲ့ မှတ်တမ်းမှာလည်း အမြဲတမ်းဖော်ပြခြင်း ခံရတော့မှာပါ။
မော်ရိုကိုအသင်းသားတွေကို ဘုရင်က တွေ့ဆုံ
မော်ရိုကိုအသင်းရဲ့ အောင်မြင်မှုမှာ နည်းပြ ဝါလစ်ရီဂရာဂွီကို မေ့ထားလို့တော့ မရပါဘူး။ သူဟာ မော်ရိုကိုအသင်း ကို အခုနှစ် ဩဂုတ်လကမှ စတင်ကိုင်တွယ်ခဲ့ပေမယ့် သူလိုချင်တဲ့ ပုံစံအတိုင်း အသင်းကို အကောင်းဆုံး တည် ဆောက် နိုင်ခဲ့တာပါ။
ဝါလစ်ဟာ ပွဲတိုင်းမှာ ကွင်းဘေးစည်းကနေ ကစားသမားတွေ စိတ်ဓါတ်တက်ကြွအောင် အမြဲတမ်း လှုံ့ဆော်ပေး နိုင်ခဲ့တာလည်း ဖြစ်ပါတယ်။ ဝါလစ်ဟာ မော်ရိုကိုကို ၁၀ ပွဲအထိ ကိုင်တွယ်ထားခဲ့တာမှာ ၅ ပွဲနိုင် ၃ ပွဲသရေ ၂ ပွဲရှုံးဆိုတဲ့ ရလဒ်ထွက်ပေါ်ခဲ့တာ ဖြစ်ပါတယ်။
မော်ရိုကိုရဲ့ အိမ်အပြန်ခရီးကလည်း တကယ်ကို လှပခဲ့ပြီး ပရိသတ် အများအပြားရဲ့ သူရဲကောင်းသဖွယ် ကြိုဆို ခြင်းကို ခံခဲ့ရတာပါ။
မော်ရိုကိုအသင်းကို ဘုရင်ဖြစ်သူက တော်ဝင်နန်းတော်မှာ လက်ခံတွေ့ဆုံခဲ့ပြီး ဆုတံဆိပ်တွေလည်း ချီးမြှင့်ခဲ့တာ ဖြစ်ပါတယ်။ မော်ရိုကိုဘုရင် မိုဟာမက် VI က ကစားသမားတွေကို မွေးထုတ်ပေးခဲ့တဲ့ မိခင်တွေနဲ့ပါ တွေ့ဆုံခဲ့ပြီး ချီးကျူးမှုတွေ ပြုလုပ်သွားခဲ့တာပါ။
မော်ရိုကိုအသင်း နည်းပြကို ဂုဏ်ပြုနေကြစဉ်
မော်ရိုကိုအသင်းဟာ ကမ္ဘာ့ဖလားပြိုင်ပွဲမှာ ဆီမီးဖိုင်နယ်အထိ ရောက်ရှိခဲ့တဲ့အတွက် ဖီဖာရဲ့ ထုတ်ပြန်တဲ့ နောက် ဆုံး ကမ္ဘာ့အဆင့် ရပ်တည်မှုမှာ အဆင့်မြင့်တက်လာခဲ့ပါတယ်။ ကမ္ဘာ့ဖလားပြိုင်ပွဲ မကစားခင် အချိန်မှာ မော်ရိုကို အသင်းက အဆင့် ၂၂ နေရာမှာ ရပ်တည်ခဲ့ပြီး အခုဆိုရင် အဆင့် ၁၁ နေရာအထိ ရောက်ရှိလာခဲ့တာပါ။
ဒါဟာ မော်ရိုကိုအတွက် ၁၉၉၈ က အဆင့် ၁၀ နေရာမှာ ရပ်တည်ပြီးနောက် အမြင့်ဆုံး အဆင့် ရပ်တည်မှုလည်း ဖြစ်ခဲ့ပါတယ်။
ကာတာကမ္ဘာ့ဖလား အကြောင်းကို နောင်တချိန်မှာ ပြန်ပြောင်း ပြောကြမယ်ဆိုရင် မော်ရိုကိုအသင်း အကြောင်း ကိုတော့ ချန်ထားလို့ ရမှာမဟုတ်ဘဲ မဖြစ်မနေ ထည့်သွင်းပြောရမယ့် အရာအဖြစ် ရှိနေပြီလည်း ဖြစ်ပါတယ်။
- By CNI
- Category: Watch TV
- Hits: 694
Page 20 of 82
Connect with us
