CNI News

၂၀၂၅ ခုနှစ်၊ စက်တင်ဘာ ၁၉

မြန်မာနိုင်ငံတွင် ၂၀၂၁ ခုနှစ် နိုင်ငံရေး အပြောင်းအလဲ ဖြစ်ပြီးနောက်ပိုင်း လက်နက်ကိုင် ပဋိပက္ခများ ကျယ်ပြန့် ပြင်းထန်လာခြင်းနှင့်အတူ ရှမ်းလက်နက်ကိုင် ၃ ဖွဲ့၏ နိုင်ငံရေး အခြေအနေ ဘယ်လိုရှိလဲဆိုသည့်အပေါ် စစ်ရေး နှင့် နိုင်ငံရေးအကဲခတ်များကြား စောင့်ကြည့်လေ့လာနေကြသည်။ 

ရှမ်းပြည်နယ်နှင့် ရှမ်းမျိုးနွယ်စုများ နေထိုင်ရာ ဒေသများသည် သယံဇာတ ပေါကြွယ်ဝကာ တိုင်းရင်းသား လူမျိုးစုံနေထိုင်သည့် ဒေသဖြစ်ကြသည်။

ရှမ်းလက်နက်ကိုင်များဖြစ်သည့် သျှမ်းပြည်ပြန်လည်ထူထောင်ရေးကောင်စီ (RCSS)၊ ရှမ်းပြည်တိုးတက်ရေးပါတီ (SSPP) နှင့် ရှမ်းနီအမျိုးသားများတပ်မတော် (SNA) တို့သည် ၂၀၂၁ ခုနှစ်နောက်ပိုင်း၌ မြန်မာ့တပ်မတော်နှင့် ပူးပေါင်း၍ တိုက်ပွဲဝင်နေခြင်း မရှိသကဲ့သို့ တော်လှန်ရေး အင်အားစုများနှင့် ပူးပေါင်း၍လည်း မြန်မာ့တပ်မတော် ကို တော်လှန်နေခြင်းမျိုး မရှိကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

ဗိုလ်ချုပ်ကြီးယွက်စစ်နှင့် ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ယခုကဲ့သို့ မည်သည့်ဘက်ကမျှ ရှမ်းလက်နက်ကိုင်တပ်ဖွဲ့များ ဝင်မပါကြခြင်းသည် လူထုဒုက္ခနှင့် နိုင်ငံအရေး အခြေအနေ ပိုမို ဆိုးရွားသွားနိုင်သည်ဟု ယူဆထားကြသည့်အတွက် ဖြစ်နိုင်ကြောင်း ငြိမ်းချမ်းရေးလုပ်ငန်းစဉ်မှာ ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

၎င်းက “RCSS ကတော့ ၂၀၁၁ ခုမှာ နှစ်ဖက် အပစ်ရပ်ကို ထိုးပြီးကတည်းက နိုင်ငံရေးပြဿနာကို နိုင်ငံရေးနည်းနဲ့ ဖြေရှင်းရမယ်ဆိုထဲမှာ သူက တစိုက်မတ်မတ် ရပ်တည်ခဲ့တာကို။ ဒါကြောင့်မို့လို့ အခုလည်း သူက ဒီဟာကို ဆက်ပြီးတော့မှ ရပ်တည်နေတာပေါ့။ တခြားအကြောင်းလည်း ရှိချင်လည်း ရှိနိုင်ပါတယ်။ ဒါပေမယ့် အဓိက အကြောင်းအရင်းကတော့ ဒါပါပဲ။ အခု သူပါဝင်သွားမယ်ဆိုရင် အခြေအနေ ပိုကောင်းလာမယ့်အစား၊ အခြေအနေ က ပိုပြီးတော့မှ ဆိုးရွားလာနိုင်တယ်လို့ မြင်တာလည်း ရှိမှာပေါ့။ SSPP ကတော့ သူတို့က FPNCC ရဲ့ အဖွဲ့ဝင်တွေ ဖြစ်တယ်။ ဒီ FPNCC ကလည်း နိုင်ငံရေးအရ ပူးပေါင်းထားတာရှိတယ်။ ဒီနိုင်ငံရေးအရ ဦးဆောင်နေတဲ့ “ဝ” က လည်း အခုအခြေအနေမှာ စစ်ရေးနည်းထက် နိုင်ငံရေးနည်းနဲ့ဖြေရှင်းဖို့ ဆိုပြီးမှ ရပ်တည်ထားတဲ့ အခါကြတော့ SSPP လည်း အဲဒီဘက်ကို လိုက်တယ်လို့ ထင်တယ်၊ တွေ့နိုင်ပါတယ်။ နောက်တစ်ခုက မကြာခင်တုန်းက သူတို့ရဲ့ ခေါင်းဆောင် တချို့နဲ့ တွေ့တုန်းကလည်း သူတို့ပြောတာက ကျနော်တို့ တိုက်လို့ ဘာထူးလာမှာလဲ၊ လူထုက ပိုပြီး တော့မှတောင် ဒုက္ခရောက်ဦးမယ်။ အခုသူတို့ဖြစ်နေတဲ့ ဒုက္ခတွေက သိပ်ကြီးနေပြီ။ တကယ်လို့ ကျနော်တို့ တိုက် ရင် ပိုပြီးတောင် ဆိုးရွားလာနိုင်တယ်။ ဒါကို ကျနော်တို့ မြင်တယ်။ ဒါကြောင့် သူတို့က အခု အခြေအနေမှာ ငြိမ်းချမ်းစွာ ဖြေရှင်းနိုင်ရေးအတွက် အခွင့်အလမ်းကို စောင့်နေတယ်လို့ ပြောပါတယ်” ဟု ပြောသည်။

RCSS ခေါင်းဆောင်များသည် ယခင် နစက လက်ထက်၌ ဥက္ကဋ္ဌဖြစ်သည့် ဗိုလ်ချုပ်မှူးကြီး မင်းအောင်လှိုင်နှင့် နေပြည်တော်တွင် ဆွေးနွေးပွဲများကို မကြာခဏ တက်ရောက်လေ့ရှိပြီး RCSS ခေါင်းဆောင် ဗိုလ်ချုပ်ကြီး ယွက်ဆစ်ကို ၂၀၂၂ ခုနှစ်အတွင်းက ဝဏ္ဏကျော်ထင်ဘွဲ့ ပေးခဲ့သေးသည်။

ထို့ပြင် SSPP သည် “ဝ”လက်နက်ကိုင်အဖွဲ့ UWSA က ဦးဆောင်ဖွဲ့စည်းခဲ့သည့် ပြည်ထောင်စုနိုင်ငံရေး ဆွေးနွေး ညှိနှိုင်းရေးကော်မတီ(FPNCC)တွင် အဖွဲ့ဝင် မဟာမိတ်လက်နက်ကိုင်အဖြစ် ပါဝင်ထားသည်။

SNA တပ်ဖွဲ့ကို တွေ့ရစဉ် 

သို့သော် ထို ၃ ဖွဲ့အနေဖြင့် မြန်မာ့တပ်မတော်နှင့် ရံဖန်ရံခါ ထိတွေ့တိုက်ပွဲအချို့ ဖြစ်ပေါ်တတ်ပြီး RCSS နှင့် SSPP တို့ တပ်ဖွဲ့ဝင်များအကြားလည်း ထိတွေ့တိုက်ပွဲများ ဖြစ်ပေါ်တတ်ကာ SNA အနေဖြင့်လည်း KIA-PDF ပူးပေါင်း တပ်များနှင့် တိုက်ပွဲများ ဖြစ်ပွားလေ့ရှိသည်။

ရှမ်းလက်နက်ကိုင် ၃ ဖွဲ့သည် ရှမ်းအရေးကိုကြည့်ကာ အမှား၊ အမှန်ကို ဆုံးဖြတ်ထားကြသည့်အတွက် ယခုကဲ့သို့ မည်သည့် အင်အားစုဘက်မှ မပါဘဲ နေကြခြင်းဟုမြင်ကြောင်း တိုင်းလိုင်(ရှမ်းနီ)အမျိုးသားများ ဖွံ့ဖြိုးတိုးတက် ရေးပါတီ (TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

၎င်းက “ပြောရမှာတော့ နည်းနည်းတော့ ခက်တာပေါ့နော် သူတို့ရဲ့ သဘောထားဆိုတဲ့ အခါကြတော့။ ကျနော့်ရဲ့ အမြင်ကတော့ အမှား၊ အမှန်ကို သူတို့ ၃ ဖွဲ့လုံးကမြင်တယ်လို့ ကျနော့် အနေနဲ့မြင်တယ်။ ဘယ်သူက မှားတယ်၊ ဘယ်သူက မှန်တယ်ပေါ့ ပြည်ထောင်စုအရေးအတွက်။ သူတို့ဘက်ကတော့ ဘယ်လိုရှိမလဲ ကျနော်မပြောတတ် ပေမယ့်လည်း ကျနော့်အမြင်က အဲဒီလိုပဲမြင်တယ်။ ထိန်းကျောင်းမှုရယ်လို့တော့ မပြောတတ်ဘူး။ SNA နဲ့ ပတ်သက်လို့ ဟိုတုန်းကတော့ မြန်မာ့တပ်မတော်နဲ့ ပစ်ခတ်တိုက်ခိုက်မှုတွေရှိတယ်ပေါ့။ အခုနောက်ပိုင်း ၂၁ နောက်ပိုင်းတော့ တော်တော်လေး ရင်းရင်းနှီးနှီး ဖြစ်သွားကြတယ်။ နောက်ပြီးတော့ SSPP တို့၊ RCSS တို့ဆိုရင် တော့ အားလုံးက ထိတွေ့မှုတော့ မရှိကြဘူး။ သူတို့ဆက်စပ်မှု ရှိတယ်ဆိုတာတော့ သူတို့အတွင်းရေး ကိစ္စတော့ မပြောလိုပေမယ့်လည်း သူတို့လည်း ရှမ်းအရေးကို ကြည့်ပြီးတော့မှ ဘယ်သူကမှားတယ်၊ ဘယ်သူမှန်တယ်ဆိုတာ သူတို့ဆုံးဖြတ်ထားလို့ ဒီလိုပဲနေကြတယ်လို့ ကျနော့် အနေနဲ့မြင်တယ်။ ထိတွေ့မှု ကြတော့လည်း နောက်ကွယ်မှာ ရှိကောင်းရှိမှာပေါ့” ဟု ပြောသည်။

ရှမ်းပြည်တိုးတက်ရေးပါတီ (SSPP) သည် တအာင်းတပ် (TNLA)၊ ကိုးကန့်တပ် (MNDAA) တို့နှင့်အတူ ပြီးခဲ့သည့် ဩဂုတ်လအတွင်းက “ဝ” ပြည်သွေးစည်းညီညွတ်ရေးတပ်မတော်(UWSA)၏ ဖိတ်ကြားချက်အရ ပန်းဆန်းမြို့ကို သွားရောက်ခဲ့ကြသည်။

ထိုတွေ့ဆုံမှုတွင် “ဝ”ဘက်မှ မဟာမိတ် လက်နက်ကိုင် အဖွဲ့များ၏ စစ်ရေးလွယ်ကူ ချောမွေ့စေရေး အကြောင်း ခံပြီး မည်သည့် လက်နက်ကိရိယာ၊ ငွေကြေး အကူအညီကိုမှ ပေးတော့မည် မဟုတ်ကြောင်း အသိပေးခဲ့သည်။