CNI News

၂၀၂၅ ခုနှစ်၊ စက်တင်ဘာ ၅

နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် အိန္ဒိယ ဝန်ကြီး ချုပ် မိုဒီတို့ တွေ့ဆုံခဲ့မှုသည် မြေရှားသတ္တု အကြောင်းအရာထက်ပိုသည့် အခြားသော ကိစ္စရပ်များပါနိုင်ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

မြန်မာနိုင်ငံအတွက် တရုတ်ဟုဆိုပါက အိန္ဒိယသည်လည်း မလွဲမသွေပါလာကြောင်း၊ အိန္ဒိယသည် ကချင်ပြည်နယ် မှ ချင်းပြည်နယ်အထိ နယ်နိမိတ် ရှည်လျားသဖြင့် အင်မတန်အရေးပါသည့် အတိုင်းအတာမှာရှိနေကြောင်း ၎င်းက ပြောသည်။

ဒေါက်တာအောင်မျိုးက “နောက်ပြီး အိန္ဒိယကလည်း လက်ရှိမှာ သူလည်း စက်မှုနိုင်ငံကြီး တစ်ခုဖြစ်တယ်။ နောက်တစ်ခုက မြန်မာနိုင်ငံ သမိုင်းတစ်လျှောက်မှာလည်း အိန္ဒိယက မြန်မာနိုင်ငံကို ဒုက္ခမပေးဘဲနဲ့ အရာရာမှာ ဖေးမကူညီခဲ့တယ်ဆိုတဲ့ အစဉ်အလာကရှိခဲ့တဲ့ အခါကြတော့ မြေရှားအပြင် အခြားအခြားသော အကြောင်းအရာ အချက်အလက်တွေ ပါကောင်း ပါပါလိမ့်မယ်။ အဲဒီတော့ မြန်မာနိုင်ငံအနေနဲ့ကတော့ တရုတ်နဲ့ဆက်ဆံရေး ပြေလည်အောင် လုပ်သလို တစ်ဖက်ကလည်း အိန္ဒိယကို ပစ်ထားလို့ မရဘူးဆိုတာလည်း အချက်အလက် ကလည်း ရှိပါတယ်။ ဒါကြောင့် တရုတ်သမ္မတကြီး ရှီကျင့်ဖျင်နဲ့ တစ်ဖက်က ဆွေးနွေးသလို တစ်ဖက်ကလည်း အိန္ဒိယက ဝန်ကြီးချုပ်နဲ့လည်း အဆက်အသွယ် ကျနော်တို့ရှိပါတယ်။ ခိုင်မာတဲ့ ဆက်ဆံရေးကို ထိန်းသိမ်းထား ပါတယ်။ ဆိုတဲ့ ပုံစံမျိုးကို ပြဖို့အတွက်လိုတယ်။ ပြလည်း ပြနေတယ်လို့ ကျနော်ထင်ပါတယ်။ ဒါကြောင့်မို့ မြေရှားဆိုတဲ့ အကြောင်းအရာထက်ကို အများကြီး ပါလိမ့်မယ်လို့ ထင်ပါတယ်” ဟု ပြောသည်။

KIA ခေါင်းဆောင်များကို တွေ့ရစဉ်

မြန်မာနိုင်ငံမှ ဗိုလ်ချုပ်မှူးကြီးမင်းအောင်လှိုင်၏ ဩဂုတ် ၃၀ ရက်နေ့တွင် စတင်ခဲ့သည့် တရုတ်ခရီးစဉ်အတွင်း အိန္ဒိယဝန်ကြီးချုပ် မိုဒီနှင့်တွေ့ဆုံခဲ့ပြီး မြေရှားသတ္တု တူးဖော်ရေးနှင့် လုံခြုံရေးကဏ္ဍများမှာ နှစ်နိုင်ငံဆက်ဆံရေး တိုးမြှင့်ရန်တို့ သဘောတူညီမှု ရရှိခဲ့ကြခြင်းဖြစ်သည်။

လက်ရှိတွင် အိန္ဒိယနှင့်ထိစပ်နေသော မြန်မာနိုင်ငံ၊ ကချင်ပြည်နယ်မှ ထွက်ရှိသည့် မြေရှားသတ္တုဒေသများကို KIA မှ သိမ်းပိုက် ရရှိထားခြင်း ဖြစ်သည့်အတွက် မြေရှားသတ္တုတူးဖော်ခြင်း၊ တင်ပို့ရောင်းချခြင်းများမှ ရရှိသည့် အခွန် ဘဏ္ဍာများကိုလည်း KIA မှ ရရှိနေကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

မြန်မာနိုင်ငံမှ မြေရှားကို တရုတ်မှ တူးဖော်တင်ပို့ခြင်းဖြစ်ပြီး တရုတ်မှတဆင့် အိန္ဒိယက ပြန်လည်ဝယ်ယူ နေရခြင်းဖြစ်ကာ ယခုကဲ့သို့ အစိုးရချင်း လုပ်ဆောင်မည်ဆိုပါက ကောင်းသောရလဒ်ဖြစ်ကြောင်း တိုင်းလိုင် (ရှမ်းနီ)အမျိုးသားများ ဖွံ့ဖြိုးတိုးတက်ရေးပါတီ(TNDP)မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

ရှမ်းနီအမျိုးသားများတပ်မတော်(SNA)ကို တွေ့ရစဉ်

၎င်းက “မြန်မာပြည်မှာ မြေရှားထွက်တဲ့ နေရာတွေ တော်တော်များများ ရှိတယ်လို့တော့ ကျနော်တို့လည်း ကြားထားတယ်။ ဒါပေမယ့် အခုလောလောဆယ် တရုတ်နယ်စပ်ဘက်မှာတော့ အများစု လုပ်ကိုင်နေတာကို တွေ့ရှိရတာပေါ့။ အိန္ဒိကလည်း မြေရှားနဲ့ပတ်သက်ပြီး တရုတ်ဆီကနေပဲ အများဆုံးဝယ်ယူတာကို တွေ့ရှိရပြန် တယ်။ ဒါကြောင့် မြန်မာပြည်ကနေ တိုက်ရိုက် ဝယ်မယ်ဆိုရင်တော့ ဒါက မြန်မာပြည်ဘက်ကိုတော့ ကောင်းသော ရလဒ်လို့ ပြောချင်ပါတယ်။ ဘာကြောင့်လဲဆို အိန္ဒိယကလည်း တရုတ်ကနေတဆင့် ဝယ်ယူရတာ သက်သာသွား သလို မြန်မာပြည်ကလည်း G to G လုပ်ခြင်းအားဖြင့် နိုင်ငံတော်အတွက်ကို အခွန်တွေ၊ ဘဏ္ဍာငွေတွေ အများကြီး ရလာမယ်လို့တော့ ကျနော်တို့မျှော်လင့်တယ်” ဟု ပြောသည်။

တရုတ်-မြန်မာနယ်စပ် ကချင်ဒေသက မြေရှားသတ္တုများသည် တရုတ်လုပ်ကွက်များ ဖြစ်နေသည့်အတွက် အိန္ဒိယ အနေဖြင့် အစိုးရချင်းသဘောတူညီမှု (G to G) ဖြင့် မြေရှားတူးဖော်ရေး လုပ်မည်ဆိုပါက စစ်ကိုင်းတိုင်းဒေသကြီး ထဲတွင် လုပ်ဆောင်နိုင်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

စစ်ကိုင်းတိုင်းဒေသကြီးအတွင်းမှာ အိန္ဒိယက မြေရှားသတ္တု တူးဖော်ရေး လုပ်မည်ဆိုပါက ရှမ်းနီအမျိုးသားများ တပ်မတော်(SNA)ဖြင့်လည်း ညှိနှိုင်းဆွေးနွေးရန် လိုအပ်မည်ဟု စစ်ရေးနှင့်နိုင်ငံရေးအကဲခတ်များက ထောက်ပြ ကြသည်။

လက်ရှိတွင် မြေရှားလုပ်ကွက်ပေါင်း ၃၀၀ နီးပါး ရှိနေသည့် ပန်ဝါဒေသ အပါအဝင် ကချင်ပြည်နယ်ထဲမှ မြေရှား သတ္တုထွက်ရှိရာ ဒေသများကိုမူ KIA မှ သိမ်းပိုက်ထားသည်။