CNI News
၂၀၂၅ ခုနှစ်၊ စက်တင်ဘာ ၁
မြန်မာနိုင်ငံတွင် ကျင်းပမည့် ရွေးကောက်ပွဲကို ထောက်ခံကြောင်းနှင့် ရွေးကောက်ပွဲ လေ့လာစောင့်ကြည့်ရေးအဖွဲ့ အား စေလွှတ်သွားမည်ဖြစ်ကြောင်း လာအိုသမ္မတ သောင်လောင်ဆီ ဆိုလစ်က နိုင်ငံတော်လုံခြုံရေးနှင့်အေးချမ်း သာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံစဉ် ပြောကြားခဲ့သည်။
၂၀၂၅ ခုနှစ်၊ စက်တင်ဘာ ၁ ရက်က တရုတ်နိုင်ငံ၊ တီယန်ကျင်းမြို့ရှိ Renaissance Tianjin Lake ဟိုတယ်တွင် ၎င်းတို့ နှစ်ဦး တွေ့ဆုံဆွေးနွေးခဲ့စဉ် လာအိုသမ္မတက ပြောကြားခဲ့ခြင်း ဖြစ်သည်။
ထိုသို့ တွေ့ဆုံစဉ် နှစ်နိုင်ငံအကြား နယ်စပ်ဒေသ တည်ငြိမ်အေးချမ်းရေးဆိုင်ရာကိစ္စရပ်များ၊ နှစ်နိုင်ငံ အစိုးရ အချင်းချင်း ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ပိုမိုမြှင့်တင် ဆောင်ရွက်သွားမည့် အခြေအနေများ၊ ခရီးသွားကဏ္ဍ၊ ကုန်သွယ်မှုကဏ္ဍများ ယခုထက် ပိုမိုတိုးမြှင့် ဆောင်ရွက်သွားမည့် အခြေအနေများကို ဆွေးနွေးခဲ့ ကြောင်း နေပြည်တော်ဘက်က ထုတ်ပြန်ခဲ့သည်။
၂၀၂၅ ခုနှစ်၊ စက်တင်ဘာ ၁ ရက်က တရုတ်နိုင်ငံ၊ တီယန်ကျင်းမြို့မှာ လာအိုသမ္မတနှင့် ဗိုလ်ချုပ်မှူးကြီး မင်းအောင်လှိုင် တွေ့ဆုံ ဆွေးနွေးစဉ်
ထို့နောက် တပ်မတော်နှစ်ရပ်အကြား ပူးပေါင်းဆောင်ရွက်ရေးဆိုင်ရာကိစ္စရပ်များ၊ မြန်မာနိုင်ငံ၌ ကျင်းပပြုလုပ် မည့် ရွေးကောက်ပွဲ အောင်မြင်စွာ ကျင်းပနိုင်ရေးအတွက် လာအိုနိုင်ငံမှ ထောက်ခံအားပေးလျက်ရှိမှုနှင့် ရွေးကောက်ပွဲ လေ့လာစောင့်ကြည့်ရေးအဖွဲ့များ စေလွှတ်ပေးသွားမည့် အခြေအနေများနှင့် အခြား ကဏ္ဍပေါင်းစုံ ၌ ပူးပေါင်းဆောင်ရွက်မှုများ ဆက်လက်မြှင့်တင် ဆောင်ရွက်ရေးဆိုင်ရာကိစ္စရပ်များအား ဆွေးနွေးခဲ့ကြသည်။
မြန်မာနိုင်ငံတွင် အထွေထွေရွေးကောက်ပွဲကို ၂၀၂၅ ခုနှစ်၊ ဒီဇင်ဘာ ၂၈ ရက်၌ အပိုင်း(၁)အနေဖြင့် မြို့နယ်ပေါင်း ၁၀၂ မြို့နယ်မှာ ကျင်းပမည်ဖြစ်သည်။
မြန်မာနိုင်ငံတွင် ကျင်းပမည့် ရွေးကောက်ပွဲအား မပျက်ပျက်အောင် ဖျက်မည်ဟု တော်လှန်ရေး အင်အားစုများက ထုတ်ပြန် ကြေညာထားသလို ရွေးကောက်ပွဲမှာ ပူးပေါင်း ဆောင်ရွက်သူများကို အရေးယူသွားမည်ဟုလည်း ထုတ်ပြန် ကြေညာထားသည်။
မြန်မာနိုင်ငံတွင် ကျင်းပမည့် ရွေးကောက်ပွဲအား နှောင့်ယှက်ခြင်း၊ ဖျက်ဆီးခြင်း၊ ပျက်ပြားအောင်လုပ်ခြင်း၊ လူသေ ဆုံးခြင်း၊ လူသေအောင်လုပ်ခြင်း စသည့် တစ်ခုခုအား ကျူးလွန်ပါက အနည်းဆုံး ထောင်ဒဏ် ၁၀ နှစ်မှ အများဆုံး တစ်သက်တစ်ကျွန်းကနေ သေဒဏ်အထိ ပေးနိုင်သော ရွေးကောက်ပွဲဆိုင်ရာ အကာအကွယ်ပေးရေး ဥပဒေကို ၂၀၂၅ ခုနှစ်၊ ဇူလိုင် ၂၉ ရက်က ဗိုလ်ချုပ်မှူးကြီးမင်းအောင်လှိုင် လက်မှတ်ထိုး ပြဋ္ဌာန်းထားသည်။
