CNI News
၂၀၂၅ ခုနှစ်၊ ဩဂုတ် ၃၁
မြန်မာနိုင်ငံ၏ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံဆွေးနွေးရာမှာ မြေရှားသတ္တုတူးဖော်ရေးနှင့် လုံခြုံရေးကဏ္ဍများမှာ နှစ်နိုင်ငံ ဆက်ဆံရေး တိုးမြှင့်ရန် သဘောတူညီမှု ရရှိခဲ့သည်ဟု အိန္ဒိယဝန်ကြီးချုပ် မိုဒီက ပြောသည်။
ဗိုလ်ချုပ်မှူးကြီးမင်းအောင်လှိုင်နှင့် အိန္ဒိယဝန်ကြီးချုပ် မိုဒီတို့သည် တရုတ်နိုင်ငံ၊ တီယန်ကျင်းမြို့မှာ ၂၀၂၅ ခုနှစ်၊ ဩဂုတ် ၃၁ ရက်က တွေ့ဆုံ ဆွေးနွေးခဲ့ကြသည်။
ဝန်ကြီးချုပ် မိုဒီက “မြန်မာနိုင်ငံသည် အိန္ဒိယနိုင်ငံ၏ အရှေ့နှင့် ထိတွေ့ဆက်ဆံရေးမူဝါဒနှင့် အိမ်နီးချင်း ဦးစားပေး ရေး မူဝါဒများ၏ အရေးပါတဲ့ မဏ္ဍိုင်တစ်ခု ဖြစ်ပါတယ်။ ကုန်သွယ်ရေး၊ ချိတ်ဆက်ဆောင်ရွက်ရေး၊ စွမ်းအင်၊ မြေရှားသတ္တု တူးဖော်ရေးနှင့် လုံခြုံရေးကဏ္ဍတွေမှာ နှစ်နိုင်ငံဆက်ဆံရေး တိုးမြှင့်ဖို့အတွက် အလားအလာ ကောင်းများရှိကြောင်း ကျွန်ုပ်တို့နှစ်ဦး သဘောတူညီခဲ့ကြပါသည်”ဟု သူ၏ ဖေ့စ်ဘွတ်ခ်စာမျက်နှာကတဆင့် ထုတ်ပြန် ပြောကြားခဲ့သည်။
ထို့နောက် အိန္ဒိယသည် မြန်မာနိုင်ငံ၏ အခြေအနေအား ငြိမ်းချမ်းစွာ ဆွေးနွေးညှိနှိုင်းခြင်းဖြင့် ဖြေရှင်းရန်သာ အကောင်းဆုံးဖြစ်မည်ဟု ယုံကြည်ကြောင်း၊ ထိုသို့ လုပ်ဆောင်ရာတွင် မြန်မာ့အရေးကို မြန်မာကိုယ်တိုင် ဦးဆောင် ကိုင်တွယ်ဖြေရှင်းရန် အိန္ဒိယက အားပေးသည်ဟု မိုဒီ၏ ပြောကြားချက်ကို ကိုးကား၍ အိန္ဒိယ နိုင်ငံခြားရေးဝန်ကြီးဌာနက ထုတ်ပြန်ခဲ့သည်။
ထို့အပြင် အိန္ဒိယ- မြန်မာနယ်စပ်ဒေသ ကုန်သွယ်ရေး အခြေအနေများ၊ ကာကွယ်ရေးနှင့်လုံခြုံရေးဆိုင်ရာ ကိစ္စများကို ဆွေးနွေးခဲ့ကြောင်း သိရသည်။
မြန်မာနိုင်ငံတွင် မြေရှားသတ္တုကို ရှမ်းပြည်နယ်နှင့် ကချင်ပြည်နယ်၌ တူးဖော်လျက်ရှိပြီး အထူးသဖြင့် တရုတ်နိုင်ငံ က အဓိက တူးဖော်နေခြင်းဖြစ်သည်။
အဆိုပါ မြေရှားသတ္တု တူးဖော်နေသော နယ်မြေများကို ကချင်လွတ်လပ်ရေးတပ်မတော်(KIA)၊ “ဝ”ပြည်သွေးစည်း ညီညွတ်ရေးတပ်မတော်(UWSA)၊ အမျိုးသားဒီမိုကရေစီမဟာမိတ်တပ်မတော်(NDAA)က ထိန်းချုပ်ထားပြီး မြန်မာ့ တပ်မတော်၏ ထိန်းချုပ်မှုအောက်မှာ မရှိပေ။
အလားတူ မြန်မာ-အိန္ဒိယ နယ်စပ်ဒေသများဖြစ်သည့် စစ်ကိုင်းတိုင်းဒေသကြီးနှင့် ချင်းပြည်နယ်တွင်လည်း မြန်မာ့ တပ်မတော်နှင့် တော်လှန်ရေးအင်အားစုများကြား တိုက်ပွဲများ အပြင်းအထန် ဖြစ်ပွားနေခြင်းကြောင့် နယ်စပ် တည်ငြိမ်အေးချမ်းမှု မရှိသလို ကုန်သွယ်ရေးများ ရပ်တန့်နေသည်။
ထို့နောက် အိန္ဒိယကို တော်လှန်တိုက်ခိုက်နေသော ကသည်းနှင့် နာဂလက်နက်ကိုင်များသည် အိန္ဒိယနိုင်ငံနှင့် ထိစပ်နေသော မြန်မာနိုင်ငံအတွင်းက နယ်မြေများမှာ အခြေစိုက်လှုပ်ရှားနေခြင်းကြောင့် အိန္ဒိယအစိုးရသည် လုံခြုံရေးစိုးရိမ်လျက်ရှိနေသည်။
