CNI International News

တိုင်နန်၊ မတ်လ ၂၈

ထိုင်ဝမ်တွင် မတ်လ ၂၇ ရက်က သမ္မတရုံး၏ ပြည်သူ့ကာကွယ်ရေးကော်မတီ လက်အောက်တွင် ပထမဆုံးအကြိမ် အဖြစ် ပြည်သူ့ကာကွယ်ရေး လေ့ကျင့်မှုကို ကွင်းဆင်းပြုလုပ်ခဲ့ကြောင်း Nikkei Asia မှ ဖော်ပြခဲ့သည်။

ထိုလေ့ကျင့်မှုများတွင် အရေးပေါ် ကယ်ဆယ်ရေးနှင့် တုန့်ပြန်ဆောင်ရွက်ရေးများအတွက် ကြိုတင်လေ့ကျင့် ပြင်ဆင်မှုအဖြစ် အစိုးရနှင့်ပုဂ္ဂလိက အခန်းကဏ္ဍများမှ လူပေါင်း ၁၅၀၀ ခန့် ပါဝင်လေ့ကျင့်ခဲ့ကြသည်။

တိုင်နန် (Tainan) မြို့ရှိ အန်ပင်းဆိပ်ကမ်း (Anping Harbor) တွင် ပေါက်ကွဲမှု ဖြစ်ပွားခဲ့မည်ဆိုပါက မည်သို့ တုန့်ပြန်ဆောင်ရွက်ရမည်ဆိုသည့် အခြေအနေများနှင့် စိတ်မှန်း ဖြစ်နိုင်ခြေများကို တွက်ချက်သုံးသပ်ပြီး လေ့ကျင့်ခဲ့ကြခြင်းဖြစ်သည်။

ထိုလေ့ကျင့်မှုသည် လူအများအပြားကို ဘေးလွတ်ရာ ရွှေ့ပြောင်းပေးခြင်း၊ ကယ်ဆယ်ရေး စခန်းများတွင် နေရာ ချထားရေးနှင့် ဒဏ်ရာရရှိသူများအား ကုသမှုများ ပါဝင်သည်။

ထိုသို့ လေ့ကျင့်မှုသည် ဗဟိုနှင့် ဒေသန္တရအစိုးရ၏ အရေးပေါ် တုန့်ပြန်ဆောင်ရွက် နိုင်စွမ်းများကို စမ်းသပ်သည့် ရည်ရွယ်ချက်ဖြင့် ပြုလုပ်ခြင်းဖြစ်ကြောင်း သမ္မတရုံးက ထုတ်ပြန်ခဲ့သည်။

ရဲတပ်ဖွဲ့ဝင်များ၊ အန်ပင်း ဆိပ်ကမ်းမှ အထူးတပ်ဖွဲ့တစ်ဖွဲ့၊ ဒေသဆိုင်ရာ ရဲစခန်းများနှင့် မီးသတ်ဌာနများအောက်ရှိ စေတနာ့ဝန်ထမ်း ရဲများ၊ ပရဟိတအဖွဲ့ဝင်များနှင့် စီးပွားရေးလုပ်ငန်းများ ပါဝင်ခဲ့ပြီး လေ့ကျင့်မှုတွင် ပူးပေါင်း လုပ်ဆောင်ရန်အရပ်သား ၁,၅၀၀ ခန့်ကို စည်းရုံးခဲ့သည်။

ထိုင်ဝမ်သမ္မတ လိုင်ချင်တေကို တွေ့ရစဉ်

ထိုစစ်ရေး လေ့ကျင့်မှုတွင် ထိုင်ဝမ်၏ လက်နက်ကိုင်တပ်ဖွဲ့များ မပါဝင်သော်လည်း အရေးပေါ် ဆေးဘက်ဆိုင်ရာ အထောက်အကူအဖြစ် စစ်မြေပြင်၌ အသုံးပြုသည့် ဆေးရုံသုံးပစ္စည်းများကို ထည့်သွင်းအသုံးပြုခဲ့သည်။

စစ်ဆင်ရေးကို ကြည့်ရှုစစ်ဆေးခဲ့သည့် ထိုင်ဝမ်သမ္မတ လိုင်ချင်တေ(Lai Ching-te)က ကြိုတင်ပြင်ဆင်မှုများ ပြုလုပ်ရန်နှင့် သဘာဝဘေး အန္တရာယ်များ၊ မတော်တဆမှုများ၊ ပြောင်းလဲနေသော ပထဝီနိုင်ငံရေး အခြေအနေ များအတွက် ထိုင်ဝမ်၏ ကြံ့ကြံ့ခံ ရပ်တည်နိုင်စွမ်းသည် အရေးကြီးကြောင်း အလေးထား ပြောဆိုခဲ့သည်။

စစ်ဘက်တွင်သာမက အရပ်ဘက် ကာကွယ်ရေး စွမ်းရည်များကိုပါ သရုပ်ပြ လေ့ကျင့်ခြင်းဖြင့် ထိုင်ဝမ်၏ လုံခြုံရေးကို စိတ်ချသေချာစေရန်နှင့် ငြိမ်းချမ်းရေးကို ထိန်းသိမ်းရန် ရည်ရွယ်ပြီး ပြည်သူ့ကာကွယ်ရေး လေ့ကျင့်မှုကို ပြုလုပ်ခဲ့ခြင်းဖြစ်သည်ဟု လိုင်က ပြောကြားခဲ့သည်။

Source: Nikkei Asia