CNI International News
ဘရပ်ဆဲလ်၊ ဇန်နဝါရီ ၁၅
နေတိုးအဖွဲ့ခေါင်းဆောင် မာ့ခ် ရူတီ (Mark Rutte) က အမေရိကန်ရွေးကောက်ခံသမ္မတ ဒေါ်နယ်ထရမ့် (Donald Trump) သည် မှန်ကန်သည့် လုပ်ဆောင်ချက်များ အများအပြားရှိခဲ့ကြောင်း ပြောကြားခဲ့သည်ဟု DW သတင်းတွင် ဖော်ပြခဲ့သည်။
ဒိန်းမတ်နိုင်ငံက ပိုင်ဆိုင်သည့် ဂရင်းလန်း (Greenland)ကျွန်းကို ထရမ့်က အရယူမည့် အစီအစဉ်နှင့်ပတ်သက်ပြီး သတင်းထောက်များ၏ မေးမြန်းမှုကိုခံရချိန်တွင် ရူတီက ထိုကဲ့သို့ ပြောဆိုခဲ့ခြင်းဖြစ်သည်။
ထို့နောက် ဥရောပနိုင်ငံများအနေဖြင့် ကာကွယ်ရေး အသုံးစရိတ်ကို မြှင့်တင်ရန် ၎င်းက တိုက်တွန်းခဲ့သည်။
ရူတီ၏ ပထမဆုံးအကြိမ် ဥရောပလွှတ်တော် ခရီးစဉ်တွင် ရုရှား၏ ခြိမ်းခြောက်မှုများ၊ လက်နက်ခဲယမ်းများ အကြောင်းကို ဆွေးနွေးခဲ့ကြသော်လည်း အကြီးမားဆုံး အကြောင်းအရာမှာ ဂရင်းလန်းကျွန်းကို အရယူရန် အတွက် အင်အားသုံး လုပ်ဆောင်မည်ဟု အရိပ်အမြွက် ပြောကြားခဲ့သည့် ထရမ့်၏ မှတ်ချက်စကားများဖြစ်သည်။
ဂရင်းလန်းကျွန်းကို တွေ့ရစဉ်
ထရမ့်နှင့်ပတ်သက်သည့် မေးခွန်းကို ရူတီက တိုက်ရိုက် ဖြေကြားခဲ့ခြင်းမရှိဘဲ “အမေရိကန် အစိုးရအဖွဲ့သစ်ဟာ လာမယ်အပတ်မှာ စတင်ရုံးထိုင်တော့မှာပါ။ အမေရိကန်က လူတွေဆီကနေ သတင်းတွေကိုလည်း ကြားရပါ တယ်။ ဒါပေမယ့် ဒီအကြောင်းကိုတော့ နောက်တစ်ပတ်ကျော်မှ ပြောကြတာပေါ့”ဟု ပြောကြားခဲ့သည်။
“ထရမ့်ဟာ အကြိမ်ပေါင်းများစွာ မှန်ကန်ခဲ့ပါတယ်။ ကျနော်တို့ သူနဲ့ စကားပြောဖို့ လိုပါတယ်။ ဒီကိစ္စမှာ ဒိန်းမတ် ဝန်ကြီးချုပ် မက်တီ ဖရက်ဒရစ်ဆင် (Mette Frederiksen) ရဲ့ ကိုင်တွယ်ဖြေရှင်းတဲ့ ပုံစံကိုလည်း ကျနော် သဘောကျပါတယ်။ သူက ဂရင်းလန်းကျွန်းနဲ့ ပတ်သက်ပြီး ထရမ့်ကို ချက်ချင်း တုန့်ပြန်တာမျိုး မလုပ်ခဲ့ပါဘူး”ဟု ရူတီက ပြောကြားခဲ့သည်။
လက်ရှိ ပိုပြီးအရေးကြီးသည့် ကိစ္စမှာ အာတိတ်ဒေသအရေး ကိစ္စဖြစ်ပြီး ရာသီဥတု ဖောက်ပြန်ပြောင်းလဲမှုကြောင့် အာတိတ်ဒေသမှ ရေခဲများ အရည်ပျော်လာခြင်းသည် ကမ္ဘာလုံးဆိုင်ရာ နောက်ဆက်တွဲ ဆိုးကျိုးများကို ဖြစ်စေနိုင် ကြောင်း ၎င်းက ဆိုသည်။
ထို့ကြောင့် နေတိုးမဟာမိတ်များ အနေဖြင့် ထိုအရေးကိစ္စကို ပိုမိုအာရုံစိုက် ဆွေးနွေးရန် လိုအပ်သည်ဟု နေတိုး အကြီးအကဲက ပြောသည်။
“ဂရင်းလန်းကျွန်းကို ဘယ်သူက ထိန်းချုပ်ထားတယ်ဆိုတာထက် အာတိတ်ရေခဲတွေ အရည်ပျော်တာက ပိုပြီး အရေးကြီးပါတယ်။ အာတိတ်ဒေသ ဘေးကင်းလုံခြုံဖို့ သေချာလုပ်ဆောင်ရမှာပါ။ ဥရောပဟာလည်း အမေရိကန် အပေါ် မှီခိုအားထားနိုင်ပါတယ်”ဟု ရူတီက ပြောသည်။
အတ္တလန္တိတ် ဖြတ်ကျော် ဆက်ဆံရေးဆိုင်ရာ ကျွမ်းကျင်သူ ဘရူနို လက်တီ (Bruno Lete) ကမူ ရူတီအနေဖြင့် နေတိုးအဖွဲ့အပေါ်ထားရှိသည့် ထရမ့်၏ သဘောထားအပေါ် ဟန်ချက်ညီစွာ ထိန်းသိမ်းသင့်ကြောင်း ပြောကြားခဲ့ သည်။
Source: DW
