CNI International News
ဆိုးလ်၊ ဒီဇင်ဘာ ၅
တောင်ကိုရီးယားသမ္မတ ယွန်းဆော့ရွဲ(Yoon Suk Yeol) ၏ အံ့အားသင့်ဖွယ် အရေးပေါ် စစ်အုပ်ချုပ်ရေး အမိန့် ထုတ်ပြန်ကြေညာမှုသည် တောင်ကိုရီးယား၏ ဆယ်စုနှစ်များစွာကြာ မဟာမိတ်ဖြစ်သည့် အမေရိကန်နှင့် ဆက်ဆံရေးအတွက် စမ်းသပ်ချက်တစ်ခု ဖြစ်လာစေခဲ့သည်ဟု The Korea Times မှ ဖော်ပြခဲ့သည်။
ယွန်း၏ အရေးပေါ် စစ်အုပ်ချုပ်ရေးအမိန့် ထုတ်ပြန်မှုကို နာရီပိုင်းအတွင်းမှာပင် လွှတ်တော်က မဲခွဲပြီး ပယ်ချခဲ့ သည်။
ထို့နောက် သမ္မတယွန်းကလည်း အရေးပေါ် စစ်အုပ်ချုပ်ရေး အမိန့်ကို ပြန်လည်ရုပ်သိမ်းခဲ့သည်။
အမေရိကန်အရာရှိများကမူ ၎င်းတို့အား ကြိုတင်အသိပေး အကြောင်းကြားချင်းမရှိဘဲ ယွန်း၏ စစ်အုပ်ချုပ်ရေး အမိန့်ကြေညာချက် ထွက်ပေါ်လာမှုအပေါ် အံ့အားသင့်ခဲ့ပုံပေါ်ကြောင်း ကျွမ်းကျင်သူများက ပြောကြားခဲ့သည်။
တောင်ကိုရီးယား စစ်တပ်ကိုတွေ့ရစဉ်
ကျယ်ကျယ်ပြန့်ပြန့် သုံးသပ်ရမည်ဆိုပါက ထိုဖြစ်စဉ်သည် တောင်ကိုရီးယား-အမေရိကန် မဟာမိတ် ဆက်ဆံရေး တွင် အဓိကကျသည့် ဒီမိုကရေစီ စံနှုန်းများအပေါ် ထားရှိသော သမ္မတယွန်းဆော့ရွဲ အစိုးရအဖွဲ့၏ ကတိကဝတ် များကို စိုးရိမ်စိတ်များ မြင့်တက်စေခဲ့သည်။
အမေရိကန်နိုင်ငံခြားရေးဝန်ကြီး ဘလင်ကင် (Antony Blinken) ကမူ စစ်အုပ်ချုပ်ရေးအမိန့်အား လျင်မြန်စွာ ပြန်လည် ရုပ်သိမ်းခဲ့မှုအပေါ် ကြိုဆိုကြောင်း ပြောကြားခဲ့သည်။
"ပြီးခဲ့တဲ့ ၂၄ နာရီအတွင်း တောင်ကိုရီးယားမှာ ဖြစ်ပွားခဲ့တဲ့ အခြေအနေတွေကို အမေရိကန်က အနီးကပ် စောင့်ကြည့်ခဲ့ပါတယ်။ ဖွဲ့စည်းပုံအခြေခံဥပဒေနဲ့အညီ လွှတ်တော်ရဲ့ မဲခွဲဆုံးဖြတ်မှုနဲ့အတူ အရေးပေါ် အခြေအနေ ကို ပြန်လည်ရုပ်သိမ်းတဲ့ ယွန်းရဲ့ ထုတ်ပြန်ချက်ကို ကျနော်တို့ ကြိုဆိုပါတယ်" ဟု ဘလင်ကင်က ပြောကြားခဲ့ သည်။
တောင်ကိုရီးယား စစ်တပ်နဲ့ လူထု ထိပ်တိုက်တွေ့နေစဉ်
ထို့ပြင် နိုင်ငံရေးသဘောထား ကွဲလွဲမှုများကို တရားဥပဒေစိုးမိုးရေးနှင့် ကိုက်ညီမှုရှိပြီး ငြိမ်းချမ်းစွာ ဖြေရှင်းလိမ့် မည်ဟု မျှော်လင့်ကြောင်း၊ တရားဥပဒေစိုးမိုးရေး၊ ဒီမိုကရေစီ စံနှုန်းများအပေါ် အခြေခံပြီး တောင်ကိုရီးယား-အမေရိကန် မဟာမိတ်ဆက်ဆံရေးနှင့် ကိုရီးယားပြည်သူများကို မိမိတို့က ထောက်ခဲ့ကြောင်း ထပ်လောင်း အတည်ပြုပါသည်ဟု ဘလင်ကင်က ပြောသည်။
စစ်အုပ်ချုပ်ရေးဥပဒေကို ယွန်းက ပြန်မရုပ်သိမ်းမီ အိမ်ဖြူတော် အမျိုးသားလုံခြုံရေးကောင်စီ ပြောရေးဆိုခွင့်ရှိသူ က တောင်ကိုရီးယား၏ အခြေအနေကို အလွန်စိုးရိမ်ကြောင်းနှင့် အနီးကပ် စောင့်ကြည့်နေကြောင်း ပြောကြား ခဲ့သည်။
ယွန်း၏ ကြေညာချက် ထွက်ပေါ်ခဲ့ပြီးနောက် တောင်ကိုရီးယားတွင် တပ်စွဲထားသည့် အမေရိကန်တပ်ဖွဲ့များ၏ အသင့် အနေအထားရှိမှု အခြေအနေကို ပြောင်းလဲခဲ့ခြင်းမရှိကြောင်း အမေရိကန်တပ်ဖွဲ့-ကိုရီးယား (USFK) က ထုတ်ပြန်ခဲ့သည်။
Source: The Korea Times
