CNI Sport News
၂၀၂၅ ခုနှစ်၊ နိုဝင်ဘာ ၂၀
မော်ရိုကို ညာနောက်ခံလူ ဟာကီမီဟာ ရာဘတ်မှာ ကျင်းပတဲ့ အာဖရိကဘောလုံးအဖွဲ့ချုပ်ရဲ့ ဆုပေးပွဲ အခမ်းအနားမှာ ၂၀၂၅ ခုနှစ်အတွက် အာဖရိကအကောင်းဆုံး အမျိုးသားဘောလုံးသမားဆုကို ရရှိခဲ့ပါတယ်။
ဟာကီမီဟာ အီဂျစ်တောင်ပံ ကစားသမား ဆာလက်နဲ့ နိုင်ဂျီးရီးယား တိုက်စစ်မှူး အိုဆီမန်တို့ကို မဲအသာရပြီး ဒီဆုကို ပထမဆုံးအကြိမ် ရရှိခဲ့တာပါ။
၂၀၂၃ နဲ့ ၂၀၂၄ ခုနှစ်တွေမှာ ဒီဆုကို လွဲချော်ခဲ့တဲ့ ဟာကီမီဟာ ၁၉၉၈ ခုနှစ်က ဟာဒီဂျီနောက်ပိုင်း ဒီဆုကို ပြန်လည်ရရှိတဲ့ ပထမဆုံး မော်ရိုကို ကစားသမားဖြစ်ခဲ့ပါတယ်။
ဟာကီမီဟာ ပြီးခဲ့တဲ့ရာသီက PSG အသင်းကို ချန်ပီယံလိဂ်ဖလား အပါအဝင် ပြည်တွင်းဖလား အောင်မြင်မှုတွေ ရယူပေးနိုင်ခဲ့တာပါ။
ဟာကီမီက “ဒီဂုဏ်သိက္ခာ ရှိတဲ့ဆုကို ရရှိခဲ့တာဟာ ကျနော့်အတွက် အလွန်ဂုဏ်ယူစရာပါပဲ။ ဒီဆုဟာ ကျနော့် အတွက်သာ မကဘဲ အာဖရိကမှာ ဘောလုံးသမားတစ်ဦးဖြစ်ဖို့ အိပ်မက်မက်နေတဲ့ ခွန်အားကြီးတဲ့ အမျိုးသားနဲ့ အမျိုးသမီးတွေ အားလုံးအတွက်ပါ။ ကျနော် ပရော်ဖက်ရှင်နယ် ဘောလုံးသမား တစ်ဦးဖြစ်လာမယ်လို့ ငယ်စဉ် ကတည်းကနေ ကျနော့်ကို အမြဲတမ်း ယုံကြည်ပေးခဲ့တဲ့ သူတွေအားလုံးကို ကျေးဇူးတင်ကြောင်း ပြောချင်တယ်”လို့ ပြောခဲ့ပါတယ်။
ချီဘက်ကို တွေ့ရစဉ်
အာဖရိကတစ်နှစ်တာ အကောင်းဆုံး အမျိုးသမီးဆုကို မော်ရိုကိုအသင်းမှ ချီဘက်က ရရှိခဲ့ပြီး သူမဟာ ဒီဆုကို ရရှိတဲ့ ပထမဆုံး မော်ရိုကို အမျိုးသမီးဖြစ်ခဲ့ပါတယ်။
ချီဘက်ဟာ ၂၀၂၄ အမျိုးသမီး အာဖရိကဖလား ပြိုင်ပွဲမှာ ၅ ဂိုးသွင်းပြီး ဒီပြိုင်ပွဲရဲ့ ဂိုးသွင်း အများဆုံးဆုကို ရခဲ့သလို မော်ရိုကိုအသင်းကိုလည်း ဒုတိယနေရာ ရရှိအောင် ကူညီပေးနိုင်ခဲ့ပါတယ်။
ချီဘက်က ဒီဆုကို ရခဲ့တဲ့အတွက် အလွန်ဝမ်းသာပြီး ဒါက နှစ်ပေါင်းများစွာ ကြိုးစားအားထုတ်မှုရဲ့ အသီးအပွင့် ဖြစ်တယ်လို့ ပြောခဲ့ပါတယ်။
ကိတ်ဗာဒီအသင်းကို ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရရှိအောင် ကိုင်တွယ်ပေးနိုင်ခဲ့တဲ့ နည်းပြဘူဘီစတာ ဟာ တစ်နှစ်တာ အကောင်းဆုံး အမျိုးသားနည်းပြဆုကို ရရှိခဲ့ပါတယ်။
Source: ESPN
