CNI International News
ဘန်ကောက်၊ နိုဝင်ဘာ ၁၈
ထိုင်းဘုရင် မဟာဝိဇယလောင်ကွန်း (Maha Vajiralongkorn) နှင့် မိဖုရား သုသီတာ (Suthida) တို့သည် တရုတ် အစိုးရ၏ ဖိတ်ကြားချက်ဖြင့် လာမည့်နှစ်တွင် တရုတ်သို့ သွားရောက်လည်ပတ်မည်ဟု ဘန်ကောက်ပို့စ်မှ ဖော်ပြခဲ့ သည်။
၂ နိုင်ငံအကြား သံတမန်ဆက်ဆံရေး ထူထောင်သည့် နှစ်ပေါင်း ၅၀ ပြည့် နှစ်ပတ်လည် အထိန်းအမှတ်အဖြစ် သွားရောက် လည်ပတ်မည်ဖြစ်ကြောင်း ဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) က ပြောကြားခဲ့သည်။
ပေတုန်တန်သည် နိုဝင်ဘာ ၁၆ ရက်က ပီရူးနိုင်ငံ၊ လီမာ (Lima) မြို့တော်တွင် ပြုလုပ်သည့် ၃၁ ကြိမ်မြောက် Apec စီးပွားရေး ခေါင်းဆောင်များ အစည်းအဝေးနှင့် ဆက်စပ် အစည်းအဝေးများအတွင်း တရုတ်သမ္မတ ရှီကျင့်ဖျင်(Xi Jinping)နှင့် တွေ့ဆုံချိန် ထိုကဲ့သို့ ပြောကြားခဲ့ခြင်းဖြစ်ကြောင်း ထိုင်းအစိုးရ ပြောရေးဆိုခွင့်ရှိသူ ဂျီရာယု ဟောင်ဆပ် (Jirayu Houngsub) က ပြောကြားခဲ့သည်။
"ဘုန်းတော်ကြီးမားတဲ့ ဘုရင်ကြီးနဲ့ မိဖုရားတို့ဟာ ၂၀၂၅ ခုနှစ်ကုန်ပိုင်းမှာ တရုတ်အစိုးရရဲ့ ဖိတ်ကြားချက်ကို လက်ခံခဲ့ပြီး တရုတ်ကို တရားဝင် ခရီးစဉ်အနေနဲ့ သွားရောက် လည်ပတ်မှာ ဖြစ်ပါတယ်။ အဲဒီခရီးစဉ်ဟာ ထိုင်း-တရုတ် ဆက်ဆံရေးမှာ သမိုင်းဝင်ဖြစ်စဉ်တစ်ခု ဖြစ်လာပါလိမ့်မယ်" ဟု ပေတုန်တန်က ပြောကြားခဲ့သည်ကို ထိုင်းနိုင်ငံပိုင် MCOT Plc ရုပ်သံလိုင်းက ဖော်ပြခဲ့သည်။
ထိုင်းဝန်ကြီးချုပ် ပေတုန်တန်နဲ့ တရုတ်သမ္မတ ရှီကျင့်ဖျင်ကို တွေ့ရစဉ်
ထို့ပြင် တရုတ်သမ္မတ ရှီနှင့် သမ္မတကတော်တို့သည်လည်း လာမည့်နှစ်တွင် ၂ နိုင်ငံဆက်ဆံရေး ထူထောင်သည့် နှစ်ပေါင်း ၅၀ ပြည့် နှစ်ပတ်လည်အတွက် ထိုင်းသို့ လာရောက်လည်ပတ်ရန် အစိုးရက မျှော်လင့်ထားကြောင်း ပေတုန်တန်က ပြောသည်။
"တရုတ်သမ္မတနဲ့ သမ္မတကတော်ကို ကြိုဆိုဖို့ အခွင့်အရေး ရှိလာလိမ့်မယ်လို့ ကျမတို့ မျှော်လင့်ပါတယ်။ နောက်နှစ်ဟာ ထိုင်းနဲ့ တရုတ်အကြား မိတ်ဖက်ဆက်ဆံရေးအတွက် ရွှေနှစ် ဖြစ်လာပါလိမ့်မယ်" ဟု ပေတုန်တန်က ပြောသည်။
ပေတုန်တန်သည် ရှီနှင့် တွေ့ဆုံချိန်တွင် Apec မူဘောင်အတွင်း နှစ်နိုင်ငံ ဆက်ဆံရေးများကို မြှင့်တင်ရန် ထိုင်းနိုင်ငံဘက်က အသင့်ရှိနေမှုကို အတည်ပြုပြောကြားခဲ့သည်။
ထို့ပြင် ပေတုန်တန်က ဆန်းသစ်တီထွင်သည့် စီးပွားရေး ဖွံ့ဖြိုးတိုးတက်မှုများကို တွန်းအားပေး လုပ်ဆောင်မှုကဲ့သို့ တရုတ်၏ ဖွံ့ဖြိုးတိုးတက်မှု အခြေအနေကို ချီးကျူးခဲ့သည်ဟုလည်း ဂျီရာယုက ပြောကြားခဲ့သည်။
Source: ဘန်ကောက်ပို့စ်
