CNINews

၂၀၂၄ ခုနှစ်၊ အောက်တိုဘာ ၁၅

လက်ရှိ မြန်မာနိုင်ငံတစ်ဝှမ်းတွင် စစ်ရေးပဋိပက္ခများ ကျယ်ကျယ်ပြန့်ပြန့် ဖြစ်ပွားနေသောကြောင့် မြန်မာနိုင်ငံ တည်ငြိမ်အေးချမ်းရေး ရရှိရန် အနာဂတ် မြန်မာနိုင်ငံကို ဘယ်လိုပုံဖော် တည်ဆောက်ကြမလဲဟုဆိုကာ စစ်ရေး နှင့်နိုင်ငံရေး အကဲခတ်များကြား ဆွေးနွေးလျက်ရှိနေကြသည်။

ထို့ပြင် မြန်မာနိုင်ငံ၏ အနာဂတ်အား ဖော်ဆောင်ရာတွင် မည်သည့် မူဝါဒများဖြင့် ဖော်ဆောင်ရမည် ဆိုသည်ကို လည်း ၎င်းတို့အကြား ဆွေးနွေးနေကြသည်။

မိမိနိုင်ငံ၏ ပြည်တွင်းရေး ပြဿနာကို မိမိတို့ကိုယ်တိုင်သာ ကြိုးစားဖြေရှင်းရမည့် တာဝန်သည် မြန်မာ ပါဝင် ပတ်သက်သော အင်အားစုအားလုံးတွင်ရှိကြောင်း ရခိုင့်ဦးဆောင်ပါတီ(AFP)မှ ဥက္ကဌ ဒေါက်တာအေးမောင်က CNI သတင်းဌာနသို့ ပြောသည်။

၎င်းက "မြန်မာ့နိုင်ငံရေး ပြဿနာကို မြန်မာတွေကပဲ ဖြေရှင်း‌ပေးရမယ်။ အဲတော့မကြာခင် NSPNC ကလည်း ဖိတ်မံတက ပြုထားတာရှိတယ်။ ၉ နှစ်မြောက် NCA လက်မှတ်ထိုးတဲ့ ငြိမ်းချမ်းရေး အခမ်းအနား လုပ်ဖို့ရှိတယ်။ အဲဒီရဲ့နောက်မှာ Workshop လေးတစ်ခုပါတယ်။ အဲဒီမှာ NSPNC ဘက်က ကျနော်တို့ အနာဂတ်မှာ ပုံဖော်လိုတဲ့ မြန်မာနိုင်ငံတော်နဲ့ ပတ်သက်တဲ့ ဆွေးနွေးပွဲတစ်ခုပါတယ်။ အဲတော့ မြန်မာနိုင်ငံတော်ကို အနာဂတ်ကာလ အတွက် ဘယ်လိုပုံဖော်သင့်သလဲဆိုတာ မြန်မာနိုင်ငံသားတွေကပဲ ဆွေးနွေးဆုံးဖြတ်ပြီးမှ သွားရမှာ။ အဲဒီမှာ နိုင်ငံ တကာတွေက ဘယ်လိုပူးပေါင်းပါဝင်ဖို့ လိုမှာလဲဆိုတာ၊ ကျနော်တို့ကပဲ ဦးဆောင်ရမယ်။ သူတို့ကတော့ အစွမ်း ကုန် ပူး‌ပေါင်းပါဝင်ပြီးမှ မြန်မာ့ငြိမ်းချမ်းရေးကို လုပ်ပေးမယ် ဆိုတဲ့ဘက်မှာတော့ ရှိနေကြ ပါတယ်။ ဒါပေမယ့် တကယ့်တကယ် ကြိုးပမ်းရမှာက ကျနော်တို့ နိုင်ငံမှာရှိတဲ့ ပါဝင်ပတ်သက်တဲ့ အင်အားစုတွေ၊ အဲဒါကလည်း ဘာကိုဦးတည်ရမလဲဆိုရင် လူထုကို ဦးတည်ရမယ်"ဟု ပြောသည်။

NCA လက်မှတ်ထိုးထားသည့် တိုင်းရင်းသားလက်နက်ကိုင် ၇ ဖွဲ့နှင့် NSPNC ကိုယ်စားလှယ်များကို တွေ့ရစဥ် 

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က နိုင်ငံရေးသဘောထား ကွဲလွဲမှုများကြောင့် နိုင်ငံတစ်ဝှမ်း လက်နက်ကိုင် ပဋိပက္ခများ ကျယ်ကျယ်ပြန့်ပြန့် ဖြစ်ပွားခဲ့ပြီး ၂၀၂၄ ခုနှစ်၊ အောက်တိုဘာလအထိ စစ်ပြေးဒုက္ခ သည် ၆ သန်းကျော်ရှိကြောင်း ISP-Myanmar မှ ထုတ်ပြန်ထားသည့် အချက်အလက်များအရ သိရသည်။

ထို့ပြင် မြန်မာပြည်သူလူထုသည် မူးယစ်ဆေးဝါးနှင့် အွန်လိုင်း လိမ်လည်မှုများဖြင့်ပါ ရင်ဆိုင်နေကြရသလို အလုပ် အကိုင်ရှားပါးမှု၊ ကုန်ဈေးနှုန်းကြီးမြင့်မှု၊ ခိုးဆိုးလုနှိုက်အန္တရာယ် စသည့် အခြေအနေများဖြင့်လည်း ရင်ဆိုင်နေကြ ရသည်။

ထို့ကြောင့် မြန်မာ့တပ်မတော် အပါအဝင် တိုင်းရင်းသားလက်နက်ကိုင်များအနေဖြင့် အနာဂတ်မြန်မာနိုင်ငံတော် ပုံဖော်ရာတွင် လူထုကို ဦးတည်သော မူဝါဒများဖြင့် လုပ်ဆောင်သင့်ကြောင်း စစ်ရေးနှင့်နိုင်ငံရေး အကဲခတ်များက ထောက်ပြကြသည်။

လူထုကိုဗဟိုပြုသော မူဝါဒ၊ လူထုကို ဦးတည်သော အခန်းကဏ္ဍအား မဖြစ်မနေ လုပ်ဆောင်ရမည်ဖြစ်ကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

နစက ဥက္ကဌနှင့် တိုင်းရင်းသား လက်နက်ကိုင်အဖွဲ့များကို တွေ့ရစဥ်

၎င်းက "နိုင်ငံရေးအရ ဖြေရှင်းမယ်ဆိုရင်တော့ သေချာတာကတော့ မြေပြင်အခြေနေ တည်ငြိမ်ဖို့လိုတယ်။ ခုန ပြောသလို လူထုကိုဦးတည်မယ်ဆိုတဲ့အပိုင်းက လူထုသည် အရေးပါတာပေါ့။ ဘာလို့လဲဆိုတော့ ဒီလူထုရှိလို့ပဲ အုပ်ချုပ်သူလူတန်းစားနဲ့ ခုနအစိုးရတို့ ဘာတို့ တိုင်းပြည်တို့ လုပ်လို့ရတာကိုး။ လူထုမပါဘဲနဲ့တော့ ဒါတွေလုပ်ဖို့က၊ နောက်တစ်ခါကျ‌တော့ လူထုကို စွဲဆောင်ပြီး တစ်နေရာကို တွန်းပို့ဖို့ဆိုတာလည်း ပြောရရင်တော့ ရည်ရွယ်ချက် သိပ်ကောင်းပြီး‌တော့ ဦးဆောင်တဲ့သူက အရမ်းတော်နေရင်တော့ တစ်မျိုးဖြစ်မှာပေါ့။ ဒါပေမယ့် ခုနပြောသလို မဖြစ်မနေလုပ်တော့မယ်၊ အတင်းအကျပ် စစ်‌ရေး၊ နိုင်ငံ‌ရေး ထူထောင်တယ်။ လူတွေကို ကိုယ့်ရဲ့ဝါဒအောက် အတင်းသွပ်သွင်းတာမျိုးက ရေရှည်မှာတော့ ကောင်းမွန်တဲ့ရလဒ် ထွက်စရာတော့ အကြောင်းမရှိဘူး။ အဲတော့ လူထုကို တကယ်တမ်း ဗဟိုပြုနိုင်မယ်ဆိုရင် အောက်ခြေလူထုမှာ ဘာပြဿနာရှိလဲ၊ သူတို့ပြဿနာတွေ ဘယ်လို ဖြေရှင်းလဲ။ ခုနပြောတဲ့ ဆွေးနွေးပွဲတွေကလည်း အဲဒီပြည်သူလူထုအတွက် ဘယ်လိုမျိုး အာမခံချက်ပေးလဲ၊ အနည်းဆုံးတော့ ငြိမ်းငြိမ်းချမ်းချမ်းနဲ့ အေးအေးဆေးဆေး စားသောက်နေထိုင်တယ်။ စီးပွားရေး တိုးတက်အောင်၊ ပြေလည်အောင်၊ အဲကနေ ဖွံ့ဖြိုးတိုးတက်မှုတွေ ရလာအောင် အဲလိုမျိုး ရည်ရွယ်ချက်တွေကို ဦးတည်တဲ့ ဆွေးနွေး ပွဲမျိုး လုပ်ဆောင်မှုမျိုးဆိုရင်တော့ ပိုကောင်းတာပေါ့။ အဲတော့ သေချာတာကတော့ ပြည်သူလူထုကို ဦးတည်ရ မယ့် အပိုင်းကတော့ မဖြစ်မနေ လုပ်ရမယ့် အပိုင်းဖြစ်တယ်"ဟု ပြောသည်။

လက်ရှိ မြန်မာနိုင်ငံတွင် ၁၉၄၈ ခုနှစ်၊ လွတ်လပ်ရေးရပြီးနောက်ပိုင်းမှ စတင်ကာ ယနေ့အချိန်ထိ လက်နက်ကိုင် ပဋိပက္ခများ ဖြစ်ပွားနေပြီး ဖြေရှင်းနိုင်သည့် နည်းလမ်းများ မရှာဖွေနိုင်သေးဘဲ ဖြစ်နေသည်။