CNI Interview

၂၀၂၂ ခုနှစ်၊ သြဂုတ် ၃၀

ဦးသိန်းစိန် အစိုးရလက်ထက် ၂၀၁၁ ခုနှစ်၊ ဩဂုတ် ၁၁ ရက်မှာ တိုင်းရင်းသားလက်နက်ကိုင် အဖွဲ့အစည်းများကို ငြိမ်းချမ်းရေး ကမ်းလှမ်းခဲ့သည်မှာ ယခုဆို ၁၁ နှစ်ပြည့်ပြီ ဖြစ်သည်။ ထို့နောက် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA)ကို တိုင်းရင်းသား လက်နက်ကိုင် အဖွဲ့အစည်း (၁၀)ဖွဲ့ လက်မှတ်ရေးထိုးနိုင်ခဲ့ သည်။

သို့သော်လည်း ၂၀၂၁ ခုနှစ်၊ ဖေဖော်ဝါရီ ၁ ရက်တွင် တပ်မ‌တော်မှ အာဏာရယူပြီးနောက် ငြိမ်းချမ်းရေးလုပ်ငန်းစဉ် အကောင်အထည်ဖော်မှုများ နှေးကွေးသွားခဲ့ပြီး NCA စာချုပ်မှာလည်း ပျက်ပြယ်ပြီဟု သုံးသပ်မှုများလည်း ရှိလာ ကြသည်။ 

ထိုအခြေအနေများနှင့် ပတ်သက်ပြီး PPST မှ ပြောခွင့်ရပုဂ္ဂိုလ် ဗိုလ်မှူးကြီးစောကျော်ညွန့်ကို CNI သတင်း ဌာနက ဆက်သွယ် မေးမြန်းထားပါသည်။

 မေး ။         ။ ဦးသိန်းစိန် အစိုးရကနေပြီးတော့ ငြိမ်းချမ်းရေးဆွေးနွေးဖို့ ဒီတိုင်းရင်းသား လက်နက်ကိုင် အဖွဲ့ အစည်းကို ကမ်းလှမ်းခဲ့တာ အခုဆိုရင်တော့ ၁၁ နှစ်ပြည့်ပြီပေါ့လေ။ ဒီ ၁၁ နှစ်အတွင်းမှာ ဒီငြိမ်းချမ်းရေး လုပ်ငန်းစဉ်တွေ ဘယ်လောက်ထိ တိုးတက်ခဲ့လဲ ဘယ်အတိုင်းအတာထိ လုပ်ဆောင်နိုင်ခဲ့လဲပေါ့။ ဒီဟာလေးနဲ့ ပတ်သက်ပြီးတော့ သိလိုပါတယ်ဗျ။

 ဖြေ ။         ။ ဒီဥစ္စာ ဖြစ်စဉ်ပြန်ပြောမယ်ဆိုရင်တော့ တော်တော်လေး ကြီးမားကျယ်ပြန့်ပါတယ်။

ဦးသိန်းစိန် ကမ်းလှမ်းခဲ့တာကလည်း ဟိုး ၂၀၁၁ ကစပြီးတော့လေ ၂၀၁၁ ကစပြီးတော့ ကမ်းလှမ်းတယ်။ ကမ်း လှမ်းပြီးတော့လည်း တိုင်းရင်းသား လက်နက်ကိုင် အဖွဲ့အစည်းတွေ တော်တော်များများ bilateral ceasefire agreement ပေါ့လေ၊ ပဏာမ အပစ်ရပ်စာချုပ် သဘောတူ လက်မှတ်ရေးထိုးခဲ့တယ်။

တချို့ အဖွဲ့တွေလည်း စာချုပ်တစ်ခု နှစ်ခု တစ်ချို့အဖွဲ့တွေလည်း စာချုပ် ၄ , ၅ ခုလောက်ဖြစ်ပြီးတော့ နောက်ဆုံး ပေါ့လေ၊ ဒီ တစ်နိုင်ငံလုံး အပစ်အခတ်ရပ်စဲဖို့ သဘောတူစာချုပ်(NCA) လက်မှတ်ရေးထိုးနိုင်တဲ့ အဆင့်အထိ ပေါ့လေ၊ လုပ်ဆောင်နိုင်ခဲ့တဲ့ ဖြစ်စဉ် တလျှေက်လုံးမှာကတော့ အချိန် အတိုင်းအတာအရလည်း တော်တော်လေး ကျယ်ပြန့်တဲ့ အခါကျတော့လေ အဲ့ဒါကို ပြန်ပြောမယ်ဆိုရင်တော့ တော်တော်လေး ကျယ်ကျယ်ပြန့်ပြန့် ရှိသလို ဒါပြောရမယ့် အချက်အလက်တွေလည်း အများကြီးရှိမှာ ဖြစ်ပါတယ်။

ဦးသိန်းစိန် လက်ထက် ၂၀၁၅ ခုနှစ်၊ အောက်တိုဘာ ၁၅ ရက်က NCA လက်မှတ်ရေးထိုးကြစဉ်

ပြီးတော့လည်း ဆရာတို့ သိတဲ့အတိုင်းပဲ ကျနော်တို့ ၂၀၁၅ မှာ ဦးသိန်းစိန် အစိုးရကနေ စတင် ဖိတ်ခေါ်တဲ့ ငြိမ်းချမ်းရေးရဲ့ နောက်အဆင့်ပေါ့လေ၊ NCA လက်မှတ်ရေးထိုးနိုင်ခဲ့တယ်။ NCA လက်မှတ် ရေးထိုးခဲ့ပြီးတော့ NCA လက်မှတ်ရေးထိုးတာကလည်း ၂၀၁၅ အောက်တိုဘာလ ဆိုတော့လေ၊ ဆရာတို့ သိတဲ့အတိုင်း ၂၀၁၅ ရွေးကောက် ပွဲမှာ ဦးသိန်းစိန်ရဲ့အစိုးရကလည်း နေရာမရတော့တဲ့ အခါကျတော့ ကျနော်တို့က NCA ကိုတော့ ဦးသိန်းစိန် အစိုးရ လက်ထက်မှာ ကျနော်တို့ လက်မှတ်ရေးထိုးခဲ့တယ်။

သို့သော်လည်းပဲ NCA ကို အကောင်အထည်ဖော်တဲ့ ငြိမ်းချမ်းရေးဖြစ်စဉ် လုပ်တဲ့အခါကျတော့ အစိုးရအသစ် လက်ထက်မှာလည်း ကျနော်တို့ ၅ နှစ်တိုင်တိုင် လုပ်ခဲ့တာလည်း ရှိတာပေါ့။ သို့သော်လည်းပဲ ဆရာတို့သိတဲ့ အတိုင်းပဲ ကျနော်တို့ ဒါအားရ ကျေနပ်လောက်တဲ့ရလဒ် ထွက်လာနိုင်အောင်တော့ ကျနော်တို့ လုပ်ဆောင် နိုင်စွမ်း မရှိပါဘူး။ ဒါတွေကလည်း အစိုးရ အပြောင်းအလဲကြောင့်လည်း ဖြစ်ကောင်းဖြစ်နိုင်တယ်။

ပြီးတော့လည်း တိုင်းရင်းသား လက်နက်ကိုင် အဖွဲ့အစည်းတွေ အားလုံးပေါ့လေ၊ ဒီ NCA လမ်းကြောင်းကနေ ဖော်ဆောင်တဲ့ ငြိမ်းချမ်းရေး ဖြစ်စဉ်ထဲမှာ အကုန်လုံး မပါဝင်နိုင်ခဲ့တဲ့ အကျိုးကျေးဇူးလည်း ဖြစ်ပါတယ်။

ဘယ်လိုပဲဖြစ်ဖြစ် နောက်ဆုံး ချုပ်လိုက်တဲ့ အခါကျတော့ ဒီ ၂၀၂၁ အာဏာသိမ်းတယ်လို့ပဲ ပြောမလား ထိန်း တယ်လို့ပဲပြောမလား အဲ့ဒီကနေစပြီးတော့ ဒီအာဏာသိမ်းမှုဖြစ်ပေါ်ပြီး နောက်ပိုင်းမှာဆိုရင်တော့ ဒီ ဦးသိန်းစိန် အစိုးရလက်ထက်က အစပြုပြီးတော့ ဒီအစိုးရလက်ထက်မှာ အကောင်အထည်ဖော်ခဲ့တဲ့ ငြိမ်းချမ်းရေး ဖြစ်စဉ် ပေါ့လေ၊ NCA လမ်းကြောင်းကနေ လုပ်ခဲ့တဲ့ ဒီကြိုးပမ်းမှုတွေ အားလုံးကလည်း ပျောက်ကွယ်သွားတာ ဆရာတို့ အားလုံး သိတဲ့အတိုင်းပါပဲ တစ်နှစ်ရှိသွားပြီ။

မေး ။        ။ NCA လက်မှတ် ထိုးပြီးနောက်ပိုင်းမှာပေါ့လေ၊ တိုက်ပွဲ အရေအတွက် ဘယ်လို ကွာခြားသွားသလဲ။ ဥပမာ ကရင်ဘက်မှာဆိုရင်တော့ KNU တို့ဖြစ်တဲ့ တိုက်ပွဲတွေဟာ NCA မထိုးခင်နဲ့ NCA ထိုးပြီးတဲ့ နောက်ပိုင်း နောက်လူထုတွေရဲ့ တိုက်ပွဲရှောင် အနေအထား ဒီဟာတွေရော ဘယ်လိုကွာခြားမှုရှိလဲဗျ။ 

ဖြေ ။       ။ ဒါကတော့လည်း ဒါပုံမှန် အနေအထား မဟုတ်တဲ့ နိုင်ငံရေး အခင်းအကျင်း တစ်ခုအောက်မှာ ကျနော် တို့ အကုန်လုံး ရင်ဆိုင်ကြုံတွေ့နေကြတဲ့အခါမှာ ဒါသတိရှိစရာပေါ့လေ။ အဲ့ဒါတွေကတော့ အမျိုးမျိုးရှိကြမှာပါ။ လက်နက်ကိုင်တိုက်ပွဲ ဆိုတာကလည်းပဲ ဒီ NCA အကောင်အထည်ဖော်ဖို့ ကာလမှာကတော့ ကျနော်တို့ ဒါတော် တော်လေး တစ်နိုင်ငံလုံး အတိုင်းအတာနဲ့ကြည့်မယ်ဆိုရင် ဒီ ရခိုင်ကလွဲလို့ ပြည်ထောင်စု  တစ်ဝှမ်းလုံး ကျန်တဲ့ နေရာတွေက တော်တော်များများမှာ ပစ်ခတ်တိုက်ခတ်မှုတွေ မဖြစ်အောင် ထိန်းထိန်းသိမ်းသိမ်းနဲ့ လုပ်နိုင်ခဲ့တဲ့ အားသာချက်တွေလည်း အများကြီး ကျနော်တို့ သိရှိခဲ့ရတာပေါ့။

KNU ခေါင်းဆောင် ဗိုလ်ချုပ်ကြီးစောမူတူးစေးဖိုးနဲ့ ဗိုလ်ချုပ်မှူးကြီးမင်းအောင်လှိုင်

သို့သော်လည်းပဲ ဒီစစ်အာဏာသိမ်းပြီးတဲ့ နောက်ပိုင်းမှာကတော့ NCA အကောင်အထည်ဖော်မှုတွေလည်း ရပ်တန့် သွားခဲ့သလို ဒါနေရာ ဒေသ တော်တော်များများမှာ အရင်တုန်းက ဒီပစ်ခတ်တိုက်ခတ်မှုတွေ မရှိတဲ့ တိုင်းရင်းသား လက်နက်ကိုင် နယ်မြေတစ်ချို့မှာလည်း ပစ်ခတ်တိုက်ခိုက်မှုတွေ ပြန်ရှိလာသလို ကျနော်တို့နိုင်ငံမှာ ဘယ်လိုမှ ဘယ်ခေတ်ဘယ်အခါမှ ကျနော်တို့ မမျှော်မှန်းထားခဲ့တဲ့ ဒီနေရာဒေသ တစ်ချို့မှာ လက်နက်ကိုင် အင်အားစုတွေ လည်း အသစ် ထပ်မံ ပေါ်ပေါက်လာပြီးတော့ ကျနော်တို့ အရင်တုန်းက တိတ်တိတ်ဆိတ်ဆိတ် အဝင်အထွက် ရှိခဲ့ တဲ့ နေရာဒေသ တော်တော်များများမှာလည်း ပစ်ခတ်တိုက်ခတ်မှုတွေက နေ့စဉ်ဓူဝ ကျနော်တို့ ကြားသိခဲ့ရတယ်။

ဒါဘယ်လိုပဲ ဖြစ်ဖြစ်ပေါ့လေ ချုပ်ပြီးတော့ ပြောလိုက်မယ်ဆိုရင်တော့ NCA အကောင်အထည်ဖော်မှု ကာလမှာ ဆို ရင် NCA ကို တိုင်းရင်းသား လက်နက်ကိုင် အဖွဲ့အားလုံး မထိုးနိုင်ခဲ့ပေမယ့် NCA အကောင်အထည် ဖော်မှုကာလ တစ်လျှောက်မှာတော့ ကျနော်တို့ တစ်နိုင်ငံလုံး အတိုင်းအတာနဲ့ ကြည့်မယ်ဆိုရင် တော်တော်လေး အားရ ကျေနပ် စရာ ကောင်းလောက်အောင် ပစ်ခတ်တိုက်ခတ်မှုတွေ မရှိအောင် ကျနော်တို့ ထိန်းထိန်းသိမ်းသိမ်း လုပ်နိုင်ခဲ့တယ်။

သို့သော် စစ်အာဏာသိမ်းမှု နောက်ပိုင်း ကျနော်တို့ NCA ကနေ လုပ်ဆောင်နေတဲ့ ငြိမ်းချမ်းရေး ဖြစ်စဉ် ရပ်တန့်တဲ့ အချိန်ကစပြီးတော့ ပစ်ခတ်တိုက်ခတ်မှုတွေက ဆရာတို့ သိရှိရတဲ့အတိုင်းပဲ ကနေ့ထိကတော့ ကျနော်တို့ နေရာ ဒေသ တော်တော်များများမှာ ပြန်လည်ပြီး ဖြစ်ပေါ်လာတာမျိုး တွေ့မြင်ရတယ်ဆိုတာကတော့ ဒါသိရှိပြီး ဖြစ်ပါတယ်။

 

မေး ။          ။ ဟုတ်ကဲ့ပါ။ အခု ဒီ NCA က ဘယ်လိုမျိုး အနေအထား ဖြစ်နေလဲ။ တချို့ကျတော့လည်း ဒီ စစ်တပ် အာဏာယူလိုက်တဲ့အတွက် NCA က ပျက်သွားပြီ ဆိုပြီးတော့ ပြောနေတာလည်း ရှိတယ်ပေါ့လေ။ EAOs ထဲမှာ လည်း တချို့အဖွဲ့တွေက NCA ကတော့ အလုပ်မဖြစ်တော့ဘူးဆိုပြီး ပြောနေတာလည်း တွေ့နေရလို့လေ။

ဖြေ ။         ။ မှန်ပါတယ်ခင်ဗျ။ ခုနက ကျနော်ပြောသလိုပါပဲ ကျနော်တို့နိုင်ငံက ပုံမှန် အနေအထား မဟုတ်တဲ့ အခင်းအကျင်းတစ်ခုကို ကျနော်တို့ ဖြတ်သန်းနေရတဲ့အချိန်မှာ ကျနော်တို့ ဒီ နိုင်ငံရေး အင်အားစုကြားထဲမှာပဲ ဖြစ်ဖြစ်ပေါ့လေ၊ တိုင်းရင်းသားလက်နက်ကိုင် အဖွဲ့အစည်း ကြားထဲမှာပဲဖြစ်ဖြစ် ယုတ်စွအဆုံး ဆရာရယ် ကျနော် တို့ တိုင်းရင်းသား လက်နက်ကိုင်အဖွဲ့အစည်း တစ်ဖွဲ့အချင်း ကြားထဲမှာပဲဖြစ်ဖြစ် အဲ့လိုမျိုး အမြင်မတူတာတွေ သဘောထား မတိုက်ဆိုင်တာတွေ၊ သဘောထား ကွဲတာတွေ ဆိုတာက ဒါရှိနေနိုင်တယ်၊ ရှိလည်း ရှိနေတယ်။

အဲ့ဒါတွေကလည်း သတိထားစရာ ဖြစ်တဲ့အတွက်ကြောင့်မလို့ ဒါကျနော်တို့ အနေနဲ့ လက်ခံပေးရမှာ ဖြစ်တယ် ခင်ဗျ။ သို့သော်လည်းပဲ ခုနက ဆရာပြောတဲ့ ဒီ NCA နဲ့ပတ်သတ်ပြီးတော့ ခုနက ပြောသလို ပုံမှန် အနေအထား မဟုတ်တဲ့ အခင်းအကျင်း အောက်မှာတော့ အမြင်တွေကတော့ အမျိုးမျိုးရှိတတ်မှာ ဖြစ်ကြပါတယ်။

၂၀၂၂ ခုနှစ်၊ သြဂုတ် ၁၇ ရက်က ဗိုလ်ချုပ်မှူးကြီးမင်းအောင်လှိုင်နဲ့ ကုလကိုယ်စားလှယ် နိုလင်းဟေဇာ တွေ့ဆုံစဉ်

သေချာတာကတော့ NCA ပျက်ခြင်း မပျက်ခြင်းထက် ကျနော်တို့ ပြောတာထက်ပေါ့လေ၊ NCA ကနေ လုပ်ဆောင် နေတဲ့ ငြိမ်းချမ်းရေး ကြိုးပမ်းမှု ဖြစ်စဉ်လို့ပဲ ပြောရမလား ငြိမ်းချမ်းရေးဆွေးနွေးပွဲ ဖြစ်စဉ်လို့ပဲ ပြောရမလား ဒါတွေ ကတော့ လုံးဝ ရပ်တန့် သွားတယ်ဆိုတာကတော့ ဒါ ပကတိအရှိတရားပဲ ဖြစ်ပါတယ်ခင်ဗျ။ 

မေး ။          ။ အခုငြိမ်းချမ်းရေး ဆွေးနွေးပွဲနဲ့ပတ်သက်ပြီးတော့ ဘယ်လို အနေအထား ဖြစ်နေလဲခင်ဗျ။ 

ဖြေ ။          ။ ပြီးခဲ့တဲ့ NCA အခင်းအကျင်းအရတော့ အင်မတန်မှ ကွာခြားပါတယ်။ NCA ဖြစ်တုန်းကတော့ ကျနော်တို့ ဒါက ငြိမ်းချမ်းရေးဆွေးနွေးပွဲတွေ လုပ်နိုင်ဖို့အတွက် ကျနော်တို့ ဒါပဏာမစာချုပ်တွေ လက်မှတ် ထိုးတယ်။ ပြီးတော့ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် ချုပ်ပြီးတော့ ပစ်ခတ်တိုက်ခတ် မှုတွေ မဖြစ်အောင် ကျနော်တို့ နှစ်ဖက် ထိန်းထိန်းသိမ်းသိမ်း လုပ်ကြတယ်။

အဲ့လို တည်ငြိမ်တဲ့ အခြေအနေ တစ်ခုရှိမှလည်းပဲ ကျနော်တို့ကတော့ ဒီနိုင်ငံရေးဆွေးနွေးပွဲကို ကျနော်တို့က စိတ်အေးလက်အေးနဲ့ ထိထိရောက်ရောက် လုပ်ကိုင်ဆောင်ရွက်လို့ရမှာ ဖြစ်တယ်။ ဒါကတော့ ပြီးခဲ့တဲ့ NCA ကာလတုန်းက ကျနော်တို့ လုပ်ခဲ့တဲ့ အစီအစဉ် ဖြစ်ပါတယ်။ သို့သော်လည်းပဲ ကနေ့ဆိုရင် ဆရာတို့အားလုံး သိတဲ့အတိုင်းပဲ ပြီးခဲ့တဲ့ ဇွန်လ ကတည်းက စပြီးတော့ပေါ့လေ ကျနော်တို့ ဒီ ငြိမ်းချမ်းရေးအတွက် ဆိုပြီးတော့ တစ်ဖွဲ့ချင်းစီကို ပြန်ပြီးတော့ ဖိတ်ခေါ်တာ ရှိတယ်။ တစ်ဖွဲ့ချင်းစီ သွားရောက်တွေ့ဆုံမှုတွေလည်း ရှိတယ်။

အခုကလည်းပဲ ဒီ နိုလင်းဟေဇာ လာတဲ့ ရက်မှာလည်းပဲ အခုဆိုရင် သွားပြီးသား တိုင်းရင်းသား လက်နက်ကိုင် အဖွဲ့အစည်း ၁၀ ဖွဲ့ထဲက ဆွေးနွေးကြမယ် အဲ့လိုမျိူးပေါ့လေ၊ ကျနော်တို့ လိုချင်တာကတော့ ဒါတစ်ဖွဲ့ချင်းစီက ကျနော်တို့ သွားခဲ့ပြီးပြီ။

ဒါ ကျနော်တို့ သွားပြီးသား အဖွဲ့တွေကနေပြီးတော့ အဲ့လိုတစ်ဖွဲ့ချင်းစီ မဟုတ်ဘဲနဲ့ စုပြီးတော့ သွားနိုင်တဲ့ အခင်းအကျင်းကိုလည်း ကျနော်တို့ တောင်းဆိုခဲ့တယ်။ သို့သော်လည်း ၇ ဖွဲ့လုံး ၁၀ ဖွဲ့စလုံး သွားနိုင်တဲ့ အခင်းအကျင်းတော့ ကျနော်တို့ မလုပ်နိုင်သေးဘူး။

လောလောဆယ်ကတော့ ဒီ ၃ ဖွဲ့ပေါ့လေ ပြန်လည်ပြီးတော့ ဒီ ၂၁, ၂၂, ၂၃ အဲ့ရက်တွေမှာပေါ့လေ ဒါဒုတိယအကြိမ် ပေါ့လေ၊ လှမ်းဖိတ်ထားတာ ရှိတယ်ဗျ။ အခုဆိုရင် ဒုတိယအကြိမ် ပထမဆုံးအနေနဲ့ ကတော့ PNLO၊ ALP၊ LDU ရယ် အဲ့ဒီ ၃ ဖွဲ့ကနေပြီးတော့ စုပြီးတော့ ငြိမ်းချမ်းရေးအတွက် ဆွေးနွေးဖို့ဆိုပြီးတော့ ပြန်လည် ဖိတ်ခေါ်ထားတာ ကို တွေ့ရတယ်ခင်ဗျ။ ကျန်တဲ့ အဖွဲ့တွေ ကျတော့လည်း ဘယ်လိုဆက်ပြီးတော့ အကြောင်းကြား လာမယ်ဆိုတာ တော့ ကျနော်တို့ မသိရသေးဘူး။

၂၀၂၂ ခုနှစ်၊ သြဂုတ် ၂၂ ရက်က ဗိုလ်ချုပ်မှူးကြီးမင်းအောင်လှိုင်နဲ့ PNLO၊ ALP၊ LDU ခေါင်းဆောင်များ တွေ့ဆုံစဉ်

မေး ။          ။ ဒီဟာကျတော့ရော ဒီ PPST ထဲမှာ ဘယ်လို အကြောင်းအရာတွေ ဆွေးနွေးမယ်ဆိုပြီးတော့ ညှိနှိုင်း တိုင်ပင်တာမျိုးရော ရှိကြပါသလဲ။

ဖြေ ။          ။ ဟုတ်တယ်။ ဆရာပြောတာ မှန်ပါတယ်။ ကျနော်တို့ PPST အနေနဲ့ကတော့ ကိုယ့်တစ်ဖွဲ့ချင်းစီ သွား ရောက် တွေ့ဆုံတဲ့အချိန် ပြီးကတည်းကိုက ကျနော်တို့ တစ်ဖွဲ့ချင်းစီ စုပေါင်းပြီး တွေ့နိုင်အောင် ကျနော်တို့ တောင်းဆိုတယ်။ အဲ့လို စုပေါင်းတွေ့နိုင်တဲ့ အခင်းအကျင်းကို သဘောတူလာတဲ့ အခါကျရင် ဘာတွေ ဆွေးနွေး မလဲ ဆိုတာကိုလည်း နှစ်ဖက်ညှိနှိုင်းပြီးတော့ လုပ်ချင်တယ်။

ညှိနှိုင်းလို့ရတဲ့ အချက်အလက် အကြောင်းအရာတွေ အပေါ်မှာ တကယ်လို့ သွားဆွေးနွေးနိုင်တဲ့ရက် ရောက်ခါနီး ပေါ့လေ ကျနော်တို့ PPST အနေနဲ့လည်း ညှိနှိုင်းတိုင်ပင် ဆွေးနွေးမှုတွေ လုပ်ပြီးတော့ ဒါအကောင်းဆုံး ကြိုးပမ်း ဆောင်ရွက်သွားဖို့ ကျနော်တို့ စဉ်းစားချက်တွေ ရှိပါတယ်။

သို့သော်လည်းပဲ အခုဖြစ်နေတဲ့ အခင်းအကျင်း အရဆိုရင် ကျနော်တို့က ဒါ ၃ ဖွဲ့ကိုတော့ ဖိတ်လိုက်တဲ့ အကြောင်း ကြားစာအရ ကြည့်လိုက်မယ်ဆိုရင် ဒါတော်တော်လေး အကြောင်းအရာတွေက ကျယ်ပြန့်တယ်လို့ ပြောလို့ရ တယ်။

ပြီးခဲ့တဲ့ ဒီပြည်ထောင်စုသဘောတူစာချုပ် ဒီအစိတ်အပိုင်း ၁၊ ၂၊ ၃ အပေါ်မှာ ဖွဲ့စည်းပုံအခြေခံဥပဒေကို ဘယ်လို ပြင်ဆင်နိုင်မလဲဆိုပြီးတော့ အဲ့လိုမျိုး ဆွေးနွေးတဲ့ အချက်လည်း ပါမှာဖြစ်သလို နောက်ပြီးတော့ နောက်ဆုံး ချုပ်ဆိုခဲ့တဲ့ ပြည်ထောင်စု သဘောတူစာချုပ် အစိတ်အပိုင်း ၄ မှာပါတဲ့ ၂၀၂၀ အလွန် အကောင်အထည်ဖော်မယ့် လုပ်ငန်းစဉ်တွေကိုလည်းပဲ ချိတ်ဆက် ဘယ်လို အကောင်အထည် ဖော်ဆောင်ရွက်နိုင်မလဲဆိုတာကို ညှိနှိုင်း ဆွေးနွေးဖို့  အဲ့ဒီ ကိစ္စရပ်တွေလည်း ဆွေးနွေးမှာ ဖြစ်တယ်။

တော်တော်လေး ကျယ်ပြန့်တယ်လို့ ပြောလို့ရပါတယ် ခင်ဗျ။ ပွင့်ပွင့်လင်းလင်း ပြောရမယ်ဆိုရင်တော့ PPST အနေနဲ့လည်း ဖိတ်တာမဟုတ်ဘူး။ တစ်ဖွဲ့ချင်းစီလည်း မဟုတ်ဘူး။ PPST နဲ့ တစ်ဖွဲ့ချင်းစီ ကြားထဲမှာ အဲ့လိုမျိုး  သုံးဖွဲ့ကို ဖိတ်ပြီးတော့ သွားတဲ့ အခင်းအကျင်း ဖြစ်တဲ့အတွက်ကြောင့်မလို့ ဒါပြီးတော့လည်း နှစ်ဖက် ကြိုတင် ညှိနှိုင်းပြီးတော့လည်း ဖိတ်လိုက် အကြောင်းကြားလိုက်တဲ့ အခင်းအကျင်း မဟုတ်တဲ့ အတွက်ကြောင့်မလို့ ဒီကိစ္စနဲ့ ပတ်သက်ပြီးတော့ PPST ကြားထဲမှာပေါ့လေ၊ သွားမယ့် အဖွဲ့အစည်းတွေအတွက် ဘယ်လိုညှိနှိုင်းဆွေးနွေးမှုတွေ လုပ်မလဲဆိုတာကို ကြိုတင်ပြီးတော့ ပြောဆိုတာတို့၊ တိုင်ပင်ဆွေးနွေးတာတို့၊ ကျနော်တို့ မလုပ်နိုင်လောက်ဘူး ခင်ဗျ။

၂၀၂၂ ခုနှစ်၊ သြဂုတ် ၂၉ ရက်က ဗိုလ်ချုပ်မှူးကြီးမင်းအောင်လှိုင်နဲ့ RCSS  ခေါင်းဆောင် ဗိုလ်ချုပ်ကြီး ယွက်စစ် တွေ့ဆုံစဉ်

မေး ။       ။  ဟုတ်ကဲ့ပါ။ အခု နစက ကနေပြီးတော့ PNLO၊ LDU၊ ALP တို့ သုံးဖွဲ့ကို ဖိတ်တယ်။ ဒီအုပ်စုပုံစံ ဖြစ်နေ တာပေါ့လေ။ ဒီဟာနဲ့ပတ်သက်ပြီးတော့ ဗိုလ်မှူးကြီး အနေနဲ့ နောက်ဆုံး ဘာများ ဖြည့်စွက်ပြောကြားလိုသေးလဲ။

ဖြေ ။       ။ ကျနော်တို့ PPST အနေနဲ့ကတော့ ဒါနိုင်ငံရေးပြဿနာကို နိုင်ငံရေး တွေ့ဆုံဆွေးနွေးခြင်းနည်းနဲ့ ဖြေ ရှင်းဖို့ဆိုတာ ကျနော်တို့ NCA အနှစ်သာရအရ ယုံယုံကြည်ကြည်နဲ့ လုပ်လာတဲ့ လုပ်ငန်းဖြစ်သလို ကျနော်တို့ နိုင်ငံ ရဲ့ ပဋိပက္ခ ကြုံတွေ့နေရတဲ့ နိုင်ငံရေး အခက်အခဲကို ကျော်လွှားနိုင်ဖို့ အတွက်ကတော့ ဒီနိုင်ငံရေး အကျပ် အတည်းတွေ ဖြစ်ပေါ်စေတဲ့ နိုင်ငံရေးပြဿနာတွေကို နိုင်ငံရေး တွေ့ဆုံဆွေးနွေးခြင်း နည်းနဲ့ ဖြေရှင်းရမယ်။ အဲ့လိုဖြေရှင်းတဲ့ အခါကျရင်လည်းပဲ ပါဝင်သင့် ပါဝင်ထိုက်သူတွေအားလုံး ပါဝင်လျက် အဓိပ္ပာယ် ပြည့်ဝသော နိုင်ငံရေးဆွေးနွေးပွဲ ဖြစ်မြောက်ဖို့ ဆိုတာကလည်း ကျနော်တို့ လုပ်ဆောင်ရမယ်။ ပြီးခဲ့တဲ့ အချိန်ကတော့ တစ်ဖွဲ့ ချင်းစီ ကျနော်တို့ သွားတွေ့ခဲ့တယ်။  ဆွေးနွေးရေး ဖြစ်မြောက်အောင် ကျနော်တို့ တောင်းဆိုတယ်။ အခင်း အကျင်းတော့ မရောက်နိုင်သေးဘူး။

ဘယ်လိုပဲဖြစ်ပါစေ ဒီနိုင်ငံရေးအခက်အခဲ အကျပ်အတည်းကို ကျော်လွှားနိုင်ဖို့အတွက် ဒီနိုင်ငံရေး ဒီပြဿနာကို ဖြေရှင်းဖို့ဆိုရင် ဒါအားလုံးသိတဲ့ အတိုင်းပါပဲ ဒီလိုမျိုးနိုင်ငံကို ဒီမိုကရေစီ ပြည်ထောင်စု တည်ဆောက်ရမှာ ဖြစ်တဲ့ အတွက်ကြောင့်မလို့ ဖက်ဒရယ်နဲ့သက်ဆိုင်တဲ့ အင်အားစုတွေအားလုံး ဒီမိုကရေစီနဲ့သက်ဆိုင်တဲ့ အင်အားစုတွေ အားလုံး ပူးပေါင်းပါဝင် ဆွေးနွေးညှိနှိုင်းတဲ့ ဒါ နိုင်ငံရေး တွေ့ဆုံဆွေးနွေးပွဲ အခင်းအကျင်းကတော့ PPST အနေနဲ့ ရှိကိုရှိရမယ်လို့ ဆန္ဒရှိပါတယ်။

အဲ့ဒီလိုမျိုး အခင်းအကျင်း ရောက်လာတဲ့ အခါကျမှပဲ ကျနော်တို့ လိုလားတဲ့ ငြိမ်းချမ်းရေး ဆိုတာကိုလည်း ကျနော် တို့ လက်တွေ့ကျကျ အကောင်အထည်ဖော်နိုင်မှာ ဖြစ်တဲ့အတွက်ကြောင့် PPST အနေနဲ့ကတော့ တစ်ဖက်ကနေ ၃ ဖွဲ့အထိကို  မြင်တွေ့ရပြီး နောက်ပိုင်းမှာ ဒါထက်ပိုပြီးတော့ ပူးပေါင်းပါဝင်တာကိုလည်း အသီးသီး ထိထိရောက် ရောက်နဲ့ ဆက်လက်ပြီးတော့ ပူးပေါင်းဆောင်ရွက်သွားဖို့ လုပ်ဆောင်နိုင်မယ်။