CNI News
၂၀၂၄ ခုနှစ်၊ မတ်လ ၁၃
ဒေသတစ်ခုချင်းစီအလိုက် လွတ်မြောက်ရေး လုပ်ဆောင်နေမှုအား မစုစည်းနိုင်ပါက အဆုံးအဖြတ်နှစ် မဖြစ်နိုင်ကြောင်း မြန်မာ့နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
အမျိုးသားညီညွတ်ရေးအစိုးရ (NUG) ပြောဆိုသည့် ယခု ၂၀၂၄ ခုနှစ်တွင် အဆုံးအဖြတ်နှစ် ဖြစ်/မဖြစ်က ၎င်းတို့၏ မဟာဗျူဟာ ဦးတည်ချက်နှင့် တိုက်ခိုက်နိုင်စွမ်းပေါ် မူတည်ကြောင်း ၎င်းက ပြောသည်။
ဦးသန်းစိုးနိုင်က “NUG ကတော့ ၂၀၂၄ ခုနှစ်ကို အဆုံးအသတ်နှစ်လို့ ကြွေးကြော်ပြီးတော့ လှုပ်ရှားနေတာပေါ့ဗျာ၊ အဲဒီလို အကြောင်းအချက်အလက်လေးတွေလည်း တိုးတက်ဖြစ်ပေါ် တိုးပွားမှုတွေလည်း ကျနော်တို့ ခုနက ပြောခဲ့တဲ့အတိုင်း ဘက်အသီးသီးမှာ ပေါ်ထွန်းနေပါတယ်။ ဒါပေမဲ့ NUG ပြောသလို ၂၀၂၄ ခုနှစ်ဟာ အဆုံးအဖြတ် ပေးမယ့် နောက်ဆုံးနှစ် ဖြစ်နိုင်မလား၊ မဖြစ်နိုင်ဘူးလားဆိုတာ ခုနလို ဒေသတစ်ခုချင်းအလိုက် လွတ်မြောက် ရေးတွေ ကြိုးပမ်းနေတဲ့ အင်အားစုတွေကို တစ်စုတစ်စည်းထဲ စုစည်းပြီးတော့ မဟာဗျူဟာ ဦးတည်ချက်နဲ့ စည်းစည်းလုံးလုံး တိုက်ခိုက်နိုင်တဲ့ အနေအထား ရှိ/မရှိ အဲဒီအပေါ်မှာ လုံးပမ်းအားထုတ်မှု ဘယ်လောက်အထိ ထိရောက်တယ်၊ မထိရောက်ဘူးဆိုတဲ့အပေါ် မူတည်တယ်၊ သက္ကရာဇ်တစ်ခုနဲ့ တန်းထိုးပြီးတော့ ဒီနှစ်ကတော့ အဆုံးအဖြတ်နှစ်ဖြစ်တယ်၊ ဘာညာဖြစ်မယ်ဆိုတဲ့ ပြောဆိုချက်တွေကတော့ ကျနော်ကတော့ အဲဒါတွေကတော့ လက်တွေ့ ပကတိအခြေအနေနဲ့ သိပ်မကိုက်သေးဘူးလို့ ကျနော်ကတော့ ပြောချင်ပါတယ်ခင်ဗျ” ဟု ပြောသည်။
TNLA တပ်ဖွဲ့ကို တွေ့ရစဉ်
ယခု ၂၀၂၄ ခုနှစ်ကို မြန်မာ့တပ်မတော်အား အပြီးတိုင်ချေမှုန်းမည့် မှတ်တိုင်နှစ်ဖြစ်ကြောင်း NUG ၏ ဝန်ကြီးချုပ် မန်းဝင်းခိုင်သန်းက ဖေဖော်ဝါရီလအတွင်းက ကျင်းပသည့် ပြည်ထောင်စုလွှတ်တော် အစည်းအဝေးတွင် ပြောကြားသွားသည်။
ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ညီနောင်မဟာမိတ် (TNLA-MNDAA-AA) ၏ ၁၀၂၇ စစ်ဆင်ရေးအတွင်း ရှမ်းပြည်နယ်မြောက်ပိုင်းရှိ မြို့အများစုကို မဟာမိတ်အဖွဲ့များက သိမ်းယူနိုင်ခဲ့သည်။
ထို့နောက် TNLA နှင့် MNDAA တို့သည် ထိန်းချုပ်နယ်မြေများ ရရှိပြီးဖြစ်သလို တရုတ်၏ ကြားဝင်စေ့စပ်မှုကြောင့် မြန်မာ့တပ်မတော်နှင့် အပစ်အခတ်ရပ်စဲခဲ့ကြသည်။
လက်ရှိတွင် NUG နှင့် တိုင်းရင်းသား မဟာမိတ် အဖွဲ့အစည်းအားလုံးမှာ လက်နက်ကိုင်တော်လှန်ရေးနှင့် လူထု တိုက်ပွဲကို ပေါင်းစပ်ပြီး စစ်အာဏာရှင်စနစ် ချုပ်ငြိမ်းရေးကို ကြိုးစားနေကြောင်း၊ မိမိတို့အနေဖြင့် လက်နက်ကိုင် ခုခံတော်လှန်သည့် အဆင့်နှင့် တင်းတိမ်နေ၍မရကြောင်း စစ်ရေးရလဒ်ထွက်ရန် လုပ်ဆောင်ဖို့ လိုအပ်ကြောင်း NUG ၏ ယာယီသမ္မတ ဒူဝါလရှီးလက ပြောကြားထားသည်။
နိုင်ငံရေး အကျပ်အတည်းများကို ကျော်လွှားပြီး ငြိမ်းချမ်းသည့် ပြည်ထောင်စုတစ်ခုကို တည်ဆောက်နိုင်ရေး သက်ဆိုင်သူများ အားလုံးပါဝင်သည့် နိုင်ငံရေးတွေ့ဆုံဆွေးနွေးပွဲ ပြန်လည်ပေါ်ထွန်းရန် လိုအပ်ကြောင်း ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) မှ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။
NUG အဖွဲ့၀င်များကို တွေ့ရစဉ်
၎င်းက “လက်ရှိ နိုင်ငံရေး အကျပ်အတည်းကို ကျော်လွှားပြီးတော့ နောင်လာနောက်သား မျိုးဆက်သစ်တွေ အတွက်ပေါ့လေ၊ အမွေကောင်းတစ်ခုကို ဖြစ်စေနိုင်မယ့် ပြည်ထောင်စုငြိမ်းချမ်းရေးကို ကျနော်တို့ တည်ဆောက် နိုင်မယ်ဆိုတာ ယုံကြည်တဲ့အတွက်ကြောင့်မို့လို့ ကိုယ့်မှာ ရှိသမျှအင်အားနဲ့ ရှိသမျှ စုဖွဲ့မှုနဲ့ ဆက်လက်ပြီးတော့ ကြိုးပမ်းဆောင်ရွက်မှုတွေ ရှိနေတယ်၊ ဆက်လက်ပြီးတော့ ကြိုးပမ်းဆောင်ရွက်ဖို့ ကျနော်တို့ စီစဉ်ဆောင်ရွက် ထားတာ ရှိတယ်။ အဓိကတော့ လက်ရှိ ကျနော်တို့ နိုင်ငံမှာ မကြုံစဖူး ကျနော်တို့ ကြုံတွေ့နေရတဲ့ တစ်နိုင်ငံလုံး အခက်အခဲ အကျပ်အတည်းတွေကို ကျော်လွှားနိုင်ဖို့အတွက် သက်ဆိုင်သူများ အားလုံးပါဝင်တဲ့ နိုင်ငံရေးတွေ့ဆုံ ဆွေးနွေးပွဲ ပြန်လည်ပေါ်ထွန်းလာဖို့ ကျနော်တို့ ဘယ်လိုစတင်ပြီးတော့ လုပ်ဆောင်မလဲ၊ နိုင်ငံတကာတွေက အကူအညီ ပံ့ပိုးမှုတွေကိုရော ကျနော်တို့ ဘယ်လိုချည်းကပ်နိုင်မလဲ ဆိုတာကို အခက်အခဲ အမျိုးမျိုးကြားကနေပဲ ကြိုးပမ်းဆောင်ရွက်နေတယ်ဆိုတာ အကျဉ်းချုပ် အဲဒီလောက်ပဲ ပြောပေးချင်တယ်” ဟု ပြောသည်။
လက်ရှိတွင် ရက္ခိုင့်တပ်တော် (AA)၊ ကချင်လွတ်မြောက်ရေးတပ်မတော် (KIA) တို့သည်လည်း မြန်မာ့တပ်မတော် နှင့် တိုက်ပွဲ အပြင်းအထန် ဖြစ်ပွားလျက်ရှိနေပြီး နယ်မြေထိန်းချုပ်မှုရရှိရေး တိုက်ခိုက်လျက်ရှိနေသည်။
လက်နက်ကိုင်ပဋိပက္ခအတွင်း ပါဝင်ပတ်သက်နေကြသော အဖွဲ့အစည်းများအနေဖြင့် နိုင်ငံရေးပြဿနာအား တွေ့ဆုံဆွေးနွေးပြီး ဖြေရှင်းနိုင်ရေးထက် တစ်ဖက်နှင့် တစ်ဖက် အပြုတ်တိုက်ရေးကိုသာ ဦးတည်နေခြင်းမှာ တိုင်းပြည်ပိုမိုနစ်နာနိုင်ကြောင်း နိုင်ငံရေးသမားများက ပြောသည်။
