CNI News
၂၀၂၃ ခုနှစ်၊ ဇွန်လ ၂
အမျိုးသားညီညွတ်ရေးအစိုးရ (NUG) ၏ ကာကွယ်ရေးဌာနမှ ရန်ကုန်တိုင်းစစ်ဒေသခွဲ တပ်ရင်း/ တပ်ဖွဲ့များ ဖွဲ့စည်းပြီးနောက် ဘာတွေ ဆက်ဖြစ်လာနိုင်လဲဆိုသည့်အပေါ် နိုင်ငံရေးအသိုင်းအဝိုင်းကြား သုံးသပ်မှုများ ရှိလာခဲ့သည်။
တပ်မတော်ကို စစ်နည်းဗျူဟာကျကျ ပိုမိုထိရောက်စွာ တိုက်ခိုက်ချေမှုန်းနိုင်ရန် ပြည်သူ့ကာကွယ်ရေးတပ်ဖွဲ့၊ ရန်ကုန်တိုင်းစစ်ဒေသခွဲ၏ ပထမဆုံး တပ်ရင်းဖြစ်သည့် ၅၁၀၁ ကို ၂၀၂၃ ခုနှစ်၊ ဇွန်လ ၁ ရက်နေ့မှာ စတင်ဖွဲ့စည်း ကြောင်း ကြေညာခဲ့သည်။
ရန်ကုန်တပ်ရင်းကို ဖွဲ့စည်းခဲ့သော်လည်း အခြေခံနယ်မြေ မရှိသည့်အတွက် တိုက်ပွဲဖော်ဆောင်ရန် ခက်ခဲကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။
၎င်းက “ထူးပြီး မဖြစ်ဘူးပေါ့နော်၊ ထူးဖြစ်စရာမရှိဘူး။ သူက ဖွဲ့စည်းပုံကြီး တစ်ခုဖွဲ့လိုက်တယ်ပေါ့နော်၊ တပ်ရင်း ဘယ်လောက်လဲ ၅၁၀၁ လား။ သူက အဲဒီလို တပ်ရင်းဖွဲ့တာပဲရှိတယ်၊ ဖွဲ့တယ်ဆိုတာ ဖွဲ့စည်းပုံအရ တပ်ရင်းမှူးရှိ မယ်၊ ဒုတပ်ရင်းမှူး ရှိမယ်၊ တပ်ခွဲမှူး၊ တပ်စုမှူး ရှိမယ်။ ဒီလိုမျိုး ဖွဲ့စည်းပုံအရသာ ဆောင်ရွက်တာလေ အဲဒီလို ဆောင်ရွက်တဲ့အတွက်ကြောင့် ပိုတောင်မှ အစိုးရက သူတို့ကို ဖမ်းဖို့ ပိုလွယ်သွားတာပေါ့၊ သဘောကတော့ အဖွဲ့ ကွဲလေးတွေ မဟုတ်ဘဲနဲ့ အကြီးကြီး လုပ်လိုက်တဲ့ အတွက်ကြောင့်မို့လို့ တစ်နွယ်ငင် တစ်စင်ပါ အကုန်ဆွဲထုတ်လို့ ရတဲ့ အနေအထားကို ဖြစ်သွားပြီ၊ ကျန်တာကတော့ သူဟာသူ တိုက်ပွဲ ပိုဖြစ်မယ်၊ ဘာဖြစ်မယ် ဒါက ဘာမှ ဖြစ်စရာမရှိဘူးပေါ့နော်၊ ဖြစ်စရာ မရှိဘူးဆိုတာက ပြောရလို့ရှိရင် ဒီလို လုပ်ကြံသတ်ဖြတ်မှု ဒါတွေပဲ ရှိမှာပေါ့၊ ဘယ်လိုမှ ကျနော်တို့လည်း ဒီလုပ်ငန်းတွေ လုပ်လာခဲ့တာ ကျနော်တို့ ပြောရရင်တော့ အနှစ် ၂၀ ပေါ့နော်၊ အနှစ် ၂၀ လောက်လုပ်ခဲ့တာ ဒီလို နေရာမျိုးမှာ အခြေခံနယ်မြေမရှိဘဲ ဘာသွားလုပ်မှာလဲ တကယ်တော့လေ၊ ဘာမှ လုပ် မရဘူး” ဟု ပြောသည်။
လုံခြုံရေးတပ်ဖွဲ့ကို တွေ့ရစဉ်
နိုင်ငံတစ်ဝှမ်း စစ်ဒေသခွဲနယ်မြေ အသီးသီးတွင် တပ်ရင်း/ တပ်ဖွဲ့များ ဖွဲ့စည်းကာ စစ်ရေးလှုပ်ရှားမှုများ စဉ်ဆက် မပြတ် လှုပ်ရှားဆောင်ရွက်နိုင်ရေး လမ်းညွှန်မှုများ ပြုလုပ်လျက်ရှိကြောင်း NUG ၏ ထုတ်ပြန်ချက်တွင် ဖော်ပြ ထားသည်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်က အရပ်သားအစိုးရ အမျိုးသားဒီမိုကရေစီအဖွဲ့ချုပ် (NLD) ကို မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ နိုင်ငံတော် ကို အရေးပေါ် ကြေညာခဲ့သည်။
ထို့နောက် မြန်မာ့တပ်မတော်ကို ပြန်လည်ဖြုတ်ချနိုင်ရေး NUG က ပြည်သူ့ကာကွယ်ရေးတပ်ဖွဲ့ (PDF) ကို ၂၀၂၁ ခုနှစ်၊ မေလ ၅ ရက်နေ့တွင် ဖွဲ့စည်းခဲ့သည်။
NUG အဖွဲ့၀င်များကိုတွေ့ရစဉ်
တော်လှန်ရေးအင်အားစုများကို စနစ်တကျဖြင့် ကျစ်လစ်ရန် လုပ်ဆောင်ခြင်းဟု ယူဆကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။
၎င်းက “ကျနော်ထင်တာကပေါ့လေ စစ်ရေးအမြင်ကို ပြောတာပါ။ ပိုပြီးတော့ စနစ်တကျ ကျစ်လစ်အောင် လုပ် လိုက်တယ်လို့ ယူဆတယ်လေ၊ ဘာဖြစ်လို့လဲဆိုတော့ သူတို့က မကြာခဏ ဖမ်းခံနေရတာတွေ ရှိတယ်လေ၊ အဲဒီ တော့ ဒါတွေဟာ သူတို့က ကျစ်လစ်မှုမရှိလို့ ဒီလို ဖြစ်တယ်လို့ ကြေညာတာလည်း ဖြစ်နိုင်တာပေ့ါ၊ နောက်တစ်ခု က ပိုမိုပြီးတော့ စွမ်းအားကောင်းအောင် လုပ်တယ်လို့ အဲဒီလိုလည်း ဖြစ်နိုင်ပါတယ်။ အဲဒါ ကျနော် ထင်မြင်ချက်ပါ နော်” ဟု ပြောသည်။
ထို့အတူ ရန်ကုန်တပ်ရင်းကို ဖွဲ့စည်းလိုက်ခြင်းကြောင့် ရန်ကုန်တွင် အဖမ်းအဆီးများ၊ အစစ်အဆေးများ ပိုမို လုပ် ဆောင်လာနိုင်ကြောင်း ၎င်းက ပြောသည်။
လက်ရှိတွင် မြန်မာ့တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းအချို့၊ PDF ပူးပေါင်းတပ်တို့ အကြား ကရင်ပြည်နယ်၊ ကယား(ကရင်နီ)ပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့ တွင် တိုက်ပွဲများ ဖြစ်ပွားလျက် ရှိနေသည်။
