CNI International News
ခါတွမ်၊ ဧပြီ ၂၈
အပစ်အခတ်ရပ်စဲရေး သက်တမ်းကုန်ရန် နီးကပ်လာချိန်တွင် ဆူဒန်စစ်တပ်သည် မြို့တော်ခါတွမ် (Khartoum) ရှိ RSF တပ်ဖွဲ့များကို လေကြောင်းတိုက်ခိုက်မှုများ ပြုလုပ်လာခဲ့သည်ဟု Al Jazeera သတင်း၌ ဖော်ပြသည်။
ထို့နောက် ဒါဖာ (Dafur) ဒေသတွင် ပြင်းထန်သော တိုက်ပွဲများ ပေါ်ပေါက်လျက်ရှိသည်။
ကြာသပတေးနေ့တွင် ခါတွမ်ရှိ သမ္မတနန်းတော်အနီးနှင့် မြောက်ပိုင်း ဧရိယာများတွင် လေကြောင်း တိုက်ခိုက် မှုများကြောင့် မီးခိုးများ ထွက်ပေါ်နေသည်ကို မြင်တွေ့ရသည်။
ရန်ဘက်ဖြစ်သော ဆူဒန်စစ်တပ်သည် ကာဖူရီ (Kafouri) ခရိုင်ရှိ ၎င်းတို့၏ စခန်းကို လေကြောင်းမှ တိုက်ခိုက် ခဲ့သည်ဟု RSF တပ်ဖွဲ့က ပြောသည်။
တိုက်ပွဲများကြောင့် သေဆုံးသူ ဦးရေလည်း မြင့်တက်လာသည်ဟု ယူဆရသည်။
ဆူဒန်နိုင်ငံအတွင်း မြို့တွင်း တိုက်ပွဲများကြောင့် ပျက်စီးနေမှုကိုတွေ့ရစဉ်
ဆူဒန်ကျန်းမာရေးဌာန၏ ထုတ်ပြန်ချက်တွင် ၁၃ ရက်ကြာ တိုက်ပွဲများအတွင်း အနည်းဆုံး လူပေါင်း ၅၁၂ ဦး သေဆုံးကာ ၄၁၉၃ ဦးဒဏ်ရာ ရရှိထားသည်ဟု ဖော်ပြထားသော်လည်း အမှန်တကယ် သေဆုံး ထိခိုက်သူ အရေအတွက်မှာ ယခုထက်ပို၍ များနိုင်သည်။
ဆူဒန်ပဋိပက္ခများအတွက် အမေရိကန်မှ ကြားဝင်ဆောင်ရွက်ပေးသော သုံးရက်ကြာ အပစ်အခတ်ရပ်စဲရေး သည် အင်္ဂါနေ့အစောပိုင်းမှ စတင် အသက်ဝင်ခဲ့သော်လည်း တိုက်ပွဲများမှာ ဆက်ဖြစ်နေဆဲ ဖြစ်သည်။
မြို့တော်မြောက်ဘက် အရပ်များတွင် စစ်လေယာဉ်များ ပျံဝဲလျက်ရှိကာ မြေပြင်တွင်လည်း လက်နက်ကိုင် တပ်များသည် လက်နက်ကြီး၊ လက်နက်ငယ်များဖြင့် အပြန်အလှန် ပစ်ခတ်နေကြဆဲ ဖြစ်သည်။
ကြာသပတေးနေ့ နှောင်းပိုင်းတွင် သက်တမ်းကုန်မည့် အပစ်အခတ်ရပ်စဲရေးကို သက်တမ်းတိုရန် အိမ်နီးချင်း တောင်ဆူဒန်မြို့တော် ဂျူဘာ (Juba) တွင် တွေ့ဆုံဆွေးနွေးရေး သဘောတူသည်ဟု ဆူဒန်စစ်တပ်က ပြောသည်။
ယင်းကို အရှေ့အာဖရိကနိုင်ငံများအဖွဲ့နှင့် နိုင်ငံတကာဖွံ့ဖြိုးတိုးတက်မှု အာဏာပိုင်အဖွဲ့ (IGAD) တို့က အဆိုပြုခဲ့ခြင်း ဖြစ်သည်။
ဆူဒန်ပဋိပက္ခသည် ဗိုလ်ချုပ်ကြီး အဗ္ဗဒဲလ် ဖာတက်အယ်လ်-ဘာဟန် (Abdal Fattach al-Burhan) ဆောင် သော စစ်တပ်နှင့် ပြိုင်ဘက်ဗိုလ်ချုပ်ကြီး မိုဟာမက် ဟီမတ်ဒီ ဟမ်ဒမ် ဒတ်ဂလို (Mohamed “Hemedti” Hamdan Daglo) တို့ ဦးဆောင်သော RSF လက်နက်ကိုင်များကြား ဧပြီ ၁၅ ရက်နေ့မှ စတင်ဖြစ်ပွားနေခြင်း ဖြစ်သည်။
ဆူဒန်ကနေ ထွက်ခွာနေကြတဲ့ နိုင်ငံခြားအစိုးရသံတမန်များကိုတွေ့ရစဉ်
ထိုတိုက်ပွဲများ ရပ်တန့်ရေး အပစ်အခတ်ရပ်စဲရေး သဘောတူညီချက်များစွာ ပေါ်ထွက်လာခဲ့သော်လည်း အားလုံးမှာ အောင်မြင်မှု မရခဲ့ပေ။
အယ်လ်ဘာဟန်က အပစ်အခတ်ရပ်စဲရေးကို နောက်ထပ် ၇၂ နာရီ တိုးမြှင့်ရန် IGAD မှ အဆိုပြုသော ဆွေးနွေး ပွဲများအား ဗုဒ္ဓဟူးနေ့တွင် သဘောတူခဲ့သည်ဟု ဆူဒန်စစ်တပ်က ပြောသည်။
ထိုသဘောတူညီချက်နှင့် ပတ်သက်၍ RSF ဘက်က တုန့်ပြန်မှုကိုတော့ ယခုအထိ မသိရသေးပေ။
မြို့တော်ခါတွမ်အပြင် တခြားသော ပြည်နယ်များတွင်လည်း တိုက်ပွဲများ ပေါ်ပေါက်လာလျက်ရှိသည်။
အထူးသဖြင့် စစ်ဘေးဒဏ်သင့် ဒါဖာဒေသတွင် ဖြစ်သည်။
အနောက် ဒါဖာမြို့တော် ဂျီရိုင်နာ (Geneina)မြို့တွင် တိုက်ပွဲများ နှစ်ရက်ဆက်တိုက် ပေါ်ပေါက်ခဲ့ကာ အရပ်သားများအနေဖြင့် အိမ်နီးချင် ချဒ်နိုင်ငံဘက်သို့ ထွက်ပြေးနေရကြောင်း ကိုယ်တိုင် မြင်တွေ့ရသူများက ပြောသည်။
Source:Aljazeera
